ਮਹਾਸਙ੍ਗਾਮਂ

ਵੋਹਰਨ੍ਤੇਨ ਜਾਨਿਤਬ੍ਬਾਦਿਵਣ੍ਣਨਾ

੩੬੮-੭੪. ਮਹਾਸਙ੍ਗਾਮੇ ਏਤੇਨੇਵ ਨਯੇਨ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਵਤ੍ਥੁਸਙ੍ਕਮਨਾਕਾਰਂ ਦਸ੍ਸੇਤ੍ਵਾ ਅਵਜਾਨਨਪਟਿਜਾਨਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਯੋ ਪਨਾ’’ਤਿਆਦਿ. ਯੋ ਪਨ ਵਦਤੀਤਿ ਸਮ੍ਬਨ੍ਧੋ. ਏਸੇਵਾਤਿ ਏਸੋ ਏਵ, ਅਵਜਾਨਨਪਟਿਜਾਨਨਭਿਕ੍ਖੂਤਿ ਅਤ੍ਥੋ.

੩੭੫. ਨੀਲਾਦਿਵਣ੍ਣਾਵਣ੍ਣਵਸੇਨਾਤਿ ਨੀਲਾਦਿਵਣ੍ਣਵਸੇਨ ਚ ਆਰੋਗ੍ਯਤ੍ਥਾਦਿਅਵਣ੍ਣਵਸੇਨ ਚ. ਸਞ੍ਚਰਿਤ੍ਤਂ ਯਸ੍ਮਾ ਅਨੇਨ ਸਿਕ੍ਖਾਪਦੇਨ ਧਨਂ ਅਨੁਪਦੀਯਤਿ, ਤਸ੍ਮਾ ਧਨਮਨੁਪ੍ਪਦਾਨਨ੍ਤਿ ਵੁਚ੍ਚਤਿ. ਪੁਬ੍ਬਪਯੋਗੋਤਿ ਪੁਬ੍ਬੇ ਪਯੁਜ੍ਜਿਤਬ੍ਬੋ.

ਅਗਤਿਅਗਨ੍ਤਬ੍ਬਵਣ੍ਣਨਾ

੩੭੯. ਬਹੁਜਨਅਹਿਤਾਯ ਪਟਿਪਨ੍ਨੋ ਹੋਤੀਤਿ ਪਾਲ਼ਿਂ ਵਿਤ੍ਥਾਰੇਨ੍ਤੋ ਆਹ ‘‘ਵਿਨਯਧਰੇਨ ਹੀ’’ਤਿਆਦਿ. ਤਤ੍ਥ ਵਿਨਯਧਰੇਨਾਤਿ ਅਨੁਵਿਜ੍ਜਕੇਨ, ਵਿਨਿਚ੍ਛਿਤੇਤਿ ਸਮ੍ਬਨ੍ਧੋ. ਓਵਾਦੂਪਜੀਵਿਨਿਯੋਤਿ ਭਿਕ੍ਖੂਨਂ ਓਵਾਦਂ ਉਪਨਿਸ੍ਸਾਯ ਜੀਵਿਨਿਯੋ. ਉਪਾਸਕਾਪੀਤਿ ਰਤਨਤ੍ਤਯਂ ਪਟਿਸ੍ਸਰਣਨ੍ਤਿ ਉਪਾਸਕਾਪਿ. ਦਾਯਕਾਪੀਤਿ ਭਿਕ੍ਖੂਨਂ ਪਚ੍ਚਯਦਾਯਕਾਪਿ. ਤੇਸਨ੍ਤਿ ਉਪਾਸਕਾਦੀਨਂ. ਤਥੇਵਾਤਿ ਯਥਾ ਉਪਾਸਕਾਦਯੋ ਦ੍ਵਿਧਾ ਭਿਜ੍ਜਨ੍ਤਿ, ਤਥੇਵ. ਤਤੋਤਿ ਆਰਕ੍ਖਦੇਵਤਾਹਿ ਪਰਨ੍ਤਿ ਸਮ੍ਬਨ੍ਧੋ. ਤੇਨਾਤਿ ਦ੍ਵਿਧਾਕਾਰਣੇਨ.

੩੮੨. ਗਹਨਨਿਸ੍ਸਿਤੋਤਿ ਏਤ੍ਥ ਗਹਨਸਦ੍ਦੋ ਦਿਟ੍ਠਿਪਰਿਯਾਯੋਤਿ ਆਹ ‘‘ਮਿਚ੍ਛਾਦਿਟ੍ਠਿਅਨ੍ਤਗ੍ਗਾਹਿਕਦਿਟ੍ਠਿਸਙ੍ਖਾਤਂ ਗਹਨ’’ਨ੍ਤਿ.

੩੯੩. ਤਸ੍ਸ ਅਵਜਾਨਨ੍ਤੋਤਿ ਏਤ੍ਥ ‘‘ਤਸ੍ਸਾ’’ਤਿ ਪਦਂ ‘‘ਵਚਨ’’ਨ੍ਤਿ ਪਾਠਸੇਸੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਤਸ੍ਸ ਵਚਨ’’ਨ੍ਤਿ. ਤਸ੍ਸਾਤਿ ਨਵਕਸ੍ਸ. ਤਨ੍ਤਿ ਨਵਕਂ.

੩੯੪. ‘‘ਯਂਅਤ੍ਥਾਯਾ’’ਤਿ ਏਸੋ ਸਦ੍ਦੋ ਸਮਾਸੋਤਿ ਆਹ ‘‘ਯਦਤ੍ਥਾਯਾ’’ਤਿ. ‘‘ਤਂ ਅਤ੍ਥ’’ਨ੍ਤਿ ਏਸੋ ਸਦ੍ਦੋ ਲਿਙ੍ਗਵਿਪਲ੍ਲਾਸੋਤਿ ਆਹ ‘‘ਸੋ ਅਤ੍ਥੋ’’ਤਿ. ਅਤ੍ਥਸਦ੍ਦੋ ਹਿ ਪੁਲ੍ਲਿਙ੍ਗੋ, ਪਾਲ਼ਿਯਂ ਨ ਪਰਿਹਾਪੇਤਬ੍ਬਨ੍ਤਿ ਏਤ੍ਥਾਪਿ ਲਿਙ੍ਗਵਿਪਲ੍ਲਾਸੋ ਵੇਦਿਤਬ੍ਬੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਮਹਾਸਙ੍ਗਾਮੇ.

ਇਤਿ ਮਹਾਸਙ੍ਗਾਮਵਣ੍ਣਨਾਯ ਯੋਜਨਾ ਸਮਤ੍ਤਾ.