੪. ਅਨੁਮੋਦਨਵਤ੍ਤਕਥਾ

੩੬੨. ਇਦ੍ਧਂ ਅਹੋਸੀਤਿ ਏਤ੍ਥ ਇਧਧਾਤੁਯਾ ਵਡ੍ਢਨਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਸਮ੍ਪਨ੍ਨਂ ਅਹੋਸੀ’’ਤਿ. ਸਙ੍ਘਤ੍ਥੇਰੇ ਨਿਸਿਨ੍ਨੇਤਿ ਸਮ੍ਬਨ੍ਧੋ. ਅਨੁਥੇਰੇ ਅਨੁਮੋਦਨਤ੍ਥਾਯ ਨਿਸਿਨ੍ਨੇਤਿ ਯੋਜਨਾ. ਸਙ੍ਘਤ੍ਥੇਰੇਨ ਅਜ੍ਝਿਟ੍ਠੇਪੀਤਿ ਸਮ੍ਬਨ੍ਧੋ. ਅਨੁਮੋਦਕੋ ਵਦਤੀਤਿ ਸਮ੍ਬਨ੍ਧੋ. ਅਨੁ ਪੁਨਪ੍ਪੁਨਂ, ਪਚ੍ਛਾ ਵਾ ਦਾਯਕੇ ਧਮ੍ਮਕਥਾਯ ਮੋਦੇਤੀਤਿ ਅਨੁਮੋਦਕੋ. ‘‘ਗਚ੍ਛਥਾ’’ਤਿ ਸਚੇ ਵਦਤਿ ਅਨੁਮੋਦਕੋਤਿ ਯੋਜਨਾ. ਤਸ੍ਸਾਤਿ ਅਨੁਮੋਦਕਸ੍ਸ. ਮਨੁਸ੍ਸਾ ਕਾਰੇਨ੍ਤੀਤਿ ਸਮ੍ਬਨ੍ਧੋ. ‘‘ਏਕੇਨਾ’’ਤਿ ਪਦਂ ‘‘ਕਾਰੇਨ੍ਤੀ’’ਤਿ ਪਦੇ ਕਾਰਿਤਕਮ੍ਮਂ. ਤਸ੍ਸਾਤਿ ਕਾਰਿਤਭਿਕ੍ਖੁਸ੍ਸ. ਅਨੁਮੋਦਨਤੋਤਿ ਅਨੁਮੋਦਨਕਾਰਣਾ. ਉਪਨਿਸਿਨ੍ਨਕਥਾਤਿ ਉਪਸਮੀਪੇ ਨਿਸਿਨ੍ਨਾਨਂ ਕਥਿਯਤਿ ਏਤਾਯਾਤਿ ਉਪਨਿਸਿਨ੍ਨਕਥਾ. ਅਨੁਮੋਦਨਾਯਾਤਿ ਅਨੁਮੋਦਨਤ੍ਥਾਯ. ਅਜ੍ਝਿਟ੍ਠੋਵਾਤਿ ਸਯਂ ਅਜ੍ਝਿਟ੍ਠੋ ਏਵ. ਏਤ੍ਥਾਤਿ ਅਨੁਮੋਦਨਵਤ੍ਥੁਸ੍ਮਿਂ. ‘‘ਸਞ੍ਜਾਤਵਚ੍ਚੋ’’ਤਿ ਇਮਿਨਾ ਵਚ੍ਚੋ ਸਞ੍ਜਾਤੋ ਇਮਸ੍ਸਾਤਿ ਵਚ੍ਚਿਤੋਤਿ ਕਤ੍ਵਾ ਸਞ੍ਜਾਤਤ੍ਥੇ ਇਤ ਪਚ੍ਚਯੋਤਿ ਦਸ੍ਸੇਤਿ.