੯. ਜਨ੍ਤਾਘਰਵਤ੍ਤਾਦਿਕਥਾ

੩੭੧. ਜਨ੍ਤਾਘਰਵਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਬਹਿਜਗਤੀਤਿ ਬਹਿਆਲਿਨ੍ਦੋ.

੩੭੩. ਆਚਮਨਵਤ੍ਥੁਸ੍ਮਿਂ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਨੀਹਰਿਤ੍ਵਾਤਿ ਉਦਕਂ ਨੀਹਰਿਤ੍ਵਾ. ਆਚਮਿਤਬ੍ਬਨ੍ਤਿ ਧੋਵਿਤਬ੍ਬਂ. ‘‘ਆਪੁਬ੍ਬੋ ਚਮੁ ਧੋਵਨੇ’’ਤਿ ਹਿ ਧਾਤੁਪਾਠੇਸੁ ਵੁਤ੍ਤਂ. ਇਦਂ ਅਤਿਵਿਵਟਨ੍ਤਿ ਇਦਂ ਠਾਨਂ ਅਤਿਵਿਵਟਂ, ਨ ਕੇਨਚਿ ਪਟਿਚ੍ਛਨ੍ਨਨ੍ਤਿ ਅਤ੍ਥੋ. ਉਦਕਂ ਅਲਭਨ੍ਤਸ੍ਸੇਵਾਤਿ ਉਦਕਂ ਅਲਭਨ੍ਤੇਯੇਵ.

੩੭੪. ਵਚ੍ਚਕੁਟਿਵਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਅਯਨ੍ਤਿ ਦਨ੍ਤਕਟ੍ਠਂ ਖਾਦਤੋ ਵਚ੍ਚਕਰਣਂ. ਸਬ੍ਬਤ੍ਥੇਵਾਤਿ ਸਬ੍ਬਸ੍ਮਿਂ ਏਵ ਠਾਨੇ. ‘‘ਨ ਫਰੁਸੇਨ ਕਟ੍ਠੇਨਾ’’ਤਿ ਏਤ੍ਥ ਨ ਕੇਵਲਂ ਖਰਕਟ੍ਠਮੇਵ, ਫਾਲਿਤਕਟ੍ਠਾਦਯੋਪਿ ਛਵਿਅਵਲੇਖਨਕਟ੍ਠਾ ਫਰੁਸਾਯੇਵ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਫਾਲਿਤਕਟ੍ਠੇਨ ਵਾ’’ਤਿਆਦਿ. ਪਵਿਟ੍ਠਸ੍ਸਾਤਿ ਵਚ੍ਚਕੁਟਿਂ ਪਵਿਟ੍ਠਸ੍ਸ.

ਸਬ੍ਬਸਾਧਾਰਣਟ੍ਠਾਨਨ੍ਤਿ ਸਬ੍ਬੇਸਂ ਭਿਕ੍ਖੂਨਂ, ਸਬ੍ਬੇਹਿ ਵਾ ਸਾਧਾਰਣਂ ਵਚ੍ਚਕੁਟਿਸਙ੍ਖਾਤਂ ਠਾਨਂ. ਤਤ੍ਰਾਤਿ ਤਸ੍ਮਿਂ ਸਬ੍ਬਸਾਧਾਰਣੇ ਠਾਨੇ. ਨਿਬਦ੍ਧਗਮਨਤ੍ਥਾਯਾਤਿ ਅਤ੍ਤਨੋ ਨਿਬਦ੍ਧਗਮਨਤ੍ਥਾਯ ਕਤਂ ਯਂ ਠਾਨਂ ਵਾ ਯਂ ਪੁਗ੍ਗਲਿਕਟ੍ਠਾਨਂ ਵਾ ਹੋਤੀਤਿ ਯੋਜਨਾ.

ਉਹਤਾਤਿ ਏਤ੍ਥ ਉਪੁਬ੍ਬੋ ਹਦਧਾਤੂਤਿ ਦਸ੍ਸੇਨ੍ਤੋ ਆਹ ‘‘ਉਹਦਿਤਾ’’ਤਿ. ‘‘ਹਦ ਕਰੀਸੋਸ੍ਸਗ੍ਗੇ’’ਤਿ ਧਾਤੁਪਾਠੇਸੁ (ਪਾਣਿਨੀ ੯੭੭ ਧਾਤੁਪਾਠੇ; ਸਦ੍ਦਨੀਤਿਧਾਤੁਮਾਲਾਯਂ ੧੫ ਦਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਵਚ੍ਚਕੂਪਤੋ ਬਹਿ ਕਰੀਸਸ੍ਸ ਓਸ੍ਸਜ੍ਜਨਨ੍ਤਿ ਆਹ ‘‘ਬਹਿ ਵਚ੍ਚਮਕ੍ਖਿਤਾ’’ਤਿ. ਧੋਵਿਤਬ੍ਬਾਤਿ ਉਦਕੇਨ ਧੋਵਿਤਬ੍ਬਾ. ਏਤਮ੍ਪੀਤਿ ਉਦਕਸ੍ਸ ਅਵਿਜ੍ਜਮਾਨਮ੍ਪਿ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਵਤ੍ਤਕ੍ਖਨ੍ਧਕੇ.

ਇਤਿ ਵਤ੍ਤਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.