ਕਥਿਨਭੇਦਂ

ਕਥਿਨਅਤ੍ਥਤਾਦਿਵਣ੍ਣਨਾ

੪੦੩. ਕਥਿਨੇ ਖਨ੍ਧਕੇਤਿ ਕਥਿਨਕ੍ਖਨ੍ਧਕੇ. ਪੁਬ੍ਬੇਤਿ ਕਥਿਨਕ੍ਖਨ੍ਧਕੇ.

੪੦੪. ਪਯੋਗਸ੍ਸਾਤਿ ਏਤ੍ਥ ਪਯੋਗੋ ਨਾਮ ਕੋਤਿ ਆਹ ‘‘ਚੀਵਰਧੋਵਨਾਦਿਨੋ’’ਤਿਆਦਿ. ਏਤ੍ਥ ਆਦਿਸਦ੍ਦੇਨ ਵਿਚਾਰਣਛੇਦਨਬਦ੍ਧਨਸਿਬ੍ਬਨਰਜਨਕਪ੍ਪਬਿਨ੍ਦੁਆਦਿਯਨਾਨਿ ਛ ਪੁਬ੍ਬਕਰਣਾਨਿ ਸਙ੍ਗਣ੍ਹਾਤਿ. ਉਦਕਾਹਰਣਾਦਿਕੋ ਯੋ ਪਯੋਗੋ ਕਰੀਯਤੀਤਿ ਯੋਜਨਾ. ਅਨਨ੍ਤਰੋ ਨਾਮ ਅਤੀਤਾਨਨ੍ਤਰਅਨਾਗਤਾਨਨ੍ਤਰਵਸੇਨ ਦੁਵਿਧੋ, ਇਧ ਅਨਾਗਤਾਨਨ੍ਤਰੋਯੇਵ ਅਧਿਪ੍ਪੇਤੋਤਿ ਆਹ ‘‘ਅਨਾਗਤਵਸੇਨਾ’’ਤਿ. ਉਦਕਾਹਰਣਾਦਿਪਯੋਗੇ ਹਿ ਉਪ੍ਪਨ੍ਨੇ ਪਚ੍ਛਾ ਧੋਵਨਾਦਿਪੁਬ੍ਬਕਰਣਸ੍ਸ ਉਪ੍ਪਤ੍ਤਿਤੋ ਤਪ੍ਪਯੋਗਸ੍ਸ ਅਨਾਗਤਵਸੇਨੇਵ ਪਚ੍ਚਯੋ. ਸਮਨਨ੍ਤਰਪਚ੍ਚਯੇਨਾਤਿ ਏਤ੍ਥ ਸਂਸਦ੍ਦੋ ਸੁਟ੍ਠੁਅਤ੍ਥੋਤਿ ਆਹ ‘‘ਸੁਟ੍ਠੁ ਅਨਨ੍ਤਰਪਚ੍ਚਯੇਨਾ’’ਤਿ. ‘‘ਆਸਨ੍ਨਤਰ’’ਨ੍ਤਿ ਇਮਿਨਾ ਸੁਟ੍ਠੁਭਾਵਂ ਦਸ੍ਸੇਤਿ. ‘‘ਪਯੋਗਸ੍ਸਾ’’ਤਿ ਪਦਂ ‘‘ਆਧਾਰਭਾਵ’’ਨ੍ਤਿ ਪਦੇ ਸਾਮੀ, ‘‘ਪਚ੍ਚਯਾ ਹੋਨ੍ਤੀ’’ਤਿ ਪਦੇ ਸਮ੍ਪਦਾਨਂ. ‘‘ਨਿਸ੍ਸਯ’’ਨ੍ਤਿ ਪਦਂ ‘‘ਆਧਾਰਭਾਵ’’ਨ੍ਤਿ ਪਦੇਨ ਸਂਵਣ੍ਣੇਤਿ. ‘‘ਉਪੇਤੇਨਾ’’ਤਿ ਇਮਿਨਾ ਉਪਸਦ੍ਦਸ੍ਸ ਉਪਗਮਨਤ੍ਥਂ ਦਸ੍ਸੇਤਿ, ਬਲਵਤ੍ਥਂ ਪਟਿਕ੍ਖਿਪਤਿ. ਪਠਮਨ੍ਤਿ ਪਯੋਗਤੋ, ਪਯੋਗਸ੍ਸ ਵਾ ਤਾਵ. ਇਮਿਨਾ ਪੁਰੇਜਾਤਪਚ੍ਚਯੇਨਾਤਿ ਏਤ੍ਥ ਪੁਰੇਸਦ੍ਦੋ ਪਠਮਤ੍ਥੋਤਿ ਦਸ੍ਸੇਤਿ. ਪਚ੍ਛਾਤਿ ਪਯੋਗਤੋ, ਪਯੋਗਸ੍ਸ ਵਾ ਪਰਂ. ਅਪੁਬ੍ਬਂ ਅਚਰਿਮਨ੍ਤਿ ਏਕਪਹਾਰੇਨ. ਇਮਿਨਾ ਸਹਜਾਤਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ.

ਏਵਂ ਪੁਚ੍ਛਿਤ੍ਵਾਤਿ ਸਮ੍ਬਨ੍ਧੋ. ਯਨ੍ਤਿ ਧਮ੍ਮਜਾਤਂ. ਇਦਾਨਿ ਆਹਾਤਿ ਸਮ੍ਬਨ੍ਧੋ. ਯਸ੍ਸਾਤਿ ਪਯੋਗਾਦਿਕਸ੍ਸ. ਤਦੇਵਾਤਿ ਧਮ੍ਮਜਾਤਮੇਵ. ਤਸ੍ਸਾਤਿ ‘‘ਪੁਬ੍ਬਕਰਣਂ ਪਯੋਗਸ੍ਸਾ’’ਤਿਆਦਿਵਚਨਸ੍ਸ ਅਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ‘‘ਪਯੋਗਸ੍ਸ ਕਤਮੇ ਧਮ੍ਮਾ’’ਤਿਆਦਿ ਯਂ ਵਚਨਂ ਵੁਤ੍ਤਂ, ਤਤ੍ਥ ਵਿਸ੍ਸਜ੍ਜਨਂ ਮਯਾ ਵੁਚ੍ਚਤੇਤਿ ਯੋਜਨਾ. ਇਮਿਨਾ ਪਾਲ਼ਿਯਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਭਾਵਂ ਦਸ੍ਸੇਤਿ. ਚਤੂਹਿ ਪਚ੍ਚਯੇਹਿ ਪਚ੍ਚਯਾਕਾਰਂ ਵਿਤ੍ਥਾਰੇਨ੍ਤੋ ਆਹ ‘‘ਪਯੋਗਸ੍ਸ ਹੀ’’ਤਿਆਦਿ. ਪਯੋਗਸ੍ਸ ਪੁਬ੍ਬਕਰਣਂ ਪਚ੍ਚਯੋ ਹੋਤੀਤਿ ਸਮ੍ਬਨ੍ਧੋ. ਉਦ੍ਦਿਟ੍ਠਧਮ੍ਮੇਸੂਤਿ ‘‘ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿਆਦਿਨਾ ਉਦ੍ਦਿਟ੍ਠੇਸੁ ਧਮ੍ਮੇਸੁ ਪੁਰੇਜਾਤਪਚ੍ਚਯੋ ਪਨੇਸਾਤਿ ਸਮ੍ਬਨ੍ਧੋ. ਅਥ ਵਾ ਉਦ੍ਦਿਟ੍ਠਧਮ੍ਮੇਸੂਤਿ ਪੁਬ੍ਬਕਰਣਵਸੇਨ ਉਦ੍ਦਿਟ੍ਠੇਸੁ ਧੋਵਨਾਦਿਧਮ੍ਮੇਸੁ ਏਕਧਮ੍ਮਮ੍ਪੀਤਿ ਸਮ੍ਬਨ੍ਧੋ. ਨ ਲਭਤੀਤਿ ਉਦਕਾਹਰਣਾਦਿਪਯੋਗਸ੍ਸ ਪੁਬ੍ਬੇ ਨ ਲਭਤਿ. ਅਯਨ੍ਤਿ ਉਦਕਾਹਰਣਾਦਿਪਯੋਗੋ. ਪਚ੍ਛਾਜਾਤਪਚ੍ਚਯਂ ਪਨ ਲਭਤੀਤਿ ਉਦਕਾਹਰਣਾਦਿਪਯੋਗੋ ਪਚ੍ਛਾਜਾਤਪਚ੍ਚਯਂ ਲਭਤਿ. ਕਸ੍ਮਾ ਲਭਤੀਤਿ ਆਹ ‘‘ਪਚ੍ਛਾ ਉਪ੍ਪਜ੍ਜਨਕਸ੍ਸ ਹੀ’’ਤਿਆਦਿ. ਪਚ੍ਛਾਤਿ ਪਯੋਗਸ੍ਸ, ਪਯੋਗਤੋ ਵਾ ਪਰਂ. ਹਿ ਯਸ੍ਮਾ ਕਯਿਰਤਿ, ਤਸ੍ਮਾ ਲਭਤੀਤਿ ਯੋਜਨਾ. ਸਹਜਾਤਪਚ੍ਚਯਂ ਪਨ ਨ ਲਭਤੀਤਿ ਸਮ੍ਬਨ੍ਧੋ. ਮਾਤਿਕਾਪਲਿਬੋਧਾਨਿਸਂਸਸਙ੍ਖਾਤੇਤਿ ਅਟ੍ਠਮਾਤਿਕਾਦ੍ਵੇਪਲਿਬੋਧਪਞ੍ਚਾਨਿਸਂਸਸਙ੍ਖਾਤੇ. ਅਞ੍ਞੋਤਿ ਪਨ੍ਨਰਸਹਿ ਧਮ੍ਮੇਹਿ ਅਞ੍ਞੋ. ਪਯੋਗਾਦੀਸੂਤਿਆਦਿਸਦ੍ਦੇਨ ਪੁਬ੍ਬਕਰਣਪਚ੍ਚੁਦ੍ਧਾਰਅਧਿਟ੍ਠਾਨਾਨਿ ਸਙ੍ਗਣ੍ਹਾਤਿ. ਏਤੇਨੁਪਾਯੇਨਾਤਿ ਏਤੇਨ ਯਥਾਵੁਤ੍ਤਉਪਾਯੇਨ.

ਪੁਬ੍ਬਕਰਣਨਿਦਾਨਾਦਿਵਿਭਾਗਵਣ੍ਣਨਾ

੪੦੬-੭. ਦ੍ਵਿਕ੍ਖਤ੍ਤੁਂ ਪੁਚ੍ਛਿਤਤ੍ਤਾ ‘‘ਪੁਚ੍ਛਾਦ੍ਵਯ’’ਨ੍ਤਿ ਵੁਤ੍ਤਂ. ਹੇਤੁਪਚ੍ਚਯਾਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਛ ਚੀਵਰਾਨੀ’’ਤਿ. ਕਸ੍ਮਾ ਵੇਦਿਤਬ੍ਬਾਨੀਤਿ ਆਹ ‘‘ਪੁਬ੍ਬਪਯੋਗਾਦੀਨਞ੍ਹੀ’’ਤਿਆਦਿ. ਹੀਤਿ ਯਸ੍ਮਾ. ਤਾਨਿਯੇਵਾਤਿ ਛ ਚੀਵਰਾਨਿ ਏਵ. ਏਵਸਦ੍ਦੋ ਪਚ੍ਛਾਪਿ ਯੋਜੇਤਬ੍ਬੋ, ਤਾਨਿ ਏਵਾਤਿ ਅਤ੍ਥੋ. ਹੀਤਿ ਸਚ੍ਚਂ, ਪੁਬ੍ਬਕਰਣਾਦੀਨਿ ਨ ਅਤ੍ਥੀਤਿ ਯੋਜਨਾ.

੪੦੮. ‘‘ਇਮਾਯ ਸਙ੍ਘਾਟਿਯਾ’’ਤਿਆਦਿਨਾ ਵਚੀਭੇਦਾਕਾਰਂ ਦਸ੍ਸੇਤਿ. ਕਥਿਨਤ੍ਥਾਰਕੇਨ ਯਸ੍ਮਾ ਪਚ੍ਚੁਦ੍ਧਾਰੋ ਚ ਅਧਿਟ੍ਠਾਨਞ੍ਚ ਕਰੀਯਤਿ, ਤਸ੍ਮਾ ਕਿਰਿਯਾਤਿ ਵੁਚ੍ਚਤਿ. ਤੇਨ ਵੁਤ੍ਤਂ ‘‘ਪਚ੍ਚੁਦ੍ਧਾਰੋ ਚੇਵ ਅਧਿਟ੍ਠਾਨਞ੍ਚਾ’’ਤਿ.

੪੧੧. ਵਤ੍ਥੁਵਿਪਨ੍ਨਾਦੀਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਅਕਪ੍ਪਿਯਦੁਸ੍ਸਂ ਹੋਤੀ’’ਤਿਆਦਿ. ਵਿਨਾਸਂ, ਵਿਕਾਰਂ ਵਾ ਪਜ੍ਜਤੀਤਿ ਵਿਪਨ੍ਨਂ, ਵਤ੍ਥੁਮੇਵ ਵਿਪਨ੍ਨਂ ਵਤ੍ਥੁਵਿਪਨ੍ਨਂ.

ਕਥਿਨਾਦਿਜਾਨਿਤਬ੍ਬਵਿਭਾਗਵਣ੍ਣਨਾ

੪੧੨. ਤੇਸਞ੍ਞੇਵ ਧਮ੍ਮਾਨਨ੍ਤਿ ਏਤ੍ਥ ਧਮ੍ਮਾਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਯੇਸੁ ਰੂਪਾਦਿਧਮ੍ਮੇਸੂ’’ਤਿ. ਤਤ੍ਥ ਰੂਪਾਦਿਧਮ੍ਮੇਸੂਤਿ ਵਣ੍ਣਗਨ੍ਧਾਦੀਸੁ ਸੁਦ੍ਧਟ੍ਠਕਰੂਪਕਲਾਪਧਮ੍ਮੇਸੁ. ਸਤੀਤਿ ਸਨ੍ਤੇਸੁ. ਤੇਸਨ੍ਤਿ ਰੂਪਾਦੀਨਂ ਧਮ੍ਮਾਨਂ. ‘‘ਸਮੋਧਾਨ’’ਨ੍ਤਿ ਇਮਿਨਾ ਸਙ੍ਗਹੋਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਮਿਸ੍ਸੀਭਾਵੋ’’ਤਿ ਇਮਿਨਾ ਸਮਵਾਯੋਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਅਵਯਵਧਮ੍ਮਾਨਂ ਸਂ ਏਕਭਾਵਸ੍ਸ ਗਹਣਂ ਸਙ੍ਗਹੋ. ਅਵਯਵਧਮ੍ਮਾਨਂ ਸਮਂ ਅਯਨਂ ਪਵਤ੍ਤਨਂ ਸਮਵਾਯੋ. ਬਹੂਸੁ ਧਮ੍ਮੇਸੂਤਿ ਬਹੂਸੁ ਪਰਮਤ੍ਥਪਞ੍ਞਤ੍ਤਿਧਮ੍ਮੇਸੁ. ਨਾਮਮਤ੍ਤਨ੍ਤਿ ਨਾਮਪਞ੍ਞਤ੍ਤਿਮਤ੍ਤਂ. ਪੁਬ੍ਬੇਤਿ ਕਥਿਨਕ੍ਖਨ੍ਧਕੇ.

‘‘ਕਾਰਣੇਹੀ’’ਤਿ ਇਮਿਨਾ ਆਕਾਰਸਦ੍ਦੋ ਕਾਰਣਤ੍ਥੋਤਿ ਦਸ੍ਸੇਤਿ. ਯਨ੍ਤਿ ਵਚਨਂ.

੪੧੬. ਉਪ੍ਪਜ੍ਜਨ੍ਤੀਤਿ ਕਥਿਨੁਦ੍ਧਾਰਾ ਉਪ੍ਪਜ੍ਜਨ੍ਤਿ. ਕਿਨ੍ਤਿ ਕਿਂ ਅਤ੍ਥਜਾਤਂ. ਸਬ੍ਬੇਪਿ ਕਥਿਨੁਦ੍ਧਾਰਾਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤ੍ਥਾਤਿ ਕਥਿਨੁਦ੍ਧਾਰੇਸੁ. ਪੁਰਿਮਾ ਦ੍ਵੇਤਿ ਅਨ੍ਤਰੁਬ੍ਭਾਰਸਹੁਬ੍ਭਾਰਵਸੇਨ ਪੁਰਿਮਾ ਦ੍ਵੇ. ਏਤੇਸਞ੍ਚਾਤਿ ਪੁਰਿਮਾਨਂ ਦ੍ਵਿਨ੍ਨਞ੍ਚ. ਇਤਰੇਤਿ ਅਵਸੇਸਾ ਕਥਿਨੁਦ੍ਧਾਰਾ. ਤੇਸੁਪੀਤਿ ਇਤਰੇਸੁ ਕਥਿਨੁਦ੍ਧਾਰੇਸੁ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਕਥਿਨਵਿਨਿਚ੍ਛਯੇ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਪਞ੍ਞਤ੍ਤਿਵਗ੍ਗਵਣ੍ਣਨਾਯ

ਯੋਜਨਾ ਸਮਤ੍ਤਾ.