੫. ਭਤ੍ਤਗ੍ਗਵਤ੍ਤਕਥਾ

੩੬੪. ਭਤ੍ਤਗ੍ਗਵਤ੍ਤੇਤਿ ਭਤ੍ਤਂ ਗਣ੍ਹਨ੍ਤਿ ਏਤ੍ਥਾਤਿ ਭਤ੍ਤਗ੍ਗਂ, ਪਰਿਵਿਸਨਟ੍ਠਾਨਂ. ਤਸ੍ਮਿਂ ਕਤ੍ਤਬ੍ਬਂ ਵਤ੍ਤਂ ਭਤ੍ਤਗ੍ਗਵਤ੍ਤਂ, ਤਸ੍ਮਿਂ ਭਤ੍ਤਗ੍ਗਵਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਮਨੁਸ੍ਸਾਨਂ ਪਰਿਵਿਸਨਟ੍ਠਾਨਂ ਨਾਮ ਯਤ੍ਥ ਮਨੁਸ੍ਸਾ ਸਪੁਤ੍ਤਦਾਰਾ ਆਵਸਿਤ੍ਵਾ ਭਿਕ੍ਖੂਭੋਜੇਨ੍ਤਿ. ‘‘ਅਤਿਅਲ੍ਲੀਯਿਤ੍ਵਾ’’ਤਿ ਇਮਿਨਾ ਅਨੁਪਖਜ੍ਜਾਤਿ ਏਤ੍ਥ ਖਦਧਾਤੁਸ੍ਸ ਹਿਂਸਨਂ ਨਾਮ ਅਤਿਅਲ੍ਲੀਯਨਨ੍ਤਿ ਦਸ੍ਸੇਤਿ. ਆਸਨੇਸੁ ਸਤੀਤਿ ਆਸਨੇਸੁ ਸਨ੍ਤੇਸੁ. ਨਿਸੀਦਨ੍ਤਸ੍ਸ ਨਵਕਸ੍ਸਾਤਿ ਸਮ੍ਬਨ੍ਧੋ. ਆਪਜ੍ਜਤੀਤਿ ਆਪਤ੍ਤਿਂ ਆਪਜ੍ਜਤਿ. ਆਪੁਚ੍ਛਿਤੇ ਅਨਨੁਜਾਨਨ੍ਤੋ ਥੇਰੋ ਆਪਜ੍ਜਤੀਤਿ ਯੋਜਨਾ. ਸਙ੍ਘਾਟਿਨ੍ਤਿ ਪਾਰੁਤਸਙ੍ਘਾਟਿਂ.

ਪਤ੍ਤਧੋਵਨਉਦਕਨ੍ਤਿ ਭੁਞ੍ਜਨਤ੍ਥਾਯ ਪਤ੍ਤਾਨਂ ਧੋਵਨਉਦਕਂ. ਗਹੇਤਬ੍ਬਨ੍ਤਿ ਹਤ੍ਥੇਨ ਗਹੇਤਬ੍ਬਂ.

ਯਥਾ ਗਣ੍ਹਿਯਮਾਨੇਤਿ ਯੋਜਨਾ. ਮਤ੍ਤਾਯਾਤਿ ਪਮਾਣਾਯ. ਸਬ੍ਬਿਆਦੀਸੁ ਏਵਾਤਿ ਏਵਸਦ੍ਦੋ ਅਜ੍ਝਾਹਰਿਤਬ੍ਬੋ. ਸਬ੍ਬਿਆਦੀਸੂਤਿ ਸਬ੍ਬਿਤੇਲਉਤ੍ਤਰਿਭਙ੍ਗੇਸੁ, ਨਿਦ੍ਧਾਰਣੇ ਭੁਮ੍ਮਂ. ਯਨ੍ਤਿ ਸਬ੍ਬਿਆਦਿਕਂ. ਅਪ੍ਪਹੋਤੀਤਿ ਸਬ੍ਬੇਸਂ ਭਿਕ੍ਖੂਨਂ ਨਪ੍ਪਹੋਤਿ. ਤਨ੍ਤਿ ਸਬ੍ਬਿਆਦਿਕਂ, ਸਮ੍ਪਾਦੇਹੀਤਿ ਸਮ੍ਬਨ੍ਧੋ. ਤਾਦਿਸਂ ਸਬ੍ਬਿਆਦਿਕਨ੍ਤਿ ਸਮ੍ਬਨ੍ਧੋ.

ਯਂ ਭਤ੍ਤਗ੍ਗਨ੍ਤਿ ਯੋਜਨਾ. ਹਤ੍ਥਧੋਵਨਉਦਕਨ੍ਤਿ ਭੁਤ੍ਤਾਵੀਨਂ ਹਤ੍ਥਸ੍ਸ ਧੋਵਨਉਦਕਂ. ਅਨ੍ਤਰਾਤਿ ਭੋਜਨਸ੍ਸ ਮਜ੍ਝੇ. ਪਿਪਾਸਿਤੇਨਾਤਿ ਪਿਵਿਤੁਂ ਇਚ੍ਛਨ੍ਤੇਨ. ਗਲੇਤਿ ਕਣ੍ਠੇ.

ਨਿਵਤ੍ਤਨ੍ਤੇਨਾਤਿ ਏਤ੍ਥ ਕਸ੍ਮਾ ਠਾਨਾ ਨਿਵਤ੍ਤਨ੍ਤੇਨਾਤਿ ਆਹ ‘‘ਭਤ੍ਤਗ੍ਗਤੋ’’ਤਿ. ਕਥਂ ਕੇਨਾਕਾਰੇਨ ਨਿਵਤ੍ਤਿਤਬ੍ਬਨ੍ਤਿ ਯੋਜਨਾ. ਕਸ੍ਮਾ ਨਵਕੇਹਿ ਭਿਕ੍ਖੂਹਿ ਪਠਮਤਰਂ ਨਿਵਤ੍ਤਿਤਬ੍ਬਨ੍ਤਿ ਆਹ ‘‘ਸਮ੍ਬਾਧੇਸੁ ਹੀ’’ਤਿਆਦਿ. ਨਿਕ੍ਖਮਨੋਕਾਸੋਤਿ ਪਠਮਤਰਂ ਨਿਕ੍ਖਨ੍ਤੋਕਾਸੋ. ਪਟਿਪਾਟਿਯਾਤਿ ਵੁਡ੍ਢਪਟਿਪਾਟਿਯਾ. ਧੁਰੇਤਿ ਗੇਹਦ੍ਵਾਰਸ੍ਸ ਸਮੀਪੇ. ਧੁਰਸਦ੍ਦੋ ਹਿ ਇਧ ਸਮੀਪਵਾਚਕੋ. ਨਵਕਾ ਅਨ੍ਤੋਗੇਹੇ ਚੇ ਨਿਸਿਨ੍ਨਾ ਹੋਨ੍ਤੀਤਿ ਯੋਜਨਾ. ਅਨ੍ਤਰੇਨਾਤਿ ਭਿਕ੍ਖੂਨਂ ਵਿਵਰੇਨ, ਮਜ੍ਝੇਨ ਵਾ. ਵਿਰਲ਼ਾਯਾਤਿ ਤਨੁਕਾਯ.