ਉਪੋਸਥਾਦਿਪੁਚ੍ਛਾਵਿਸ੍ਸਜ੍ਜਨਾ

੩੩੨. ਵਿਸ੍ਸਜ੍ਜਨੇ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਕਾਯਸਾਮਗ੍ਗੀ ਆਦਿ ਨਾਮਾਤਿ ਯੋਜਨਾ. ਓਸਾਰਣਕਿਰਿਯਾਤਿ ਕਥਨਕਿਰਿਯਾ. ਛਨ੍ਦਪਵਾਰਣਂ ਆਹਰਿਤ੍ਵਾਤਿ ਛਨ੍ਦਞ੍ਚ ਪਵਾਰਣਞ੍ਚ ਆਹਰਿਤ੍ਵਾ. ਪਵਾਰਣਾਕਥਾਤਿ ‘‘ਸਙ੍ਘਂ ਭਨ੍ਤੇ ਪਵਾਰੇਮੀ’’ਤਿਆਦਿਕਾ (ਮਹਾਵ. ੨੧੦) ਪਵਾਰਣਾਕਥਾ. ਤਜ੍ਜਨੀਯਕਮ੍ਮਾਦੀਸੁ ਵਤ੍ਥੁ ਨਾਮ ਕਿਂ? ਪੁਗ੍ਗਲੋ ਨਾਮ ਕੋਤਿ ਆਹ ‘‘ਵਤ੍ਥੁ ਨਾਮਾ’’ਤਿਆਦਿ. ਤਤ੍ਥ ਯੇਨ ਵਤ੍ਥੁਨਾਤਿ ਭਣ੍ਡਨਕਾਰਕਾਦਿਨਾ ਯੇਨ ਵਤ੍ਥੁਨਾ ਕਰਣਭੂਤੇਨ, ਹੇਤੁਭੂਤੇਨ ਵਾ. ਯੇਨਾਤਿ ਪੁਗ੍ਗਲੇਨ ਕਤ੍ਤੁਭੂਤੇਨ, ਕਤਨ੍ਤਿ ਸਮ੍ਬਨ੍ਧੋ. ‘‘ਤਸ੍ਸਾ ਤਸ੍ਸਾ ਕਮ੍ਮਵਾਚਾਯਾ’’ਤਿ ਪਦਂ ‘‘ਅਵਸਾਨਵਚਨ’’ਨ੍ਤਿ ਪਦੇ ਅਵਯਵਿਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਵਿਸ੍ਸਜ੍ਜਨੇਸੁ.

ਇਤਿ ਉਪੋਸਥਾਦਿਪੁਚ੍ਛਾਵਿਸ੍ਸਜ੍ਜਨਵਣ੍ਣਨਾਯ ਯੋਜਨਾ

ਸਮਤ੍ਤਾ.

ਅਤ੍ਥਵਸਪਕਰਣਵਣ੍ਣਨਾ

੩੩੪. ਅਤ੍ਥਵਸਪਕਰਣੇਤਿ ਅਵਯਵਿਆਧਾਰੋ. ਦਸ ਅਤ੍ਥਵਸੇਤਿਆਦੀਸੂਤਿ ਅਵਯਵਾਧਾਰੋ. ਯਨ੍ਤਿ ਵਚਨਂ. ਉਪਰਿਮਂ ਉਪਰਿਮਂ ਪਦਨ੍ਤਿ ‘‘ਸਙ੍ਘਫਾਸੁਤਾਯਾ’’ਤਿਆਦਿਕਂ ਉਤ੍ਤਰੁਤ੍ਤਰਿ ਵੁਤ੍ਤਂ ਪਦਂ. ਹੇਟ੍ਠਿਮਸ੍ਸ ਹੇਟ੍ਠਿਮਸ੍ਸ ਪਦਸ੍ਸਾਤਿ ‘‘ਸਙ੍ਘਸੁਟ੍ਠੁਤਾਯਾ’’ਤਿਆਦਿਕਸ੍ਸ ਅਧੋ ਅਧੋ ਵੁਤ੍ਤਸ੍ਸ ਪਦਸ੍ਸ.

ਯਦੇਤਂ ਪਦਸਤਂ ਵੁਤ੍ਤਨ੍ਤਿ ਯੋਜਨਾ. ਤਤ੍ਥਾਤਿ ਤਸ੍ਮਿਂ ਪਦਸਤੇ, ਨਿਦ੍ਧਾਰਣੇ ਭੁਮ੍ਮਂ, ਅਤ੍ਥਸਤਨ੍ਤਿ ਅਭਿਧੇਯ੍ਯਸਤਂ. ਧਮ੍ਮਸਤਨ੍ਤਿਅਭਿਧਾਨਸਤਂ, ਪਾਲ਼ਿਸਤਨ੍ਤਿ ਅਤ੍ਥੋ. ‘‘ਅਤ੍ਥਸਤਂ ਧਮ੍ਮਸਤ’’ਨ੍ਤਿ ਪਦਾਨਂ ਅਤ੍ਥਨ੍ਤਰਵਿਕਪ੍ਪਂ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਤਤ੍ਥ ਯੇ ਦਸ ਅਤ੍ਥਵਸੇ ਪਟਿਚ੍ਚ ਪਞ੍ਞਤ੍ਤਂ, ਤੇਸਂ ਦਸਅਤ੍ਥਵਸਾਨਨ੍ਤਿ ਯੋਜਨਾ, ਯੇ ਦਸ ਅਤ੍ਥਵਸੇ ਪੁਬ੍ਬੇ ਵਣ੍ਣਿਤਾ, ਤੇਸਂ ਦਸਅਤ੍ਥਵਸਾਨਨ੍ਤਿ ਯੋਜਨਾ. ਪਠਮਪਾਰਾਜਿਕਵਣ੍ਣਨਾਯਂ (ਪਾਰਾ. ਅਟ੍ਠ. ੧.੩੯) ਵਣ੍ਣਿਤਾਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਸਙ੍ਘਸੁਟ੍ਠੁਤਾਯਾ’’ਤਿਆਦਿਪਾਠੇ. ਸੁਟ੍ਠੁ ਦੇਵਾਤਿ ਸੁਟ੍ਠੁ ਮਹਾਰਾਜ. ਹਿ ਯਸ੍ਮਾ ਆਣਾਬਲਭੋਗਬਲਇਸ੍ਸਰਿਯਬਲੇਹਿ ਦਿਬ੍ਬਤਿ, ਤਸ੍ਮਾ ਦੇਵੋਤਿ ਵੁਚ੍ਚਤਿ. ਯੋ ਚਾਤਿ ਗਹਟ੍ਠੋ ਵਾ ਪਬ੍ਬਜਿਤੋ ਵਾ, ਸਮ੍ਪਟਿਚ੍ਛਤੀਤਿ ਸਮ੍ਬਨ੍ਧੋ. ਤਸ੍ਮਾਤਿ ਯਸ੍ਮਾ ਹਿਤਾਯ ਸੁਖਾਯ ਹੋਤਿ, ਤਸ੍ਮਾ. ਆਨਿਸਂਸਂ ਦਸ੍ਸੇਤ੍ਵਾ ਪਞ੍ਞਪੇਸ੍ਸਾਮੀਤਿ ਸਮ੍ਬਨ੍ਧੋ. ਅਭਿਭਵਿਤ੍ਵਾ ਨ ਪਞ੍ਞਪੇਸ੍ਸਾਮੀਤਿ ਯੋਜਨਾ. ਇਧਾਤਿ ਅਤ੍ਥਵਸਪਕਰਣੇ. ਤਦਤ੍ਥਜੋਤਕਾਨਨ੍ਤਿ ਸੋਯੇਵ ਅਤ੍ਥੋ ਤਦਤ੍ਥੋ, ਤਸ੍ਸ ਜੋਤਕਾ ਤਦਤ੍ਥਜੋਤਕਾ, ਤੇਸਂ. ਇਦਾਨਿ ਵੇਦਿਤਬ੍ਬਾਨੀਤਿ ਸਮ੍ਬਨ੍ਧੋ. ਅਤ੍ਥਂ ਜੋਤੇਨ੍ਤੀਤਿ ਅਤ੍ਥਜੋਤਕਾ, ਸਦ੍ਦਾ. ਨੀਹਰਿਤ੍ਵਾ, ਨਿਯਮੇਤ੍ਵਾ ਵਾ ਅਤ੍ਥੋ ਵੁਚ੍ਚਤੇ ਇਮਾਹਿ ਸਦ੍ਦਪਞ੍ਞਤ੍ਤੀਹੀਤਿ ਨਿਰੁਤ੍ਤਿਯੋ.

ਅਤ੍ਥਸਤਨ੍ਤਿ ਗਾਥਾਯਂ ਅਤ੍ਥਵਸੇ ਪਕਰਣੇ ਅਤ੍ਥਸਤਂ ਵੇਦਿਤਬ੍ਬਨ੍ਤਿਆਦਿਨਾ ਯੋਜਨਾ ਕਾਤਬ੍ਬਾ. ਇਤਿ ਹੀਤਿ ਇਤਿ ਏਵ. ਹਿਸਦ੍ਦੋ ਹਿ ਏਵਸਦ੍ਦਤ੍ਥੋ. ਇਦਨ੍ਤਿ ‘‘ਅਤ੍ਥਸਤ’’ਨ੍ਤਿਆਦਿਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਏਤਨ੍ਤਿ ਯਥਾਵੁਤ੍ਤਂ ਅਤ੍ਥਂ ਪਟਿਚ੍ਚਾਤਿ ਸਮ੍ਬਨ੍ਧੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਮਹਾਵਗ੍ਗਵਣ੍ਣਨਾਯ

ਯੋਜਨਾ ਸਮਤ੍ਤਾ.