ਪਞ੍ਚਵਗ੍ਗੋ

ਕਮ੍ਮਵਗ੍ਗਵਣ੍ਣਨਾ

੪੮੨. ਕਮ੍ਮਵਗ੍ਗੇ ‘‘ਗਣਨਪਰਿਚ੍ਛੇਦਵਚਨ’’ਨ੍ਤਿ ਇਮਿਨਾ ਨ ਪਮਾਣਵਚਨਨ੍ਤਿ ਦਸ੍ਸੇਤਿ. ਇਮਿਨਾ ਕਮ੍ਮਾਨਂ ਤਤੋ ਊਨਾਤਿਰੇਕਭਾਵਂ ਨਿਵਾਰੇਤਿ. ਗਣਿਯਤੇ ਗਣਨਂ, ਪਰਿਚ੍ਛਿਜ੍ਜਤਿ ਅਨੇਨਾਤਿ ਪਰਿਚ੍ਛੇਦੋ, ਗਣਨਸ੍ਸ ਪਰਿਚ੍ਛੇਦੋ ਗਣਨਪਰਿਚ੍ਛੇਦੋ. ਅਥ ਵਾ ਗਣਿਯਤਿ ਅਨੇਨਾਤਿ ਗਣਨਂ, ਤਮੇਵ ਪਰਿਚ੍ਛੇਦੋ ਗਣਨਪਰਿਚ੍ਛੇਦੋ, ਸੋਯੇਵ ਵਚਨਂ ਗਣਨਪਰਿਚ੍ਛੇਦਵਚਨਂ. ਅਪਲੋਕਨਕਮ੍ਮਂ ਨਾਮਾਤਿ ਕਤ੍ਤਬ੍ਬਂ ਕਮ੍ਮਨ੍ਤਿ ਸਮ੍ਬਨ੍ਧੋ. ਵੁਤ੍ਤਨਯੇਨੇਵਾਤਿ ‘‘ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾ’’ਤਿ ਵੁਤ੍ਤੇਨ ਏਵ ਨਯੇਨ.

ਤਤ੍ਥਾਤਿ ਚਤੂਸੁ ਕਮ੍ਮੇਸੁ, ਞਤ੍ਤਿਦੁਤਿਯਕਮ੍ਮਂ ਪਨ ਅਤ੍ਥੀਤਿ ਸਮ੍ਬਨ੍ਧੋ.

ਤਤ੍ਥਾਤਿ ਦ੍ਵੀਸੁ ਕਮ੍ਮੇਸੁ. ਅਵਸੇਸਾਤਿ ਛਹਿ ਕਮ੍ਮੇਹਿ ਅਵਸੇਸਾ. ਯਦਿ ਪਰਿਵਤ੍ਤੇਤ੍ਵਾ ਕਤਂ ਦਲ਼੍ਹੀਕਮ੍ਮਂ ਨ ਹੋਤਿ, ਏਵਂ ਸਤਿ ਦਲ਼੍ਹੀਕਮ੍ਮਤ੍ਥਾਯ ਕਿਨ੍ਤਿ ਕਾਤਬ੍ਬਨ੍ਤਿ ਆਹ ‘‘ਸਚੇ ਪਨਾ’’ਤਿਆਦਿ. ਤਤ੍ਥ ‘‘ਅਕ੍ਖਰਪਰਿਹੀਨਂ ਵਾ ਪਦਪਰਿਹੀਨਂ ਵਾ’’ਤਿ ਇਦਂ ਅਕ੍ਖਰਪਦਾਨਂ ਗਲ਼ਿਤਂ ਸਨ੍ਧਾਯ ਵੁਤ੍ਤਂ. ‘‘ਦੁਰੁਤ੍ਤਪਦਂ ਵਾ’’ਤਿ ਇਦਂ ਸਿਥਿਲਧਨਿਤਾਦਿਅਪਰਿਪੁਣ੍ਣਂ ਸਨ੍ਧਾਯ ਵੁਤ੍ਤਂ. ਏਤ੍ਥ ‘‘ਦੁਰੁਤ੍ਤਕ੍ਖਰਂ ਵਾ’’ਤਿ ਅਜ੍ਝਾਹਰਿਤਬ੍ਬਂ. ਇਦਨ੍ਤਿ ਪੁਨਪ੍ਪੁਨਂ ਵਚਨਂ. ਕਮ੍ਮਂ ਹੁਤ੍ਵਾਤਿ ਸੁਕਮ੍ਮਂ ਹੁਤ੍ਵਾ.

੪੮੩. ਸਮ੍ਮੁਖਾਕਰਣੀਯਅਸਮ੍ਮੁਖਾਕਰਣੀਯੇਸੁ ਅਸਮ੍ਮੁਖਾਕਰਣੀਯਾਨਿ ਅਪ੍ਪਕਤ੍ਤਾ ਪਠਮਂ ਦਸ੍ਸੇਤ੍ਵਾ ਸੇਸਾਨਂ ਸਮ੍ਮੁਖਾਕਰਣੀਯਭਾਵਂ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਤੇਸੁ ਦ੍ਵੀਸੁ, ਅਸਮ੍ਮੁਖਾਕਰਣੀਯਂ ਨਾਮ ਅਟ੍ਠਵਿਧਂ ਹੋਤੀਤਿ ਸਮ੍ਬਨ੍ਧੋ. ਤਤ੍ਥ ਤਤ੍ਥਾਤਿ ਤੇਸੁ ਤੇਸੁ ਖਨ੍ਧਕੇਸੁ. ‘‘ਸੁਕਤਂ ਹੋਤੀ’’ਤਿ ਵਚਨਸਾਮਤ੍ਥਿਯਤੋ ਸਮ੍ਮੁਖਾਕਤਮ੍ਪਿ ਸੁਕਤਂ ਹੋਤੀਤਿ ਅਤ੍ਥੋਪਿ ਗਹੇਤਬ੍ਬੋ.

ਸੇਸਾਨੀਤਿ ਅਟ੍ਠਕਮ੍ਮੇਹਿ ਸੇਸਾਨਿ. ਏਤਾਨੀਤਿ ਕਮ੍ਮਾਨਿ. ਵਤ੍ਥੁਵਿਪਨ੍ਨਾਨੀਤਿ ਵਤ੍ਥੁਨਾ ਵਿਪਨ੍ਨਾਨਿ.

ਤੇਸਮ੍ਪੀਤਿ ਪਟਿਪੁਚ੍ਛਾਕਰਣੀਯਾਨਮ੍ਪਿ. ਏਤ੍ਥਾਤਿ ‘‘ਪਟਿਪੁਚ੍ਛਾਕਰਣੀਯ’’ਨ੍ਤਿ ਪਦੇ. ‘‘ਪੁਚ੍ਛਿਤ੍ਵਾ’’ਤਿ ਇਮਿਨਾ ਪਟਿਪੁਚ੍ਛਾਤਿ ਪਦਸ੍ਸ ਤ੍ਵਾਪਚ੍ਚਯਨ੍ਤਭਾਵਂ ਦਸ੍ਸੇਤਿ. ‘‘ਕਾਤਬ੍ਬ’’ਨ੍ਤਿ ਇਮਿਨਾ ਕਰਣੀਯਨ੍ਤਿ ਏਤ੍ਥ ਅਨੀਯਸਦ੍ਦਸ੍ਸ ਕਮ੍ਮਤ੍ਥਭਾਵਂ ਦਸ੍ਸੇਤਿ. ਯਥਾਦਿਨ੍ਨਾਯਾਹਿ ਚੁਦਿਤਕੇਨ ਯਥਾਦਿਨ੍ਨਾਯ. ਵਿਪ੍ਪਲਪਨ੍ਤਸ੍ਸਾਤਿ ਵਿਕਾਰੇਨ ਯਂ ਵਾ ਤਂ ਵਾ ਵਚਨਂ ਪਲਪਨ੍ਤਸ੍ਸ ਚੁਦਿਤਕਸ੍ਸਾਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਤਜ੍ਜਨੀਯਕਮ੍ਮਾਰਹਸ੍ਸਾ’’ਤਿਆਦੀਸੁ.

ਅਨੁਪੋਸਥਦਿਵਸੇਤਿ ਉਪੋਸਥਦਿਵਸਤੋ ਅਞ੍ਞਸ੍ਮਿਂ ਦਿਵਸੇ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਉਪੋਸਥਦਿਵਸੋ ਨਾਮਾ’’ਤਿਆਦਿ. ਕਤ੍ਤਿਕਮਾਸਨ੍ਤਿ ਪਚ੍ਛਿਮਕਤ੍ਤਿਕਮਾਸਂ. ਤਸ੍ਸ ਪਵਾਰਣਮਾਸਤ੍ਤਾ ‘‘ਠਪੇਤ੍ਵਾ’’ਤਿ ਵੁਤ੍ਤਂ. ਸਾਮਗ੍ਗਿਦਿਵਸੋ ਚ ਯਥਾਵੁਤ੍ਤਾ ਚਾਤੁਦ੍ਦਸਪਨ੍ਨਰਸਾ ਚ ਉਪੋਸਥਦਿਵਸੋ ਨਾਮਾਤਿ ਯੋਜਨਾ. ਯਤ੍ਰਹੀਤਿ ਯਸ੍ਮਿਂ ਪਨ ਵਿਹਾਰੇ, ਠਪੇਨ੍ਤੀਤਿ ਸਮ੍ਬਨ੍ਧੋ. ਅਨ੍ਤਰਾਤਿ ਚਾਤੁਦ੍ਦਸੀਪਨ੍ਨਰਸੀਨਂ ਮਜ੍ਝੇ.

ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋਤਿ ਪਚ੍ਛਾ ਉਪਰਿ ਕਡ੍ਢਿਤ੍ਵਾ ਠਪਿਤਂ ਕਤ੍ਤਿਕਕਾਲ਼ਪਕ੍ਖਚਾਤੁਦ੍ਦਸਿਂ ਵਾ ਪਞ੍ਚਦਸਿਂ ਵਾ ਸਨ੍ਧਾਯ ਵੁਤ੍ਤਂ. ਇਧਾਪੀਤਿ ਅਪਵਾਰਣਾਯ ਪਵਾਰਣਟ੍ਠਾਨੇਪਿ. ਪਾਲ਼ਿਯਮਾਗਤਨਯਤੋ ਅਞ੍ਞਮ੍ਪਿ ਨਯਂ ਦਸ੍ਸੇਨ੍ਤੋ ਆਹ ‘‘ਅਪਿਚਾ’’ਤਿਆਦਿ. ਅਨ੍ਤਿਮਵਤ੍ਥੁਨ੍ਤਿ ਪਾਰਾਜਿਕਵਤ੍ਥੁਂ. ਯਸ੍ਸਾਤਿ ਪੁਗ੍ਗਲਸ੍ਸ. ਇਮਿਨਾ ਕਮ੍ਮਾਰਹੋ ਪੁਗ੍ਗਲੋ ਵਤ੍ਥੁ ਨਾਮਾਤਿ ਦਸ੍ਸੇਤਿ.

੪੮੪. ਦਬ੍ਬਸ੍ਸ ਅਗ੍ਗਣ੍ਹਨਂ ਵਤ੍ਥੁਅਪਰਾਮਸਨਂ ਨਾਮ ਨ ਹੋਤਿ, ਅਥ ਖੋ ਨਾਮਸ੍ਸ ਅਗ੍ਗਣ੍ਹਨਮੇਵਾਤਿ ਆਹ ‘‘ਤਸ੍ਸ ਨਾਮਂ ਨ ਗਣ੍ਹਾਤੀ’’ਤਿ. ਅਪਰਾਮਸਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਸੁਣਾਤੁ ਮੇ’’ਤਿਆਦਿ.

ਪੁਗ੍ਗਲਂ ਨ ਪਰਾਮਸਤੀਤਿ ਏਤ੍ਥ ਪੁਗ੍ਗਲੋ ਨਾਮ ਉਪਜ੍ਝਾਯੋਤਿ ਆਹ ‘‘ਯੋ ਉਪਸਮ੍ਪਦਾਪੇਕ੍ਖਸ੍ਸ ਉਪਜ੍ਝਾਯੋ’’ਤਿ. ਤਨ੍ਤਿ ਉਪਜ੍ਝਾਯਂ.

ਸਬ੍ਬੇਨ ਸਬ੍ਬਨ੍ਤਿ ਸਬ੍ਬਥਾ ਸਬ੍ਬਂ, ਨਿਪਾਤਸਮੁਦਾਯੋਯਂ, ਸਬ੍ਬੇਨ ਵਾ ਆਕਾਰੇਨ ਸਬ੍ਬਂ ਞਤ੍ਤਿਨ੍ਤਿ ਯੋਜਨਾ.

ਞਤ੍ਤਿਕਮ੍ਮੇ ਪਠਮਂ ਕਮ੍ਮਂ ਕਤ੍ਵਾ ਪਚ੍ਛਾ ਞਤ੍ਤਿਟ੍ਠਪਨਮ੍ਪਿ ਪਚ੍ਛਾ ਞਤ੍ਤਿਂ ਠਪੇਤਿਯੇਵ ਨਾਮ. ਇਤਿ ਇਮੇਹੀਤਿਆਦਿ ਨਿਗਮਨਂ.

੪੮੫. ‘‘ਵੁਤ੍ਤਨਯੇਨੇਵਾ’’ਤਿ ਅਤਿਦਿਸਿਤ੍ਵਾਪਿ ਞਤ੍ਤਿਕਮ੍ਮਵਾਚਾਨਂ ਅਸਦਿਸਤ੍ਤਾ ਅਪਰਾਮਸਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਏਵਂ ਪਨਾ’’ਤਿਆਦਿ. ਤਤ੍ਥ ਨੇਸਨ੍ਤਿ ਵਤ੍ਥੁਸਙ੍ਘਪੁਗ੍ਗਲਾਨਂ, ਪਠਮਾਨੁਸ੍ਸਾਵਨੇ ਵਾ ਦੁਤਿਯਤਤਿਯਾਨੁਸ੍ਸਾਵਨਾਸੁ ਵਾ ਵਤ੍ਤਬ੍ਬੇ ਵਦਨ੍ਤੋਤਿ ਸਮ੍ਬਨ੍ਧੋ.

ਸਾਵਨਂ ਹਾਪੇਤੀਤਿ ਏਤ੍ਥ ਅਨੁਸਦ੍ਦੋ ਲੋਪੋਤਿ ਆਹ ‘‘ਅਨੁਸ੍ਸਾਵਨਂ ਨ ਕਰੋਤੀ’’ਤਿ. ‘‘ਸਾਵਨਂ ਹਾਪੇਤੀ’’ਤਿ ਏਤ੍ਥ ਨ ਕੇਵਲਂ ਸਬ੍ਬੇਨ ਸਬ੍ਬਂ ਅਨੁਸ੍ਸਾਵਨਂ ਅਕਰੋਨ੍ਤੋਯੇਵ ਸਾਵਨਂ ਹਾਪੇਤਿ ਨਾਮ, ਅਥ ਖੋ ਅਨੁਸ੍ਸਾਵਨਾਯ ਦੁਰੁਤ੍ਤਛਡ੍ਡਨਮ੍ਪਿ ਹਾਪੇਤਿਯੇਵ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਯੋਪੀ’’ਤਿਆਦਿ. ‘‘ਸਕਿਮੇਵ ਵਾ ਦ੍ਵਿਕ੍ਖਤ੍ਤੁਂ ਵਾ’’ਤਿ ਇਮਿਨਾ ਤਿਕ੍ਖਤ੍ਤੁਂ ਅਪਰਿਪੂਰੇਨ੍ਤੋਯੇਵ ਸਾਵਨਂ ਹਾਪੇਤਿ ਨਾਮਾਤਿ ਦਸ੍ਸੇਤਿ. ਇਮਸ੍ਸ ਵਚਨਸ੍ਸ ਸਾਮਤ੍ਥਿਯਤੋ ਞਤ੍ਤਿਦੁਤਿਯਕਮ੍ਮੇ ਏਕਕ੍ਖਤ੍ਤੁਤੋ, ਞਤ੍ਤਿਚਤੁਤ੍ਥਕਮ੍ਮੇ ਤਿਕ੍ਖਤ੍ਤੁਤੋ ਅਤਿਰੇਕਂ ਕਮ੍ਮਵਾਚਂ ਕਰੋਨ੍ਤੋ ਨ ਹਾਪੇਤੀਤਿ ਞਾਯਤਿ.

‘‘ਛਡ੍ਡੇਤੀ’’ਤਿ ਏਤ੍ਥ ਛਡ੍ਡਨਸ੍ਸ ਪਦਕ੍ਖਰਾਨਂ ਗਲ਼ਿਤਭਾਵੇਨ ਪਾਕਟਤ੍ਤਾ ਤਂ ਅਦਸ੍ਸੇਤ੍ਵਾ ‘‘ਦੁਰੁਤ੍ਤਂ ਕਰੋਤੀ’’ਤਿ ਏਤ੍ਥ ਦੁਰੁਤ੍ਤਮੇਵ ਦਸ੍ਸੇਨ੍ਤੋ ਆਹ ‘‘ਦੁਰੁਤ੍ਤਂ ਕਰੋਤੀਤਿ ਏਤ੍ਥ ਪਨਾ’’ਤਿਆਦਿ. ਕਰੋਨ੍ਤੇਨ ਭਿਕ੍ਖੁਨਾ ਉਪਲਕ੍ਖੇਤਬ੍ਬੋਤਿ ਸਮ੍ਬਨ੍ਧੋ.

‘‘ਸਿਥਿਲ…ਪੇ… ਪਭੇਦੋ’’ਤਿ ਯ੍ਵਾਯਂ ਬ੍ਯਞ੍ਜਨਪ੍ਪਭੇਦੋ ਵੁਤ੍ਤੋ, ਅਯਂ ਬ੍ਯਞ੍ਜਨਪ੍ਪਭੇਦੋਤਿ ਯੋਜਨਾ. ਗਾਥਾਯਂ ਦਸਧਾਤਿ ਦਸਪ੍ਪਕਾਰੇਨ. ਬ੍ਯਞ੍ਜਨਬੁਦ੍ਧਿਯਾਤਿ ਵਦ੍ਧੇਤੀਤਿ ਬੁਦ੍ਧਿ, ਬ੍ਯਞ੍ਜਨਮੇਵ ਅਕ੍ਖਰਮੇਵ ਸਿਥਿਲਾਦਿਵਸੇਨ ਦਸਧਾ ਬੁਦ੍ਧਿ ਬ੍ਯਞ੍ਜਨਬੁਦ੍ਧਿ, ਤਾਯ. ਏਤ੍ਥ ‘‘ਦਸਧਾ’’ਤਿ ਪਦੇਨ ‘‘ਬ੍ਯਞ੍ਜਨਬੁਦ੍ਧੀ’’ਤਿ ਸਮਾਸਪਦਸ੍ਸ ਅਨ੍ਤਰੇ ਦਸਧਾਸਦ੍ਦਸ੍ਸ ਲੋਪਂ ਦਸ੍ਸੇਤਿ ‘‘ਕਮ੍ਮਜਂ ਏਵਾ’’ਤਿਆਦੀਸੁ (ਵਿਸੁਦ੍ਧਿ. ੨.੪੫੦; ਵਿਸੁਦ੍ਧਿ. ਮਹਾਟਿ. ੨.੪੫੦) ਵਿਯ. ਏਤ੍ਥ ਹਿ ਏਵਸਦ੍ਦੇਨ ਕਮ੍ਮੇਨ ਏਵ ਜਾਤਂ ਕਮ੍ਮਜਨ੍ਤਿ ਸਮਾਸਂ ਕਤ੍ਵਾ ਸਮਾਸਮਜ੍ਝੇ ਏਵਸਦ੍ਦਲੋਪਂ ਦਸ੍ਸੇਤਿ. ਪਭੇਦੋਤਿ ਵਿਸੇਸੋ. ਅਯਂ ਪਨੇਤ੍ਥ ਯੋਜਨਾ – ਸਿਥਿਲਞ੍ਚ ਧਨਿਤਞ੍ਚ ਦੀਘਞ੍ਚ ਰਸ੍ਸਞ੍ਚ ਗਰੁਕਞ੍ਚ ਲਹੁਕਞ੍ਚ ਨਿਗ੍ਗਹਿਤਞ੍ਚ ਸਮ੍ਬਨ੍ਧਞ੍ਚ ਵਵਤ੍ਥਿਤਞ੍ਚ ਵਿਮੁਤ੍ਤਞ੍ਚਾਤਿ ਦਸਧਾ ਬ੍ਯਞ੍ਜਨਬੁਦ੍ਧਿਯਾਵ ਪਭੇਦੋ ਵਿਸੇਸੋ ਞਾਤਬ੍ਬੋਤਿ. ‘‘ਸਿਥਿਲ’’ਨ੍ਤਿ ਆਦੀਨਿ ਦਸ ਪਦਾਨਿ ‘‘ਅਕ੍ਖਰਂ ਪਦਂ ਬ੍ਯਞ੍ਜਨ’’ਨ੍ਤਿ ਨਪੁਂਸਕਲਿਙ੍ਗਵਸੇਨ ਵੁਤ੍ਤਪਾਠਂਨਿਸ੍ਸਾਯ ਵੁਤ੍ਤਾਨੀਤਿ ਦਟ੍ਠਬ੍ਬਂ.

ਗਾਥਾਯ ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਏਤ੍ਥ ਹੀ’’ਤਿਆਦਿ. ਅਗਾਲ਼੍ਹੇਨ ਵਚੀਪਯੋਗੇਨ ਵਤ੍ਤਬ੍ਬਂ ਅਕ੍ਖਰਂ ਸਿਥਿਲਂ. ਗਾਲ਼੍ਹੇਨ ਵਚੀਪਯੋਗੇਨ ਵਤ੍ਤਬ੍ਬਂ ਅਕ੍ਖਰਂ ਧਨਿਤਂ. ਤੇਸ੍ਵੇਵਾਤਿ ਪਞ੍ਚਸੁ ਏਵ ਵਗ੍ਗੇਸੁ. ਨ ਕੇਵਲਂ ਦੀਘਮੇਵ ਗਰੁਕਂ ਨਾਮ, ਅਥ ਖੋ ਸਂਯੋਗਪਰਮ੍ਪੀਤਿ ਆਹ ‘‘ਯਂ ਵਾ’’ਤਿਆਦਿ. ਯਂ ਅਕ੍ਖਰਂ ਸਂਯੋਗਪਰਂ ਕਤ੍ਵਾ ਵੁਚ੍ਚਤਿ, ਤਮ੍ਪਿ ਗਰੁਕਂ ਨਾਮਾਤਿ ਯੋਜਨਾ. ਸਂਯੋਗੋ ਪਰੋ ਯਸ੍ਸ ਅਕ੍ਖਰਸ੍ਸਾਤਿ ਸਂਯੋਗਪਰਂ. ‘‘ਸਂਯੋਗਪਦ’’ਨ੍ਤਿਪਿ ਪਾਠੋ. ਯਂ ਅਸਂਯੋਗਪਰਂ ਕਤ੍ਵਾ ਵੁਚ੍ਚਤਿ, ਤਮ੍ਪਿ ਲਹੁਕਂ ਨਾਮਾਤਿ ਯੋਜਨਾ. ਯਂ ਸਾਨੁਨਾਸਿਕਂ ਕਤ੍ਵਾ ਵਤ੍ਤਬ੍ਬਂ, ਤਂ ਨਿਗ੍ਗਹਿਤਂ ਨਾਮਾਤਿ ਯੋਜਨਾ. ਨਿਗ੍ਗਹੇਤ੍ਵਾਤਿ ਨਿਗ੍ਗਹਿਤਂ ਨਾਮ ਅਤ੍ਥਤੋ ਠਾਨਕਰਣਾਨਂ ਅਵਿਸ੍ਸਜ੍ਜਨਂ ਅਮੁਞ੍ਚਨਨ੍ਤਿ ਆਹ ‘‘ਅਵਿਸ੍ਸਜ੍ਜੇਤ੍ਵਾ’’ਤਿ. ਯਂ ਸਮ੍ਬਨ੍ਧਿਤ੍ਵਾ ਵੁਚ੍ਚਤਿ, ਤਂ ਸਮ੍ਬਨ੍ਧਂ ਨਾਮਾਤਿ ਯੋਜਨਾ. ਯਂ ਅਸਮ੍ਬਨ੍ਧਂ ਕਤ੍ਵਾ ਵੁਚ੍ਚਤਿ, ਤਂ ਵਵਤ੍ਥਿਤਂ ਨਾਮਾਤਿ ਯੋਜਨਾ. ਯਂ ਅਨਿਗ੍ਗਹੇਤ੍ਵਾ ਵੁਚ੍ਚਤਿ, ਤਂ ਵਿਮੁਤ੍ਤਂ ਨਾਮਾਤਿ ਯੋਜਨਾ. ਅਨਿਗ੍ਗਹੇਤ੍ਵਾਤਿ ਅਨਿਗ੍ਗਹਂ ਨਾਮ ਅਤ੍ਥਤੋ ਵਿਸ੍ਸਜ੍ਜਨਨ੍ਤਿ ਆਹ ‘‘ਵਿਸ੍ਸਜ੍ਜੇਤ੍ਵਾ’’ਤਿ.

ਏਵਂ ਬ੍ਯਞ੍ਜਨਬੁਦ੍ਧਿਵਿਸੇਸਂ ਦਸ੍ਸੇਤ੍ਵਾ ਇਦਾਨਿ ਕਮ੍ਮਵਾਚਾਯ ਉਚ੍ਚਾਰਣਵਿਸੇਸਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਤਾਸੁ ਦਸਸੁ ਬ੍ਯਞ੍ਜਨਬੁਦ੍ਧੀਸੁ. ਤਥਾਸਦ੍ਦੇਨ ਤਕਾਰਸ੍ਸ ਥਕਾਰਕਰਣਞ੍ਚ ਸਿਥਿਲਸ੍ਸ ਧਨਿਤਕਰਣਞ੍ਚ ਅਤਿਦਿਸਤਿ, ਤਥਾ ‘‘ਪਤ੍ਤਕਲ੍ਲਂ ਏਸਾ ਞਤ੍ਤੀ’’ਤਿਆਦਿਵਚਨਞ੍ਚ ਸਿਥਿਲਸ੍ਸ ਧਨਿਤਕਰਣਂ ਨਾਮਾਤਿ ਯੋਜਨਾ.

ਇਤੀਤਿ ਏਵਂ. ਸਿਥਿਲੇ ਕਤ੍ਤਬ੍ਬੇ ਧਨਿਤਂ ਕਰੋਤੀਤਿ ਸਮ੍ਬਨ੍ਧੋ. ਚਤ੍ਤਾਰਿ ਬ੍ਯਞ੍ਜਨਾਨੀਤਿ ਚਤ੍ਤਾਰਿ ਅਕ੍ਖਰਾਨਿ. ਬ੍ਯਞ੍ਜਨਸਦ੍ਦੋ ਹਿ ਇਧ ਅਕ੍ਖਰਵਾਚਕੋ. ਚਤਸ੍ਸਨ੍ਨਂ ਬ੍ਯਞ੍ਜਨਬੁਦ੍ਧੀਨਂ ਕਮ੍ਮਦੂਸਨਂ ਦਸ੍ਸੇਤ੍ਵਾ ਇਤਰਾਸਂ ਅਦੂਸਨਂ ਦਸ੍ਸੇਨ੍ਤੋ ਆਹ ‘‘ਇਤਰੇਸੁ ਪਨਾ’’ਤਿਆਦਿ. ਅਨੁਕ੍ਕਮਾਗਤਨ੍ਤਿ ਅਰਿਯੇਹਿ ਓਤਰਿਤ੍ਵਾ ਅਨੁਕ੍ਕਮੇਨ ਆਗਤਂ. ਪਵੇਣਿਨ੍ਤਿ ਸਨ੍ਤਤਿਂ. ਵਿਨਾਸੇਤ੍ਵਾ ਵੁਤ੍ਤੇ ਕਿਂ ਕਮ੍ਮਵਾਚਾਕੋਪੋ ਹੋਤੀਤਿ ਆਹ ‘‘ਸਚੇ ਪਨਾ’’ਤਿਆਦਿ. ਨ ਕੁਪ੍ਪਤੀਤਿ ਨ ਨਸ੍ਸਤਿ. ਕਸ੍ਮਾ ਪਨ ਕਮ੍ਮਵਾਚਾ ਨ ਕੁਪ੍ਪਤਿ, ਨਨੁ ਕਮ੍ਮਂ ਕੋਪੇਨ੍ਤੀ ਕਮ੍ਮਵਾਚਾ ਕੁਪ੍ਪਤੀਤਿ ਆਹ ‘‘ਇਮਾਨਿ ਹੀ’’ਤਿਆਦਿ. ਹਿ ਯਸ੍ਮਾ ਨ ਕੋਪੇਨ੍ਤਿ, ਤਸ੍ਮਾ ਕਮ੍ਮਵਾਚਾ ਨ ਕੁਪ੍ਪਤੀਤਿ ਯੋਜਨਾ.

ਯਂ ਪਨ ਵਚਨਂ ਸੁਤ੍ਤਨ੍ਤਿਕਤ੍ਥੇਰਾ ਵਦਨ੍ਤੀਤਿ ਸਮ੍ਬਨ੍ਧੋ. ਕਚ੍ਚਾਯਨਾਦਿਸੁਤ੍ਤਨ੍ਤਂ ਕਰੋਨ੍ਤੀਤਿ ਸੁਤ੍ਤਨ੍ਤਿਕਾ, ਕਚ੍ਚਾਯਨਾਦਯੋ, ਸੁਤ੍ਤਨ੍ਤਿਕਾ ਚ ਤੇ ਥੇਰਾ ਚੇਤਿ ਸੁਤ੍ਤਨ੍ਤਿਕਤ੍ਥੇਰਾ. ਨ ਵਟ੍ਟਤੀਤਿ ਅਕ੍ਖਰਵਿਕਾਰੋ ਨ ਵਟ੍ਟਤਿ. ਵਿਨਯਧਰੇਨ ਕਮ੍ਮਵਾਚਾ ਕਾਤਬ੍ਬਾਤਿ ਸਮ੍ਬਨ੍ਧੋ. ਯਥਾਪਾਲ਼ਿਯਾਤਿ ਭਗਵਤਾ ਯਥਾਵੁਤ੍ਤਾਯ ਪਾਲ਼ਿਯਾ. ਬ੍ਯਞ੍ਜਨਨਿਰੁਤ੍ਤਿਯਾਤਿ ਬ੍ਯਞ੍ਜਨਨਿਰੁਤ੍ਤਿਯਂ. ਇਤਰਥਾਤਿ ਵੁਤ੍ਤਦੋਸਪਰਿਹਰਣਤੋ ਅਞ੍ਞੇਨ ਪਕਾਰੇਨ.

ਅਕਾਲੇ ਵਾ ਸਾਵੇਤੀਤਿ ਏਤ੍ਥ ਅਕਾਲੋ ਨਾਮ ਅਨੋਕਾਸੋਤਿ ਆਹ ‘‘ਅਨੋਕਾਸੇ’’ਤਿ. ਅਨੋਕਾਸੋ ਨਾਮ ਞਤ੍ਤਿਅਨੁਸ੍ਸਾਵਨਾਨਂ ਪੁਬ੍ਬਾਪਰਵਿਤਥਨ੍ਤਿ ਆਹ ‘‘ਞਤ੍ਤਿਂ ਅਟ੍ਠਪੇਤ੍ਵਾ’’ਤਿਆਦਿ. ਪਠਮਂਯੇਵ ਞਤ੍ਤਿਂ ਅਟ੍ਠਪੇਤ੍ਵਾ ਪਠਮਂਯੇਵ ਅਨੁਸ੍ਸਾਵਨਕਮ੍ਮਂ ਕਤ੍ਵਾਤਿ ਯੋਜਨਾ. ‘‘ਪਠਮਂਯੇਵਾ’’ਤਿ ਹਿ ਪਦਂ ਪੁਬ੍ਬਾਪਰਾਪੇਕ੍ਖਂ. ਇਤੀਤਿਆਦਿ ਨਿਗਮਨਂ.

੪੮੬. ਯਾ ਏਕਵੀਸਤਿ ਭਿਕ੍ਖੂ ਨ ਗਣ੍ਹਾਤਿ, ਅਯਂ ਅਤਿਖੁਦ੍ਦਕਸੀਮਾ ਨਾਮਾਤਿ ਯੋਜਨਾ. ਏਕਵੀਸਤਿ ਭਿਕ੍ਖੂਤਿ ਅਬ੍ਭਾਨਕਮ੍ਮੇ ਕਮ੍ਮਾਰਹੇਨ ਸਦ੍ਧਿਂ ਏਕਵੀਸਤਿ ਭਿਕ੍ਖੂ. ਯਤ੍ਥ ਸੀਮਾਯਂ ਨਿਸੀਦਿਤੁਂ ਨ ਸਕ੍ਕੋਨ੍ਤਿ, ਅਯਂ ਅਤਿਖੁਦ੍ਦਕਸੀਮਾ ਨਾਮਾਤਿ ਯੋਜਨਾ. ਨਿਸੀਦਿਤੁਨ੍ਤਿ ਅਞ੍ਞਮਞ੍ਞਸ੍ਸ ਹਤ੍ਥਪਾਸਂ ਅਵਿਜਹਿਤ੍ਵਾ ਪਰਿਮਣ੍ਡਲਾਕਾਰੇਨ ਨਿਸੀਦਿਤੁਂ. ਤਤ੍ਥਾਤਿ ਅਤਿਖੁਦ੍ਦਕੇ. ਏਤ੍ਥਾਤਿ ਸੇਸਸੀਮਾਸੁ. ਯਾ ਸਮ੍ਮਤਾ ਹੋਤਿ, ਅਯਂ ਅਤਿਮਹਤੀ ਨਾਮਾਤਿ ਯੋਜਨਾ. ਕੇਸਗ੍ਗਮਤ੍ਤੇਨਾਪੀਤਿ ਪਿਸਦ੍ਦੋ ਤਤੋ ਅਤਿਰੇਕੇਨ ਪਨ ਪਗੇਵਾਤਿ ਦਸ੍ਸੇਤਿ. ਅਘਟਿਤਂ ਅਸਮ੍ਬਨ੍ਧਂ ਨਿਮਿਤ੍ਤਂ ਇਮਿਸ੍ਸਾਤਿ ਅਘਟਿਤਨਿਮਿਤ੍ਤਾ. ਖਣ੍ਡਨਿਮਿਤ੍ਤਭਾਵਂ ਅਖਣ੍ਡਨਿਮਿਤ੍ਤਦਸ੍ਸਨੇਨ ਪਾਕਟਂ ਕਰੋਨ੍ਤੋ ਆਹ ‘‘ਪੁਰਤ੍ਥਿਮਾਯਾ’’ਤਿਆਦਿ. ਪੁਬ੍ਬਕਿਤ੍ਤਿਤਨ੍ਤਿ ਪਠਮਕਿਤ੍ਤਿਤਂ. ਤਤ੍ਥੇਵਾਤਿ ਉਤ੍ਤਰਾਯ ਏਵ ਦਿਸਾਯ. ਅਪਰਾਪੀਤਿ ਪਿਸਦ੍ਦੋ ਦੁਤਿਯਤ੍ਥਸਮ੍ਪਿਣ੍ਡਨਤ੍ਥੋ. ਯਾ ਸਮ੍ਮਤਾ ਹੋਤਿ, ਖਣ੍ਡਨਿਮਿਤ੍ਤਾ ਨਾਮਾਤਿ ਯੋਜਨਾ. ਅਨਿਮਿਤ੍ਤੁਪਗਨ੍ਤਿ ਯਥਾਭੂਤਕਥਨਵਿਸੇਸਨਮੇਵ, ਨ ਬ੍ਯਵਚ੍ਛੇਦਵਿਸੇਸਨਂ ਤਚਸਾਰਾਦਿਗ੍ਗਹਣੇਨ ਅਨਿਮਿਤ੍ਤੁਪਗਭਾਵਸ੍ਸ ਪਾਕਟਤ੍ਤਾ. ਅਨ੍ਤਰਾਤਿ ਮਜ੍ਝੇ. ਯਾ ਸਮ੍ਮਤਾ ਹੋਤਿ, ਸਾ ਛਾਯਾਨਿਮਿਤ੍ਤਾ ਨਾਮ, ਅਨਿਮਿਤ੍ਤਾ ਨਾਮਾਤਿ ਯੋਜਨਾ.

ਬਹਿ ਠਿਤੋ ਹੁਤ੍ਵਾ ਸਮ੍ਮਨ੍ਨਤੀਤਿ ਯੋਜਨਾ. ਨਿਮਿਤ੍ਤਾਨਿ ਪਨ ਬਹਿ ਠਤ੍ਵਾਪਿ ਕਿਤ੍ਤੇਤੁਂ ਵਟ੍ਟਤਿ. ਏਵਂ ਸਮ੍ਮਤਾਪੀਤਿ ਪਿਸਦ੍ਦੋ ਅਸਮ੍ਮਤਾ ਪਨ ਪਗੇਵਾਤਿ ਦਸ੍ਸੇਤਿ. ਸੀਮਾਯ ਸੀਮਨ੍ਤਿ ਪਦਾਨਂ ਸਮ੍ਬਨ੍ਧਾਪੇਕ੍ਖਤ੍ਤਾ, ਤਸ੍ਸ ਚ ਅਸਮਾਨਭਾਵਤੋ ਤੇਸਂ ਵਿਸੁਂ ਵਿਸੁਂ ਸਮ੍ਬਨ੍ਧਂ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਸੀਮਾਯ ਪਰੇਸਂ ਸੀਮ’’ਨ੍ਤਿ. ਸਮ੍ਭਿਨ੍ਦਤੀਤਿ ਸਮ੍ਬਨ੍ਧਂ ਕਰੋਤਿ. ਏਤ੍ਥ ਹਿ ਭਿਦਿਧਾਤੁ ਦ੍ਵਿਧਾਕਰਣਤ੍ਥਵਾਚਕੋ, ਧਾਤ੍ਵਤ੍ਥਬਾਧਕੇਨ ਸਂਤ੍ਯੂਪਸਗ੍ਗੇਨ ਸਮ੍ਬਨ੍ਧਵਾਚਕੋ ਹੋਤੀਤਿ ਦਟ੍ਠਬ੍ਬਂ. ਤਤ੍ਥਾਤਿ ਤਾਸੁ ਦ੍ਵੀਸੁ ਸੀਮਾਸੁ. ਇਤੀਤਿ ਏਵਂ. ਤਾਸੂਤਿ ਸੀਮਾਸੁ.

੪੮੭-੮. ਯਮ੍ਪਿ ਕਮ੍ਮਪ੍ਪਤ੍ਤਛਨ੍ਦਾਰਹਲਕ੍ਖਣਨ੍ਤਿ ਯੋਜਨਾ. ਤਤ੍ਥਾਤਿ ਤਸ੍ਸਂ ਪਰਿਸਤੋ ਕਮ੍ਮਵਿਪਤ੍ਤਿਯਂ. ਤਮ੍ਪੀਤਿ ਕਮ੍ਮਪ੍ਪਤ੍ਤਛਨ੍ਦਾਰਹਲਕ੍ਖਣਮ੍ਪਿ, ਵੁਤ੍ਤਮੇਵਾਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਚਤ੍ਤਾਰੋ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ’’ਤਿ ਪਾਠੇ. ਅਨੁਕ੍ਖਿਤ੍ਤਾਤਿ ਸਙ੍ਘੇਨ ਉਕ੍ਖੇਪਨੀਯਕਮ੍ਮਸ੍ਸ ਅਕਤਤ੍ਤਾ ਅਨੁਕ੍ਖਿਤ੍ਤਾ. ਪਰਿਸੁਦ੍ਧਸੀਲਾਤਿ ਪਾਰਾਜਿਕਂ ਅਨਜ੍ਝਾਪਨ੍ਨਤ੍ਤਾ ਪਰਿਸੁਦ੍ਧਸੀਲਾ. ਇਮੇਹਿ ਪਦੇਹਿ ਪਕਤਿ ਅਤ੍ਤਾ ਸਭਾਵੋ ਏਤੇਸਨ੍ਤਿ ਪਕਤਤ੍ਤਾਤਿ ਅਤ੍ਥਂ ਦਸ੍ਸੇਤਿ. ‘‘ਕਮ੍ਮਸ੍ਸ ਅਰਹਾ’’ਤਿ ਇਮਿਨਾ ‘‘ਕਮ੍ਮਪ੍ਪਤ੍ਤਾ’’ਤਿ ਪਦਸ੍ਸ ਛਟ੍ਠੀਸਮਾਸਞ੍ਚ ਪਤ੍ਤਸਦ੍ਦਸ੍ਸ ਅਰਹਅਨੁਚ੍ਛਵਿਕਤ੍ਥਭਾਵਞ੍ਚ ਦਸ੍ਸੇਤਿ. ਤੇਹੀਤਿ ਚਤੂਹਿ ਪਕਤਤ੍ਤੇਹਿ. ਏਤੀਤਿ ਆਗਚ੍ਛਤਿ. ਅਵਸੇਸਾਤਿ ਚਤੂਹਿ ਪਕਤਤ੍ਤੇਹਿ ਅਵਸੇਸਾ. ਯਸ੍ਸ ਪਨਾਤਿ ਪੁਗ੍ਗਲਸ੍ਸ ਪਨ. ਕਮ੍ਮਾਰਹੋਤਿ ਕਮ੍ਮਸ੍ਸ ਅਰਹੋ.

੪੮੯. ਏਤ੍ਥਾਤਿ ਪਣ੍ਡਕਾਦੀਨਂ ਅਵਤ੍ਥੁਭਾਵਦਸ੍ਸਨਟ੍ਠਾਨੇ.

ਅਪਲੋਕਨਕਮ੍ਮਕਥਾ

੪੯੫-੬. ਤਤ੍ਥਾਤਿ ਚਤੂਸੁ ਕਮ੍ਮੇਸੁ. ਏਤ੍ਥਾਤਿ ਓਸਾਰਣਾਦਿਪਾਠੇ. ਪਦਸਿਲਿਟ੍ਠਤਾਯਾਤਿ ਲੋਕੇ ਪਦਾਨਂ ਸਿਲਿਟ੍ਠਭਾਵਤੋ. ਤਤ੍ਥਾਤਿ ਓਸਾਰਣਾਦੀਸੁ ਪਞ੍ਚਸੁ. ਕਣ੍ਟਕਸਾਮਣੇਰਸ੍ਸ ਯਾ ਸਾ ਦਣ੍ਡਕਮ੍ਮਨਾਸਨਾ ਅਤ੍ਥਿ, ਸਾ ਨਿਸ੍ਸਾਰਣਾਤਿ ਯੋਜਨਾ. ‘‘ਮਿਚ੍ਛਾਦਿਟ੍ਠਿਕੋ ਹੋਤੀ’’ਤਿ ਵਤ੍ਵਾ ਤਮੇਵਤ੍ਥਂ ਦਸ੍ਸੇਤੁਂ ‘‘ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋ’’ਤਿ ਵੁਤ੍ਤਂ. ਮਿਚ੍ਛਾਦਿਟ੍ਠਿ ਹਿ ਲਿਙ੍ਗਨਾਸਨਾਯ ਕਾਰਣਂ ਹੋਤਿ. ਸੋਤਿ ਸਾਮਣੇਰੋ, ‘‘ਨਿਸ੍ਸਜ੍ਜਾਪੇਤਬ੍ਬੋ’’ਤਿ ਪਦੇ ਕਾਰਿਤਕਮ੍ਮਂ, ਵੁਤ੍ਤਕਮ੍ਮਂ ਵਾ. ਤਂ ਲਦ੍ਧਿਨ੍ਤਿ ਧਾਤੁਕਮ੍ਮਂ, ਅਵੁਤ੍ਤਕਮ੍ਮਂ ਵਾ. ਕਿਨ੍ਤਿ ਕਾਤਬ੍ਬਨ੍ਤਿ ਆਹ ‘‘ਏਵਞ੍ਚ ਪਨ ਕਮ੍ਮਂ ਕਾਤਬ੍ਬ’’ਨ੍ਤਿ.

ਕਾਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਸਙ੍ਘਂ ਭਨ੍ਤੇ’’ਤਿਆਦਿ. ਯਂ ਸਹਸੇਯ੍ਯਂ ਲਭਨ੍ਤੀਤਿ ਯੋਜਨਾ. ਤਸ੍ਸਾਤਿ ਸਹਸੇਯ੍ਯਸ੍ਸ. ਅਲਾਭਾਯਾਤਿ ਅਲਾਭਤ੍ਥਾਯ. ‘‘ਚਰ ਪਿਰੇ ਵਿਨਸ੍ਸਾ’’ਤਿ ਇਮਿਨਾ ਨਿਸ੍ਸਾਰਣਾਕਾਰਂ ਦਸ੍ਸੇਤਿ. ਅਤ੍ਥੋ ਪਨਸ੍ਸ ਹੇਟ੍ਠਾ ਵੁਤ੍ਤੋਯੇਵ.

ਸੋਤਿ ਸਮਣੇਰੋ, ਓਸਾਰੇਤਬ੍ਬੋਤਿ ਸਮ੍ਬਨ੍ਧੋ.

ਸ੍ਵਾਯਨ੍ਤਿ ਸੋ ਅਯਂ ਸਾਮਣੇਰੋ, ਅਚ੍ਚਯਂ ਦੇਸੇਤੀਤਿ ਸਮ੍ਬਨ੍ਧੋ. ਸੋਰਤੋਤਿ ਸੁਨ੍ਦਰਲਦ੍ਧਿਯਂ ਰਤੋ, ਦੁਲਦ੍ਧਿਤੋ ਵਾ ਸੁਟ੍ਠੁ ਓਰਤੋ. ਯਥਾ ਪੁਰੇਤਿ ਯਥਾ ਪੁਬ੍ਬੇ ਰੁਚ੍ਚਤਿ, ਤਥਾਤਿ ਯੋਜਨਾ. ਕਾਯਸਮ੍ਭੋਗਸਾਮਗ੍ਗਿਦਾਨਨ੍ਤਿ ਕਾਯੇਨ ਚ ਸਮ੍ਭੋਗੇਨ ਚ ਸਾਮਗ੍ਗਿਯਾ ਦਾਨਂ.

ਏਵਨ੍ਤਿਆਦਿ ਨਿਗਮਨਂ. ਯਸ੍ਮਾ ਪਨ ਬ੍ਰਹ੍ਮਦਣ੍ਡੋ ਪਞ੍ਚਸਤਿਕਕ੍ਖਨ੍ਧਕੇ (ਚੂਲ਼ਵ. ੪੪੫) ਛਨ੍ਨਸ੍ਸੇਵ ਪਞ੍ਞਤ੍ਤੋ, ਤਸ੍ਮਾ ਤਸ੍ਸੇਵ ਦਾਤਬ੍ਬੋਤਿ ਆਹ ‘‘ਨ ਕੇਵਲ’’ਨ੍ਤਿਆਦਿ. ਏਸਾਤਿ ਬ੍ਰਹ੍ਮਦਣ੍ਡੋ, ਅਞ੍ਞੋਪਿ ਯੋ ਭਿਕ੍ਖੁ ਵਿਹਰਤਿ, ਤਸ੍ਸਪਿ ਦਾਤਬ੍ਬੋਤਿ ਸਮ੍ਬਨ੍ਧੋ. ਕਿਨ੍ਤਿ ਦਾਤਬ੍ਬੋਤਿ ਆਹ ‘‘ਏਵਞ੍ਚ ਪਨ ਦਾਤਬ੍ਬੋ’’ਤਿ. ਦਾਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਸਙ੍ਘਮਜ੍ਝੇ’’ਤਿਆਦਿ.

ਯਂ ਵਚਨਂ ਇਚ੍ਛੇਯ੍ਯ, ਤਂ ਵਚਨਨ੍ਤਿ ਯੋਜਨਾ. ਖਮਾਪੇਨ੍ਤਸ੍ਸਾਤਿ ਸਙ੍ਘਂ ਖਮਾਪੇਨ੍ਤਸ੍ਸ ਤਸ੍ਸ ਭਿਕ੍ਖੁਸ੍ਸਾਤਿ ਯੋਜਨਾ.

ਪਟਿਸਙ੍ਖਾਤਿ ਪਟਿਸਙ੍ਖਾਯ, ਞਾਣੇਨ ਪਚ੍ਚਵੇਕ੍ਖਿਤ੍ਵਾਤਿ ਅਤ੍ਥੋ.

ਯਨ੍ਤਿ ਅਵਨ੍ਦਿਯਕਮ੍ਮਂ, ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ਕੇਨ ਅਨੁਞ੍ਞਾਤਨ੍ਤਿ ਆਹ ‘‘ਭਗਵਤਾ’’ਤਿ. ਕਿਸ੍ਮਿਂ ਖਨ੍ਧਕੇ ਅਨੁਞ੍ਞਾਤਨ੍ਤਿ ਆਹ ‘‘ਭਿਕ੍ਖੁਨਿਕ੍ਖਨ੍ਧਕੇ’’ਤਿ. ਕੇਸੁ ਵਤ੍ਥੂਸੁ ਅਨੁਞ੍ਞਾਤਨ੍ਤਿ ਆਹ ‘‘ਤੇਨ ਖੋ ਪਨ…ਪੇ… ਇਮੇਸੁ ਵਤ੍ਥੂਸੂ’’ਤਿ (ਚੂਲ਼ਵ. ੪੧੧). ਕਿਂ ਕਤ੍ਵਾ ਅਨੁਞ੍ਞਾਤਨ੍ਤਿ ਆਹ ‘‘ਦੁਕ੍ਕਟਂ ਪਞ੍ਞਪੇਤ੍ਵਾ’’ਤਿ. ਕਿਨ੍ਤਿ ਅਨੁਞ੍ਞਾਤਨ੍ਤਿ ਆਹ ‘‘ਅਨੁਜਾਨਾਮਿ…ਪੇ… ਕਾਤਬ੍ਬੋ’’ਤਿ. ਤਸ੍ਸਾਤਿ ਅਵਨ੍ਦਿਯਸ੍ਸ. ‘‘ਨ ਓਸਾਰਣਾਦੀਨੀ’’ਤਿ ਇਮਿਨਾ ਏਵਸਦ੍ਦਸ੍ਸ ਛਡ੍ਡੇਤਬ੍ਬਤ੍ਥਂ ਦਸ੍ਸੇਤਿ. ਤਸ੍ਸਾਤਿ ਕਮ੍ਮਲਕ੍ਖਣਭੂਤਸ੍ਸ ਅਵਨ੍ਦਿਯਸ੍ਸ. ਤਤ੍ਥੇਵਾਤਿ ਭਿਕ੍ਖੁਨਿਕ੍ਖਨ੍ਧਕੇਯੇਵ. ਨਨ੍ਤਿ ਕਮ੍ਮਲਕ੍ਖਣਂ. ਇਧਾਪੀਤਿ ਪਰਿਵਾਰੇ ਕਮ੍ਮਵਗ੍ਗੇਪਿ.

ਅਪਾਸਾਦਿਕਨ੍ਤਿ ਅਪਸਾਦਾਵਹਂ, ਅਪਸਾਦਜਨਕਂ ਵਾ.

ਤਤੋਤਿ ਅਵਨ੍ਦਿਯਕਰਣਤੋ. ਇਮਨ੍ਤਿ ਭਿਕ੍ਖੁਂ. ਵਨ੍ਦਿਯਨ੍ਤਿ ਵਨ੍ਦਿਤਬ੍ਬਂ, ਵਨ੍ਦਨਂ ਵਾ.

ਏਤ੍ਥਾਤਿ ਅਪਲੋਕਨਕਮ੍ਮੇ, ਭਿਕ੍ਖੁਨਿਸਙ੍ਘਮੂਲਕਂ ਕਤ੍ਵਾ ਪਞ੍ਞਤ੍ਤਨ੍ਤਿ ਯੋਜਨਾ. ਭਿਕ੍ਖੁਸਙ੍ਘਸ੍ਸਾਪੀਤਿ ਪਿਸਦ੍ਦੋ ਨ ਭਿਕ੍ਖੁਨਿਸਙ੍ਘਸ੍ਸੇਵਾਤਿ ਦਸ੍ਸੇਤਿ. ਪਨਸਦ੍ਦੋ ਸਮ੍ਭਾਵਨਤ੍ਥੋ, ਤਥਾ ਭਿਕ੍ਖੁਨਿਸਙ੍ਘਮੂਲਕਂ ਪਞ੍ਞਤ੍ਤਮ੍ਪੀਤਿ ਅਤ੍ਥੋ, ਲਭਿਤਬ੍ਬਭਾਵਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਯਂ ਹੀ’’ਤਿਆਦਿ. ਯਂ ਅਪਲੋਕਨਕਮ੍ਮਂ ਕਰੋਤੀਤਿ ਯੋਜਨਾ. ਅਪ੍ਪਮਤ੍ਤਕਵਿਸ੍ਸਜ੍ਜਕੇਨ ਪਨ ਦਾਤਬ੍ਬਾਨੀਤਿ ਸਮ੍ਬਨ੍ਧੋ. ਤੇਸਨ੍ਤਿ ਸੂਚਿਆਦੀਨਂ. ਸੋਯੇਵਾਤਿ ਅਪ੍ਪਮਤ੍ਤਕਵਿਸ੍ਸਜ੍ਜਕੋਯੇਵ. ਤਤੋਤਿ ਅਪ੍ਪਮਤ੍ਤਕਤੋ. ਤਤ੍ਥਾਤਿ ਸੇਨਾਸਨਕ੍ਖਨ੍ਧਕਵਣ੍ਣਨਾਯਂ (ਚੂਲ਼ਵ. ਅਟ੍ਠ. ੩੨੧). ਵੁਤ੍ਤਪ੍ਪਕਾਰਂ ਗਿਲਾਨਭੇਸਜ੍ਜਮ੍ਪੀਤਿ ਸਮ੍ਬਨ੍ਧੋ. ਯੋਪਿ ਚਾਤਿ ਭਿਕ੍ਖੁਪਿ ਚ ਹੋਤੀਤਿ ਸਮ੍ਬਨ੍ਧੋ. ਤਸ੍ਸ ਦਾਤਬ੍ਬਾਤਿ ਸਮ੍ਬਨ੍ਧੋ. ਤਤ੍ਰੁਪ੍ਪਾਦਤੋਤਿ ਤਸ੍ਮਿਂ ਮਹਾਵਾਸੇ ਉਪ੍ਪਾਦਪਚ੍ਚਯਤੋ, ਗਹੇਤ੍ਵਾਤਿ ਸਮ੍ਬਨ੍ਧੋ. ‘‘ਪੇਸਲਸ੍ਸਾ’’ਤਿਆਦਿਨਾ ਦੁਸ੍ਸੀਲਾਦੀਨਂ ਦਾਤੁਂ ਨ ਵਟ੍ਟਤੀਤਿ ਦਸ੍ਸੇਤਿ.

ਜਗ੍ਗਾਪੇਤੁਂ ਵਟ੍ਟਤੀਤਿ ਏਤ੍ਥ ਅਪੁਚ੍ਛਿਤ੍ਵਾ ਜਗ੍ਗਾਪੇਤੁਂ ਵਟ੍ਟਤੀਤਿ ਆਹ ‘‘ਅਯਂ ਭਿਕ੍ਖੂ’’ਤਿਆਦਿ. ਓਦਿਸ੍ਸਾਤਿ ਉਦ੍ਦਿਸਿਤ੍ਵਾ.

ਆਸਨਘਰਂ ਵਾਤਿ ਪਟਿਮਾਘਰਂ ਵਾ, ਕਾਰਕੋ ਮਨੁਸ੍ਸੋਤਿ ਸਮ੍ਬਨ੍ਧੋ. ਉਪਨਿਕ੍ਖੇਪਤੋ ਗਹੇਤ੍ਵਾਤਿ ਸਮ੍ਬਨ੍ਧੋ. ਸਙ੍ਘਿਕੇਨਪੀਤਿ ਪਿਸਦ੍ਦੋ ਨ ਕੇਵਲਂ ਚੇਤਿਯਸ੍ਸ ਉਪਨਿਕ੍ਖੇਪੇਨੇਵ, ਅਥ ਖੋ ਸਙ੍ਘਿਕੇਨਪੀਤਿ ਦਸ੍ਸੇਤਿ.

ਯਾਪਨਮਤ੍ਤਂ ਅਲਭਨ੍ਤੇਹਿ ਕਰੋਨ੍ਤੇਹੀਤਿ ਯੋਜਨਾ, ਪਰਿਭੁਞ੍ਜਨ੍ਤੇਹਿ ਹੁਤ੍ਵਾਤਿ ਸਮ੍ਬਨ੍ਧੋ. ‘‘ਵਤ੍ਤਂ ਕਰੋਮਾ’’ਤਿਆਦਿਨਾ ‘‘ਯਾਪਨਮਤ੍ਤ’’ਨ੍ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਵਿਹਾਰੇ ਰੋਪਿਤਾ ਯੇ ਫਲਰੁਕ੍ਖਾਤਿ ਯੋਜਨਾ. ਯੇਸਨ੍ਤਿ ਰੁਕ੍ਖਾਨਂ. ਤੇਸੂਤਿ ਰੁਕ੍ਖੇਸੁ. ਯੇ ਪਨਾਤਿ ਰੁਕ੍ਖਾ ਪਨ, ਅਪਰਿਗ੍ਗਹਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਤਂ ਪਨਾਤਿ ਅਪਲੋਕਨਕਮ੍ਮਂ ਪਨ. ਸਲਾਕਂ ਗਣ੍ਹਨ੍ਤਿ ਏਤ੍ਥਾਤਿ ਸਲਾਕਗ੍ਗਂ, ਠਾਨਂ. ‘‘ਯਾਗਗ੍ਗਭਤ੍ਤਗ੍ਗ’’ਇਤਿ ਏਤ੍ਥਾਪਿ ਏਸੇਵ ਨਯੋ. ਉਪੋਸਥਗ੍ਗੇਤਿ ਉਪੋਸਥਸ੍ਸ ਗਹਣਟ੍ਠਾਨੇ, ਉਪੋਸਥਗੇਹੇਤਿ ਅਤ੍ਥੋ. ਤਤ੍ਥਾਤਿ ਉਪੋਸਥਗ੍ਗੇ. ਤਨ੍ਤਿ ਅਪਲੋਕਨਕਮ੍ਮਂ.

ਯਂ ਮੂਲਤਚਪਤ੍ਤਅਙ੍ਕੁਰਪੁਪ੍ਫਫਲਖਾਦਨੀਯਾਦੀਤਿ ਯੋਜਨਾ. ਅਨ੍ਤੋਸੀਮਾਯਾਤਿ ਅਨ੍ਤੋ ਉਪਚਾਰਸੀਮਾਯ.

ਸੁਕਤਮੇਵਾਤਿ ਸਙ੍ਘੇਨ ਕਤਮੇਵ. ਉਪੋਸਥਦਿਵਸੇਤਿ ਨਿਦਸ੍ਸਨਮਤ੍ਤਂ ਯਸ੍ਮਿਂ ਕਸ੍ਮਿਂਚਿ ਦਿਵਸੇਪਿ ਕਤਤ੍ਤਾ.

ਫਲਵਾਰੇਨਾਤਿ ਰੁਕ੍ਖਾਨਂ ਫਲਗਹਣਵਾਰੇਨ. ਰੁਕ੍ਖਾ ਧਰਨ੍ਤੀਤਿ ਰੁਕ੍ਖਾ ਤਿਟ੍ਠਨ੍ਤਿ, ਸਂਵਿਜ੍ਜਨ੍ਤਿ ਵਾ. ਯੇਹੀਤਿ ਭਿਕ੍ਖੂਹਿ ਰੋਪਿਤਾ, ਹੋਨ੍ਤੀਤਿ ਸਮ੍ਬਨ੍ਧੋ. ਸਾ ਏਵ ਕਤਿਕਾਤਿ ਪੁਬ੍ਬੇ ਕਤਾ ਸਾ ਏਵ ਕਤਿਕਾ, ਅਞ੍ਞਾ ਕਤਿਕਾ ਨ ਕਾਤਬ੍ਬਾਤਿ ਅਧਿਪ੍ਪਾਯੋ.

ਅਞ੍ਞਸ੍ਮਿਂ ਵਿਹਾਰੇਤਿ ਰੁਕ੍ਖਾਨਂ ਠਿਤਵਿਹਾਰਤੋ ਅਞ੍ਞਸ੍ਮਿਂ ਵਿਹਾਰੇ. ਤੇਸਨ੍ਤਿ ਰੁਕ੍ਖਾਨਂ, ਸਾਮੀਤਿ ਸਮ੍ਬਨ੍ਧੋ. ਯੇਪੀਤਿ ਰੁਕ੍ਖਾਪਿ, ਰੋਪਿਤਾਤਿ ਸਮ੍ਬਨ੍ਧੋ. ਅਞ੍ਞਤੋ ਠਾਨਤੋਤਿ ਯੋਜਨਾ. ਤੇਸੂਤਿ ਰੁਕ੍ਖੇਸੁ. ਏਤ੍ਥਾਤਿ ਵਿਹਾਰੇ. ਤੇਹਿ ਪਨਾਤਿ ਪਰਿਵੇਣਸਾਮਿਕੇਹਿ ਭਿਕ੍ਖੂਹਿ ਪਨ. ਦਸਭਾਗਨ੍ਤਿ ਦਸਮਭਾਗਂ. ‘‘ਏਸੇਵ ਨਯੋ’’ਤਿ ਇਮਿਨਾ ਦਸਭਾਗਂ ਦਤ੍ਵਾਤਿ ਅਤ੍ਥਂ ਅਤਿਦਿਸਤਿ.

ਸਮ੍ਭਾਵਨੀਯਭਿਕ੍ਖੁਨੋਤਿ ਸੀਲਸੁਤਾਦੀਹਿ ਸਮ੍ਭਾਵਨੀਯਸ੍ਸ ਭਿਕ੍ਖੁਨੋ. ਤਤ੍ਥਾਤਿ ਪੋਰਾਣਵਿਹਾਰੇ. ਮੂਲੇਤਿ ਪੁਬ੍ਬੇ, ਆਦਿਕਾਲੇਤਿ ਅਤ੍ਥੋ. ਨਿਕ੍ਕੁਕ੍ਕੁਚ੍ਚੇਨਾਤਿ ‘‘ਅਭਾਜਿਤਮਿਦ’’ਨ੍ਤਿ ਕੁਕ੍ਕੁਚ੍ਚਵਿਰਹੇਨ. ਖਿਯ੍ਯਨਮਤ੍ਤਮੇਵ ਤਨ੍ਤਿ ਤਂ ਖਿਯ੍ਯਨਂ ਖਿਯ੍ਯਨਮਤ੍ਤਮੇਵ, ਨ ਸਾਮਣੇਰਾਨਂ ਖਿਯ੍ਯਨਂ ਰੁਹਤੀਤਿ ਅਤ੍ਥੋ.

ਪਨਸਰੁਕ੍ਖਨ੍ਤਿ ਕਣ੍ਟਕੀਫਲਰੁਕ੍ਖਂ. ਅਯਂ ਸਾਮੀਚੀਤਿ ਅਯਂ ਭਾਜੇਤ੍ਵਾ ਖਾਦਨਂ ਅਨੁਧਮ੍ਮਤਾ. ਖਾਯਿਤਨ੍ਤਿ ਖਾਦਿਤਂ. ਦ੍ਵਿਨ੍ਨਂ ਤਿਣ੍ਣਂ ਕਤਿਕਪਟਿਪ੍ਪਸ੍ਸਮ੍ਭਨਂ ਨਯੇਨ ਞਾਤੁਂ ਸਕ੍ਕੁਣੇਯ੍ਯਤ੍ਤਾ ਤਂ ਅਦਸ੍ਸੇਤ੍ਵਾ ਏਕਸ੍ਸੇਵ ਕਤਿਕਪਟਿਪ੍ਪਸ੍ਸਮ੍ਭਨਂ ਦਸ੍ਸੇਨ੍ਤੋ ਆਹ ‘‘ਏਕਭਿਕ੍ਖੁਕੇ ਪਨਾ’’ਤਿਆਦਿ. ਪੁਰਿਮਕਤਿਕਾਤਿ ‘‘ਯਥਾਸੁਖਂ ਪਰਿਭੁਞ੍ਜਿਤੁਂ ਰੁਚ੍ਚਤੀ’’ਤਿ (ਪਰਿ. ਅਟ੍ਠ. ੪੯੫-੪੯੬) ਪੁਰੇ ਕਤਾ ਕਤਿਕਾ. ਤੇਸਨ੍ਤਿ ਸਾਮਣੇਰਾਨਂ, ਫਾਤਿਕਮ੍ਮਨ੍ਤਿ ਸਮ੍ਬਨ੍ਧੋ. ਭਾਜੇਤ੍ਵਾਤਿ ਸਾਮਣੇਰਾਨਂ ਭਾਜੇਤ੍ਵਾ. ਇਮਿਨਾ ਸਾਮਣੇਰਾਨਂ ਫਾਤਿਕਮ੍ਮਂ ਨ ਦਾਤਬ੍ਬਮ੍ਪਿ ਭਾਗਂ ਭਾਜੇਤਬ੍ਬਨ੍ਤਿ ਦਸ੍ਸੇਤਿ.

ਸਾਮਨ੍ਤਗਾਮੇਹੀਤਿ ਆਸਨ੍ਨਗਾਮੇਹਿ, ਆਗਨ੍ਤ੍ਵਾਤਿ ਸਮ੍ਬਨ੍ਧੋ. ਏਕਂ ਅਮ੍ਬਂ ਏਕਂ ਲਬੁਜਨ੍ਤਿ ਯੋਜਨਾ. ਅਦਿਯ੍ਯਮਾਨੇ ਦੋਸੇ ਦਸ੍ਸਿਤੇ ਦਿਯ੍ਯਮਾਨੇ ਆਨਿਸਂਸਮ੍ਪਿ ਅਤ੍ਥਤੋ ਞਾਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਦਿਯ੍ਯਮਾਨੇ ਹੀ’’ਤਿਆਦਿ.

ਗਣ੍ਹਨ੍ਤਾਨਂ ਮਨੁਸ੍ਸਾਨਨ੍ਤਿ ਸਮ੍ਬਨ੍ਧੋ. ਤਤੋਤਿ ਕਤਿਕਵਤ੍ਤਟ੍ਠਪਨਤੋ. ਨ ਵਤ੍ਤਬ੍ਬਾਤਿ ਫਲਦਾਨਕੁਲਦੂਸਕਤ੍ਤਾ ਨ ਵਤ੍ਤਬ੍ਬਾ. ਕਿਨ੍ਤਿ ਆਚਿਕ੍ਖਿਤਬ੍ਬਨ੍ਤਿ ਆਹ ‘‘ਨਾਲ਼ਿਕੇਰਾਦੀਨੀ’’ਤਿਆਦਿ. ਅਨੁਵਿਚਰਿਤ੍ਵਾਤਿ ਪਦਾਨਮਨੁਕ੍ਕਮੇਨ ਵਿਚਰਿਤ੍ਵਾ. ਉਪਡ੍ਢਭਾਗੋਤਿ ਭਿਕ੍ਖੂਨਂ ਲਦ੍ਧਭਾਗਤੋ ਉਪਡ੍ਢੋ ਭਾਗੋ. ਅਪਲੋਕੇਤ੍ਵਾਤਿ ਸਙ੍ਘਂ ਆਪੁਚ੍ਛਿਤ੍ਵਾ.

ਮਗ੍ਗਗਮਿਯਸਤ੍ਥਵਾਹੋਤਿ ਮਗ੍ਗਂ ਗਮਿਕੋ ਸਤ੍ਥਵਾਹੋ. ਸੋਤਿ ਬਲਕ੍ਕਾਰੇਨ ਗਹੇਤ੍ਵਾ ਖਾਦਨ੍ਤੋ. ਛਾਯਾਦੀਨਨ੍ਤਿਆਦਿਸਦ੍ਦੇਨ ਆਰਾਮਵਨਾਨਿ ਸਙ੍ਗਹੇਤਬ੍ਬਾਨਿ. ਸਚੇ ਅਤ੍ਥੀਤਿ ਸਚੇ ਅਤ੍ਥੋ ਅਤ੍ਥਿ. ਫਲਭਰਿਤਾਤਿ ਫਲੇਨ ਪਰਿਪੁਣ੍ਣਾ. ‘‘ਫਲਭਾਰਿਤਾ’’ਤਿਪਿ ਪਾਠੋ. ਫਲਸਙ੍ਖਾਤੇਨ ਭਾਰੇਨ ਸਮਨ੍ਨਾਗਤਾਤਿ ਅਤ੍ਥੋ. ਅਪਚ੍ਚਾਸੀਸਨ੍ਤੇਨਾਤਿ ਤੇਸਂ ਸਨ੍ਤਿਕਾ ਦਾਨਪਟਿਦਾਨਂ ਅਪਚ੍ਚਾਸੀਸਨ੍ਤੇਨ. ਪੁਬ੍ਬੇ ਵੁਤ੍ਤਮੇਵਾਤਿ ਪੁਬ੍ਬੇ ਸਙ੍ਘਿਕਟ੍ਠਾਨੇ ‘‘ਕੁਦ੍ਧੋ ਹਿ ਸੋ’’ਤਿਆਦਿਨਾ ਵੁਤ੍ਤਮੇਵ. ਏਤ੍ਥਾਤਿ ਪੁਗ੍ਗਲਿਕਟ੍ਠਾਨੇ.

ਤਨ੍ਤਿ ਫਲਾਰਾਮਂ. ਸੋਤਿ ਪਟਿਬਲੋ ਭਿਕ੍ਖੁ. ਭਾਰਿਯਂ ਕਮ੍ਮਨ੍ਤਿ ਜਗ੍ਗਨਕਮ੍ਮਂ ਭਾਰਿਯਂ. ਏਤ੍ਤਕੇਨਾਤਿ ਤਤਿਯਭਾਗਉਪਡ੍ਢਭਾਗਮਤ੍ਤੇਨ. ਸਬ੍ਬਂ ਫਲਾਰਾਮਨ੍ਤਿ ਸਮ੍ਬਨ੍ਧੋ. ਮੂਲਭਾਗਨ੍ਤਿ ਪਠਮਭਾਗਂ. ‘‘ਦਸਭਾਗਮਤ੍ਤ’’ਨ੍ਤਿ ਇਮਿਨਾ ਤਦਤ੍ਥਂ ਦਸ੍ਸੇਤਿ. ਦਤ੍ਵਾਤਿ ਸਙ੍ਘਸ੍ਸ ਦਤ੍ਵਾ. ਸੋਤਿ ਭਿਕ੍ਖੁ. ਅਕਤਾਵਾਸਨ੍ਤਿ ਪੁਬ੍ਬੇ ਅਕਤਂ ਨਵਂ ਸੇਨਾਸਨਂ. ਆਰਾਮਨ੍ਤਿ ਸਙ੍ਘਸ੍ਸ ਆਰਾਮਂ. ਤੇਹਿਪੀਤਿ ਨਿਸ੍ਸਿਤਕੇਹਿਪਿ. ਪਿਸਦ੍ਦੋ ਆਚਰਿਯਂ ਅਪੇਕ੍ਖਤਿ. ਤੇਸਨ੍ਤਿ ਨਿਸ੍ਸਿਤਕਾਨਂ. ਜਗ੍ਗਿਤਕਾਲੇਤਿ ਜਗ੍ਗਿਤਾਨਂ ਰੁਕ੍ਖਾਨਂ ਪੁਪ੍ਫਫਲਭਰਿਤਕਾਲੇ. ਜਗ੍ਗਨਕਾਲੇਤਿ ਜਗ੍ਗਨਮਤ੍ਤਕਾਲੇ, ਜਗ੍ਗਨਮਤ੍ਤਮੇਵ, ਨ ਜਗ੍ਗਨਕਾਰਣਾ ਕਿਞ੍ਚਿ ਪੁਪ੍ਫਂ ਵਾ ਫਲਂ ਵਾ ਹੋਤਿ, ਤਸ੍ਮਿਂ ਕਾਲੇਤਿ ਅਤ੍ਥੋ. ‘‘ਬਹੁ’’ਨ੍ਤਿਆਦਿਨਾ ਵਾਰੇਤਬ੍ਬਾਕਾਰਂ ਦਸ੍ਸੇਤਿ.

ਫਾਤਿਕਮ੍ਮੇਨ ਜਗ੍ਗਨ੍ਤੋ ਨ ਅਤ੍ਥੀਤਿ ਯੋਜਨਾ. ਅਨਾਪੁਚ੍ਛਿਤ੍ਵਾਵਾਤਿ ਸਙ੍ਘਂ ਅਨਪਲੋਕੇਤ੍ਵਾਵ. ਇਤੀਤਿ ਏਵਂ.

ਞਤ੍ਤਿਕਮ੍ਮਟ੍ਠਾਨਭੇਦੇ ਪਨ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਓਸਾਰੇਤਿ ਸਙ੍ਘਮਜ੍ਝਂ ਪਵੇਸੇਤਿ ਇਮਾਯ ਞਤ੍ਤਿਯਾਤਿ ਓਸਾਰਣਾ.

ਨਿਸ੍ਸਾਰਿਯਤਿ ਸਙ੍ਘਤੋ ਬਹਿ ਕਰਿਯਤਿ ਇਮਾਯਾਤਿ ਨਿਸ੍ਸਾਰਣਾ. ਞਤ੍ਤਿ ਉਪੋਸਥੋ ਨਾਮਾਤਿ ਇਦਂ ਕਾਰਣੂਪਚਾਰਵਸੇਨ ਵੁਤ੍ਤਂ. ਤੇਨਾਹ ‘‘ਉਪੋਸਥਕਮ੍ਮਵਸੇਨ ਠਪਿਤਾ’’ਤਿ. ਏਸੇਵ ਨਯੋ ਞਤ੍ਤਿਪਵਾਰਣਾ ਨਾਮਾਤਿ ਏਤ੍ਥਾਪਿ.

ਅਨੁਸਾਸੇਯ੍ਯਾਤਿਆਦਿਨਾ ਪਠਮਪੁਰਿਸਏਯ੍ਯਵਿਭਤ੍ਤਿਵਸੇਨ ਠਪਿਤਾ ਞਤ੍ਤਿ ਅਤ੍ਤਨਾ ਪਰਂ ਸਮ੍ਮਨਿਤੁਂ ਠਪਿਤਾ ਞਤ੍ਤਿ ਨਾਮ. ਅਨੁਸਾਸੇਯ੍ਯਨ੍ਤਿਆਦਿਨਾ ਉਤ੍ਤਮਪੁਰਿਸਏਯ੍ਯਂਵਿਭਤ੍ਤਿਵਸੇਨ ਠਪਿਤਾ ਞਤ੍ਤਿ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨਿਤੁਂ ਠਪਿਤਾ ਞਤ੍ਤਿ ਨਾਮ. ਅਤ੍ਤਨਾਵ ਅਤ੍ਤਾ ਵਾ ਪਰੋ ਵਾ ਸਮ੍ਮਨਿਯਤਿ ਇਮਾਯ ਞਤ੍ਤਿਯਾਤਿ ਸਮ੍ਮੁਤਿ. ਨਿਸ੍ਸਟ੍ਠਪਤ੍ਤਚੀਵਰਾਦੀਨਿ ਦੀਯਨ੍ਤਿ ਅਨੇਨਾਤਿ ਦਾਨਂ, ਞਤ੍ਤਿ. ਵਚ੍ਚਂ ਅਨਪੇਕ੍ਖਿਤ੍ਵਾ ਵਾਚਕਸ੍ਸ ਨਿਯਤਨਪੁਂਸਕਲਿਙ੍ਗਤ੍ਤਾ ਨਪੁਂਸਕਲਿਙ੍ਗਵਸੇਨ ਵੁਤ੍ਤਂ.

ਆਪਤ੍ਤਿ ਪਟਿਗ੍ਗਣ੍ਹਿਯਤਿ ਅਨੇਨਾਤਿ ਪਟਿਗ੍ਗਹੋ.

ਪਟਿਮੁਖਂ ਉਪਰਿ ਕਡ੍ਢਿਯਤਿ ਇਮਾਯਾਤਿ ਪਚ੍ਚੁਕ੍ਕਡ੍ਢਨਾ.

ਕਮ੍ਮਮੇਵਾਤਿ ਲਕ੍ਖਿਯਤਿ ਅਨੇਨਾਤਿ ਕਮ੍ਮਲਕ੍ਖਣਂ.

‘‘ਤਥਾ’’ਤਿ ਪਦੇਨ ‘‘ਕਮ੍ਮਲਕ੍ਖਣਂ ਨਾਮਾ’’ਤਿ ਪਦਂ ਅਤਿਦਿਸਤਿ. ਤਤੋਤਿ ਸਬ੍ਬਸਙ੍ਗਾਹਿਕਞਤ੍ਤਿਤੋ. ਪਰਾ ਦ੍ਵੇ ਞਤ੍ਤਿਯੋ ਕਮ੍ਮਲਕ੍ਖਣਂ ਨਾਮਾਤਿ ਯੋਜਨਾ. ਇਤੀਤਿਆਦਿ ਨਿਗਮਨਂ.

ਞਤ੍ਤਿਦੁਤਿਯਕਮ੍ਮਟ੍ਠਾਨਭੇਦੇ ਓਸਾਰਣਾਦੀਨਂ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਵਡ੍ਢਸ੍ਸ ਲਿਚ੍ਛਵਿਨੋ’’ਤਿਆਦਿ. ਸੀਮਾਸਮ੍ਮੁਤਿ ਚਾਤਿਆਦਿਨਾ ਯੋਜਨਾ ਕਾਤਬ੍ਬਾ.

ਯਾ ਪਨ ਦ੍ਵੇ ਞਤ੍ਤਿਦੁਤਿਯਕਮ੍ਮਵਾਚਾ ਵੁਤ੍ਤਾਤਿ ਯੋਜਨਾ. ਇਤੀਤਿਆਦਿ ਨਿਗਮਨਂ.

ਞਤ੍ਤਿਚਤੁਤ੍ਥਕਮ੍ਮਟ੍ਠਾਨਭੇਦੇ ਯੋਜਨਾਨਯੋ ਪਾਕਟੋਯੇਵ.

੪੯੭. ਚਤੁਵਗ੍ਗਕਰਣੇ ਕਮ੍ਮੇਤਿਆਦਿਕਾਯ ਦੇਸਨਾਯ ਸਮ੍ਬਨ੍ਧਂ ਦਸ੍ਸੇਨ੍ਤੋ ਆਹ ‘‘ਇਤਿ ਕਮ੍ਮਾਨਿ ਚਾ’’ਤਿਆਦਿ. ਤਤ੍ਥ ਇਤੀਤਿ ਏਵਂ ਦਸ੍ਸੇਤ੍ਵਾਤਿ ਸਮ੍ਬਨ੍ਧੋ. ਤਸ੍ਸਤ੍ਥੋਤਿ ਤਸ੍ਸ ‘‘ਚਤੁਵਗ੍ਗਕਰਣੇ ਕਮ੍ਮੇ’’ਤਿਆਦਿਵਚਨਸ੍ਸ ਅਤ੍ਥੋ ਵੇਦਿਤਬ੍ਬੋਤਿ ਸਮ੍ਬਨ੍ਧੋ.

ਇਤਿ ਕਮ੍ਮਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.

ਅਤ੍ਥਵਸਵਗ੍ਗਾਦਿਵਣ੍ਣਨਾ

੪੯੮. ਏਵਂ ਕਮ੍ਮਵਗ੍ਗਵਣ੍ਣਨਂ ਦਸ੍ਸੇਤ੍ਵਾ ਤਸ੍ਸਾਨਨ੍ਤਰੇ ਵੁਤ੍ਤਾਯ ‘‘ਦ੍ਵੇ ਅਤ੍ਥਵਸੇ ਪਟਿਚ੍ਚਾ’’ਤਿਆਦਿਕਾਯ ਦੇਸਨਾਯ ਅਨੁਸਨ੍ਧਿਂ ਦਸ੍ਸੇਨ੍ਤੋ ਆਹ ‘‘ਇਦਾਨੀ’’ਤਿਆਦਿ, ਇਦਾਨਿ ਆਰਦ੍ਧਨ੍ਤਿ ਸਮ੍ਬਨ੍ਧੋ. ਯਾਨਿ ਤਾਨਿ ਸਿਕ੍ਖਾਪਦਾਨੀਤਿ ਯੋਜਨਾ. ਦਿਟ੍ਠਧਮ੍ਮਿਕਵੇਰਾਨਨ੍ਤਿ ਦਿਟ੍ਠਧਮ੍ਮੇ ਪਵਤ੍ਤਤ੍ਤਾ ਚ ਵਿਰਮਿਤਬ੍ਬਤ੍ਤਾ ਚ ਦਿਟ੍ਠਧਮ੍ਮਿਕਾਨਂ ਵੇਰਾਨਂ. ਸਂਵਰਾਯਾਤਿ ਏਤ੍ਥ ਸਂਪੁਬ੍ਬੋ ਵਰਧਾਤੁ ਪਿਦਹਨਤ੍ਥੋ, ਆਯਸਦ੍ਦੋ ਚ ਤਦਤ੍ਥੋਤਿ ਆਹ ‘‘ਪਿਦਹਨਤ੍ਥਾਯਾ’’ਤਿ. ਵਿਪਾਕਦੁਕ੍ਖਸਙ੍ਖਾਤਾਨਨ੍ਤਿ ਪਾਣਾਤਿਪਾਤਾਦੀਨਂ ਵਿਪਾਕਭੂਤਾਨਂ ਦੁਕ੍ਖਸਙ੍ਖਾਤਾਨਂ. ਸਮ੍ਪਰਾਯਿਕਾਨਨ੍ਤਿ ਸਮ੍ਪਰਾਯੇ ਪਵਤ੍ਤਾਨਂ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦਪਞ੍ਞਤ੍ਤਾਨਿਸਂਸਟ੍ਠਾਨੇ. ‘‘ਵਜ੍ਜਨੀਯਭਾਵਤੋ’’ਤਿ ਇਮਿਨਾ ਵਜ੍ਜੇਤਬ੍ਬਾਨੀਤਿ ਵਜ੍ਜਾਨੀਤਿ ਵਚਨਤ੍ਥਂ ਦਸ੍ਸੇਤਿ. ਭਾਯਨ੍ਤਿ ਏਤੇਹੀਤਿ ਭਯਾਨਿ. ਅਕ੍ਖਮਟ੍ਠੇਨਾਤਿ ਅਸਹਣੀਯਟ੍ਠੇਨ. ‘‘ਅਕੁਸਲਾਨੀਤਿ ਵੁਚ੍ਚਨ੍ਤੀ’’ਤਿ ਇਮਿਨਾ ਵਿਪਾਕਦੁਕ੍ਖਾਨਿ ਫਲੂਪਚਾਰੇਨ ਅਕੁਸਲਾਨਿ ਨਾਮਾਤਿ ਦਸ੍ਸੇਤਿ. ਗਣਬਨ੍ਧਭੇਦਨਤ੍ਥਾਯ ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਏਵਮੇਵ ਪਾਠੋ. ਪੋਤ੍ਥਕੇਸੁ ਪਨ ‘‘ਗਣਭੋਜਨਸਿਕ੍ਖਾਪਦਂ ਪਞ੍ਞਤ੍ਤ’’ਨ੍ਤਿ ਪਾਠੋ ਲਿਖਿਤੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਅਤ੍ਥਵਸਵਗ੍ਗੇ. ਯਨ੍ਤਿ ਵਚਨਂ. ਏਤ੍ਥਾਤਿ ਇਮਸ੍ਮਿਂ ਵਗ੍ਗੇ.

ਇਤਿ ਅਤ੍ਥਵਸਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.

੪੯੯. ਵਤ੍ਤੇਸੁ ਵਤ੍ਤਮਾਨੋ ਪੁਗ੍ਗਲੋ ਓਸਾਰੀਯਤਿ ਅਨੇਨਾਤਿ ਓਸਾਰਣੀਯਂ, ਕਮ੍ਮਂ. ਤੇਨ ਵੁਤ੍ਤਂ ‘‘ਯੇਨ ਕਮ੍ਮੇਨ ਓਸਾਰੀਯਤਿ, ਤਂ ਕਮ੍ਮਂ ਪਞ੍ਞਤ੍ਤ’’ਨ੍ਤਿ. ‘‘ਯੇਨ ਕਮ੍ਮੇਨਾ’’ਤਿਆਦਿਨਾ ਭਣ੍ਡਨਕਾਰਕਾਦਯੋ ਨਿਸ੍ਸਾਰੀਯਨ੍ਤਿ ਅਨੇਨ ਕਮ੍ਮੇਨਾਤਿ ਨਿਸ੍ਸਾਰਣੀਯਨ੍ਤਿ ਵਚਨਤ੍ਥਂ ਦਸ੍ਸੇਤਿ.

੫੦੦. ਸਤ੍ਤਾਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਂ ਨਾਮਾਤਿ ਸਮ੍ਬਨ੍ਧੋ. ਅਨ੍ਤਰਾਤਿ ਕਕੁਸਨ੍ਧਾਦੀਨਂ ਤਿਣ੍ਣਂ ਬੁਦ੍ਧਾਨਞ੍ਚ ਅਮ੍ਹਾਕਂ ਭਗਵਤੋ ਚ ਅਨ੍ਤਰੇ. ‘‘ਸਿਕ੍ਖਾਪਦੇ’’ਤਿ ਇਮਿਨਾ ‘‘ਅਪਞ੍ਞਤ੍ਤੇ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਮਕ੍ਕਟੀਵਤ੍ਥੁਆਦਿਵਿਨੀਤਕਥਾ ਅਨੁਪਞ੍ਞਤ੍ਤਂ ਨਾਮਾਤਿ ਸਮ੍ਬਨ੍ਧੋ. ‘‘ਸਿਕ੍ਖਾਪਦੇ’’ਤਿ ਇਮਿਨਾ ‘‘ਪਞ੍ਞਤ੍ਤੇ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਆਨਿਸਂਸਵਗ੍ਗੇ.

ਇਤਿ ਆਨਿਸਂਸਵਗ੍ਗਵਣ੍ਣਨਾਯ ਯੋਜਨਾ ਸਮਤ੍ਤਾ.

੫੦੧. ਸਬ੍ਬਸਿਕ੍ਖਾਪਦਾਨਂ ਸਙ੍ਗਹਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ‘‘ਨਵ ਸਙ੍ਗਹਾ’’ਤਿਆਦਿਪਾਠੇ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ‘‘ਵਤ੍ਥੁਨਾ ਸਙ੍ਗਹੋ’’ਤਿ ਇਮਿਨਾ ‘‘ਵਤ੍ਥੁਸ੍ਮਿਂ, ਵਤ੍ਥੂਨਂ ਸਙ੍ਗਹੋ’’ਤਿ ਅਤ੍ਥਂ ਨਿਵਾਰੇਤਿ. ਏਤ੍ਥਾਤਿ ‘‘ਵਤ੍ਥੁਸਙ੍ਗਹੋ’’ਤਿਆਦਿਪਾਠੇ. ਹੀਤਿ ਵਿਤ੍ਥਾਰੋ. ਯਸ੍ਮਾ ਨਤ੍ਥੀਤਿ ਸਮ੍ਬਨ੍ਧੋ. ਸਬ੍ਬਾਨੀਤਿ ਸਿਕ੍ਖਾਪਦਾਨਿ. ‘‘ਸਙ੍ਗਹਿਤਾਨੀ’’ਤਿ ਇਮਿਨਾ ਸਙ੍ਗਹਿਤਬ੍ਬੋਤਿ ਸਙ੍ਗਹੋਤਿ ਨਿਬ੍ਬਚਨਂ ਦਸ੍ਸੇਤਿ. ਏਵਂ ਤਾਵਾਤਿਆਦਿ ਨਿਗਮਨਂ.

ਯਸ੍ਮਾ ਪਨ ਸਙ੍ਗਹਿਤਾਤਿ ਸਮ੍ਬਨ੍ਧੋ.

ਏਵਮੇਤ੍ਥਾਤਿਆਦਿਨਾ ਖਨ੍ਧਸਮੁਟ੍ਠਾਨਅਧਿਕਰਣਸਮਥੇ ਸਮ੍ਪਿਣ੍ਡੇਤ੍ਵਾ ਨਿਗਮਨਂ ਦਸ੍ਸੇਤਿ. ਏਤ੍ਥਾਤਿ ਸਙ੍ਗਹਵਗ੍ਗੇ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਨਵਸਙ੍ਗਹਿਤਵਣ੍ਣਨਾਯ ਯੋਜਨਾ ਸਮਤ੍ਤਾ.

ਨਿਟ੍ਠਿਤਾਤਿ ਨਿਟ੍ਠਂ ਨਿਪ੍ਫਤ੍ਤਿਂ ਇਤਾ ਗਤਾਤਿ ਨਿਟ੍ਠਿਤਾ, ਅਥ ਵਾ ਨਿਟ੍ਠੇ ਨਿਪ੍ਫਤ੍ਤਿਯਂ ਇਤਾ ਠਿਤਾਤਿ ਨਿਟ੍ਠਿਤਾ. ਚਸਦ੍ਦੋ ਅਵਧਾਰਣਤ੍ਥੋ, ਨਿਟ੍ਠਿਤਾ ਏਵਾਤਿ ਹਿ ਅਤ੍ਥੋ. ਅਨੁਤ੍ਤਾਨਤ੍ਥਪਦਵਣ੍ਣਨਾਤਿ ਅਨੁਤ੍ਤਾਨਾਨਂ ਅਤ੍ਥਵਨ੍ਤਪਦਾਨਂ, ਅਤ੍ਥਾਨਞ੍ਚ ਪਦਾਨਞ੍ਚ ਵਣ੍ਣਨਾ.

ਇਤਿ ਪਰਿਵਾਰਵਣ੍ਣਨਾਯ ਯੋਜਨਾ ਸਮਤ੍ਤਾ.

ਨਿਟ੍ਠਿਤਾ ਚ ਪਾਚਿਤ੍ਯਾਦਿਵਣ੍ਣਨਾਯ ਯੋਜਨਾਤਿ.

ਜਾਦਿਲਞ੍ਛਿਤਨਾਮੇਨਨੇਕਾਨਂ ਵਾਚਿਤੋ ਮਯਾ;

ਪਰਿਵਾਰਵਿਨਯਸ੍ਸ, ਸਮਤ੍ਤੋ ਯੋਜਨਾਨਯੋ.

ਨਿਗਮਨਕਥਾਵਣ੍ਣਨਾ

ਏਵਂ ਵਿਨਯਸਂਵਣ੍ਣਨਂ ਕਤ੍ਵਾ ਇਦਾਨਿ ਤਂ ਨਿਗਮੇਨ੍ਤੋ ਆਹ ‘‘ਏਤ੍ਤਾਵਤਾ’’ਤਿਆਦਿ. ਤਤ੍ਥ ਏਤ੍ਤਾਵਤਾਤਿ ਏਤ੍ਤਕੇਨ ‘‘ਯੋ ਕਪ੍ਪਕੋਟੀਹਿਪਿ ਅਪ੍ਪਮੇਯ੍ਯ’’ਨ੍ਤਿਆਦਿਵਚਨਤੋ (ਪਾਰਾ. ਅਟ੍ਠ. ੧.ਗਨ੍ਥਾਰਮ੍ਭਕਥਾ) ਪਟ੍ਠਾਯ ‘‘ਨਵਸਙ੍ਗਹਿਤਵਗ੍ਗਵਣ੍ਣਨਾ ਨਿਟ੍ਠਿਤਾ’’ਤਿ ਵਚਨਪਰਿਯੋਸਾਨਾਨਂ ਅਕ੍ਖਰਪਦਬ੍ਯਞ੍ਜਨਾਨਂ ਸਮੁਦਾਯਭੂਤੇਨ ਵਚਨਕ੍ਕਮੇਨ, ਸਮਤ੍ਤਾਤਿ ਸਮ੍ਬਨ੍ਧੋ.

ਉਭਤੋਵਿਭਙ੍ਗਖਨ੍ਧਕਪਰਿਵਾਰਵਿਭਤ੍ਤਿਦੇਸਨਨ੍ਤਿ ਉਭਤੋਵਿਭਙ੍ਗੇਨ ਚ ਖਨ੍ਧਕੇਨ ਚ ਪਰਿਵਾਰੇਨ ਚ ਵਿਭਜਿਤਬ੍ਬਦੇਸਨਂ ਵਿਨਯਪਿਟਕਨ੍ਤਿ ਸਮ੍ਬਨ੍ਧੋ. ਨਾਥੋਤਿ ਭਿਕ੍ਖੁਭਿਕ੍ਖੁਨੀਨਂ ਹਿਤਪਟਿਪਤ੍ਤਿਂ ਯਾਚਨਟ੍ਠੇਨ ਚ ਕਿਲੇਸਾਨਂ ਉਪਤਾਪਨਟ੍ਠੇਨ ਚ ਵੇਨੇਯ੍ਯਾਨਂ ਹਿਤਸੁਖਂ ਆਸੀਸਨਟ੍ਠੇਨ ਚ ਚਿਤ੍ਤਿਸ੍ਸਰਿਯਟ੍ਠੇਨ ਚ ਨਾਥੋ. ਵੇਨੇਯ੍ਯਨ੍ਤਿ ਵਿਨੇਤਬ੍ਬਟ੍ਠੇਨ ਵੇਨੇਯ੍ਯਂ. ਜਿਨੋਤਿ ਪਞ੍ਚਮਾਰਾਨਂ ਜਿਤਟ੍ਠੇਨ ਜਿਨੋ. ਅਯਂ ਪਨੇਤ੍ਥ ਯੋਜਨਾ – ਨਾਥੋ ਵੇਨੇਯ੍ਯਂ ਵਿਨੇਨ੍ਤੋ ਜਿਨੋ ਉਭਤੋਵਿਭਙ੍ਗਖਨ੍ਧਕਪਰਿਵਾਰਵਿਭਤ੍ਤਿਦੇਸਨਂ ਯਂ ਵਿਨਯਪਿਟਕਂ ਆਹਾਤਿ.

ਸਮਧਿਕਸਤ੍ਤਵੀਸਤਿਸਹਸ੍ਸਮਤ੍ਤੇਨਾਤਿ ਸਹ ਅਧਿਕੇਨ ਸਤ੍ਤਸਹਸ੍ਸਪ੍ਪਮਾਣੇਨ ਚ ਵੀਸਤਿਸਹਸ੍ਸਪ੍ਪਮਾਣੇਨ ਚ ਗਨ੍ਥੇਨਾਤਿ ਸਮ੍ਬਨ੍ਧੋ. ਤਸ੍ਸਾਤਿ ਵਿਨਯਪਿਟਕਸ੍ਸ. ਸਮਨ੍ਤਪਾਸਾਦਿਕਾਤਿ ਸਮਨ੍ਤਤੋ ਪਸਾਦਂ ਵਹਿਕਾ, ਜਨਿਕਾ ਵਾ. ਤਤ੍ਰਾਯਂ ਯੋਜਨਾ – ਤਸ੍ਸ ਸਮਧਿਕਸਤ੍ਤਵੀਸਤਿਸਹਸ੍ਸਮਤ੍ਤੇਨ ਗਨ੍ਥੇਨ ਸਮਨ੍ਤਪਾਸਾਦਿਕਾ ਨਾਮ ਸਂਵਣ੍ਣਨਾ ਸਮਤ੍ਤਾਤਿ.

ਤਤ੍ਰਿਦਨ੍ਤਿ ਤਤ੍ਰ ਇਦਂ. ‘‘ਤਤ੍ਰਾ’’ਤਿ ਪਦਂ ਪੁਰਿਮਵਚਨਾਪੇਕ੍ਖਂ. ਤਤ੍ਰ ‘‘ਸਮਨ੍ਤਪਾਸਾਦਿਕਾ ਨਾਮਾ’’ਤਿ ਵਚਨੇਤਿ ਹਿ ਅਤ੍ਥੋ. ਸਮਨ੍ਤਪਾਸਾਦਿਕਤ੍ਤਸ੍ਮਿਨ੍ਤਿ ਪਚ੍ਚਤ੍ਤਤ੍ਥੇ ਚੇਤਂ ਭੁਮ੍ਮਵਚਨਂ ਹੋਤਿ ‘‘ਇਦਮ੍ਪਿ ਸੀਲਸ੍ਮਿ’’ਨ੍ਤਿਆਦੀਸੁ (ਦੀ. ਨਿ. ੧.੧੯੪ ਆਦਯੋ) ਵਿਯ, ਸਮਨ੍ਤਪਾਸਾਦਿਕਤ੍ਤਨ੍ਤਿ ਅਤ੍ਥੋ. ਅਯਂ ਪਨੇਤ੍ਥ ਯੋਜਨਾਤਤ੍ਰ ‘‘ਸਮਨ੍ਤਪਾਸਾਦਿਕਾ ਨਾਮਾ’’ਤਿ ਵਚਨੇ ਸਮਨ੍ਤਪਾਸਾਦਿਕਾਯ ਇਦਂ ਸਮਨ੍ਤਪਾਸਾਦਿਕਤ੍ਤਂ ਹੋਤੀਤਿ ਅਯਂ ਸਮਨ੍ਤਪਾਸਾਦਿਕਭਾਵੋਤਿ ਅਤ੍ਥੋ.

ਆਚਰਿਯਪਰਂਪਰਤੋਤਿਆਦੀਸੁ ਗਾਥਾਸੁ ਵੁਤ੍ਤਂ ਨਵਵਿਧਂ ਵਿਸੇਸਨਪਦਂ ‘‘ਨ ਦਿਸ੍ਸਤੀ’’ਤਿ ਪਦੇਨ ਸਮ੍ਬਨ੍ਧਿਤਬ੍ਬਂ. ਸਮ੍ਪਸ੍ਸਤਨ੍ਤਿ ਸਮ੍ਮਾ ਪਸ੍ਸਨ੍ਤਾਨਂ ਵਿਞ੍ਞੂਨਨ੍ਤਿ ਸਮ੍ਬਨ੍ਧੋ. ਯਤੋਤਿ ਯਸ੍ਮਾ, ਨ ਦਿਸ੍ਸਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਸਂਵਣ੍ਣਨਾਯਂ. ਸਮਨ੍ਤਪਾਸਾਦਿਕਾਤ੍ਵੇਵਾਤਿ ਸਮਨ੍ਤਪਾਸਾਦਿਕਾ ਇਤਿ ਏਵ ਨਾਮ. ਵਿਨਯਸ੍ਸਾਤਿ ਵਿਨਯਪਿਟਕਸ੍ਸ. ਵਿਨੇਯ੍ਯਦਮਨਕੁਸਲੇਨਾਤਿ ਵਿਨੇਯ੍ਯਾਨਂ ਦਮਨੇ ਛੇਕੇਨ. ਲੋਕਨਾਥੇਨਾਤਿ ਲੋਕਾਨਂ ਨਾਥੇਨ. ਲੋਕਮਨੁਕਮ੍ਪਮਾਨੇਨਾਤਿ ਲੋਕਂ ਅਨੁਕਮ੍ਪਮਾਨੇਨ. ਅਯਞ੍ਹੇਤ੍ਥ ਯੋਜਨਾ – ਆਚਰਿਯਪਰਂਪਰਤੋ…ਪੇ… ਵਿਭਙ੍ਗਨਯਭੇਦਦਸ੍ਸਨਤੋ ਸਮ੍ਪਸ੍ਸਤਂ ਵਿਞ੍ਞੂਨਂ ਏਤ੍ਥ ਕਿਞ੍ਚਿ ਅਪਾਸਾਦਿਕਂ ਯਤੋ ਨ ਦਿਸ੍ਸਤਿ, ਤਸ੍ਮਾ ਵਿਨੇਯ੍ਯਦਮਨਕੁਸਲੇਨ ਲੋਕਨਾਥੇਨ ਲੋਕਮਨੁਕਮ੍ਪਮਾਨੇਨ ਭਗਵਤਾ ਵੁਤ੍ਤਸ੍ਸ ਵਿਨਯਸ੍ਸ ਅਯਂ ਸਮਨ੍ਤਪਾਸਾਦਿਕਾਤ੍ਵੇਵ ਸਂਵਣ੍ਣਨਾ ਪਵਤ੍ਤਾਤਿ.

ਤਿਸ੍ਸੋਪਿ ਇਮਾ ਸੀਹਲ਼ਟ੍ਠਕਥਾਯੋ ਸੁਤ੍ਵਾਤਿ ਸਮ੍ਬਨ੍ਧੋ. ਕਸ੍ਸ ਸਨ੍ਤਿਕੇ ਸੁਤਨ੍ਤਿ ਆਹ ‘‘ਬੁਦ੍ਧਮਿਤ੍ਤੋ…ਪੇ… ਸਨ੍ਤਿਕੇ’’ਤਿ. ‘‘ਬੁਦ੍ਧਮਿਤ੍ਤੋ’’ਤਿ ਨਾਮੇਨ ਵਿਸ੍ਸੁਤਸ੍ਸ ਯਸਸ੍ਸਿਨੋ ਵਿਨਯਞ੍ਞੁਸ੍ਸ ਧੀਰਸ੍ਸ ਥੇਰਸ੍ਸ ਸਨ੍ਤਿਕੇ ਸੁਤ੍ਵਾਤਿ ਯੋਜਨਾ. ‘‘ਸੁਤ੍ਵਾ’’ਤਿ ਪਦਂ ‘‘ਆਰਦ੍ਧਾ’’ਤਿ ਪਦੇ ਪੁਬ੍ਬਕਾਲਕਿਰਿਯਾਵਿਸੇਸਨਂ.

ਮਹਾਮੇਘਵਨੁਯ੍ਯਾਨੇ ਭੂਮਿਭਾਗੇ ਪਤਿਟ੍ਠਿਤੋ ਸਤ੍ਥੁ ਮਹਾਬੋਧਿਵਿਭੂਸਿਤੋ ਯੋ ਮਹਾਵਿਹਾਰੋ ਅਤ੍ਥੀਤਿ ਯੋਜਨਾ.

ਤਸ੍ਸ ਮਹਾਵਿਹਾਰਸ੍ਸ ਦਕ੍ਖਿਣੇ ਦਿਸਾਭਾਗੇ ਪਧਾਨਘਰਂ ਪਧਾਨਘਰਨਾਮਕਂ ਉਤ੍ਤਮਂ ਸੁਚਿਚਾਰਿਤ੍ਤਸੀਲੇਨ ਭਿਕ੍ਖੁਸਙ੍ਘੇਨ ਸੇਵਿਤਂ ਯਂ ਪਰਿਵੇਣਂ ਅਤ੍ਥਿ, ਤਤ੍ਥ ਕਾਰਯੀਤਿ ਯੋਜਨਾ.

ਕੋਨਾਮੋ ਕਾਰਯੀਤਿ ਆਹ ‘‘ਉਲ਼ਾਰਕੁਲਸਮ੍ਭੂਤੋ…ਪੇ… ਵਿਸ੍ਸੁਤੋ’’ਤਿ. ਤਤ੍ਥ ਉਲ਼ਾਰਕੁਲਸਮ੍ਭੂਤੋ ਸਙ੍ਘੁਪਟ੍ਠਾਯਕੋ ਸਦਾ ਅਨਾਕੁਲਾਯ ਸਦ੍ਧਾਯ ਰਤਨਤ੍ਤਯੇ ਪਸਨ੍ਨੋ ‘‘ਮਹਾਨਿਗਮਸਾਮੀ’’ਤਿ ਵਿਸ੍ਸੁਤੋ ਉਪਾਸਕੋ ਕਾਰਯੀਤਿ ਸਮ੍ਬਨ੍ਧੋ.

ਕਂ ਕਾਰਯੀਤਿ ਆਹ ‘‘ਚਾਰੁ…ਪੇ… ਸਮ੍ਪਨ੍ਨਸਲਿਲਾਸਯ’’ਨ੍ਤਿ. ਤਤ੍ਥ ਚਾਰੁਪਾਕਾਰਸਂਚਿਤਂ ਸੋਭੇਨ ਪਾਕਾਰੇਨ ਸੁਟ੍ਠੁ ਚਿਤਂ ਚਿਨਿਤਂ ਮਨੋਰਮਂ ਸੀਤਚ੍ਛਾਯਤਰੂਪੇਤਂ ਸੀਤਚ੍ਛਾਯੇਨ ਰੁਕ੍ਖੇਨ ਉਪੇਤਂ ਸਮ੍ਪਨ੍ਨਸਲਿਲਾਸਯਂ ਮਧੁਰਜਲਾਧਾਰਂ ਯਂ ਪਾਸਾਦਂ ਕਾਰਯੀਤਿ ਯੋਜਨਾ. ਮਹਾਨਿਗਮਸਾਮਿਨੋ ਤਤ੍ਰ ਪਾਸਾਦੇ ਵਸਤਾਮਯਾਤਿ ਸਮ੍ਬਨ੍ਧੋ.

ਕਂ ਉਦ੍ਦਿਸਿਤ੍ਵਾ ਕੀਦਿਸਾ ਕਾ ਆਰਦ੍ਧਾਤਿ ਆਹ ‘‘ਸੁਚਿਸੀਲਸਮਾਚਾਰਂ…ਪੇ… ਵਿਨਯਵਣ੍ਣਨਾ’’ਤਿ. ਤਤ੍ਥ ਸੁਚਿਸੀਲਸਮਾਚਾਰਂ ਬੁਦ੍ਧਸਿਰਿਵ੍ਹਯਂ ਥੇਰਂ ਉਦ੍ਦਿਸਿਤ੍ਵਾ ਇਦ੍ਧਾ ਅਤ੍ਥਵਿਨਿਚ੍ਛਯਾਦੀਹਿ ਪਰਿਪੁਣ੍ਣਾ ਯਾ ਵਿਨਯਵਣ੍ਣਨਾ ਆਰਦ੍ਧਾਤਿ ਯੋਜਨਾ.

ਕਿਂਨਾਮਸ੍ਸ ਰਞ੍ਞੋ ਕਤਮੇ ਸਂਵਚ੍ਛਰੇ ਆਰਦ੍ਧਾ, ਕਿਸ੍ਮਿਂ ਕਾਲੇ ਪਰਿਨਿਟ੍ਠਿਤਾਤਿ ਆਹ ‘‘ਪਾਲਯਨ੍ਤਸ੍ਸ…ਪੇ… ਪਰਿਨਿਟ੍ਠਿਤਾ’’ਤਿ. ਤਤ੍ਥ ਸਕਲਂ ਲਙ੍ਕਾਦੀਪਂ ਨਿਰਬ੍ਬੁਦਂ ਕਤ੍ਵਾਤਿ ਸਮ੍ਬਨ੍ਧੋ. ਪਾਲਯਨ੍ਤਸ੍ਸ ਸਿਰਿਨਿਵਾਸਸ੍ਸ ਸਿਰਿਪਾਲਯਸਸ੍ਸਿਨੋ ਰਞ੍ਞੋ ਜਯਸਂਵਚ੍ਛਰੇਤਿ ਸਮ੍ਬਨ੍ਧੋ. ਸਮਵੀਸਤਿਮੇ ਖੇਮੇ ਜਯਸਂਵਚ੍ਛਰੇ ਅਯਂ ਵਿਨਯਸਂਵਣ੍ਣਨਾ ਆਰਦ੍ਧਾ, ਏਕਵੀਸਮ੍ਹਿ ਰਞ੍ਞੋ ਏਕਵੀਸਤਿਮੇ ਸਂਵਚ੍ਛਰੇ ਸਮ੍ਪਤ੍ਤੇ ਸਤਿ ਪਰਿਨਿਟ੍ਠਿਤਾਤਿ ਯੋਜਨਾ.

ਯਥਾ ਅਤ੍ਤਨੋ ਸਂਵਣ੍ਣਨਾ ਨਿਰੁਪਦ੍ਦਵਾ ਸੀਘਂ ਨਿਟ੍ਠਂ ਉਪਗਤਾ, ਏਵਂ ਲੋਕਸ੍ਸ ਧਮ੍ਮੂਪਸਂਹਿਤਾ ਸੀਘਂ ਗਚ੍ਛਨ੍ਤੂਤਿ ਆਸੀਸਂ ਦਸ੍ਸੇਨ੍ਤੋ ਆਹ ‘‘ਉਪਦ੍ਦਵਾਕੁਲੇ’’ਤਿਆਦਿ. ਤਤ੍ਥ ਉਪਦ੍ਦਵਾਕੁਲੇ ਉਪਦ੍ਦਵੇਹਿ ਆਕੁਲੇ ਲੋਕੇ ਸਤ੍ਤਲੋਕੇ ਨਿਰੁਪਦ੍ਦਵਤੋ ਉਪਦ੍ਦਵਵਿਰਹਤੋ ਯਥਾ ਅਯਂ ਵਿਨਯਸਂਵਣ੍ਣਨਾ ਏਕਸਂਵਚ੍ਛਰੇਨੇਵ ਨਿਟ੍ਠਂ ਉਪਾਗਤਾ, ਏਵਂ ਸਬ੍ਬਸ੍ਸ ਲੋਕਸ੍ਸ ਆਰਦ੍ਧਾ ਸਬ੍ਬੇਪਿ ਧਮ੍ਮੂਪਸਂਹਿਤਾ ਅਤ੍ਥਾ ਨਿਰੁਪਦ੍ਦਵਾ ਸੀਘਂ ਨਿਟ੍ਠਂ ਗਚ੍ਛਨ੍ਤੂਤਿ ਯੋਜਨਾ.

ਅਤ੍ਤਨਾ ਸਮਾਚਿਤਸ੍ਸ ਪੁਞ੍ਞਸ੍ਸ ਇਚ੍ਛਿਤਤ੍ਥੇ ਪਰਿਣਾਮਨਂ ਦਸ੍ਸੇਨ੍ਤੋ ਆਹ ‘‘ਚਿਰਟ੍ਠਿਤਤ੍ਥਂ ਧਮ੍ਮਸ੍ਸਾ’’ਤਿਆਦਿ. ਤਤ੍ਥ ਧਮ੍ਮਸ੍ਸ ਚਿਰਟ੍ਠਿਤਤ੍ਥਂ ਇਮਂ ਵਿਨਯਸਂਵਣ੍ਣਨਂ ਕਰੋਨ੍ਤੇਨ ਸਦ੍ਧਮ੍ਮਬਹੁਮਾਨੇਨ ਮਯਾ ਯਞ੍ਚ ਪੁਞ੍ਞਂ ਸਮਾਚਿਤਂ, ਸਬ੍ਬਸ੍ਸ ਤਸ੍ਸ ਪੁਞ੍ਞਸ੍ਸ ਆਨੁਭਾਵੇਨ ਸਬ੍ਬੇਪਿ ਪਾਣਿਨੋ ਧਮ੍ਮਰਾਜਸ੍ਸ ਭਗਵਤੋ ਸਦ੍ਧਮ੍ਮਰਸਸੇਵਿਨੋ ਭਵਨ੍ਤੁ.

ਸਦ੍ਧਮ੍ਮੋ ਚਿਰਂ ਤਿਟ੍ਠਤੁ, ਦੇਵੋ ਕਾਲੇ ਵਸ੍ਸਂ ਵਸ੍ਸਨ੍ਤੋ ਚਿਰਂ ਪਜਂ ਸਤ੍ਤਸਮੂਹਂ ਤਪ੍ਪੇਤੁ. ਰਾਜਾ ਧਮ੍ਮੇਨ ਮੇਦਨਿਂ ਰਕ੍ਖਤੂਤਿ ਯੋਜਨਾ. ਇਤਿਸਦ੍ਦੋ ਪਰਿਸਮਾਪਨਤ੍ਥੋ. ਇਤਿ ਪਰਿਨਿਟ੍ਠਂ ਸੁਟ੍ਠੁ ਆਪਨਂ ਦਟ੍ਠਬ੍ਬਨ੍ਤੀਤਿ ਅਤ੍ਥੋ.

ਸਦ੍ਧਾ ਚ ਬੁਦ੍ਧਿ ਚ ਵੀਰਿਯਞ੍ਚ ਸਦ੍ਧਾਬੁਦ੍ਧਿਵੀਰਿਯਾਨਿ, ਵਿਸੁਦ੍ਧਾਨਿ ਚ ਤਾਨਿ ਸਦ੍ਧਾਬੁਦ੍ਧਿਵੀਰਿਯਾਨਿ ਚੇਤਿ ਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਾਨਿ, ਪਰਮਾਨਿ ਚ ਤਾਨਿ ਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਾਨਿ ਚੇਤਿ ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਾਨਿ, ਤੇਹਿ ਪਰਿਮਣ੍ਡਿਤੋ ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਪਟਿਮਣ੍ਡਿਤੋ, ਤੇਨ, ਥੇਰੇਨਾਤਿ ਸਮ੍ਬਨ੍ਧੋ. ਸੀਲਞ੍ਚ ਆਚਾਰੋ ਚ ਅਜ੍ਜਵਞ੍ਚ ਮਦ੍ਦਵਞ੍ਚ ਸੀਲਾਚਾਰਜ੍ਜਵਮਦ੍ਦਵਾਨਿ, ਤਾਨਿ ਆਦੀਨਿ ਯੇਸਂ ਤੇਤਿ ਸੀਲਾਚਾਰਜ੍ਜਵਮਦ੍ਦਵਾਦਯੋ, ਆਦਿਸਦ੍ਦੇਨ ਖਨ੍ਤਿਸੋਰਚ੍ਚਾਦਯੋ ਸਙ੍ਗਣ੍ਹਾਤਿ, ਤੇਯੇਵ ਗੁਣਾਤਿ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਾ, ਤੇਸਂ ਸਮੁਦਯੋਤਿ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯੋ, ਤੇਨ ਸਮੁਦਿਤੋ ਸੁਟ੍ਠੁ ਪਾਕਟੋਤਿ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯਸਮੁਦਿਤੋ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ.

ਸਕਸਮਯੋ ਚ ਸਮਯਨ੍ਤਰੋ ਚ ਸਕਸਮਯਸਮਯਨ੍ਤਰਾ, ਤੇਯੇਵ ਪਨ ਗਹਨਸਦਿਸਤ੍ਤਾ ਗਹਨਨ੍ਤਿ ਸਕਸਮਯਸਮਯਨ੍ਤਰਗਹਨਂ, ਤਸ੍ਸ ਅਜ੍ਝੋਗਾਹਣਂ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਣਂ, ਤਸ੍ਮਿਂ ਸਮਤ੍ਥੋ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਣਸਮਤ੍ਥੋ. ਤੇਨ ਥੇਰੇਨਾਤਿ ਸਮ੍ਬਨ੍ਧੋ. ਵਿਸੇਸੇਨ ਅਞ੍ਜਤਿ ਪਾਕਟਂ ਕਰੋਤੀਤਿ ਵਿਯਤ੍ਤੋ, ਪੁਗ੍ਗਲੋ, ਵਿਯਤ੍ਤਸ੍ਸ ਇਦਂ ਵੇਯ੍ਯਤ੍ਤਿਯਂ, ਸਤਿ. ਪਞ੍ਞਾ ਚ ਵੇਯ੍ਯਤ੍ਤਿਯਞ੍ਚ ਪਞ੍ਞਾਵੇਯ੍ਯਤ੍ਤਿਯਂ, ਤੇਨ ਸਮਨ੍ਨਾਗਤੇਨਾਤਿ ਸਮ੍ਬਨ੍ਧੋ. ਸਮਨ੍ਨਾਗਤੇਨ ਥੇਰੇਨਾਤਿ ਯੋਜਨਾ.

ਤੀਣਿ ਪਿਟਕਾਨੀਤਿ ਤਿਪਿਟਕਂ, ਤਮੇਵ ਪਰਿਯਾਪੁਣਿਤਬ੍ਬਤ੍ਤਾ ਪਰਿਯਤ੍ਤੀਤਿ ਤਿਪਿਟਕਪਰਿਯਤ੍ਤਿ, ਤਸ੍ਸ ਪਭੇਦੋ ਏਤ੍ਥ ਸਤ੍ਥੁਸਾਸਨੇਤਿ ਤਿਪਿਟਕਪਰਿਯਤ੍ਤਿਪਭੇਦਂ, ਤਸ੍ਮਿਂ. ਸਹ ਅਟ੍ਠਕਥਾਯਾਤਿ ਸਾਟ੍ਠਕਥਂ, ਸਤ੍ਥੁ ਸਾਸਨਂ, ਤਸ੍ਮਿਂ ਸਤ੍ਥੁਸਾਸਨੇਤਿ ਸਮ੍ਬਨ੍ਧੋ. ਸਤ੍ਥੁਨੋ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਂ ਸਾਸਨਂ ਸਤ੍ਥੁਸਾਸਨਂ, ਬ੍ਯਾਸੋਪਿ ਯੁਜ੍ਜਤੇਵ, ਤਸ੍ਮਿਂ ਸਤ੍ਥੁਸਾਸਨੇ ‘‘ਅਪ੍ਪਟਿਹਤ’’ਇਤਿ ਪਦੇਨ ਸਮ੍ਬਨ੍ਧਿਤਬ੍ਬਂ. ਅਪ੍ਪਟਿਹਤਂ ਞਾਣਂ ਅਪ੍ਪਟਿਹਤਞਾਣਂ, ਇਦਂ ਤਸ੍ਮਿਂ ਵਿਨਯਸਂਵਣ੍ਣਨਾਕਾਲੇ ਥੇਰਸ੍ਸ ਪਟਿਵੇਧਞਾਣਾਭਾਵਤੋ ਸੁਤਮਯਚਿਨ੍ਤਾਮਯਞਾਣਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਅਪ੍ਪਟਿਹਤਞਾਣਸ੍ਸ ਪਭਾਵੋ ਏਤਸ੍ਸਾਤਿ ਅਪ੍ਪਟਿਹਤਞਾਣਪਭਾਵੋ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ. ਮਹਨ੍ਤਂ ਵੇਯ੍ਯਾਕਰਣਮੇਤਸ੍ਸਾਤਿ ਮਹਾਵੇਯ੍ਯਾਕਰਣੋ, ਇਮਿਨਾ ਸਿਕ੍ਖਾਨਿਰੁਤ੍ਤਿਆਦੀਹਿ ਛਲ਼ਙ੍ਗੇ ਮਹਨ੍ਤਵੇਯ੍ਯਾਕਰਣੇ ਥੇਰਸ੍ਸ ਅਪ੍ਪਟਿਹਤਞਾਣਪਭਾਵਤਂ ਦਸ੍ਸੇਤਿ, ਤੇਨ ਮਹਾਵੇਯ੍ਯਾਕਰਣੇਨ ਥੇਰੇਨਾਤਿ ਸਮ੍ਬਨ੍ਧੋ.

ਕਰਣਂ ਵੁਚ੍ਚਤਿ ਠਾਨਂ ਕਰਿਯਤਿ ਉਚ੍ਚਾਰਿਯਤਿ ਏਤ੍ਥ, ਏਤੇਨਾਤਿ ਵਾ ਵਚਨਤ੍ਥੇਨ, ਕਰਣਸ੍ਸ ਸਮ੍ਪਤ੍ਤਿ ਕਰਣਸਮ੍ਪਤ੍ਤਿ, ਤਾਯ ਜਨਿਤਂ ਕਰਣਸਮ੍ਪਤ੍ਤਿਜਨਿਤਂ. ਸੁਖੇਨ ਥੇਰਮੁਖਤੋ ਵਿਨਿਗ੍ਗਤਂ ਸੁਖਵਿਨਿਗ੍ਗਤਂ, ਕਰਣਸਮ੍ਪਤ੍ਤਿਜਨਿਤੇਨ ਹੇਤੁਭੂਤੇਨ ਸੁਖਵਿਨਿਗ੍ਗਤਂ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਂ. ਮਧੁਰਵਚਨਞ੍ਚ ਉਦਾਰਵਚਨਞ੍ਚ ਮਧੁਰੋਦਾਰਵਚਨਂ, ਪੁਬ੍ਬਪਦੇ ਉਤ੍ਤਰਪਦਲੋਪੋ, ਇਮਿਨਾ ਕੇਟੁਭਪਕਰਣੇ (ਸੁਬੋਧਾਲਂਕਾਰੇ ੧੨੭-੧੪੨ ਗਾਥਾਸੁ) ਵੁਤ੍ਤੇਸੁ ਦਸਸੁ ਸਦ੍ਦਗੁਣੇਸੁ ਮਧੁਰਤਾਗੁਣੇਨ ਚ ਉਦਾਰਤਾਗੁਣੇਨ ਚ ਸਮਨ੍ਨਾਗਤਭਾਵਂ ਦਸ੍ਸੇਤਿ. ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਞ੍ਚ ਤਂ ਮਧੁਰੋਦਾਰਵਚਨਞ੍ਚੇਤਿ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਂ. ਅਥ ਵਾ ਕਰਣਸਮ੍ਪਤ੍ਤਿਜਨਿਤਞ੍ਚ ਤਂ ਸੁਖਵਿਨਿਗ੍ਗਤਮਧੁਰੋਦਾਰਵਚਨਞ੍ਚੇਤਿ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਂ. ਏਲਂ ਵੁਚ੍ਚਤਿ ਦੁਰੁਤ੍ਤਦੋਸੋ, ਨਤ੍ਥਿ ਏਲਮੇਤਸ੍ਸਾਤਿ ਨੇਲਾ, ਸੋਯੇਵ ਵਣ੍ਣੋ ਨੇਲਵਣ੍ਣੋ, ਤੇਨ ਯੁਤ੍ਤਂ ਨੇਲਵਣ੍ਣਯੁਤ੍ਤਂ, ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਂ ਨੇਲਵਣ੍ਣਯੁਤ੍ਤਮੇਤਸ੍ਸਾਤਿ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਨੇਲਵਣ੍ਣਯੁਤ੍ਤੋ, ਥੇਰੋ. ਵਿਸੇਸਨਪਰਪਦਸਮਾਸੋ, ਨੇਲਵਣ੍ਣਯੁਤ੍ਤਕਰਣਸਮ੍ਪਤ੍ਤਿ ਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨੋਤਿ ਹਿ ਅਤ੍ਥੋ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ. ਯੁਤ੍ਤਞ੍ਚ ਪਰਿਸਾਯ ਸੋਤੇਨ ਅਨੁਰੂਪਤ੍ਤਾ, ਮੁਤ੍ਤਞ੍ਚ ਪਰਿਸਾਯ ਵਿਸਾਰਦਤ੍ਤਾਤਿ ਯੁਤ੍ਤਮੁਤ੍ਤਂ, ਵਚਨਂ, ਤਂ ਵਦਤਿ ਸੀਲੇਨਾਤਿ ਯੁਤ੍ਤਮੁਤ੍ਤਵਾਦੀ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ.

ਕਮ੍ਮਸਸ੍ਸਤਉਚ੍ਛੇਦਇਸ੍ਸਰਨਿਮ੍ਮਾਨਾਦਿਵਸੇਨ ਨਾਨਾ ਵਾਦਾ ਏਤੇਸਨ੍ਤਿ ਵਾਦਿਨੋ, ਨਾਨਾਵਾਦਾ ਜਨਾ, ਵਾਦੀਨਂ, ਵਾਦੀਸੁ ਵਾ ਵਰੋ ਕਮ੍ਮਕਿਰਿਯਵਾਦਤ੍ਤਾਤਿ ਵਾਦਿਵਰੋ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ. ਪਾਲ਼ਿਯਾ ਅਤ੍ਥਂ ਵਣ੍ਣੇਤੁਂ ਸਮਤ੍ਥਤ੍ਤਾ ਮਹਨ੍ਤੋ ਕਵਿ ਮਹਾਕਵਿ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ.

ਅਤ੍ਥਧਮ੍ਮਨਿਰੁਤ੍ਤਿਪਟਿਭਾਨਵਸੇਨ ਪਭਿਨ੍ਨਾਯ ਪਟਿਸਮ੍ਭਿਦਾਯ ਪਰਿਵਾਰਿਤੋਤਿ ਪਭਿਨ੍ਨਪਟਿਸਮ੍ਭਿਦਾਪਰਿਵਾਰੋ, ਤਸ੍ਮਿਂ ਉਤ੍ਤਰਿਮਨੁਸ੍ਸਧਮ੍ਮੇਤਿ ਸਮ੍ਬਨ੍ਧੋ. ਛ ਅਭਿਞ੍ਞਾ ਚ ਪਟਿਸਮ੍ਭਿਦਾ ਚ ਛਲ਼ਭਿਞ੍ਞਾਪਟਿਸਮ੍ਭਿਦਾ, ਤਾ ਆਦਯੋ ਯੇਸਂ ਤੇਤਿ ਛਲ਼ਭਿਞ੍ਞਾਪਟਿਸਮ੍ਭਿਦਾਦਯੋ, ਆਦਿਸਦ੍ਦੇਨ ਤੇਵਿਜ੍ਜਾਦਯੋ ਸਙ੍ਗਣ੍ਹਾਤਿ. ਛਲ਼ਭਿਞ੍ਞਾਪਟਿਸਮ੍ਭਿਦਾਦਯੋ ਪਭੇਦਾ ਏਤਸ੍ਸਾਤਿ ਛਲ਼ਭਿਞ੍ਞਾਪਟਿਸਮ੍ਭਿਦਾਦਿਪ੍ਪਭੇਦੋ, ਸੋਯੇਵ ਗੁਣੋ ਛਲ਼ਭਿਞ੍ਞਾਪਟਿਸਮ੍ਭਿਦਾਦਿਪ੍ਪਭੇਦਗੁਣੋ, ਤੇਨ ਪਟਿਮਣ੍ਡਿਤੋ ਛਲ਼ਭਿਞ੍ਞਾਪਟਿਸਮ੍ਭਿਦਾਦਿਪ੍ਪਭੇਦਗੁਣਪਟਿਮਣ੍ਡਿਤੋ, ਤਸ੍ਮਿਂ ਉਤ੍ਤਰਿਮਨੁਸ੍ਸਧਮ੍ਮੇਤਿ ਸਮ੍ਬਨ੍ਧੋ. ਉਤ੍ਤਰਿਮਨੁਸ੍ਸਾਨਂ ਝਾਨਲਾਭਿਆਦੀਨਂ ਧਮ੍ਮੋ ਉਤ੍ਤਰਿਮਨੁਸ੍ਸਧਮ੍ਮੋ, ਅਥ ਵਾ ਮਨੁਸ੍ਸਾਨਂ ਕੁਸਲਕਮ੍ਮਪਥਸਙ੍ਖਾਤਧਮ੍ਮਤੋ ਉਤ੍ਤਰੀਤਿ ਉਤ੍ਤਰਿਮਨੁਸ੍ਸਧਮ੍ਮੋ, ਝਾਨਾਦਿਧਮ੍ਮੋ, ਤਸ੍ਮਿਂ, ‘‘ਸੁਪ੍ਪਤਿਟ੍ਠਿਤ’’ ਇਤਿ ਪਦੇਨ ਸਮ੍ਬਨ੍ਧਿਤਬ੍ਬਂ. ਸੁਪ੍ਪਤਿਟ੍ਠਿਤਾ ਬੁਦ੍ਧਿ ਏਤੇਸਨ੍ਤਿ ਸੁਪ੍ਪਤਿਟ੍ਠਿਤਬੁਦ੍ਧਿਨੋ, ਤੇਸਂ ਥੇਰਾਨਨ੍ਤਿ ਸਮ੍ਬਨ੍ਧੋ. ਥੇਰਾਨਂ ਵਂਸੇ ਪਕਾਰੇਨ ਦਿਪ੍ਪਨ੍ਤਿ, ਪਦੀਪੋ ਵਿਯਾਤਿ ਵਾ ਥੇਰਵਂਸਪ੍ਪਦੀਪਾ, ਤੇਸਂ. ਥਿਰੋ ਸੀਲਸਮਾਧਿਪਞ੍ਞਾਸਙ੍ਖਾਤੋ ਗੁਣੋ ਏਤੇਸਮਤ੍ਥੀਤਿ ਥੇਰਾ, ਤੇਸਂ, ਵਂਸਾਲਙ੍ਕਾਰਭੂਤੇਨਾਤਿ ਸਮ੍ਬਨ੍ਧੋ. ਮਹਾਵਿਹਾਰੇ ਵਸਨਸੀਲਾ ਵਸਨਧਮ੍ਮਾ, ਵਸਨੇ ਸਾਧੁਕਾਰੀਤਿ ਵਾ ਮਹਾਵਿਹਾਰਵਾਸਿਨੋ, ਤੇਸਂ, ਥੇਰਾਨਨ੍ਤਿ ਸਮ੍ਬਨ੍ਧੋ. ਵਂਸੇ ਅਲਙ੍ਕਾਰੋ, ਵਂਸਸ੍ਸ ਵਾਤਿ ਵਂਸਾਲਙ੍ਕਾਰੋ, ਸੋ ਹੁਤ੍ਵਾ ਭੂਤੋ, ਵਂਸਾਲਙ੍ਕਾਰਭਾਵਂ ਵਾ ਪਤ੍ਤੋਤਿ ਵਂਸਾਲਙ੍ਕਾਰਭੂਤੋ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ.

ਵਿਪੁਲਾ ਚ ਸਾ ਵਿਸੁਦ੍ਧਾ ਚੇਤਿ ਵਿਪੁਲਵਿਸੁਦ੍ਧਾ, ਵਿਸੇਸਨੋਭਯਪਦੋ, ਵਿਪੁਲਵਿਸੁਦ੍ਧਾ ਬੁਦ੍ਧਿ ਏਤਸ੍ਸਾਤਿ ਵਿਪੁਲਵਿਸੁਦ੍ਧਬੁਦ੍ਧਿ, ਤੇਨ ਥੇਰੇਨਾਤਿ ਸਮ੍ਬਨ੍ਧੋ. ਨਾਮਮੇਵ ਨਾਮਧੇਯ੍ਯਂ, ਗਹਿਤਂ ਨਾਮਧੇਯ੍ਯਮੇਤਸ੍ਸਾਤਿ ਗਹਿਤਨਾਮਧੇਯ੍ਯੋ, ਤੇਨ ਥੇਰੇਨ ਕਤਾ ਸਮਨ੍ਤਪਾਸਾਦਿਕਾ ਨਾਮ ਅਯਂ ਵਿਨਯਸਂਵਣ੍ਣਨਾ ਤਿਟ੍ਠਤੂਤਿ ਸਮ੍ਬਨ੍ਧੋ.

ਸੁਦ੍ਧਚਿਤ੍ਤਸ੍ਸ ਤਾਦਿਨੋ ਲੋਕਜੇਟ੍ਠਸ੍ਸ ਮਹੇਸਿਨੋ ‘‘ਬੁਦ੍ਧੋ’’ਤਿ ਨਾਮਮ੍ਪਿ ਯਾਵ ਲੋਕਮ੍ਹਿ ਪਵਤ੍ਤਤਿ, ਤਾਵ ਲੋਕਨਿਤ੍ਥਰਣੇਸੀਨਂ ਕੁਲਪੁਤ੍ਤਾਨਂ ਸੀਲਵਿਸੁਦ੍ਧਾਯ ਨਯਂ ਦਸ੍ਸੇਨ੍ਤੀ ਲੋਕਸ੍ਮਿਂ ਤਿਟ੍ਠਤੂਤਿ ਯੋਜਨਾ.

ਇਤਿ ਨਿਗਮਨਸ੍ਸ ਅਤ੍ਥਯੋਜਨਾ ਸਮਤ੍ਤਾ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਰਤਨਪੁਣ੍ਣਨਾਮਸ੍ਸ, ਪੁਰਸ੍ਸ ਰਾਜਧਾਨਿਯਾ;

ਦਕ੍ਖਿਣੇ ਮੁਨਿਰੂਪਸ੍ਸ, ਈਸਂਪਾਚੀਨਨਿਸ੍ਸਿਤੇ.

ਯੋ ਵਿਹਾਰੋ ਸਪਾਸਾਦੋ, ਕਾਰਿਤੋ ਰਾਜਦੇਵਿਯਾ;

ਯਾ ਵਸਤਾ ਮਯਾ ਤਤ੍ਰ, ਕਤਾ ਪਾਚਿਤ੍ਯਾਦਿਯੋਜਨਾ.

ਮਾਪਿਤਰਤ੍ਨਪੁਣ੍ਣਸ੍ਸ, ਸਤ੍ਤਰਸੇਵ ਰਾਜਿਨੋ;

ਜਯਵਸ੍ਸੇਟ੍ਠਾਰਸਮ੍ਹਿ, ਸਮ੍ਪਤ੍ਤੇਯਂ ਸੁਨਿਟ੍ਠਿਤਾ.

‘‘ਰਤਨਪੁਣ੍ਣਾ’’ਤਿਵ੍ਹਯਸ੍ਸ ਰਾਜਧਾਨੀਨਗਰਸ੍ਸ ਦਕ੍ਖਿਣਸ੍ਮਿਂ ਦਿਸਾਭਾਗੇ ਪਞ੍ਚਯੋਜਨਪ੍ਪਮਾਣੇ ਠਾਨੇ ਦ੍ਵੀਹਿ ਮਹਾਤਲ਼ਾਕੇਹਿ ਸੁਸੋਭਿਤਸ੍ਸ ਮਿਧਿਲਨਾਮਨਗਰਸ੍ਸ ਪੁਰਤ੍ਥਿਮਸ੍ਮਿਂ ਦਿਸਾਭਾਗੇ ਦਿਯਡ੍ਢਗਾਵੁਤਪ੍ਪਮਾਣੇ ਠਾਨੇ ਅਨੇਕਤਾਲਪਨ੍ਤੀਹਿ ਸੁਸੋਭਿਤੋ ਚਤੁਨ੍ਨਂ ਕੁਲਾਨਂ ਰਮਣੀਯਭੂਤੋ ‘‘ਕਫ੍ਰੂ’’ ਇਤਿ ਵੋਹਰਿਤੋ ਯੋ ਸੋ ਮਹਾਗਾਮੋ ਪਤਿਟ੍ਠਿਤੋ, ਤਤ੍ਥ ਪਟਿਸਨ੍ਧਿਯਾ ਜਾਤੇਨ ਸੀਲਾਦਿਗੁਣੇਹਿ ਪਸਂਸਿਤੇਨ ‘‘ਜਾਗਰੋ’’ਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਤਿਕ੍ਖਤ੍ਤੁਂ ਰਾਜੂਹਿ ਰਾਜਮੁਦ੍ਦਿਨਾ ਲਞ੍ਛਿਤੇਨ ਮੇ ਕਤਾਯਂ ਪਾਚਿਤ੍ਯਾਦਿਵਣ੍ਣਨਾਯ ਯੋਜਨਾ ਸਮ੍ਪਤ੍ਤੇ ਜਿਨਚਕ੍ਕੇ ਤੇਰਸਾਧਿਕਚਤੁਵਸ੍ਸਸਤਾਧਿਕਂ ਦ੍ਵਿਸਹਸ੍ਸਂ, ਸਕ੍ਕਰਾਜੇ ਪਨ ਏਕਤਿਂਸਾਧਿਕਦ੍ਵਿਵਸ੍ਸਸਤਾਧਿਕਂ ਸਹਸ੍ਸਂ ਗਿਮ੍ਹਾਨੇ ਜੇਟ੍ਠਮਾਸੇ ਜੁਣ੍ਹਪਕ੍ਖਸ੍ਸ ਪਞ੍ਚਮੇ ਸੁਕ੍ਕਵਾਰੇ ਨਿਟ੍ਠਂ ਪਤ੍ਤਾ ਅਨਾਯਾਸੇਨਾਤਿ.

ਯੋਜਨਾਯ ਇਮਿਸ੍ਸਾਹਂ, ਰਚਨਸ੍ਸਾਨੁਭਾਵਤੋ;

ਭਵੇਯ੍ਯਾਨੇਕਜਾਤੀਸੁ, ਪਿਟਕਤ੍ਤਯਧਾਰਕੋ.

ਕੁਸਲੋ ਚੁਭਯਤ੍ਥੇਸੁ, ਪਰਿਸਾਸੁ ਵਿਸਾਰਦੋ;

ਸਮਿਜ੍ਝਨ੍ਤੁ ਸੁਸਙ੍ਕਪ੍ਪਾ, ਮਯ੍ਹਞ੍ਚ ਸਬ੍ਬਪਾਣਿਨਂ.

ਵਪ੍ਪਾਦਿਮਨਤਿਕ੍ਕਮ੍ਮ, ਸਮ੍ਮਾ ਦੇਵੋ ਪਵਸ੍ਸਤੁ;

ਅਤ੍ਤਜਮਿਵ ਰਕ੍ਖਨ੍ਤੁ, ਰਾਜਾਨੋ ਚਾਪਿ ਮੇਦਿਨਿਨ੍ਤਿ.

ਇਤਿ ਭਦਨ੍ਤਜਾਗਰਤ੍ਥੇਰੇਨ ਕਤਾ

ਪਾਚਿਤ੍ਯਾਦਿਵਣ੍ਣਨਾਯ ਯੋਜਨਾ ਸਮਤ੍ਤਾ.