ਅਪਰਦੁਤਿਯਗਾਥਾਸਙ੍ਗਣਿਕਂ

(੧) ਕਾਯਿਕਾਦਿਆਪਤ੍ਤਿਵਣ੍ਣਨਾ

੪੭੪. ਛ ਆਪਤ੍ਤਿਯੋ ਕਾਯਿਕਾਤਿ ਏਤ੍ਥ ਛ ਆਪਤ੍ਤਿਯੋ ਨਾਮ ਕਾਤਿ ਆਹ ‘‘ਅਨ੍ਤਰਪੇਯ੍ਯਾਲੇ’’ਤਿਆਦਿ. ਅਨ੍ਤਰਪੇਯ੍ਯਾਲੇ ਵੁਤ੍ਤਾਤਿ ਸਮ੍ਬਨ੍ਧੋ. ‘‘ਕਾਯਦ੍ਵਾਰੇ ਸਮੁਟ੍ਠਿਤਤ੍ਤਾ’’ਤਿ ਇਮਿਨਾ ਕਾਯੇ ਸਮੁਟ੍ਠਨ੍ਤੀਤਿ ਕਾਯਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਤਸ੍ਮਿਂਯੇਵ ਅਨ੍ਤਰਪੇਯ੍ਯਾਲੇ ਵੁਤ੍ਤਾਤਿ ਸਮ੍ਬਨ੍ਧੋ. ‘‘ਵਜ੍ਜਪਟਿਚ੍ਛਾਦਿਕਾਯਾ’’ਤਿਆਦਿਨਾ ਛਾਦੇਨ੍ਤਸ੍ਸ ਤਿਸ੍ਸੋਤਿ ਏਤ੍ਥ ਤਿਣ੍ਣਂ ਸਰੂਪਂ ਦਸ੍ਸੇਤਿ. ‘‘ਭਿਕ੍ਖੁਨਿਯਾ’’ਤਿਆਦਿਨਾ ਪਞ੍ਚ ਸਂਸਗ੍ਗਪਚ੍ਚਯਾਤਿ ਏਤ੍ਥ ਪਞ੍ਚਨ੍ਨਂ ਸਰੂਪਂ ਦਸ੍ਸੇਤਿ.

‘‘ਏਕਰਤ੍ਤ’’ਇਤਿਆਦਿਨਾ ਅਰੁਣੁਗ੍ਗੇ ਤਿਸ੍ਸੋਤਿ ਏਤ੍ਥ ਤਿਣ੍ਣਂ ਸਰੂਪਂ ਦਸ੍ਸੇਤਿ. ਦ੍ਵੇ ਯਾਵਤਤਿਯਕਾਤਿ ਸਂਵਣ੍ਣੇਤਬ੍ਬੇਨ ‘‘ਏਕਾਦਸ ਯਾਵਤਤਿਯਕਾ ਨਾਮਾ’’ਤਿ ਸਂਵਣ੍ਣਨਾਯ ਵਿਰੁਦ੍ਧਭਾਵਂ ਪਟਿਕ੍ਖਿਪਨ੍ਤੋ ਆਹ ‘‘ਪਞ੍ਞਤ੍ਤਿਵਸੇਨ ਪਨਾ’’ਤਿਆਦਿ. ‘‘ਇਮਸ੍ਮਿਂ ਸਾਸਨੇ’’ਤਿ ਇਮਿਨਾ ਏਤ੍ਥਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਏਕੇਨ ਸਬ੍ਬਸਙ੍ਗਹੋਤਿ ਏਤ੍ਥ ਏਕੋ ਨਾਮ ਕੋ, ਸਬ੍ਬਾਨਿ ਨਾਮ ਕਾਨੀਤਿ ਆਹ ‘‘ਯਸ੍ਸ ਸਿਯਾ’’ਤਿਆਦਿ. ‘‘ਨਿਦਾਨੁਦ੍ਦੇਸੇਨਾ’’ਤਿ ਇਮਿਨਾ ਏਕਸ੍ਸ ਸਰੂਪਂ ਦਸ੍ਸੇਤਿ. ‘‘ਸਿਕ੍ਖਾਪਦਾਨਞ੍ਚ ਪਾਤਿਮੋਕ੍ਖੁਦ੍ਦੇਸਾਨਞ੍ਚਾ’’ਤਿ ਇਮੇਹਿ ਪਦੇਹਿ ਸਬ੍ਬਸਰੂਪਂ ਦਸ੍ਸੇਤਿ. ਸਙ੍ਗਹ ਸਦ੍ਦੇਨ ਕਮ੍ਮਛਟ੍ਠੀਸਮਾਸੋ.

‘‘ਵਜ੍ਜਪਟਿਚ੍ਛਾਦਿਕਾਯਾ’’ਤਿਆਦਿਨਾ ਦ੍ਵੇ ਦੁਟ੍ਠੁਲ੍ਲਚ੍ਛਾਦਨਾਤਿ ਏਤ੍ਥ ਦ੍ਵਿਨ੍ਨਂ ਸਰੂਪਂ ਦਸ੍ਸੇਤਿ.

‘‘ਭਿਕ੍ਖੁ ਭਿਕ੍ਖੁਨਿਯਾ’’ਤਿਆਦਿਨਾ ਗਾਮਨ੍ਤਰੇ ਚਤਸ੍ਸੋਤਿ ਏਤ੍ਥ ਚਤਸ੍ਸਨ੍ਨਂ ਸਰੂਪਂ ਦਸ੍ਸੇਤਿ. ਪੁਨ ‘‘ਭਿਕ੍ਖੁ ਭਿਕ੍ਖੁਨਿਯਾ’’ਤਿਆਦਿਨਾ ਚੇਤਸ੍ਸਾ ਨਦਿਪਾਰਪਚ੍ਚਯਾਤਿ ਏਤ੍ਥ ਚਤਸ੍ਸਨ੍ਨਮੇਵ ਸਰੂਪਂ ਦਸ੍ਸੇਤਿ. ‘‘ਚੀਵਰਦਾਨੇ ਪਾਚਿਤ੍ਤਿਯ’’ਨ੍ਤਿ ਇਮਿਨਾ ਪਾਚਿਤ੍ਤਿਯਭਾਵੇਨ ਸਦਿਸਤ੍ਤਾ ਸਙ੍ਖ੍ਯਾਵਿਸੇਸੋ ਨ ਕਾਤਬ੍ਬੋਤਿ ਦਸ੍ਸੇਤਿ.

(੨) ਦੇਸਨਾਗਾਮਿਨਿਯਾਦਿਵਣ੍ਣਨਾ

੪੭੫. ਏਕੇਤ੍ਥਾਤਿ ਏਤ੍ਥਸਦ੍ਦੋ ਸਾਸਨਵਿਸਯੋ.

ਏਕਸਿਕ੍ਖਾਪਦਮ੍ਪਿ ਨਤ੍ਥੀਤਿ ਪਿਸਦ੍ਦੋ ਬਹੁਸਿਕ੍ਖਾਪਦਾਨਿ ਪਨ ਪਗੇਵਾਤਿ ਚ ਆਪਤ੍ਤਿ ਪਨ ਪਗੇਵਾਤਿ ਚ ਆਪਤ੍ਤੀਪਿ ਨਤ੍ਥੀਤਿ ਚ ਅਤ੍ਥਂ ਦਸ੍ਸੇਤਿ.

‘‘ਸਕਲੇਪਿ ਵਿਨਯੇ’’ਤਿ ਇਮਿਨਾ ਦ੍ਵੇਤ੍ਥਾਤਿ ਪਾਠੇ ਏਤ੍ਥਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਉਭਿਨ੍ਨਨ੍ਤਿ ਭਿਕ੍ਖੁਭਿਕ੍ਖੁਨੀਨਂ. ਅਞ੍ਞਥਾ ਪਨ ਕਿਤ੍ਤਕਾ ਪਠਮਾਪਤ੍ਤਿਕਾਤਿ ਆਹ ‘‘ਇਤਰਥਾ ਪਨਾ’’ਤਿਆਦਿ. ਤਤ੍ਥ ਇਤਰਥਾਤਿ ਪਞ੍ਞਤ੍ਤਿਤੋ ਅਞ੍ਞੇਨ ਪਕਾਰੇਨ. ਕਮ੍ਮਞ੍ਚਾਤਿ ਕਮ੍ਮਞਤ੍ਤਿ ਚ. ਕਮ੍ਮਪਾਦਿਕਾ ਚਾਤਿ ਕਮ੍ਮਪਾਦਞਤ੍ਤਿ ਚ. ਨਵਸੁ ਠਾਨੇਸੂਤਿ ਓਸਾਰਣਾਦੀਸੁ ਨਵਸੁ ਠਾਨੇਸੁ. ਦ੍ਵੀਸੂਤਿ ਞਤ੍ਤਿਦੁਤਿਯ, ਞਤ੍ਤਿਚਤੁਤ੍ਥਕਮ੍ਮੇਸੁ.

ਵਜ੍ਜਪਟਿਚ੍ਛਾਦਿਕਾਯ ਪਾਰਾਜਿਕਂ, ਉਕ੍ਖਿਤ੍ਤਾਨੁਵਤ੍ਤਿਕਾਯ ਪਾਰਾਜਿਕਂ, ਅਟ੍ਠਵਤ੍ਥੁਕਾਯ ਪਾਰਾਜਿਕਨ੍ਤਿ ਇਤਿ ਇਮੇ ਤਯੋਤਿ ਯੋਜਨਾ. ਕਾਰਣਭੂਤੇਨਾਤਿ ਹੇਤੁਭੂਤੇਨ, ‘‘ਕਰਣਭੂਤੇਨਾ’’ਤਿਪਿ ਪਾਠੋ, ਸਾਧਕਤਮਸਤ੍ਤਿਭੂਤੇਨਾਤਿ ਅਤ੍ਥੋ.

ਤੇਸਨ੍ਤਿ ਅਦ੍ਧਾਨਹੀਨਾਦੀਨਂ. ਏਤ੍ਥਾਤਿ ‘‘ਤਯੋ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ’’ਤਿ ਪਾਠੇ, ਏਤੇਸੁ ਅਙ੍ਗਹੀਨਾਦੀਸੁ ਵਾ. ਯੋਤਿ ਪੁਗ੍ਗਲੋ. ਅਪਰਿਪੂਰੋ ਨ ਯਾਚਤੀਤਿ ਸਮ੍ਬਨ੍ਧੋ. ਮਾਤੁਘਾਤਕਾਦਯੋ ਕਰਣਦੁਕ੍ਕਟਕਾ ਚਾਤਿ ਯੋਜਨਾ. ਤਤ੍ਥਾਤਿ ਤੇਸੁ ਞਤ੍ਤਿਕਪ੍ਪਨਾਦੀਸੁ. ਞਤ੍ਤਿਕਪ੍ਪਨਾਤਿ ਞਤ੍ਤਿਵਿਧਿ. ਵਿਪ੍ਪਕਤਪਚ੍ਚਤ੍ਤਨ੍ਤਿ ਵਿਪ੍ਪਕਤਂ ਪਚ੍ਚਤ੍ਤਂ. ਅਤੀਤਕਰਣਨ੍ਤਿ ਅਤੀਤਸ੍ਸ ਕਰਣਂ. ਵਿਤ੍ਥਾਰੇਨ੍ਤੋ ਆਹ ‘‘ਵਤ੍ਥੁਸਮ੍ਪਨ੍ਨਂ ਹੀ’’ਤਿਆਦਿ. ਤਯੋ ਕਮ੍ਮਾਨ ਸਙ੍ਗਹਾਤਿ ਏਤ੍ਥ ਛਨ੍ਦਭੇਦਰਕ੍ਖਨਤ੍ਥਾਯ ਨਕਾਰੇ ਨਿਗ੍ਗਹਿਤਲੋਪੋ. ਨਾਸਿਤਕਾਤਿ ਨਾਸੇਤਬ੍ਬਾ ਪੁਗ੍ਗਲਾ, ਨਾਸਿਤਬ੍ਬਾਤਿ ਨਾਸਿਤਾ, ਨਾਸਿਤਾ ਏਵ ਨਾਸਿਤਕਾ. ਤਿਣ੍ਣਂ ਜਨਾਨਨ੍ਤਿ ਤਿਣ੍ਣਂ ਉਪਸਮ੍ਪਦਾਪੇਕ੍ਖਜਨਾਨਂ ਏਕੂਪਜ੍ਝਾਯੇਨ ਨਾਨਾਚਰਿਯੇਨ ਹੁਤ੍ਵਾਤਿ ਯੋਜਨਾ. ਏਕਾਨੁਸ੍ਸਾਵਨਾਤਿ ਏਕਤੋ ਅਨੁਸ੍ਸਾਵਨਾ.

ਪਾਦੋ ਨਾਮ ਕਹਾਪਣਸ੍ਸ ਚਤੁਤ੍ਥਭਾਗੋ. ਮਾਸਕੋ ਨਾਮ ਪਾਦਸ੍ਸ ਪਞ੍ਚਮਭਾਗੋ. ਪਾਰਾਜਿਕਨ੍ਤਿ ਵਨਪ੍ਪਤਿਂ ਛਿਨ੍ਦਨ੍ਤਸ੍ਸ ਦੁਤਿਯਪਾਰਾਜਿਕਂ (ਪਾਰਾ. ੧੧੦). ਅਨੋਦਿਸ੍ਸਾਤਿ ‘‘ਮਨੁਸ੍ਸੋ ਮਰਤੂ’’ਤਿਆਦਿਨਾ ਨ ਉਦ੍ਦਿਸਿਤ੍ਵਾ. ਤੇਨਾਤਿ ਵਿਸੇਨ.

ਭਿਕ੍ਖੁਨੋਵਾਦਕਵਗ੍ਗਸ੍ਮਿਨ੍ਤਿ ਸਾਮਞ੍ਞਾਧਾਰੋ. ਦਸਸੁ ਸਿਕ੍ਖਾਪਦੇਸੂਤਿ ਵਿਸੇਸਾਧਾਰੋ. ਪਠਮਸਿਕ੍ਖਾਪਦਮ੍ਹਿਯੇਵਾਤਿ ਦਸਸੁ ਸਿਕ੍ਖਾਪਦੇਸੁ ਪਠਮਸਿਕ੍ਖਾਪਦਮ੍ਹਿਯੇਵ. ਉਪਸਮ੍ਪਨ੍ਨਾਯ ਭਿਕ੍ਖੁਨਿਯਾਤਿ ਸਮ੍ਬਨ੍ਧੋ. ‘‘ਆਪਤ੍ਤਿ ਹੋਤੀ’’ਤਿ ਇਮਿਨਾ ‘‘ਚੀਵਰੇਨਾ’’ਤਿ ਪਦਸ੍ਸ ਸਮ੍ਬਨ੍ਧਟ੍ਠਾਨਂ ਦਸ੍ਸੇਤਿ.

‘‘ਚਤਸ੍ਸੋ ਏਵਾ’’ਤਿ ਇਮਿਨਾ ਤਤ੍ਤਿਕਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਤਾ ਚਤਸ੍ਸੋ ਪਰਿਮਾਣਾ ਯਾਸਂ ਆਪਤ੍ਤੀਨਨ੍ਤਿ ਤਤ੍ਤਿਕਾ. ਨਿਪਨ੍ਨਸ੍ਸਾਪਿ ਤਤ੍ਤਿਕਾਤਿ ਏਤ੍ਥਾਪਿ ਏਸੇਵ ਨਯੋ. ਸਾਤਿ ਭਿਕ੍ਖੁਨੀ.

(੩) ਪਾਚਿਤ੍ਤਿਯਵਣ੍ਣਨਾ

੪੭੬. ਪਞ੍ਚ ਭੇਸਜ੍ਜਾਨੀਤਿ ਸਬ੍ਬਿਆਦੀਨਿ ਪਞ੍ਚ ਭੇਸਜ੍ਜਾਨਿ. ਇਮਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ. ਪਚ੍ਛਾ ਆਪਨ੍ਨੋਤਿ ਯੋਜਨਾ.

ਏਕਂ ਕਬਲ਼ਨ੍ਤਿ ਏਕਂ ਆਲੋਪਂ, ਤੁਮ੍ਹਮੂਲੇਤਿ ਤੁਮ੍ਹਂ ਸਨ੍ਤਿਕੇ.

ਯਥਾਵਤ੍ਥੁਕਨ੍ਤਿ ਵਤ੍ਥੁਅਨੁਲੋਮਂ, ਆਪਤ੍ਤਿਯੋ ਦੇਸਿਤਾਵ ਹੋਨ੍ਤੀਤਿ ਯੋਜਨਾ.

ਕੋਕਾਲਿਕਾਦੀਨਨ੍ਤਿਆਦਿਸਦ੍ਦੇਨ ਕਟਮੋਦਕਤਿਸ੍ਸਕਾਦਯੋ (ਪਾਰਾ. ੪੧੭) ਸਙ੍ਗਣ੍ਹਾਤਿ. ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਪਾਚਿਤ੍ਤਿਯਞ੍ਚ ਚਣ੍ਡਕਾਲ਼ਿਕਾਯ ਭਿਕ੍ਖੁਨਿਯਾ ਪਾਚਿਤ੍ਤਿਯਞ੍ਚਾਤਿ ਯੋਜਨਾ. ਪਯੁਤ੍ਤਵਾਚਾਪਚ੍ਚਯਾਤਿ ਵਿਞ੍ਞਤ੍ਤਿਨਿਮਿਤ੍ਤਾਦੀਹਿ ਪਕਾਰੇਨ ਯੁਤ੍ਤਾਯ ਵਾਚਾਯ ਪਚ੍ਚਯਾ. ਆਪਤ੍ਤਿ ਪਾਰਾਜਿਕਸ੍ਸਾਤਿ ਪਾਰਾਜਿਕਸ੍ਸ ਆਪਜ੍ਜਨਂ. ਅਥਵਾ ਪਾਰਾਜਿਕਸ੍ਸਾਤਿ ਅਸ੍ਸ ਭਿਕ੍ਖੁਸ੍ਸ ਪਾਰਾਜਿਕਾ ਆਪਤ੍ਤਿ ਹੋਤੀਤਿ ਵਾ ਪਾਰਾਜਿਕਾ ਆਪਤ੍ਤਿ ਅਸ੍ਸ ਭਵਤੀਤਿ ਵਾ ਯੋਜਨਾ ਕਾਤਬ੍ਬਾ. ਇਤੀਤਿ ਇਮਾ ਛ ਆਪਤ੍ਤਿਯੋ ਆਪਜ੍ਜਤੀਤਿ ਯੋਜਨਾ.

ਭੋਜਨਂ ਗਹੇਤ੍ਵਾ ਅਜ੍ਝੋਹਰਮਾਨਾਤਿ ਸਮ੍ਬਨ੍ਧੋ. ਤਥੇਵਾਤਿ ਯਥਾ ਖਾਦਨੇ, ਤਥੇਵ ਮਂਸਂ ਲਸੁਣਂ ਅਜ੍ਝੋਹਰਮਾਨਾਤਿ ਯੋਜਨਾ. ‘‘ਪਣੀਤਭੋਜਨਾਨੀ’’ਤਿ ਚ ‘‘ਅਕਪ੍ਪਿਯਮਂਸ’’ਨ੍ਤਿ ਚ ਪਦਾਨਿ ‘‘ਅਜ੍ਝੋਹਰਮਾਨਾ’’ਤਿ ਪਦੇਨ ਸਮ੍ਬਨ੍ਧਿਤਬ੍ਬਾਨਿ.

ਪਞ੍ਚ ਠਾਨਾਨੀਤਿ ਪਞ੍ਚ ਆਪਤ੍ਤਿਸਙ੍ਖਾਤਾਨਿ ਠਾਨਾਨਿ. ਤਤ੍ਥਾਤਿ ਪਞ੍ਚਸੁ ਸਹਧਮ੍ਮਿਕੇਸੁ. ਦ੍ਵਿਨ੍ਨਨ੍ਤਿ ਭਿਕ੍ਖੁਭਿਕ੍ਖੁਨੀਨਂ. ਤੇਸਨ੍ਤਿ ਸਿਕ੍ਖਮਾਨਾਦੀਨਂ. ਪਞ੍ਚਨ੍ਨਮੇਵਾਤਿ ਸਹਧਮ੍ਮਿਕਾਨਂਯੇਵ. ਵਿਨਿਚ੍ਛਯਵੋਹਾਰੋਤਿ ਵਿਨਿਚ੍ਛਯਵਚਨਂ. ਇਮਿਨਾ ਚਤ੍ਤਾਰਿ ਅਧਿਕਰਣਾਨਿ ਪਟਿਕ੍ਖਿਪਤਿ. ਅਡ੍ਡਕਮ੍ਮਂ ਨਾਮਾਤਿ ਅਭਿਯੁਞ੍ਜਨ੍ਤਾਨਂ ਕਮ੍ਮਂ ਨਾਮ.

‘‘ਸਹਧਮ੍ਮਿਕਾਨ’’ਨ੍ਤਿ ਇਮਿਨਾ ਪਞ੍ਜਨ੍ਨਂ ਵਿਨਿਚ੍ਛਯੋਤਿ ਏਤ੍ਥ ਪਞ੍ਚਸਰੂਪਂ ਦਸ੍ਸੇਤਿ. ਸੋਭਣਭਾਵਂ ਵਿਤ੍ਥਾਰੇਨ੍ਤੋ ਆਹ ‘‘ਕਤਵੀਤਿਕ੍ਕਮੋ ਹੀ’’ਤਿਆਦਿ. ਅਬ੍ਭੁਣ੍ਹਸੀਲੋਤਿ ਅਭਿਨਵੁਪ੍ਪਨ੍ਨਸੀਲੋ. ਅਬ੍ਭੁਣ੍ਹਸੀਲੋ ਨਾਮ ਅਤ੍ਥਤੋ ਪਾਕਤਿਕਸੀਲੋਤਿ ਆਹ ‘‘ਪਾਕਤਿਕੋ’’ਤਿ, ਪਕਤਿਸੀਲੇਨ ਨਿਯੁਤ੍ਤੋਤਿ ਅਤ੍ਥੋ.

‘‘ਕਾਯਦ੍ਵਾਰਸਮ੍ਭਵਾ’’ਤਿ ਇਮਿਨਾ ਕਾਯਿਕਾਤਿ ਪਦਸ੍ਸ ਤਦ੍ਧਿਤਭਾਵਂ ਦਸ੍ਸੇਤਿ. ਮੁਖਂ ਓਲੋਕੇਤਬ੍ਬਨ੍ਤਿ ਏਤ੍ਥ ਵੁਤ੍ਤਾਤਿ ਸਮ੍ਬਨ੍ਧੋ.

ਚਤੁਨ੍ਨਂ ਦੇਸਨਾਯ ਚਾਤਿ ਏਤ੍ਥ ‘‘ਦੇਸਨਾਯਾ’’ਤਿ ਪਦਂ ਆਦਿਪਦਲੋਪਨ੍ਤਿ ਆਹ ‘‘ਅਚ੍ਚਯਦੇਸਨਾਯਾ’’ਤਿ. ਸਾਤਿ ਅਚ੍ਚਯਦੇਸਨਾ. ਅਭਿਨਿਲੀਯਿਤ੍ਵਾ ਧਨੁਨਾ ਮਾਰੇਨ੍ਤੀਤਿ ਅਭਿਮਾਰਾ.

ਛੇਜ੍ਜਂ ਹੋਤੀਤਿ ਏਤ੍ਥ ਛੇਜ੍ਜਂ ਨਾਮ ਪਾਰਾਜਿਕਾਪਜ੍ਜਨਮੇਵਾਤਿ ਆਹ ‘‘ਦੇਵਦਤ੍ਤੋ ਵਿਯ ਪਾਰਾਜਿਕਂ ਆਪਜ੍ਜਤੀ’’ਤਿ. ਇਮਾ ਪਨ ਆਪਤ੍ਤਿਯੋਤਿ ਪਾਰਾਜਿਕਥੁਲ੍ਲਚ੍ਚਯਾਪਤ੍ਤਿਯੋ.

(੪) ਅਵਨ੍ਦਨੀਯਪੁਗ੍ਗਲਾਦਿਵਣ੍ਣਨਾ

੪੭੭. ਤੇਸਨ੍ਤਿ ਦਸਨ੍ਨਂ ਪੁਗ੍ਗਲਾਨਂ. ‘‘ਸਦ੍ਧਿ’’ਨ੍ਤਿ ਇਮਿਨਾ ਸਾਮੀਚੇਨਾਤਿ ਏਤ੍ਥ ਸਹਤ੍ਥੇ ਕਰਣਵਚਨਨ੍ਤਿ ਦਸ੍ਸੇਤਿ. ਸਾਮੀਚੇਨਾਤਿ ਚ ਸਾਮੀਚਿਨਾ ਕਤ੍ਤਬ੍ਬਂ ਸਾਮੀਚਂ ਕਮ੍ਮਂ, ਤੇਨ ਸਾਮੀਚੇਨ. ਦਸ ਚੀਵਰਧਾਰਣਾਤਿ ਪਦਸ੍ਸ ਸਮਾਸਭਾਵਂ ਪਟਿਕ੍ਖਿਪਨ੍ਤੋ ਆਹ ‘‘ਦਸ ਦਿਵਸਾਨਿ ਅਤਿਰੇਕਚੀਵਰਸ੍ਸ ਧਾਰਣਾ’’ਤਿ.

ਕਤਿਸਤਨ੍ਤਿਆਦੀਸੁ ਦ੍ਵੀਸੁ ਗਾਥਾਪਾਦੇਸੁ ਚਤੂਸੁ ਵਿਭਤ੍ਯਨ੍ਤਪਦੇਸੁ ਪੁਰਿਮਂ ਪੁਰਿਮੇਨ, ਪਚ੍ਛਿਮਞ੍ਚ ਪਚ੍ਛਿਮੇਨ ਯਥਾਕ੍ਕਮਂ ਯੋਜੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਤਿਸਤਂ ਆਪਤ੍ਤਿਯੋ ਰਤ੍ਤਿਸਤਂ ਛਾਦਯਿਤ੍ਵਾਨਾ’’ਤਿ. ਪਚ੍ਛਿਮਗਾਥਾਯ ਪੁਬ੍ਬਡ੍ਢੇਪਿ ਏਸੇਵ ਨਯੋ. ਅਯਂ ਹੀਤਿ ਅਯਂ ਏਵ ਵਕ੍ਖਮਾਨੋ. ਏਤ੍ਥਾਤਿ ਗਾਥਾਯਂ. ਯੋਤਿ ਭਿਕ੍ਖੁ, ਪਟਿਚ੍ਛਾਦੇਤੀਤਿ ਸਮ੍ਬਨ੍ਧੋ. ਇਤੀਤਿ ਅਯਂ ਸਙ੍ਖੇਪਤ੍ਥੋ.

ਹੇਟ੍ਠਾ ਵੁਤ੍ਤੇਸੁ ਚਤੂਸੁ ਚਤੁਕ੍ਕੇਸੁ ਧਮ੍ਮੇਨ ਸਮਗ੍ਗਂ ਅਪਨੇਤ੍ਵਾ ਦ੍ਵਾਦਸ ਕਮ੍ਮਦੋਸਾ ਵੁਤ੍ਤਾਤਿ ਦਟ੍ਠਬ੍ਬਂ. ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਨ੍ਤਿ ਯੋਜੇਤਬ੍ਬਂ.

ਏਤ੍ਥਾਤਿ ਛਸੁ ਕਮ੍ਮੇਸੁ. ਏਤਦੇਵਾਤਿ ਧਮ੍ਮੇਨ ਸਮਗ੍ਗਕਮ੍ਮਮੇਵ.

ਯਂ ਦੇਸਿਤਾਤਿ ਏਤ੍ਥ ਯਂਸਦ੍ਦੋ ਵਚਨਵਿਪਲ੍ਲਾਸੋਤਿ ਆਹ ‘‘ਯਾਨਿ ਦੇਸਿਤਾਨੀ’’ਤਿ. ‘‘ਦੇਸਿਤਾਨੀ’’ਤਿ ਇਮਿਨਾ ਦੇਸਿਤਾਤਿ ਏਤ੍ਥ ਨਿਕਾਰਸ੍ਸ ਆਕਾਰਾਦੇਸਭਾਵਂ ਦਸ੍ਸੇਤਿ. ‘‘ਪਰਿਯਨ੍ਤਪਰਿਚ੍ਛੇਦਭਾਵਰਹਿਤਤ੍ਤਾ’’ਤਿ ਇਮਿਨਾ ਨਤ੍ਥਿ ਅਨ੍ਤਂ ਪਰਿਯਨ੍ਤਮੇਤਸ੍ਸਾਤਿ ਅਨਨ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਤਨ੍ਤਿ ਨਿਬ੍ਬਾਨਂ, ਜਿਤਨ੍ਤਿ ਸਮ੍ਬਨ੍ਧੋ. ਕੇਨ ਕਂ ਕਿਨ੍ਤਿ ਕਤ੍ਵਾ ਜਿਤਨ੍ਤਿ ਆਹ ‘‘ਭਗਵਤਾ ਕਿਲੇਸਗਣਂ ਅਭਿਮਦ੍ਦਿਤ੍ਵਾ’’ਤਿ. ਕੇਨ ਕਂ ਕਿਨ੍ਤਿ ਕਤ੍ਵਾ ਕਿਂ ਜਿਤਂ ਵਿਯਾਤਿ ਆਹ ‘‘ਰਞ੍ਞਾ ਸਪਤ੍ਤਗਣਂ ਅਭਿਮਦ੍ਦਿਤ੍ਵਾ ਰਜ੍ਜਂ ਵਿਯਾ’’ਤਿ. ਤਤ੍ਥ ‘‘ਰਞ੍ਞਾ’’ਤਿ ਇਮਿਨਾ ‘‘ਕੇਨਾ’’ਤਿ ਪੁਚ੍ਛਂ ਵਿਸ੍ਸਜ੍ਜੇਸਿ. ‘‘ਸਪਤ੍ਤਗਣ’’ਨ੍ਤਿ ਇਮਿਨਾ ‘‘ਕ’’ਨ੍ਤਿ ਪੁਚ੍ਛਂ ਵਿਸ੍ਸਜ੍ਜੇਸਿ. ‘‘ਅਭਿਮਦ੍ਦਿਤ੍ਵਾ’’ਤਿ ਇਮਿਨਾ ‘‘ਕਿਨ੍ਤਿ ਕਤ੍ਵਾ’’ਤਿ ਪੁਚ੍ਛਂ ਵਿਸ੍ਸਜ੍ਜੇਸਿ. ‘‘ਰਜ੍ਜ’’ਨ੍ਤਿ ਇਮਿਨਾ ‘‘ਕਿ’’ਨ੍ਤਿ ਪੁਚ੍ਛਂ ਵਿਸ੍ਸਜ੍ਜੇਸਿ. ਸਪਤ੍ਤਗਣਨ੍ਤਿ ਵੇਰਿਗਣਂ. ਅਯਂ ਪਨੇਤ੍ਥ ਯੋਜਨਾ – ਰਞ੍ਞਾ ਸਪਤ੍ਤਗਣਂ ਅਭਿਮਦ੍ਦਿਤ੍ਵਾ ਰਜ੍ਜਂ ਰਾਜਭਾਵਂ ਜਿਤਂ ਵਿਯ, ਭਗਵਤਾ ਕਿਲੇਸਗਣਂ ਅਭਿਮਦ੍ਦਿਤ੍ਵਾ ਨਿਬ੍ਬਾਨਂ ਜਿਤਨ੍ਤਿ. ਸ੍ਵੇਵਾਤਿ ਭਗਵਾ ਏਵ. ‘‘ਨਿਬ੍ਬਿਕਾਰਤਾਯਾ’’ਤਿ ਇਮਿਨਾ ਤਾਦਿਸਦ੍ਦੋ ਨਿਬ੍ਬਿਕਾਰਤ੍ਥਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋਤਿ ਦਸ੍ਸੇਤਿ. ‘‘ਵਿਵੇਕਪਞ੍ਚਕ’’ਨ੍ਤਿ ਇਮਿਨਾ ਕਾਯਚਿਤ੍ਤਉਪਧਿਵਸੇਨ ਵਿਵੇਕਤ੍ਤਯਮ੍ਪਿ ਗਹੇਤਬ੍ਬਂ ਵਿਵੇਕਭਾਵੇਨ ਸਮਾਨਤ੍ਤਾ. ਤੇਨ ਭਗਵਤਾਤਿ ਸਮ੍ਬਨ੍ਧੋ. ‘‘ਯਾਨਿ ਸਤ੍ਤ ਆਪਤ੍ਤਿਕ੍ਖਨ੍ਧਾਨੀ’’ਤਿ ਇਮਿਨਾ ਏਕੇਤ੍ਥਾਤਿ ਏਤ੍ਥ ਏਕਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਤਤ੍ਥਾਤਿ ਸਤ੍ਤਸੁ ਆਪਤ੍ਤਿਕ੍ਖਨ੍ਧੇਸੁ. ਏਤ੍ਥ ਪਨਾਤਿ ਸਮਥੇਸੁ ਪਨ. ਹੀਤਿ ਸਚ੍ਚਂ. ਤਸ੍ਸਾਤਿ ਸਮ੍ਮੁਖਾਵਿਨਯਸ੍ਸ. ਅਟ੍ਠਕਥਾਸੂਤਿ ਸਬ੍ਬਅਟ੍ਠਕਥਾਸੁ. ਮਯਂ ਪਨਾਤਿ ਸਙ੍ਗਹਕਾਰਕਾ ਅਮ੍ਹੇ ਪਨ, ਬੁਦ੍ਧਘੋਸਨਾਮਕਾ ਮਯਂ ਪਨਾਤਿ ਅਤ੍ਥੋ, ਰੋਚਯਾਮਾਤਿ ਸਮ੍ਬਨ੍ਧੋ. ਕਸ੍ਸ ਕਿਮਤ੍ਥਂ ਗਹੇਤ੍ਵਾ ਰੋਚੇਸੀਤਿ ਆਹ ‘‘ਵਿਨਾਤਿ ਨਿਪਾਤਸ੍ਸ ਪਟਿਸੇਧਨਮਤ੍ਥਮਤ੍ਤ’’ਨ੍ਤਿ. ‘‘ਵਿਨਾਤਿ ਨਿਪਾਤਸ੍ਸਾ’’ਤਿ ਪਦਂ ‘‘ਅਤ੍ਥਮਤ੍ਤ’’ਨ੍ਤਿ ਪਦੇ ਵਾਚਕਸਮ੍ਬਨ੍ਧੋ. ਅਤ੍ਤਨੋ ਸਾਧ੍ਯਵਚਨਂ ਬੁਦ੍ਧਵਚਨਸਙ੍ਖਾਤੇਨ ਸਾਧਕਵਚਨੇਨ ਸਾਧੇਨ੍ਤੋ ਆਹ ‘‘ਵੁਤ੍ਤਮ੍ਪਿ ਚੇਤ’’ਨ੍ਤਿਆਦਿ.

ਅਟ੍ਠਾਰਸ ਅਟ੍ਠਕਾਨੀਤਿ ਅਧਮ੍ਮਦਿਟ੍ਠਿਭੇਦ, ਧਮ੍ਮਦਿਟ੍ਠਿਭੇਦ, ਵੇਮਤਿਕਭੇਦੇਸੁ ਤੀਸੁ ਏਕਮੇਕਂ ਮੂਲਂ ਕਤ੍ਵਾ ਤਯੋ ਤਯੋ ਮੂਲਿਂ ਕਤ੍ਵਾ ਨਵ ਹੋਨ੍ਤਿ, ਤੇਸੁ ਧਮ੍ਮਦਿਟ੍ਠਿਭੇਦੇਸੁ ਧਮ੍ਮਦਿਟ੍ਠਿਭੇਦਂ ਅਪਨੇਤ੍ਵਾ ਅਟ੍ਠ ਹੋਨ੍ਤਿ, ਤਾਨਿ ਅਟ੍ਠਾਰਸ ਭੇਦਕਰਵਤ੍ਥੂਸੁ ਯੋਜੇਤ੍ਵਾ ਅਟ੍ਠਾਰਸ ਅਟ੍ਠਕਾਨਿ ਹੋਨ੍ਤੀਤਿ ਦਟ੍ਠਬ੍ਬਂ. ਛਊਨਦਿਯਡ੍ਢਸਤਨ੍ਤਿ ਚਤੁਚਤ੍ਤਾਲੀਸਾਧਿਕਂ ਸਤਨ੍ਤਿ ਵੁਤ੍ਤਂ ਹੋਤਿ.

ਏਕੇਕਵਤ੍ਥੁਸ੍ਮਿਨ੍ਤਿ ਅਟ੍ਠਾਰਸਸੁ ਭੇਦਕਰਵਤ੍ਥੂਸੁ ਏਕੇਕਸ੍ਮਿਂ ਵਤ੍ਥੁਸ੍ਮਿਂ.

ਇਤਿ ਗਾਥਾਸਙ੍ਗਣਿਕਵਣ੍ਣਨਾਯ ਯੋਜਨਾ ਸਮਤ੍ਤਾ.