ਏਕੁਤ੍ਤਰਿਕਨਯੋ
ਏਕੁਤ੍ਤਰਿਕਨਯੋ ਏਕਕਵਾਰਵਣ੍ਣਨਾ
੩੨੧. ਏਵਂ ਖਨ੍ਧਕਪੁਚ੍ਛਾਯ ਵਣ੍ਣਨਂ ਕਤ੍ਵਾ ਇਦਾਨਿ ਏਕੁਤ੍ਤਰਿਕਨਯਸ੍ਸ ਤਂ ਕਰੋਨ੍ਤੋ ਆਹ ‘‘ਆਪਤ੍ਤਿ…ਪੇ… ਨਯੇ’’ਤਿ. ਤਤ੍ਥ ਏਕੁਤ੍ਤਰਿਕਨਯੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ‘‘ਛ ਆਪਤ੍ਤਿਸਮੁਟ੍ਠਾਨਾਨੀ’’ਤਿ ਇਮਿਨਾ ਸਮੁਟ੍ਠਾਨਾਨਿ ਆਪਤ੍ਤਿਂ ਕਰੋਨ੍ਤੀਤਿ ਅਤ੍ਥੇਨ ਆਪਤ੍ਤਿਕਰਾ ਨਾਮਾਤਿ ਦਸ੍ਸੇਤਿ. ਏਤੇਸਨ੍ਤਿ ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ. ਹੀਤਿ ਯਸ੍ਮਾ, ਆਪਜ੍ਜਤੀਤਿ ਸਮ੍ਬਨ੍ਧੋ. ਸਿਕ੍ਖਾਪਦੇ ਚਾਤਿ ਮਾਤਿਕਾਸਿਕ੍ਖਾਪਦੇ ਚ. ਲਹੁਕਾ ਆਪਤ੍ਤੀਤਿ ਏਤ੍ਥ ਅਪ੍ਪਸਾਵਜ੍ਜਤ੍ਤਾ ਨ ਲਹੁਕਾ ਨਾਮ ਹੋਤਿ, ਲਹੁਕੇਨ ਪਨ ਵਿਨਯਕਮ੍ਮੇਨਾਤਿ ਆਹ ‘‘ਲਹੁਕੇਨ ਵਿਨਯਕਮ੍ਮੇਨ ਵਿਸੁਜ੍ਝਨਤੋ’’ਤਿ. ਪਞ੍ਚਵਿਧਾਤਿ ਥੁਲ੍ਲਚ੍ਚਯਾਦਿਵਸੇਨ ਪਞ੍ਚਪਕਾਰਾ. ਕੇਨਚੀਤਿ ਲਹੁਕੇਨ ਵਾ ਗਰੁਕੇਨ ਵਾ ਕੇਨਚਿ ਆਕਾਰੇਨ. ਸਂਵਿਜ੍ਜਤਿ ਗਿਹਿਭਾਵਤੋ ਅਵਸੇਸੋ ਸਮਣਭਾਵੋ ਏਤਿਸ੍ਸਾਤਿ ਸਾਵਸੇਸਾ, ਪਟਿਪਕ੍ਖਵਸੇਨ ਅਨਵਸੇਸਾ. ਦ੍ਵੇ ਆਪਤ੍ਤਿਕ੍ਖਨ੍ਧਾਤਿ ਪਾਰਾਜਿਕਸਙ੍ਘਾਦਿਸੇਸਵਸੇਨ ਦ੍ਵੇ ਆਪਤ੍ਤਿਕ੍ਖਨ੍ਧਾ.
‘‘ਕਰੋਨ੍ਤੀ’’ਤਿ ਇਮਿਨਾ ਅਨ੍ਤਰਾਯਿਕਾਤਿ ਏਤ੍ਥ ਣਿਕਪਚ੍ਚਯਸ੍ਸ ਅਤ੍ਥਂ ਦਸ੍ਸੇਤਿ. ਅਨ੍ਤਰਾਯਿਕਾ ਆਪਤ੍ਤਿਯੋ ਸਬ੍ਬਥਾ ਅਨ੍ਤਰਾਯਿਕਾ ਹੋਨ੍ਤੀਤਿ ਆਹ ‘‘ਅਨ੍ਤਰਾਯਿਕਂ ਆਪਨ੍ਨਸ੍ਸਾਪੀ’’ਤਿਆਦਿ. ਦੇਸੇਤ੍ਵਾ ਸੁਦ੍ਧਿਪਤ੍ਤਸ੍ਸਾਤਿ ਸਮ੍ਬਨ੍ਧੋ. ਲੋਕਵਜ੍ਜਾਤਿ ਲੋਕੇਹਿ ਵਜ੍ਜੇਤਬ੍ਬਾ. ਪਣ੍ਣਤ੍ਤਿਵਜ੍ਜਾਤਿ ਭਗਵਤੋ ਪਣ੍ਣਤ੍ਤਿਯਾ ਵਜ੍ਜੇਤਬ੍ਬਾ. ਯਨ੍ਤਿ ਯਂ ਆਪਤ੍ਤਿਂ ਆਪਜ੍ਜਤੀਤਿ ਸਮ੍ਬਨ੍ਧੋ. ਕਰੋਨ੍ਤੋਤਿ ਕਿਰਿਯਮਾਨਤੋ. ਏਤ੍ਥ ਹਿ ਮਾਨਸਦ੍ਦਸ੍ਸ ਅਨ੍ਤਾਦੇਸੋ. ਇਮਿਨਾ ਕਰਣਂ ਕਿਰਿਯਨ੍ਤਿ ਭਾਵਤ੍ਥਂ ਦਸ੍ਸੇਤਿ. ਆਪਜ੍ਜਤੀਤਿ ਪੁਗ੍ਗਲੋ ਆਪਜ੍ਜਤਿ. ਸਾ ਆਪਤ੍ਤਿ ਕਿਰਿਯਤੋ ਸਮੁਟ੍ਠਿਤਾ ਨਾਮਾਤਿ ਯੋਜਨਾ. ਕਾ ਆਪਤ੍ਤਿ ਵਿਯਾਤਿ ਆਹ ‘‘ਪਾਰਾਜਿਕਾਪਤ੍ਤਿ ਵਿਯਾ’’ਤਿ. ਏਸੇਵ ਨਯੋ ਅਨਨ੍ਤਰਵਾਕ੍ਯੇਸੁਪਿ.
ਪੁਬ੍ਬਾਪਤ੍ਤੀਤਿ ਏਤ੍ਥ ਪੁਬ੍ਬਸਦ੍ਦੋ ਪਠਮਤ੍ਥੋਤਿ ਆਹ ‘‘ਪਠਮਂ ਆਪਨ੍ਨਾਪਤ੍ਤੀ’’ਤਿ. ‘‘ਆਪਨ੍ਨਾ’’ਤਿ ਪਦੇਨ ਮਜ੍ਝੇਲੋਪਂ ਦਸ੍ਸੇਤਿ. ਪਚ੍ਛਾ ਆਪਨ੍ਨਾਪਤ੍ਤੀਤਿ ਵਤ੍ਤਭੇਦਦੁਕ੍ਕਟਾਪਤ੍ਤਿ. ਮੂਲਵਿਸੁਦ੍ਧਿਯਾਤਿ ਮੂਲੇ ਕਾਯਚਿ ਆਪਤ੍ਤਿਯਾ ਅਮਿਸ੍ਸਤ੍ਤਾ ਵਿਸੁਦ੍ਧਿਯਾ ਆਪਤ੍ਤਿਯਾ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਇਦਮ੍ਪੀਤਿ ਕੁਰੁਨ੍ਦਿਯਂ ਵੁਤ੍ਤਵਚਨਮ੍ਪਿ. ਪਿਸਦ੍ਦੇਨ ਪੁਰਿਮਂ ਮਹਾਅਟ੍ਠਕਥਾਵਚਨਂ ਅਪੇਕ੍ਖਤਿ. ਏਕੇਨ ਪਰਿਯਾਯੇਨਾਤਿ ਏਕੇਨ ਕਾਰਣੇਨ.
ਯਾਤਿ ਆਪਤ੍ਤਿ, ਦੇਸਿਤਾ ਹੋਤੀਤਿ ਸਮ੍ਬਨ੍ਧੋ. ਅਯਂ ਦੇਸਿਤਾ ਗਣਨੂਪਿਕਾ ਨਾਮਾਤਿ ਯੋਜਨਾ. ਯਾ ਦੇਸਿਤਾ ਹੋਤਿ, ਅਯਂ ਅਗਣਨੂਪਿਕਾ ਨਾਮਾਤਿ ਯੋਜਨਾ. ਸਉਸ੍ਸਾਹੇਨੇਵਾਤਿ ਪੁਨਪਿ ਆਪਜ੍ਜਿਸ੍ਸਾਮੀਤਿ ਸਹ ਉਸ੍ਸਾਹੇਨੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ‘‘ਗਣਨਂ ਨ ਉਪੇਤੀ’’ਤਿ ਇਮਿਨਾ ਗਣਨਂ ਨ ਉਪਗਚ੍ਛਤੀਤਿ ਅਗਣਨੂਪਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਅਟ੍ਠਮੇ ਵਤ੍ਥੁਸ੍ਮਿਂ ਪੂਰਣੇਤਿ ਸਮ੍ਬਨ੍ਧੋ. ਇਦਂ ਪਾਲ਼ਿਯਂ ਅਟ੍ਠਵਤ੍ਥੁਕਪੂਰਣਵਸੇਨ ਭਿਕ੍ਖੁਨੀਨਂ ਆਗਤਤ੍ਤਾ ਭਿਕ੍ਖੁਨਿਯੋ ਸਨ੍ਧਾਯ ਵੁਤ੍ਤਂ. ਭਿਕ੍ਖੂਨਮ੍ਪਿ ਦੁਤਿਯਪਾਰਾਜਿਕਟ੍ਠਾਨੇ ਲਬ੍ਭਤਿਯੇਵ.
ਥੁਲ੍ਲਵਜ੍ਜਾਤਿ ਏਤ੍ਥ ਥੁਲ੍ਲਂ ਵਜ੍ਜਂ ਏਤਿਸ੍ਸਾਤਿ ਥੁਲ੍ਲਵਜ੍ਜਾਤਿ ਦਸ੍ਸੇਨ੍ਤੋ ਆਹ ‘‘ਥੁਲ੍ਲਦੋਸੇ ਪਞ੍ਞਤ੍ਤਾ’’ਤਿ. ਯਾ ਚ ਧਮ੍ਮਿਕਸ੍ਸ ਪਟਿਸ੍ਸਵਸ੍ਸ ਅਸਚ੍ਚਾਪਨੇ ਆਪਤ੍ਤਿ ਅਤ੍ਥਿ, ਸਾ ਚ ਗਿਹਿਪਟਿਸਂਯੁਤ੍ਤਾਤਿ ਯੋਜਨਾ. ਪਞ੍ਚਾਨਨ੍ਤਰਿਯਕਮ੍ਮਾਪਤ੍ਤੀਤਿ ਪਞ੍ਚਹਿ ਆਨਨ੍ਤਰਿਯਕਮ੍ਮੇਹਿ ਆਪਨ੍ਨਾ ਪਾਰਾਜਿਕਾਪਤ੍ਤਿ. ਸੁਦਿਨ੍ਨਤ੍ਥੇਰਾਦੀਤਿ ਆਦਿਸਦ੍ਦੇਨ ਧਨਿਯਤ੍ਥੇਰਾਦਯੋ ਸਙ੍ਗਣ੍ਹਾਤਿ. ਆਦਿਕਮ੍ਮਿਕੋਤਿ ਆਦਿਕਮ੍ਮਂ ਕਰੋਨ੍ਤੋ, ਤਸ੍ਮਿਂ ਨਿਯੁਤ੍ਤੋ ਵਾ. ਮਕ੍ਕਟਿਸਮਣਾਦੀਤਿ ਆਦਿਸਦ੍ਦੇਨ ਵਜ੍ਜਿਪੁਤ੍ਤਕਾਦਯੋ ਸਙ੍ਗਣ੍ਹਾਤਿ. ਯੋ ਕਦਾਚਿ ਕਰਹਚਿ ਆਪਤ੍ਤਿਂ ਆਪਜ੍ਜਤਿ, ਸੋ ਅਧਿਚ੍ਚਾਪਤ੍ਤਿਕੋ ਨਾਮਾਤਿ ਯੋਜਨਾ. ਪਰਤੋਪਿ ਏਸੇਵ ਨਯੋ.
‘‘ਚੋਦੇਤੀ’’ਤਿ ਇਮਿਨਾ ਚੋਦੇਤੀਤਿ ਚੋਦਕੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਚੋਦਿਤੋ’’ਤਿ ਇਮਿਨਾ ਚੋਦਿਤਬ੍ਬੋਤਿ ਚੁਦਿਤੋ, ਸੋਯੇਵ ਚੁਦਿਤਕੋਤਿ ਵਚਨਤ੍ਥਂ ਦਸ੍ਸੇਤਿ. ਪਞ੍ਚਦਸਸੂਤਿ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ ਵੁਤ੍ਤੇਸੁ ਪਞ੍ਚਦਸਧਮ੍ਮੇਸੁ. ਤੇਨਾਤਿ ਅਧਮ੍ਮਚੋਦਕੇਨ, ਚੋਦਿਤੋਤਿ ਸਮ੍ਬਨ੍ਧੋ. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ (ਚੂਲ਼ਵ. ੪੦੧) ਵੁਤ੍ਤੇ ਸਚ੍ਚੇ ਚ ਅਕੁਪ੍ਪੇ ਚ ਅਤਿਟ੍ਠਨ੍ਤੋਪਿ ਅਧਮ੍ਮਚੁਦਿਤਕੋਯੇਵ ਨਾਮ, ਸੋ ਪਨ ਧਮ੍ਮਚੋਦਕੇਨ ਚੋਦਿਤੇਯੇਵ ਕੁਪ੍ਪਨ੍ਤੋ ਅਧਮ੍ਮਚੁਦਿਤਕੋ ਨਾਮ, ਅਧਮ੍ਮਚੋਦਕੇਨ ਚੋਦਿਤੇ ਪਨ ਕੁਪ੍ਪਨ੍ਤੋਪਿ ਅਧਮ੍ਮਚੁਦਿਤਕੋ ਨਾਮ ਨ ਹੋਤਿ, ਤਸ੍ਮਾ ਇਧ ਨ ਵੁਤ੍ਤੋ. ‘‘ਸਮਨ੍ਨਾਗਤੋ’’ਤਿ ਇਮਿਨਾ ਨਿਯਤਾ ਏਤਸ੍ਸ ਸਨ੍ਤੀਤਿ ਨਿਯਤੋਤਿ ਵਚਨਤ੍ਥਂ ਦਸ੍ਸੇਤਿ.
ਆਪਜ੍ਜਿਤੁਂ ਭਬ੍ਬਾਤਿ ਭਬ੍ਬਾਪਤ੍ਤਿਕਾ. ਕੇਨਚਿ ਕਮ੍ਮੇਨ ਅਕਤੋਪਿ ਅਨੁਕ੍ਖਿਤ੍ਤਕੋਯੇਵ ਨਾਮ, ਸੋ ਪਨ ਉਕ੍ਖਿਤ੍ਤਕੋਤਿ ਸਙ੍ਕਾਭਾਵਤੋ ਇਧ ਨ ਵੁਤ੍ਤੋ. ਅਯਨ੍ਤਿ ਤਜ੍ਜਨੀਯਾਦਿਕਮ੍ਮਕਤੋ ਭਿਕ੍ਖੁ. ਹੀਤਿ ਯਸ੍ਮਾ, ਨ ਕੋਪੇਤੀਤਿ ਸਮ੍ਬਨ੍ਧੋ. ਲਿਙ੍ਗਦਣ੍ਡਕਮ੍ਮਸਂਵਾਸਨਾਸਨਾਹੀਤਿ ਲਿਙ੍ਗਨਾਸਨੇਨ ਚ ਦਣ੍ਡਕਮ੍ਮਨਾਸਨੇਨ ਚ ਸਂਵਾਸਨਾਸਨੇਨ ਚ. ਯੇਨਾਤਿ ਭਿਕ੍ਖੁਨਾ. ਸੋਤਿ ਨਾਨਾਸਂਵਾਸਕੋ. ਦ੍ਵਿਨ੍ਨਂ ਨਾਨਾਸਂਵਾਸਕਾਨਂ ਵਿਸੇਸੋ ਹੇਟ੍ਠਾ (ਪਾਚਿ. ਅਟ੍ਠ. ੪੨੮) ਵੁਤ੍ਤੋਯੇਵ. ਠਪਨਂ ਜਾਨਿਤਬ੍ਬਨ੍ਤਿ ਏਤ੍ਥ ਕਿਂ ਠਪਨਂ ਨਾਮਾਤਿ ਆਹ ‘‘ਪਾਤਿਮੋਕ੍ਖਟ੍ਠਪਨ’’ਨ੍ਤਿ.
ਇਤਿ ਏਕਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਦੁਕਵਾਰਵਣ੍ਣਨਾ
੩੨੨. ਦੁਕੇਸੁ ਅਚਿਤ੍ਤਕਾ ਆਪਤ੍ਤੀਤਿ ਸਮ੍ਬਨ੍ਧੋ. ਭੂਤਾਰੋਚਨਾਪਤ੍ਤੀਤਿ ਪਾਚਿਤ੍ਤਿਯਾਪਤ੍ਤਿ. ਅਭੂਤਾਰੋਚਨਾਪਤ੍ਤੀਤਿ ਪਾਰਾਜਿਕਥੁਲ੍ਲਚ੍ਚਯਾਪਤ੍ਤਿ. ਪਦਸੋਧਮ੍ਮਾਦਿਕਾਤਿਆਦਿਸਦ੍ਦੇਨ ਉਤ੍ਤਰਿਛਪਞ੍ਚਵਾਚਾ ਸਙ੍ਗਹਿਤਾ. ਮਞ੍ਚਪੀਠਾਦੀਨਨ੍ਤਿਆਦਿਸਦ੍ਦੇਨ ਭਿਸਿਆਦਯੋ ਸਙ੍ਗਣ੍ਹਾਤਿ. ਅਨਾਪੁਚ੍ਛਾਗਮਨਾਦੀਸੂਤਿ ਆਦਿਸਦ੍ਦੇਨ ਅਨੁਦ੍ਧਰਿਤ੍ਵਾ ਗਮਨਂ ਸਙ੍ਗਣ੍ਹਾਤਿ. ਸਪੁਗ੍ਗਲੋਤਿ ਸੋ ਅਤ੍ਤਸਙ੍ਖਾਤੋ ਪੁਗ੍ਗਲੋ ਸਪੁਗ੍ਗਲੋ. ਪਰਪੁਗ੍ਗਲੋਤਿ ਪਰੋ ਪੁਗ੍ਗਲੋ ਪਰਪੁਗ੍ਗਲੋ. ਗਰੁਕਨ੍ਤਿ ਸਙ੍ਘਾਦਿਸੇਸਂ. ਲਹੁਕਨ੍ਤਿ ਪਾਚਿਤ੍ਤਿਯਂ. ਪੁਨ ਗਰੁਕਨ੍ਤਿ ਪਾਰਾਜਿਕਂ. ਪੁਨ ਲਹੁਕਨ੍ਤਿ ਪਾਚਿਤ੍ਤਿਯਮੇਵ.
ਅਙ੍ਗੁਲਿਮਤ੍ਤਮ੍ਪੀਤਿ ਪਿਸਦ੍ਦੇਨ ਕੇਸਗ੍ਗਮਤ੍ਤਮ੍ਪੀਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਤਨ੍ਤਿ ਮਞ੍ਚਪੀਠਂ. ਗਮਿਯੋ ਆਪਜ੍ਜਤਿ ਨਾਮਾਤਿ ਸਮ੍ਬਨ੍ਧੋ.
‘‘ਆਦਿਯਨ੍ਤੋ ਆਪਜ੍ਜਤਿ ਨਾਮਾ’’ਤਿਆਦਿਨਾ ਅਤ੍ਥਾਪਤ੍ਤਿ ਆਦਿਯਨ੍ਤੋ ਆਪਜ੍ਜਤੀਤਿ ਪਾਲ਼ਿਯਂ ਆਦਿਯਨ੍ਤੋ ਹੁਤ੍ਵਾ ਆਪਜ੍ਜਤਿ ਆਪਤ੍ਤਿ ਅਤ੍ਥੀਤਿ ਯੋਜਨਾਨਯਂ ਦਸ੍ਸੇਤਿ. ਏਵਞ੍ਹਿ ਸਤਿ ‘‘ਆਪਜ੍ਜਤੀ’’ਤਿ ਆਖ੍ਯਾਤਪਦਂ ‘‘ਅਤ੍ਥੀ’’ਤਿ ਕਿਰਿਯਨ੍ਤਰਂ ਅਪੇਕ੍ਖਿਤ੍ਵਾ ਕਤ੍ਤਾ ਹੋਤੀਤਿ ਦਟ੍ਠਬ੍ਬਂ. ਅਥ ਵਾ ਆਦਿਯਨ੍ਤੋ ਪੁਗ੍ਗਲੋ ਯਂ ਆਪਤ੍ਤਿਂ ਆਪਜ੍ਜਤਿ, ਸਾ ਆਪਤ੍ਤਿ ਅਤ੍ਥੀਤਿ ਯੋਜਨਾ. ਏਸੇਵ ਨਯੋ ਅਞ੍ਞੇਸੁਪਿ. ਮੂਗਬ੍ਬਤਾਦੀਨੀਤਿ ਆਦਿਸਦ੍ਦੇਨ ਗੋਵਤਕੁਕ੍ਕੁਰਵਤਾਦੀਨਿ ਸਙ੍ਗਣ੍ਹਾਤਿ. ਪਾਰਿਵਾਸਿਕਾਦਯੋ ਆਪਜ੍ਜਨ੍ਤੀਤਿ ਸਮ੍ਬਨ੍ਧੋ. ਤਜ੍ਜਨੀਯਾਦਿਕਮ੍ਮਕਤਾ ਵਾ ਪੁਗ੍ਗਲਾਤਿ ਯੋਜਨਾ. ਅਸਮਾਦਿਯਨ੍ਤਾ ਆਪਜ੍ਜਨ੍ਤੀਤਿ ਅਸਮਾਦਿਯਨ੍ਤਾ ਹੁਤ੍ਵਾ ਆਪਜ੍ਜਨ੍ਤਿ. ਤੇਤਿ ਪੁਗ੍ਗਲੇ. ਕਰੋਨ੍ਤੋ ਆਪਜ੍ਜਤਿ ਨਾਮਾਤਿ ਕਰੋਨ੍ਤੋ ਹੁਤ੍ਵਾ ਆਪਜ੍ਜਤਿ ਨਾਮਾਤਿ ਯੋਜਨਾ. ਏਵਂ ਦੇਨ੍ਤੋ ਆਪਜ੍ਜਤਿ ਨਾਮਾਤਿਆਦੀਸੁਪਿ.
ਏਕਰਤ੍ਤਛਾਰਤ੍ਤਸਤ੍ਤਾਹਦਸਾਹਮਾਸਾਤਿਕ੍ਕਮੇਸੂਤਿ ‘‘ਏਕਰਤ੍ਤਮ੍ਪਿ ਤਿਚੀਵਰੇਨ ਵਿਪ੍ਪਵਸੇਯ੍ਯਾ’’ਤਿ (ਪਾਰਾ. ੪੭੫-੪੭੬) ਚ ‘‘ਛਾਰਤ੍ਤਪਰਮਂ ਤੇਨ ਭਿਕ੍ਖੁਨਾ ਤੇਨ ਚੀਵਰੇਨ ਵਿਪ੍ਪਵਸਿਤਬ੍ਬ’’ਨ੍ਤਿ (ਪਾਰਾ. ੬੫੩) ਚ ‘‘ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬ’’ਨ੍ਤਿ (ਪਾਰਾ. ੬੨੨-੬੨੩) ਚ ‘‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’’ਨ੍ਤਿ (ਪਾਰਾ. ੪੬੨-੪੬੩) ਚ ‘‘ਮਾਸਪਰਮਂ ਨਿਕ੍ਖਿਪਿਤਬ੍ਬ’’ਨ੍ਤਿ (ਪਾਰਾ. ੪੯੯-੫੦੦) ਚ ਵੁਤ੍ਤਕਾਲਾਤਿਕ੍ਕਮੇਸੁ.
ਇਮਂ ਪਨ ਆਪਤ੍ਤਿਂ ਆਪਜ੍ਜਤਿ ਨਾਮਾਤਿ ਸਮ੍ਬਨ੍ਧੋ.
ਯਸ੍ਮਿਂ ਪਕ੍ਖੇ ਨਿਸਿਨ੍ਨੋਤਿ ਯਸ੍ਮਿਂ ਪਕ੍ਖੇ ਸਯਂ ਨਿਸਿਨ੍ਨੋ. ਤੇਸਨ੍ਤਿ ਅਤ੍ਤਨੋ ਪਕ੍ਖੇ ਨਿਸਿਨ੍ਨਾਨਂ, ਨਾਨਾਸਂਵਾਸਕਨ੍ਤਿ ਸਮ੍ਬਨ੍ਧੋ. ਯੇਸਨ੍ਤਿ ਸਕਪਕ੍ਖੇ ਨਿਸਿਨ੍ਨਾਨਂ. ਕਮ੍ਮਂ ਕੋਪੇਤੀਤਿ ਨਾਨਾਸਂਵਾਸਕਤ੍ਤਾ ਕਮ੍ਮਂ ਕੋਪੇਤਿ. ਇਤਰੇਸਨ੍ਤਿ ਪਰਪਕ੍ਖੇ ਨਿਸਿਨ੍ਨਾਨਂ. ਹਤ੍ਥਪਾਸਂ ਅਨਾਗਤਤ੍ਤਾ ਕਮ੍ਮਂ ਕੋਪੇਤੀਤਿ ਯੋਜਨਾ. ‘‘ਏਸੇਵ ਨਯੋ’’ਤਿ ਵੁਤ੍ਤਵਚਨਂ ਵਿਤ੍ਥਾਰੇਨ੍ਤੋ ਆਹ ‘‘ਯੇਸਂ ਹੀ’’ਤਿਆਦਿ. ਯੇਸਨ੍ਤਿ ਸਕਪਕ੍ਖੇ ਵਾ ਪਰਪਕ੍ਖੇ ਵਾ ਨਿਸਿਨ੍ਨਾਨਂ ਯੇਸਂ ਭਿਕ੍ਖੂਨਂ. ਸੋਤਿ ਭਿਕ੍ਖੁ. ਆਪਜ੍ਜਿਤਬ੍ਬਤੋਤਿ ਆਪਜ੍ਜਿਤਬ੍ਬਭਾਵਤੋ. ਇਮਿਨਾ ਪੁਗ੍ਗਲੇਨ ਛਹਿ ਸਮੁਟ੍ਠਾਨੇਹਿ ਆਪਜ੍ਜਿਤਬ੍ਬਾਤਿ ਆਪਤ੍ਤਿਯੋਤਿ ਵਚਨਤ੍ਥਂ ਦਸ੍ਸੇਤਿ. ਕਮ੍ਮੇਨ ਵਾ ਸਲਾਕਗ੍ਗਾਹੇਨ ਵਾਤਿ ਏਤ੍ਥ ਉਦ੍ਦੇਸੋ ਕਮ੍ਮੇ ਲਕ੍ਖਣਹਾਰਨਯੇਨ ਸਙ੍ਗਹਂ ਗਚ੍ਛਤਿ, ਵੋਹਾਰਾਨੁਸ੍ਸਾਵਨਾ ਸਲਾਕਗ੍ਗਾਹੇਤਿ ਦਸ੍ਸੇਨ੍ਤੋ ਆਹ ‘‘ਉਦ੍ਦੇਸੋ ਚੇਵ…ਪੇ… ਏਕ’’ਨ੍ਤਿ. ਪੁਬ੍ਬਭਾਗਾਤਿ ਸਙ੍ਘਭੇਦਸ੍ਸ ਪੁਬ੍ਬਭਾਗੇ ਪਵਤ੍ਤਾ. ਪਮਾਣਨ੍ਤਿ ਸਙ੍ਘਭੇਦਸ੍ਸ ਕਾਰਣਂ.
ਅਦ੍ਧਾਨਹੀਨੋ ਨਾਮਾਤਿ ਏਤ੍ਥ ਅਦ੍ਧਾਨਸਦ੍ਦੋ ਕਾਲਪਰਿਯਾਯੋਤਿ ਆਹ ‘‘ਊਨਵੀਸਤਿਵਸ੍ਸੋ’’ਤਿ. ਥੇਯ੍ਯਸਂਵਾਸਕਾਦਯੋਤਿਆਦਿਸਦ੍ਦੇਨ ਤਿਤ੍ਥਿਯਪਕ੍ਕਨ੍ਤਕਭਿਕ੍ਖੁਨੀਦੂਸਕਪਞ੍ਚਾਨਨ੍ਤਰਿਯਾ ਸਙ੍ਗਹੇਤਬ੍ਬਾ. ਅਟ੍ਠ ਅਭਬ੍ਬਪੁਗ੍ਗਲਾ ਕਰਣਦੁਕ੍ਕਟਕਾ ਨਾਮ ਹੋਨ੍ਤੀਤਿ ਯੋਜਨਾ. ਏਤ੍ਥ ਕਤ੍ਤਬ੍ਬਨ੍ਤਿ ਕਰਣਂ, ਕਮ੍ਮਂ, ਦੁਟ੍ਠੁ ਕਤ੍ਤਬ੍ਬਨ੍ਤਿ ਦੁਕ੍ਕਟਂ, ਕਮ੍ਮਮੇਵ. ਕਰਣਂ ਦੁਕ੍ਕਟਮੇਤਸ੍ਸਾਤਿ ਕਰਣਦੁਕ੍ਕਟਕੋ. ਵਿਸੇਸਨਪਰਨਿਪਾਤੋ ‘‘ਅਗ੍ਯਾਹਿਤੋ’’ਤਿਆਦੀਸੁ ਵਿਯ. ਤਦੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਦੁਕ੍ਕਟਕਿਰਿਯਾ’’ਤਿਆਦਿ. ਨੋ ਚ ਯਾਚਤੀਤਿ ਏਤ੍ਥ ਯਾਚਧਾਤੁਯਾ ਪਧਾਨਕਮ੍ਮਂ ਦਸ੍ਸੇਨ੍ਤੋ ਆਹ ‘‘ਉਪਸਮ੍ਪਦ’’ਨ੍ਤਿ, ‘‘ਸਙ੍ਘ’’ਨ੍ਤਿ ਅਪਧਾਨਕਮ੍ਮਮਾਨੇਤਬ੍ਬਂ. ਤੇਪਿਟਕੋਤਿ ਤਿਪਿਟਕਂ ਵਾਚੁਗ੍ਗਤਵਸੇਨ ਧਾਰਕੋ. ਆਣਾਯਪੀਤਿ ਪਿਸਦ੍ਦੋ ‘‘ਮਤੇਨਪੀ’’ਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਯਾਚਨ੍ਤਸ੍ਸੇਵਾਤਿ ਨਿਸ੍ਸਯਂ ਆਚਰਿਯਂ ਯਾਚਨ੍ਤਸ੍ਸੇਵ. ਯਂ ਵਤ੍ਥੁਂ ਅਜ੍ਝਾਚਰਨ੍ਤੋ ਆਪਤ੍ਤਿਂ ਆਪਜ੍ਜਤਿ, ਤਂ ਵਤ੍ਥੁ ਸਾਤਿਸਾਰਂ ਨਾਮਾਤਿ ਯੋਜਨਾ.
ਉਪਘਾਤਿਕਾਤਿ ਏਤ੍ਥ ਉਪਹਨਨ੍ਤੀਤਿ ਉਪਘਾਤਾ, ਤੇਯੇਵ ਉਪਘਾਤਿਕਾਤਿ ਦਸ੍ਸੇਨ੍ਤੋ ਆਹ ‘‘ਉਪਘਾਤਾ’’ਤਿ. ਤਤ੍ਥਾਤਿ ਦ੍ਵੀਸੁ ਉਪਘਾਤਿਕੇਸੁ. ਦ੍ਵੇ ਵੇਨਯਿਕਾਤਿ ਏਤ੍ਥ ਵਿਨਯੇਨ ਸਿਦ੍ਧਾ ਵੇਨਯਿਕਾਤਿ ਦਸ੍ਸੇਨ੍ਤੋ ਆਹ ‘‘ਵਿਨਯਸਿਦ੍ਧਾ’’ਤਿ. ‘‘ਦ੍ਵੇ ਅਤ੍ਥਾ’’ਤਿ ਇਮਿਨਾ ਣਿਕਸਦ੍ਦਸ੍ਸ ਸਰੂਪਂ ਦਸ੍ਸੇਤਿ. ਪਞ੍ਞਤ੍ਤਾਨੁਲੋਮਂ ਨਾਮ ਦਟ੍ਠਬ੍ਬਨ੍ਤਿ ਸਮ੍ਬਨ੍ਧੋ. ਪਚ੍ਚਯਘਾਤੋਤਿ ਪਚ੍ਚਯਸ੍ਸ ਘਾਤੋ. ਇਮਿਨਾ ਸੇਤੁਘਾਤੋਤਿ ਏਤ੍ਥ ਸੇਤੁਸਦ੍ਦੋ ਪਚ੍ਚਯਵਾਚਕੋਤਿ ਦਸ੍ਸੇਤਿ. ਚਿਤ੍ਤਸ੍ਸਾਪੀਤਿ ਪਿਸਦ੍ਦੋ ਪਗੇਵ ਕਾਯਵਾਚਾਨਨ੍ਤਿ ਦਸ੍ਸੇਤਿ. ਇਤਿਪੀਤਿ ਪਿਸਦ੍ਦੋ ਦੁਤਿਯਤ੍ਥਸਮ੍ਪਿਣ੍ਡਨੋ. ‘‘ਪਮਾਣੇਨਾ’’ਤਿ ਇਮਿਨਾ ਮਤ੍ਤਕਾਰਿਤਾਤਿ ਏਤ੍ਥ ਮਤ੍ਤਸਦ੍ਦੋ ਪਮਾਣਤ੍ਥੋਤਿ ਦਸ੍ਸੇਤਿ. ‘‘ਕਰਣ’’ਨ੍ਤਿ ਇਮਿਨਾ ਕਾਰਿਤਾਤਿ ਤਦ੍ਧਿਤਭਾਵਂ ਕਿਤਭਾਵੇਨ ਦਸ੍ਸੇਤਿ ਸਭਾਗਤ੍ਤਾ. ਕਾਯਦ੍ਵਾਰਿਕਨ੍ਤਿ ਕਾਯਦ੍ਵਾਰੇ ਪਵਤ੍ਤਂ ਆਪਤ੍ਤਿਂ. ਇਮਿਨਾ ਆਪਜ੍ਜਤੀਤਿ ਪਦਸ੍ਸ ਕਮ੍ਮਂ ਦਸ੍ਸੇਤਿ. ਕਾਯੇਨੇਵ ਵੁਟ੍ਠਾਤੀਤਿ ਕਾਯਸਾਮਗ੍ਗਿਯਾ ਦਾਨਤ੍ਤਾ ਕਾਯੇਨੇਵ ਵੁਟ੍ਠਾਤਿ. ਸੀਸਮਕ੍ਖਨਾਦੀਤਿ ਆਦਿਸਦ੍ਦੇਨ ਪਾਦਮਕ੍ਖਨਾਦਿਂ ਸਙ੍ਗਣ੍ਹਾਤਿ.
ਤਨ੍ਤਿ ਭਾਰਂ. ‘‘ਨਿਤ੍ਥਰਿਤੁਂ ਵੀਰਿਯਂ ਆਰਭਤੀ’’ਤਿ ਇਮਿਨਾ ਵਹਨਾਕਾਰਂ ਦਸ੍ਸੇਤਿ. ਥੇਰੋ ਸਮਾਨੋਤਿ ਯੋਜਨਾ. ਨਵਹਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਅਨੁਜਾਨਾਮੀ’’ਤਿਆਦਿ. ‘‘ਕੁਕ੍ਕੁਚ੍ਚਾਯਿਤ੍ਵਾ ਕਰੋਤੀ’’ਤਿ ਇਮਿਨਾ ਕੁਕ੍ਕੁਚ੍ਚਸਦ੍ਦਸ੍ਸ ਨਾਮਧਾਤੁਂ ਦਸ੍ਸੇਤਿ. ‘‘ਦਿਵਾ ਚ ਰਤ੍ਤੋ ਚਾ’’ਤਿ ਇਮਿਨਾ ਅਭਿਣ੍ਹਂ ਆਸਵਵਡ੍ਢਨਂ ਦਸ੍ਸੇਤਿ. ਤਤ੍ਥ ਤਤ੍ਥਾਤਿ ਤੇਸੁ ਤੇਸੁ ਵਿਭਙ੍ਗਕ੍ਖਨ੍ਧਕੇਸੁ.
ਇਤਿ ਦੁਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਤਿਕਵਾਰਵਣ੍ਣਨਾ
੩੨੩. ਤਿਕੇਸੁ ਭਗਵਤਿ ਤਿਟ੍ਠਨ੍ਤੇ ਯਂ ਆਪਤ੍ਤਿਂ ਆਪਜ੍ਜਤਿ, ਸਾ ਆਪਤ੍ਤਿ ਅਤ੍ਥੀਤਿ ਯੋਜਨਾ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਦੇਸੁ. ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਤਿਕੇਸੁ, ਵਿਤ੍ਥਾਰੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਲੋਹਿਤੁਪ੍ਪਾਦਾਪਤ੍ਤੀਤਿ ਅਨੁਲੋਮਪਾਰਾਜਿਕਾਪਤ੍ਤਿ. ‘‘ਆਵੁਸੋਵਾਦੇਨਾ’’ਤਿ ‘‘ਆਵੁਸੋ’’ਤਿ ਵੋਹਾਰੇਨ. ਵੋਤਿ ਤੁਮ੍ਹੇਹਿ.
ਕਾਲੇਤਿ ਪੁਰੇਭਤ੍ਤਕਾਲੇ. ਵਿਕਾਲੇਤਿ ਪਚ੍ਛਾਭਤ੍ਤਕਾਲੇ. ਅਵਸੇਸਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ. ਦਸਵਸ੍ਸੋਮ੍ਹੀਤਿ ਅਹਂ ਦਸਵਸ੍ਸੋ ਅਮ੍ਹਿ. ਨਵੋਤਿ ਪਞ੍ਚਵਸ੍ਸਅਪਰਿਪੁਣ੍ਣੋ. ਮਜ੍ਝਿਮੋਤਿ ਪਞ੍ਚਵਸ੍ਸਤੋ ਪਟ੍ਠਾਯ ਯਾਵ ਦਸਵਸ੍ਸਅਪਰਿਪੁਣ੍ਣੋ. ਕੁਸਲਚਿਤ੍ਤੋ ਆਪਜ੍ਜਤੀਤਿ ਕੁਸਲਚਿਤ੍ਤੋ ਹੁਤ੍ਵਾ ਆਪਜ੍ਜਤਿ. ਅਬ੍ਯਾਕਤਚਿਤ੍ਤੋਤਿ ਸੁਪਨ੍ਤਸ੍ਸ ਭਵਙ੍ਗਚਿਤ੍ਤਂ ਸਨ੍ਧਾਯ ਵੁਤ੍ਤਂ. ਯਨ੍ਤਿ ਆਪਤ੍ਤਿਂ. ਸਬ੍ਬਨ੍ਤਿ ਆਪਤ੍ਤਿਂ, ਆਪਜ੍ਜਤੀਤਿ ਸਮ੍ਬਨ੍ਧੋ. ਦੁਕ੍ਖਵੇਦਨਾਸਮਙ੍ਗੀ ਹੁਤ੍ਵਾ ਆਪਜ੍ਜਤੀਤਿ ਯੋਜਨਾ. ਯਨ੍ਤਿ ਆਪਤ੍ਤਿਂ.
ਤਯੋ ਪਟਿਕ੍ਖੇਪਾਤਿ ਏਤ੍ਥ ਪਟਿਕ੍ਖੇਪਸ੍ਸ ਸਾਮਿਕਂ ਦਸ੍ਸੇਨ੍ਤੋ ਆਹ ‘‘ਬੁਦ੍ਧਸ੍ਸ ਭਗਵਤੋ’’ਤਿ. ਕਿਲੇਸਸਲ੍ਲੇਖਨਕਪਟਿਪਤ੍ਤਿਯਾਤਿ ਕਿਲੇਸਂ ਸਲ੍ਲਿਖਤਿ ਤਨੁਂ ਕਰੋਤੀਤਿ ਕਿਲੇਸਸਲ੍ਲੇਖਨਕਾ, ਸਾਯੇਵ ਪਟਿਪਤ੍ਤਿ ਕਿਲੇਸਸਲ੍ਲੇਖਨਕਪਟਿਪਤ੍ਤਿ, ਤਾਯ.
ਪਰਿਸਂ ਉਪਟ੍ਠਾਪੇਨ੍ਤੋ ਬਾਲੋਤਿ ਸਮ੍ਬਨ੍ਧੋ. ਪਰਿਸਂ ਉਪਟ੍ਠਾਪੇਨ੍ਤੋ ਪਣ੍ਡਿਤੋ ਚਾਤਿ ਸਮ੍ਬਨ੍ਧੋ. ਅਵਸੇਸਂ ਆਪਤ੍ਤਿਨ੍ਤਿ ਯੋਜਨਾ. ਕਾਲ਼ੇਤਿ ਕਾਲ਼ਪਕ੍ਖੇ. ਜੁਣ੍ਹੇਤਿ ਜੁਣ੍ਹਪਕ੍ਖੇ.
ਕਤ੍ਤਿਕਪੁਣ੍ਣਮਾਸਿਯਾਤਿ ਪਚ੍ਛਿਮਕਤ੍ਤਿਕਪੁਣ੍ਣਮਾਸਿਯਾ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸੁਵੁਤ੍ਤਕਾਰਣਂ ਦਸ੍ਸੇਨ੍ਤੋ ਆਹ ‘‘ਚਾਤੁਮਾਸ’’ਨ੍ਤਿਆਦਿ. ਹੀਤਿ ਯਸ੍ਮਾ, ਪਰਿਯੇਸਨ੍ਤੋ ਚ ਨਿਵਾਸੇਨ੍ਤੋ ਚ ਭਿਕ੍ਖੂਤਿ ਯੋਜਨਾ.
ਵਤ੍ਥੁਨ੍ਤਿ ਮੇਥੁਨਧਮ੍ਮਾਦਿਵਤ੍ਥੁਂ.
ਪਟਿਚ੍ਛਾਦੇਤਿ ਏਤਾਯਾਤਿ ਪਟਿਚ੍ਛਾਦੀਤਿ ਕਰਣਤ੍ਥੋਪਿ ਯੁਜ੍ਜਤਿ. ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਦ੍ਵਾਰਂ ਪਿਦਹਿਤ੍ਵਾ’’ਤਿਆਦਿ. ਏਤਦੇਵਾਤਿ ਪਰਿਕਮ੍ਮਮੇਵ. ਉਭਯਤ੍ਥਾਤਿ ਉਭਯੇਸੁ ਜਨ੍ਤਾਘਰਪਟਿਚ੍ਛਾਦਿਉਦਕਪਟਿਚ੍ਛਾਦੀਸੁ. ਸਬ੍ਬਨ੍ਤਿ ਅਖਿਲਂ ਪਰਿਕਮ੍ਮਾਦਿਂ. ਨਿਯ੍ਯਨ੍ਤੀਤਿ ਨਿਲੀਯਿਤ੍ਵਾ ਯਨ੍ਤਿ. ਇਮਿਨਾ ਵਹਨ੍ਤੀਤਿ ਏਤ੍ਥ ਵਹਧਾਤੁ ਗਤ੍ਯਤ੍ਥੋਤਿ ਦਸ੍ਸੇਤਿ. ਅਬ੍ਭਮਹਿਕਾਧੂਮਰਜਰਾਹੁਵਿਮੁਤ੍ਤਨ੍ਤਿ ਅਬ੍ਭੇਨ ਚ ਮਹਿਕਾਯ ਚ ਧੂਮੇਨ ਚ ਰਜੇਨ ਚ ਰਾਹੁਨਾ ਚ ਵਿਮੁਤ੍ਤਂ. ਤੇਸੂਤਿ ਅਬ੍ਭਾਦੀਸੁ. ਤਥਾਤਿ ਯਥਾ ਚਨ੍ਦਮਣ੍ਡਲਂ ਵਿਰੋਚਤਿ, ਤਥਾ ਸੂਰਿਯਮਣ੍ਡਲਂ.
ਕਰਣੀਯੇਨ ਹੁਤ੍ਵਾਤਿ ਸਮ੍ਬਨ੍ਧੋ.
ਕਪ੍ਪੇਨ੍ਤੋਤਿ ਕਰੋਨ੍ਤੋ. ਆਗਨ੍ਤੁਕੋ ਆਪਜ੍ਜਤੀਤਿ ਸਮ੍ਬਨ੍ਧੋ. ਅਨਜ੍ਝਿਟ੍ਠੋਤਿ ਅਨਜ੍ਝੇਸਿਤੋ ਹੁਤ੍ਵਾਤਿ ਸਮ੍ਬਨ੍ਧੋ. ਤਿਣਵਤ੍ਥਾਰਕਸਮਥੇ ਕਾਯੇਨ ਵੁਟ੍ਠਾਤਿ ਕਾਯਸਾਮਗ੍ਗਿਯਾ ਦਾਨਤ੍ਤਾ.
ਆਗਾਲ਼੍ਹਾਯ ਚੇਤੇਯ੍ਯਾਤਿ ਆਗਾਲ਼੍ਹਸਦ੍ਦੋ ਦਲ਼੍ਹਪਰਿਯਾਯੋਤਿ ਆਹ ‘‘ਦਲ਼੍ਹਭਾਵਾਯਾ’’ਤਿ. ਆ ਭੁਸੋ ਗਾਹਿਯਤੇ ਆਗਾਲ਼੍ਹੋ, ਗਾਲ਼੍ਹੋ ਬਾਲ਼੍ਹੋ ਦਲ਼੍ਹੋਤਿ ਅਤ੍ਥਤੋ ਏਕਂ. ਚੇਤੇਯ੍ਯਾਤਿ ਪਕਪ੍ਪੇਯ੍ਯ. ਨ ਪੂਰਯਤੋਤਿ ਨ ਪੂਰਯਨ੍ਤਸ੍ਸ. ਅਲਜ੍ਜੀ ਚ ਹੋਤਿ ਬਾਲੋ ਚ ਅਪਕਤਤ੍ਤੋ ਚਾਤਿ ਏਤ੍ਥ ਬਾਲਮਤ੍ਤਅਪਕਤਤ੍ਤਮਤ੍ਤੇਨ ਕਮ੍ਮਂ ਨ ਕਾਤਬ੍ਬਂ, ਆਪਤ੍ਤਿਵਸੇਨੇਵ ਪਨ ਕਾਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਬਾਲੋ’’ਤਿਆਦਿ. ਤਤ੍ਥ ਬਾਲੋ ਨ ਜਾਨਾਤੀਤਿ ਸਮ੍ਬਨ੍ਧੋ. ਅਯਨ੍ਤਿ ਬਾਲੋ. ਏਤ੍ਤਾਵਤਾਤਿ ਏਤ੍ਤਕੇਨ ਅਜਾਨਨਮਤ੍ਤੇਨ. ਬਾਲਭਾਵਮੂਲਕਂ ਆਪਤ੍ਤਿਨ੍ਤਿ ਸਮ੍ਬਨ੍ਧੋ. ਦ੍ਵੇ ਆਪਤ੍ਤਿਕ੍ਖਨ੍ਧੇਤਿ ਪਾਰਾਜਿਕਸਙ੍ਘਾਦਿਸੇਸਵਸੇਨ ਦ੍ਵੇ ਆਪਤ੍ਤਿਰਾਸਯੋ. ਤੇਸਨ੍ਤਿ ਤਿਣ੍ਣਂ ਪੁਗ੍ਗਲਾਨਂ, ਕਾਤਬ੍ਬਨ੍ਤਿ ਸਮ੍ਬਨ੍ਧੋ.
ਕਾਯਿਕੋ ਦਵੋ ਨਾਮਾਤਿ ਕਾਯਿਕੋ ਪਰਿਹਾਸੋ ਨਾਮ. ਮੁਖਾਲਮ੍ਬਰਕਰਣਾਦਿਭੇਦੋਤਿ ਮੁਖੇਨ ਆਲਮ੍ਬਰਨਾਮਕਤੂਰਿਯਕਿਚ੍ਚਸ੍ਸ ਕਰਣਾਦਿਭੇਦੋ. ਦ੍ਵੀਹਿਪਿ ਦ੍ਵਾਰੇਹੀਤਿ ਕਾਯਵਚੀਵਸੇਨ ਦ੍ਵੀਹਿਪਿ ਦ੍ਵਾਰੇਹਿ. ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋਤਿ ਕਾਯਦ੍ਵਾਰੇ ਪਞ੍ਞਤ੍ਤਸ੍ਸ ਕਾਯਸਂਸਗ੍ਗਾਦਿਸਿਕ੍ਖਾਪਦਸ੍ਸ ਵੀਤਿਕ੍ਕਮੋ. ਵਚੀਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੋਤਿ ਵਚੀਦ੍ਵਾਰੇ ਪਞ੍ਞਤ੍ਤਸ੍ਸ ਦੁਟ੍ਠੁਲ੍ਲਵਾਚਾਦਿਸਿਕ੍ਖਾਪਦਸ੍ਸ ਵੀਤਿਕ੍ਕਮੋ. ਕਾਯਿਕੇਨ ਉਪਘਾਤਿਕੇਨਾਤਿ ਏਤ੍ਥ ਉਪਘਾਤਿਕਂ ਨਾਮ ਅਸਿਕ੍ਖਨਨ੍ਤਿ ਆਹ ‘‘ਅਸਿਕ੍ਖਨੇਨਾ’’ਤਿ. ਕਸ੍ਮਾ ਅਸਿਕ੍ਖਨਂ ਉਪਘਾਤਂ ਨਾਮਾਤਿ ਆਹ ‘‘ਯੋ ਹੀ’’ਤਿਆਦਿ. ਤਤ੍ਥ ਯੋਤਿ ਪੁਗ੍ਗਲੋ. ਤਨ੍ਤਿ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਂ. ਨਨ੍ਤਿ ਏਵਮੇਵ. ਹਿ ਯਸ੍ਮਾ ਉਪਘਾਤੇਤੀਤਿ ਸਮ੍ਬਨ੍ਧੋ. ਵੇਜ੍ਜਕਮ੍ਮੇਨ ਸਮਨ੍ਨਾਗਤੋਤਿ ਸਮ੍ਬਨ੍ਧੋ. ਸਾਸਨਉਗ੍ਗਹਣਆਰੋਚਨਾਦਿਨਾ ਵਾਚਸਿਕੇਨ ਮਿਚ੍ਛਾਜੀਵੇਨਾਤਿ ਯੋਜਨਾ.
‘‘ਮਾ ਭਣ੍ਡਨਂ ਕਰੀ’’ਤਿ ਇਮਿਨਾ ‘‘ਮਾ’’ਤਿ ਪਟਿਸੇਧਸ੍ਸ ‘‘ਕਰੀ’’ਤਿ ਪਾਠਸੇਸੇਨ ਸਮ੍ਬਨ੍ਧਿਤਬ੍ਬਭਾਵਂ ਦਸ੍ਸੇਤਿ. ਨ ਵੋਹਰਿਤਬ੍ਬਨ੍ਤਿ ਏਤ੍ਥ ਵਿਪੁਬ੍ਬਅਵਪੁਬ੍ਬ-ਹਰਧਾਤੁ ਕਥਨਤ੍ਥੋਤਿ ਆਹ ‘‘ਨ ਕਿਞ੍ਚਿ ਵਤ੍ਤਬ੍ਬ’’ਨ੍ਤਿ. ਹੀਤਿ ਸਚ੍ਚਂ. ਬੀਜਨਗ੍ਗਾਹਾਦਿਕੇਤਿ ਆਦਿਸਦ੍ਦੇਨ ਧਮ੍ਮਜ੍ਝੇਸਨਾਦਿਂ ਸਙ੍ਗਣ੍ਹਾਤਿ. ਓਕਾਸਕਮ੍ਮਂ ਕਾਰੇਨ੍ਤਸ੍ਸਾਤਿ ਏਤ੍ਥ ‘‘ਓਕਾਸ’’ਨ੍ਤਿ ਚ ‘‘ਓਕਾਸਕਮ੍ਮ’’ਨ੍ਤਿ ਚ ਸਦਿਸਨ੍ਤਿ ਆਹ ‘‘ਓਕਾਸਂ ਕਾਰੇਨ੍ਤਸ੍ਸਾ’’ਤਿ. ਨ ਆਦਾਤਬ੍ਬਨ੍ਤਿ ਨ ਗਣ੍ਹਿਤਬ੍ਬਂ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਤ੍ਥ ਗਹੇਤ੍ਵਾ’’ਤਿਆਦਿ.
ਯਨ੍ਤਿ ਵਿਨਯਂ. ਸੋਤਿ ਭਿਕ੍ਖੁ. ਸੋਤਿ ਵਿਨਯੋ. ਤਸ੍ਸਾਤਿ ਭਿਕ੍ਖੁਸ੍ਸ. ਇਦਨ੍ਤਿ ਕਮ੍ਮਂ. ਅਞ੍ਞਂ ਪੁਚ੍ਛਾਤਿ ਮਯਾ ਅਞ੍ਞਂ ਭਿਕ੍ਖੁਂ ਪੁਚ੍ਛਾਹੀਤਿ ਯੋਜਨਾ. ਇਤੀਤਿ ਏਵਂ. ਸੋਤਿ ਤੀਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ. ਅਸ੍ਸਾਤਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ. ਨ ਸਾਕਚ੍ਛਿਤਬ੍ਬੋਤਿ ਨ ਸਹ ਕਥੇਤਬ੍ਬੋ.
‘‘ਲਦ੍ਧਿ’’ਨ੍ਤਿ ਇਮਿਨਾ ਇਦਮਪ੍ਪਹਾਯਾਤਿ ਏਤ੍ਥ ਇਦਂਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ‘‘ਅਵਿਜਹਿਤ੍ਵਾ’’ਤਿ ਇਮਿਨਾ ਹਾਧਾਤੁ ਤ੍ਵਾਪਚ੍ਚਯੋਤਿ ਦਸ੍ਸੇਤਿ. ਸੁਦ੍ਧਂ ਬ੍ਰਹ੍ਮਚਾਰਿਨ੍ਤਿ ਏਤ੍ਥ ਸਬ੍ਬਥਾ ਕਿਲੇਸਸੁਦ੍ਧੋ ਖੀਣਾਸਵੋਵ ਗਹੇਤਬ੍ਬੋਤਿ ਆਹ ‘‘ਖੀਣਾਸਵਂ ਭਿਕ੍ਖੁ’’ਨ੍ਤਿ. ‘‘ਪਾਤਬ੍ਯਭਾਵ’’ਨ੍ਤਿ ਇਮਿਨਾ ਪਾਤਬ੍ਯਤਨ੍ਤਿ ਏਤ੍ਥ ਤਾਪਚ੍ਚਯੋ ਭਾਵਤ੍ਥੇ ਹੋਤੀਤਿ ਦਸ੍ਸੇਤਿ. ‘‘ਪਟਿਸੇਵਨ’’ਨ੍ਤਿ ਇਮਿਨਾ ਪਾਤਬ੍ਯਸਦ੍ਦੋ ਯਥਾਕਾਮਪਰਿਭੁਞ੍ਜਨਤ੍ਥੋਤਿ ਦਸ੍ਸੇਤਿ. ਗਤਿਵਿਸੋਧਨਨ੍ਤਿ ਦੁਗ੍ਗਤਿਤੋ ਸੁਗਤਿਯਾ ਵਿਸੁਜ੍ਝਨਂ. ‘‘ਅਕੁਸਲਾਨਿ ਚੇਵ ਮੂਲਾਨਿ ਚਾ’’ਤਿ ਇਮਿਨਾ ਅਕੁਸਲਸਦ੍ਦਸ੍ਸ ਚ ਮੂਲਸਦ੍ਦਸ੍ਸ ਚ ਤੁਲ੍ਯਾਧਿਕਰਣਭਾਵਂ ਦਸ੍ਸੇਤਿ. ਤਸ੍ਮਾ ਅਕੁਸਲਸਙ੍ਖਾਤਾਨਿ ਮੂਲਾਨਿ ਅਕੁਸਲਮੂਲਾਨੀਤਿ ਤੁਲ੍ਯਾਧਿਕਰਣਸਮਾਸੋ ਕਾਤਬ੍ਬੋ. ਦੁਚ੍ਚਰਿਤਾਨੀਤਿ ਏਤ੍ਥ ਦੁਸਦ੍ਦਸ੍ਸ ਦੁਟ੍ਠੁਵਿਰੂਪਤ੍ਥਭਾਵਂ ਦਸ੍ਸੇਨ੍ਤੋ ਆਹ ‘‘ਦੁਟ੍ਠੁ ਚਰਿਤਾਨਿ, ਵਿਰੂਪਾਨਿ ਵਾ ਚਰਿਤਾਨੀ’’ਤਿ. ਵਿਰੂਪਾਨੀਤਿ ਵਿਕਾਰਸਭਾਵਾਨਿ. ‘‘ਕਰਣਭੂਤੇਨਾ’’ਤਿ ਇਮਿਨਾ ‘‘ਕਤ੍ਤੁਭੂਤੇਨਾ’’ਤਿ ਅਤ੍ਥਂ ਪਟਿਕ੍ਖਿਪਤਿ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਖਨ੍ਧਕੇ.
ਇਤਿ ਤਿਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਚਤੁਕ੍ਕਵਾਰਵਣ੍ਣਨਾ
੩੨੪. ਚਤੁਕ੍ਕੇਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਤਿਣਵਤ੍ਥਾਰਕਸਮਥਟ੍ਠਾਨਨ੍ਤਿ ਤਿਣਵਤ੍ਥਾਰਕਸਮਥੇਨ ਅਧਿਕਰਣਵੂਪਸਮਿਤਟ੍ਠਾਨਂ. ਪਰਸ੍ਸ ਕਮ੍ਮਵਾਚਾਯਾਤਿ ਪਰਸ੍ਸ ਕਰਣਭੂਤਾਯ ਕਮ੍ਮਵਾਚਾਯ. ਤਤੋਤਿ ਚਤੁਕ੍ਕਤੋ. ਪਰੇਸੂਤਿ ਅਞ੍ਞੇਸੁ ਚਤੁਕ੍ਕੇਸੁ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਤਮੇਵਾਤਿ ਕਾਯਦ੍ਵਾਰਿਕਮੇਵ. ਪੁਨ ਤਮੇਵਾਤਿ ਵਚੀਦ੍ਵਾਰਿਕਮੇਵ. ਆਪਜ੍ਜਿਤਬ੍ਬਾਪਤ੍ਤਿਞ੍ਚ ਸਹਾਗਾਰਸੇਯ੍ਯਾਪਤ੍ਤਿਞ੍ਚਾਤਿ ਯੋਜਨਾ. ਜਗ੍ਗਨ੍ਤੋਤਿ ਜਾਗਰਨ੍ਤੋ.
ਅਚਿਤ੍ਤਕੋ ਆਪਜ੍ਜਤਿ ਨਾਮਾਤਿ ‘‘ਅਚਿਤ੍ਤਕੋ ਭਿਕ੍ਖੁ ਆਪਜ੍ਜਤਿ ਨਾਮਾ’’ਤਿ ਵਾ ‘‘ਅਚਿਤ੍ਤਕੋ ਹੁਤ੍ਵਾ ਆਪਜ੍ਜਤਿ ਨਾਮਾ’’ਤਿ ਵਾ ਯੋਜਨਾ ਕਾਤਬ੍ਬਾ. ਸਭਾਗਨ੍ਤਿ ਵਤ੍ਥੁਸਭਾਗਂ. ਤਞ੍ਚਾਤਿ ਅਞ੍ਞਤਰਂ ਤਞ੍ਚ ਆਪਤ੍ਤਿਂ. ਇਤੀਤਿ ਏਵਂ.
ਕਮ੍ਮੇਨਾਤਿ ਸਮਨੁਭਾਸਨਕਮ੍ਮੇਨ. ਕਮ੍ਮੇਨ ਵੁਟ੍ਠਾਤੀਤਿ ਕਮ੍ਮੇਨ ਏਵ ਵੁਟ੍ਠਾਤਿ.
ਸੋਤਿ ਗਿਹਿਪਰਿਕ੍ਖਾਰੋ, ਆਹਟੋ ਹੋਤੀਤਿ ਸਮ੍ਬਨ੍ਧੋ. ਅਵਾਪੁਰਣਨ੍ਤਿ ਕੁਞ੍ਚਿਕਂ. ਅਨ੍ਤੋਤਿ ਭਣ੍ਡਾਗਾਰਸ੍ਸ ਅਨ੍ਤੋ.
ਸਮ੍ਮੁਖਾ ਵੁਟ੍ਠਾਤੀਤਿ ਸਮ੍ਮੁਖਾ ਏਵ ਵੁਟ੍ਠਾਤਿ.
ਸਯਿਤਾਯ ਏਵ ਭਿਕ੍ਖੁਨਿਯਾਤਿ ਯੋਜਨਾ. ਇਦਨ੍ਤਿ ਸਹਾਗਾਰਸੇਯ੍ਯਾਪਤ੍ਤਿਂ, ਪਟਿਚ੍ਚਾਤਿ ਸਮ੍ਬਨ੍ਧੋ. ਏਤਨ੍ਤਿ ‘‘ਲਿਙ੍ਗਪਾਤੁਭਾਵੇਨਾ’’ਤਿ ਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਉਭਿਨ੍ਨਮ੍ਪੀਤਿ ਭਿਕ੍ਖੁਭਿਕ੍ਖੁਨੀਨਮ੍ਪਿ. ਲਿਙ੍ਗਪਟਿਲਾਭੇਨਾਤਿ ਇਤ੍ਥਿਲਿਙ੍ਗਪਟਿਲਾਭੇਨ. ਪਠਮਨ੍ਤਿ ਆਦਿਕਪ੍ਪਕਾਲੇ. ‘‘ਪਠਮਂ ਉਪ੍ਪਨ੍ਨਵਸੇਨਾ’’ਤਿ ਇਮਿਨਾ ਪੁਰੇ ਉਪ੍ਪਨ੍ਨਂ ਪੁਰਿਮਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਸੇਟ੍ਠਭਾਵੇਨਾ’’ਤਿ ਇਮਿਨਾ ਪੁਰਭਾਵੇਨ ਸੇਟ੍ਠਭਾਵੇਨ ਉਪ੍ਪਨ੍ਨਂ ਪੁਰਿਮਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਪੁਰਿਸਲਿਙ੍ਗ’’ਨ੍ਤਿ ਇਮਿਨਾ ਇਮਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਪੁਰਿਸਕੁਤ੍ਤਪੁਰਿਸਾਕਾਰਾਦੀਤਿ ਆਦਿਸਦ੍ਦੇਨ ਪੁਰਿਸਨਿਮਿਤ੍ਤਾਦਯੋ ਸਙ੍ਗਣ੍ਹਾਤਿ. ਯਾਨਿ ਛਚਤ੍ਤਾਲੀਸ ਸਿਕ੍ਖਾਪਦਾਨੀਤਿ ਯੋਜਨਾ. ਇਮਿਨਾ ਵੁਤ੍ਤਨਯਾਨੁਸਾਰੇਨ ਦੁਤਿਯਚਤੁਕ੍ਕੇਪਿ ਅਤ੍ਥੋ ਵੇਦਿਤਬ੍ਬੋ. ਤੇਹੀਤਿ ਤਿਂਸਾਧਿਕੇਹਿ ਸਤਸਿਕ੍ਖਾਪਦੇਹਿ.
ਮਹਾਪਦੇਸਾਤਿ ਵਿਨਯੇ (ਮਹਾਵ. ੩੦੫) ਆਗਤਾ ਮਹਾਪਦੇਸਾ. ਕਸ੍ਮਾ ਮਹਾਪਦੇਸਾ ‘‘ਸਾਮੁਕ੍ਕਂਸਾ’’ਤਿ ਵੁਚ੍ਚਨ੍ਤੀਤਿ ਆਹ ‘‘ਤੇ ਹੀ’’ਤਿਆਦਿ. ਤਤ੍ਥ ਤੇਤਿ ਚਤ੍ਤਾਰੋ ਮਹਾਪਦੇਸਾ, ਵੁਚ੍ਚਨ੍ਤੀਤਿ ਸਮ੍ਬਨ੍ਧੋ. ‘‘ਸਯ’’ਨ੍ਤਿ ਇਮਿਨਾ ਸਾਮੁਕ੍ਕਂਸਾਤਿ ਏਤ੍ਥ ਸਂਸਦ੍ਦਸ੍ਸ ਸਯਮਤ੍ਥਂ ਦਸ੍ਸੇਤਿ. ‘‘ਉਕ੍ਖਿਪਿਤ੍ਵਾ’’ਤਿ ਇਮਿਨਾ ਉਕ੍ਕਂਸਸਦ੍ਦੋ ਉਕ੍ਖਿਪਨਤ੍ਥੋਤਿ ਦਸ੍ਸੇਤਿ. ‘‘ਠਪਿਤਤ੍ਤਾ’’ਤਿ ਇਮਿਨਾ ਸਯਂ ਉਕ੍ਕਂਸਿਤ੍ਵਾ ਠਪਿਤਾ ਸਾਮੁਕ੍ਕਂਸਾਤਿ ਵਚਨਤ੍ਥਂ ਦਸ੍ਸੇਤਿ. ‘‘ਅਜ੍ਝੋਹਰਣੀਯਪਰਿਭੋਗਾ’’ਤਿ ਇਮਿਨਾ ਬਾਹਿਰਪਰਿਭੋਗਂ ਨਿਵਤ੍ਤੇਤਿ. ਉਦਕਂ ਪਨਾਤਿ ਕੇਨਚਿ ਅਸਂਸਗ੍ਗਂ ਪਸਨ੍ਨੋਦਕਂ ਪਨ. ਕਾਲੇਤਿ ਸਪ੍ਪਦਟ੍ਠਕਾਲੇ. ‘‘ਪਞ੍ਚ ਵਾ ਦਸ ਵਾ ਸੀਲਾਨੀ’’ਤਿ ਇਮਿਨਾ ਪਞ੍ਚ ਵਾ ਦਸ ਵਾ ਸੀਲਾਨਿ ਉਪਾਸਕਸੀਲਨ੍ਤਿ ਦਸ੍ਸੇਤਿ.
ਤਤ੍ਥ ਚਾਤਿ ਵਿਹਾਰੇ ਚ. ਉਭੋਪੀਤਿ ਆਗਨ੍ਤੁਕਾਵਾਸਿਕਵਸੇਨ ਉਭੋਪਿ. ਅਸਾਧਾਰਣਨ੍ਤਿ ਦ੍ਵੀਹਿ ਅਸਾਧਾਰਣਂ. ਆਪਤ੍ਤਿਨ੍ਤਿ ਭਿਕ੍ਖੁਨੀਹਿਯੇਵ ਸਾਧਾਰਣਂ ਆਪਤ੍ਤਿਂ. ਗਮਿਯਚਤੁਕ੍ਕੇਪੀਤਿ ਪਿਸਦ੍ਦੋ ਆਗਨ੍ਤੁਕਚਤੁਕ੍ਕਂ ਅਪੇਕ੍ਖਤਿ. ਵਤ੍ਥੁਨਾਨਤ੍ਤਤਾਵਾਤਿ ਮੇਥੁਨਾਦਿਵਤ੍ਥੁਨਾਨਤ੍ਤਤਾ ਏਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸਾਤਿ ਆਪਤ੍ਤਿ. ਤਥਾਤਿ ਯਥਾ ਕਾਯਸਂਸਗ੍ਗੇ, ਤਥਾ ਲਸੁਣਖਾਦਨੇਤਿ ਯੋਜਨਾ. ਏਤ੍ਥਾਤਿ ਵਤ੍ਥੁਨਾਨਤ੍ਤਤਾਦਿਚਤੁਕ੍ਕੇ. ਚਤ੍ਤਾਰਿ ਪਾਰਾਜਿਕਾਨੀਤਿ ਭਿਕ੍ਖੁਪਾਤਿਮੋਕ੍ਖੇ ਆਗਤਾਨਿ. ਵਿਸੁਂ ਆਪਜ੍ਜਨ੍ਤੇਸੁਪਿ ਏਸੇਵ ਨਯੋਤਿ ਸਮ੍ਬਨ੍ਧੋ.
ਪੁਰਿਮਚਤੁਕ੍ਕੇਤਿ ਵਤ੍ਥੁਨਾਨਤ੍ਤਤਾਦਿਚਤੁਕ੍ਕੇ. ਯੋ ਪਠਮੋ ਪਞ੍ਹੋਤਿ ਯੋਜਨਾ. ਇਧਾਤਿ ਵਤ੍ਥੁਸਭਾਗਤਾਦਿਚਤੁਕ੍ਕੇ. ਯੋ ਚਾਤਿ ਯੋ ਚ ਪਞ੍ਹੋ. ਤਤ੍ਥਾਤਿ ਵਤ੍ਥੁਨਾਨਤ੍ਤਤਾਦਿਚਤੁਕ੍ਕੇ. ਤਤਿਯਚਤੁਤ੍ਥੇਸੁ ਪਞ੍ਹੇਸੂਤਿ ਸਮ੍ਬਨ੍ਧੋ.
‘‘ਸਦ੍ਧਿਵਿਹਾਰਿਕਸ੍ਸਾ’’ਤਿ ਪਦਂ ‘‘ਕਤ੍ਤਬ੍ਬ’’ਇਤਿ ਪਦੇ ਸਮ੍ਪਦਾਨਂ.
ਗਰੁਕਨ੍ਤਿ ਪਾਰਾਜਿਕਂ. ਲਹੁਕਨ੍ਤਿ ਥੁਲ੍ਲਚ੍ਚਯਂ ਵਾ ਦੁਕ੍ਕਟਂ ਵਾ.
ਅਟ੍ਠਨ੍ਨਂ ਭਿਕ੍ਖੁਨੀਨਂ ਪਟਿਪਾਟਿਯਾ ਨਿਸੀਦਿਤਬ੍ਬਤੋ ਵੁਤ੍ਤਂ ‘‘ਨਵਮਭਿਕ੍ਖੁਨਿਤੋ’’ਤਿ. ਪਚ੍ਚੁਟ੍ਠਾਨਾਰਹਾਤਿ ਪਟਿਮੁਖਂ ਉਪਟ੍ਠਾਤੁਂ ਅਰਹਾ. ਅਵਿਸੇਸੇਨ ਚਾਤਿ ‘‘ਭਿਕ੍ਖੂ’’ਤਿ ਵਾ ‘‘ਭਿਕ੍ਖੁਨੀ’’ਤਿ ਵਾ ਵਿਸੇਸ, ਮਕਤ੍ਵਾ ਸਾਮਞ੍ਞੇਨ ਚ. ‘‘ਆਸਨਾਰਹਚਤੁਕ੍ਕਸ੍ਸਾ’’ਤਿ ਪਦਂ ‘‘ਪਠਮਪਦ’’ਨ੍ਤਿ ਪਦੇ ਅਵਯਵਿਸਮ੍ਬਨ੍ਧੋ.
ਅਸਾਧਾਰਣਨ੍ਤਿ ਭਿਕ੍ਖੂਹਿ ਅਸਾਧਾਰਣਂ. ਵਿਕਾਲੇ ਕਪ੍ਪਤੀਤਿ ਤਦਹੁਵਿਕਾਲੇ ਕਪ੍ਪਤਿ. ਕਾਲਾਤੀਤਨ੍ਤਿ ਕਾਲਯਾਮਸਤ੍ਤਹਾਤੀਤਂ. ਯਾਵਕਾਲਿਕਾਦਿਤ੍ਤਯਞ੍ਚ ਅਕਪ੍ਪਿਯਮਂਸਞ੍ਚ ਉਗ੍ਗਹਿਤਕਞ੍ਚ ਅਪਟਿਗ੍ਗਹਿਤਕਞ੍ਚਾਤਿ ਯੋਜਨਾ.
ਗੁਣਙ੍ਗੁਣੂਪਾਹਨਞ੍ਚ ਧੁਵਨ੍ਹਾਨਞ੍ਚ ਚਮ੍ਮਤ੍ਥਰਣਞ੍ਚ ਗੁਣਙ੍ਗੁਣੂਪਾਹਨਧੁਵਨ੍ਹਾਨਚਮ੍ਮਤ੍ਥਰਣਾਨਿ. ਇਮਾਨਿ ਚਤ੍ਤਾਰੀਤਿ ਪਞ੍ਚਵਗ੍ਗੇਨ ਗਣੇਨ ਉਪਸਮ੍ਪਦਦਾਨਾਦੀਨਿ. ਇਧਾਤਿ ਪਚ੍ਚਨ੍ਤਿਮੇਸੁ ਜਨਪਦੇਸੁ. ਇਧਾਤਿ ਮਜ੍ਝਿਮੇਸੁ. ਇਦਨ੍ਤਿ ਚਤੁਬ੍ਬਿਧਂ ਵਤ੍ਥੁ. ਦੀਪੇਤੁਮ੍ਪੀਤਿ ਦੀਪਨਮ੍ਪਿ. ਤੁਂਪਚ੍ਚਯੋ ਹਿ ਕਤ੍ਵਤ੍ਥਜੋਤਕੋ. ਏਸੇਵ ਨਯੋ ਦੀਪੇਤੁਂ ਪਨਾਤਿ ਏਤ੍ਥਾਪਿ. ਸੇਸਂ ਅਨੁਞ੍ਞਾਤਕਨ੍ਤਿ ਸਮ੍ਬਨ੍ਧੋ. ਉਭਯਤ੍ਥਪੀਤਿ ਪਚ੍ਚਨ੍ਤਿਮਮਜ੍ਝਿਮਵਸੇਨ ਉਭਯਤ੍ਥਾਪਿ.
ਛਨ੍ਦਪਾਰਿਸੁਦ੍ਧਿਅਕ੍ਖਾਨਂ ਏਕਂ ਕਤ੍ਵਾ ‘‘ਚਤ੍ਤਾਰੋ’’ਤਿ ਵੁਤ੍ਤਂ. ਚਤ੍ਤਾਰੋ ਪੁਬ੍ਬਕਿਚ੍ਚਾਤਿ ਲਿਙ੍ਗਵਿਪਲ੍ਲਾਸੋ, ‘‘ਚਤ੍ਤਾਰਿ ਪੁਬ੍ਬਕਿਚ੍ਚਾਨੀ’’ਤਿ ਹਿ ਅਤ੍ਥੋ. ਏਵਂ ਵੁਤ੍ਤਾਨਿ ਇਮਾਨਿ ਚਤ੍ਤਾਰੀਤਿ ਸਮ੍ਬਨ੍ਧੋ. ਏਵਂ ਆਗਤਾ ਸਮ੍ਮੁਤਿਯੋਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਚਤੁਕ੍ਕੇਸੁ.
ਇਤਿ ਚਤੁਕ੍ਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਪਞ੍ਚਕਵਾਰਵਣ੍ਣਨਾ
੩੨੫. ਪਞ੍ਚਕੇਸੁ ‘‘ਪਞ੍ਚ ਪੁਗ੍ਗਲਾ ਨਿਯਤਾ’’ਤਿ ਏਤਂ ਆਨਨ੍ਤਰਿਯਾਨਮੇਵ ਗਹਣਨ੍ਤਿ ਯੋਜਨਾ. ਪਞ੍ਚ ਛੇਦਨ ਕਾ ਆਪਤ੍ਤਿਯੋ ਨਾਮ ਵੇਦਿਤਬ੍ਬਾਤਿ ਸਮ੍ਬਨ੍ਧੋ. ਯਾ ਵਿਕਪ੍ਪਨਾ ਵੁਤ੍ਤਾਤਿ ਯੋਜਨਾ. ਉਸ੍ਸਙ੍ਕਿਤੋਤਿ ਉਟ੍ਠਹਿਤ੍ਵਾ ਸਙ੍ਕਿਤੋ. ਪਰਿਸਙ੍ਕਿਤੋਤਿ ਪੁਨਪ੍ਪੁਨਂ ਸਙ੍ਕਿਤੋ. ਅਕੁਪ੍ਪੋ ਅਰਹਤ੍ਤਫਲਸਙ੍ਖਾਤੋ ਧਮ੍ਮੋ ਇਮਸ੍ਸਾਤਿ ਅਕੁਪ੍ਪਧਮ੍ਮੋ, ਖੀਣਾਸਵੋ. ਖੀਣਾਸਵੋ ਸਮਾਨੋਪਿ ਉਸ੍ਸਙ੍ਕਿਤੋ ਚੇਵ ਪਰਿਸਙ੍ਕਿਤੋ ਚਾਤਿ ਯੋਜਨਾ. ਪਰਿਹਰਿਤਬ੍ਬਾਤਿ ਅਪਨੇਤਬ੍ਬਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤੇਸੂਤਿ ਅਗੋਚਰੇਸੁ. ਥੂਪਚੀਵਰਨ੍ਤਿ ਏਤ੍ਥ ਥੂਪਂ ਪਰਿਕ੍ਖਿਪਿਤ੍ਵਾ ਕਤਂ ਚੀਵਰਂ ਥੂਪਚੀਵਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਵਮ੍ਮਿਕ’’ਨ੍ਤਿਆਦਿ. ਵਮ੍ਮਿਕੋ ਹਿ ਥੂਪਯਤਿ ਉਦ੍ਧਂ ਆਰੋਹਤੀਤਿ ਥੂਪੋਤਿ ਵੁਚ੍ਚਤਿ. ਨ੍ਹਾਨਟ੍ਠਾਨੇਤਿ ਸਬ੍ਬੇਸਂ ਨ੍ਹਾਨਟ੍ਠਾਨੇ. ਤਞ੍ਹਿ ਉਦਕੇਨ ਕਾਯਂ ਅਭਿਸਿਞ੍ਚਤਿ ਏਤ੍ਥਾਤਿ ਅਭਿਸੇਕਨ੍ਤਿ ਵੁਚ੍ਚਤਿ. ਅਭਿਸੇਕੇ ਛਡ੍ਡਿਤਂ ਆਭਿਸੇਕਿਕਂ, ਚੀਵਰਂ. ਤੇਨ ਵੁਤ੍ਤਂ ‘‘ਛਡ੍ਡਿਤਚੀਵਰ’’ਨ੍ਤਿ. ਭਤਪਟਿਯਾਭਤਨ੍ਤਿ ਏਤ੍ਥ ਭਰਧਾਤੁਯਾ ਪੋਸਨਤ੍ਥਂ ਪਟਿਕ੍ਖਿਪਿਤ੍ਵਾ ਧਾਰਣਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੁਸਾਨਂ ਨੇਤ੍ਵਾ ਪੁਨ ਆਨੀਤਕ’’ਨ੍ਤਿ. ਤਤ੍ਥ ‘‘ਸੁਸਾਨ’’ਨ੍ਤਿ ਇਮਿਨਾ ਕਮ੍ਮਂ ਦਸ੍ਸੇਤਿ, ‘‘ਪੁਨਾ’’ਤਿ ਇਮਿਨਾ ਪਟਿਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ਇਮੇਹਿ ਪਦੇਹਿ ਸੁਸਾਨਂ ਭਤਂ ਹੁਤ੍ਵਾ ਗੇਹਂ ਪਟਿਆਭਰਿਤਬ੍ਬਨ੍ਤਿ ਭਤਪਟਿਯਾਭਤਨ੍ਤਿ ਵਚਨਤ੍ਥਂ ਦਸ੍ਸੇਤਿ, ਯਕਾਰੋ ਪਦਸਨ੍ਧਿਕਰੋ. ਪਾਲ਼ਿਯਂ, ਅਟ੍ਠਕਥਾਯਞ੍ਚ ਪੋਤ੍ਥਕੇਸੁ ‘‘ਗਤਪਟਿਯਾਗਤ’’ਨ੍ਤਿ ਕਣ੍ਠਜਤਤਿਯਕ੍ਖਰੇਨ ਪਾਠੋ ਅਤ੍ਥਿ, ਸੋ ਅਸੁਨ੍ਦਰੋ.
ਕਾਯੋ ਪਠਮਂ, ਵਾਚਾ ਦੁਤਿਯਂ, ਕਾਯਵਾਚਾ ਤਤਿਯਂ, ਇਦਂ ਸਨ੍ਧਾਯ ‘‘ਤਤਿਯੇਨਾ’’ਤਿ ਵੁਤ੍ਤਂ. ਤਤ੍ਥੇਵਾਤਿ ਅਨ੍ਤਰਪੇਯ੍ਯਾਲੇ ਏਵ.
ਅਦਿਨ੍ਨਨ੍ਤਿ ਏਤ੍ਥ ਅਕਾਰਸ੍ਸ ਨਕਾਰਿਯਭਾਵਞ੍ਚ ਤਪਚ੍ਚਯਸ੍ਸ ਕਮ੍ਮਵਾਚਕਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਅਞ੍ਞੇਨ ਨ ਦਿਨ੍ਨ’’ਨ੍ਤਿ. ਤਤ੍ਥ ‘‘ਅਞ੍ਞੇਨਾ’’ਤਿ ਇਮਿਨਾ ਤਪਚ੍ਚਯਸ੍ਸ ਕਮ੍ਮਵਾਚਕਭਾਵਂ ਦਸ੍ਸੇਤਿ, ਨਕਾਰੇਨ ਅਕਾਰਸ੍ਸ ਕਾਰਿਯਂ ਦਸ੍ਸੇਤਿ. ਕੇਨ ਕਾਰਣੇਨ ਅਵਿਦਿਤਨ੍ਤਿ ਆਹ ‘‘ਪਟਿਗ੍ਗਣ੍ਹਾਮੀਤਿ ਚੇਤਨਾਯ ਅਭਾਵੇਨਾ’’ਤਿ. ਅਵਿਦਿਤਨ੍ਤਿ ਅਪਾਕਟਂ. ਨਟਸਮਜ੍ਜਾਦਿਦਾਨਨ੍ਤਿ ਨਟਸਮਜ੍ਜਾਦੀਨਂ ਸਬ੍ਬੇਸਂ ਦਾਨਂ. ਉਸਭਵਿਸ੍ਸਜ੍ਜਨਨ੍ਤਿ ਉਸਭਸ੍ਸ ਵਿਸ੍ਸਜ੍ਜਨਂ. ਇਦਂ ਉਪਲਕ੍ਖਣਵਸੇਨ ਵੁਤ੍ਤਂ. ਸਬ੍ਬਾਸਮ੍ਪਿ ਪਨ ਮਨੁਸ੍ਸਾਮਨੁਸ੍ਸਾਨਂ ਇਤ੍ਥੀਨਂ ਮੇਥੁਨਰਤਿਵਸੇਨ ਪੁਰਿਸਾਨਂ ਦਾਨਮ੍ਪਿ ਗਹੇਤਬ੍ਬਂ. ਇਤ੍ਥਿਦਾਨਨ੍ਤਿ ਏਤ੍ਥਾਪਿ ਯਾਸਂ ਕਾਸਞ੍ਚਿ ਇਤ੍ਥੀਨਂ ਯੇਸਂ ਕੇਸਞ੍ਚਿ ਪੁਰਿਸਾਨਂ ਦਾਨਂ ਗਹੇਤਬ੍ਬਂ. ਪਟਿਭਾਨਚਿਤ੍ਤਕਮ੍ਮਦਾਨਨ੍ਤਿ ਮੇਥੁਨਸੇਵਨਪਟਿਭਾਨਚਿਤ੍ਤਕਮ੍ਮਦਾਨਂ. ਲੋਕਸ੍ਸਾਤਿ ਲੋਕੇਨ. ਕਥੇਤੁਕਮ੍ਯਤਾਤਿ ਕਥੇਤੁਕਾਮਤਾ. ‘‘ਨ ਸੁਪ੍ਪਟਿਵਿਨੋਦਯਾ’’ਤਿ ਇਮਿਨਾ ਦੁਕ੍ਖੇਨ ਪਟਿਵਿਨੋਦੇਤਬ੍ਬਾਤਿ ਦੁਪ੍ਪਟਿਵਿਨੋਦਯਾ, ਪਟਿਵਿਨੋਦੇਤੁਂ ਨ ਸੁਕਰਾਤਿ ਦਸ੍ਸੇਤਿ. ਉਪਾਯੇਨਾਤਿ ਯੁਤ੍ਤਿਯਾ.
ਫੁਸ੍ਸਦੇਵਤ੍ਥੇਰੋ ਅਟ੍ਠਾਸਿ ਕਿਰਾਤਿ ਸਮ੍ਬਨ੍ਧੋ. ਏਕਂਸਨ੍ਤਿ ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਏਕਸ੍ਮਿਂ ਅਂਸੇਤਿ ਹਿ ਅਤ੍ਥੋ. ਬੁਦ੍ਧਾਰਮ੍ਮਣਨ੍ਤਿ ਬੁਦ੍ਧਗੁਣਾਰਮ੍ਮਣਂ. ਮਾਰੋਤਿ ਦੇਵਪੁਤ੍ਤਮਾਰੋ, ਗਤੋਤਿ ਸਮ੍ਬਨ੍ਧੋ. ਗੋਮਯਨ੍ਤਿ ਗੋਮੀਲ਼੍ਹਂ. ਜਰਗ੍ਗਵੋਤਿ ਜਰਗੋਣੋ. ਤਾਦਿਸਮੇਵਾਤਿ ਗੋਮਯਵਿਪ੍ਪਕਿਰਣਸਭਾਵਮੇਵ. ਵਿਪ੍ਪਕਾਰਨ੍ਤਿ ਵਿਸੇਸਪਕਾਰੇਨ ਕਰਣਂ. ਵਙ੍ਕਪਾਦਨ੍ਤਿ ਕੁਟਿਲਪਾਦਂ. ਪਰਿਕਸਨ੍ਤੋਤਿ ਪਰਿਚ੍ਛੇਦਂ ਕਤ੍ਵਾ ਵਿਲੇਖਨ੍ਤੋ. ਵਿਗਚ੍ਛਪੁਰਿਸੋਤਿ ਵਿਕਾਰਂ, ਵਿਰੂਪਂ ਵਾ ਗਤਪੁਰਿਸੋ. ‘‘ਵਿਭਚ੍ਛਪੁਰਿਸੋ’’ਤਿਪਿ ਪਾਠੋ, ਵਿਸੇਸੇਨ ਸੋਭਣਂ ਭਕ੍ਖਪੁਰਿਸੋਤਿ ਅਤ੍ਥੋ. ਅਯਮੇਵ ਪਾਠੋ ਅਭਿਧਾਨਾਦੀਸੁ (ਅਭਿਧਾਨਪ੍ਪਦੀਪਿਕਾਯਂ ੧੦੨ ਗਾਥਾਯਂ) ਦਿਸ੍ਸਤਿ. ਸਮਨ੍ਤਾਤਿ ਕਟਅਨ੍ਧਕਾਰਵਿਹਾਰਸ੍ਸ ਸਮਨ੍ਤਤੋ. ਮਾਰੋ ਸਿਯਾ ਨੁ ਖੋਤਿ ਯੋਜਨਾ. ਨ ਅਸਕ੍ਖਿਂ ਇਤਿ ਆਹਾਤਿ ਯੋਜਨਾ. ਦਿਟ੍ਠਪੁਬ੍ਬੋਤਿ ਪੁਬ੍ਬੇ ਦਿਟ੍ਠੋ. ਮਹਾਨੁਭਾਵੋਤਿ ਦੇਵਿਦ੍ਧਿਯਾ ਮਹਾਨੁਭਾਵੋ. ਇਙ੍ਘਾਤਿ ਉਯ੍ਯੋਜਨਤ੍ਥੇ ਨਿਪਾਤੋ, ਉਯ੍ਯੋਜੇਮੀਤਿ ਅਤ੍ਥੋ. ਅਤ੍ਤਭਾਵਨ੍ਤਿ ਤਵ ਅਤ੍ਤਭਾਵਂ. ਤਾਦਿਸਂ ਰੂਪਨ੍ਤਿ ਬੁਦ੍ਧਸ੍ਸ ਭਗਵਤੋ ਅਤ੍ਤਭਾਵਸਦਿਸਂ ਰੂਪਂ. ਤਂਸਰਿਕ੍ਖਕਨ੍ਤਿ ਤੇਨ ਰੂਪੇਨ ਸਦਿਸਂ. ਪਤਿਰੂਪਮੇਵ ਸਦਿਸਟ੍ਠੇਨ ਪਤਿਰੂਪਕਂ, ਨ ਏਕਂਸਸਦਿਸਂ ਰੂਪਂ ਕਿਞ੍ਚਿ ਸਦਿਸਰੂਪਨ੍ਤਿ ਅਤ੍ਥੋ. ਸਕਤ੍ਤਭਾਵਨ੍ਤਿ ਸਸ੍ਸ ਏਸੋ ਸਕੋ, ਸੋਯੇਵ ਅਤ੍ਤਭਾਵੋ ਸਕਤ੍ਤਭਾਵੋ, ਤਂ. ਅਯਨ੍ਤਿ ਮਾਰੋ. ਕਥਨ੍ਤਿ ਕੇਨ ਕਾਰਣੇਨ ਭਗਵਾ ਨ ਸੋਭਤਿ ਨੁ ਖੋ, ਸੋਭਤਿਯੇਵਾਤਿ ਅਤ੍ਥੋ. ਤਦੇਵ ਸਮਤ੍ਥੇਤੁਂ ਵੁਤ੍ਤਂ ‘‘ਸਬ੍ਬਸੋ ਵੀਤਰਾਗਦੋਸਮੋਹੋ’’ਤਿ. ਵਞ੍ਚਿਤੋਮ੍ਹੀਤਿ ਅਹਂ ਵਞ੍ਚਿਤੋ ਅਮ੍ਹਿ. ਕਿਂ ਅਤ੍ਥੀਤਿ ਕਿਂ ਨਾਮ ਅਤ੍ਥਿ, ਮਮ ਵਞ੍ਚਨਚਿਤ੍ਤਂ ਨਤ੍ਥੀਤਿ ਅਧਿਪ੍ਪਾਯੋ. ਦਹਰਭਿਕ੍ਖੁ ਪਟਿਲਭਤੀਤਿਆਦਿਨਾ ਸਮ੍ਬਨ੍ਧਿਤਬ੍ਬਂ.
ਦਹਰਭਿਕ੍ਖੁ ਅਟ੍ਠਾਸੀਤਿ ਸਮ੍ਬਨ੍ਧੋ. ਸਙ੍ਕਾਰਛਡ੍ਡਨਿਂ ਪਚ੍ਛਿਨ੍ਤਿ ਸਮ੍ਬਨ੍ਧੋ. ਸਙ੍ਕਾਰਂ ਛਡ੍ਡੇਤਿ ਇਮਾਯਾਤਿ ਸਙ੍ਕਾਰਛਡ੍ਡਨੀ. ਤਿਸ੍ਸਦਤ੍ਤਤ੍ਥੇਰੋ ਨਾਮ ਪੁਚ੍ਛੀਤਿ ਸਮ੍ਬਨ੍ਧੋ. ਨਾਵਾਤੋਤਿ ਪੋਤਤੋ. ਪਞ੍ਹਾਸਹਸ੍ਸਨ੍ਤਿ ਸਮਥਵਿਪਸ੍ਸਨਾਕਮ੍ਮਟ੍ਠਾਨੇਸੁ ਪੁਚ੍ਛਾਸਹਸ੍ਸਂ. ਪੁਚ੍ਛੀਤਿ ਦਹਰਂ ਪੁਚ੍ਛਿ. ਪਰਿਚ੍ਛਿਨ੍ਦੀਤਿ ਤਸ੍ਮਿਂ ਦਿਵਸੇ ਕਾਤਬ੍ਬਵਤ੍ਤਂ ਨਿਟ੍ਠਪੇਸੀਤਿ ਅਤ੍ਥੋ. ਯੋਨਕਵਿਸਯਤੋਤਿ ਯੋਨਕਲੋਕਤੋ. ਅਟ੍ਠ ਕਪ੍ਪੇ ਅਨੁਸ੍ਸਰੀਤਿ ਚੇਤਿਯਙ੍ਗਣਂ ਦਿਸ੍ਵਾ ਚਿਤ੍ਤਸ੍ਸ ਪਸੀਦਨਤੋ ਪੁਬ੍ਬੇਨਿਵਾਸਞਾਣੇਨ ਅਟ੍ਠ ਕਪ੍ਪੇ ਅਨੁਸ੍ਸਰਿ.
ਏਕੋ ਭਿਕ੍ਖੁ ਗਤੋਤਿ ਸਮ੍ਬਨ੍ਧੋ. ਦੇਵਤਾ ਪੁਪ੍ਫਹਤ੍ਥਾ ਅਟ੍ਠਂਸੂਤਿ ਮਨੁਸ੍ਸਵੇਸਂ ਗਹੇਤ੍ਵਾ ਅਟ੍ਠਂਸੁ. ਤੇਨ ਵੁਤ੍ਤਂ ‘‘ਕਤਰਗਾਮਵਾਸਿਕਾਤ੍ਥਾ’’ਤਿ. ਤੁਮ੍ਹੇ ਕਤਰਸ੍ਮਿਂ ਗਾਮੇ ਵਸਨਸੀਲਾ ਅਤ੍ਥ ਭਵਥਾਤਿ ਯੋਜਨਾ. ਇਧੇਵਾਤਿ ਇਮਸ੍ਮਿਂਯੇਵ ਠਾਨੇ. ਠਿਤਾਮ੍ਹਾਤਿ ਮਯਂ ਠਿਤਾ ਅਮ੍ਹਾਤਿ ਯੋਜਨਾ.
ਅਯਂ ਕਥਾਤਿ ਅਯਂ ਵਕ੍ਖਮਾਨਕਥਾ. ਕਿਂ ਅਮਚ੍ਚਪੁਤ੍ਤੋ ਪਾਸਾਦਿਕੋ ਨੁ ਖੋਤਿ ਯੋਜਨਾ. ਨੇਤਿ ਅਮਚ੍ਚਪੁਤ੍ਤਅਭਯਤ੍ਥੇਰੇ. ਞਾਤਕਾ ਅਗਮਂਸੂਤਿ ਸਮ੍ਬਨ੍ਧੋ. ਥੇਰਮਾਤਾਪਿ ਪਹਿਣੀਤਿ ਸਮ੍ਬਨ੍ਧੋ. ਪਿਸਦ੍ਦੇਨ ਞਾਤਕੇ ਅਪੇਕ੍ਖਤਿ. ਪਹਿਣਾਕਾਰਂ ਦਸ੍ਸੇਨ੍ਤੋ ਆਹ ‘‘ਪੁਤ੍ਤੋ ਮੇ’’ਤਿਆਦਿ. ਅਮਚ੍ਚਪੁਤ੍ਤੋ ਆਰੂਲ਼੍ਹੋਤਿ ਸਮ੍ਬਨ੍ਧੋ. ਅਭਯਤ੍ਥੇਰੋ ਆਹਾਤਿ ਸਮ੍ਬਨ੍ਧੋ. ਤੇਨਾਤਿ ਅਮਚ੍ਚਪੁਤ੍ਤੇਨ. ਯੁਗਗ੍ਗਾਹਨ੍ਤਿ ਯੁਗਸ੍ਸ ਗਾਹਂ. ‘‘ਮਹਲ੍ਲਕਤ੍ਥੇਰਸ੍ਸ ਸਮ੍ਮਟ੍ਠਟ੍ਠਾਨੇ ਕਚਵਰਂ ਛਡ੍ਡੇਤ੍ਵਾ’’ਤਿ ਵਚਨਂ ਆਵਿ ਕਰੋਨ੍ਤੋ ਆਹ ‘‘ਅਤੀਤਤ੍ਤਭਾਵੇ ਕਿਰਾ’’ਤਿਆਦਿ. ਅਮਚ੍ਚਪੁਤ੍ਤੋ ਛਡ੍ਡੇਸੀਤਿ ਸਮ੍ਬਨ੍ਧੋ.
ਤਨ੍ਤਿ ਸਮ੍ਮਜ੍ਜਨਵਤ੍ਤਂ. ਤਤ੍ਰਾਤਿ ‘‘ਸਤ੍ਥੁਸਾਸਨਂ ਕਤਂ ਹੋਤੀ’’ਤਿਵਚਨੇ. ਆਯਸ੍ਮਾ ਸਾਰਿਪੁਤ੍ਤੋ ਨਿਸੀਦਿ ਕਿਰਾਤਿ ਸਮ੍ਬਨ੍ਧੋ. ਭਗਵਾ ਪਚ੍ਚਾਗਞ੍ਛੀਤਿ ਸਮ੍ਬਨ੍ਧੋ. ਪਾਦਾਨੀਤਿ ਪਾਦਸ੍ਸ ਅਕ੍ਕਮਨਟ੍ਠਾਨਾਨਿ, ਪਾਦਚੇਤਿਯਾਨੀਤਿ ਅਤ੍ਥੋ. ਥੇਰੋ ਨਿਸੀਦੀਤਿ ਸਮ੍ਬਨ੍ਧੋ. ਜਣ੍ਣੁਕੇਹਿ ਪਤਿਟ੍ਠਾਯ ‘‘ਪਾਦਚੇਤਿਯਂ ਵਨ੍ਦਿਤ੍ਵਾ’’ਤਿ ਪਾਠਸੇਸੋ ਅਜ੍ਝਾਹਰਿਤਬ੍ਬੋ. ਮੇ ਨਿਸਿਨ੍ਨਭਾਵਂ ਮੇ ਸਤ੍ਥਾ ਅਞ੍ਞਾਸਿ ਵਤਾਤਿ ਯੋਜਨਾ. ਮੇਸਦ੍ਦੋ ਹਿ ਪੁਬ੍ਬਪਰਾਪੇਕ੍ਖੋ. ਚੋਦਨਨ੍ਤਿ ਦੋਸਾਰੋਪਨਂ. ਕਾਰੇਸ੍ਸਾਮੀਤਿ ਦਸਬਲਂ ਕਾਰੇਸ੍ਸਾਮਿ. ਭਗਵਾ ਆਹਾਤਿ ਸਮ੍ਬਨ੍ਧੋ. ਗਤੋਸੀਤਿ ਤ੍ਵਂ ਗਤੋ ਅਸਿ, ਵਿਚਰਨ੍ਤਸ੍ਸ ਤੁਯ੍ਹਂ ਨ ਪਤਿਰੂਪਨ੍ਤਿ ਯੋਜਨਾ. ਤਤੋਤਿ ਚੋਦਨਕਾਲਤੋ.
ਏਤ੍ਤਕੋ ਵਿਨਿਚ੍ਛਯੋ ਉਪਲਬ੍ਭਤੀਤਿ ਸਮ੍ਬਨ੍ਧੋ. ਭਾਸਪਰਿਯਨ੍ਤਨ੍ਤਿ ਵਚਨਪਰਿਚ੍ਛੇਦਂ. ਅਯਨ੍ਤਿ ਕਥਾ. ਏਤ੍ਤਕਂ ਵਚਨਨ੍ਤਿ ਸਮ੍ਬਨ੍ਧੋ. ਗਯ੍ਹੂਪਗਨ੍ਤਿ ਗਹੇਤਬ੍ਬਭਾਵਂ ਉਪਗਮਨਂ, ਗਣ੍ਹਿਤੁਂ ਖਮਨੀਯਨ੍ਤਿ ਅਤ੍ਥੋ. ਤਾਨੀਤਿ ਦ੍ਵੇ ਮੂਲਾਨਿ. ਪੁਨ ਤਾਨੀਤਿ ਸਮੁਦਯਭੂਤਾਨਿ ਛ ਆਪਤ੍ਤਿਸਮੁਟ੍ਠਾਨਾਨਿ. ਵਤ੍ਥੁਨ੍ਤਿ ਮੇਥੁਨਾਦਿਵਤ੍ਥੁਂ. ਇਤਿਪੀਤਿ ਪਿਸਦ੍ਦੋ ਪਠਮਨਯਂ ਅਪੇਕ੍ਖਤਿ. ਏਤ੍ਥ ਪਠਮਨਯੇ ਮੂਲੇਨ ਸਮੁਦਯਸ੍ਸ ਪਾਯਤੋ ਅਭੇਦੋ ਹੋਤਿ, ਪਚ੍ਛਿਮਨਯੇ ਪਨ ਸਬ੍ਬਥਾ ਭੇਦੋ ਹੋਤਿ. ਤਸ੍ਮਾ ਪਚ੍ਛਿਮਨਯੋਯੇਵ ਯੁਤ੍ਤਤਰੋਤਿ ਦਟ੍ਠਬ੍ਬੋ. ‘‘ਵੂਪਸਮ੍ਮਤੀ’’ਤਿ ਇਮਿਨਾ ‘‘ਨਿਰੁਜ੍ਝਤੀ’’ਤਿ ਪਦਸ੍ਸ ਸਮੁਚ੍ਛੇਦਨਿਰੋਧਂ ਦਸ੍ਸੇਤਿ. ਵੁਟ੍ਠਾਨੇਨਾਤਿ ਪਰਿਵਾਸਾਦਿਵਿਨਯਕਮ੍ਮੇਨ.
ਤੇਤ੍ਤਿਂਸਮੂਲਾਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਵਿਵਾਦਾਧਿਕਰਣਸ੍ਸ ਦ੍ਵਾਦਸ ਮੂਲਾਨੀ’’ਤਿਆਦਿ. ਏਕਂ ਮੂਲਨ੍ਤਿ ਸਮ੍ਬਨ੍ਧੋ. ਤਾਨੀਤਿ ਤੇਤ੍ਤਿਂਸ ਮੂਲਾਨਿ. ਪਰਤੋਤਿ ਪਰਸ੍ਮਿਂ. ‘‘ਅਟ੍ਠਾਰਸ ਭੇਦਕਰਵਤ੍ਥੂਨੀ’’ਤਿਆਦਿਨਾ ਅਧਿਕਰਣਾਨਂ ਸਮੁਟ੍ਠਾਨਂ ਦਸ੍ਸੇਤਿ. ਚਤ੍ਤਾਰਿ ਸਙ੍ਘਕਿਚ੍ਚਾਨਿ ਨਿਸ੍ਸਾਯ ਉਪ੍ਪਜ੍ਜਤੀਤਿ ਯੋਜਨਾ. ਇਦਨ੍ਤਿ ਵਤ੍ਥੁ. ਸਤ੍ਤਨ੍ਨਂ ਨਿਦਾਨਨ੍ਤਿ ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਪਞ੍ਞਤ੍ਤਿਟ੍ਠਾਨਸਙ੍ਖਾਤਂ ਨਿਦਾਨਂ. ਏਤ੍ਥਾਤਿ ਠਾਨੇ. ਪਞ੍ਞਤ੍ਤਿਂ ਨ ਜਾਨਾਤੀਤਿ ਏਤ੍ਥ ‘‘ਅਨੁਪਞ੍ਞਤ੍ਤਿਂ ਨ ਜਾਨਾਤੀ’’ਤਿ ਵਕ੍ਖਮਾਨਤ੍ਤਾ ਪਠਮਪਞ੍ਞਤ੍ਤਿ ਗਹੇਤਬ੍ਬਾਤਿ ਆਹ ‘‘ਪਠਮਪਞ੍ਞਤ੍ਤਿਂ ਨ ਜਾਨਾਤੀ’’ਤਿ. ਅਨੁਪਞ੍ਞਤ੍ਤੀਤਿ ਏਤ੍ਥ ਅਨੁਸਦ੍ਦੋ ਨਉਪਚ੍ਛਿਨ੍ਨਤ੍ਥੋਤਿ ਆਹ ‘‘ਪੁਨਪ੍ਪੁਨਂ ਪਞ੍ਞਤ੍ਤਿਂ ਨ ਜਾਨਾਤੀ’’ਤਿ. ਪਚ੍ਛਾਤ੍ਥੋਪਿ ਯੁਜ੍ਜਤੇਵ ਪਠਮਪਞ੍ਞਤ੍ਤਿਤੋ ਪਚ੍ਛਾ ਪਞ੍ਞਤ੍ਤਤ੍ਤਾ. ਅਨੁਸਨ੍ਧਿਵਚਨਪਥਨ੍ਤਿ ਏਤ੍ਥ ਅਨੁਸਨ੍ਧੀਨਂ ਵਸੇਨ ਵਚਨਪਥਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਥਾਨੁਸਨ੍ਧਿਵਿਨਿਚ੍ਛਯਾਨੁਸਨ੍ਧਿਵਸੇਨ ਵਤ੍ਥੁ’’ਨ੍ਤਿ. ਞਤ੍ਤਿਕਿਚ੍ਚਨ੍ਤਿ ਞਤ੍ਤਿਯਾ ਕਿਚ੍ਚਂ. ਇਮਿਨਾ ਞਤ੍ਤਿਯਾਤਿ ਏਤ੍ਥ ਸਾਮ੍ਯਤ੍ਥੇ ਸਾਮਿਵਚਨਂ. ਕਰਧਾਤੁਸਮ੍ਬਨ੍ਧੇ ਕਰਣਵਚਨਮ੍ਪਿ ਯੁਜ੍ਜਤੇਵ. ਕਰਣਨ੍ਤਿ ਏਤ੍ਥ ਚ ਯੁਪਚ੍ਚਯਸ੍ਸ ਕਮ੍ਮਤ੍ਥਭਾਵਞ੍ਚ ਦਸ੍ਸੇਤਿ. ਨ ਕੇਵਲਂ ਞਤ੍ਤਿਕਮ੍ਮੇ ਏਵ ਞਤ੍ਤਿਕਿਚ੍ਚਂ ਨ ਜਾਨਾਤਿ, ਅਥ ਖੋ ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮੇਸੁਪਿ ਨ ਜਾਨਾਤੀਤਿ ਦਸ੍ਸੇਨ੍ਤੋ ਆਹ ‘‘ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮੇਸੂ’’ਤਿਆਦਿ. ਪੁਬ੍ਬੇ ਠਪੇਤਬ੍ਬਾਤਿ ਞਤ੍ਤਿ ਨਾਮ ਕਮ੍ਮਵਾਚਾਯ ਪੁਬ੍ਬੇ ਠਪੇਤਬ੍ਬਾਤਿ ਨ ਜਾਨਾਤਿ. ਇਮਿਨਾ ਨਪੁਬ੍ਬਕੁਸਲਭਾਵਂ ਦਸ੍ਸੇਤਿ. ‘‘ਪਚ੍ਛਾ’’ਤਿ ਇਮਿਨਾ ਨਅਪਰਕੁਸਲਭਾਵਂ ਦਸ੍ਸੇਤਿ. ਪਿਸਦ੍ਦੇਨ ਪਠਮਨਯਂ ਅਪੇਕ੍ਖਤਿ. ‘‘ਕਾਲਂ ਨ ਜਾਨਾਤੀ’’ਤਿ ਇਮਿਨਾ ਅਕਾਲਞ੍ਞੂਤਿ ਪਦਸ੍ਸ ਵਿਗ੍ਗਹਵਾਕ੍ਯਂ ਦਸ੍ਸੇਤਿ. ਕਾਲਂ ਦਸ੍ਸੇਨ੍ਤੋ ਆਹ ‘‘ਅਨਜ੍ਝਿਟ੍ਠੋ’’ਤਿਆਦਿ.
‘‘ਧੁਤਙ੍ਗੇ ਆਨਿਸਂਸਂ ਅਜਾਨਿਤ੍ਵਾ’’ਤਿ ਇਮਿਨਾ ਮਨ੍ਦਮੋਮੂਹਾਨਂ ਫਲਂ ਦਸ੍ਸੇਤਿ. ਪਾਪਿਚ੍ਛੋਤਿ ਏਤ੍ਥ ਪਾਪਿਚ੍ਛੋ ਨਾਮ ਪਚ੍ਚਯਲਾਭਸ੍ਸ ਪਤ੍ਥਨਾਤਿ ਆਹ ‘‘ਪਚ੍ਚਯਲਾਭਂ ਪਤ੍ਥਯਮਾਨੋ’’ਤਿ. ਕਾਯਵਿਵੇਕੋ ਚ ਚਿਤ੍ਤਵਿਵੇਕੋ ਚ ਉਪਧਿਵਿਵੇਕੋ ਚ ਕਾਯਚਿਤ੍ਤਉਪਧਿਵਿਵੇਕਂ, ਸਮਾਹਾਰਦ੍ਵਨ੍ਦੋ, ਪੁਬ੍ਬਪਦੇਸੁ ਉਤ੍ਤਰਪਦਲੋਪੋ. ਏਤਸ੍ਸਾਤਿ ਆਰਞ੍ਞਿਕਸ੍ਸ. ਇਮਿਨਾ ਇਮਾਯ ਅਤ੍ਥੋ ਇਦਮਤ੍ਥੋ, ਸੋ ਏਤਸ੍ਸਤ੍ਥੀਤਿ ਇਦਮਤ੍ਥੀਤਿ ਵਚਨਤ੍ਥਂ ਦਸ੍ਸੇਤਿ. ਅਪ੍ਪਿਚ੍ਛਞ੍ਞੇਵਾਤਿਆਦੀਸੁ ਏਵਸਦ੍ਦਾਨਂ ਛਡ੍ਡੇਤਬ੍ਬਤ੍ਥਂ ਦਸ੍ਸੇਨ੍ਤੋ ਆਹ ‘‘ਨ ਅਞ੍ਞਂ ਕਿਞ੍ਚਿ ਲੋਕਾਮਿਸ’’ਨ੍ਤਿ.
ਨਵਵਿਧਨ੍ਤਿ ਦਿਵਸਵਸੇਨ ਤਿਵਿਧਂ, ਤਥਾ ਕਤ੍ਤਬ੍ਬਾਕਾਰਵਸੇਨ, ਤਥਾ ਕਾਰਕਵਸੇਨਾਤਿ ਨਵਵਿਧਂ ਉਪੋਸਥਂ.
ਕਾਯਦੁਚ੍ਚਰਿਤਾਦਿ ਯਸ੍ਮਾ ਨ ਪਸਾਦਂ ਸਂਵਤ੍ਤੇਤਿ, ਨ ਪਸਾਦਾਯ ਵਾ ਸਂਵਤ੍ਤਤਿ, ਤਸ੍ਮਾ ਅਪਾਸਾਦਿਕਨ੍ਤਿ ਵੁਚ੍ਚਤਿ. ਤੇਨ ਵੁਤ੍ਤਂ ‘‘ਅਪਾਸਾਦਿਕਨ੍ਤਿ ਕਾਯਦੁਚ੍ਚਰਿਤਾਦਿ ਅਕੁਸਲ’’ਨ੍ਤਿ. ਵੇਲਂ ਅਤਿਕ੍ਕਮ੍ਮਾਤਿ ਭੋਜਨਾਦਿਕਾਲਂ ਅਤਿਕ੍ਕਮਿਤ੍ਵਾ. ਇਮਿਨਾ ਅਤਿਵੇਲਨ੍ਤਿ ਏਤ੍ਥ ਅਤਿਸਦ੍ਦਸ੍ਸ ਅਤਿਕ੍ਕਮਨਤ੍ਥਞ੍ਚ ‘‘ਅਤਿਵੇਲ’’ਨ੍ਤਿ ਪਦਸ੍ਸ ‘‘ਵਿਹਰਤੋ’’ਤਿ ਪਦੇ ਕਿਰਿਯਵਿਸੇਸਨਭਾਵਞ੍ਚ ਦਸ੍ਸੇਤਿ. ਅਪ੍ਪਂ ਕਾਲਨ੍ਤਿ ਯੋਜਨਾ. ਅਵਤਰਣਂ ਓਤਾਰੋਤਿ ਦਸ੍ਸੇਨ੍ਤੋ ਆਹ ‘‘ਓਤਰਣ’’ਨ੍ਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਞ੍ਚਕੇਸੁ.
ਇਤਿ ਪਞ੍ਚਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਛਕ੍ਕਵਾਰਵਣ੍ਣਨਾ
੩੨੬. ਛਕ੍ਕੇਸੁ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਇਤੀਤਿ ਏਵਂ. ਇਮਾ ਛ ਸਾਮੀਚਿਯੋਤਿ ਯੋਜਨਾ. ਤਤ੍ਥਾਤਿ ਛਸੁ ਆਕਾਰੇਸੁ. ਸਤਿਸਮ੍ਮੋਸੇਨਾਤਿ ਸਤਿਯਾ ਵਿਪ੍ਪਵਾਸੇਨ.
ਤਤ੍ਥਾਤਿ ਚੁਦ੍ਦਸਸੁ ਪਰਮੇਸੁ. ਤਤੋਤਿ ਛਕ੍ਕਤੋ. ਏਕਂ ਅਪਨੇਤ੍ਵਾਤਿ ਯਂਕਿਞ੍ਚਿ ਏਕਂ ਅਪਨੇਤ੍ਵਾ. ਸੇਸੇਸੂਤਿ ਛਹਿ ਪਰਮੇਹਿ ਸੇਸੇਸੁ ਅਟ੍ਠਸੁ ਪਰਮੇਸੁ. ਅਞ੍ਞਾਨਿਪਿ ਛਕ੍ਕਾਨੀਤਿ ਪਠਮਛਕ੍ਕਤੋ ਅਞ੍ਞਾਨਿਪਿ ਅਟ੍ਠ ਛਕ੍ਕਾਨਿ.
ਛ ਆਪਤ੍ਤਿਯੋਤਿ ਤੀਣਿ ਛਕ੍ਕਾਨੀਤਿ ‘‘ਛ ਆਪਤ੍ਤਿਯੋ’’ਤਿ ਵੁਤ੍ਤਾਨਿ ਤੀਣਿ ਛਕ੍ਕਾਨੀਤਿ ਯੋਜਨਾ. ਵੁਤ੍ਤਦ੍ਵਯਂ ਏਕਂ ਕਤ੍ਵਾ. ਨ੍ਹਾਨੇਤਿ ਨ੍ਹਾਨਸਿਕ੍ਖਾਪਦੇ. ਛਕ੍ਕਦ੍ਵਯਨ੍ਤਿ ਆਦਾਯਸਮਾਦਾਯਵਸੇਨ ਛਕ੍ਕਦ੍ਵਯਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਛਕ੍ਕੇਸੁ.
ਇਤਿ ਛਕ੍ਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਸਤ੍ਤਕਵਾਰਵਣ੍ਣਨਾ
੩੨੭. ਸਤ੍ਤਕੇਸੁ ਛਸੁ ਸਾਮੀਚੀਸੁ ਪਕ੍ਖਿਪਿਤ੍ਵਾਤਿ ਸਮ੍ਬਨ੍ਧੋ. ਤਤ੍ਥੇਵਾਤਿ ਸਮਥਕ੍ਖਨ੍ਧਕੇ ਏਵ.
ਚਮ੍ਪੇਯ੍ਯਕੇਤਿ ਚਮ੍ਪੇਯ੍ਯਕ੍ਖਨ੍ਧਕੇ. ‘‘ਅਸਦ੍ਧਮ੍ਮਾ’’ਤਿ ਪਦਸ੍ਸ ਭੇਦਨਿਸ੍ਸਿਤਤੁਲ੍ਯਨਿਸ੍ਸਿਤਸਮਾਸਂ ਦਸ੍ਸੇਨ੍ਤੋ ਆਹ ‘‘ਅਸਤਂ ਧਮ੍ਮਾ’’ਤਿਆਦਿ. ਤਤ੍ਥ ‘‘ਅਸਤਂ ਧਮ੍ਮਾ’’ਤਿ ਇਮਿਨਾ ਭੇਦਨਿਸ੍ਸਿਤਸਮਾਸਂ ਦਸ੍ਸੇਤਿ, ‘‘ਅਸਨ੍ਤੋ ਵਾ ਧਮ੍ਮਾ’’ਤਿ ਇਮਿਨਾ ਤੁਲ੍ਯਨਿਸ੍ਸਿਤਸਮਾਸਂ ਦਸ੍ਸੇਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਸਤ੍ਤਕੇਸੁ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਇਤਿ ਸਤ੍ਤਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਅਟ੍ਠਕਵਾਰਵਣ੍ਣਨਾ
੩੨੮. ਅਟ੍ਠਕੇਸੁ ਅਟ੍ਠਾਨਿਸਂਸਾਦੀਨਂ ਦੇਸਨਾਕਾਰਦੇਸਨਟ੍ਠਾਨਾਨਿ ਦਸ੍ਸੇਨ੍ਤੋ ਆਹ ‘‘ਨ ਮਯ’’ਨ੍ਤਿਆਦਿ. ਤਤ੍ਥ ‘‘ਨ ਮਯਂ…ਪੇ… ਕਰਿਸ੍ਸਾਮਾ’’ਤਿ ਇਮਿਨਾ ਦੇਸਨਾਕਾਰਂ ਦਸ੍ਸੇਤਿ, ‘‘ਕੋਸਮ੍ਬਕਕ੍ਖਨ੍ਧਕੇ’’ਤਿ ਇਮਿਨਾ ਦੇਸਨਟ੍ਠਾਨਂ ਦਸ੍ਸੇਤਿ. ਤਮ੍ਪੀਤਿ ਦੁਤਿਯਅਟ੍ਠਕਮ੍ਪਿ.
ਤੇਰਸਕੇ ਵੁਤ੍ਤਾਤਿ ਸਮ੍ਬਨ੍ਧੋ. ਕੁਲਾਨਿ ਦੂਸੇਤੀਤਿ ਏਤ੍ਥ ‘‘ਦੂਸੇਤੀ’’ਤਿ ਕਿਰਿਯਾਪਦਸ੍ਸ ਕਰਣਂ ਦਸ੍ਸੇਨ੍ਤੋ ਆਹ ‘‘ਪੁਪ੍ਫੇਨ ਵਾ’’ਤਿਆਦਿ. ਇਮੇਹਿ ਅਟ੍ਠਹਿ ਦੂਸੇਤੀਤਿ ਯੋਜਨਾ. ‘‘ਲਾਭੇਨਾ’’ਤਿਆਦਿਨਾ ‘‘ਅਟ੍ਠਹਿ ਅਸਦ੍ਧਮ੍ਮੇਹੀ’’ਤਿ ਏਤ੍ਥ ਅਸਦ੍ਧਮ੍ਮਸਰੂਪਂ ਦਸ੍ਸੇਤਿ. ਸਾਰਾਗੋਤਿ ਸਂਰਾਗੋ, ਭੁਸਂ ਰਜ੍ਜਨਨ੍ਤਿ ਅਤ੍ਥੋ. ਪਟਿਵਿਰੋਧੋਤਿ ਦੋਸੋ. ਸੋ ਹਿ ਯਸ੍ਮਾ ਅਲਾਭਾਦੀਸੁ ਪਟਿਵਿਰੁਜ੍ਝਤਿ, ਤਸ੍ਮਾ ਪਟਿਵਿਰੋਧੋਤਿ ਵੁਚ੍ਚਤਿ. ਪਾਲ਼ਿਯਨ੍ਤਿ ਵਿਨਯਪਾਲ਼ਿਯਂ.
ਪਾਣਨ੍ਤਿਆਦਿਕਾ ਦ੍ਵੇ ਗਾਥਾਯੋ ਦ੍ਵਾਦਸਕ੍ਖਰੇਨ ਬਨ੍ਧਿਤਾ. ਪਠਮਗਾਥਾਯ ਤਤਿਯਪਾਦੇ ਚਰਿਯਸਦ੍ਦੇਨ ਯੁਤ੍ਤਤ੍ਤਾ ਏਕਕ੍ਖਰੋ ਅਧਿਕੋ. ਅਯਂ ਪਨੇਤ੍ਥ ਯੋਜਨਾ – ਪਾਣਂ ਨ ਹਨੇ ਨ ਘਾਤੇਯ੍ਯ, ਆਦਿਨ੍ਨਞ੍ਚ ਨ ਆਦਿਯੇ ਨ ਗਣ੍ਹੇਯ੍ਯ, ਮੁਸਾ ਵਿਤਥਵਚਨਂ ਨ ਭਾਸੇ ਨ ਕਥੇਯ੍ਯ, ਮਜ੍ਜਪੋ ਮਜ੍ਜਪਾਨਂ ਨ ਚ ਸਿਯਾ, ਅਬ੍ਰਹ੍ਮਚਰਿਯਾ ਮੇਥੁਨਾ ਵਿਰਮੇਯ੍ਯ, ਰਤ੍ਤਿਂ ਵਿਕਾਲਭੋਜਨਂ ਨ ਭੁਞ੍ਜੇਯ੍ਯ.
ਮਾਲਂ ਨ ਧਾਰੇ ਨ ਧਾਰੇਯ੍ਯ, ਗਨ੍ਧਞ੍ਚ ਨ ਆਚਰੇ, ਸਨ੍ਥਤੇ ਮਞ੍ਚੇ ਚ ਛਮਾਯਞ੍ਚ ਸਯੇਥ. ਏਤਞ੍ਹਿ ਉਪੋਸਥਂ ਅਟ੍ਠਙ੍ਗਿਕਂ ਉਪੋਸਥਂ ਇਤਿ ਦੁਕ੍ਖਨ੍ਤਗੁਨਾ ਬੁਦ੍ਧੇਨ ਪਕਾਸਿਤਨ੍ਤਿ ਆਹੁ ਪਣ੍ਡਿਤਾਤਿ.
ਸਙ੍ਘਭੇਦਕੇਤਿ ਸਙ੍ਘਭੇਦਕਕ੍ਖਨ੍ਧਕੇ. ਤਾਸਂਯੇਵਾਤਿ ਭਿਕ੍ਖੁਨੀਨਮੇਵ. ‘‘ਉਪਾਸਿਕਾ ਅਟ੍ਠ ਵਰਾਨਿ ਯਾਚਤੀ’’ਤਿ ਏਵਂ ਸਾਮਞ੍ਞਵਚਨਸ੍ਸਾਪਿ ਅਤ੍ਥਪਕਰਣਾਦਿਨਾ ਵਿਸੇਸਵਿਸਯੋ ਹੋਤੀਤਿ ਆਹ ‘‘ਵਿਸਾਖਾ’’ਤਿ. ਸਾ ਹਿ ਵਿਵਿਧਾ ਪੁਤ੍ਤਨਤ੍ਤੁਸਙ੍ਖਾਤਾ ਸਾਖਾ ਏਤਿਸ੍ਸਾਤ੍ਥੀਤਿ ਵਿਸਾਖਾਤਿ ਵੁਚ੍ਚਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਅਟ੍ਠਕੇਸੁ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਇਤਿ ਅਟ੍ਠਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਨਵਕਵਾਰਵਣ੍ਣਨਾ
੩੨੯. ਨਵਕੇਸੁ ਅਚਰੀਤਿਆਦੀਨੀਤਿ ਆਦਿਸਦ੍ਦੇਨ ‘‘ਚਰਤਿ, ਚਰਿਸ੍ਸਤੀ’’ਤਿਆਦੀਨਿ (ਦੀ. ਨਿ. ੩.੩੪੦; ਅਟ੍ਠ. ਨਿ. ੯.੨੯-੩੦) ਸਙ੍ਗਣ੍ਹਾਤਿ. ਤਂ ਕੁਤੇਤ੍ਥ ਲਬ੍ਭਾਤਿ ਏਤ੍ਥ ਤਨ੍ਤਿ ਅਨਤ੍ਥਚਰਣਂ, ਕੋਪਕਰਣਂ ਵਾ. ਕੁਤੋਤਿ ਕੇਨ ਕਾਰਣੇਨ. ਏਤ੍ਥਾਤਿ ਏਤਸ੍ਮਿਂ ਅਨਤ੍ਥਚਰਕਪੁਗ੍ਗਲੇ. ਲਬ੍ਭਾਤਿ ਲਦ੍ਧਾ, ਸਕ੍ਕਾ ਲਦ੍ਧੁਂ ਨ ਲਬ੍ਭਾ ਏਵਾਤਿ ਅਤ੍ਥੋ. ਨਵਨ੍ਨਂ ਵਾ ਭਿਕ੍ਖੂਨਂ ਕਾਰਣਾਤਿ ਯੋਜਨਾ. ਤਣ੍ਹਨ੍ਤਿ ਦ੍ਵੀਸੁ ਏਸਨਤਣ੍ਹਾਏਸਿਤਤਣ੍ਹਾਸੁ ਏਸਨਤਣ੍ਹਂ. ਪਟਿਚ੍ਚਾਤਿ ਆਰਬ੍ਭ. ਪਰਿਯੇਸਨਾਤਿ ਪੁਨਪ੍ਪੁਨਂ ਏਸਨਾ. ਲਾਭੋਤਿ ਰੂਪਾਦਿਆਰਮ੍ਮਣਲਾਭੋ. ਵਿਨਿਚ੍ਛਯੋਤਿ ਞਾਣਤਣ੍ਹਾਦਿਟ੍ਠਿਵਿਤਕ੍ਕਵਸੇਨ ਚਤੁਬ੍ਬਿਧੋ ਵਿਨਿਚ੍ਛਯੋ. ਚਤੁਬ੍ਬਿਧੋ ਹਿ ਧਮ੍ਮੋ ‘‘ਏਤ੍ਤਕਂ ਮਯ੍ਹਂ ਭਵਿਸ੍ਸਤੀ’’ਤਿਆਦਿਨਾ ਵਿਨਿਚ੍ਛਿਨਤਿ ਅਨੇਨਾਤਿ ਵਿਨਿਚ੍ਛਯੋਤਿ ਵੁਚ੍ਚਤਿ. ਛਨ੍ਦਰਾਗੋਤਿ ਬਲਵਰਾਗੋ. ਅਜ੍ਝੋਸਾਨਨ੍ਤਿ ‘‘ਅਹਂ ਮਮ’’ਨ੍ਤਿ ਬਲਵਸਨ੍ਨਿਟ੍ਠਾਨਂ, ਪਰਿਗ੍ਗਹੋਤਿ ਤਣ੍ਹਾਦਿਟ੍ਠਿਵਸੇਨ ਪਰਿਚ੍ਛਿਨ੍ਦਿਤ੍ਵਾ ਗਹਣਂ. ਮਚ੍ਛਰਿਯਨ੍ਤਿ ਪਰੇਸਂ ਸਾਧਾਰਣਭਾਵਸ੍ਸ ਅਸਹਨਤਾ. ਆਰਕ੍ਖਾਤਿ ਦ੍ਵਾਰਪਿਦਹਨਮਞ੍ਜੂਸਗੋਪਨਾਦਿਵਸੇਨ ਆਭੁਸੋ ਰਕ੍ਖਨਂ. ਆਰਕ੍ਖਾਧਿਕਰਣਨ੍ਤਿ ਆਰਕ੍ਖਕਾਰਣਾ, ਹੇਤ੍ਵਤ੍ਥੇ ਚੇਤਂ ਪਚ੍ਚਤ੍ਤਵਚਨਂ. ਦਣ੍ਡਾਦਾਨਾਦੀਸੁ ਪਰਨਿਸੇਧਨਤ੍ਥਂ ਦਣ੍ਡਸ੍ਸ ਆਦਾਨਂ ਦਣ੍ਡਾਦਾਨਂ. ਤਥਾ ਏਕਤੋਧਾਰਾਦਿਨੋ ਸਤ੍ਥਸ੍ਸ ਆਦਾਨਂ ਸਤ੍ਥਾਦਾਨਂ. ਕਲਹੋਤਿ ਕਾਯਕਲਹੋਪਿ ਵਾਚਾਕਲਹੋਪਿ. ਵਿਗ੍ਗਹੋਤਿ ਵਿਰੁਦ੍ਧਵਸੇਨ ਗਹਣਂ. ਵਿਵਾਦੋਤਿ ਵਿਰੁਦ੍ਧਵਸੇਨ ਵਦਨਂ. ‘‘ਤੁਵਂ ਤੁਵ’’ਨ੍ਤਿ ਅਨਾਦਰਵਸੇਨ ਵਦਨਂ ਤੁਵਂਤੁਵਂ ਵਾਦੋ, ਪੇਸੁਞ੍ਞਵਸੇਨ ਵਦਨਂ ਪੇਸੁਞ੍ਞਵਾਦੋ, ਮੁਸਾਵਸੇਨ ਵਦਨਂ ਮੁਸਾਵਾਦੋ, ਦਣ੍ਡਾਦਾਨਞ੍ਚ ਸਤ੍ਥਾਦਾਨਞ੍ਚ ਕਲਹੋ ਚ ਵਿਗ੍ਗਹੋ ਚ ਵਿਵਾਦੋ ਚ ਤੁਵਂਤੁਵਂਵਾਦੋ ਚ ਪੇਸੁਞ੍ਞਵਾਦੋ ਚ ਮੁਸਾਵਾਦੋ ਚ ਦਣ੍ਡਾਦਾਨ…ਪੇ… ਮੁਸਾਵਾਦਾ. ਮੁਸਾਵਾਦਾਤਿ ਏਤ੍ਥ ਵਾਦਸਦ੍ਦੋ ‘‘ਤੁਵਂ ਤੁਵ’’ਨ੍ਤਿ ਚ ‘‘ਪੇਸੁਞ੍ਞ’’ਨ੍ਤਿ ਚ ਏਤ੍ਥਾਪਿ ਯੋਜੇਤਬ੍ਬੋ. ‘‘ਅਹਂ ਸੇਯ੍ਯੋਹਮਸ੍ਮੀ’’ਤਿ ਪਵਤ੍ਤਮਾਨਾਦਯੋਤਿ ਯੋਜਨਾ. ਅਧਿਟ੍ਠਿਤਕਾਲਤੋ ਪਟ੍ਠਾਯ ਨ ਵਿਕਪ੍ਪੇਤਬ੍ਬਾਨੀਤਿ ਅਧਿਟ੍ਠਾਨਵਿਕਪ੍ਪਨਂ ਏਕਤੋ ਨ ਕਾਤਬ੍ਬਂ, ਅਧਿਟ੍ਠਿਤੇ ਨ ਵਿਕਪ੍ਪੇਤਬ੍ਬਨ੍ਤਿ ਅਧਿਪ੍ਪਾਯੋ. ਪਰਿਣਤਂ ਲਾਭਂ ਪਰਿਣਾਮੇਤੀਤਿ ਸਮ੍ਬਨ੍ਧੋ.
ਏਤੇਸਂਯੇਵ ਦਾਨਾਨਨ੍ਤਿ ਏਤੇਸਂਯੇਵ ਅਧਮ੍ਮਿਕਾਨਂ ਦਾਨਾਨਂ. ਸਙ੍ਘਸ੍ਸ ਨਿਨ੍ਨਨ੍ਤਿ ਸਙ੍ਘਸ੍ਸ ਨਤਂ, ਨਾਮਿਤਂ ਵਾ ਲਾਭਨ੍ਤਿ ਸਮ੍ਬਨ੍ਧੋ. ਸਙ੍ਘਸ੍ਸ ਨਮਤਿ, ਨਾਮਿਯਤੀਤਿ ਵਾ ਨਿਨ੍ਨਂ. ਤੇਸਂਯੇਵਾਤਿ ਤੇਸਂਯੇਵ ਤਿਣ੍ਣਂ ਧਮ੍ਮਿਕਦਾਨਾਨਂ. ਤਯੋ ਤਯੋ ਦਾਨਪਟਿਗ੍ਗਹਪਰਿਭੋਗੇ ਸਮ੍ਪਿਣ੍ਡੇਤ੍ਵਾ ਨਵਕੋ ਗਹੇਤਬ੍ਬੋ. ਤਤ੍ਥੇਵਾਤਿ ਸਮਥਕ੍ਖਨ੍ਧਕੇ ਏਵ. ਓਵਾਦਵਗ੍ਗਸ੍ਸਾਤਿ ਭਿਕ੍ਖੁਨੋਵਾਦਵਗ੍ਗਸ੍ਸ. ਤਤ੍ਥੇਵਾਤਿ ਓਵਾਦਵਗ੍ਗਸ੍ਸ ਪਠਮਸਿਕ੍ਖਾਪਦੇ ਏਵ. ਸਬ੍ਬਤ੍ਥਾਤਿ ਸਬ੍ਬੇਸੁ ਨਵਕੇਸੁ.
ਇਤਿ ਨਵਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਦਸਕਵਾਰਵਣ੍ਣਨਾ
੩੩੦. ਦਸਕੇਸੁ ਅਟ੍ਠਾਨੇ ਵਾ ਪਨਾਤਿ ਅਕਾਰਣੇ ਵਾ ਪਨ. ਤਤ੍ਥਾਤਿ ਨਵਕੇਸੁ. ‘‘ਨਤ੍ਥਿ ਦਿਨ੍ਨਨ੍ਤਿਆਦਿਵਸੇਨਾ’’ਤਿ ਆਦਿਸਦ੍ਦੇਨ ‘‘ਨਤ੍ਥਿ ਯਿਟ੍ਠਂ ਨਤ੍ਥਿ ਹੁਤ’’ਨ੍ਤਿਆਦਯੋ (ਧ. ਸ. ੧੨੨੧; ਮ. ਨਿ. ੯੪.੨੨੫; ੩.੯੧, ੧੧੬; ਸਂ. ਨਿ. ੩.੨੧੦; ਅ. ਨਿ. ੧੦.੧੭੬) ਨਵ ਨਤ੍ਥਿਕਾ ਸਙ੍ਗਹੇਤਬ੍ਬਾ. ‘‘ਸਸ੍ਸਤੋ ਲੋਕੋਤਿ ਆਦਿਵਸੇਨਾ’’ਤਿਆਦਿਸਦ੍ਦੇਨ (ਦੀ. ਨਿ. ੧.੩੧; ਮ. ਨਿ. ੧.੨੬੯) ‘‘ਅਸਸ੍ਸਤੋ ਲੋਕੋ’’ਤਿਆਦਯੋ (ਮ. ਨਿ. ੧.੨੬੯) ਨਵ ਅਨ੍ਤਗ੍ਗਾਹਿਕੇ ਸਙ੍ਗਣ੍ਹਾਤਿ. ਵਿਪਰੀਤਾ ਸਮ੍ਮਤ੍ਤਾਤਿ ਦਸਹਿ ਮਿਚ੍ਛਤ੍ਤੇਹਿ ਵਿਪਰੀਤਾ ਦਸ ਸਮ੍ਮਤ੍ਤਾ ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ ਸਮ੍ਮਾਞਾਣਂ ਸਮ੍ਮਾਵਿਮੁਤ੍ਤੀਤਿ.
ਦਸ ਆਦੀਨਵਾ ਨਿਦ੍ਦਿਟ੍ਠਾਤਿ ਸਮ੍ਬਨ੍ਧੋ. ਉਨ੍ਦੂਰਕ੍ਖਾਯਿਤਨ੍ਤਿ ਮੂਸਿਕੇਨ ਖਾਦਿਤਂ. ਏਤ੍ਥ ਹਿ ਖੇਧਾਤੁ ਖਾਦਨਤ੍ਥੋ ਹੋਤਿ. ਅਗ੍ਗਿਦਡ੍ਢਨ੍ਤਿ ਅਗ੍ਗਿਨਾ ਦਡ੍ਢਂ. ਏਤੇਸੂਤਿ ਏਤੇਸੁ ਦਸਸੁ ਪਂਸੁਕੂਲੇਸੁ. ਉਦਕਸਾਟਿਕਂ ਵਾ ਸਂਕਚ੍ਚਿਕਂ ਵਾਤਿ ਭਿਕ੍ਖੁਨੀਨਂ ਉਦਕਸਾਟਿਕਂ ਵਾ ਸਂਕਚ੍ਚਿਕਂ ਵਾ. ਏਤ੍ਥ ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ.
ਪਣ੍ਣਸਨ੍ਥਾਰੋ ਤਿਣਸਨ੍ਥਾਰੇਨ ਸਙ੍ਗਹਿਤੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਦਸਕੇਸੁ.
ਇਤਿ ਦਸਕਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.
ਏਕੁਤ੍ਤਰਿਕਨਯੋ ਏਕਾਦਸਕਵਾਰਵਣ੍ਣਨਾ
੩੩੧. ਏਕਾਦਸਕੇਸੁ ਤਿਣਪਾਦੁਕਾਤਿ ਮੁਞ੍ਜਪਬ੍ਬਜੇਹਿ ਅਵਸੇਸਾ ਤਿਣਮਯਪਾਦੁਕਾ. ਕਟ੍ਠਪਾਦੁਕਸਙ੍ਗਹਮੇਵਾਤਿ ਕਟ੍ਠਪਾਦੁਕੇ ਸਙ੍ਗਹਂ ਏਵ. ਤਮ੍ਬਲੋਹਮਯੇਨ ਵਾ ਦਾਰੁਮਯੇਨ ਵਾਤਿ ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ‘‘ਨਸਿ ਅਨਿਮਿਤ੍ਤਾ’’ਤਿਆਦਯੋ ਭਿਕ੍ਖੁਨਿਕ੍ਖਨ੍ਧਕੇ (ਚੂਲ਼ਵ. ੪੨੩) ਨਿਦ੍ਦਿਟ੍ਠਾ. ਤੇ ਸਬ੍ਬੇਤਿ ਸਬ੍ਬੇ ਤੇ ਗਣ੍ਠਿਕਵਿਧਾ. ਨਗ੍ਗੇਨਾਤਿ ਅਚੇਲਕੇਨ. ਤੇ ਸਬ੍ਬੇਤਿ ਸਬ੍ਬੇ ਤੇ ਅਵਨ੍ਦਿਯਪੁਗ੍ਗਲਾ. ਪੁਬ੍ਬੇਤਿ ਦਸਕੇ. ਕਮ੍ਮਵਗ੍ਗੇਤਿ ਅਵਸਾਨੇ ਕਮ੍ਮਵਗ੍ਗੇ.
ਸੋ ਭਿਕ੍ਖੁ ਯਂ ਨ ਨਿਗਚ੍ਛੇਯ੍ਯ, ਏਤਂ ਨ ਨਿਗਤਂ ਅਟ੍ਠਾਨਂ ਅਨਵਕਾਸੋਤਿ ਯੋਜਨਾ. ਏਵਞ੍ਹਿ ਸਤਿ ਯਂਸਦ੍ਦੋ ਕਿਰਿਯਾਪਰਾਮਸਨੋ ਹੋਤਿ, ਅਥ ਵਾ ਯਂ ਯੇਨ ਕਾਰਣੇਨ ਨ ਨਿਗਚ੍ਛੇਯ੍ਯ, ਏਤਂ ਕਾਰਣਂ ਅਟ੍ਠਾਨਨ੍ਤਿ ਯੋਜਨਾ. ਅਨਧਿਗਤਂ ਸਮਾਧਿਨ੍ਤਿ ਯੋਜਨਾ. ਸਦ੍ਧਮ੍ਮਾਸ੍ਸਾਤਿ ਸਦ੍ਧਮ੍ਮਾ ਅਸ੍ਸ. ਅਸ੍ਸ ਅਕ੍ਕੋਸਕਪਰਿਭਾਸਕਸ੍ਸ ਭਿਕ੍ਖੁਸ੍ਸ ਸਦ੍ਧਮ੍ਮਾ ਨ ਵੋਦਾਯਨ੍ਤਿ ਨ ਪਰਿਯੋਦਪੇਨ੍ਤੀਤਿ ਅਤ੍ਥੋ. ਰੋਗਾਤਙ੍ਕਨ੍ਤਿ ਰੋਗਸਙ੍ਖਾਤਂ ਆਤਙ੍ਕਂ. ਨਿਰਯਂ ਉਪਪਜ੍ਜਤੀਤਿ ਨਿਰਯਮ੍ਹਿ ਉਪਪਜ੍ਜਤਿ. ‘‘ਉਪਪਜ੍ਜਤੀ’’ਤਿ ਏਤ੍ਥ ਉਪਇਤਿ ਕਮ੍ਮਪ੍ਪਵਚਨੀਯਉਪਸਗ੍ਗੇਨ ਯੁਤ੍ਤਤ੍ਤਾ ‘‘ਨਿਰਯ’’ਨ੍ਤਿ ਏਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਂ ਦਟ੍ਠਬ੍ਬਂ. ਏਤ੍ਥ ਏਤਸ੍ਮਿਂ ਅਙ੍ਗੁਤ੍ਤਰਪਾਲ਼ਿਯਂ (ਅ. ਨਿ. ੧੧.੬).
ਆਸੇਵਿਤਾਯਾਤਿ ਏਤ੍ਥ ਆਤ੍ਯੂਪਸਗ੍ਗੋ ਆਦਿਕਮ੍ਮਤ੍ਥੋਤਿ ਆਹ ‘‘ਆਦਿਤੋ ਪਟ੍ਠਾਯ ਸੇਵਿਤਾਯਾ’’ਤਿ. ‘‘ਨਿਪ੍ਫਾਦਿਤਾਯਾ’’ਤਿਇਮਿਨਾ ਭਾਵਿਤਾਯਾਤਿ ਏਤ੍ਥ ਭੂਸਦ੍ਦੋ ਸਤ੍ਤਤ੍ਥੋਤਿ ਦਸ੍ਸੇਤਿ, ‘‘ਵਡ੍ਢਿਤਾਯਾ’’ਤਿ ਇਮਿਨਾ ਵਡ੍ਢਨਤ੍ਥੋਤਿ ਦਸ੍ਸੇਤਿ. ਬਹੁਲੀਕਤਾਯਾਤਿ ਏਤ੍ਥ ਬਹੁਲਂ ਨਾਮ ਅਤ੍ਥਤੋ ਪੁਨਪ੍ਪੁਨਨ੍ਤਿ ਆਹ ‘‘ਪੁਨਪ੍ਪੁਨਂ ਕਤਾਯਾ’’ਤਿ. ਸੁਯੁਤ੍ਤਯਾਨਸਦਿਸਾਯਾਤਿ ਸੁਟ੍ਠੁ ਯੁਤ੍ਤੇਨ ਯਾਨੇਨ ਸਦਿਸਾਯ. ਇਮਿਨਾ ਯਾਨੀਕਤਾਯਾਤਿ ਏਤ੍ਥ ਨ ਯਂਕਿਞ੍ਚਿ ਯਾਨਂ ਵਿਯ ਕਤਂ ਹੋਤਿ, ਅਥ ਖੋ ਇਚ੍ਛਿਤਿਚ੍ਛਿਤਕ੍ਖਣੇ ਆਰੋਹਨੀਯਤ੍ਤਾ ਸੁਯੁਤ੍ਤਯਾਨਂ ਵਿਯ ਕਤਂ ਹੋਤੀਤਿ ਦਸ੍ਸੇਤਿ. ਯਥਾ ਕਰਿਯਮਾਨੇ ਪਤਿਟ੍ਠਾ ਹੋਤੀਤਿ ਯੋਜਨਾ. ਵਤ੍ਥੁਕਤਾਯਾਤਿ ਏਤ੍ਥ ਵਤ੍ਥੁਸਦ੍ਦੋ ਪਤਿਟ੍ਠਤ੍ਥੋਤਿ ਦਸ੍ਸੇਤਿ. ਵਸਤਿ ਪਤਿਟ੍ਠਹਤਿ ਏਤ੍ਥਾਤਿ ਵਤ੍ਥੂਤਿ ਵਚਨਤ੍ਥੋ ਕਾਤਬ੍ਬੋ. ਅਨੁਟ੍ਠਿਤਾਯਾਤਿ ਏਤ੍ਥ ਅਨੁਸਦ੍ਦੋ ਨਉਪਚ੍ਛਿਨ੍ਨਤ੍ਥੋ, ਠਾਧਾਤੁ ਉਪ੍ਪਜ੍ਜਨਤ੍ਥੋਤਿ ਦਸ੍ਸੇਨ੍ਤੋ ਆਹ ‘‘ਅਨੁ ਅਨੁ ਪਵਤ੍ਤਿਤਾਯਾ’’ਤਿ. ‘‘ਸਮਨ੍ਤਤੋ’’ਤਿ ਇਮਿਨਾ ਪਰਿਚਿਤਾਯਾਤਿ ਏਤ੍ਥ ਪਰਿਸਦ੍ਦੋ ਸਮਨ੍ਤਤ੍ਥੋਤਿ ਦਸ੍ਸੇਤਿ. ‘‘ਅਭਿਵਡ੍ਢਿਤਾਯਾ’’ਤਿ ਇਮਿਨਾ ਚਿਧਾਤੁ ਵਡ੍ਢਨਤ੍ਥੋਤਿ ਦਸ੍ਸੇਤਿ. ਸਮਾਰਦ੍ਧਾਯਾਤਿ ਪਰਿਪੁਣ੍ਣਂ ਆਰਾਧਿਤਾਯ. ਰਾਧਧਾਤੁ ਹਿ ਸਾਧਨਤ੍ਥੋ ਹੋਤਿ. ‘‘ਵਸੀਭਾਵਂ ਉਪਨੀਤਾਯਾ’’ਤਿ ਇਮਿਨਾ ਤਦਤ੍ਥਂ ਅਧਿਪ੍ਪਾਯੇਨ ਦਸ੍ਸੇਤਿ. ‘‘ਨ ਪਾਪਕਂ ਸੁਪਿਨਂ ਪਸ੍ਸਤੀ’’ਤਿ ਵਚਨਸ੍ਸ ਅਤ੍ਥਾਪਤ੍ਤਿਨਯਂ ਦਸ੍ਸੇਨ੍ਤੋ ਆਹ ‘‘ਭਦ੍ਰਕਂ ਪਨਾ’’ਤਿਆਦਿ. ਵੁਦ੍ਧਿਕਾਰਣਭੂਤਨ੍ਤਿ ਵੁਦ੍ਧਿਯਾ ਕਾਰਣਭੂਤਂ ਸੁਪਿਨਨ੍ਤਿ ਸਮ੍ਬਨ੍ਧੋ. ਦੇਵਤਾ ਰਕ੍ਖਨ੍ਤੀਤਿ ਏਤ੍ਥ ਸਾਮਞ੍ਞਤੋ ਵੁਤ੍ਤੇਪਿ ਆਰਕ੍ਖਦੇਵਤਾਯੇਵ ਗਹੇਤਬ੍ਬਾਤਿ ਆਹ ‘‘ਆਰਕ੍ਖਦੇਵਤਾ’’ਤਿ. ਆਰਕ੍ਖਦੇਵਤਾ ਨਾਮ ਭੁਮ੍ਮਦੇਵਾਦਯੋ. ਖਿਪ੍ਪਨ੍ਤਿ ਭਾਵਨਪੁਂਸਕਂ. ਇਮਿਨਾ ਤੁਵਟਂ ਚਿਤ੍ਤਨ੍ਤਿ ਏਤ੍ਥ ਤੁਵਟਸਦ੍ਦੋ ਖਿਪ੍ਪਪਰਿਯਾਯੋਤਿ ਦਸ੍ਸੇਤਿ. ਉਤ੍ਤਰਿਮਪ੍ਪਟਿਵਿਜ੍ਝਨ੍ਤੋਤਿ ਏਤ੍ਥ ‘‘ਉਤ੍ਤਰਿ’’ਨ੍ਤਿ ਪਦਸ੍ਸ ਅਵਧਿਪੇਕ੍ਖਤ੍ਤਾ ਤਸ੍ਸ ਅਵਧਿ ਚ ਉਤ੍ਤਰਿਸਦ੍ਦਸ੍ਸ ਇਧ ਅਰਹਤ੍ਤਵਾਚਕਭਾਵਞ੍ਚ ਵਿਧਧਾਤੁਯਾ ਸਚ੍ਛਿਕਰਣਤ੍ਥਞ੍ਚ ਦਸ੍ਸੇਨ੍ਤੋ ਆਹ ‘‘ਮੇਤ੍ਤਾਝਾਨਤੋ’’ਤਿਆਦਿ. ਤਤ੍ਥ ‘‘ਮੇਤ੍ਤਾਝਾਨਤੋ’’ਤਿ ਇਮਿਨਾ ਅਵਧਿਂ ਦਸ੍ਸੇਤਿ, ‘‘ਅਰਹਤ੍ਤ’’ਨ੍ਤਿ ਇਮਿਨਾ ‘‘ਉਤ੍ਤਰਿ’’ਨ੍ਤਿ ਪਦਸ੍ਸ ਸਰੂਪਤ੍ਥਂ ਦਸ੍ਸੇਤਿ, ‘‘ਅਸਚ੍ਛਿਕਰੋਨ੍ਤੋ’’ਤਿ ਇਮਿਨਾ ਵਿਧਧਾਤੁਯਾ ਸਚ੍ਛਿਕਰਣਤ੍ਥਂ ਦਸ੍ਸੇਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਏਕਾਦਸਕੇਸੁ.
ਇਤਿ ਏਕਾਦਸਕਵਾਰਵਣ੍ਣਨਾਪਰਿਯੋਸਾਨਾਯ
ਏਕੁਤ੍ਤਰਿਕਵਣ੍ਣਨਾਯ
ਯੋਜਨਾ ਸਮਤ੍ਤਾ.