੭. ਅਤ੍ਤਾਦਾਨਅਙ੍ਗਕਥਾ

੩੯੮. ਅਤ੍ਤਾਦਾਨਂ ਆਦਾਤੁਕਾਮੇਨਾਤਿ ਏਤ੍ਥ ਕਿਂ ਅਤ੍ਤਾਦਾਨਨ੍ਤਿ ਆਹ ‘‘ਸਾਸਨਂ ਸੋਧੇਤੁਕਾਮੋ’’ਤਿਆਦਿ. ਇਮਿਨਾ ਪਰਂ ਚੋਦੇਤੁਂ ਅਤ੍ਤਨਾ ਆਦਾਤਬ੍ਬਂ ਅਧਿਕਰਣਂ ਅਤ੍ਤਾਦਾਨਨ੍ਤਿ ਵੁਚ੍ਚਤੀਤਿ ਦਸ੍ਸੇਤਿ. ਅਕਾਲੋ ਇਮਂ ਅਤ੍ਤਾਦਾਨਂ ਆਦਾਤੁਨ੍ਤਿ ਏਤ੍ਥ ਅਕਾਲਂ ਦਸ੍ਸੇਨ੍ਤੋ ਆਹ ‘‘ਰਾਜਭਯ’’ਨ੍ਤਿਆਦਿ. ਤਤ੍ਥ ਵਸ੍ਸਾਰਤ੍ਤੋਤਿ ਵਸ੍ਸਕਾਲੋ. ਸੋ ਹਿ ਵਸ੍ਸੋ ਅਤਿਵਿਯ ਰਞ੍ਜਤਿ ਏਤ੍ਥ ਕਾਲੇਤਿ ਵਸ੍ਸਾਰਤ੍ਤੋਤਿ ਵੁਚ੍ਚਤਿ. ਵਸ੍ਸਾਰਤ੍ਤੋਪਿ ਅਧਿਕਰਣਵੂਪਸਮਤ੍ਥਂ ਲਜ੍ਜਿਪਰਿਸਾਯ ਦੂਰਤੋ ਆਨਯਨਸ੍ਸ ਦੁਕ੍ਕਰਤ੍ਤਾ ਅਕਾਲੋ ਨਾਮ. ਇਤੀਤਿ ਅਯਂ ਰਾਜਭਯਾਦਿਕਾਲੋਤਿ ਅਤ੍ਥੋ. ਵਿਪਰੀਤੋਤਿ ਰਾਜਭਯਾਦੀਨਂ ਅਭਾਵਕਾਲੋ.

ਅਭੂਤਂ ਇਦਂ ਅਤ੍ਤਾਦਾਨਨ੍ਤਿ ਏਤ੍ਥ ਅਭੂਤਸਦ੍ਦੋ ਅਵਿਜ੍ਜਮਾਨਪਰਿਯਾਯੋਤਿ ਆਹ ‘‘ਅਸਨ੍ਤਮਿਦ’’ਨ੍ਤਿ, ਇਦਂ ਅਤ੍ਤਾਦਾਨਂ ਅਵਿਜ੍ਜਮਾਨਨ੍ਤਿ ਅਤ੍ਥੋ. ਮਯਾ ਗਹਿਤੋਤਿ ਸਮ੍ਬਨ੍ਧੋ. ਸੀਲਵਾ ਪੁਗ੍ਗਲੋਤਿ ਯੋਜਨਾ. ਯਨ੍ਤਿ ਅਤ੍ਤਾਦਾਨਂ ਸਂਵਤ੍ਤਤੀਤਿ ਸਮ੍ਬਨ੍ਧੋ. ਇਦਨ੍ਤਿ ਅਤ੍ਤਾਦਾਨਂ.

ਨ ਲਭਿਸ੍ਸਾਮਿ ਸਨ੍ਦਿਟ੍ਠੇ, ਲਭਿਸ੍ਸਾਮਿ ਸਨ੍ਦਿਟ੍ਠੇਤਿ ਏਤ੍ਥ ‘‘ਨ ਲਭਿਸ੍ਸਾਮਿ, ਲਭਿਸ੍ਸਾਮੀ’’ਤਿ ਇਦਂ ਕਿਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਅਪ੍ਪੇਕਦਾ ਹੀ’’ਤਿਆਦਿ. ਤਤ੍ਥ ਅਪ੍ਪੇਕਦਾਤਿ ਅਪਿ ਏਕਦਾ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਏਵਰੂਪਾਤਿ ਸਨ੍ਦਿਟ੍ਠਸਮ੍ਭਤ੍ਤਸਭਾਵਾ. ਤਨ੍ਤਿ ਉਪਤ੍ਥਮ੍ਭਕਭਿਕ੍ਖੁਲਭਨਂ ਸਨ੍ਧਾਯਾਤਿ ਸਮ੍ਬਨ੍ਧੋ. ‘‘ਨ ਲਭਿਸ੍ਸਾਮੀ’’ਤਿ ਇਦਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ.

ਕੋਸਮ੍ਬਕਾਨਂ ਭਣ੍ਡਨਾਦਿ ਭਵਤਿ ਵਿਯ ਭਣ੍ਡਨਾਦਿ ਭਵਿਸ੍ਸਤੀਤਿ ਯੋਜਨਾ. ਪਚ੍ਛਾਪਿ ਅਵਿਪ੍ਪਟਿਸਾਰਕਰਂ ਭਵਿਸ੍ਸਤੀਤਿ ਏਤ੍ਥ ਕੇਸਂ ਅਵਿਪ੍ਪਟਿਸਾਰਕਰਂ ਭਵਤਿ ਵਿਯ ਪਞ੍ਚਙ੍ਗਸਮ੍ਪਨ੍ਨਾਗਤਂ ਅਤ੍ਤਾਦਾਨਂ ਆਦਿਯਤੋ ਪਚ੍ਛਾਪਿ ਅਵਿਪ੍ਪਟਿਸਾਰਕਰਂ ਭਵਤੀਤਿ ਆਹ ‘‘ਸੁਭਦ੍ਦਂ ਵੁਡ੍ਢਪਬ੍ਬਜਿਤ’’ਨ੍ਤਿਆਦਿ. ਤਤ੍ਥ ਪਞ੍ਚਸਤਿਕਸਙ੍ਗੀਤਿਨ੍ਤਿ ਪਞ੍ਚਸਤੇਹਿ ਮਹਾਕਸ੍ਸਪਾਦੀਹਿ ਕਤ੍ਤਬ੍ਬਂ ਸਙ੍ਗੀਤਿਂ. ਮਹਾਕਸ੍ਸਪਤ੍ਥੇਰਸ੍ਸ ਪਚ੍ਛਾ ਸਮਨੁਸ੍ਸਰਣਕਰਂ ਹੋਤਿ ਇਵ ਹੋਤੀਤਿ ਯੋਜਨਾ. ਏਸੇਵ ਨਯੋ ਸੇਸੇਸੁਪਿ. ਸਮਨੁਸ੍ਸਰਣਕਰਨ੍ਤਿ ਸਮ੍ਮੋਦਵਸੇਨ ਪੁਨਪ੍ਪੁਨਂ ਅਨੁਸ੍ਸਰਣਸ੍ਸ ਕਰਂ. ਇਮਿਨਾ ‘‘ਅਵਿਪ੍ਪਟਿਸਾਰਕਰ’’ਨ੍ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਪਚ੍ਛਾਪੀਤਿ ਏਤ੍ਥ ਪਿਸਦ੍ਦਸ੍ਸ ਅਵੁਤ੍ਤਸਮ੍ਪਿਣ੍ਡਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਾਸਨਸ੍ਸ ਚਾ’’ਤਿਆਦਿ. ਤਤ੍ਥ ਸਾਸਨਸ੍ਸ ਚ ਸਸ੍ਸਿਰਿਕਤਾਯਾਤਿ ਸਮ੍ਬਨ੍ਧੋ. ਵਿਗਤਉਪਕ੍ਕਿਲੇਸਚਨ੍ਦਿਮਸੂਰਿਯਾਨਂ ਵਿਯ ਸਾਸਨਸ੍ਸ ਚ ਸਸ੍ਸਿਰਿਕਤਾਯ ਸਂਵਤ੍ਤਤੀਤਿ ਅਧਿਪ੍ਪਾਯੋ.