ਉਪਾਲਿਪਞ੍ਚਕਂ
ਅਨਿਸ੍ਸਿਤਵਗ੍ਗਵਣ੍ਣਨਾ
੪੧੭. ਉਪਾਲਿਪਞ੍ਹੇਸੁ ‘‘ਕਤਿ ਹਿ ਨੁ ਖੋ ਭਨ੍ਤੇ’’ਤਿ ਪੁਚ੍ਛਾਯ ਸਮ੍ਬਨ੍ਧੋ ਨਤ੍ਥੀਤਿ ਕਸ੍ਸਚਿ ਮਞ੍ਞਨਂ ਨਿਵਾਰੇਨ੍ਤੋ ਆਹ ‘‘ਅਯ ਸਮ੍ਬਨ੍ਧੋ’’ਤਿ. ਥੇਰੋਤਿ ਉਪਾਲਿਤ੍ਥੇਰੋ, ਪੁਚ੍ਛੀਤਿ ਸਮ੍ਬਨ੍ਧੋ. ਇਮੇਸਨ੍ਤਿ ਪਞ੍ਚਕਾਨਂ ਤਨ੍ਤਿਨ੍ਤਿ ਸਮ੍ਬਨ੍ਧੋ. ਕੇਸਂ ਅਤ੍ਥਾਯ ਤਨ੍ਤਿਂ ਠਪੇਸ੍ਸਾਮੀਤਿ ਆਹ ‘‘ਨਿਸ੍ਸਾਯ ਵਸਨਕਾਰੀਨਂ ਅਤ੍ਥਾਯਾ’’ਤਿ. ਵਸਨਕਾਰੀਨਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਤੇਸਨ੍ਤਿ ਪਞ੍ਹਾਨਂ.
ਆਪਨ੍ਨੋ ਕਮ੍ਮਕਤੋਤਿ ਏਤ੍ਥ ‘‘ਆਪਨ੍ਨੋ’’ਤਿ ਪਦਂ ‘‘ਕਮ੍ਮਕਤੋ’’ਤਿ ਪਦਸ੍ਸ ਕਾਰਣਦਸ੍ਸਨਨ੍ਤਿ ਆਹ ‘‘ਆਪਤ੍ਤਿਂ ਆਪਨ੍ਨੋ, ਤਪ੍ਪਚ੍ਚਯਾਵ ਸਙ੍ਘੇਨ ਕਮ੍ਮਂ ਕਤਂ ਹੋਤੀ’’ਤਿ. ਤਪ੍ਪਚ੍ਚਯਾਵਾਤਿ ਤਂਆਪਤ੍ਤਿਆਪਨ੍ਨਸਙ੍ਖਾਤਾ ਕਾਰਣਾ ਏਵ.
ਨਪ੍ਪਟਿਪ੍ਪਸ੍ਸਮ੍ਭਨਵਗ੍ਗਵਣ੍ਣਨਾ
੪੨੦. ਅਯਨ੍ਤਿ ਕਮ੍ਮਕਤੋ ਭਿਕ੍ਖੁ, ਨ ਵਤ੍ਤਤੀਤਿ ਸਮ੍ਬਨ੍ਧੋ. ਅਨੁਲੋਮਵਤ੍ਤੇਤਿ ਕਤਕਮ੍ਮਸ੍ਸ ਅਨੁਲੋਮੇ ਵਤ੍ਤੇ. ਅਸ੍ਸਾਤਿ ਭਿਕ੍ਖੁਸ੍ਸ. ਸਰਜ੍ਜੁਕੋਤਿ ਸਹ ਕਮ੍ਮਸਙ੍ਖਾਤਾਯ ਰਜ੍ਜੁਯਾਤਿ ਸਰਜ੍ਜੁਕੋ.
੪੨੧. ਸਮਗ੍ਗੇਹਿ ਭਿਕ੍ਖੂਹੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਅਚ੍ਚਯਂ ਦੇਸਾਪੇਤ੍ਵਾਤਿ ਅਞ੍ਞਮਞ੍ਞਂ ਦੋਸਂ ਦੇਸਾਪੇਤ੍ਵਾ. ਤਿਣਵਤ੍ਥਾਰਕਸਮਥਂ ਵਾਤਿ ਵਾਸਦ੍ਦੋ ਅਤ੍ਥਨ੍ਤਰਵਿਕਪ੍ਪੋ. ਤਤ੍ਰ ਚੇਤਿ ਏਤ੍ਥ ਤਸਦ੍ਦੋ ਕਮ੍ਮਵਿਸਯੋ, ਚੇਸਦ੍ਦੋ ਸਚੇਪਰਿਯਾਯੋਤਿ ਆਹ ‘‘ਸਚੇ ਤਾਦਿਸੇ ਕਮ੍ਮੇ’’ਤਿ. ਦਿਟ੍ਠਾਵਿਕਮ੍ਮਮ੍ਪਿ ਕਤ੍ਵਾਤਿ ਦਿਟ੍ਠਾਵਿਕਮ੍ਮਂ ਕਤ੍ਵਾਪੀਤਿ ਯੋਜਨਾ. ਪਿਸਦ੍ਦੇਨ ਅਕਤ੍ਵਾਪੀਤਿ ਸਮ੍ਪਿਣ੍ਡੇਤਿ. ਯਤ੍ਰ ਪਨਾਤਿ ਕਮ੍ਮੇ ਪਨ. ਤਤ੍ਥਾਤਿ ਕਮ੍ਮੇ. ਪਕ੍ਕਮਿਤਬ੍ਬਨ੍ਤਿ ਸਙ੍ਗਾਮਾਵਚਰੇਨ ਪਕ੍ਕਮਿਤਬ੍ਬਂ.
੪੨੨. ਉਸ੍ਸਿਤਮਨ੍ਤੀਤਿ ਏਤ੍ਥ ਉਸ੍ਸਿਤਂ ਮਨ੍ਤੀ ਉਸ੍ਸਿਤਮਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਲੋਭ…ਪੇ… ਭਾਸਿਤਾ’’ਤਿ. ਤਤ੍ਥ ‘‘ਲੋਭਦੋਸ ਮੋਹਮਾਨੁਸ੍ਸਨ੍ਨਂ ਵਾਚ’’ਨ੍ਤਿ ਇਮਿਨਾ ਉਸ੍ਸਿਤਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਭਾਸਿਤਾ’’ਤਿ ਇਮਿਨਾ ‘‘ਮਨ੍ਤੀ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਨਿਸ੍ਸਿਤਜਪ੍ਪੀਤਿ ਏਤ੍ਥ ਅਞ੍ਞਨਿਸ੍ਸਿਤਂ ਜਪ੍ਪਮੇਤਸ੍ਸਾਤਿ ਨਿਸ੍ਸਿਤਜਪ੍ਪੀਤਿ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ’’ਤਿਆਦਿ. ਏਤ੍ਥ ਜਪ੍ਪਨ੍ਤਿ ਵਚਨਂ. ਜਪ੍ਪ ਵਚਨੇਤਿ ਹਿ ਧਾਤੁਪਾਠੇਸੁ ਵੁਤ੍ਤਂ. ਉਸ੍ਸਦਯੁਤ੍ਤਨ੍ਤਿ ਲੋਭਾਦਿਉਸ੍ਸਦਯੁਤ੍ਤਂ, ਵਚਨਨ੍ਤਿ ਸਮ੍ਬਨ੍ਧੋ. ਏਵਮਞ੍ਞਨ੍ਤਿ ਏਵਂ ਅਤ੍ਤਨਾ ਅਞ੍ਞਂ. ਕਥਾਨੁਸਨ੍ਧਿਵਚਨੇਤਿ ਚੋਦਕਚੁਦਿਤਕਾਨਂ ਕਥਾਯ ਅਨੁਸਨ੍ਧਿਵਚਨੇ. ਏਤ੍ਥ ‘‘ਵਚਨੇ’’ਤਿ ਇਮਿਨਾ ‘‘ਭਾਸਾਨੁਸਨ੍ਧੀ’’ਤਿ ਏਤ੍ਥ ਭਾਸਸਦ੍ਦੋ ਵਚਨਪਰਿਯਾਯੋਤਿ ਦਸ੍ਸੇਤਿ.
ਉਸ੍ਸਾਰੇਤੀਤਿ ਉਦ੍ਧਂ ਗਮਾਪੇਤਿ. ਇਮਿਨਾ ਉਸ੍ਸਾਦੇਤਿ ਉਪਰਿ ਗਮਾਪੇਤੀਤਿ ਉਸ੍ਸਾਦੇਤਾਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ਹਿ ਦਕਾਰਰਕਾਰਾ ਸਦਿਸਤ੍ਥਾ. ਤੇ ਹਿ ਦ੍ਵੇ ਅਕ੍ਖਰਾ ਕਦਾਚਿ ਕਤ੍ਥਚਿ ਸਦਿਸਤ੍ਥਾ ਹੋਨ੍ਤਿ. ਅਵਸਾਰੇਤੀਤਿ ਹੀਨਭਾਵਂ ਗਮਾਪੇਤਿ. ਇਮਿਨਾ ਅਵਸਾਦੇਤਿ ਅਧੋਭਾਵਂ ਗਮਾਪੇਤੀਤਿ ਅਵਸਾਦੇਤਾਤਿ ਵਚਨਤ੍ਥਂ ਦਸ੍ਸੇਤਿ. ‘‘ਅਪਸਾਦੇਤਾ’’ਤਿਪਿ ਪਾਠੋ, ਉਪਸਗ੍ਗਮਤ੍ਤਮੇਵ ਨਾਨਂ. ਸਮ੍ਫਞ੍ਚ ਬਹੁਂ ਭਾਸਤੀਤਿ ਏਤ੍ਥ ਸਮ੍ਫਸਦ੍ਦੋ ਨਿਰਤ੍ਥਕਕਥਾਵਚਨੋਤਿ ਆਹ ‘‘ਨਿਰਤ੍ਥਕਕਥ’’ਨ੍ਤਿ. ਨਿਰਤ੍ਥਕਕਥਾ ਹਿ ਯਸ੍ਮਾ ਸਂ ਹਿਤਸੁਖਂ ਫਲਤਿ ਵਿਨਾਸੇਤਿ, ਤਸ੍ਮਾ ਸਮ੍ਫਨ੍ਤਿ ਵੁਚ੍ਚਤਿ. ਫਾ ਧਾਤੂਤਿ ਚ ਫਲਧਾਤੂਤਿ ਚ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੬ ਲਕਾਰਨ੍ਤਧਾਤੁ) ਵੁਤ੍ਤਂ.
ਭਾਰੇ ਅਨਾਰੋਪਿਤੇਤਿ ‘‘ਤਵ ਭਾਰੋ’’ਤਿ ਸਙ੍ਘੇਨ ਭਾਰੇ ਅਨਾਰੋਪਿਤੇ. ਅਜ੍ਝੋਤ੍ਥਰਿਤ੍ਵਾਤਿ ਅਭਿਭਵਿਤ੍ਵਾ. ਇਮਿਨਾ ਪਸਯ੍ਹ ਪਵਤ੍ਤਾਤਿ ਏਤ੍ਥ ਪਸਯ੍ਹਸਦ੍ਦਸ੍ਸ ਅਭਿਭਵਨਤ੍ਥਂ ਦਸ੍ਸੇਤਿ. ਅਨਧਿਕਾਰੇਤਿ ਅਨਧਿਪਚ੍ਚਟ੍ਠਾਨੇ. ‘‘ਕਥੇਤਾ’’ਤਿ ਇਮਿਨਾ ਵਤੁਧਾਤੁਯਾ ਕਥਨਤ੍ਥਂ ਦਸ੍ਸੇਤਿ. ਅਨੋਕਾਸਕਮ੍ਮਂ ਕਾਰੇਤ੍ਵਾਤਿ ਏਤ੍ਥ ਨਕਾਰਸ੍ਸ ਅਯੁਤ੍ਤਯੋਗਭਾਵਤੋ ਯੁਤ੍ਤਟ੍ਠਾਨਂ ਦਸ੍ਸੇਨ੍ਤੋ ਆਹ ‘‘ਓਕਾਸਕਮ੍ਮਂ ਅਕਾਰੇਤ੍ਵਾ’’ਤਿ. ਯਸ੍ਸਾਤਿ ਯਾ ਅਸ੍ਸ. ਅਸ੍ਸ ਭਿਕ੍ਖੁਨੋ ਅਤ੍ਤਨੋ ਯਾ ਦਿਟ੍ਠਿ ਅਤ੍ਥੀਤਿ ਯੋਜਨਾ, ਅਥਵਾ ਅਤ੍ਤਨੋ ਯਾ ਦਿਟ੍ਠਿ ਭਵੇਯ੍ਯਾਤਿ ਯੋਜਨਾ. ਤਨ੍ਤਿ ਦਿਟ੍ਠਿਂ. ‘‘ਕਥੇਤਾ’’ਤਿ ਇਮਿਨਾ ਬ੍ਯਾਕਤਾਤਿ ਏਤ੍ਥ ਵਿ ਆ ਪੁਬ੍ਬਕਰਧਾਤੁਯਾ ਕਥਨਤ੍ਥਂ ਦਸ੍ਸੇਤਿ.
ਵੋਹਾਰਵਗ੍ਗਵਣ੍ਣਨਾ
੪੨੪. ‘‘ਨੇਵ ਦੇਸਨਾਯ ਨ ਵੁਟ੍ਠਾਨੇਨਾ’’ਤਿ ਇਦਂ ਪਾਰਾਜਿਕਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਦੋਸਾਨੁਰੂਪਨ੍ਤਿ ਵਤ੍ਥੁਸਙ੍ਖਾਤਸ੍ਸ ਦੋਸਸ੍ਸ ਅਨੁਰੂਪਂ.
ਪਯੋਗਂ ਨ ਜਾਨਾਤੀਤਿ ਏਤ੍ਥ ਸਚੇ ਪਯੋਗੋ ਮੂਲੇਨ ਵਿਸਦਿਸੋ ਹੁਤ੍ਵਾ ਭਿਨ੍ਨੋ ਹੋਤਿ, ਏਵਂ ਸਤਿ ਮੂਲਪਯੋਗਨ੍ਤਿ ਨ ਵਤ੍ਤਬ੍ਬਨ੍ਤਿ ਆਹ ‘‘ਅਧਿਕਰਣਾਨਂ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਮੂਲਮੇਵ ਪਯੋਗਾ ਨਾਮ ਹੋਨ੍ਤਿ, ਨ ਅਞ੍ਞਨ੍ਤਿ ਅਧਿਪ੍ਪਾਯੋ.
ਕਾਤਬ੍ਬਨ੍ਤਿ ਨ ਜਾਨਾਤੀਤਿ ਕਾਤਬ੍ਬਂ ਇਤਿ ਕਮ੍ਮਸ੍ਸ ਕਰਣਂ ਨ ਜਾਨਾਤੀਤਿ ਯੋਜਨਾ. ਵਤ੍ਥੂਤਿ ਭਣ੍ਡਨਕਲਹਾਦਿਵਤ੍ਥੁ, ਨਿਯਸ੍ਸਾਦੀਨਂ ਵਤ੍ਥੂਤਿ ਸਮ੍ਬਨ੍ਧੋ. ਚਤੁਨ੍ਨਨ੍ਤਿ ਤਜ੍ਜਨੀਯਨਿਯਸ੍ਸਪਬ੍ਬਾਜਨੀਯਪਟਿਸਾਰਣੀਯਵਸੇਨ ਚਤੁਨ੍ਨਂ. ਯਾਚਤੀਤਿ ਸਙ੍ਘਂ ਕਮ੍ਮਸ੍ਸ ਵੂਪਸਮਂ ਯਾਚਤਿ.
ਵਤ੍ਥੁਨ੍ਤਿ ਏਤ੍ਥ ਆਪਤ੍ਤਿਕ੍ਖਨ੍ਧਾਨਮੇਵ ਵਤ੍ਥੁਨ੍ਤਿ ਆਹ ‘‘ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨ’’ਨ੍ਤਿ. ਪਦੇਸਪਞ੍ਞਤ੍ਤਿਸਬ੍ਬਤ੍ਥਪਞ੍ਞਤ੍ਤਿਸਾਧਾਰਣਪਞ੍ਞਤ੍ਤਿਅਸਾਧਾਰਣਪਞ੍ਞਤ੍ਤਿਏਕਤੋਪਞ੍ਞ- ਤ੍ਤਿਉਭਤੋਪਞ੍ਞਤ੍ਤਿਵਸੇਨ ਛਨ੍ਨਂ ਪਞ੍ਞਤ੍ਤੀਨਂ ਪਞ੍ਞਤ੍ਤਿਯਂ ਪਵਿਟ੍ਠਤ੍ਤਾ ਵੁਤ੍ਤਂ ‘‘ਤਿਵਿਧਂ ਪਞ੍ਞਤ੍ਤਿ’’ਨ੍ਤਿ. ‘‘ਹੇਟ੍ਠੁਪਰਿਯਂ ਕਤ੍ਵਾ ਪਦਂ ਯੋਜੇਤੀ’’ਤਿ ਇਮਿਨਾ ਪਦਪਚ੍ਚਾਭਟ੍ਠਨ੍ਤਿ ਏਤ੍ਥ ਪਦਾਨਂ ਹੇਟ੍ਠੁਪਰਿਯਵਸੇਨ ਪਟਿਨਿਵਤ੍ਤਿਤ੍ਵਾ ਆਭਸ੍ਸਨਂ ਗਲ਼ਨਂ ਚੁਤਂ ਪਦਪਚ੍ਚਾਭਟ੍ਠਨ੍ਤਿ ਅਤ੍ਥਂ ਦਸ੍ਸੇਤਿ.
ਵਿਨਯੇਤਿ ਏਤ੍ਥ ਨ ਕੇਵਲਂ ਪਾਲ਼ਿਯਂਯੇਵ, ਅਥ ਖੋ ਅਟ੍ਠਕਥਾਯਮ੍ਪੀਤਿ ਆਹ ‘‘ਵਿਨਯਪਾਲ਼ਿਯਞ੍ਚੇਵ ਅਟ੍ਠਕਥਾਯਞ੍ਚਾ’’ਤਿ.
ਞਤ੍ਤਿਂ ਨ ਜਾਨਾਤੀਤਿ ਏਤ੍ਥ ਞਤ੍ਤਿਭੇਦਂ ਦਸ੍ਸੇਨ੍ਤੋ ਆਹ ‘‘ਸਙ੍ਖੇਪਤੋ’’ਤਿਆਦਿ. ਤਤ੍ਥਾਤਿ ਦੁਵਿਧਾਸੁ ਞਤ੍ਤੀਸੁ. ਕਮ੍ਮਞਤ੍ਤੀਤਿ ਅਨੁਸ੍ਸਾਵਨਕਮ੍ਮਸ੍ਸ ਠਾਨੇ ਠਿਤਾ ਞਤ੍ਤਿ. ਅਨੁਸ੍ਸਾਵਨਕਮ੍ਮਂ ਨਤ੍ਥਿ, ਸਯਮੇਵ ਅਨੁਸ੍ਸਾਵਨਕਮ੍ਮਟ੍ਠਾਨੇ ਠਿਤਾਤਿ ਅਤ੍ਥੋ. ਕਮ੍ਮਪਾਦਞਤ੍ਤੀਤਿ ਅਨੁਸ੍ਸਾਵਨਕਮ੍ਮਸ੍ਸ ਪਾਦਭੂਤਾ ਮੂਲਭੂਤਾ ਞਤ੍ਤਿ. ਨਵਸੁ ਠਾਨੇਸੂਤਿ ਓਸਾਰਣਾਦੀਸੁ ਨਵਸੁ ਠਾਨੇਸੂ. ਦ੍ਵੀਸੁ ਠਾਨੇਸੂਤਿ ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਵਸੇਨ ਦ੍ਵੀਸੁ ਠਾਨੇਸੁ, ਕਮ੍ਮਪਾਦਞਤ੍ਤਿਯਾ ਕਰਣਂ ਨ ਜਾਨਾਤੀਤਿ ਸਮ੍ਬਨ੍ਧੋ. ਯ੍ਵਾਯਂ ਚਤੁਬ੍ਬਿਧੋ ਸਮਥੋਤਿ ਯੋਜਨਾ. ਤਨ੍ਤਿ ਚਤੁਬ੍ਬਿਧਂ ਸਮਥਂ. ਞਤ੍ਤਿਯਾਤਿ ਸਾਮ੍ਯਤ੍ਥੇ ਸਾਮਿਵਚਨਂ. ਯਂ ਅਧਿਕਰਣਂ ਵੂਪਸਮਤੀਤਿ ਸਮ੍ਬਨ੍ਧੋ. ਤਸ੍ਸਾਤਿ ਅਧਿਕਰਣਸ੍ਸ. ਤਂ ਵੂਪਸਮਂ ਨ ਜਾਨਾਤੀਤਿ ਸਮ੍ਬਨ੍ਧੋ.
ਸੁਤ੍ਤਂ ਨ ਜਾਨਾਤੀਤਿ ਏਤ੍ਥ ਸੁਤ੍ਤਸਦ੍ਦਸ੍ਸ ਕਦਾਚਿ ਕਤ੍ਥਚਿ ਮਾਤਿਕਾਯਞ੍ਚ ਸੁਤ੍ਤਨ੍ਤਪਿਟਕੇ ਚ ਪਵਤ੍ਤਨਤੋ ਇਧ ਉਭਤੋਵਿਭਙ੍ਗੇਤਿ ਆਹ ‘‘ਉਭਤੋਵਿਭਙ੍ਗ’’ਨ੍ਤਿ. ਵਿਨਯਂ ਨ ਜਾਨਾਤੀਤਿ ਏਤ੍ਥ ਵਿਨਯਸਦ੍ਦਸ੍ਸ ਸਕਲੇ ਵਿਨਯਪਿਟਕੇ ਵਤ੍ਤਮਾਨਸ੍ਸਾਪਿ ਸੁਤ੍ਤਨ੍ਤਿ ਏਤ੍ਥ ਉਭਤੋਵਿਭਙ੍ਗਸ੍ਸ ਗਹਿਤਤ੍ਤਾ ਇਧ ਖਨ੍ਧਕਪਰਿਵਾਰਾਵ ਗਹੇਤਬ੍ਬਾਤਿ ਆਹ ‘‘ਖਨ੍ਧਕਪਰਿਵਾਰਂ ਨ ਜਾਨਾਤੀ’’ਤਿ.
ਵਿਨਯਂ ਨ ਜਾਨਾਤੀਤਿ ਏਤ੍ਥ ਵਿਨਯਪਿਟਕਸ੍ਸ ਗਹੇਤਬ੍ਬਤ੍ਤਾ ਵੁਤ੍ਤਂ ‘‘ਠਪੇਤ੍ਵਾ ਵਿਨਯਪਿਟਕ’’ਨ੍ਤਿ. ਸੁਤ੍ਤਨ੍ਤਿਕੇ ਚਤ੍ਤਾਰੋ ਮਹਾਪਦੇਸੇਤਿ (ਦੀ. ਨਿ. ੨.੧੮੭ ਆਦਯੋ; ਅ. ਨਿ. ੪.੧੮੦) ਬੁਦ੍ਧਾਪਦੇਸਸਙ੍ਘਾਪਦੇਸਸਮ੍ਬਹੁਲਤ੍ਥੇਰਾਪਦੇਸਏਕਤ੍ਥੇਰਾ ਪਦੇਸਵਸੇਨ ਚਤ੍ਤਾਰੋ ਮਹਾਪਦੇਸੇ. ਏਤ੍ਥਾਤਿ ਪਞ੍ਚਕੇ. ਯਨ੍ਤਿ ਵਚਨਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਞ੍ਚਕੇਸੁ.
ਇਤਿ
ਅਨਿਸ੍ਸਿਤਵਗ੍ਗ-ਨਪ੍ਪਟਿਪ੍ਪਸ੍ਸਮ੍ਭਨਵਗ੍ਗ-ਵੋਹਾਰਵਗ੍ਗਵਣ੍ਣਨਾਯ
ਯੋਜਨਾ ਸਮਤ੍ਤਾ.
ਦਿਟ੍ਠਾਵਿਕਮ੍ਮਵਗ੍ਗਵਣ੍ਣਨਾ
੪੨੫. ਦਿਟ੍ਠਾਵਿਕਮ੍ਮਵਗ੍ਗੇ ਦਿਟ੍ਠਾਵਿਕਮ੍ਮਾਤਿ ਏਤ੍ਥ ਆਵਿ ਕਰੀਯਤੇ ਆਵਿਕਮ੍ਮਂ, ਦਿਟ੍ਠੀਨਂ ਆਵਿਕਮ੍ਮਂ ਦਿਟ੍ਠਾਵਿਕਮ੍ਮਨ੍ਤਿ ਦਸ੍ਸੇਨ੍ਤੋ ਆਹ ‘‘ਦਿਟ੍ਠੀਨਂ ਆਵਿਕਮ੍ਮਾਨੀ’’ਤਿ. ‘‘ਲਦ੍ਧਿਪਕਾਸਨਾਨ’’ਨ੍ਤਿ ਇਮਿਨਾ ਦਿਟ੍ਠਿਸਦ੍ਦੋ ਲਦ੍ਧਿਪਰਿਯਾਯੋ, ਆਵਿਕਮ੍ਮਸਦ੍ਦੋ ਪਕਾਸਨਪਰਿਯਾਯੋਤਿ ਦਸ੍ਸੇਤਿ. ਏਤਨ੍ਤਿ ‘‘ਦਿਟ੍ਠਾਵਿਕਮ੍ਮਾ’’ਤਿ ਨਾਮਂ. ਅਦੇਸਨਾਗਾਮਿਨੀ ਨਾਮ ਅਤ੍ਥਤੋ ਗਰੁਕਨ੍ਤਿ ਆਹ ‘‘ਗਰੁਕਾਪਤ੍ਤਿਯਾ’’ਤਿ. ਲਹੁਕਾਯਪੀਤਿ ਪਿਸਦ੍ਦੋ ਗਰਹਤ੍ਥੋ. ਲਹੁਕਾਯਪਿ ਦੇਸਿਤਾਯ ਦਿਟ੍ਠਾਵਿਕਮ੍ਮਂ ਅਧਮ੍ਮਿਕਂ ਹੋਤਿ, ਪਗੇਵ ਗਰੁਕਾਯਾਤਿ ਅਤ੍ਥੋ.
ਯਥਾ …ਪੇ… ਹੋਤੀਤਿ ਯਥਾ ਆਵਿਕਤੇ ਚਤੂਹਿ ਪਞ੍ਚਹਿ ਏਕੀਭੂਤੇਹਿ ਆਵਿਕਤਾ ਹੋਤੀਤਿ ਯੋਜਨਾ. ਚਤੂਹਿ ਪਞ੍ਚਹੀਤਿ ਅਨ੍ਤਿਮਪਰਿਚ੍ਛੇਦਦਸ੍ਸਨਂ. ਤਤੋ ਅਤਿਰੇਕੇਹਿਪਿ ਏਕਤੋ ਦੇਸੇਤੁਂ ਨ ਵਟ੍ਟਤਿ, ਦੇਸਿਤਾ ਚ ਆਪਤ੍ਤਿ ਨ ਵੁਟ੍ਠਾਤਿ, ਦੇਸਨਾਪਚ੍ਚਯਾ ਦੁਕ੍ਕਟਞ੍ਚ ਹੋਤਿ. ‘‘ਚਤੂਹਿ ਪਞ੍ਚਹੀ’’ਤਿ ਅਨ੍ਤਿਮਪਰਿਚ੍ਛੇਦਸ੍ਸ ਦਸ੍ਸਿਤਤ੍ਤਾ ਦ੍ਵੀਹਿ ਤੀਹਿ ਪਨ ਏਕਤੋ ਦੇਸੇਤੁਂ ਵਟ੍ਟਤੀਤਿ ਦਟ੍ਠਬ੍ਬਂ. ਮਨੋਮਾਨਸੇਨਾਤਿ ਏਤ੍ਥ ਮਨੋਸਦ੍ਦੇਨ ਮਾਨਸਸਦ੍ਦਸ੍ਸ ਰਾਗਅਰਹਤ੍ਤੇਸੁਪਿ ਪਵਤ੍ਤਨਤੋ ਤਦਤ੍ਥੇ ਪਟਿਕ੍ਖਿਪਿਤ੍ਵਾ ਚਿਤ੍ਤੇ ਏਵ ਵਤ੍ਤਤੀਤਿ ਦਸ੍ਸੇਤਿ. ਤੇਨ ਵੁਤ੍ਤਂ ‘‘ਮਨਸਙ੍ਖਾਤੇਨ ਮਾਨਸੇਨਾ’’ਤਿ. ਇਮਿਨਾ ਮਨਭੂਤਂ ਮਾਨਸਂ ਮਨੋਮਾਨਸਨ੍ਤਿ ਵਚਨਤ੍ਥਂ ਦਸ੍ਸੇਤਿ.
ਸਮਾਨਸਂਵਾਸਕਸ੍ਸਾਪੀਤਿ ਪਿਸਦ੍ਦੋ ਸਮਾਨਸਂਵਾਸਕਸ੍ਸਪਿ ਨਾਨਾਸੀਮਾਯ ਠਿਤਸ੍ਸ ਸਨ੍ਤਿਕੇ ਆਵਿਕਮ੍ਮਂ ਅਧਮ੍ਮਿਕਂ ਹੋਤਿ, ਪਗੇਵ ਨਾਨਾਸਂਵਾਸਕਸ੍ਸਾਤਿ ਦਸ੍ਸੇਤਿ. ਮਾਲ਼ਕਸੀਮਾਯਾਤਿ ਖਣ੍ਡਸੀਮਾਯ ਅਙ੍ਗਣੇ. ਅਵਿਪ੍ਪਵਾਸਸੀਮਾਯਾਤਿ ਮਹਾਸੀਮਾਯ, ਠਿਤਸ੍ਸਾਪਿ ਸਨ੍ਤਿਕੇਤਿ ਸਮ੍ਬਨ੍ਧੋ. ਪਿਸਦ੍ਦੇਨ ‘‘ਖਣ੍ਡਸੀਮਾਯ ਠਿਤਸ੍ਸਪੀ’’ਤਿ ਅਤ੍ਥਂ ਸਮ੍ਪਿਣ੍ਡੇਤਿ.
੪੩੦. ਨ ਪਰਿਯਤ੍ਤਨ੍ਤਿ ਨ ਸਮਤ੍ਥਂ. ਇਮਿਨਾ ਨਾਲਨ੍ਤਿ ਏਤ੍ਥ ਅਲਂਸਦ੍ਦੋ ਪਰਿਯਤ੍ਤਤ੍ਥੋਵ, ਨਾਰਹਭੂਸਨਵਾਰਣਤ੍ਥੋਤਿ ਦਸ੍ਸੇਤਿ. ਇਧਾਪੀਤਿ ਪਞ੍ਚਕੇਪਿ. ਪਿਸਦ੍ਦੇਨ ਪੁਰਿਮਪਞ੍ਚਕਂ ਅਪੇਕ੍ਖਤਿ. ‘‘ਸਾਸਨਤੋ’’ਤਿ ਇਮਿਨਾ ਚੁਧਾਤੁਯਾ ਅਪਾਦਾਨਂ ਦਸ੍ਸੇਤਿ. ‘‘ਕਾਮੋ’’ਤਿ ਇਮਿਨਾ ਅਧਿਪ੍ਪਾਯਸਦ੍ਦੋ ਕਾਮਪਰਿਯਾਯੋਤਿ ਦਸ੍ਸੇਤਿ.
੪੩੨. ਮਨ੍ਦਤ੍ਤਾ ਮੋਮੂਹਤ੍ਤਾਤਿ ਏਤ੍ਥ ਤ੍ਤਪਚ੍ਚਯਸ੍ਸ ਭਾਵਤ੍ਥੇ, ਪਞ੍ਚਮੀਵਿਭਤ੍ਤਿਯਾ ਚ ਕਾਰਣਤ੍ਥੇ ਪਵਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਮਨ੍ਦਭਾਵੇਨ ਮੋਮੂਹਭਾਵੇਨਾ’’ਤਿ. ਪਰਿਭਵਾਤਿ ਏਤ੍ਥ ਪਰਿਭਵਕਾਮਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਰਿਭਵਂ ਆਰੋਪੇਤੁਕਾਮੋ ਹੁਤ੍ਵਾ’’ਤਿ. ਅਞ੍ਞਬ੍ਯਾਕਰਣੇਸੁਪੀਤਿ ਅਰਹਤ੍ਤਬ੍ਯਾਕਰਣੇਸੁਪਿ. ਸਬ੍ਬਤ੍ਥਾਤਿ ਦਿਟ੍ਠਾਵਿਕਮ੍ਮਵਗ੍ਗੇ. ਯਨ੍ਤਿ ਵਚਨਂ.
ਇਤਿ ਦਿਟ੍ਠਾਵਿਕਮ੍ਮਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.
ਮੁਸਾਵਾਦਵਗ੍ਗਵਣ੍ਣਨਾ
੪੪੪. ਧਮ੍ਮਪਧਾਨਂ ਧਮ੍ਮਾਧਿਟ੍ਠਾਨਂ ਸਨ੍ਧਾਯ ‘‘ਪਾਰਾਜਿਕਂ ਗਚ੍ਛਤੀਤਿ ਪਾਰਾਜਿਕਗਾਮੀ’’ਤਿ ਸੁਦ੍ਧਕਤ੍ਤੁਵਸੇਨ ਵੁਤ੍ਤਂ, ਪੁਗ੍ਗਲਪਧਾਨਂ ਪੁਗ੍ਗਲਾਧਿਟ੍ਠਾਨਂ ਸਨ੍ਧਾਯ ‘‘ਪਾਰਾਜਿਕਂ ਗਚ੍ਛਤਿ ਅਨੇਨ, ਗਮਾਪੇਤੀਤਿ ਵਾ ਪਾਰਾਜਿਕਗਾਮੀ’’ਤਿ ਕਰਣਹੇਤੁਕਤ੍ਤੁਵਸੇਨਪਿ ਵਤ੍ਤਬ੍ਬਂ. ਵਿਤ੍ਥਾਰਂ ਦਸ੍ਸਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ‘‘ਮੁਸਾਵਾਦੋ ਪਾਰਾਜਿਕਗਾਮੀ’’ਤਿਆਦਿਪਾਠੇ, ਏਵਂ ਵਿਤ੍ਥਾਰੋ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਤੇਸੁ ‘‘ਮੁਸਾਵਾਦੋ ਪਾਰਾਜਿਕਗਾਮੀ’’ਤਿਆਦੀਸੁ ਵਾ, ਨਿਦ੍ਧਾਰਣੇ ਭੁਮ੍ਮਂ.
ਅਦਸ੍ਸਨੇਨਾਤਿ ਏਤ੍ਥ ਕਸ੍ਸ ਅਦਸ੍ਸਨੇਨਾਤਿ ਆਹ ‘‘ਵਿਨਯਧਰਸ੍ਸਾ’’ਤਿ. ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਕਪ੍ਪਿਯਾਕਪ੍ਪਿਯੇਸੁ ਹੀ’’ਤਿਆਦਿ. ਤਨ੍ਤਿ ਵਿਨਯਧਰਂ. ਅਸ੍ਸਵਨੇਨਾਤਿ ਏਤ੍ਥ ਕੇਸਂ ਵਚਨਂ ਅਸ੍ਸਵਨੇਨਾਤਿ ਆਹ ‘‘ਏਕਵਿਹਾਰੇਪੀ’’ਤਿਆਦਿ. ਏਕਵਿਹਾਰੇਪੀਤਿ ਵਿਨਯਧਰੇਨ ਏਕਵਿਹਾਰੇਪਿ. ਪਿਸਦ੍ਦੇਨ ਨਾਨਾਵਿਹਾਰੇ ਪਨ ਪਗੇਵਾਤਿ ਦਸ੍ਸੇਤਿ. ਉਪਟ੍ਠਾਨਨ੍ਤਿ ਉਪਟ੍ਠਾਨਤ੍ਥਂ, ਉਪਟ੍ਠਾਨਟ੍ਠਾਨਂ ਵਾ. ਵੁਚ੍ਚਮਾਨਂ ਅਞ੍ਞੇਸਂ ਵਚਨਂ ਅਸੁਣਨ੍ਤੋ ਹੁਤ੍ਵਾ ਵਾਤਿ ਯੋਜਨਾ. ਪਸੁਤ੍ਤਕਤਾਤਿ ਏਤ੍ਥ ਯਕਾਰਲੋਪੋਤਿ ਆਹ ‘‘ਪਸੁਤ੍ਤਕਤਾਯਾ’’ਤਿ. ਪਸੁਤ੍ਤਕਭਾਵੇਨਪੀਤਿ ਪਿਸਦ੍ਦੋ ਅਞ੍ਞਮ੍ਪਿ ਅਦਸ੍ਸਨਾਦਿਕਾਰਣਂ ਸਮ੍ਪਿਣ੍ਡੇਤਿ. ਤਥਾਸਞ੍ਞੀਤਿ ਏਤ੍ਥ ਤਥਾਸਦ੍ਦੋ ਕੋਵਿਸਯੋਤਿ ਆਹ ‘‘ਅਕਪ੍ਪਿਯੇ…ਪੇ… ਆਪਜ੍ਜਨ੍ਤੋ’’ਤਿ. ਏਕਰਤ੍ਤਾਤਿਕ੍ਕਮਾਦਿਵਸੇਨਾਤਿ ਆਦਿਸਦ੍ਦੇਨ ਛਾਰਤ੍ਤਾਤਿਕ੍ਕਮਾਦਿਂ ਸਙ੍ਗਣ੍ਹਾਤਿ. ਸਬ੍ਬਤ੍ਥਾਤਿ ਮੁਸਾਵਾਦਵਗ੍ਗੇ.
ਇਤਿ ਮੁਸਾਵਾਦਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.
ਭਿਕ੍ਖੁਨੋਵਾਦਵਗ੍ਗਵਣ੍ਣਨਾ
੪੫੦. ਭਿਕ੍ਖੁਨਿਵਗ੍ਗੇ ਅਲਾਭਾਯਾਤਿ ਏਤ੍ਥ ਲਭਧਾਤੁਯਾ ਕਮ੍ਮਂ, ਸਮ੍ਪਦਾਨਵਚਨਸ੍ਸ ਚ ਤਦਤ੍ਥਂ ਦਸ੍ਸੇਨ੍ਤੋ ਆਹ ‘‘ਚਤੁਨ੍ਨਂ ਪਚ੍ਚਯਾਨਂ ਅਲਾਭਤ੍ਥਾਯਾ’’ਤਿ. ‘‘ਵਾਯਮਤੀ’’ਤਿ ਇਮਿਨਾ ਪਰਿਸਕ੍ਕਤੀਤਿ ਏਤ੍ਥ ਸਕ੍ਕਧਾਤੁਯਾ ਸਮਤ੍ਥਤ੍ਥਂ ਪਟਿਕ੍ਖਿਪਿਤ੍ਵਾ ਵਾਯਮਤ੍ਥਂ ਦਸ੍ਸੇਤਿ. ਕਲਿਸਾਸਨਨ੍ਤਿ ਪਾਪਪਰਾਜਯਆਣਂ. ਨੀਹਰਣਤ੍ਥਾਯਾਤਿ ਨਿਦ੍ਧਰਿਤ੍ਵਾ ਅਪਨਯਨਤ੍ਥਾਯ.
੪੫੧. ‘‘ਕਮ੍ਮ’’ਨ੍ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ‘‘ਸਤ੍ਤਨ੍ਨਂ ਕਮ੍ਮਾਨਂ ਅਞ੍ਞਤਰ’’ਨ੍ਤਿ.
੪੫੪. ਨ ਸਾਕਚ੍ਛਾਤਬ੍ਬੋਤਿ ਏਤ੍ਥ ਕੋ ਨਾਮ ਕਥਾਮਗ੍ਗੋ ਨ ਸਾਕਚ੍ਛਾਤਬ੍ਬੋ, ਨਨੁ ਵਿਨਯੋਯੇਵਾਤਿ ਆਹ ‘‘ਕਪ੍ਪਿਯਾ…ਪੇ… ਕਥਾਮਗ੍ਗੋ’’ਤਿ. ‘‘ਨ ਕਥੇਤਬ੍ਬੋ’’ਤਿ ਇਮਿਨਾ ਕਚ੍ਛਸਦ੍ਦਸ੍ਸ ਕਥਧਾਤੁਯਾ ਨਿਪ੍ਫਨ੍ਨਭਾਵਂ ਦੀਪੇਤਿ. ਕਸ੍ਮਾ ਪਨ ਪਠਮਪਞ੍ਚਕੇ ‘‘ਨ ਅਸੇਕ੍ਖੇਨਾ’’ਤਿ ਪਟਿਕ੍ਖਿਪਿਤ੍ਵਾ ਦੁਤਿਯਪਞ੍ਚਕੇ ‘‘ਅਸੇਕ੍ਖੇਨਾ’’ਤਿਆਦਿ ਵੁਤ੍ਤਨ੍ਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਇਤਰੋ ਪੁਥੁਜ੍ਜਨੋ ਨ ਕਥੇਤੀਤਿ ਯੋਜਨਾ.
ਨ ਅਤ੍ਥਪਟਿਸਮ੍ਭਿਦਾਪਤ੍ਤੋਤਿ ਏਤ੍ਥ ਅਤ੍ਥੋ ਨਾਮ ਅਟ੍ਠਕਥਾਯੇਵਾਧਿਪ੍ਪੇਤਾਤਿ ਆਹ ‘‘ਅਟ੍ਠਕਥਾਯਾ’’ਤਿ. ‘‘ਪਭੇਦਗਤਞਾਣਪ੍ਪਤ੍ਤੋ’’ਤਿ ਇਮਿਨਾ ਅਤ੍ਥਾਦੀਸੁ ਪਤਿ ਵਿਸੁਂ ਸਮ੍ਭਿਜ੍ਜਤੀਤਿ ਪਟਿਸਮ੍ਭਿਦਾ, ਪਞ੍ਞਾ, ਤਂ ਪਤ੍ਤੋਤਿ ਪਟਿਸਮ੍ਭਿਦਾਪਤ੍ਤੋ. ਅਤ੍ਥੇ ਪਟਿਸਮ੍ਭਿਦਾਪਤ੍ਤੋ ਅਤ੍ਥਪਟਿਸਮ੍ਭਿਦਾਪਤ੍ਤੋਤਿ ਦਸ੍ਸੇਤਿ. ‘‘ਪਾਲ਼ਿਧਮ੍ਮੇ’’ਤਿ ਇਮਿਨਾ ਧਮ੍ਮਪਟਿਸਮ੍ਭਿਦਾਪਤ੍ਤੋਤਿ ਏਤ੍ਥ ਧਮ੍ਮਸਰੂਪਂ ਦਸ੍ਸੇਤਿ. ਵੋਹਾਰਨਿਰੁਤ੍ਤਿਯਨ੍ਤਿ ਪਞ੍ਞਤ੍ਤਿਨਿਰੁਤ੍ਤਿਯਂ. ਇਮਿਨਾ ਨਿਰੁਤ੍ਤਿਪਟਿਸਮ੍ਭਿਦਾਪਤ੍ਤੋਤਿ ਏਤ੍ਥ ਨਿਰੁਤ੍ਤਿਸਰੂਪਂ ਦਸ੍ਸੇਤਿ. ਪਟਿਭਾਨਪਟਿਸਮ੍ਭਿਦਾਪਤ੍ਤੋਤਿ ਏਤ੍ਥ ਪਟਿਭਾਨਂ ਨਾਮ ਹੇਟ੍ਠਿਮਞਾਣਤ੍ਤਯਮੇਵਾਤਿ ਆਹ ‘‘ਅਤ੍ਥਪਟਿਸਮ੍ਭਿਦਾਦੀਨਿ ਞਾਣਾਨੀ’’ਤਿ, ਤੇਸੂਤਿ ਞਾਣੇਸੁ, ਯਂ ਯਂ ਵਿਮੁਤ੍ਤਂ ਯਥਾਵਿਮੁਤ੍ਤਂ, ਚਿਤ੍ਤਂ. ਪਚ੍ਚਵੇਕ੍ਖਿਤਾਤਿ ਪੁਨਪ੍ਪੁਨਂ ਓਲੋਕਿਤਾ. ਸਬ੍ਬਤ੍ਥਾਤਿ ਭਿਕ੍ਖੁਨਿਵਗ੍ਗੇ.
ਇਤਿ ਭਿਕ੍ਖੁਨੋਵਾਦਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.
ਉਬ੍ਬਾਹਿਕਵਗ੍ਗਵਣ੍ਣਨਾ
੪੫੫. ਉਬ੍ਬਾਹਿਕਵਗ੍ਗੇ ਅਤ੍ਥਕੁਸਲੋਤਿਆਦਿਪਦਾਨਂ ਭੇਦਨਿਸ੍ਸਿਤਸਮਾਸਂ ਦਸ੍ਸੇਨ੍ਤੋ ਆਹ ‘‘ਅਟ੍ਠਕਥਾਕੁਸਲੋ’’ਤਿਆਦਿ. ਆਚਰਿਯਮੁਖਤੋਤਿ ਆਚਰਿਯਵਦਨਤੋ, ਆਚਰਿਯਸਮ੍ਮੁਖੇ ਵਾ, ਸਿਥਿਲਧਨਿਤਾਦੀਤਿ ਆਦਿਸਦ੍ਦੇਨ ਦੀਘਰਸ੍ਸਾਦੀਨਿ (ਪਰਿ. ਅਟ੍ਠ. ੪੮੫; ਵਿ. ਸਙ੍ਗ. ਅਟ੍ਠ. ੨੫੨) ਸਙ੍ਗਣ੍ਹਾਤਿ. ਅਕ੍ਖਰਪਰਿਚ੍ਛੇਦੇਤਿ ਏਤ੍ਤਕੋ ਸਿਥਿਲੋ, ਏਤ੍ਤਕੋ ਧਨਿਤੋਤਿਆਦਿਨਾ ਅਕ੍ਖਰਪਰਿਚ੍ਛੇਦੇ. ਇਮਿਨਾ ਬ੍ਯਞ੍ਜਨਕੁਸਲੋਤਿ ਏਤ੍ਥ ਬ੍ਯਞ੍ਜਨਸਦ੍ਦੋ ਅਕ੍ਖਰਪਰਿਯਾਯੋਤਿ ਦਸ੍ਸੇਤਿ. ਨ ਪੁਬ੍ਬਾਪਰਕੁਸਲੋਤਿ ਏਤ੍ਥ ਪੁਬ੍ਬਾਪਰੋ ਨਾਮ ਪੁਰਿਮਾਨਂ ਚਤੁਨ੍ਨਞ੍ਚੇਵ ਕਥਾਯ ਚ ਪੁਬ੍ਬਾਪਰੋਤਿ ਆਹ ‘‘ਅਤ੍ਥਪੁਬ੍ਬਾਪਰੇ’’ਤਿਆਦਿ.
ਕੋਧਨੋਤਿਆਦੀਨਿ ਵੁਤ੍ਤਾਨੀਤਿ ਸਮ੍ਬਨ੍ਧੋ. ਯਸ੍ਮਾ ਨ ਸਕ੍ਕੋਤੀਤਿ ਯੋਜਨਾ. ਪਸਾਰੇਤਾਤਿ ਏਤ੍ਥ ਸਰਧਾਤੁ ਉਪਸਗ੍ਗਵਸੇਨ ਵੇਚਿਤ੍ਤਵਾਚਕੋਤਿ ਆਹ ‘‘ਮੋਹੇਤਾ’’ਤਿ.
ਇਤਿ ਉਬ੍ਬਾਹਿਕਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.
ਅਧਿਕਰਣਵੂਪਸਮਵਗ੍ਗਵਣ੍ਣਨਾ
੪੫੭. ਅਧਿਕਰਣਵੂਪਸਮਵਗ੍ਗੇ ਸਙ੍ਘਗਰੁ ਨਾਮ ਕੋਤਿ ਆਹ ‘‘ਧਮ੍ਮਞ੍ਚ…ਪੇ… ਸਙ੍ਘਗਰੁ ਨਾਮ ਹੋਤੀ’’ਤਿ. ਤਾਨੀਤਿ ਚੀਵਰਾਦੀਨਿ.
੪੫੮. ਪਞ੍ਚਹੁਪਾਲਿ ਆਕਾਰੇਹੀਤਿ ਏਤ੍ਥ ਆਕਾਰਸਦ੍ਦੋ ਕਾਰਣਤ੍ਥੋਤਿ ਆਹ ‘‘ਪਞ੍ਚਹਿ ਕਾਰਣੇਹੀ’’ਤਿ. ਕਮ੍ਮੇਨਾਤਿਆਦੀਸੁ ਕਮ੍ਮਾਦੀਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਅਪਲੋਕਨਾਦੀਸੂ’’ਤਿਆਦਿ. ਉਪਪਤ੍ਤੀਹੀਤਿ ਯੁਤ੍ਤੀਹਿ. ਮਯ੍ਹਂ ਉਚ੍ਚਾਕੁਲਾ ਪਬ੍ਬਜਿਤਭਾਵਞ੍ਚ ਬਹੁਸ੍ਸੁਤਭਾਵਞ੍ਚ ਤੁਮ੍ਹੇ ਜਾਨਾਥਾਤਿ ਯੋਜਨਾ. ਮਾਦਿਸੋ ਨਾਮ…ਪੇ… ਤੁਮ੍ਹਾਕਂ ਯੁਤ੍ਤਂ ਨਨੂਤਿ ਯੋਜਨਾ. ਕਣ੍ਣਮੂਲੇਤਿ ਕਣ੍ਣਸਮੀਪੇ. ਅਨੁਸ੍ਸਾਵਨੇਨਾਤਿ ਅਨੁਸਮੀਪੇ ਸਾਵਾਪਨੇਨ. ਤੇਸਨ੍ਤਿ ਭਿਕ੍ਖੂਨਂ. ਅਨਿਵਤ੍ਤਿਧਮ੍ਮੇਤਿ ਅਨਿਵਤ੍ਤਨਸਭਾਵੇ. ਸਲਾਕਗ੍ਗਾਹੇਨਾਤਿ ਅਤ੍ਤਨੋ ਸਲਾਕਾਯ ਗਾਹਾਪਨੇਨ.
ਏਤ੍ਥਾਤਿ ਕਮ੍ਮਾਦੀਸੁ. ਪਮਾਣਨ੍ਤਿ ਸਙ੍ਘਭੇਦਸ੍ਸ ਕਾਰਣਂ. ਪੁਬ੍ਬਭਾਗਾਤਿ ਸਙ੍ਘਭੇਦਤੋ ਪੁਬ੍ਬਭਾਗੇ ਪਵਤ੍ਤਾ. ਪੁਬ੍ਬਭਾਗਭਾਵਂ ਆਵਿਕਰੋਨ੍ਤੋ ਆਹ ‘‘ਅਟ੍ਠਾਰਸਵਤ੍ਥੁਦੀਪਨਵਸੇਨ ਹੀ’’ਤਿਆਦਿ. ਵੋਹਰਨ੍ਤੇਪੀਤਿ ਯੋਜਨਾ. ਤਤ੍ਥਾਤਿ ਵੋਹਾਰੇ. ਕਦਾ ਪਨ ਸਙ੍ਘੋ ਭਿਨ੍ਨੋਤਿ ਆਹ ‘‘ਯਦਾ ਪਨਾ’’ਤਿਆਦਿ. ਯਦਾ ਪਨ ਕਰੋਤੀਤਿ ਸਮ੍ਬਨ੍ਧੋ. ਕਮ੍ਮਨ੍ਤਿ ਉਪੋਸਥਕਮ੍ਮਤੋ ਅਞ੍ਞਂ ਕਮ੍ਮਂ ਗਹੇਤਬ੍ਬਂ. ਉਦ੍ਦੇਸਨ੍ਤਿ ਉਪੋਸਥਕਮ੍ਮਂ. ਇਤੀਤਿ ਏਵਂ. ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾਯਂ ‘‘ਏਵਂ…ਪੇ… ਪਕਾਸਯਿਸ੍ਸਾਮਾ’’ਤਿ (ਚੂਲ਼ਵ. ਅਟ੍ਠ. ੩੫੧) ਯਂ ਵਚਨਂ ਅਵੋਚੁਮ੍ਹਾਤਿ ਯੋਜਨਾ. ਤਸ੍ਸ ਵਚਨਸ੍ਸਾਤਿ ਪਾਠਂ ਅਜ੍ਝਾਹਰਿਤ੍ਵਾ ‘‘ਸ੍ਵਾਯਂ ਅਤ੍ਥੋ’’ਤਿ ਪਦੇਨ ਸਮ੍ਬਨ੍ਧਿਤਬ੍ਬੋ.
ਪਞ੍ਞਤ੍ਤੇਤਨ੍ਤਿ ਏਤ੍ਥ ਨਿਗ੍ਗਹਿਤਲੋਪਸਨ੍ਧੀਤਿ ਆਹ ‘‘ਪਞ੍ਞਤ੍ਤਂ ਏਤ’’ਨ੍ਤਿ. ਕ੍ਵਾਤਿ ਕਿਸ੍ਮਿਂ ਖਨ੍ਧਕੇ. ਤਤ੍ਰਾਤਿ ਵਤ੍ਤਕ੍ਖਨ੍ਧਕੇ. ਏਤ੍ਤਾਵਤਾਤਿ ਏਤ੍ਤਕੇਨ ਆਗਨ੍ਤੁਕਵਤ੍ਤਾਦਿਅਕਰਣਮਤ੍ਤੇਨ. ਅਨੁਪੁਬ੍ਬੇਨਾਤਿ ਅਨੁਕ੍ਕਮੇਨ. ਯਥਾਰਤ੍ਤਨ੍ਤਿ ਏਤ੍ਥ ਯਥਾਸਦ੍ਦੋ ਅਨੁਰੂਪਤ੍ਥਵਾਚਕੋ, ਰਤ੍ਤਿਸਦ੍ਦੇਨ ਰਤ੍ਤਿਪ੍ਪਮਾਣਂ ਗਹੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਰਤ੍ਤਿਪਰਿਮਾਣਾਨੁਰੂਪ’’ਨ੍ਤਿ. ਇਮਿਨਾ ਰਤ੍ਤਿਯਾ ਅਨੁਰੂਪਂ ਯਥਾਰਤ੍ਤਨ੍ਤਿ ਨਿਬ੍ਬਚਨਂ ਦਸ੍ਸੇਤਿ. ‘‘ਰਤ੍ਤਿਪਰਿਮਾਣਾਨੁਰੂਪ’’ਨ੍ਤਿ ਵੁਤ੍ਤੇ ਰਤ੍ਤਿਪਰਿਮਾਣਸ੍ਸ ਅਤਿਕ੍ਕਨ੍ਤਤ੍ਤਾ ਅਤ੍ਥਤੋ ਥੇਰੋਤਿ ਆਹ ‘‘ਯਥਾਥੇਰਨ੍ਤਿ ਅਤ੍ਥੋ’’ਤਿ. ਵਵਤ੍ਥਾਨਨ੍ਤਿ ਪਰਿਚ੍ਛੇਦੋ. ਸੋ ਹਿ ਵਿਸੁਂ ਅਵਹਿਤੋ ਹੁਤ੍ਵਾ ਤਿਟ੍ਠਤੀਤਿ ਵਵਤ੍ਥਾਨਨ੍ਤਿ ਵੁਚ੍ਚਤਿ. ਕਮ੍ਮਾਕਮ੍ਮਾਨੀਤਿ ਏਤ੍ਥ ਕਮ੍ਮਂ ਅਕਮ੍ਮਾਨੀਤਿ ਪਦਵਿਭਾਗਂ ਕਤ੍ਵਾ ਅਕਾਰੋ ਵੁਦ੍ਧਤ੍ਥੋਤਿ ਆਹ ‘‘ਖੁਦ੍ਦਕਾਨਿ ਚੇਵ ਮਹਨ੍ਤਾਨਿ ਚ ਕਮ੍ਮਾਨੀ’’ਤਿ. ਸਤਿ ਚ ਅਕਮ੍ਮਸ੍ਸ ਮਹਨ੍ਤਭਾਵੇ ਕਮ੍ਮਂ ਨਾਮ ਖੁਦ੍ਦਕਨ੍ਤਿ ਅਤ੍ਥਤੋ ਸਿਦ੍ਧਂ ਹੋਤਿ. ਤੇਨ ਵੁਤ੍ਤਂ ‘‘ਖੁਦ੍ਦਕਾਨਿ ਚੇਵਾ’’ਤਿ. ਅਕਾਰਸ੍ਸ ਅਪ੍ਪਤ੍ਥਂ ਗਹੇਤ੍ਵਾ ‘‘ਮਹਨ੍ਤਾਨਿ ਚੇਵ ਖੁਦ੍ਦਕਾਨਿ ਚ ਕਮ੍ਮਾਨੀ’’ਤਿ ਅਤ੍ਥੋਪਿ ਯੁਜ੍ਜਤੇਵ. ਸੋ ਪਨ ਇਧ ਨ ਗਹਿਤੋ, ਅਞ੍ਞਤ੍ਥ ਪਨ ਦਿਸ੍ਸਤਿ. ‘‘ਉਚ੍ਚਾਵਚਾਨਿ ਕਮ੍ਮਾਨੀ’’ਤਿ ਹਿ ਵਾਕ੍ਯਵਸੇਨ ਵੁਤ੍ਤਟ੍ਠਾਨੇ ਉਚ੍ਚਸਦ੍ਦੇਨ ਮਹਨ੍ਤਤ੍ਥਂ ਦਸ੍ਸੇਤਿ, ਅਵਚਸਦ੍ਦੇਨ ਖੁਦ੍ਦਕਤ੍ਥਂ ਦਸ੍ਸੇਤਿ. ਤਸ੍ਮਾ ਮਹਨ੍ਤਖੁਦ੍ਦਕਾਨਿ ਕਮ੍ਮਾਨੀਤਿ ਅਤ੍ਥੋ ਵੇਦਿਤਬ੍ਬੋ. ਸਤਿ ਚ ਅਕਮ੍ਮਸ੍ਸ ਖੁਦ੍ਦਕਭਾਵੇ ਕਮ੍ਮਂ ਨਾਮ ਮਹਨ੍ਤਨ੍ਤਿ ਅਤ੍ਥਤੋਪਿ ਸਿਦ੍ਧਨ੍ਤਿ ਦਟ੍ਠਬ੍ਬਂ.
ਸਙ੍ਘਭੇਦਵਗ੍ਗਦ੍ਵਯਵਣ੍ਣਨਾ
੪੫੯. ਸਙ੍ਘਭੇਦਵਗ੍ਗਦ੍ਵਯੇ ਏਤੇਤਿ ਸਭਾਵਾ. ਤੇਤਿ ਅਧਮ੍ਮਾਦਯੋ. ਇਤੀਤਿ ਏਵਂ. ਯਂ ਕਮ੍ਮਨ੍ਤਿ ਯੋਜਨਾ. ਦਿਟ੍ਠਿਂ ਵਿਨਿਧਾਯਾਤਿ ਸਮ੍ਬਨ੍ਧੋ. ਏਕਸ੍ਮਿਂ ਪਞ੍ਚਕੇ ਅਯਂ ਅਤ੍ਥਯੋਜਨਾ ਕਾਤਬ੍ਬਾਤਿ ਸਮ੍ਬਨ੍ਧੋ. ਏਤ੍ਥਾਪੀਤਿ ਇਮਸ੍ਮਿਂ ਪਞ੍ਚਕੇਪਿ. ਪਿਸਦ੍ਦੇਨ ਹੇਟ੍ਠਾ ਵੁਤ੍ਤਂ ਪਞ੍ਚਕਂ ਅਪੇਕ੍ਖਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਞ੍ਚਕੇਸੁ. ਹੀਤਿ ਸਚ੍ਚਂ. ਪੁਬ੍ਬੇ ਅਵੁਤ੍ਤਨਯਂ ਯਂ ਵਚਨਮਤ੍ਥਿ, ਤਂ ਵਚਨਂ ਏਤ੍ਥ ਪਞ੍ਚਕੇਸੁ ਨ ਅਤ੍ਥੀਤਿ ਯੋਜਨਾ.
ਆਵਾਸਿਕਵਗ੍ਗਵਣ੍ਣਨਾ
੪੬੧. ਆਵਾਸਿਕਵਗ੍ਗੇ ‘‘ਹਰਿਤ੍ਵਾ’’ਤਿ ਇਮਿਨਾ ਯਥਾਭਤਨ੍ਤਿ ਏਤ੍ਥ ਭਰਧਾਤੁਯਾ ਹਰਣਤ੍ਥਞ੍ਚ ਕਿਰਿਯਾਵਿਸੇਸਨਭਾਵਞ੍ਚ ਦਸ੍ਸੇਤਿ. ‘‘ਠਪਿਤੋ’’ਤਿ ਇਮਿਨਾ ਨਿਕ੍ਖਿਤ੍ਤੋਤਿ ਏਤ੍ਥ ਖਿਪਧਾਤੁਯਾ ਠਪਨਤ੍ਥਂ ਦਸ੍ਸੇਤਿ.
੪੬੨. ਪਰਿਣਾਮੇਤੀਤਿ ਪਰਿਣਤਂਪਾਪੇਤਿ. ‘‘ਨਿਯਾਮੇਤਿ ਕਥੇਤੀ’’ਤਿ ਇਮਿਨਾ ਅਧਿਪ੍ਪਾਯਤ੍ਥਂ ਦਸ੍ਸੇਤਿ, ਏਤ੍ਥਾਤਿ ਆਵਾਸਿਕਵਗ੍ਗੇ.
ਕਥਿਨਤ੍ਥਾਰਵਗ੍ਗਵਣ੍ਣਨਾ
੪੬੭. ਕਥਿਨਤ੍ਥਾਰਵਗ੍ਗੇ ਓਤਮਸਿਕੋਤਿ ਏਤ੍ਥ ਅਵਤਮਂ ਗਤੋ ਓਤਮਸਿਕੋਤਿ ਦਸ੍ਸੇਨ੍ਤੋ ਆਹ ‘‘ਅਨ੍ਧਕਾਰਗਤੋ’’ਤਿ. ਅਨ੍ਧਕਾਰਸਦ੍ਦੇਨ ਤਮਸਦ੍ਦੋ ਅਨ੍ਧਕਾਰਪਰਿਯਾਯੋਤਿ ਦਸ੍ਸੇਤਿ. ਤਨ੍ਤਿ ਓਤਮਸਿਕਂ. ਅਸਮਨ੍ਨਾਹਰਨ੍ਤੋਤਿ ਤਂ ਅਸਮਨ੍ਨਾਹਰਨ੍ਤੋ, ਕਸ੍ਮਾ ਅਸਮਨ੍ਨਾਹਰਨ੍ਤੋਤਿ ਆਹ ‘‘ਕਿਚ੍ਚਯਪਸੁਤਤ੍ਤਾ ਵਨ੍ਦਨ’’ਨ੍ਤਿ. ਏਕਤੋਤਿ ਕੋਪੇਨ ਸਦ੍ਧਿਂ. ਵੇਰੀ ਵਿਸਭਾਗਪੁਗ੍ਗਲੋ ਏਕਤੋ ਆਕੋਧੇਨ ਵਤ੍ਤਨਟ੍ਠੇਨ ਏਕਾਵਤ੍ਤੋਤਿ ਵੁਚ੍ਚਤਿ. ਪਹਰੇਯ੍ਯਾਤਿ ਵਨ੍ਦਨ੍ਤਂ ਪਹਰੇਯ੍ਯ. ‘‘ਅਞ੍ਞਂ ਚਿਨ੍ਤਯਮਾਨੋ’’ਤਿ ਇਮਿਨਾ ਅਞ੍ਞਸ੍ਮਿਂ ਆਰਮ੍ਮਣੇ ਚਿਤ੍ਤਂ ਵਿਦਹਤਿ ਠਪੇਤੀਤਿ ਅਞ੍ਞਵਿਹਿਤੋਤਿ ਦਸ੍ਸੇਤਿ.
ਸਙ੍ਘਤੋ ਉਦ੍ਧਰਿਤ੍ਵਾ ਖਿਪਿਤਬ੍ਬੋ ਅਪਨੇਤਬ੍ਬੋਤਿ ਉਕ੍ਖਿਤ੍ਤੋ, ਸੋਯੇਵ ਉਕ੍ਖਿਤ੍ਤਕੋ. ਤੇਹੀਤਿ ਚਤੂਹਿ. ਅਵਨ੍ਦਿਯੇਸੁ ਪਨ੍ਨਰਸਪੁਗ੍ਗਲੇਸੂਤਿ ਸਮ੍ਬਨ੍ਧੋ. ਅਨ੍ਤਰਾ ਵੁਤ੍ਤਕਾਰਣੇਨ ਚਾਤਿ ਅਨ੍ਤਰੇ ਵੁਤ੍ਤੇਨ ‘‘ਤਞ੍ਹਿ ਵਨ੍ਦਨ੍ਤਸ੍ਸ ਮਞ੍ਚਪਾਦਾਦੀਸੁਪਿ ਨਲਾਟਂ ਪਟਿਹਞ੍ਞੇਯ੍ਯਾ’’ਤਿਆਦਿਨਾ ਕਾਰਣੇਨ ਚ. ਇਤੋਤਿ ਪਨ੍ਨਰਸਪੁਗ੍ਗਲਮ੍ਹਾ. ਇਤੀਤਿ ਏਵਂ. ਸਚੇ ਉਦ੍ਦੇਸਾਚਰਿਯੋ ਚ ਓਵਾਦਾਚਰਿਯੋ ਚ ਨਵਕੋ ਹੋਤਿ, ਨ ਵਨ੍ਦਨੀਯੋ. ਸਬ੍ਬਤ੍ਥਾਤਿ ਕਥਿਨਤ੍ਥਾਰਵਗ੍ਗੇ.
ਇਤਿ ਕਥਿਨਤ੍ਥਾਰਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.
ਨਿਟ੍ਠਿਤਾ ਚ ਉਪਾਲਿਪਞ੍ਚਕਵਣ੍ਣਨਾਯ ਯੋਜਨਾ.
ਆਪਤ੍ਤਿਸਮੁਟ੍ਠਾਨਵਣ੍ਣਨਾ
੪੭੦. ‘‘ਅਚਿਤ੍ਤਕੋ ਆਪਜ੍ਜਤੀ’’ਤਿਆਦੀਸੁ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਅਚਿਤ੍ਤਕੋ ਆਪਜ੍ਜਤੀਤਿ ਅਚਿਤ੍ਤਕੋ ਹੁਤ੍ਵਾ ਆਪਜ੍ਜਤਿ. ਏਸੇਵ ਨਯੋ ਅਚਿਤ੍ਤਕੋ ਵੁਟ੍ਠਾਤੀਤਿ ਏਤ੍ਥਾਪਿ. ਯਂਕਿਞ੍ਚਿ ਆਪਤ੍ਤਿਨ੍ਤਿ ਸਮ੍ਬਨ੍ਧੋ. ਇਤਰਂ ਆਪਤ੍ਤਿਨ੍ਤਿ ਯੋਜਨਾ. ਧਮ੍ਮਦਾਨਂ ਕਰੋਮੀਤਿ ‘‘ਸਬ੍ਬਦਾਨਂ ਧਮ੍ਮਦਾਨਂ ਜਿਨਾਤੀ’’ਤਿ (ਧ. ਪ. ੩੫੪) ਚ ‘‘ਅਮਤਂਦਦੋ ਚ ਸੋ ਹੋਤਿ, ਯੋ ਧਮ੍ਮਮਨੁਸਾਸਤੀ’’ਤਿ (ਸਂ. ਨਿ. ੧.੪੨) ਚ ਭਗਵਤਾ ਵੁਤ੍ਤਵਚਨਂ ਸੁਤ੍ਵਾ ਧਮ੍ਮਦਾਨਂ ਕਰੋਮਿ. ਦੋਮਨਸ੍ਸਿਕੋਤਿ ਦੋਮਨਸ੍ਸੇਨ ਯੁਤ੍ਤੋ, ਦੋਮਨਸ੍ਸਵਨ੍ਤੋ ਵਾ. ਏਤ੍ਥਾਤਿ ਅਬ੍ਯਾਕਤਮੂਲੇ.
੪੭੩. ਯਸ੍ਸ ਯਸ੍ਸਾਤਿ ਸਿਕ੍ਖਾਪਦਸ੍ਸ. ਤਂ ਸਬ੍ਬਨ੍ਤਿ ਸਬ੍ਬਂ ਤਂਤਂਸਮੁਟ੍ਠਾਨਸਿਕ੍ਖਾਪਦਂ.