ਪਠਮਗਾਥਾਸਙ੍ਗਣਿਕਂ

ਸਤ੍ਤਨਗਰੇਸੁ ਪਞ੍ਞਤ੍ਤਸਿਕ੍ਖਾਪਦਵਣ੍ਣਨਾ

੩੩੫. ਏਕਂਸਨ੍ਤਿ ਏਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਏਕਸ੍ਮਿਂ ਅਂਸੇ’’ਤਿ. ਦਸਨਖਸਮੋਧਾਨਸਮੁਜ੍ਜਲਨ੍ਤਿ ਦਸਨ੍ਨਂ ਨਖਾਨਂ ਸਮੂਹੇਨ ਸੁਟ੍ਠੁ ਉਜ੍ਜਲਂ. ਏਤ੍ਥ ‘‘ਸਮੁਜ੍ਜਲ’’ਨ੍ਤਿ ਇਮਿਨਾ ਅਞ੍ਜਲਿਨ੍ਤਿ ਪਦਸ੍ਸ ਆਦਰੇਨ, ਅਭਿਮੁਖਂ ਵਾ ਜਲਤਿ ਦਿਬ੍ਬਤੀਤਿ ਅਞ੍ਜਲੀਤਿ ਅਤ੍ਥਂ ਦਸ੍ਸੇਤਿ. ਆਸੀਸਮਾਨਰੂਪੋਵਾਤਿ ਏਤ੍ਥ ਆਸੀਸਮਾਨਰੂਪੋ ਏਵਾਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਪਚ੍ਚਾਸੀਸਮਾਨਰੂਪੋ ਵਿਯਾ’’ਤਿ. ਏਤ੍ਥ ‘‘ਵਿਯਾ’’ਤਿ ਇਮਿਨਾ ‘‘ਆਸੀਸਮਾਨੋ ਇਵਾ’’ਤਿ ਪਦਵਿਭਾਗਂ ਕਤ੍ਵਾ ਇਵਸਦ੍ਦੋ ਉਪਮਤ੍ਥਜੋਤਕੋਤਿ ਦਸ੍ਸੇਤਿ. ਕਿਸ੍ਸਾਤਿ ਏਤ੍ਥ ਕਰਣਤ੍ਥੇ ਛਟ੍ਠੀਵਿਭਤ੍ਤਿ ਹੋਤੀਤਿ ਆਹ ‘‘ਕੇਨ ਕਾਰਣੇਨਾ’’ਤਿ. ਇਧਾਤਿ ਮਮ ਨਿਸਿਨ੍ਨਟ੍ਠਾਨਂ. ‘‘ਆਗਤੋ’’ਤਿ ਇਮਿਨਾ ਇਧਮਾਗਤੋਤਿ ਏਤ੍ਥ ਮਕਾਰੋ ਪਦਸਨ੍ਧਿਕਰਮਤ੍ਤੋਤਿ ਦਸ੍ਸੇਤਿ. ਅਸ੍ਸਾਤਿ ਉਪਾਲਿਸ੍ਸ ਵਿਸ੍ਸਜ੍ਜੇਸੀਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਞ੍ਹੇਸੁ. ਇਤੀਤਿ ਏਵਂ.

ਤਤ੍ਥਾਤਿ ਵਿਸ੍ਸਜ੍ਜਨੇ. ਭਦ੍ਦਕੋ ਤੇ ਉਮ੍ਮਙ੍ਗੋਤਿ ਏਤ੍ਥ ਉਮ੍ਮਙ੍ਗਸਦ੍ਦੋ ਪਞ੍ਹਵਾਚਕੋਤਿ ਆਹ ‘‘ਭਦ੍ਦਕਾ ਤੇ ਪਞ੍ਹਾ’’ਤਿ. ਤਤ੍ਥ ਤੇਤਿ ਤਵ. ਕਸ੍ਮਾ ਪਞ੍ਹਾ ‘‘ਉਮ੍ਮਙ੍ਗੋ’’ਤਿ ਵੁਚ੍ਚਤੀਤਿ ਆਹ ‘‘ਪਞ੍ਚਾ ਹੀ’’ਤਿਆਦਿ. ਹਿ ਯਸ੍ਮਾ ਉਮ੍ਮਙ੍ਗੋਤਿ ਵੁਚ੍ਚਤਿ, ਤਸ੍ਮਾ ਪਞ੍ਹਾ ਉਮ੍ਮਙ੍ਗੋ ਨਾਮਾਤਿ ਯੋਜਨਾ. ‘‘ਉਮ੍ਮੁਜ੍ਜਿਤ੍ਵਾ ਠਿਤਤ੍ਤਾ’’ਤਿ ਇਮਿਨਾ ਉਮ੍ਮੁਜ੍ਜਤੀਤਿ ਉਮ੍ਮਙ੍ਗੋਤਿ ਵਚਨਤ੍ਥਂ ਦਸ੍ਸੇਤਿ. ਮੁਜਧਾਤੁ ਉਕਾਰਸ੍ਸ ਅਕਾਰੋ, ਅਵਿਜ੍ਜਨ੍ਧਕਾਰਸਙ੍ਖਾਤਾ ਉਦਕਤੋ ਉਮ੍ਮੁਜ੍ਜਤੀਤਿ ਅਤ੍ਥੋ. ‘‘ਤਗ੍ਘਾ’’ਤਿ ਨਿਪਾਤਸ੍ਸ ਤਸ੍ਮਾ ਕਾਰਣਾਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ’’ਤਿਆਦਿ. ‘‘ਸਮ੍ਪਟਿਚ੍ਛਨਤ੍ਥੇ’’ਤਿ ਇਮਿਨਾ ਤਗ੍ਘਸਦ੍ਦੋ ਸਾਧੁਅਤ੍ਥੋਤਿ ਦਸ੍ਸੇਤਿ, ਤਗ੍ਘ ਸਾਧੂਤਿ ਅਤ੍ਥੋ. ਤੀਣਿਯੇਵਾਤਿ ‘‘ਸਮਾਦਹਿਤ੍ਵਾ ਵਿਸਿਬ੍ਬੇਨ੍ਤੀ’’ਤਿ ਏਕਂ, ‘‘ਸਾਮਿਸੇਨਾ’’ਤਿ ਏਕਂ, ‘‘ਸਸਿਤ੍ਥਕ’’ਨ੍ਤਿ ਏਕਨ੍ਤਿ ਇਮਾਨਿ ਤੀਣਿਯੇਵ.

ਚਤੁਵਿਪਤ੍ਤਿਵਣ੍ਣਨਾ

੩੩੬. ਯਂ ਤਂ ਪੁਚ੍ਛਿਮ੍ਹਾਤਿ ਏਤ੍ਥ ਨਿਗ੍ਗਹਿਤਤੋ ਪਰਂ ਅਕਾਰਲੋਪੋਤਿ ਆਹ ‘‘ਯਂ ਤਂ ਅਪੁਚ੍ਛਿਮ੍ਹਾ’’ਤਿ. ਤਤ੍ਥ ਯਨ੍ਤਿ ਪਞ੍ਹਂ. ਤਨ੍ਤਿ ਤੁਵਂ. ‘‘ਤ੍ਵ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਤਂ ਤਦੇਵਾਤਿ ਤਂ ਤਂ ਏਵ ਪਞ੍ਹਂ. ਅਞ੍ਞਥਾਤਿ ਅਞ੍ਞਂ ਆਕਾਰਂ.

ਯੇ ਦੁਟ੍ਠੁਲ੍ਲਾ ਸਾ ਸੀਲਵਿਪਤ੍ਤੀਤਿ ਏਤ੍ਥ ਨਨੁ ਸੀਲਵਿਪਤ੍ਤਿਂ ਪੁਚ੍ਛਨ੍ਤੋ ਪਞ੍ਹੋ ਨਤ੍ਥਿ, ਕਸ੍ਮਾ ਪਨ ‘‘ਸਾ ਸੀਲਵਿਪਤ੍ਤੀ’’ਤਿ ਵਿਸ੍ਸਜ੍ਜਨਂ ਵੁਤ੍ਤਨ੍ਤਿ ਆਹ ‘‘ਕਿਞ੍ਚਾਪੀ’’ਤਿਆਦਿ. ਏਤਨ੍ਤਿ ‘‘ਯੇ ਦੁਟ੍ਠੁਲ੍ਲਾ ਸਾ ਸੀਲਵਿਪਤ੍ਤੀ’’ਤਿ ਵਚਨਂ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਚਤੂਸੁ ਹੀ’’ਤਿਆਦਿ. ਵਤ੍ਵਾਤਿ ਸਂਖੇਪੇਨ ਵਤ੍ਵਾ.

ਤਿਸ੍ਸਨ੍ਨਂ ਵਿਪਤ੍ਤੀਨਨ੍ਤਿ ਸੀਲਵਿਪਤ੍ਤਿਤੋ ਅਵਸੇਸਾਨਂ ਤਿਸ੍ਸਨ੍ਨਂ ਵਿਪਤ੍ਤੀਨਂ. ਤਤ੍ਥਾਤਿ ‘‘ਥੁਲ੍ਲਚ੍ਚਯ’’ਨ੍ਤਿਆਦਿਵਚਨੇ.

‘‘ਅਬ੍ਭਾਚਿਕ੍ਖਨ੍ਤੀ’’ਤਿ ਪਦਸ੍ਸ ਕਤ੍ਤਾਰਂ ਦਸ੍ਸੇਨ੍ਤੋ ਆਹ ‘‘ਵਦਨ੍ਤਾ’’ਤਿ. ‘‘ਤਥਾਹ’’ਨ੍ਤਿਆਦਿਨਾ ਵਦਨਾਕਾਰਂ ਦਸ੍ਸੇਤਿ.

‘‘ਅਯਂ ਛਹੀ’’ਤਿ ਇਮਿਨਾ ਅਯਂ ਸਾਤਿ ਏਤ੍ਥ ਸਾਸਦ੍ਦੋ ਪਦਾਲਙ੍ਕਾਰੋਤਿ ਦਸ੍ਸੇਤਿ. ਏਤ੍ਤਾਵਤਾਤਿ ਏਤ੍ਤਕੇਨ ‘‘ਥੁਲ੍ਲਚ੍ਚਯ’’ਨ੍ਤਿਆਦਿਵਚਨਮਤ੍ਤੇਨ. ਵਿਸ੍ਸਜ੍ਜਿਤਂ ਹੋਤੀਤਿ ਸਮ੍ਬਨ੍ਧੋ.

ਛੇਦਨਕਾਦਿਵਣ੍ਣਨਾ

੩੩੭. ਕਤਿ ਛੇਦਨਕਾਨੀਤਿਆਦਿਪੁਚ੍ਛਾਨਂ ਅਨੁਸਨ੍ਧਿਪੁਚ੍ਛਾਭਾਵਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਪੁਚ੍ਛਾ ਹਿ ਅਨੁਸਨ੍ਧਿਅਨਨੁਸਨ੍ਧਿਵਸੇਨ ਦੁਵਿਧਾ. ਤਤ੍ਥ ਵਿਸ੍ਸਜ੍ਜਨੇਨ ਅਨੁਸਨ੍ਧਿਵਸੇਨ ਪੁਚ੍ਛਾ ਅਨੁਸਨ੍ਧਿਪੁਚ੍ਛਾ ਨਾਮ, ਵਿਸ੍ਸਜ੍ਜਨਮਨਪੇਕ੍ਖਿਤ੍ਵਾ ਯਥਾਕਾਮਪੁਚ੍ਛਾ ਅਨਨੁਸਨ੍ਧਿਪੁਚ੍ਛਾ ਨਾਮ. ਤਾਸਂ ਵਿਤ੍ਥਾਰੋ ਨੇਤ੍ਤਿਅਟ੍ਠਕਥਾਦੀਸੁ ਗਹੇਤਬ੍ਬੋ. ਇਧਾਪਿ ‘‘ਏਕਾਦਸ ਯਾਵਤਤਿਯਕਾ’’ਤਿ ਵਿਸ੍ਸਜ੍ਜਨੇਨ ਅਨੁਸਨ੍ਧਾਨਤ੍ਤਾ ਅਨੁਸਨ੍ਧਿਪੁਚ੍ਛਾ ਨਾਮ. ਯਸ੍ਮਾ ਪਨ ਵਿਸ੍ਸਜ੍ਜਿਤੋਤਿ ਸਮ੍ਬਨ੍ਧੋ. ਸਙ੍ਖਾਵਸੇਨਾਤਿ ਏਕਾਦਸਾ’’ਤਿ ਸਙ੍ਖਾਯ ਸਤ੍ਤਿਯਾ, ਆਯਤ੍ਤੇਨ ਵਾ. ਸਙ੍ਖਾਨੁਸਨ੍ਧਿਵਸੇਨੇਵਾਤਿ ‘‘ਕਤੀ’’ਤਿ ਸਙ੍ਖਾਯ ਅਨੁਸਨ੍ਧਿਵਸੇਨ ਏਵ. ਤੇਸਨ੍ਤਿ ਪਞ੍ਹਾਨਂ. ਤਤ੍ਥਾਤਿ ‘‘ਛ ਛੇਦਨਕਾਨੀ’’ਤਿਆਦਿਪਾਠੇ. ਇਦਮੇਵਾਤਿ ਇਦਂ ਏਵ ਵਚਨਂ. ਅਪੁਬ੍ਬਨ੍ਤਿ ਪੁਬ੍ਬੇ ਨ ਵੁਤ੍ਤਂ, ਅਪੋਰਾਣਂ ਨਵਨ੍ਤਿ ਅਤ੍ਥੋ. ਯਂ ਪਨੇਤਨ੍ਤਿ ਯਂ ਪਨ ਏਤਂ ਵਚਨਂ. ‘‘ਸੋਲ਼ਸਾ’’ਤਿ ਇਮਿਨਾ ਸੋਦਸਾਤਿ ਏਤ੍ਥ ਦਕਾਰਸ੍ਸ ਲ਼ਕਾਰਂ ਕਤ੍ਵਾ ‘‘ਸੋਲ਼ਸਾ’’ਤਿ ਪਾਠੋਪਿ ਯੁਜ੍ਜਤੀਤਿ ਦਸ੍ਸੇਤਿ. ਜਾਨਨ੍ਤਿ ਪਞ੍ਞਤ੍ਤਾਤਿ ਏਤ੍ਥ ‘‘ਏਵਂ ਵਤ੍ਵਾ’’ਤਿ ਪਾਠਸੇਸਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਭਾਵਂ ਦਸ੍ਸੇਨ੍ਤੋ ਆਹ ‘‘ਜਾਨ’’ਨ੍ਤਿ ਏਵਂ ਵਤ੍ਵਾ ਪਞ੍ਞਤ੍ਤਾ’’ਤਿ. ਤੇਤਿ ‘‘ਜਾਨ’’ਨ੍ਤਿ ਪਞ੍ਞਤ੍ਤਾ ਸਿਕ੍ਖਾਪਦਾਤਿ ਅਤ੍ਥੋ. ਏਵਨ੍ਤਿ ਵਕ੍ਖਮਾਨਨਯੇਨ. ਪਵਿਸੇਯ੍ਯਾਤੀਤਿ ਏਤ੍ਥ ਇਤਿਸਦ੍ਦੋ ਪਰਿਸਮਾਨਤ੍ਥੋ. ਇਤਿ ਵੇਦਿਤਬ੍ਬੋਤਿ ਯੋਜਨਾ.

ਅਸਾਧਾਰਣਾਦਿਵਣ੍ਣਨਾ

੩੩੮. ਪੁਰਿਮ ਪਞ੍ਹਨ੍ਤਿ ‘‘ਕਤਿ ਛੇਦਨਕਾਨੀ’’ਤਿਆਦਿਪਞ੍ਹਾਨਂ ਪੁਰੇ ਵੁਤ੍ਤਂ ਪਞ੍ਹਂ. ਤਤ੍ਥਾਤਿ ‘‘ਵੀਸਂ ਦ੍ਵੇ ਸਤਾਨੀ’’ਤਿਆਦਿਪਾਠੇ. ‘‘ਦ੍ਵੇਅਨਿਯਤੇਹੀ’’ਤਿ ਪਦਸ੍ਸ ਅਸਮਾਹਾਰਦਿਗੁਵਾਕ੍ਯਂ ਦਸ੍ਸੇਨ੍ਤੋ ਆਹ ‘‘ਦ੍ਵੀਹਿ ਅਨਿਯਤੇਹੀ’’ਤਿ. ‘‘ਸਦ੍ਧਿ’’ਨ੍ਤਿ ਇਮਿਨਾ ਸਹਾਦਿਯੋਗੇ ਕਰਣਵਚਨਨ੍ਤਿ ਦਸ੍ਸੇਤਿ.

ਗਾਥਾਯਂ ‘‘ਧੋਵਨਞ੍ਚ ਸਿਕ੍ਖਾਪਦ’’ਨ੍ਤਿਆਦਿਨਾ ਯੋਜਨਾ ਕਾਤਬ੍ਬਾ. ਦ੍ਵੇ ਲੋਮਾਤਿ ਦ੍ਵੇ ਏਲ਼ਕਲੋਮਸਿਕ੍ਖਾਪਦਾਨਿ.

‘‘ਸਕਲੋ’’ਤਿਆਦਿਕਾਯ ਅਡ੍ਢਤੇਯ੍ਯਗਾਥਾਯ ਯੋਜਨਾ ਸੁਵਿਞ੍ਞੇਯ੍ਯਾਵ.

ਸਙ੍ਘਮ੍ਹਾ ਦਸ ਨਿਸ੍ਸਰੇਤਿ ਏਤ੍ਥ ‘‘ਸਙ੍ਘਮ੍ਹਾ ਨਿਸ੍ਸਾਰੀਯਤੀ’’ਤਿ (ਪਾਚਿ. ੬੮੦, ੭੩੦) ਏਵਂ ਵੁਤ੍ਤਾ ਦਸਾਤਿ ਯੋਜਨਾਨਯਂ ਦਸ੍ਸੇਨ੍ਤੋ ਆਹ ‘‘ਸਙ੍ਘਮ੍ਹਾ ਨਿਸ੍ਸਾਰੀਯਤੀ’’ਤਿਆਦਿ. ਤਤ੍ਥਾਤਿ ਭਿਕ੍ਖੁਨਿਵਿਭਙ੍ਗੇ. ਤਥਾਤਿ ਯਥਾ ਖੁਦ੍ਦਕਾ, ਤਥਾਤਿ ਅਤ੍ਥੋ. ਇਤੀਤਿ ਏਵਂ.

ਤੇਸਨ੍ਤਿ ਪਾਰਾਜਿਕਾਨਂ. ਕਣ੍ਹਸਪ੍ਪਾਦਯੋ ਦੁਰਾਸਦਾ ਵਿਯ ਦੁਰਾਸਦਾ ਹੋਨ੍ਤੀਤਿ ਯੋਜਨਾ. ‘‘ਦੁਰੂਪਗਮਨਾਤਿ ਇਮਿਨਾ ਸਦਧਾਤੁਯਾ ਗਤ੍ਯਤ੍ਥਂ ਦਸ੍ਸੇਤਿ. ਦੁਰਾਸਜ੍ਜਨਾਤਿ ਦੁਕ੍ਖੇਨ ਆਸਜ੍ਜਿਤਬ੍ਬਾ, ਆਸਜ੍ਜਿਤੁਂ ਨ ਸੁਕਰਾਤਿ ਅਤ੍ਥੋ. ਸਮੂਪਮਾਤਿ ਸਮਉਪਮਾ. ਸਮੂਪਮਾਕਾਰਂ ਦਸ੍ਸੇਨ੍ਤੋ ਆਹ ‘‘ਯਥਾ’’ਤਿਆਦਿ.

ਸਾਧਾਰਣਨ੍ਤਿ ਅਟ੍ਠਹਿ ਪਾਰਾਜਿਕੇਹਿ ਸਾਧਾਰਣਂ. ਏਕੇਕਸ੍ਸ ਪਾਰਾਜਿਕਸ੍ਸਾਤਿ ਸਮ੍ਬਨ੍ਧੋ. ਅਵਿਰੂਲ਼੍ਹੀ ਭਵਨ੍ਤਿ ਤੇਤਿ ਏਤ੍ਥ ਉਪਮਾਨੋਪਮੇਯ੍ਯਾਨਂ ਪਾਕਟਭਾਵਂ ਕਤ੍ਵਾ ਯੋਜਨਾਨਯਂ ਦਸ੍ਸੇਨ੍ਤੋ ਆਹ ‘‘ਯਥਾ ਏਤੇ’’ਤਿਆਦਿ. ਅਵਿਰੂਲ਼੍ਹਿਧਮ੍ਮਾਤਿ ਅਵਿਰੂਲ਼੍ਹੀਸਭਾਵਾ. ਪਕਤਿਸੀਲਭਾਵੇਨਾਤਿ ਪਕਤਿਯਾ ਸੀਲਵਨ੍ਤਭਾਵੇਨ, ‘‘ਪਕਤਿਸੀਲਾਭਾਵੇਨਾ’’ਤਿਪਿ ਪਾਠੋ, ਪਕਤਿਸੀਲਸ੍ਸ ਅਭਾਵੇਨ, ਅਭਾਵਹੇਤੂਤਿ ਅਤ੍ਥੋ. ਏਤ੍ਤਾਵਤਾਤਿ ਏਤ੍ਤਕੇਨ ‘‘ਅਟ੍ਠੇਵ ਪਾਰਾਜਿਕਾ’’ਤਿਆਦਿਵਚਨਮਤ੍ਤੇਨ, ਦਸ੍ਸਿਤਂ ਹੋਤੀਤਿ ਸਮ੍ਬਨ੍ਧੋ. ਵਿਭਤ੍ਤਿਯੋਤਿ ਪਾਰਾਜਿਕਾਦਿਵਸੇਨ ਵਿਭਜਿਤਬ੍ਬਾਤਿ ਵਿਭਤ੍ਤਿਯੋਤਿ. ਤਤ੍ਥਾਤਿ ‘‘ਤੇਵੀਸਤਿ ਸਙ੍ਘਾਦਿਸੇਸਾ’’ਤਿਆਦਿਪਾਠੇ. ਸਬ੍ਬਸਙ੍ਗਾਹਿਕਵਚਨਨ੍ਤਿ ਸਬ੍ਬੇਸਂ ਤਿਣ੍ਣਂ ਸਮਥਾਨਂ, ਸਬ੍ਬਾਸਂ ਵਾ ਆਪਤ੍ਤੀਨਂ ਸਮਥਾਨਂ ਸਙ੍ਗਾਹਿਕਵਚਨਂ. ‘‘ਦ੍ਵੀਹਿ ਸਮਥੇਹੀ’’ਤਿ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚਾਤਿ ਦ੍ਵੀਹਿ ਸਮਥੇਹਿ.

ਏਤਨ੍ਤਿ ‘‘ਦ੍ਵੇ ਉਪੋਸਥਾ ਦ੍ਵੇ ਪਵਾਰਣਾ’’ਤਿ ਵਚਨਂ. ਵਿਭਜਨਾਨੀਤਿ ਵਿਭਜਿਤਬ੍ਬਾਨਂ ਵਿਭਜਨਕਿਰਿਯਾਯ ਅਵਿਨਾਭਾਵਤੋ ਭਾਵਵਸੇਨ ਵੁਤ੍ਤਂ, ਤਸ੍ਮਾ ਵਿਭਜਿਤਬ੍ਬਾਤਿ ਵਿਭਤ੍ਤਿਯੋਤਿ ਵਚਨਤ੍ਥੋ ਕਾਤਬ੍ਬੋ. ਅਪਰਾਪਿ ਇਮਾ ਵਿਭਤ੍ਤਿਯੋ ਹੋਨ੍ਤੀਤਿ ਯੋਜਨਾ. ਹੇਟ੍ਠਾ ਵੁਤ੍ਤਸ੍ਸ ‘‘ਵਿਭਤ੍ਤਿਮਤ੍ਤਦਸ੍ਸਨੇਨੇਵ ਚੇਤਂ ਵੁਤ੍ਤਂ, ਨ ਸਮਥੇਹਿ ਵੂਪਸਮਨਵਸੇਨਾ’’ਤਿ ਵਚਨਸ੍ਸ ਅਤ੍ਥਨਯਤੋ ਅਞ੍ਞਂ ਅਤ੍ਥਨਯਂ ਦਸ੍ਸੇਨ੍ਤੋ ਆਹ ‘‘ਅਥਵਾ’’ਤਿਆਦਿ, ‘‘ਇਮਾਪਿ ਵਿਭਤ੍ਤਿਯੋ’’ਤਿ ਪਦਂ ‘‘ਨਿਸ੍ਸਾਯਾ’’ਤਿ ਪਦੇ ਅਵੁਤ੍ਤਕਮ੍ਮਂ. ਨਿਸ੍ਸਾਯ ਆਪਜ੍ਜਨ੍ਤੀਤਿ ਸਮ੍ਬਨ੍ਧੋ. ਤਾਤਿ ਆਪਤ੍ਤਿਯੋ. ਵੁਤ੍ਤਪ੍ਪਕਾਰੇਹੇਵਾਤਿ ਤੀਹਿ ਸਮਥੇਹੀਤਿ ਵੁਤ੍ਤਪਕਾਰੇਹੇਵ. ਤਂਮੂਲਿਕਾਨਨ੍ਤਿ ਤੇ ਏਵ ਉਪੋਸਥਾਦਯੋ ਮੂਲਮੇਤਾਸਨ੍ਤਿ ਤਂਮੂਲਿਕਾ, ਤਾਸਂ. ਇਮਿਨਾ ਕਾਰਿਯੂਪਚਾਰੇਨ ਵੁਤ੍ਤਨਯਂ ਦਸ੍ਸੇਤਿ. ਤਾ ਵਿਭਤ੍ਤਿਯੋਤਿ ਉਪੋਸਥਾਦਿਵਿਭਤ੍ਤਿਯੋ.

ਪਾਰਾਜਿਕਾਦਿਆਪਤ੍ਤਿਵਣ੍ਣਨਾ

੩੩੯. ਏਵਂ ਵਿਸ੍ਸਜ੍ਜੇਤ੍ਵਾਤਿ ਸਮ੍ਬਨ੍ਧੋ. ਯਦਿਦਂ ਆਪਤ੍ਤਿਪਾਰਾਜਿਕਂ ਨਾਮਾਤਿ ਯੋਜਨਾ. ਆਪਤ੍ਤਿਪਾਰਾਜਿਕਨ੍ਤਿ ਆਪਤ੍ਤਿਸਙ੍ਖਾਤਂ ਪਾਰਾਜਿਕਂ. ‘‘ਪਰਾਜਯਮਾਪਨ੍ਨੋ’’ਤਿ ਇਮਿਨਾ ਸਾਸਨਤੋ ਪੁਗ੍ਗਲਂ ਪਰਾਜੇਤੀਤਿ ਪਾਰਾਜਿਕਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਣ੍ਯਪਚ੍ਚਯੋ ਹੇਤੁਕਤ੍ਵਤ੍ਥਵਾਚਕੋ, ਯਕਾਰਸ੍ਸ ਕਕਾਰੋ. ਚੁਤੋਤਿ ਚਵਕੋ. ਪਰਦ੍ਧੋਤਿ ਵਿਰਦ੍ਧੋ. ਭਟ੍ਠੋਤਿ ਪਤਿਤੋ. ਨਿਰਙ੍ਕਤੋਤਿ ਸਙ੍ਘਮ੍ਹਾ ਅਪਸਾਰਿਤੋ. ਅਨੀਹਤੇ ਤਸ੍ਮਿਂ ਪੁਗ੍ਗਲੇਤਿ ਤਸ੍ਮਿਂ ਪੁਗ੍ਗਲੇ ਸਙ੍ਘਮ੍ਹਾ ਨੀਹਰਿਤ੍ਵਾ ਨ ਹਰਿਤੇ, ਅਨਪਨੀਤੇਤਿ ਅਤ੍ਥੋ. ‘‘ਉਪੋਸਥਪਵਾਰਣਾਦਿਭੇਦੋ’’ਤਿ ਇਮਿਨਾ ਸਂਵਾਸਸਰੂਪਂ ਦਸ੍ਸੇਤਿ. ਬ੍ਯਞ੍ਜਨੇ ਆਦਰਮਕਤ੍ਵਾ ‘‘ਏਤਂ ਆਪਤ੍ਤੀ’’ਤਿ ਵੁਤ੍ਤਂ. ਅਯਂ ਹੀਤਿ ਅਯਂ ਏਵਂ ਵਕ੍ਖਮਾਨੋ. ਏਤ੍ਥਾਤਿ ਗਾਥਾਯਂ. ਤੇਨ ਤਸ੍ਮਾਤਿ ਏਤ੍ਥ ‘‘ਤਸ੍ਮਾ’’ਤਿ ਪਦੇਨ ‘‘ਤੇਨਾ’’ਤਿ ਪਦਸ੍ਸ ਕਾਰਣਤ੍ਥਂ ਦਸ੍ਸੇਤਿ.

ਏਤ੍ਥਾਤਿ ਦੁਤਿਯਗਾਥਾਯਂ. ਆਦਿਮ੍ਹਿ ਚੇਵ ਇਚ੍ਛਿਤਬ੍ਬੋਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਏਤ੍ਥਾਤਿ ਪਰਿਵਾਸਦਾਨਾਦੀਸੁ ਚਤੂਸੁ ਕਮ੍ਮੇਸੁ. ‘‘ਸਙ੍ਘੋ’’ਤਿਆਦਿਵਚਨਤ੍ਥੋ ਤਿਪਦਭਿਨ੍ਨਾਧਿਕਰਣਬਾਹਿਰਤ੍ਥਸਮਾਸੋ ਹੋਤਿ, ਚੇਵਸਦ੍ਦਚਸਦ੍ਦੇਹਿ ਆਦਿਸੇਸਪਦਾਨਂ ਉਭਯਪਦਤ੍ਥਪਧਾਨਭਾਵਂ ਦਸ੍ਸੇਤਿ, ‘‘ਇਚ੍ਛਿਤਬ੍ਬੋ’’ਤਿ ਪਦਂ ਕਾਰਕਾਨਂ ਕਿਰਿਯਾਪੇਕ੍ਖਤ੍ਤਾ ਕਿਰਿਯਤ੍ਥਾਯ ਪਕ੍ਖਿਤ੍ਤਂ. ਅਸ੍ਸਾਤਿ ਆਪਤ੍ਤਿਯਾ, ਇਮਿਨਾ ਅਞ੍ਞਪਦਂ ਦਸ੍ਸੇਤਿ. ਇਚ੍ਛਿਤਬ੍ਬਤ੍ਥੇ ਅਪਚ੍ਚਯਂ ਕਤ੍ਵਾ ਤਦ੍ਧਿਤਨ੍ਤਿਪਿ ਵਦਨ੍ਤਿ. ਲਹੁਕਨਯੋ ਪਨੇਸ. ਅਯਂ ਪਨੇਤ੍ਥ ਗਰੁਕਨਯੋ – ਆਦਿ ਚ ਸੇਸੋ ਚ ਆਦਿਸੇਸਾ, ਸਙ੍ਘੋ ਆਦਿਸੇਸੇਸੁ ਅਸ੍ਸਾ ਇਚ੍ਛਿਤਬ੍ਬੋਤਿ ਸਙ੍ਘਾਦਿਸੇਸੋਤਿ.

ਅਨੇਕਂਸਿਕਤਂ ਪਦਨ੍ਤਿ ਏਤ੍ਥ ਪਦਨ੍ਤਿ ਸਿਕ੍ਖਾਪਦਂ. ਅਨੇਕਂਸੇਨ ਕਤਂ ਅਨੇਕਂਸਿਕਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ ਇਦਂ ਸਿਕ੍ਖਾਪਦਂ ਅਨੇਕਂਸੇਨ ਕਤ’’ਨ੍ਤਿ. ਯਸ੍ਮਾ ਕਤਂ, ਤਸ੍ਮਾ ਅਨਿਯਤੋਤਿ ਪਵੁਚ੍ਚਤੀਤਿ ਯੋਜਨਾ. ਤਤ੍ਥਾਤਿ ਅਨਿਯਤੇ. ਯਤ੍ਥਾਤਿ ਸਿਕ੍ਖਾਪਦੇ. ਸੋਪੀਤਿ ਸਿਕ੍ਖਾਪਦਧਮ੍ਮੋਪਿ.

ਅਚ੍ਚਯੇਸੂਤਿ ਦੋਸੇਸੁ. ਤੇ ਹਿ ਨਿਦ੍ਦੋਸਂ ਅਤਿਕ੍ਕਮ੍ਮ ਅਯਨ੍ਤਿ ਗਚ੍ਛਨ੍ਤਿ ਪਵਤ੍ਤਨ੍ਤੀਤਿ ਅਚ੍ਚਯਾਤਿ ਵੁਚ੍ਚਨ੍ਤਿ. ਤੇਨਾਤਿ ਅਚ੍ਚਯੇਨ. ਥੂਲੋਤਿ ਓਲ਼ਾਰਿਕੋ. ‘‘ਥੂਲਤ੍ਤਾ’’ਤਿ ਇਮਿਨਾ ‘‘ਤੇਨੇਤ’’ਨ੍ਤਿ ਏਤ੍ਥ ਤੇਨਸਦ੍ਦਸ੍ਸ ਕਾਰਣਤ੍ਥਂ ਦਸ੍ਸੇਤਿ. ਅਚ੍ਚਯਸ੍ਸ ਥੂਲਤ੍ਤਾਤਿ ਸਮ੍ਬਨ੍ਧੋ. ਏਤਨ੍ਤਿ ਆਪਤ੍ਤਿਧਮ੍ਮਂ. ਇਮਾਯ ਗਾਥਾਯ ਅਞ੍ਞੇਸਂ ਲਹੁਕਾਪਤ੍ਤੀਨਂ ਥੂਲੋ ਅਚ੍ਚਯੋ ਥੁਲ੍ਲਚ੍ਚਯੋਤਿ ਵਚਨਤ੍ਥਂ ਦਸ੍ਸੇਤਿ. ਦ੍ਵੇਭਾਵੇ ਸਤਿ ਸਂਯੋਗਪਰਤ੍ਤਾ ਰਸ੍ਸੋ ਹੋਤੀਤਿ ਦਟ੍ਠਬ੍ਬਂ.

‘‘ਨਿਸ੍ਸਜ੍ਜਿਤ੍ਵਾ ਦੇਸੇਤਬ੍ਬਤੋ’’ਤਿ ਇਮਿਨਾ ਨਿਸ੍ਸਜ੍ਜਨਂ ਨਿਸ੍ਸਗ੍ਗੋ, ਆਪਤ੍ਤਿਦੇਸਨਤੋ ਪੁਬ੍ਬਭਾਗੇ ਕਤ੍ਤਬ੍ਬਸ੍ਸ ਵਿਨਯਕਮ੍ਮਸ੍ਸੇਤਮਧਿਵਚਨਂ, ਸੋ ਏਤਸ੍ਸਤ੍ਥੀਤਿ ਨਿਸ੍ਸਗ੍ਗਿਯਨ੍ਤਿ ਵਚਨਤ੍ਥਂ ਦਸ੍ਸੇਤਿ.

ਕੁਸਲਧਮ੍ਮਸਦ੍ਦੇਨ ਕੁਸਲਚਿਤ੍ਤਮੇਵ ਗਹੇਤਬ੍ਬਨ੍ਤਿ ਆਹ ‘‘ਕੁਸਲਧਮ੍ਮਸਙ੍ਖਾਤਂ ਕੁਸਲਚਿਤ੍ਤ’’ਨ੍ਤਿ. ‘‘ਕੁਸਲਚਿਤ੍ਤਂ ਪਾਤੇਤੀ’’ਤਿ ਇਮਿਨਾ ਚਿਤ੍ਤਂ ਪਾਤੇਤੀਤਿ ਪਾਚਿਤ੍ਤਿਯਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਏਤ੍ਥ ‘‘ਚਿਤ੍ਤਪਾਤਿਯ’’ਨ੍ਤਿ ਵਤ੍ਤਬ੍ਬੇ ਪਦਵਿਪਰਿਯਾਯਂ ਕਤ੍ਵਾ, ਤਕਾਰਸ੍ਸ ਚ ਲੋਪਂ ਕਤ੍ਵਾ ‘‘ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ. ਅਚਿਨ੍ਤੇਯ੍ਯੋ ਹਿ ਪਾਲ਼ਿਨਯੋ. ਣ੍ਯਪਚ੍ਚਯੋ ਹੇਤੁਕਤ੍ਵਤ੍ਥਵਾਚਕੋ. ਨਨੁ ‘‘ਪਾਤੇਤਿ ਕੁਸਲਂ ਧਮ੍ਮ’’ਨ੍ਤਿ ਇਮਿਨਾਵ ‘‘ਪਾਚਿਤ੍ਤਿਯ’’ਨ੍ਤਿ ਪਦਸ੍ਸ ਨਿਬ੍ਬਚਨਂ ਸਿਦ੍ਧਂ, ਕਸ੍ਮਾ ਪਨ ‘‘ਅਪਰਜ੍ਝਤਿ ਚਿਤ੍ਤਸਮ੍ਮੋਹਨਟ੍ਠਾਨ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਯਂ ਪਨਾ’’ਤਿਆਦਿ. ਯਸ੍ਮਾ ਹੋਤੀਤਿ ਸਮ੍ਬਨ੍ਧੋ.

ਪਾਟਿਦੇਸਨੀਯਾਸੁ ਨਿਬ੍ਬਚਨਮੇਵ ਅਦਸ੍ਸੇਤ੍ਵਾ ਕਸ੍ਮਾ ‘‘ਭਿਕ੍ਖੁ ਅਞ੍ਞਾਤਕੋ ਸਨ੍ਤੋ’’ਤਿਆਦਿ ਵੁਤ੍ਤਨ੍ਤਿ ਆਹ ‘‘ਵੁਤ੍ਤਗਾਰਯ੍ਹਭਾਵਕਾਰਣਦਸ੍ਸਨਤ੍ਥਮੇਵਾ’’ਤਿ. ‘‘ਪਟਿਦੇਸੇਤਬ੍ਬਤੋ’’ਤਿ ਇਮਿਨਾ ਅਞ੍ਞਾਪਤ੍ਤਿਦੇਸਨਾਨਯਤੋ ‘‘ਗਾਰਯ੍ਹ’’ਨ੍ਤਿਆਦਿਨਾ ਪਟਿ ਵਿਸੁਂ ਵਤ੍ਵਾ ਦੇਸੇਤਬ੍ਬਾਤਿ ਪਾਟਿਦੇਸਨੀਯਾਤਿ ਨਿਬ੍ਬਚਨਂ ਦਸ੍ਸੇਤਿ.

ਦੁਕ੍ਕਟਨ੍ਤਿ ਏਤ੍ਥ ਦੁਸਦ੍ਦੋ ਦੁਟ੍ਠੁਅਤ੍ਥੋ ਚ ਵਿਰੂਪਤ੍ਥੋ ਚ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਦੁਟ੍ਠੁ ਕਤਂ, ਵਿਰੂਪਂ ਵਾ ਕਤ’’ਨ੍ਤਿ. ਤਨ੍ਤਿ ਕਮ੍ਮਂ. ਤਂ ਪਨੇਤਨ੍ਤਿ ਦੁਕ੍ਕਟਂ, ਖਲਿਤਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ਦੁਕ੍ਕਟਸ੍ਸ. ਤਸ੍ਸਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਹੀਤਿ ਵਿਤ੍ਥਾਰੋ. ਯਂ ਪਾਪਨ੍ਤਿ ਯੋਜਨਾ. ਯਦੀਤਿ ਅਥ. ਯਦਿਸਦ੍ਦੋ ਹਿ ਅਥਪਰਿਯਾਯੋ. ਇਦਮ੍ਪੀਤਿ ਇਦਮ੍ਪਿ ਕਮ੍ਮਂ, ਪਾਪਨ੍ਤਿ ਸਮ੍ਬਨ੍ਧੋ.

‘‘ਲਪਿਤ’’ਨ੍ਤਿ ਇਮਿਨਾ ਦੁਰਾਭਟ੍ਠਨ੍ਤਿ ਏਤ੍ਥ ਭਾਸਧਾਤੁਯਾ ਕਥਨਤ੍ਥਂ ਦਸ੍ਸੇਤਿ. ਯਨ੍ਤਿ ਵਚਨਂ. ਕਿਞ੍ਚ ਭਿਯ੍ਯੋਤਿ ਤਤੋ ਅਤਿਰੇਕਂ ਕਥੇਤਬ੍ਬਵਚਨਂ ਕਿਞ੍ਚਾਤਿ ਅਤ੍ਥੋ. ਸਂਕਿਲਿਟ੍ਠਞ੍ਚ ਯਂ ਪਦਨ੍ਤਿ ਏਤ੍ਥ ਚਕਾਰੋ ਪਿਸਦ੍ਦਤ੍ਥੋ ‘‘ਪਦ’’ਨ੍ਤਿ ਏਤ੍ਥ ਯੋਜੇਤਬ੍ਬੋ, ਯਂਸਦ੍ਦੋ ਕਾਰਣਤ੍ਥੋਤਿ ਆਹ ‘‘ਸਂਕਿਲਿਟ੍ਠਂ ਯਸ੍ਮਾ ਤਮ੍ਪਿ ਪਦ’’ਨ੍ਤਿ. ਤਮ੍ਪਿ ਪਦਨ੍ਤਿ ਤਮ੍ਪਿ ਵਚਨਂ. ਪਦਸਦ੍ਦੋ ਹਿ ਵਚਨਵਾਚਕੋ. ਤਮ੍ਪਿ ਵਚਨਂ ਯਸ੍ਮਾ ਸਂਕਿਲਿਟ੍ਠਂ ਹੋਤੀਤਿ ਯੋਜਨਾ. ਕਥਂ ਸਂਕਿਲਿਟ੍ਠਂ ਹੋਤੀਤਿ ਯੋਜਨਾ. ‘‘ਯਸ੍ਮਾ’’ਤਿ ਪਦੇਨ ਯਂਸਦ੍ਦੋ ਕਾਰਣਤ੍ਥੋਤਿ ਦਸ੍ਸੇਤਿ. ਨਨ੍ਤਿ ਪਦਂ. ‘‘ਏਤਂ ਇਤਿ ਵੁਚ੍ਚਤੀ’’ਤਿ ਸਂਵਣ੍ਣੇਤਬ੍ਬਪਦਂ. ‘‘ਦੁਬ੍ਭਾਸਿਤਨ੍ਤਿ ਏਤਂ ਵੁਚ੍ਚਤੀ’’ਤਿ ਸਂਵਣ੍ਣਨਾਪਦਂ. ਏਤਨ੍ਤਿ ਏਤਂ ਪਦਂ, ਏਤਂ ਵਚਨਨ੍ਤਿ ਅਤ੍ਥੋ.

ਏਤ੍ਥਾਤਿ ਸੇਖਿਯਗਾਥਾਯ. ਇਦਨ੍ਤਿ ਆਪਤ੍ਤੀਨਂ ਨਿਬ੍ਬਚਨਦੀਪਕਂ ਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਕਸ੍ਸ ਦੀਪਨਤ੍ਥਂ ਵੁਤ੍ਤਨ੍ਤਿ ਆਹ ‘‘ਸਙ੍ਗਹਿਤਸ੍ਸ ਅਤ੍ਥਸ੍ਸ ਦੀਪਨਤ੍ਥ’’ਨ੍ਤਿ.

ਤਤ੍ਥਾਤਿ ‘‘ਛਨ੍ਨਮਤਿਵਸ੍ਸਤੀ’’ਤਿਆਦਿਵਚਨੇ. ਗੇਹਨ੍ਤਿ ਪਕਤਿਗੇਹਂ. ਇਦਂ ਪਨ ਗੇਹਨ੍ਤਿ ਯੋਜਨਾ. ਵਿਤ੍ਥਾਰੇਨ੍ਤੋ ਆਹ ‘‘ਮੂਲਾਪਤ੍ਤਿਞ੍ਹੀ’’ਤਿਆਦਿ. ‘‘ਅਵਿਵਟ’’ਨ੍ਤਿ ਵਤ੍ਵਾ ਤਸ੍ਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸੁਚ੍ਛਨ੍ਨ’’ਨ੍ਤਿ. ਵਿਵਟਨ੍ਤਿ ਅਚ੍ਛਨ੍ਨਂ. ਨਾਤਿਵਸ੍ਸਨਭਾਵਂ ਵਿਤ੍ਥਾਰੇਨ੍ਤੋ ਆਹ ‘‘ਮੂਲਾਪਤ੍ਤਿਞ੍ਹੀ’’ਤਿਆਦਿ. ਵਿਵਰਨ੍ਤੋ ਭਿਕ੍ਖੁ ਨਾਪਜ੍ਜਤੀਤਿ ਸਮ੍ਬਨ੍ਧੋ. ਸੁਦ੍ਧਨ੍ਤੇਤਿ ਸੁਦ੍ਧਕੋਟ੍ਠਾਸੇ. ‘‘ਤਸ੍ਮਾ’’ਤਿ ਚ ‘‘ਤੇਨਾ’’ਤਿ ਚ ਯੇਭੁਯ੍ਯੇਨ ਅਤ੍ਥਤੋ ਏਕਂ, ਤਸ੍ਮਾ ਵੁਤ੍ਤਂ ‘‘ਤੇਨ ਕਾਰਣੇਨਾ’’ਤਿ. ਏਵਞ੍ਚੇਤਂ ਵਿਵਟਨ੍ਤਿ ਏਵਂ ਏਤਂ ਛਨ੍ਨਂ ਚੇ ਵਿਵਟਨ੍ਤਿ ਯੋਜਨਾ.

ਪਰਿਪਾਤਿਯਮਾਨਾਨਨ੍ਤਿ ਅਭਿਭੂਯਮਾਨਾਨਂ. ‘‘ਰੁਕ੍ਖਾਦਿਗਹਨਂ ਅਰਞ੍ਞ’’ਨ੍ਤਿ ਇਮਿਨਾ ਪਵਨਨ੍ਤਿ ਪਦਸ੍ਸ ਅਰਞ੍ਞਪਰਿਯਾਯਤਂ ਦਸ੍ਸੇਤਿ. ਗਤਿਸਦ੍ਦਸ੍ਸ ਭਵਭੇਦਾਦਿਅਤ੍ਥਂ ਪਟਿਕ੍ਖਿਪਿਤ੍ਵਾ ਪਟਿਸ੍ਸਰਣਤ੍ਥੇ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਪਟਿਸ੍ਸਰਣਂ ਹੋਤੀ’’ਤਿ. ਤਨ੍ਤਿ ਪਵਨਂ. ਤੇਤਿ ਮਿਗਾ. ‘‘ਅਸ੍ਸਸਨ੍ਤੀ’’ਤਿ ਪਦੇਨ ‘‘ਪਸ੍ਸਸਨ੍ਤੀ’’ਤਿ ਅਤ੍ਥੋਪਿ ਗਹੇਤਬ੍ਬੋ ਅਵਿਨਾਭਾਵਤੋ, ਆਨਾਪਾਨਂ ਕਰੋਨ੍ਤੀਤਿ ਅਤ੍ਥੋ. ਆਕਾਸੋਤਿ ਅਜਟਾਕਾਸੋ. ਪਕ੍ਖੀਨਨ੍ਤਿ ਵਿਹਙ੍ਗਮਾਨਂ. ‘‘ਸਬ੍ਬੇਸਂ ਸਙ੍ਖਤਧਮ੍ਮਾਨ’’ਨ੍ਤਿ ਇਮਿਨਾ ਧਮ੍ਮਾਨਨ੍ਤਿ ਏਤ੍ਥ ਸਙ੍ਖਤਧਮ੍ਮੋਯੇਵ ਗਹੇਤਬ੍ਬੋਤਿ ਦਸ੍ਸੇਤਿ. ‘‘ਵਿਨਾਸੋਵਾ’’ਤਿ ਇਮਿਨਾ ਵਿਭਵਸਦ੍ਦੋ ਵਿਨਾਸਵਾਚਕੋਤਿ ਦਸ੍ਸੇਤਿ. ਤੇਸਨ੍ਤਿ ਸਬ੍ਬੇਸਮ੍ਪਿ ਸਙ੍ਖਤਧਮ੍ਮਾਨਂ. ਗਤੀਤਿ ਪਤਿਟ੍ਠਾ. ਕਸ੍ਮਾ ਵਿਭਵੋ ਧਮ੍ਮਾਨਂ ਗਤਿ ਹੋਤੀਤਿ ਆਹ ‘‘ਨ ਹੀ’’ਤਿਆਦਿ. ਹੀਤਿ ਯਸ੍ਮਾ. ਤੇਤਿ ਸਬ੍ਬੇਪਿ ਸਙ੍ਖਤਧਮ੍ਮਾ. ਵਿਨਾਸਨ੍ਤਿ ਵਿਭਵਂ. ਸੁਚਿਰਮ੍ਪੀਤਿ ਅਸੀਤਿਵਸ੍ਸਾਦਿਕਾਲਮ੍ਪਿ. ਨਿਬ੍ਬਾਨਂ ਅਰਹਤੋ ਗਤੀਤਿ ਸਂਵਣ੍ਣੇਤਬ੍ਬਪਦਂ. ‘‘ਖੀਣਾਸਵਸ੍ਸਾ’’ਤਿ ਇਮਿਨਾ ਅਰਹਤੋਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਅਨੁਪਾਦਿਸੇਸਨਿਬ੍ਬਾਨਧਾਤੂ’’ਤਿ ਇਮਿਨਾ ‘‘ਨਿਬ੍ਬਾਨ’’ਨ੍ਤਿ ਪਦਸ੍ਸ ਇਧ ਅਧਿਪ੍ਪੇਤਨਿਬ੍ਬਾਨਂ ਦਸ੍ਸੇਤਿ. ਗਾਥਾਯ ਤੇ ਤੇ ਅਤ੍ਥਾ ਸਂਗਹੇਤ੍ਵਾ ਗਣਿਯਨ੍ਤਿ ਏਤ੍ਥਾਤਿ ਗਾਥਾਸਙ੍ਗਣਿਕਂ.

ਇਤਿ ਪਠਮਗਾਥਾਸਙ੍ਗਣਿਕਵਣ੍ਣਨਾਯ ਯੋਜਨਾ ਸਮਤ੍ਤਾ.