੬. ਸੇਨਾਸਨਕ੍ਖਨ੍ਧਕਂ

ਵਿਹਾਰਾਨੁਜਾਨਨਕਥਾ

੨੯੪. ਸੇਨਾਸਨਕ੍ਖਨ੍ਧਕੇ ਅਪਞ੍ਞਤ੍ਤਂ ਹੋਤੀਤਿ ਏਤ੍ਥ ਨ ਞਪਧਾਤੁ ਹੋਤਿ, ਅਪਿਚ ਞਾਧਾਤੁਯੇਵ, ਸੋ ਚ ਖੋ ਅਨੁਜਾਨਨਤ੍ਥੋਤਿ ਆਹ ‘‘ਅਨਨੁਞ੍ਞਾਤਂ ਹੋਤੀ’’ਤਿ. ਇਮਿਨਾ ਞਾਧਾਤੁਸ੍ਸ ਅਵਬੋਧਨਾਦਯੋ ਅਤ੍ਥੇ ਨਿਵਤ੍ਤੇਤਿ, ਅਨੁਜਾਨਨਤ੍ਥਂਯੇਵ ਦਸ੍ਸੇਤਿ. ਅਡ੍ਢਯੋਗਾਦੀਨਂ ਵਿਸੁਂ ਗਹਿਤਤ੍ਤਾ ਵਿਹਾਰਸਦ੍ਦੇਨ ਪਾਰਿਸੇਸਤੋ ਅਵਸੇਸਾਵਾਸੋਵ ਗਹੇਤਬ੍ਬੋਤਿ ਆਹ ‘‘ਅਡ੍ਢਯੋਗਾਦਿਮੁਤ੍ਤਕੋ ਅਵਸੇਸਾਵਾਸੋ’’ਤਿ. ਸੁਵਣ੍ਣਵਙ੍ਕਗੇਹਨ੍ਤਿ ਸੁਵਣ੍ਣਵਙ੍ਕਛਦਨੇਨ ਛਾਦਿਤਂ ਗੇਹਂ. ਇਟ੍ਠਕਾਗੁਹਾਤਿ ਇਟ੍ਠਕਾਯ ਕਤਾ ਗੁਹਾ. ਏਸੇਵ ਨਯੋ ਸੇਸੇਸੁਪਿ. ਆਗਤਸ੍ਸ ਚ ਅਨਾਗਤਸ੍ਸ ਚਾਤਿ ਏਤ੍ਥ ਚਸਦ੍ਦੇਨ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ. ਆਗਚ੍ਛਤੀਤਿ ਆਗਤੋ, ਨ ਆਗਤੋ ਅਨਾਗਤੋ, ਸਙ੍ਘੋ. ਆਗਤੋ ਚ ਅਨਾਗਤੋ ਚ ਆਗਤਾਨਾਗਤੋ, ਸਮਾਹਾਰਦ੍ਵਨ੍ਦੋ ਪੁਂਲਿਙ੍ਗੋ, ਤਸ੍ਸ. ‘‘ਅਪ੍ਪਟਿਹਤਚਾਰਸ੍ਸਾ’’ਤਿ ਇਮਿਨਾ ਚਤੂਸੁ ਦਿਸਾਸੁ ਅਪ੍ਪਟਿਹਤਚਾਰੋ ਚਾਤੁਦ੍ਦਿਸੋਤਿ ਵਚਨਤ੍ਥਂ ਦਸ੍ਸੇਤਿ.

੨੯੫. ਅਨੁਮੋਦਨਗਾਥਾਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਉਤੁਵਿਸਭਾਗਵਸੇਨਾਤਿ ਸੀਤਉਣ੍ਹਾਨਂ ਉਤੂਨਂ ਵਿਸਭਾਗਵਸੇਨ. ਸਂਫੁਸਿਤਕਵਾਤੋਤਿ ਸਹ ਉਦਕਬਿਨ੍ਦੁਨਾ ਆਗਤੋ ਵਾਤੋ. ਏਤ੍ਥ ਹਿ ਸਂਸਦ੍ਦੋ ਸਹਤ੍ਥੋ, ਫੁਸਿਤਸਦ੍ਦੋ ਉਦਕਬਿਨ੍ਦੁਵਾਚਕੋ. ਉਜੁਕਮੇਘਵੁਟ੍ਠਿਯੋ ਏਵਾਤਿ ਵਾਤੇਨ ਅਪਹਰਿਤਤ੍ਤਾ ਉਜੁਕਂ ਪਤਿਤਾ ਮੇਘਵੁਟ੍ਠਿਯੋ ਏਵ. ਪਾਲ਼ਿਯਂ ਤਤੋਤਿ ਏਤ੍ਥ ਤੋਪਚ੍ਚਯੋ ਪਚ੍ਚਤ੍ਤਤ੍ਥੇ ਵਤ੍ਤਤਿ. ਸੋ ਵਿਹਾਰੋਤਿ ਹਿ ਅਤ੍ਥੋ. ਵਾਲ਼ਮਿਗਾਨਿ ਚਾਤਿ ਵਾਲ਼ਮਿਗੇ ਚ. ਲਿਙ੍ਗਵਿਪਲ੍ਲਾਸੋ ਹੇਸ. ਏਤਾਨਿ ਸਬ੍ਬਾਨੀਤਿ ‘‘ਸੀਤ’’ਨ੍ਤਿਆਦੀਨਿ ਸਬ੍ਬਾਨਿ ਸਤ੍ਤ ਪਦਾਨਿ. ਯੋਜੇਤਬ੍ਬਾਨੀਤਿ ਸੋ ਵਿਹਾਰੋ ਸੀਤਂ ਪਟਿਹਨਤਿ…ਪੇ… ਵੁਟ੍ਠਿਯੋ ਪਟਿਹਨਤੀਤਿ ਯੋਜੇਤਬ੍ਬਾਨੀਤਿ ਅਤ੍ਥੋ.

‘‘ਵਿਹਾਰੇਨਾ’’ਤਿ ਇਮਿਨਾ ਪਾਲ਼ਿਯਂ ਤਤੋਤਿ ਏਤ੍ਥ ਤੋਪਚ੍ਚਯੋ ਕਤ੍ਤੁਤ੍ਥੇ ਹੋਤੀਤਿ ਦਸ੍ਸੇਤਿ, ਤੇਨ ਵਿਹਾਰੇਨਾਤਿ ਅਤ੍ਥੋ. ਪਟਿਹਞ੍ਞਤੀਤਿ ਪਟਿਹਨੀਯਤਿ. ਸੁਖਤ੍ਥਨ੍ਤਿ ਏਤ੍ਥ ਉਤ੍ਤਰਪਦਲੋਪੋਤਿ ਆਹ ‘‘ਸੁਖਵਿਹਾਰਤ੍ਥ’’ਨ੍ਤਿ. ‘‘ਲੇਣਤ੍ਥਞ੍ਚ ਸੁਖਤ੍ਥਞ੍ਚਾ’’ਤਿ ਪਦਦ੍ਵਯਂ ‘‘ਹੋਤੀ’’ਤਿ ਪਾਠਸੇਸੇਨ ਯੋਜੇਤਬ੍ਬਂ. ਵਿਹਾਰਦਾਨਂ ਲੇਣਤ੍ਥਞ੍ਚ ਸੁਖਤ੍ਥਞ੍ਚ ਹੋਤੀਤਿ ਹਿ ਅਤ੍ਥੋ. ਇਦਨ੍ਤਿ ਅਯਂ ਅਧਿਪ੍ਪਾਯੋ. ਵੁਤ੍ਤਨ੍ਤਿ ਵੁਤ੍ਤੋ. ਵਿਹਾਰਦਾਨਂ ਸੁਖਤ੍ਥਞ੍ਚ ਹੋਤੀਤਿ ਯੋਜਨਾ. ਝਾਯਿਤੁਂ ਵਿਪਸ੍ਸਿਤੁਞ੍ਚ ਯਂ ਸੁਖਂ ਅਤ੍ਥੀਤਿ ਸਮ੍ਬਨ੍ਧੋ. ਤਦਤ੍ਥਨ੍ਤਿ ਤਸ੍ਸ ਸੁਖਸ੍ਸ ਅਤ੍ਥਾਯ. ਪਰਪਦੇਨਪੀਤਿ ‘‘ਝਾਯਿਤੁਞ੍ਚ ਵਿਪਸ੍ਸਿਤੁ’’ਨ੍ਤਿ ਪਦਦ੍ਵਯਤੋ ਪਰਂ ਠਿਤੇਨ ‘‘ਵਿਹਾਰਦਾਨ’’ਨ੍ਤਿ ਪਦੇਨਪਿ. ਇਧਾਤਿ ਇਮਸ੍ਮਿਂ ਵਿਹਾਰੇ. ਵਿਹਾਰਦਾਨਨ੍ਤਿ ਵਿਹਾਰਸ੍ਸ ਦਾਨਂ, ਦਾਤਬ੍ਬਵਿਹਾਰਂ ਵਾ, ਵਣ੍ਣਿਤਨ੍ਤਿ ਸਮ੍ਬਨ੍ਧੋ. ਵੁਤ੍ਤਨ੍ਤਿ ਸਂਯੁਤ੍ਤਨਿਕਾਯੇ ਵੁਤ੍ਤਂ. ਸਾਧਕਪਾਲ਼ਿਯਂ ਯੋ ਉਪਸ੍ਸਯਂ ਦਦਾਤਿ, ਸੋ ਚ ਸਬ੍ਬਦਦੋ ਸਬ੍ਬੇਸਂ ਬਲਾਦੀਨਂ ਦਦੋ ਹੋਤੀਤਿ ਯੋਜਨਾ. ਸੋ ਚਾਤਿ ਏਤ੍ਥ ਚਸਦ੍ਦੋ ਅਵਧਾਰਣਤ੍ਥੋ. ਸੋ ਏਵਾਤਿ ਹਿ ਅਤ੍ਥੋ.

‘‘ਵਿਹਾਰੇ’’ਤਿ ਇਮਿਨਾ ਵਾਸਯੇਤ੍ਥਾਤਿ ਏਤ੍ਥ ਏਤਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਵਾਸਯੇਤਿ ਵਾਸੇਯ੍ਯ. ਤੇਸਂ ਅਨ੍ਨਞ੍ਚਾਤਿ ਏਤ੍ਥ ‘‘ਤੇਸ’’ਨ੍ਤਿ ਪਦਂ ‘‘ਅਨੁਚ੍ਛਵਿਯ’’ਨ੍ਤਿ ਪਾਠਸੇਸੇਨ ਯੋਜੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਤੇਸਂ ਅਨੁਚ੍ਛਵਿਯ’’ਨ੍ਤਿ. ਤਤ੍ਥ ਅਨੁਚ੍ਛਵਿਯਂ ਅਨ੍ਨਞ੍ਚ ਅਨੁਚ੍ਛਵਿਯਾਨਿ ਵਤ੍ਥਾਨਿ ਚਾਤਿ ਯੋਜਨਾ. ਅਥ ਵਾ ਤੇਸਨ੍ਤਿ ਭੁਮ੍ਮਤ੍ਥੇ ਸਮ੍ਪਦਾਨਵਚਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਤੇਸੂ’’ਤਿ, ਭਿਕ੍ਖੂਸੂਤਿ ਅਤ੍ਥੋ. ਉਜੁਭੂਤੇਸੂਤਿ ਏਤ੍ਥ ਸਮ੍ਪਦਾਨਤ੍ਥੇ ਭੁਮ੍ਮਵਚਨਂ ਕਤ੍ਵਾ ਉਜੁਭੂਤਾਨਂ ਤੇਸਂ ਭਿਕ੍ਖੂਨਂ ਦਦੇਯ੍ਯਾਤਿ ਅਤ੍ਥੋਪਿ ਯੁਜ੍ਜਤੇਵ. ‘‘ਅਕੁਟਿਲਚਿਤ੍ਤੇਸੂ’’ਤਿ ਇਮਿਨਾ ‘‘ਉਜੁਭੂਤੇਸੂ’’ਤਿ ਏਤ੍ਥ ਉਜੁਸਦ੍ਦਸ੍ਸ ਅਕੁਟਿਲਤ੍ਥਞ੍ਚ ਭੂਤਸਦ੍ਦੇਨ ਬਾਹਿਰਤ੍ਥਸਮਾਸਞ੍ਚ ਦਸ੍ਸੇਤਿ. ਉਜੁਭੂਤਂ ਚਿਤ੍ਤਮੇਤੇਸਨ੍ਤਿ ਉਜੁਭੂਤਾਤਿ ਵਚਨਤ੍ਥੋ ਕਾਤਬ੍ਬੋ. ਨਿਦਹੇਯ੍ਯਾਤਿ ਨਿਖਣਿਤ੍ਵਾ ਠਪੇਯ੍ਯ. ‘‘ਨ ਚਿਤ੍ਤਪਸਾਦਂ ਵਿਰਾਧੇਤ੍ਵਾ’’ਤਿ ਇਮਿਨਾ ਵਿਪ੍ਪਸਨ੍ਨੇਨ ਚੇਤਸਾਤਿ ਏਤ੍ਥ ਏਵਤ੍ਥਫਲਂ ਵਾ ਅਞ੍ਞਤ੍ਥਾਪੋਹਨਂ ਵਾ ਦਸ੍ਸੇਤਿ. ਹੀਤਿ ਫਲਜੋਤਕੋ. ਏਵਂ ਵਿਪ੍ਪਸਨ੍ਨਚਿਤ੍ਤਸ੍ਸ ਤਸ੍ਸ ਵਿਹਾਰਦਾਯਕਸ੍ਸ ਤੇ ਭਿਕ੍ਖੂ ਧਮ੍ਮਂ ਦੇਸੇਨ੍ਤੀਤਿ ਯੋਜਨਾ.

੨੯੬. ਆਵਿਞ੍ਛਨਛਿਦ੍ਦਨ੍ਤਿ ਅਙ੍ਗੁਲਿਂ ਅਵ ਪਵੇਸੇਤ੍ਵਾ ਅਞ੍ਛਤਿ ਆਕਡ੍ਢਤਿ ਏਤ੍ਥ, ਏਤੇਨਾਤਿ ਵਾ ਆਵਿਞ੍ਛਨਂ. ਅਵਪੁਬ੍ਬੋ ਅਛਿਧਾਤੁ, ਉਪਸਗ੍ਗਅਕਾਰਸ੍ਸ ਦੀਘਂ ਕਤ੍ਵਾ, ਧਾਤੁਅਕਾਰਸ੍ਸ ਚ ਇਕਾਰਂ ਕਤ੍ਵਾ ‘‘ਆਵਿਞ੍ਛਨ’’ਨ੍ਤਿ ਵੁਤ੍ਤਂ, ਤਮੇਵ ਛਿਦ੍ਦਂ ਆਵਿਞ੍ਛਨਛਿਦ੍ਦਂ. ਆਵਿਞ੍ਛਨਰਜ੍ਜੁਨ੍ਤਿ ਕਵਾਟਚ੍ਛਿਦ੍ਦੇ ਅਵ ਪਵੇਸੇਤ੍ਵਾ ਅਞ੍ਛਤਿ ਆਕਡ੍ਢਤਿ ਇਮਾਯਾਤਿ ਆਵਿਞ੍ਛਨਾ, ਸਾਯੇਵ ਰਜ੍ਜੂਤਿ ਆਵਿਞ੍ਛਨਰਜ੍ਜੁ. ਕਾਚਿ ਰਜ੍ਜੁ ਨ ਨ ਵਟ੍ਟਤੀਤਿ ਯੋਜਨਾ. ਅਥ ਵਾ ਨ ਵਟ੍ਟਤਿ ਨ ਹੋਤਿ, ਵਟ੍ਟਤਿਯੇਵਾਤਿ ਯੋਜਨਾ. ਤੀਣਿ ਤਾਲਾਨੀਤਿ ਏਤ੍ਥ ਤਾਲਸਦ੍ਦੋ ਕੁਞ੍ਚਿਕਾਪਰਿਯਾਯੋਤਿ ਆਹ ‘‘ਤਿਸ੍ਸੋ ਕੁਞ੍ਚਿਕਾਯੋ’’ਤਿ. ਇਮਿਨਾ ਤਾਲਸਦ੍ਦਸ੍ਸ ਰੁਕ੍ਖਤੂਰਿਯਵਿਸੇਸੇ ਨਿਵਤ੍ਤੇਤਿ. ਯਂ ਯਨ੍ਤਿ ਉਪਕਰਣਂ. ਤਸ੍ਸਾਤਿ ਯਨ੍ਤਕਸ੍ਸ. ਵੇਦਿਕਾਵਾਤਪਾਨਨ੍ਤਿ ਵਾਤਂ ਪਿਵਤਿ ਅਨੇਨਾਤਿ ਵਾਤਪਾਨਂ, ਵੇਦਿਕਾਯ ਕਤਂ ਵਾਤਪਾਨਂ ਵੇਦਿਕਾਵਾਤਪਾਨਂ. ਚਕ੍ਕਲਿਕਨ੍ਤਿ ਏਤ੍ਥ ਚਕ੍ਕਾਕਾਰੇਨ ਅਲਤਿ ਪਵਤ੍ਤਤੀਤਿ ਚਕ੍ਕਲਂ, ਚੋਲ਼ਕਪਾਦਪੁਞ੍ਜਨਂ. ਤੇਨ ਬਨ੍ਧਿਤਬ੍ਬਨ੍ਤਿ ਚਕ੍ਕਲਿਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਚੋਲ਼ਕਪਾਦਪੁਞ੍ਜਨਂ ਬਨ੍ਧਿਤੁ’’ਨ੍ਤਿ. ‘‘ਵਾਤਪਾਨਪ੍ਪਮਾਣੇਨ ਭਿਸਿਂ ਕਤ੍ਵਾ’’ਤਿ ਇਮਿਨਾ ਵਾਤਪਾਨਪਮਾਣੇਨ ਕਤਾ ਭਿਸਿ ਵਾਤਪਾਨਭਿਸੀਤਿ ਵਚਨਤ੍ਥਂ ਦਸ੍ਸੇਤਿ.

੨੯੭. ‘‘ਉਚ੍ਚਕਮ੍ਪਿ ਆਸਨ੍ਦਿਕ’’ਨ੍ਤਿ ਵਚਨਤੋ ਵਟ੍ਟਤੀਤਿ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਏਕਤੋਭਾਗੇਨ ਦੀਘਪੀਠਂ ਅਟ੍ਠਙ੍ਗੁਲਪਾਦਕਮੇਵ ਵਟ੍ਟਤੀਤਿ ਯੋਜਨਾ. ਤਤੋ ਅਧਿਕਂ ਨ ਵਟ੍ਟਤੀਤਿ ਅਧਿਪ੍ਪਾਯੋ. ਪਮਾਣਾਤਿਕ੍ਕਨ੍ਤੋਪੀਤਿ ਪਿਸਦ੍ਦੋ ਪਮਾਣਯੁਤ੍ਤੋ ਪਨ ਪਗੇਵਾਤਿ ਦਸ੍ਸੇਤਿ. ਸਤ੍ਤਙ੍ਗੋਤਿ ਤੀਸੁ ਦਿਸਾਸੁ ਅਪਸ੍ਸਯੋ, ਚਤ੍ਤਾਰੋ ਪਾਦਾਤਿ ਸਤ੍ਤ ਅਙ੍ਗਾਨਿ ਏਤਸ੍ਸਾਤਿ ਸਤ੍ਤਙ੍ਗੋ. ਅਯਮ੍ਪੀਤਿ ਪਿਸਦ੍ਦੋ ਆਸਨ੍ਦਿਕਂ ਅਪੇਕ੍ਖਤਿ. ਏਲ਼ਕਪਾਦਪੀਠਂ ਨਾਮ ਵੁਚ੍ਚਤੀਤਿ ਸਮ੍ਬਨ੍ਧੋ. ਏਲ਼ਕਸ੍ਸ ਪਾਦੋ ਵਿਯ ਪਾਦੋ ਏਤ੍ਥਾਤਿ ਏਲ਼ਕਪਾਦਂ, ਤਮੇਵ ਪੀਠਂ ਏਲ਼ਕਪਾਦਪੀਠਂ. ਆਮਲਕਵਣ੍ਣਿਕਪੀਠਨ੍ਤਿ ਆਮਲਕਾਯ ਵਣ੍ਣੋ ਸਣ੍ਠਾਨੋ ਆਮਲਕਵਣ੍ਣੋ, ਤੇਨ ਯੋਜਿਤਂ ਆਮਲਕਵਣ੍ਣਿਕਂ, ਤਦੇਵ ਪੀਠਂ ਆਮਲਕਵਣ੍ਣਿਕਪੀਠਂ. ‘‘ਆਕਾਰੇਨਾ’’ਤਿ ਇਮਿਨਾ ਵਣ੍ਣਸਦ੍ਦਸ੍ਸ ਸਣ੍ਠਾਨਤ੍ਥਂ ਦਸ੍ਸੇਤਿ. ਇਮਾਨੀਤਿ ਪੀਠਾਨਿ. ਏਤ੍ਥਾਤਿ ਪੀਠੇ. ਮੁਞ੍ਚਪਬ੍ਬਜਮਯਨ੍ਤਿ ਮੁਞ੍ਜੇਨ ਚ ਪਬ੍ਬਜੇਨ ਚ ਕਤਂ.

ਮਨੁਸ੍ਸਾਨਨ੍ਤਿ ਵਡ੍ਢਕੀਮਨੁਸ੍ਸਾਨਂ. ਛਵਿਸਂਰਕ੍ਖਨਤ੍ਥਾਯਾਤਿ ਛਵਿਯਾ ਵਿਨਾਸਨਤੋ ਸੁਟ੍ਠੁ ਰਕ੍ਖਨਤ੍ਥਾਯ. ਸਿਮ੍ਬਲਿਰੁਕ੍ਖਾਦੀਨਨ੍ਤਿਆਦਿਸਦ੍ਦੇਨ ਤੂਲਨਿਬ੍ਬਤ੍ਤਕੇ ਸਬ੍ਬਰੁਕ੍ਖੇ ਸਙ੍ਗਣ੍ਹਾਤਿ. ਖੀਰਵਲ੍ਲਿਆਦੀਨਨ੍ਤਿਆਦਿਸਦ੍ਦੇਨ ਤੂਲਨਿਬ੍ਬਤ੍ਤਕਾ ਸਬ੍ਬਾ ਲਤਾਯੋ ਸਙ੍ਗਣ੍ਹਾਤਿ. ਪੋਟਕੀਤਿਣਾਦੀਨਨ੍ਤਿਆਦਿਸਦ੍ਦੇਨ ਤੂਲਨਿਬ੍ਬਤ੍ਤਕਾ ਸਬ੍ਬਾ ਤਿਣਜਾਤਿਯੋ ਸਙ੍ਗਣ੍ਹਾਤਿ. ਤੀਹੀਤਿ ਰੁਕ੍ਖਲਤਾਪੋਟਕੀਹਿ. ਨਨੁ ਭੂਤਗਾਮਾਨਂ ਅਨੇਕਤ੍ਤਾ ਏਤੇਹਿ ਤੀਹਿ ਮੁਤ੍ਤੋ ਭੂਤਗਾਮੋ ਅਤ੍ਥਿ, ਕਸ੍ਮਾ ਪਨ ਸਬ੍ਬਭੂਤਗਾਮਾ ਸਙ੍ਗਹਿਤਾ ਹੋਨ੍ਤੀਤਿ ਆਹ ‘‘ਰੁਕ੍ਖਵਲ੍ਲਿਤਿਣਜਾਤਿਯੋ ਹੀ’’ਤਿਆਦਿ. ਤਤ੍ਥ ਹਿ ਯਸ੍ਮਾ ਨਤ੍ਥਿ, ਤਸ੍ਮਾ ਸਙ੍ਗਹਿਤਾ ਹੋਨ੍ਤੀਤਿ ਯੋਜਨਾ. ਤਸ੍ਮਾਤਿ ਯਸ੍ਮਾ ਨਤ੍ਥਿ, ਤਸ੍ਮਾ. ਸਬ੍ਬਮ੍ਪਿ ਏਤਂ ਤੂਲਨ੍ਤਿ ਯੋਜਨਾ. ਬਿਬ੍ਬੋਹਨੇ ਲੋਮਮ੍ਪਿ ਵਟ੍ਟਤੀਤਿ ਸਮ੍ਬਨ੍ਧੋ. ਲੋਮਮ੍ਪੀਤਿ ਪਿਸਦ੍ਦੇਨ ਤੂਲਂ ਅਪੇਕ੍ਖਤਿ. ਯਂਕਿਞ੍ਚਿ ਪੁਪ੍ਫਨ੍ਤਿ ਸਬ੍ਬਂ ਪੁਪ੍ਫਂ. ਪਤ੍ਤਂ ਪਾਪੁਣਿਤ੍ਵਾ ਸੁਦ੍ਧਂ ਤਮਾਲਪਤ੍ਤਮੇਵ ਨ ਵਟ੍ਟਤਿ, ਅਵਸੇਸਂ ਸਬ੍ਬਂ ਪਤ੍ਤਂ ਸੁਦ੍ਧਮ੍ਪਿ ਵਟ੍ਟਤੀਤਿ ਅਧਿਪ੍ਪਾਯੋ. ਪਞ੍ਚਵਿਧਨ੍ਤਿ ਉਣ੍ਣਚੋਲ਼ਵਾਕਤਿਣਪਣ੍ਣਵਸੇਨ ਪਞ੍ਚਪਕਾਰਂ.

‘‘ਉਪਡ੍ਢਕਾਯਪਮਾਣਾਨੀ’’ਤਿ ਇਮਿਨਾ ਅਦ੍ਧਕਾਯਿਕਾਨੀਤਿ ਏਤ੍ਥ ਅਦ੍ਧਸ੍ਸ ਕਾਯਸ੍ਸ ਪਮਾਣੇਨ ਕਤਾਨਿ ਅਦ੍ਧਕਾਯਿਕਾਨੀਤਿ ਅਤ੍ਥਂ ਦਸ੍ਸੇਤਿ. ਯੇਸੁ ਬਿਬ੍ਬੋਹਨੇਸੁ ਕਟਿਤੋ ਪਟ੍ਠਾਯ ਯਾਵ ਸੀਸਂ ਉਪਦਹਨ੍ਤਿ, ਤਾਨਿ ਬਿਬ੍ਬੋਹਨਾਨਿ ਅਦ੍ਧਕਾਯਿਕਾਨਿ ਨਾਮਾਤਿ ਯੋਜਨਾ. ਯਸ੍ਸਾਤਿ ਬਿਬ੍ਬੋਹਨਸ੍ਸ. ਵਿਤ੍ਥਾਰਤੋ ਮੁਟ੍ਠਿਰਤਨਂ ਹੋਤੀਤਿ ਸਮ੍ਬਨ੍ਧੋ. ਇਮਿਨਾ ਯਤ੍ਥ ਸਹ ਗੀਵਾਯ ਸਕਲਂ ਸੀਸਂ ਠਪੇਤੁਂ ਸਕ੍ਕਾ, ਤਸ੍ਸ ਮੁਟ੍ਠਿਰਤਨਂ ਵਿਤ੍ਥਾਰਪਮਾਣਨ੍ਤਿ ਦਸ੍ਸੇਤਿ. ‘‘ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨ’’ਨ੍ਤਿ ਇਦਂ ਬਿਬ੍ਬੋਹਨਸ੍ਸ ਉਭੋਸੁ ਅਨ੍ਤੇਸੁ ਠਪੇਤਬ੍ਬਚੋਲ਼ਪਮਾਣਂ ਸਨ੍ਧਾਯ ਵੁਤ੍ਤਂ. ਇਦਂ ਪਨ ਬਿਬ੍ਬੋਹਨਸ੍ਸ ਉਭੋਸੁ ਅਨ੍ਤੇਸੁ ਠਪਿਤਚੋਲ਼ਸ੍ਸ ਕੋਟਿਯਾ ਕੋਟਿਂ ਆਹਚ੍ਚ ਦ੍ਵਿਗੁਣਂ ਕਤਂ ਤਿਕਣ੍ਣਂ ਹੋਤਿ, ਤੇਸੁ ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨਮਨ੍ਤਰਂ ਵਿਦਤ੍ਥਿ ਚਤੁਰਙ੍ਗੁਲਂ ਹੋਤਿ, ਮਜ੍ਝਟ੍ਠਾਨਂ ਕੋਟਿਤੋ ਕੋਟਿਮਾਹਚ੍ਚ ਮੁਟ੍ਠਿਰਤਨਂ ਹੋਤਿ, ਇਦਂ ਪਨ ਬਿਬ੍ਬੋਹਨਂ ਤਿਕਣ੍ਣਂ ਹੋਤਿ. ਵਟ੍ਟਂ ਵਾ ਚਤੁਰਸ੍ਸਾਦਿਂ ਵਾ ਕਤ੍ਵਾ ਸਿਬ੍ਬਿਤਂ ਯਥਾ ਕੋਟਿਤੋ ਕੋਟਿ ਵਿਤ੍ਥਾਰਤੋ ਪੁਥੁਲਟ੍ਠਾਨਂ ਮੁਟ੍ਠਿਰਤਨਂ ਹੋਤਿ, ਏਵਂ ਸਿਬ੍ਬਿਤਬ੍ਬਂ. ਇਤੋ ਅਧਿਕਂ ਨ ਵਟ੍ਟਤਿ, ਊਨਂ ਪਨ ਵਟ੍ਟਤਿਯੇਵ. ਸੀਸੂਪਧਾਨਨ੍ਤਿ ਸੀਸਂ ਉਪਦਹਨ੍ਤਿ ਠਪੇਨ੍ਤਿ ਏਤ੍ਥਾਤਿ ਸੀਸੂਪਧਾਨਂ. ਬਿਬ੍ਬੋਹਨਾਨੀਤਿ ਵਿਸੇਸੇਨ, ਵਿਸੇਸਂ ਵਾ ਸੁਖਂ ਵਹਨ੍ਤੀਤਿ ਬਿਬ੍ਬੋਹਨਾਨਿ. ਉਪਰੀਤਿ ਬਿਬ੍ਬੋਹਨਾਨਂ ਉਪਰਿ. ਯਾਨਿ ਪਨ ਕਪ੍ਪਿਯਤੂਲਾਨਿ ਸਨ੍ਤੀਤਿ ਯੋਜਨਾ. ਮਹਨ੍ਤਮ੍ਪੀਤਿ ਪਿਸਦ੍ਦੋ ਖੁਦ੍ਦਕਂ ਪਨ ਪਗੇਵਾਤਿ ਦਸ੍ਸੇਤਿ. ਵਿਨਯਧਰਉਪਤਿਸ੍ਸਤ੍ਥੇਰੋ ਪਨ ਆਹਾਤਿ ਸਮ੍ਬਨ੍ਧੋ. ‘‘ਵਿਨਯਧਰ’’ ਇਤਿ ਪਦੇਨ ਫੁਸ੍ਸਦੇਵਤ੍ਥੇਰਤੋ ਵਿਸੇਸਂ ਦਸ੍ਸੇਤਿ. ਅਕਪ੍ਪਿਯਤੂਲਂ ਵਾਤਿ ਭਿਸਿਯਂ ਅਕਪ੍ਪਿਯਤੂਲਂ ਵਾ. ਬਿਬ੍ਬੋਹਨੇ ਹਿ ਅਕਪ੍ਪਿਯਤੂਲਂ ਨਾਮ ਨਤ੍ਥਿ.

ਪਞ੍ਚਭਿਸਿਯੋਤਿ ਏਤ੍ਥ ਵਾਕ੍ਯਭਾਵਞ੍ਚ ਅਸਮਾਹਾਰਦਿਗੁਭਾਵਞ੍ਚ ਪਟਿਕ੍ਖਿਪਨ੍ਤੋ ਆਹ ‘‘ਪਞ੍ਚਹਿ ਉਣ੍ਣਾਦੀਹਿ ਪੂਰਿਤਾ ਭਿਸਿਯੋ’’ਤਿ. ਇਮਿਨਾ ਪਞ੍ਚਹਿ ਉਣ੍ਣਾਦੀਹਿ ਪੂਰਿਤਾ ਭਿਸਿਯੋ ਪਞ੍ਚਭਿਸਿਯੋਤਿ ਵਚਨਤ੍ਥਂ ਦਸ੍ਸੇਤਿ. ਅਤ੍ਥਤੋ ਪਨ ਵਾਕ੍ਯਮ੍ਪਿ ਅਸਮਾਹਾਰਦਿਗੁਪਿ ਯੁਜ੍ਜਤੇਵ. ਕਸ੍ਮਾ ਪਞ੍ਚਗਣਨਾ ਹੋਤੀਤਿ ਆਹ ‘‘ਤੂਲਗਣਨਾਯ ਹੀ’’ਤਿਆਦਿ. ਹਿ ਯਸ੍ਮਾ ਤੂਲਗਣਨਾਯ ਏਤਾਸਂ ਗਣਨਾ ਵੁਤ੍ਤਾ, ਤਸ੍ਮਾ ਪਞ੍ਚਭਿਸਿਯੋ ਹੋਨ੍ਤੀਤਿ ਯੋਜਨਾ. ਤਤ੍ਥਾਤਿ ਉਣ੍ਣਾਦੀਸੁ ਪਞ੍ਚਸੁ. ਉਣ੍ਣਗ੍ਗਹਣੇਨ ਗਹਿਤਨ੍ਤਿ ਸਮ੍ਬਨ੍ਧੋ. ਕਮ੍ਬਲਮੇਵਾਤਿ ਉਣ੍ਣਾਮਯਂ ਕਮ੍ਬਲਮੇਵ. ਉਣ੍ਣਾਯ, ਉਣ੍ਣਂ ਵਾ ਪਕ੍ਖਿਪਿਤ੍ਵਾ ਕਤਾ ਭਿਸਿ ਉਣ੍ਣਾਭਿਸਿ. ਏਸੇਵ ਨਯੋ ਚੋਲ਼ਭਿਸਿਆਦੀਸੁ.

ਪਮਾਣਨਿਯਮੋਤਿ ਏਤ੍ਤਕਾ ਪਮਾਣਾਤਿ ਪਮਾਣਸ੍ਸ ਨਿਯਮੋ. ਮਞ੍ਚੇ ਅਤ੍ਥਰਿਤਬ੍ਬਾ ਭਿਸਿ ਮਞ੍ਚਭਿਸਿ. ਏਤਾਸਨ੍ਤਿ ਮਞ੍ਚਭਿਸਿਆਦੀਨਂ. ਯਂ ਏਤਂ ਤੂਲਨ੍ਤਿ ਯੋਜਨਾ. ਸੂਰਕੇਪੀਤਿ ਚਮ੍ਮਮਯਭਿਸਿਯਮ੍ਪਿ. ਏਤੇਨਾਤਿ ਕੁਰੁਨ੍ਦਿਯਂ ਵੁਤ੍ਤਵਚਨੇਨ ਸਿਦ੍ਧਂ ਹੋਤੀਤਿ ਸਮ੍ਬਨ੍ਧੋ.

ਮਞ੍ਚਭਿਸਿਨ੍ਤਿ ਮਞ੍ਚੇ ਅਤ੍ਥਰਿਤਬ੍ਬਂ ਭਿਸਿਂ. ‘‘ਅਤ੍ਥਰਣਤ੍ਥਾਯ ਸਂਹਰਨ੍ਤੀਤਿ ਯੁਜ੍ਜਤੀ’’ਤਿ ਇਮਿਨਾ ‘‘ਅਤ੍ਥਰਨ੍ਤੀ’’ਤਿ ਏਤ੍ਥ ਕਾਰਿਯੂਪਚਾਰੇਨ ਅਤ੍ਥੋ ਗਹੇਤਬ੍ਬੋਤਿ ਦਸ੍ਸੇਤਿ. ਅਤ੍ਥਰਣਾਯ ਹਿ ਸਂਹਰਣਂ ਕਾਰਣਂ ਨਾਮ, ਅਤ੍ਥਰਣਂ ਕਾਰਿਯਂ ਨਾਮ. ਉਪਰੀਤਿ ਭਿਸਿਛਵਿਯਾ ਉਪਰਿ. ਫੁਸਿਤਾਨੀਤਿ ਬਿਨ੍ਦੂਨਿ. ਭਿਤ੍ਤਿਕਮ੍ਮਨ੍ਤਿ ਭਿਤ੍ਤਿਯਂ ਨਾਨਾਵਣ੍ਣੇਹਿ ਰਾਜਿਕਰਣਂ ਵਿਯ ਕਤ੍ਤਬ੍ਬਂ ਕਮ੍ਮਂ.

੨੯੮. ‘‘ਇਕ੍ਕਾਸ’’ਨ੍ਤਿ ਨਾਮਂ ਨਿਯ੍ਯਾਸਸਿਲੇਸਾਨਂ ਨਾਮਨ੍ਤਿ ਆਹ ‘‘ਰੁਕ੍ਖਨਿਯ੍ਯਾਸਂ ਵਾ ਸਿਲੇਸਂ ਵਾ’’ਤਿ. ‘‘ਕੁਣ੍ਡਕਮਿਸ੍ਸਕਮਤ੍ਤਿਕ’’ਨ੍ਤਿ ਇਮਿਨਾ ਕੁਣ੍ਡਕੇਨ ਮਿਸ੍ਸਕਾ ਮਤ੍ਤਿਕਾ ਕੁਣ੍ਡਕਮਤ੍ਤਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਸਾਸਪਪਿਟ੍ਠਨ੍ਤਿ ਸਾਸਪਚੁਣ੍ਣਂ. ‘‘ਬਿਨ੍ਦੁ ਬਿਨ੍ਦੁ ਹੁਤ੍ਵਾ’’ਤਿ ਇਮਿਨਾ ਅਚ੍ਚੁਸ੍ਸਨ੍ਨਂ ਹੋਤੀਤਿ ਏਤ੍ਥ ਕਾਰਣੂਪਚਾਰਂ ਦਸ੍ਸੇਤਿ. ਅਚ੍ਚੁਸ੍ਸਨ੍ਨਞ੍ਹਿ ਕਾਰਣਂ ਹੋਤਿ, ‘‘ਬਿਨ੍ਦੁ ਬਿਨ੍ਦੁ ਹੁਤ੍ਵਾ’’ਤਿ ਠਾਨਂ ਕਾਰਿਯਂ ਹੋਤਿ. ‘‘ਪੁਞ੍ਜਿਤੁ’’ਨ੍ਤਿ ਸੋਧੇਤੁਂ. ਗਣ੍ਡੁਪ੍ਪਾਦਗੂਥਮਤ੍ਤਿਕਨ੍ਤਿ ਮਹਿਲਤਾਯ ਗੂਥਮਯਂ ਮਤ੍ਤਿਕਂ. ਇਮਿਨਾ ਲਣ੍ਡਮਤ੍ਤਿਕਨ੍ਤਿ ਏਤ੍ਥ ਲਣ੍ਡਸਦ੍ਦੋ ਗੂਥਪਰਿਯਾਯੋਤਿ ਦਸ੍ਸੇਤਿ.

੨੯੯. ਨ ਭਿਕ੍ਖਵੇ ਪਟਿਭਾਨਚਿਤ੍ਤਨ੍ਤਿ ਏਤ੍ਥ ‘‘ਇਤ੍ਥਿਰੂਪਕਂ ਪੁਰਿਸਰੂਪਕ’’ਨ੍ਤਿ ਪਾਲ਼ਿਯਂ ਵੁਤ੍ਤਤ੍ਤਾ ਕਿਂ ਇਤ੍ਥਿਪੁਰਿਸਰੂਪਮੇਵ ਨ ਵਟ੍ਟਤੀਤਿ ਆਹ ‘‘ਨ ਕੇਵਲ’’ਨ੍ਤਿਆਦਿ. ਤਿਰਚ੍ਛਾਨਰੂਪਮ੍ਪਿ ਕਾਤੁਂ ਵਾ ‘‘ਕਰੋਹੀ’’ਤਿ ਵਤ੍ਤੁਂ ਵਾ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਦ੍ਵਾਰਪਾਲਨ੍ਤਿ ਦ੍ਵਾਰਪਾਲਰੂਪਂ. ਪਸਾਦਨੀਯਾਨੀਤਿ ਪਸਾਦੇਤਬ੍ਬਾਨਿ, ਪਸਾਦੇਤੁਂ ਅਰਹਾਨੀਤਿ ਅਤ੍ਥੋ.

੩੦੦. ਏਕਙ੍ਗਣਾਤਿ ਅਵਿਹਾਰਟ੍ਠਾਨੇਨ ਸਮਾਨਭੂਮਿਭਾਗਾ. ਮੁਣ੍ਡਚ੍ਛੇਦਨਗਬ੍ਭੋਤਿ ਮੁਣ੍ਡੇਨ ਛਾਦੇਤਬ੍ਬੋ ਗਬ੍ਭੋ.

ਤਤ੍ਥਾਤਿ ਵਿਜ੍ਝਿਤਬ੍ਬਰੁਕ੍ਖੇ. ‘‘ਕਤ’’ਨ੍ਤਿ ਇਮਿਨਾ ਕੁਲਙ੍ਕਪਾਦਕਨ੍ਤਿ ਏਤ੍ਥ ਣਿਕਪਚ੍ਚਯਸ੍ਸ ਅਤ੍ਥਂ ਦਸ੍ਸੇਤਿ. ਤਂ ਆਹਰਿਮਂ ਭਿਤ੍ਤਿਪਾਦਂ ਪਤਿਟ੍ਠਾਪੇਤੁਨ੍ਤਿ ਸਮ੍ਬਨ੍ਧੋ. ਵਸ੍ਸਪਰਿਤ੍ਤਾਣਤ੍ਥਨ੍ਤਿ ਵਸ੍ਸੋਦਕਪਰਿਤ੍ਤਾਣਤ੍ਥਂ. ‘‘ਮਦ੍ਦਿਤਮਤ੍ਤਿਕ’’ਨ੍ਤਿ ਇਮਿਨਾ ਉਦ੍ਦਸੁਧਨ੍ਤਿ ਏਤ੍ਥ ਸੁਧਾਸਦ੍ਦਸ੍ਸ ਲੇਪਨਸੁਧਂ ਦਸ੍ਸੇਤਿ, ਭੋਜਨਸੁਧਂ ਨਿਵਤ੍ਤੇਤਿ.

ਪਮੁਖਨ੍ਤਿ ਵਿਹਾਰਸ੍ਸ ਪਮੁਖਂ. ਯਨ੍ਤਿ ਪਦੇਸਂ, ਹਨਨ੍ਤੀਤਿ ਸਮ੍ਬਨ੍ਧੋ. ਤਸ੍ਸ ਕਤਪਦੇਸਸ੍ਸਾਤਿ ਯੋਜਨਾ. ‘‘ਪਘਾਨ’’ਨ੍ਤਿਪਿ ਵੁਚ੍ਚਤੀਤਿ ਦੀਘਵਸੇਨ ‘‘ਪਘਾਨ’’ਨ੍ਤਿਪਿ ਵੁਚ੍ਚਤਿ. ਇਮਿਨਾ ਪੁਰਿਮਪਾਠੇ ਰਸ੍ਸਭਾਵਂ ਦੀਪੇਤਿ. ‘‘ਪਕੁਟ੍ਟ’’ਨ੍ਤਿਪਿ ਪਾਠੋਤਿ ਸਸਂਯੋਗਵਸੇਨ ‘‘ਪਕੁਟ੍ਟ’’ਨ੍ਤਿਪਿ ਪਾਠੋ. ਇਮਿਨਾ ਪੁਰਿਮਪਾਠੇ ਨਿਸਂਯੋਗਭਾਵਂ ਦਸ੍ਸੇਤਿ. ਵਂਸਨ੍ਤਿ ਵੇਲ਼ੁਂ. ਤਤੋਤਿ ਵਂਸਤੋ. ‘‘ਓਸਾਰੇਤ੍ਵਾ ਕਤ’’ਨ੍ਤਿ ਇਮਿਨਾ ਓਸਾਰੇਤ੍ਵਾ ਕਤਂ ਓਸਾਰਕਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਛਦਨਪਮੁਖ’’ਨ੍ਤਿ ਇਮਿਨਾ ਣਿਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਚਕ੍ਕਲਯੁਤ੍ਤੋਤਿ ਚਕ੍ਕਲੇਨ ਯੁਤ੍ਤੋ.

੩੦੧. ਪਾਨੀਯਦਾਨਭਾਜਨਨ੍ਤਿ ਪਾਨੀਯਂ ਦੇਤਿ ਅਨੇਨਾਤਿ ਪਾਨੀਯਦਾਨਂ, ਤਮੇਵ ਭਾਜਨਂ ਪਾਨੀਯਦਾਨਭਾਜਨਂ. ‘‘ਉਲ਼ੁਙ੍ਕੋ ਚ ਥਾਲਕਞ੍ਚਾ’’ਤਿ ਇਮਿਨਾ ਦ੍ਵੇ ਪਾਨੀਯਸਙ੍ਖਸ੍ਸ ਅਨੁਲੋਮਾਨੀਤਿ ਯੋਜਨਾ.

੩੦੩. ਦ੍ਵਾਰਥਕਨਕਨ੍ਤਿ ਦ੍ਵਾਰਂ ਥਕੇਤਿ ਅਨੇਨਾਤਿ ਦ੍ਵਾਰਥਕਨਕਂ. ਗਾਮਦ੍ਵਾਰੇਸੁ ਦ੍ਵਾਰਥਕਨਕਂ ਵਿਯ ਚਕ੍ਕਲਯੁਤ੍ਤਂ ਦ੍ਵਾਰਥਕਨਕਨ੍ਤਿ ਯੋਜਨਾ.

੩੦੫. ਅਸ੍ਸਤਰਿਰਥਾਤਿ ਅਸ੍ਸਾਨਂ ਵਿਸੇਸੇਨ, ਅਤਿਸਯੇਨ ਵਾਤਿ ਅਸ੍ਸਤਰੋ, ਅਥ ਵਾ ਪਕਤਿਅਸ੍ਸੇ ਤਰਤਿ ਅਤਿਕ੍ਕਮਤੀਤਿ ਅਸ੍ਸਤਰੋ, ਸੋ ਏਤੇਸੁ ਰਥੇਸੁ ਯੁਜ੍ਜਿਤਬ੍ਬੋਤਿ ਅਸ੍ਸਤਰੀ, ਤੇਯੇਵ ਰਥਾਤਿ ਅਸ੍ਸਤਰਿਰਥਾਤਿ ਦਸ੍ਸੇਨ੍ਤੋ ਆਹ ‘‘ਅਸ੍ਸਤਰਯੁਤ੍ਤਾ ਰਥਾ ਅਸ੍ਸਤਰਿਰਥਾ’’ਤਿ. ਤਤ੍ਥ ‘‘ਅਸ੍ਸਤਰਯੁਤ੍ਤਾ’’ਤਿ ਇਮਿਨਾ ‘‘ਅਸ੍ਸਤਰੀ’’ਤਿ ਪਦਸ੍ਸ ਅਸ੍ਸਤ੍ਥਿਤਦ੍ਧਿਤਂ ਦਸ੍ਸੇਤਿ. ਆਮੁਤ੍ਤਮਣਿਕੁਣ੍ਡਲਾਤਿ ਪਦਸ੍ਸ ‘‘ਸਤਂ ਕਞ੍ਞਾ ਸਹਸ੍ਸਾਨੀ’’ਤਿ ਪਦੇਨ ਸਮ੍ਬਨ੍ਧਿਤਬ੍ਬਤ੍ਤਾ ਵੁਤ੍ਤਂ ‘‘ਆਮੁਤ੍ਤਮਣਿਕੁਣ੍ਡਲਾਨੀ’’ਤਿ. ਇਮਿਨਾ ਨਿਕਾਰਸ੍ਸ ਆਕਾਰੋ ਹੋਤੀਤਿ ਦਸ੍ਸੇਤਿ. ਕਣ੍ਣੇਸੁ ਆਮੁਤ੍ਤਂ ਮਣਿਕੁਣ੍ਡਲਂ ਏਤਾਸਨ੍ਤਿ ਆਮੁਤ੍ਤਮਣਿਕੁਣ੍ਡਲਾ ਕਞ੍ਞਾਯੋ.

ਖਨ੍ਧਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ’’ਤਿ. ਸੀਤਿਭੂਤੋਤਿ ਏਤ੍ਥ ਕਿਲੇਸਾਤਪਾਨਂ ਅਭਾਵੇਨੇਵ ਸੀਤਿਭੂਤੋ, ਨ ਅਞ੍ਞੇਸਨ੍ਤਿ ਆਹ ‘‘ਕਿਲੇਸਾਤਪਾਭਾਵੇਨਾ’’ਤਿ. ‘‘ਕਿਲੇਸੂਪਧਿਅਭਾਵੇਨਾ’’ਤਿ ਇਮਿਨਾ ਨਿਰੁਪਧੀਤਿ ਏਤ੍ਥ ਖਨ੍ਧੂਪਧਿਅਭਿਸਙ੍ਖਾਰੂਪਧਿਅਭਾਵੇਨਾਤਿ ਅਤ੍ਥਂ ਪਟਿਕ੍ਖਿਪਤਿ.

ਆਸਤ੍ਤਿਯੋਤਿ ਏਤ੍ਥ ਪੁਨਪ੍ਪੁਨਂ ਵਿਸਯੇਸੁ, ਭਵੇਸੁ ਵਾ ਸਞ੍ਜਨ੍ਤੀਤਿ ਆਸਤ੍ਤਿਯੋਤਿ ਦਸ੍ਸੇਨ੍ਤੋ ਆਹ ‘‘ਰੂਪਾਦੀਸੂ’’ਤਿਆਦਿ. ਪਤ੍ਥਨਾਯੋਤਿ ਤਣ੍ਹਾਯੋ. ਇਮਿਨਾ ਆਸਤ੍ਤੀਨਂ ਸਰੂਪਂ ਦਸ੍ਸੇਤਿ. ‘‘ਛਿਨ੍ਦਿਤ੍ਵਾ’’ਤਿ ਇਮਿਨਾ ਛੇਤ੍ਵਾਤਿ ਏਤ੍ਥ ਛੇਧਾਤੁਯਾ ਛੇਦਨਤ੍ਥਂ ਦਸ੍ਸੇਤਿ. ਵਿਨੇਯ੍ਯਹਦਯੇ ਦਰਨ੍ਤਿ ਏਤ੍ਥ ‘‘ਵਿਨੇਯ੍ਯਾ’’ਤਿ ਪਦਸ੍ਸ ਤ੍ਵਾਪਚ੍ਚਯਨ੍ਤਭਾਵਞ੍ਚ ਹਦਯਸਦ੍ਦਸ੍ਸ ਚਿਤ੍ਤਵਾਚਕਭਾਵਞ੍ਚ ਦਰਥਸਰੂਪਞ੍ਚ ਦਸ੍ਸੇਨ੍ਤੋ ਆਹ ‘‘ਚਿਤ੍ਤੇ ਕਿਲੇਸਦਰਥਂ ਵਿਨੇਤ੍ਵਾ’’ਤਿ. ਤਤ੍ਥ ‘‘ਚਿਤ੍ਤੇ’’ਤਿ ਇਮਿਨਾ ਹਦਯਸਦ੍ਦਸ੍ਸਤ੍ਥਂ ਦਸ੍ਸੇਤਿ, ‘‘ਕਿਲੇਸ’’ ਇਤਿ ਪਦੇਨ ਦਰਥਸਰੂਪਂ, ‘‘ਵਿਨੇਤ੍ਵਾ’’ਤਿ ਇਮਿਨਾ ਤ੍ਵਾਪਚ੍ਚਯਨ੍ਤਭਾਵਂ ਦਸ੍ਸੇਤਿ. ਵਯਕਰਣਨ੍ਤਿ ਪਰਿਬ੍ਬਯਮੂਲਂ. ਤਞ੍ਹਿ ਵਯਂ ਕਰਿਯਤਿ ਅਨੇਨਾਤਿ ਵਯਕਰਣਨ੍ਤਿ ਵੁਚ੍ਚਤਿ. ਇਮਿਨਾ ਵਯਸ੍ਸ ਕਰਣਂ ਵਯਾਯਿਕਂ, ਕਰਣਤ੍ਥੇ ਆਯਿਕਪਚ੍ਚਯੋ, ਵਯਾਯਿਕਮੇਵ ਵੇਯ੍ਯਾਯਿਕਨ੍ਤਿ ਅਤ੍ਥਂ ਦਸ੍ਸੇਤਿ.

੩੦੭. ਆਦੇਯ੍ਯਵਾਚੋਤਿ ਏਤ੍ਥ ਆਦਿਯਿਤਬ੍ਬਾਤਿ ਆਦੇਯ੍ਯਾ, ਸਾ ਵਾਚਾ ਏਤਸ੍ਸਾਤਿ ਆਦੇਯ੍ਯਵਾਚੋਤਿ ਦਸ੍ਸੇਨ੍ਤੋ ਆਹ ‘‘ਤਸ੍ਸ ਵਚਨ’’ਨ੍ਤਿਆਦਿ. ਤਤ੍ਥ ਤਸ੍ਸਾਤਿ ਅਨਾਥਪਿਣ੍ਡਿਕਸ੍ਸ. ਸਧਨਾਤਿ ਸਂਵਿਜ੍ਜਮਾਨ ਧਨਾ, ਅਤ੍ਤਨੋ ਵਾ ਧਨਵਨ੍ਤੋ. ਮਨ੍ਦਧਨਾਤਿ ਅਪ੍ਪਧਨਾ. ਅਦਾਸੀਤਿ ਅਨਾਥਪਿਣ੍ਡਿਕੋ ਅਦਾਸਿ. ਇਤੀਤਿ ਏਵਂ, ਦਤ੍ਵਾ ਕਤ੍ਵਾਤਿ ਸਮ੍ਬਨ੍ਧੋ. ਸੋਤਿ ਅਨਾਥਪਿਣ੍ਡਿਕੋ, ਅਗਮਾਸੀਤਿ ਸਮ੍ਬਨ੍ਧੋ.

ਕਹਾਪਣੇ ਸਨ੍ਥਰੀਤਿ ਸਮ੍ਬਨ੍ਧੋ. ਕੋਟਿਯਾ ਕਰਣਭੂਤਾਯ, ਆਧਾਰਭੂਤਾਯ ਵਾ. ਪਟਿਪਾਤੇਤ੍ਵਾਤਿ ਪਟਿਹਨਾਪੇਤ੍ਵਾ. ਤਤ੍ਥ ਤਸ੍ਮਿਂ ਠਾਨੇ ਯੇ ਰੁਕ੍ਖਾ ਵਾ ਯਾ ਪੋਕ੍ਖਰਣਿਯੋ ਵਾ ਤਿਟ੍ਠਨ੍ਤੀਤਿ ਯੋਜਨਾ. ਤੇਸਨ੍ਤਿ ਤਾਸਂ ਰੁਕ੍ਖਪੋਕ੍ਖਰਣੀਨਂ. ਸਾਮਞ੍ਞਞ੍ਹਿ ਅਪੇਕ੍ਖਿਤ੍ਵਾ ਪੁਲ੍ਲਿਙ੍ਗਵਸੇਨ ਵੁਤ੍ਤਂ. ਪਰਿਕ੍ਖੇਪਪਮਾਣਨ੍ਤਿ ਪਰਿਣਾਹਸ੍ਸ ਪਮਾਣਂ. ਅਸ੍ਸਾਤਿ ਅਨਾਥਪਿਣ੍ਡਿਕਸ੍ਸ.

ਏਵਂ ਬਹੁਧਨਂ ਚਜਨ੍ਤਸ੍ਸਾਪਿ ਗਹਪਤਿਨੋਤਿ ਯੋਜਨਾ. ਕੋਟ੍ਠਕਂ ਮਾਪੇਸੀਤਿ ਏਤ੍ਥ ਅਞ੍ਞੇ ਕੋਟ੍ਠਕੇ ਪਟਿਕ੍ਖਿਪਨ੍ਤੋ ਆਹ ‘‘ਦ੍ਵਾਰਕੋਟ੍ਠਕਪਾਸਾਦ’’ਨ੍ਤਿ.

ਵਿਹਾਰਾਦਯੋਤਿ ਏਤ੍ਥ ਆਦਿਸਦ੍ਦੇਨ ਪਾਲ਼ਿਯਂ ਆਗਤੇ ਪਰਿਵੇਣਾਦਯੋ ਚੁਦ੍ਦਸ ਉਪਕਰਣੇ ਸਙ੍ਗਣ੍ਹਾਤਿ. ਅਮ੍ਹਾਕਂ ਭਗਵਤੋ ਵਿਹਾਰਕਾਰਾਪਨਪਸਙ੍ਗੇਨ ਸਤ੍ਤਨ੍ਨਮ੍ਪਿ ਬੁਦ੍ਧਾਨਂ ਵਿਹਾਰਕਾਰਾਪਨਂ ਦਸ੍ਸੇਨ੍ਤੋ ਆਹ ‘‘ਵਿਪਸ੍ਸਿਸ੍ਸਾ’’ਤਿਆਦਿ. ਤਤ੍ਥ ਵਿਪਸ੍ਸਿਸ੍ਸ ਭਗਵਤੋ ਵਿਹਾਰਂ (ਦੀ. ਨਿ. ਅਟ੍ਠ. ੨.੧੨) ਕਾਰਾਪੇਸੀਤਿ ਸਮ੍ਬਨ੍ਧੋ. ਤਿਗਾਵੁਤਪ੍ਪਮਾਣਂ ਭੂਮਿਂ ਸੁਵਣ੍ਣਯਟ੍ਠਿਸਨ੍ਥਰੇਨ ਕਿਣਿਤ੍ਵਾ ਵਿਹਾਰਂ ਕਾਰਾਪੇਸੀਤਿ ਯੋਜਨਾ. ਏਸੇਵ ਨਯੋ ਪਰਤੋਪਿ. ਅਟ੍ਠਕਰੀਸਪ੍ਪਮਾਣਾ ਭੂਮਿ ਉਸਭੇਨ ਦਸਉਸਭਪ੍ਪਮਾਣਾ ਯਟ੍ਠਿਯਾ ਦ੍ਵਿਸਤਯਟ੍ਠਿਪ੍ਪਮਾਣਾ ਹੋਤੀਤਿ ਦਟ੍ਠਬ੍ਬਂ. ‘‘ਏਵਂ ਅਨੁਪੁਬ੍ਬੇਨ ਪਰਿਹਾਯਨ੍ਤੀ’’ਤਿ ਵਤ੍ਵਾ ਸਬ੍ਬਜਨਂ ਸਂਵੇਜੇਨ੍ਤੋ ਆਹ ‘‘ਸਮ੍ਪਤ੍ਤਿਯੋ ਹੀ’’ਤਿਆਦਿ. ਤਤ੍ਥ ਯਸ੍ਮਾ ਸਮ੍ਪਤ੍ਤਿਯੋ ਪਰਿਹਾਯਨ੍ਤਿ, ਤਸ੍ਮਾ ਅਲਮੇਵ ਸਬ੍ਬਸਮ੍ਪਤ੍ਤੀਸੁ ਵਿਰਜ੍ਜਿਤੁਂ, ਅਲਂ ਏਵ ਸਬ੍ਬਸਮ੍ਪਤ੍ਤੀਹਿ ਵਿਮੁਚ੍ਚਿਤੁਨ੍ਤਿ ਯੋਜਨਾ. ‘‘ਸਬ੍ਬਸਮ੍ਪਤ੍ਤੀਸੂ’’ਤਿ ਪਦਞ੍ਹਿ ‘‘ਵਿਮੁਚ੍ਚਿਤੁ’’ਨ੍ਤਿ ਪਦੇਨ ਵਿਭਤ੍ਤਿਪਰਿਣਾਮਂ ਕਤ੍ਵਾ ਸਮ੍ਬਨ੍ਧਿਤਬ੍ਬਂ.

੩੦੮. ਖਣ੍ਡਫੁਲ੍ਲਸਦ੍ਦਾਨਂ ਅਧਿਕਰਣਭਾਵਂ ਦਸ੍ਸੇਨ੍ਤੋ ਆਹ ‘‘ਖਣ੍ਡਨ੍ਤਿ ਛਿਨ੍ਨੋਕਾਸੋ. ਫੁਲ੍ਲਨ੍ਤਿ ਫਲਿਤੋਕਾਸੋ’’ਤਿ. ਤਤ੍ਥ ‘‘ਛਿਨ੍ਨੋਕਾਸੋ’’ਤਿ ਇਮਿਨਾ ਖਣ੍ਡਤਿ ਛਿਜ੍ਜਤਿ ਏਤ੍ਥਾਤਿ ਖਣ੍ਡਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਫਲਿਤੋਕਾਸੋ’’ਤਿ ਇਮਿਨਾ ਫੁਲ੍ਲਤਿ ਫਲਤਿ ਏਤ੍ਥਾਤਿ ਫੁਲ੍ਲਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਪਟਿਸਙ੍ਖਰਿਸ੍ਸਤੀਤਿ ਏਤ੍ਥ ਪਾਟਿਸਦ੍ਦਸ੍ਸ ਪਾਕਤਿਕਤ੍ਥਭਾਵਂ, ਸਙ੍ਖਰਿਸ੍ਸਤਿਸਦ੍ਦਸ੍ਸ ਚ ਕਰਧਾਤੁਯਾ ਨਿਪ੍ਫਨ੍ਨਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪਾਕਤਿਕਂ ਕਰਿਯਤੀ’’ਤਿ.

੩੧੦. ਥੇਰੋਤਿ ਸਾਰਿਪੁਤ੍ਤਤ੍ਥੇਰੋ, ਆਗਚ੍ਛਤੀਤਿ ਸਮ੍ਬਨ੍ਧੋ. ਇਦਨ੍ਤਿ ਗਿਲਾਨਪਟਿਜਗ੍ਗਨਾਦਿ. ਅਸ੍ਸਾਤਿ ਥੇਰਸ੍ਸ. ਅਗ੍ਗਾਸਨਨ੍ਤਿਆਦੀਸੁ ਅਗ੍ਗਸਦ੍ਦੋ ਪਠਮਤ੍ਥੋਪਿ ਉਤ੍ਤਮਤ੍ਥੋਪਿ ਯੁਜ੍ਜਤਿ. ਤੇਨ ਵੁਤ੍ਤਂ ‘‘ਥੇਰਾਸਨ’’ਨ੍ਤਿਆਦਿ. ਅਨ੍ਤਰਾ ਸਤ੍ਥੀਨਨ੍ਤਿ ਏਤ੍ਥ ਅਨ੍ਤਰਾਤਿ ਭੁਮ੍ਮਤ੍ਥੇ ਨਿਸ੍ਸਕ੍ਕਵਚਨਂ. ਸਤ੍ਥਿਸਦ੍ਦੋ ਚ ਊਰੁਸਙ੍ਖਾਤੋ ਪਾਦਵਾਚਕੋਤਿ ਆਹ ‘‘ਚਤੁਨ੍ਨਂ ਪਾਦਾਨਂ ਅਨ੍ਤਰੇ’’ਤਿ.

੩੧੫. ਪਤਿਟ੍ਠਾਪੇਸੀਤਿ ਏਤ੍ਥ ਕਂ ਵਯਂ ਕਤ੍ਵਾ ਪਤਿਟ੍ਠਾਪੇਸੀਤਿ ਆਹ ‘‘ਅਟ੍ਠਾਰਸਕੋਟਿਪਰਿਚ੍ਚਾਗਂ ਕਤ੍ਵਾ’’ਤਿ. ਏਵਨ੍ਤਿਆਦਿ ਨਿਗਮਨਂ.

ਆਸਨਪ੍ਪਟਿਬਾਹਨਾਦਿਕਥਾ

੩੧੬. ਵਿਪ੍ਪਕਤਭੋਜਨੇਨਾਤਿ ਏਤ੍ਥ ਵਿਪ੍ਪਕਤਸਦ੍ਦੋ ਅਨਿਟ੍ਠਿਤਪਰਿਯਾਯੋਤਿ ਆਹ ‘‘ਅਨਿਟ੍ਠਿਤੇ ਭੋਜਨੇ’’ਤਿ. ਪਕਿਰਿਯਿਤ੍ਥ, ਪਕਿਰਿਯਿਸ੍ਸਤੇ ਵਾ ਪਕਤਂ, ਨ ਪਕਤਂ ਵਿਪ੍ਪਕਤਨ੍ਤਿ ਵਿਗ੍ਗਹੋ ਕਾਤਬ੍ਬੋ, ਅਤ੍ਥਤੋ ਪਨ ‘‘ਕਰਿਯਮਾਨੋ ਅਨਿਟ੍ਠਿਤੋ’’ਤਿ ਵੁਤ੍ਤਂ ਹੋਤਿ. ਏਤ੍ਥਾਤਿ ਠਾਨੇ. ਅਤਿਸਮੀਪਨ੍ਤਿ ਭੁਞ੍ਜਮਾਨਸ੍ਸ ਭਿਕ੍ਖੁਸ੍ਸ ਅਤਿਆਸਨ੍ਨਂ. ਤਸ੍ਸਾਤਿ ਭੁਞ੍ਜਮਾਨਸ੍ਸ ਭਿਕ੍ਖੁਸ੍ਸ. ਪਿਵਿਤ੍ਵਾ ਵਾਤਿ ਯਾਗੁਂ ਪਿਵਿਤ੍ਵਾ ਵਾ. ਖਾਦਿਤ੍ਵਾ ਵਾਤਿ ਖਜ੍ਜਕਂ ਖਾਦਿਤ੍ਵਾ ਵਾ. ਰਿਤ੍ਤਹਤ੍ਥਮ੍ਪੀਤਿ ਤੁਚ੍ਛਹਤ੍ਥਮ੍ਪਿ. ਪਿਸਦ੍ਦੇਨ ਆਮਿਸਹਤ੍ਥਂ ਪਨ ਪਗੇਵਾਤਿ ਦਸ੍ਸੇਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸੋਤਿ ਰਿਤ੍ਤਹਤ੍ਥੋ ਭਿਕ੍ਖੁ.

ਆਪਤ੍ਤਿਨ੍ਤਿ ਦੁਕ੍ਕਟਾਪਤ੍ਤਿਂ. ਯਨ੍ਤਿ ਵਿਪ੍ਪਕਤਭੋਜਨਂ ਭਿਕ੍ਖੁਂ. ਸੋਤਿ ਪਚ੍ਛਾ ਆਗਤੋ ਭਿਕ੍ਖੁ. ਅਯਞ੍ਚ ਭਿਕ੍ਖੂਤਿ ਵਿਪ੍ਪਕਤਭੋਜਨੋ ਅਯਞ੍ਚ ਭਿਕ੍ਖੁ. ਤੇਨਾਤਿ ਵਿਪ੍ਪਕਤਭੋਜਨੇਨ ਨਵਕੇਨ ਵਾ ਵੁਡ੍ਢਤਰੇਨ ਵਾ ਭਿਕ੍ਖੁਨਾ. ਕਿਂ ਨਵਕੇਨ ਵੁਡ੍ਢਤਰਂ ਆਣਾਪੇਤੁਂ ਵਟ੍ਟਤੀਤਿ ਆਹ ‘‘ਵੁਡ੍ਢਤਰਂ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸੋਤਿ ਵੁਡ੍ਢਤਰੋ ਭਿਕ੍ਖੁ. ਤਤੋਤਿ ਉਦਕਂ ਆਹਰਾਪੇਤੁਂ ਆਣਤ੍ਤਿਤੋ. ਯਨ੍ਤਿ ਕਮ੍ਮਂ.

ਯੋਤਿ ਭਿਕ੍ਖੁ. ‘‘ਏਵਰੂਪਸ੍ਸਾ’’ਤਿ ਪਦੇਨ ਤਸ੍ਸ ਨਿਯਮਨਂ ਵੇਦਿਤਬ੍ਬਂ. ਕਾਸਸ੍ਸ ਖੇਲ਼ਮਲ੍ਲਕਂ ਠਪੇਤਬ੍ਬਂ. ਭਗਨ੍ਦਰਅਤਿਸਾਰਾਨਂ ਵਚ੍ਚਕਪਾਲਂ ਠਪੇਤਬ੍ਬਂ. ਅਞ੍ਞੇਸਂ ਅਞ੍ਞਾਨਿ ਠਪੇਤਬ੍ਬਾਨਿ ਹੋਨ੍ਤਿ. ਤੇਨ ਵੁਤ੍ਤਂ ‘‘ਖੇਲ਼…ਪੇ… ਹੋਨ੍ਤੀ’’ਤਿ. ਯਸ੍ਮਿਂਤਿ ਯਸ੍ਮਿਂ ਗਿਲਾਨੇ. ਯੋਪਿ ਭੇਸਜ੍ਜਂ ਕਰੋਤੀਤਿ ਸਮ੍ਬਨ੍ਧੋ. ਲੇਸਕਪ੍ਪੇਨਾਤਿ ਏਤ੍ਥ ਲੇਸਕਪ੍ਪਸਦ੍ਦਾਨਂ ਅਤ੍ਥਤੋ ਏਕਤ੍ਤਾ ਵੁਤ੍ਤਂ ‘‘ਅਪ੍ਪਕੇਨ ਸੀਸਾਬਾਧਾਦਿਮਤ੍ਤੇਨਾ’’ਤਿ. ਭਿਕ੍ਖੂ ਗਣੇਤ੍ਵਾਤਿ ਏਤ੍ਥ ਗਣਂ ਞਤ੍ਵਾਤਿ ਦਸ੍ਸੇਨ੍ਤੋ ਆਹ ‘‘ਪਰਿਚ੍ਛੇਦਂ ਞਤ੍ਵਾ’’ਤਿ. ਤਤ੍ਥ ‘‘ਪਰਿਚ੍ਛੇਦ’’ਨ੍ਤਿ ਇਮਿਨਾ ਗਣਸਦ੍ਦਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ‘‘ਞਤ੍ਵਾ’’ਤਿ ਇਮਿਨਾ ਇਧਾਤੁਯਾ ਅਤ੍ਥਂ ਦਸ੍ਸੇਤਿ.

ਸੇਨਾਸਨਗ੍ਗਾਹਕਥਾ

੩੧੮. ਸੇਯ੍ਯਾਤਿ ਕਾਯਪਸਾਰਣਸਙ੍ਖਾਤਂ ਸਯਨਕਿਰਿਯਂ ਪਟਿਕ੍ਖਿਪਿਤ੍ਵਾ ਸੇਨਾਸਨਸਙ੍ਖਾਤਂ ਸੇਯ੍ਯਂ ਦਸ੍ਸੇਨ੍ਤੋ ਆਹ ‘‘ਮਞ੍ਚਟ੍ਠਾਨਾਨੀ’’ਤਿ. ‘‘ਸੇਯ੍ਯਾਪਰਿਚ੍ਛੇਦੇਨਾ’’ਤਿ ਇਮਿਨਾ ਸੇਯ੍ਯਗ੍ਘੇਨਾਤਿ ਏਤ੍ਥ ਅਗ੍ਘਸਦ੍ਦਸ੍ਸ ਪੂਜਨਤ੍ਥਂ ਪਟਿਕ੍ਖਿਪਿਤ੍ਵਾ ਪਰਿਚ੍ਛੇਦਨਤ੍ਥਂ ਦੀਪੇਤਿ. ਏਤ੍ਥ ਚ ਅਗ੍ਘਸਦ੍ਦਸ੍ਸ ਚਤੁਤ੍ਥਕ੍ਖਰੇਨ ਯੁਤ੍ਤਭਾਵੋ ਹੇਟ੍ਠਾ ਸਮੁਚ੍ਚਯਕ੍ਖਨ੍ਧਕਵਣ੍ਣਨਾ (ਚੂਲ਼ਵ. ਅਟ੍ਠ. ੧੦੨) ਯੋਜਨਾਯ ਵੁਤ੍ਤੋਯੇਵ. ਕਾਲਨ੍ਤਿ ਸੇਯ੍ਯਾਪਟਿਗ੍ਗਹਣਸ੍ਸ ਕਾਲਂ. ਗਾਹਿਯਮਾਨਾਤਿ ਗਾਹਾਪਿਯਮਾਨਾ. ‘‘ਅਤਿਰੇਕਾਨਿ ਅਹੇਸੁ’’ਨ੍ਤਿ ਇਮਿਨਾ ਉਸ੍ਸਾਰਯਿਂਸੂਤਿ ਏਤ੍ਥ ਉਦ੍ਧਂ ਸਾਰਯਿਂਸੁ ਗਚ੍ਛਿਂਸੁ ਪਵਤ੍ਤਿਂਸੂਤਿ ਅਤ੍ਥਂ ਦਸ੍ਸੇਤਿ. ਅਤਿਰੇਕਾਨੀਤਿ ਚ ਭਿਕ੍ਖੁਪਰਿਚ੍ਛੇਦਤੋ ਸੇਯ੍ਯਾਪਰਿਚ੍ਛੇਦਾਨਿ ਅਤਿਰੇਕਾਨਿ. ਅਨੁਭਾਗਨ੍ਤਿ ਏਤ੍ਥ ਅਨੁ ਪਚ੍ਛਾ ਦਾਤਬ੍ਬੋ ਭਾਗੋ ਅਨੁਭਾਗੋਤਿ ਦਸ੍ਸੇਨ੍ਤੋ ਆਹ ‘‘ਪੁਨ ਅਪਰਮ੍ਪਿ ਭਾਗਂ ਦਾਤੁ’’ਨ੍ਤਿ. ਅਤਿਮਨ੍ਦੇਸੂਤਿਆਦਿਵਚਨੇਨ ਕਿਞ੍ਚਿਮਨ੍ਦੇਸੁ ਭਿਕ੍ਖੂਸੁ ਏਕੇਕਸ੍ਸ ਭਿਕ੍ਖੁਨੋ ਦ੍ਵੇ ਤਿਸ੍ਸੋ ਸੇਯ੍ਯਾ ਦਾਤਬ੍ਬਾ. ਯਤੋ ਕਿਞ੍ਚਿਮਨ੍ਦੇਸੁ ਭਿਕ੍ਖੂਸੁ ਦ੍ਵੇ ਤਯੋ ਵਿਹਾਰਾ ਦਾਤਬ੍ਬਾਤਿ ਅਤ੍ਥੋਪਿ ਗਹੇਤਬ੍ਬੋ. ਤਤ੍ਥਾਤਿ ‘‘ਨ ਅਕਾਮਾ ਦਾਤਬ੍ਬੋ’’ਤਿ ਵਚਨੇ. ਅਨੁਭਾਗੇ ਗਹਿਤੇਤਿ ਯੋਜਨਾ. ਯੇਨ ਅਨੁਭਾਗੋ ਚ ਪਠਮਭਾਗੋ ਚ ਗਹਿਤੋ, ਸੋ ਭਿਕ੍ਖੂਤਿ ਯੋਜਨਾ.

‘‘ਉਪਚਾਰਸੀਮਤੋ ਬਹੀ’’ਤਿ ਇਮਿਨਾ ਨਿਸ੍ਸੀਮੇਤਿ ਏਤ੍ਥ ਸੀਮਤੋ ਬਹਿ ਨਿਕ੍ਖਨ੍ਤਂ, ਨਿਸਿਨ੍ਨਂ ਵਾ ਨਿਸ੍ਸੀਮਨ੍ਤਿ ਅਤ੍ਥਂ ਦਸ੍ਸੇਤਿ. ਉਪਚਾਰਸੀਮਾਯ ਆਵਾਸਵਡ੍ਢਨਵਸੇਨ ਅਤਿਵਿਤ੍ਥਾਰਤ੍ਤਾ ਵੁਤ੍ਤਂ ‘‘ਦੂਰੇ ਠਿਤਸ੍ਸਾਪੀ’’ਤਿ. ਉਤੁਕਾਲੇਪੀਤਿ ਹੇਮਨ੍ਤਗਿਮ੍ਹਕਾਲੇਪਿ. ਤਸ੍ਮਿਞ੍ਹਿ ਕਾਲੇ ਸੀਤਉਣ੍ਹਉਤੁ ਤਿਖਿਣੋ ਹੋਤਿ, ਤਸ੍ਮਾ ਤਸ੍ਸੇਵ ਵਿਸੇਸੇਨ ਉਤੁਕਾਲੋਤਿ ਨਾਮਂ ਪਾਕਟਂ ਹੋਤਿ. ਤੇਨ ਵੁਤ੍ਤਂ ‘‘ਹੇਮਨ੍ਤਗਿਮ੍ਹਕਾਲੇਪੀ’’ਤਿ. ਪਿਸਦ੍ਦੇਨ ਵਸ੍ਸਕਾਲਂ ਅਪੇਕ੍ਖਤਿ. ਪੁਰਿਮਵਸ੍ਸੂਪਨਾਯਿਕਦਿਵਸੇ ਗਾਹੋ ਪੁਰਿਮਕੋ, ਪਚ੍ਛਿਮਵਸ੍ਸੂਪਨਾਯਿਕਦਿਵਸੇ ਗਾਹੋ ਪਚ੍ਛਿਮਕੋ.

ਅਨ੍ਤਰਾ ਦ੍ਵੀਹਿ ਵਸ੍ਸੂਪਨਾਯਿਕਦਿਵਸੇਹਿ ਮੁਤ੍ਤੇ ਕਾਲੇ ਗਾਹੋ ਅਨ੍ਤਰਾਮੁਤ੍ਤਕੋ. ਏਕਸ੍ਮਿਂ ਵਿਹਾਰੇਤਿ ਏਕਿਸ੍ਸਂ ਵਿਹਾਰਸੀਮਾਯਂ. ਸੇਨਾਸਨਸਾਮਿਕਾਤਿ ਸੇਨਾਸਨਦਾਯਕਾ, ਦੇਨ੍ਤੀਤਿ ਸਮ੍ਬਨ੍ਧੋ. ਤਨ੍ਤਿ ਸੇਨਾਸਨਂ. ਆਵਾਸਿਕਾ ਨ ਓਲੋਕੇਨ੍ਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੇਨਾਸਨੇ. ਪਲੁਜ੍ਜਨ੍ਤਮ੍ਪੀਤਿ ਵਿਨਸ੍ਸਨ੍ਤਮ੍ਪਿ. ਭਗਵਾ ਆਹਾਤਿ ਸਮ੍ਬਨ੍ਧੋ. ਤਸ੍ਸਾਤਿ ਸੇਨਾਸਨਸ੍ਸ. ਅਪਰਜ੍ਜੂਤਿ ਅਪਰਸ੍ਮਿਂ ਅਹਨਿ ਅਪਰਜ੍ਜੁ. ਗਤਾਯਾਤਿ ਅਤਿਕ੍ਕਮਿਤਾਯ. ਪਵਾਰਣਾਯ ਗਤਾਯ ਪਵਾਰਣਦਿਵਸੇ ਅਤਿਕ੍ਕਮਿਤੇ ਸਤਿ ਅਪਰਜ੍ਜੁ ਅਨ੍ਤਰਾਮੁਤ੍ਤਕੋ ਗਾਹੇਤਬ੍ਬੋਤਿ ਯੋਜਨਾ.

ਤਨ੍ਤਿ ਅਨ੍ਤਰਾਮੁਤ੍ਤਕਂ. ਗਾਹੇਨ੍ਤੇਨਾਤਿ ਗਾਹਾਪੇਨ੍ਤੇਨ. ਤੇਨਾਤਿ ਗਣ੍ਹਨ੍ਤੇਨ. ਅਟ੍ਠਮਾਸੇਤਿ ਚਤ੍ਤਾਰੋ ਹੇਮਨ੍ਤਮਾਸੇ, ਚਤ੍ਤਾਰੋ ਚ ਗਿਮ੍ਹਮਾਸੇਤਿ ਅਟ੍ਠਮਾਸੇ. ਕਦਾਚਿ ਪਞ੍ਚ ਗਿਮ੍ਹਮਾਸੇਤਿ ਨਵਮਾਸੇ ਵਾ. ਖਣ੍ਡਂ ਵਾਤਿ ਛਿਨ੍ਨਟ੍ਠਾਨਂ ਵਾ. ਫੁਲ੍ਲਂ ਵਾਤਿ ਫਲਿਤਟ੍ਠਾਨਂ ਵਾ. ਪਟਿਸਙ੍ਖਰਿਤਬ੍ਬਨ੍ਤਿ ਪਾਕਤਿਕਂ ਕਾਤਬ੍ਬਂ. ਦਿਵਸਂ ਖੇਪੇਤ੍ਵਾਤਿ ਪਰਿਵੇਣੇ ਦਿਵਸਂ ਖੇਪੇਤ੍ਵਾ. ਤਤ੍ਥਾਤਿ ਗਹਿਤਸੇਨਾਸਨੇ. ਰਤ੍ਤਿਨ੍ਦਿਵਨ੍ਤਿ ਰਤ੍ਤਿ ਚ ਦਿਵੋ ਚ ਰਤ੍ਤਿਨ੍ਦਿਵਂ, ਸਮਾਹਾਰਦ੍ਵਨ੍ਦੋ, ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ. ਨ ਲਬ੍ਭਤੀਤਿ ਸਙ੍ਘਤ੍ਥੇਰੇਨ ਨ ਲਬ੍ਭਤਿ. ਇਦਨ੍ਤਿ ਸੇਨਾਸਨਂ.

ਅਨ੍ਤਰਾਮੁਤ੍ਤਕਗਾਹੇਨ ਅਗਹੇਤਬ੍ਬਸੇਨਾਸਨਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਿਂ ਪਨਾ’’ਤਿਆਦਿ. ਤੇਮਾਸਚ੍ਚਯੇਨ ਤੇਮਾਸਚ੍ਚਯੇਨਾਤਿ ਤਿਣ੍ਣਂ ਮਾਸਾਨਂ ਅਤਿਕ੍ਕਮੇਨ ਤਿਣ੍ਣਂ ਮਾਸਾਨਂ ਅਤਿਕ੍ਕਮੇਨ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਯਸ੍ਮਿਂ ਪਨਾਤਿ ਸੇਨਾਸਨੇ ਪਨ. ਸਕਿਦੇਵਾਤਿ ਏਕਵਾਰਮੇਵ. ਅਯਨ੍ਤਿ ਏਸਾ ਕਥਾ.

ਤਤ੍ਥਾਤਿ ਦੁਵਿਧੇਸੁ ਸੇਨਾਸਨਗ੍ਗਾਹੇਸੁ. ਉਤੁਕਾਲਨ੍ਤਿ ਉਤੁਕਾਲੇ ਆਗਚ੍ਛਨ੍ਤੀਤਿ ਸਮ੍ਬਨ੍ਧੋ. ਤੇਸਂ ਤਦਾਵ ਦਾਤਬ੍ਬਨ੍ਤਿ ਸਮ੍ਬਨ੍ਧੋ. ਅਕਾਲੋ ਨਾਮਾਤਿ ਉਟ੍ਠਾਪਨਸ੍ਸ ਅਕਾਲੋ ਨਾਮ ਨਤ੍ਥਿ. ਏਕਂ ਵਾ ਮਞ੍ਚਟ੍ਠਾਨਂ ਵਾ ਠਪੇਤਬ੍ਬਨ੍ਤਿ ਯੋਜਨਾ. ਏਕੋ ਵਾ ਥੇਰੋ ਆਗਚ੍ਛਤੀਤਿ ਯੋਜਨਾ. ਉਬ੍ਭਣ੍ਡਿਕਾਤਿ ਉਕ੍ਖਿਤ੍ਤਭਣ੍ਡਿਕਾ.

ਬਹੂਸੂਤਿ ਤਯੋ ਆਦਿਂ ਕਤ੍ਵਾ ਬਹੂਸੁ ਭਿਕ੍ਖੂਸੁ. ਪਹੋਤੀਤਿ ਏਕੇਕਸ੍ਸ ਭਿਕ੍ਖੁਸ੍ਸ ਪਹੋਤਿ. ਤਤ੍ਥਾਤਿ ਪਰਿਵੇਣੇ. ਤਸ੍ਸੇਵਾਤਿ ਪਰਿਵੇਣਸਾਮਿਕਸ੍ਸੇਵ. ਏਵਂ ਅਪਹੋਨ੍ਤੇਸੂਤਿ ਏਵਂ ਪਰਿਵੇਣਗ੍ਘੇਨ ਅਪਹੋਨ੍ਤੇਸੁ. ਪਾਸਾਦਗ੍ਘੇਨਾਤਿ ਵਿਹਾਰਸਙ੍ਖਾਤਸ੍ਸ ਪਾਸਾਦਸ੍ਸ ਪਰਿਚ੍ਛੇਦੇਨ. ਓਵਰਕਗ੍ਘੇਨਾਤਿ ਗਬ੍ਭਸ੍ਸ ਪਰਿਚ੍ਛੇਦੇਨ. ਸੇਯ੍ਯਗ੍ਘੇਨਾਤਿ ਚਤੁਪਞ੍ਚਹਤ੍ਥਪ੍ਪਮਾਣਾਯ ਸੇਯ੍ਯਾਯ ਪਰਿਚ੍ਛੇਦੇਨ. ਮਞ੍ਚਟ੍ਠਾਨੇਨਾਤਿ ਦ੍ਵਿਹਤ੍ਥਵਿਤ੍ਥਾਰਸ੍ਸ ਚਤੁਹਤ੍ਥਆਯਾਮਸ੍ਸ ਮਞ੍ਚਸ੍ਸ ਠਾਨੇਨ. ਏਕਮਞ੍ਚਟ੍ਠਾਨਸ੍ਸ ਦ੍ਵਿਨ੍ਨਂ ਪੀਠਕਾਨਂ ਠਾਨਤ੍ਤਾ ਵੁਤ੍ਤਂ ‘‘ਏਕਪੀਠਕਟ੍ਠਾਨਵਸੇਨਾ’’ਤਿ. ਇਦਂ ਨਿਸੀਦਿਤੁਂ ਸਕ੍ਕੁਣੇਯ੍ਯਵਸੇਨ ਵੁਤ੍ਤਂ. ਸਚੇ ਨ ਸਕ੍ਕਾ ਨਿਸੀਦਿਤੁਂ, ਨ ਦਾਤਬ੍ਬਂ. ਤੇਨ ਵੁਤ੍ਤਂ ‘‘ਭਿਕ੍ਖੁਨੋ ਪਨ ਠਿਤੋਕਾਸਮਤ੍ਤਂ ਨ ਗਾਹੇਤਬ੍ਬ’’ਨ੍ਤਿ. ਏਤਨ੍ਤਿ ਠਿਤੋਕਾਸਮਤ੍ਤਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਕਮਞ੍ਚਟ੍ਠਾਨਸ੍ਸ ਤਿਣ੍ਣਂ ਜਨਾਨਂ ਏਕਪੀਠਕਟ੍ਠਾਨਭਾਵੇਨ ਅਪਹੋਨ੍ਤਤ੍ਤਾ ਵੁਤ੍ਤਂ ‘‘ਏਕਂ ਮਞ੍ਚਟ੍ਠਾਨਂ ਵਾ ਤਿਣ੍ਣਂ ਜਨਾਨਂ ਦਾਤਬ੍ਬ’’ਨ੍ਤਿ. ਹੀਤਿ ਸਚ੍ਚਂ. ‘‘ਸੀਤਸਮਯੇ’’ਤਿ ਇਮਿਨਾ ਉਣ੍ਹਸਮਯੇਪਿ ਸਬ੍ਬਦਿਵਸਂ ਅਜ੍ਝੋਕਾਸੇ ਵਸਿਤੁਂ ਨ ਸਕ੍ਕਾਤਿ ਦੀਪੇਤਿ. ਪਰਿਲ਼ਾਹਸਮਯੇ ਪਨ ਸਕ੍ਕਾ ਸਬ੍ਬਰਤ੍ਤਿਂ ਅਜ੍ਝੋਕਾਸੇ ਵਸਿਤੁਂ. ਕਿਞ੍ਚਾਪਿ ਸਕ੍ਕਾ, ਸੀਤੁਣ੍ਹਕਾਲੇ ਪਨ ਨ ਦਾਤਬ੍ਬਤ੍ਤਾ ਪਰਿਲ਼ਾਹਸਮਯੇਪਿ ਨ ਦਾਤਬ੍ਬਨ੍ਤਿ ਵੇਦਿਤਬ੍ਬਂ. ਏਕਮਞ੍ਚਟ੍ਠਾਨੇ ਵਾ ਏਕਪੀਠਕਟ੍ਠਾਨੇ ਵਾ ਤਿਣ੍ਣਂ ਜਨਾਨਂ ਨਿਸੀਦਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਮਹਾਥੇਰੇਨਾ’’ਤਿਆਦਿ. ਤਤ੍ਥ ਮਹਾਥੇਰੇਨ ਵਤ੍ਤਬ੍ਬਨ੍ਤਿ ਸਮ੍ਬਨ੍ਧੋ. ਨਿਦ੍ਦਾਗਰੁਕੋਤਿ ਨਿਦ੍ਦਾਯ ਗਰੁਕਾਰਕੋ. ਸੀਤਂ ਅਨੁਦਹਤੀਤਿ ਸੀਤਂ ਮਂ ਪੀਲ਼ੇਤਿ. ਤੇਨਾਤਿ ਮਹਾਥੇਰੇਨ. ਦੁਤਿਯਤ੍ਥੇਰੇਨਾਪੀਤਿ ਪਿਸਦ੍ਦੋ ਮਹਾਥੇਰਂ ਅਪੇਕ੍ਖਤਿ. ਵੁਤ੍ਤਨਯੇਨੇਵਾਤਿ ‘‘ਉਕ੍ਕਾਸਿਤ੍ਵਾ’’ਤਿਆਦਿਨਾ ਵੁਤ੍ਤਨਯੇਨੇਵ. ਏਵਨ੍ਤਿਆਦਿ ਨਿਗਮਨਂ. ਜਮ੍ਬੁਦੀਪੇ ਪਨ ਏਕਚ੍ਚੇ ਭਿਕ੍ਖੂ ਗਾਹੇਨ੍ਤੀਤਿ ਸਮ੍ਬਨ੍ਧੋ. ਕਿਞ੍ਚਿਦੇਵ ਮਞ੍ਚਟ੍ਠਾਨਂ ਵਾ ਪੀਠਟ੍ਠਾਨਂ ਵਾਤਿ ਯੋਜਨਾ. ਅਯਨ੍ਤਿਆਦਿ ਪੁਰਿਮਵਚਨਸ੍ਸ ਨਿਗਮਨਵਸੇਨ ਪਚ੍ਛਿਮਵਚਨਸ੍ਸ ਕਥਨਤ੍ਥਾਯ ਵੁਤ੍ਤਵਚਨਂ.

ਵਸ੍ਸਾਵਾਸੇ ਸੇਨਾਸਨਗ੍ਗਾਹੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਆਗਨ੍ਤੁਕਵਤ੍ਤਨ੍ਤਿ ਆਗਨ੍ਤੁਕਸ੍ਸ ਵਤ੍ਤਂ. ਅਞ੍ਞਤ੍ਥਾਤਿ ਅਞ੍ਞਸ੍ਮਿਂ ਠਾਨੇ. ਗਨ੍ਤ੍ਵਾ ਵਸਿਤੁਕਾਮੇਨ ਆਗਨ੍ਤੁਕੇਨਾਤਿ ਯੋਜਨਾ. ਵਸ੍ਸੂਪਨਾਯਿਕਦਿਵਸਮੇਵਾਤਿ ਵਸ੍ਸਂ ਉਪਗਮਨਦਿਵਸੇਯੇਵ. ਤਤ੍ਥਾਤਿ ਅਞ੍ਞਂ ਠਾਨਂ. ਨਗਨ੍ਤਬ੍ਬਕਾਰਣਂ ਦਸ੍ਸੇਨ੍ਤੋ ਆਹ ‘‘ਵਸਨਟ੍ਠਾਨਂ ਵਾ ਹੀ’’ਤਿਆਦਿ. ਹੀਤਿ ਯਸ੍ਮਾ. ਤਤ੍ਰਾਤਿ ਅਞ੍ਞਸ੍ਮਿਂ ਠਾਨੇ. ਤੇਨਾਤਿ ਸਮ੍ਬਾਧਅਸਮ੍ਪਜ੍ਜਨਕਾਰਣਾ. ਤਸ੍ਮਾਤਿ ਯਸ੍ਮਾ ਨ ਫਾਸੁਂ ਵਿਹਰੇਯ੍ਯ, ਤਸ੍ਮਾ. ਤਂ ਵਿਹਾਰਨ੍ਤਿ ਯਸ੍ਮਿਂ ਵਸਿਤੁਕਾਮੋ, ਤਂ ਵਿਹਾਰਂ. ਤਤ੍ਥਾਤਿ ਵਿਹਾਰੇ, ਵਸਨ੍ਤੋ ਸੁਖਂ ਵਸਿਸ੍ਸਤੀਤਿ ਸਮ੍ਬਨ੍ਧੋ. ਉਦ੍ਦੇਸਤ੍ਥਿਕੋਤਿ ਉਦ੍ਦੇਸਂ ਅਤ੍ਥਿਕੋ, ਉਦ੍ਦੇਸੇਨ ਵਾ. ਕਮ੍ਮਟ੍ਠਾਨਸਪ੍ਪਾਯਤਨ੍ਤਿ ਕਮ੍ਮਟ੍ਠਾਨੇਨ, ਕਮ੍ਮਟ੍ਠਾਨਸ੍ਸ ਵਾ ਸਪ੍ਪਾਯਭਾਵਂ.

ਤਤ੍ਥਾਤਿ ਅਞ੍ਞਵਿਹਾਰਂ. ਗਚ੍ਛਨ੍ਤੇਨ ਘਟ੍ਟੇਤਬ੍ਬੋਤਿ ਸਮ੍ਬਨ੍ਧੋ. ਘਟ੍ਟੇਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਨ ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ਸਕਟ੍ਠਾਨੇ. ਕਿਂ ਨ ਵਤ੍ਤਬ੍ਬਾਤਿ ਆਹ ‘‘ਤੁਮ੍ਹੇ’’ਤਿਆਦਿ. ਸਲਾਕਭਤ੍ਤਾਦੀਨਿ ਵਾ ਯਾਗੁਖਜ੍ਜਕਾਦੀਨਿ ਵਾ ਨਤ੍ਥਿ ਨ ਵਿਜ੍ਜਨ੍ਤੀਤਿ ਯੋਜਨਾ. ਉਪੋਸਥਾਗਾਰਸ੍ਸ ਪਰਿਕ੍ਖਾਰੋਤਿ ਸਮ੍ਬਨ੍ਧੋ. ਤੁਮ੍ਹਾਕਂ ਵਿਹਾਰਸ੍ਸ ਇਦਂ ਤਾਲ਼ਞ੍ਚੇਵ ਇਮਂ ਸੂਚਿਞ੍ਚ ਸਮ੍ਪਟਿਚ੍ਛਥਾਤਿ ਯੋਜਨਾ. ਗਮਿਯਵਤ੍ਤਨ੍ਤਿ ਗਮਿਕਾਨਂ ਭਿਕ੍ਖੂਨਂ ਵਤ੍ਤਂ. ‘‘ਦਹਰੇਹੀ’’ਤਿ ਪਦਂ ‘‘ਉਕ੍ਖਿਪਾਪੇਤ੍ਵਾ’’ਤਿ ਚ ‘‘ਗਾਹਾਪੇਤ੍ਵਾ’’ਤਿ ਚ ਪਦਦ੍ਵਯੇ ਕਾਰਿਤਕਮ੍ਮਂ, ‘‘ਪਤ੍ਤਚੀਵਰਭਣ੍ਡਿਕਾਯੋ’’ਤਿ ਪਦਂ ‘‘ਉਕ੍ਖਿਪਾਪੇਤ੍ਵਾ’’ਤਿ ਪਦੇ ਧਾਤੁਕਮ੍ਮਂ, ‘‘ਤੇਲਨਾਲ਼ਿਕਤ੍ਤਰਦਣ੍ਡਾਦੀਨੀ’’ਤਿ ਪਦਂ ‘‘ਗਾਹਾਪੇਤ੍ਵਾ’’ਤਿ ਪਦੇ ਧਾਤੁਕਮ੍ਮਮੇਵ. ਅਤ੍ਤਾਨਂ ਦਸ੍ਸੇਨ੍ਤੇਨਾਤਿ ਅਤ੍ਤਾਨਂ ਮਨੁਸ੍ਸਾਨਂ ਪਕਾਸੇਨ੍ਤੇਨ. ਵਿਤਕ੍ਕਨ੍ਤਿ ਪਚ੍ਚਯਬਾਹੁਲ੍ਲਿਕਵਿਤਕ੍ਕਂ. ‘‘ਸਪਰਿਵਾਰ’’ਨ੍ਤਿ ਪਦਂ ‘‘ਗਚ੍ਛਨ੍ਤਞ੍ਚਾ’’ਤਿ ਪਦੇ ਕਿਰਿਯਾਵਿਸੇਸਨਂ. ਏਵਞ੍ਹਿ ਸਤਿ ਸਪਰਿਵਾਰਂ ਗਚ੍ਛਨ੍ਤਞ੍ਚਾਤਿ ਸਮ੍ਬਨ੍ਧੋ. ‘‘ਨ’’ਨ੍ਤਿ ਪਦੇ ਪਨ ਕਾਰਕਵਿਸੇਸਨਂ. ਏਵਞ੍ਹਿ ਸਤਿ ਸਪਰਿਵਾਰਂ ਨਂ ਭਿਕ੍ਖੁਨ੍ਤਿ ਸਮ੍ਬਨ੍ਧੋ. ‘‘ਦਿਸ੍ਵਾ’’ਤਿ ਪਦੇ ਚ ਕਿਰਿਯਾਵਿਸੇਸਨਮੇਵ. ਏਵਞ੍ਹਿ ਸਤਿ ਗਚ੍ਛਨ੍ਤਞ੍ਚ ਨਂ ਭਿਕ੍ਖੁਂ ਸਪਰਿਵਾਰਂ ਦਿਸ੍ਵਾਤਿ ਸਮ੍ਬਨ੍ਧੋ. ਮਨੁਸ੍ਸਾ ਵਦਨ੍ਤੀਤਿ ਸਮ੍ਬਨ੍ਧੋ. ਤੇਸੂਤਿ ਮਨੁਸ੍ਸੇਸੁ. ਏਕੋ ਪਣ੍ਡਿਤਮਨੁਸ੍ਸੋਤਿ ਸਮ੍ਬਨ੍ਧੋ. ਅਯਂ ਕਾਲੋ ਵਸ੍ਸੂਪਨਾਯਿਕਕਾਲੋ ਨਾਮਾਤਿ ਯੋਜਨਾ. ਯਤ੍ਥਾਤਿ ਠਾਨੇ. ਤਸ੍ਸਾਤਿ ਏਕਸ੍ਸ ਪਣ੍ਡਿਤਮਨੁਸ੍ਸਸ੍ਸ, ਵਚਨਨ੍ਤਿ ਸਮ੍ਬਨ੍ਧੋ. ਤੇ ਮਨੁਸ੍ਸਾ ਯਾਚਨ੍ਤੀਤਿ ਸਮ੍ਬਨ੍ਧੋ. ਅਞ੍ਞਤ੍ਥਾਤਿ ਅਞ੍ਞਂ ਠਾਨਂ. ਮੇਜ੍ਜਨ੍ਤਿ ਅਞ੍ਞਮਞ੍ਞਂ ਸਿਨੇਹਨ੍ਤੀਤਿ ਮਿਤ੍ਤਾ. ਸੁਖਦੁਕ੍ਖੇਸੁ ਅਮਾ ਸਹ ਵਤ੍ਤਨ੍ਤੀਤਿ ਅਮਚ੍ਚਾ. ਮਿਤ੍ਤਾਯੇਵ ਅਮਚ੍ਚਾਤਿ ਮਿਤ੍ਤਾਮਚ੍ਚਾ, ਤੇ. ਸਮ੍ਮਨ੍ਤਯਿਤ੍ਵਾਤਿ ਸਮਂ, ਸਮ੍ਮਾ ਵਾ ਮਨ੍ਤਯਿਤ੍ਵਾ. ਇਧੇਵਾਤਿ ਗਾਮੇ ਏਵ, ਵਿਹਾਰੇ ਏਵ ਵਾ. ਕਸ੍ਮਾ ਸਾਦਿਤੁਂ ਵਟ੍ਟਤਿ, ਨਨੁ ਸਬ੍ਬਮੇਤਂ ਅਕਪ੍ਪਿਯਞ੍ਚ ਸਾਵਜ੍ਜਞ੍ਚਾਤਿ ਆਹ ‘‘ਸਬ੍ਬਞ੍ਹੇਤਂ ਕਪ੍ਪਿਯਞ੍ਚੇਵ ਅਨਵਜ੍ਜਞ੍ਚਾ’’ਤਿ. ਹਿ ਯਸ੍ਮਾ ਏਤਂ ਸਬ੍ਬਂ ਕਪ੍ਪਿਯਞ੍ਚ ਅਨਵਜ੍ਜਞ੍ਚ, ਤਸ੍ਮਾ ਸਬ੍ਬਂ ਸਾਦਿਤੁਂ ਵਟ੍ਟਤੀਤਿ ਯੋਜਨਾ. ਕੁਰੁਨ੍ਦਿਯਂ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਉਭਯਮ੍ਪੀਤਿ ਮਹਾਅਟ੍ਠਕਥਾਕੁਰੁਨ੍ਦੀਸੁ ਵੁਤ੍ਤਵਚਨਵਸੇਨ ਉਭਯਮ੍ਪਿ ਏਤਂ ਵਚਨਨ੍ਤਿ ਸਮ੍ਬਨ੍ਧੋ.

ਆਵਾਸਿਕਵਤ੍ਤਂ ਵਿਤ੍ਥਾਰੇਨ੍ਤੋ ਆਹ ‘‘ਪਟਿਕਚ੍ਚੇਵ ਹੀ’’ਤਿਆਦਿ. ਤਤ੍ਥ ਪਟਿਕਚ੍ਚੇਵਾਤਿ ਆਗਨ੍ਤੁਕਾਨਂ ਆਗਤਤੋ ਪਠਮਮੇਵ. ਪਧਾਨਘਰਵਿਹਾਰਮਗ੍ਗੋਤਿ ਪਧਾਨਘਰਮਗ੍ਗੋ ਚ ਵਿਹਾਰਮਗ੍ਗੋ ਚ. ਮੁਦ੍ਦਵੇਦਿਕਾਯਾਤਿ ਚੇਤਿਯਸ੍ਸ ਹਮ੍ਮਿਯਵੇਦਿਕਾਯ. ਕਸ੍ਮਾ ਇਦਮ੍ਪਿ ਸਬ੍ਬਂ ਕਾਤਬ੍ਬਨ੍ਤਿ ਆਹ ‘‘ਵਸ੍ਸਂ ਵਸਿਤੁਕਾਮਾ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਵਸ੍ਸਂ ਵਸਿਤੁਕਾਮਾ ਸੁਖਂ ਵਸਿਸ੍ਸਨ੍ਤੀਤਿ ਸਮ੍ਬਨ੍ਧੋ. ਕਤਪਰਿਕਮ੍ਮੇਹਿ ਆਵਾਸਿਕੇਹੀਤਿ ਸਮ੍ਬਨ੍ਧੋ. ਯਤੋ ਕੁਲਤੋ ਪਕਤਿਯਾ ਲਬ੍ਭਤਿ, ਤਸ੍ਮਿਂ ਕੁਲੇ ਵਸ੍ਸਾਵਾਸਿਕਂ ਪੁਚ੍ਛਿਤਬ੍ਬਨ੍ਤਿ ਯੋਜਨਾ. ਨ ਦਿਨ੍ਨਪੁਬ੍ਬਨ੍ਤਿ ਪੁਬ੍ਬੇ ਨ ਦਿਨ੍ਨਂ. ਹੀਤਿ ਯਸ੍ਮਾ. ਉਪਦ੍ਦੁਤਾਤਿ ਉਪਗਨ੍ਤ੍ਵਾ, ਭੁਸਂ ਵਾ ਪੀਲ਼ਿਤਾ. ਤਤ੍ਥਾਤਿ ਮਨੁਸ੍ਸੇਸੁ. ਯੇਤਿ ਮਨੁਸ੍ਸਾ. ਵਸ੍ਸਾਵਾਸਿਕੇ ਗਾਹਿਤੇਤਿ ਵਸ੍ਸਾਵਾਸਿਕੇ ਸੇਨਾਸਨੇ ਗਾਹਾਪਿਯਮਾਨੇ. ਗਾਹਿਤਭਿਕ੍ਖੂਨਨ੍ਤਿ ਗਾਹਾਪਿਤਭਿਕ੍ਖੂਨਂ. ਵਸ੍ਸਾਵਾਸਿਕਨ੍ਤਿ ਵਸ੍ਸਂ ਆਵਸਨ੍ਤਾਨਂ ਦਾਤਬ੍ਬਂ ਚੀਵਰਂ. ਗਾਹਣਕਾਲੋਤਿ ਗਾਹਾਪਨਕਾਲੋ. ਉਪਕਟ੍ਠੋਤਿ ਆਸਨ੍ਨੋ. ਛਾਤਕਾਦੀਹੀਤਿ ਆਦਿਸਦ੍ਦੇਨ ਰੋਗਾਦਯੋ ਸਙ੍ਗਣ੍ਹਾਤਿ. ਯਨ੍ਤਿ ਚੀਵਰਂ. ਤਤੋਤਿ ਚੀਵਰਤੋ. ਤਨ੍ਤਿ ਵਚਨਂ. ਤਦਨੁਰੂਪੇਨਾਤਿ ਤੇਸਂ ਮਨੁਸ੍ਸਾਨਂ ਵਚਨਸ੍ਸਾਨੁਰੂਪੇਨ. ਤੇਸਂ ਤੇਸਨ੍ਤਿ ਮਨੁਸ੍ਸਾਨਂ, ਵਸ੍ਸਾਵਾਸਿਕਂ ਚੀਵਰਨ੍ਤਿ ਸਮ੍ਬਨ੍ਧੋ.

ਯਸ੍ਸਾਤਿ ਭਿਕ੍ਖੁਨੋ. ਸੋਤਿ ਭਿਕ੍ਖੁ. ਇਤਿ ਵਦਨ੍ਤੀਤਿ ਯੋਜਨਾ. ਤਨ੍ਤਿ ਚੀਵਰਂ. ਪਟਿਕ੍ਕਮ੍ਮਾਤਿ ਪਟਿਕ੍ਕਮਿਤ੍ਵਾ. ਵਿਹਾਰਤੋ ਅਪਸਕ੍ਕਿਤ੍ਵਾਤਿ ਅਤ੍ਥੋ. ਤਤ੍ਰਾਤਿ ਗਾਮੇ. ਉਪਨਿਕ੍ਖੇਪਂ ਠਪੇਤ੍ਵਾਤਿ ਕਪ੍ਪਿਯਵਤ੍ਥੁਂ ਵਾ ਅਕਪ੍ਪਿਯਵਤ੍ਥੁਂ ਵਾ ਆਰਾਮਿਕਾਦੀਨਂ ਹਤ੍ਥੇ ਉਪਨਿਕ੍ਖੇਪਂ ਠਪੇਤ੍ਵਾ. ਵਿਹਾਰੇਤਿ ਵਿਹਾਰਸ੍ਸ, ਵਿਹਾਰੇ ਵਸ੍ਸਂ ਵਸਨ੍ਤਸ੍ਸ ਵਾ. ਅਪੁਚ੍ਛਿਤ੍ਵਾਪੀਤਿ ਪਿਸਦ੍ਦੇਨ ‘‘ਪੁਚ੍ਛਿਤ੍ਵਾਪੀ’’ਤਿ ਅਤ੍ਥਂ ਦਸ੍ਸੇਤਿ. ਤੇਸਨ੍ਤਿਕੁਲਾਨਂ. ਵਤ੍ਤਨ੍ਤਿ ਜਗ੍ਗਨਾਦਿਵਤ੍ਤਂ. ਤੇਸਨ੍ਤਿ ਕੁਲਾਨਂ. ਆਗਤਞ੍ਚ ਤਨ੍ਤਿ ਤਂ ਪਂਸੁਕੂਲਿਕਂ ਆਗਤਞ੍ਚ ਵਦਨ੍ਤੀਤਿ ਸਮ੍ਬਨ੍ਧੋ. ਤੇਨਾਤਿ ਪਂਸੁਕੂਲਿਕੇਨ. ਦਾਤੁਂ ਨ ਇਚ੍ਛਨ੍ਤੀਤਿ ਸਙ੍ਘਸ੍ਸ ਆਚਿਕ੍ਖਨ੍ਤੇਪਿ ਸਙ੍ਘਸ੍ਸ ਦਾਤੁਂ ਨ ਇਚ੍ਛਨ੍ਤਿ. ਸਭਾਗੋ ਭਿਕ੍ਖੂਤਿ ਅਤ੍ਤਨਾ ਸਭਾਗੋ ਭਿਕ੍ਖੁ. ਏਤਨ੍ਤਿ ਵਸ੍ਸਾਵਾਸਿਕਂ. ਪਂਸੁਕੂਲਿਕਸ੍ਸ ਨ ਵਟ੍ਟਤਿ, ਕਸ੍ਮਾ? ਗਹਪਤਿਚੀਵਰਤ੍ਤਾ. ਇਤੀਤਿਆਦਿ ਨਿਗਮਨਂ. ਸਦ੍ਧਾਦੇਯ੍ਯੇਤਿ ਸਦ੍ਧਾਯ ਦਾਤਬ੍ਬੇ ਵਸ੍ਸਾਵਾਸਿਕਲਾਭਵਿਸਯੇ.

ਤਤ੍ਰੁਪ੍ਪਾਦੇਤਿ ਤਸ੍ਮਿਂ ਵਿਹਾਰੇ ਉਪ੍ਪਜ੍ਜਨਕਲਾਭਵਿਸਯੇ. ਭਣ੍ਡਪਟਿਚ੍ਛਾਦਨਨ੍ਤਿ ਪਟਿਚ੍ਛਾਦਨਚੀਵਰਭਣ੍ਡਂ. ਚੀਵਰਭਣ੍ਡਮੇਵ ਹਿ ਯਸ੍ਮਾ ਅਨੇਨ ਸਰੀਰਂ ਪਟਿਚ੍ਛਾਦਿਯਤਿ, ਤਸ੍ਮਾ ਭਣ੍ਡਪਟਿਚ੍ਛਾਦਨਨ੍ਤਿ ਵੁਚ੍ਚਤਿ. ਗਾਹੇਥਾਤਿ ਭਿਕ੍ਖੂਹਿ ਗਾਹਾਪੇਥ. ਗਾਹੇਤਬ੍ਬਨ੍ਤਿ ਭਿਕ੍ਖੂਹਿ ਗਾਹਾਪੇਤਬ੍ਬਂ. ਵਤ੍ਥੁ ਪਨਾਤਿ ਸਾਟਕਤੋ ਅਞ੍ਞਂ ਕਪ੍ਪਿਯਂ ਵਾ ਅਕਪ੍ਪਿਯਂ ਵਾ ਵਤ੍ਥੁ ਪਨ. ਕਸ੍ਮਾ ਵਟ੍ਟਤਿਯੇਵ, ਨਨੁ ਅਕਪ੍ਪਿਯਵਤ੍ਥੁ ਨ ਵਟ੍ਟਤੀਤਿ ਆਹ ‘‘ਕਪ੍ਪਿਯਕਾਰਕਾਨਞ੍ਹਿ’’ਤਿਆਦਿ. ਤਤ੍ਥ ਹਿ ਯਸ੍ਮਾ ਅਨੁਞ੍ਞਾਤਂ, ਤਸ੍ਮਾ ਵਟ੍ਟਤਿਯੇਵਾਤਿ ਯੋਜਨਾ. ਦਿਨ੍ਨਵਤ੍ਥੁਤੋ ਉਪ੍ਪਨ੍ਨਨ੍ਤਿ ਸਮ੍ਬਨ੍ਧੋ.

ਯਨ੍ਤਿ ਵਤ੍ਥੁ ਦਿਨ੍ਨਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਕਪ੍ਪਿਯਕਾਰਕਾਨਂ ਹਤ੍ਥੇ ਦਿਨ੍ਨਵਤ੍ਥੂਸੁ. ਤਨ੍ਤਿ ਵਤ੍ਥੁ ਉਪਨਾਮੇਨ੍ਤੇਹੀਤਿ ਸਮ੍ਬਨ੍ਧੋ. ਗਰੁਭਣ੍ਡਂ ਹੋਤਿ, ਗਰੁਭਣ੍ਡਤ੍ਤਾ ਅਞ੍ਞੇਸੁ ਪਚ੍ਚਯੇਸੁ ਨ ਉਪਨਾਮੇਤਬ੍ਬਨ੍ਤਿ ਅਧਿਪ੍ਪਾਯੋ. ਪੁਗ੍ਗਲਵਸੇਨੇਵਾਤਿ ‘‘ਭਿਕ੍ਖੂ ਚੀਵਰੇਨ ਕਿਲਮਨ੍ਤਿ, ਏਤ੍ਤਕਂ ਨਾਮ ਤਣ੍ਡੁਲਭਾਗਂ ਭਿਕ੍ਖੂਨਂ ਚੀਵਰਂ ਕਾਤੁਂ ਰੁਚ੍ਚਤਿ ਸਙ੍ਘਸ੍ਸਾ’’ਤਿਆਦਿਨਾ ਪੁਗ੍ਗਲਂ ਪਰਾਮਸਿਤ੍ਵਾ ਪੁਗ੍ਗਲਵਸੇਨੇਵ. ਸਙ੍ਘਵਸੇਨਾਤਿ ‘‘ਸਙ੍ਘੋ ਚੀਵਰੇਨ ਕਿਲਮਤੀ’’ਤਿਆਦਿਨਾ ਸਙ੍ਘਵਸੇਨ ਨ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਏਵਂ ਪੁਗ੍ਗਲਵਸੇਨ ਅਪਲੋਕਨਕਮ੍ਮਸ੍ਸ ਅਕਤ੍ਤਬ੍ਬਤਂ ਦਸ੍ਸੇਤ੍ਵਾ ਇਦਾਨਿ ਵਤ੍ਥੁਵਸੇਨ ਤਸ੍ਸੇਵ ਅਕਤ੍ਤਬ੍ਬਤਂ ਦਸ੍ਸੇਨ੍ਤੋ ਆਹ ‘‘ਜਾਤਰੂਪਰਜਤਵਸੇਨਾਪੀ’’ਤਿਆਦਿ. ਕਪ੍ਪਿਯਭਣ੍ਡਵਸੇਨਾਤਿ ਚੀਵਰਤਣ੍ਡੁਲੇਹਿ ਅਵਸੇਸਸ੍ਸ ਕਪ੍ਪਿਯਭਣ੍ਡਸ੍ਸ ਵਸੇਨ. ਚੀਵਰਤਣ੍ਡੁਲਾਨਞ੍ਹਿ ਵਿਸੁਂ ਗਹਿਤਤ੍ਤਾ ‘‘ਕਪ੍ਪਿਯਭਣ੍ਡਵਸੇਨਾ’’ਤਿ ਏਤ੍ਥ ਤੇਹਿ ਅਵਸੇਸੋ ਕਪ੍ਪਿਯਭਣ੍ਡੋਵ ਗਹੇਤਬ੍ਬੋ. ਤਂ ਪਨਾਤਿ ਅਪਲੋਕਨਕਮ੍ਮਂ ਪਨ. ਕਤ੍ਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਇਦਾਨੀ’’ਤਿਆਦਿ. ਸੁਭਿਕ੍ਖਨ੍ਤਿ ਸਮਿਦ੍ਧਭਿਕ੍ਖਂ. ਸੁਲਭਪਿਣ੍ਡਨ੍ਤਿ ਸੁਖੇਨ ਲਭਪਿਣ੍ਡਂ. ਦ੍ਵੀਹਿ ਪਦੇਹਿ ਅਞ੍ਞਮਞ੍ਞਸ੍ਸ ਕਾਰਣਂ ਦਸ੍ਸੇਤਿ, ਸੁਭਿਕ੍ਖਤ੍ਤਾ ਸੁਲਭਪਿਣ੍ਡਂ, ਸੁਲਭਪਿਣ੍ਡਤ੍ਤਾ ਸੁਭਿਕ੍ਖਨ੍ਤਿ ਵੁਤ੍ਤਂ ਹੋਤਿ.

ਏਵਂ ਚੀਵਰਪਚ੍ਚਯਂ ਸਲ੍ਲਕ੍ਖੇਤ੍ਵਾ ਸੇਨਾਸਨਂ ਸਲ੍ਲਕ੍ਖੇਤਬ੍ਬਨ੍ਤਿ ਸਮ੍ਬਨ੍ਧੋ. ਕਾਲੇਤਿ ਗਾਹਾਪਨਸ੍ਸ ਕਾਲੇ. ਵੁਤ੍ਤਨ੍ਤਿ ਮਹਾਅਟ੍ਠਕਥਾਯ ਵੁਤ੍ਤਂ. ਕਸ੍ਮਾ ਦ੍ਵੇ ਸਮ੍ਮਨ੍ਨਿਤਬ੍ਬਾ, ਨਨੁ ਏਕਮ੍ਪਿ ਸਮ੍ਮਨ੍ਨਿਤੁਂ ਵਟ੍ਟਤੀਤਿ ਆਹ ‘‘ਏਵਞ੍ਹੀ’’ਤਿਆਦਿ. ਤਤ੍ਥ ਹਿ ਯਸ੍ਮਾ ਗਾਹੇਸ੍ਸਤਿ, ਤਸ੍ਮਾ ਦ੍ਵੇ ਸਮ੍ਮਨ੍ਨਿਤਬ੍ਬਾਤਿ ਯੋਜਨਾ. ਏਕੇਨ ਹਿ ਸਮ੍ਮੁਤਿਲਦ੍ਧੇਨ ਸਕ੍ਕਾ ਪਰਂ ਗਾਹਾਪੇਤੁਂ, ਅਤ੍ਤਨਾ ਪਨ ਅਤ੍ਤਨੋ ਪਾਪੇਤੁਂ ਨ ਸਕ੍ਕਾ, ਤਸ੍ਮਾ ਦ੍ਵੀਸੁ ਸਮ੍ਮਤੇਸੁ ਨਵਕੋ ਵੁਡ੍ਢਸ੍ਸ, ਵੁਡ੍ਢੋ ਚ ਨਵਕਸ੍ਸਾਤਿ ਉਭੋ ਅਞ੍ਞਮਞ੍ਞਂ ਗਾਹੇਸ੍ਸਨ੍ਤੀਤਿ ਅਧਿਪ੍ਪਾਯੋ. ਸਮ੍ਮਨ੍ਨਿਤਬ੍ਬਾਤਿ ਏਕਤੋ ਸਮ੍ਮਨ੍ਨਿਤਬ੍ਬਾ. ਅਟ੍ਠਪਿ ਸੋਲ਼ਸਪੀਤਿ ਏਤ੍ਥ ਪਿਸਦ੍ਦੇਨ ਤਤੋ ਅਧਿਕਮ੍ਪਿ ਏਕਤੋ ਸਮ੍ਮਨ੍ਨਿਤੁਂ ਵਟ੍ਟਤੀਤਿ ਦੀਪੇਤਿ. ਸਤ੍ਤਸਤਿਕਕ੍ਖਨ੍ਧਕੇ ਉਬ੍ਬਾਹਿਕਸਮ੍ਮੁਤਿਯਂ (ਚੂਲ਼ਵ. ੪੫੬) ਅਟ੍ਠਪਿ ਜਨਾ ਏਕਤੋਵ ਸਮ੍ਮਤਾਤਿ ਵਚਨਞ੍ਚੇਤ੍ਥ ਸਾਧਕਂ. ਨਿਗ੍ਗਹਕਮ੍ਮਮੇਵ ਹਿ ਸਙ੍ਘੋ ਸਙ੍ਘਸ੍ਸ ਨ ਕਰੋਤੀਤਿ ਦਟ੍ਠਬ੍ਬਂ. ਤੇਸਨ੍ਤਿ ਅਟ੍ਠਸੋਲ਼ਸਜਨਾਨਂ, ਸਮ੍ਮੁਤਿ ਵਟ੍ਟਤਿਯੇਵਾਤਿ ਸਮ੍ਬਨ੍ਧੋ. ਕਿਨ੍ਤਿ ਸਲ੍ਲਕ੍ਖੇਤਬ੍ਬਨ੍ਤਿ ਆਹ ‘‘ਚੇਤਿਯਘਰ’’ਨ੍ਤਿਆਦਿ.

ਆਸਨਘਰਨ੍ਤਿ ਪਟਿਮਾਘਰਂ. ਮਗ੍ਗਪੋਕ੍ਖਰਣੀਨਂ ਸਮੀਪੇ ਕਤਾ ਸਾਲਾਯੋ ਉਪਚਾਰਵਸੇਨ ਵੁਚ੍ਚਨ੍ਤਿ ‘‘ਮਗ੍ਗੋ’’ਤਿ ਚ ‘‘ਪੋਕ੍ਖਰਣੀ’’ਤਿ ਚ. ਤਾ ਹਿ ਸਾਲਾਯੋ ਉਪਚਾਰਸੀਮਬ੍ਭਨ੍ਤਰਗਤੇ ਗਾਮਾਭਿਮੁਖਮਗ੍ਗੇ ਚ ਅਨ੍ਤੋਉਪਚਾਰਸੀਮਾਯਂ ਖਣਿਤਾ ਯਤ੍ਥ ਕਤ੍ਥਚਿ ਪੋਕ੍ਖਰਣਿਯੋ ਚ ਕਰੀਯਨ੍ਤਿ, ਇਤਿ ਸਲ੍ਲਕ੍ਖੇਤਬ੍ਬਨ੍ਤਿ ਯੋਜਨਾ. ਅਸੇਨਾਸਨਂ ਦਸ੍ਸੇਤ੍ਵਾ ਸੇਨਾਸਨਂ ਦਸ੍ਸੇਨ੍ਤੋ ਆਹ ‘‘ਵਿਹਾਰੋ’’ਤਿਆਦਿ. ਰੁਕ੍ਖਮੂਲਨ੍ਤਿ ਛਨ੍ਨਕਵਾਟਬਦ੍ਧਰੁਕ੍ਖਮੂਲਂ. ਏਸੇਵ ਨਯੋ ਵੇਲ਼ੁਗੁਮ੍ਬੇਪਿ. ਗਾਹੇਨ੍ਤੇਨ ਚ ਗਾਹੇਤਬ੍ਬਾਨੀਤਿ ਸਮ੍ਬਨ੍ਧੋ. ਸਙ੍ਘਿਕੋਤਿ ਤਤ੍ਰੁਪ੍ਪਾਦੋ. ਤੇਸੂਤਿ ਦ੍ਵੀਸੁ ਚੀਵਰਪਚ੍ਚਯੇਸੁ. ਯਨ੍ਤਿ ਚੀਵਰਪਚ੍ਚਯਂ. ਤਸ੍ਸਾਤਿ ਚੀਵਰਪਚ੍ਚਯਸ੍ਸ. ਠਿਤਿਕਤੋਤਿ ਪਬਨ੍ਧਵਸੇਨ ਠਿਤਟ੍ਠਾਨਤੋ. ਇਤਰੋਤਿ ਪਠਮਂ ਗਹਿਤਚੀਵਰਪਚ੍ਚਯਤੋ ਇਤਰੋ.

ਅਪ੍ਪਤਾਯਾਤਿ ਅਪ੍ਪਭਾਵਤੋ, ਗਾਹਿਯਮਾਨੇਤਿ ਸਮ੍ਬਨ੍ਧੋ. ਪਰਿਵੇਣਗ੍ਘੇਨਾਤਿ ਪਰਿਵੇਣਪਰਿਚ੍ਛੇਦੇਨ. ਲਭਨ੍ਤੀਤਿ ਪਰਿਵੇਣਸਾਮਿਕਾ ਭਿਕ੍ਖੂ ਲਭਨ੍ਤਿ. ਤਨ੍ਤਿ ਪਰਿਵੇਣਂ. ਵਿਜਟੇਤ੍ਵਾਤਿ ਵਿਜਟਂ ਕਤ੍ਵਾ, ਦ੍ਵੇ ਵਾ ਤਯੋ ਵਾ ਕੋਟ੍ਠਾਸੇ ਕਤ੍ਵਾਤਿ ਅਤ੍ਥੋ. ਪਕ੍ਖਿਪਿਤ੍ਵਾਤਿ ਭਾਗਕੋਟ੍ਠਾਸਂ ਪਕ੍ਖਿਪਿਤ੍ਵਾ. ਨ ਏਵਂ ਕਾਤਬ੍ਬਨ੍ਤਿ ਯਥਾ ਮਹਾਸੁਮਤ੍ਥੇਰੋ ਆਹ, ਤਥਾ ਨ ਕਾਤਬ੍ਬਨ੍ਤਿ ਅਤ੍ਥੋ. ਅਕਾਤਬ੍ਬਕਾਰਣਂ ਦਸ੍ਸੇਨ੍ਤੋ ਆਹ ‘‘ਮਨੁਸ੍ਸਾ ਹੀ’’ਤਿਆਦਿ. ਤਤ੍ਥਾਤਿ ਪਰਿਵੇਣੇ, ਪਵਿਸਿਤਬ੍ਬਂ ਇਤਿ ਆਹਾਤਿ ਯੋਜਨਾ. ਏਤ੍ਥਾਤਿ ਏਤਸ੍ਮਿਂ ਗਾਹਣਟ੍ਠਾਨੇ. ਪਟਿਕ੍ਕੋਸਤੀਤਿ ਪਟਿਸੇਧੇਤਿ. ਪਟਿਕ੍ਕੋਸਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਮਾ ਆਵੁਸੋ’’ਤਿਆਦਿ. ਇਤਿ ਵੁਤ੍ਤਂ, ਇਤਿ ਪਟਿਕ੍ਕੋਸਤੀਤਿ ਯੋਜਨਾ. ਏਕੋ ਹਿ ਇਤਿਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਤਸ੍ਸਾਤਿ ਮਹਾਥੇਰਸ੍ਸ. ਸਙ੍ਗਹਨ੍ਤਿ ਭਿਕ੍ਖੂਨਂ ਸਙ੍ਗਹਂ. ਤਨ੍ਤਿ ਮਹਾਥੇਰਂ.

ਏਵਂ ਵਤ੍ਤਬ੍ਬਨ੍ਤਿ ਏਵਂ ਵਕ੍ਖਮਾਨਨਯੇਨ ਵਤ੍ਤਬ੍ਬਂ. ਪਚ੍ਚਯਂ ਧਾਰੇਥ, ਇਤਿ ਵਤ੍ਤਬ੍ਬਨ੍ਤਿ ਯੋਜਨਾ. ਪਾਪੁਣਾਤਿ ਆਵੁਸੋ ਇਤਿ ਵੁਤ੍ਤੇਤਿ ਯੋਜਨਾ. ‘‘ਗਹਿਤਂ ਹੋਤੀ’’ਤਿ ਇਮਿਨਾ ‘‘ਗਣ੍ਹਥ, ਗਣ੍ਹਾਮੀ’’ਤਿ ਪਚ੍ਚੁਪ੍ਪਨ੍ਨਕਾਲਵਸੇਨ ਵੁਤ੍ਤਤ੍ਤਾ ਗਹਿਤਂ ਹੋਤੀਤਿ ਦਸ੍ਸੇਤਿ. ਅਤੀਤਅਨਾਗਤਕਾਲਵਸੇਨ ਅਗਹਿਤਭਾਵਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਸਤੁਪ੍ਪਾਦਮਤ੍ਤਨ੍ਤਿ ਗਹਣੇ ਸਤਿਯਾ ਉਪ੍ਪਾਦਨਮਤ੍ਤਂ. ਏਤ੍ਥਾਤਿ ਸੇਨਾਸਨਪਚ੍ਚਯਗਹਣਟ੍ਠਾਨੇ.

ਯੋਪੀਤਿ ਯਮ੍ਪਿ. ਉਪਯੋਗਤ੍ਥੇ ਚੇਤਂ ਪਚ੍ਚਤ੍ਤਵਚਨਂ, ਯਮ੍ਪਿ ਪਚ੍ਚਯਂ ਵਿਸ੍ਸਜ੍ਜੇਤੀਤਿ ਯੋਜਨਾ. ਪਚ੍ਚਯਨ੍ਤਿ ਚ ਚੀਵਰਪਚ੍ਚਯਂ. ਅਯਮ੍ਪੀਤਿ ਅਯਮ੍ਪਿ ਪਚ੍ਚਯੋ. ਪਿਸਦ੍ਦੋ ਮਹਾਲਾਭਪਰਿਵੇਣੇ ਪਚ੍ਚਯਂ ਸਮ੍ਪਿਣ੍ਡੇਤਿ. ਤਸ੍ਮਿਂਯੇਵ ਪਰਿਵੇਣੇਤਿ ਤਸ੍ਮਿਂ ਪਂਸੁਕੂਲਿਕੇਨ ਗਹਿਤਪਰਿਵੇਣੇ ਏਵ. ਅਞ੍ਞਸ੍ਸਾਤਿ ਪਂਸੁਕੂਲਿਕਤੋ ਅਞ੍ਞਸ੍ਸ ਭਿਕ੍ਖੁਸ੍ਸ. ਪਂਸੁਕੂਲਿਕੋ ‘‘ਅਹਂ ਵਸਾਮੀ’’ਤਿ ਸੇਨਾਸਨਂ ਜਗ੍ਗਿਸ੍ਸਤਿ. ਇਤਰੋ ‘‘ਅਹਂ ਪਚ੍ਚਯਂ ਗਣ੍ਹਾਮੀ’’ਤਿ ਸੇਨਾਸਨਂ ਜਗ੍ਗਿਸ੍ਸਤੀਤਿ ਯੋਜਨਾ. ਦ੍ਵੀਹਿ ਕਾਰਣੇਹੀਤਿ ਵਸਨਗਹਣਵਸੇਨ ਦ੍ਵੀਹਿ ਕਾਰਣੇਹਿ. ਪਂਸੁਕੂਲਿਕੇ ਗਣ੍ਹਨ੍ਤੇਤਿ ਸਮ੍ਬਨ੍ਧੋ. ਇਧਾਤਿ ਸੇਨਾਸਨੇ. ਤੇਨਾਤਿ ਪਂਸੁਕੂਲਿਕੇਨ. ਹੇਟ੍ਠਾਤਿ ਸੇਨਾਸਨਸ੍ਸ ਹੇਟ੍ਠਾ, ਠਿਤਂ ਅਞ੍ਞਂ ਭਿਕ੍ਖੁਨ੍ਤਿ ਸਮ੍ਬਨ੍ਧੋ. ਤੇਨਾਤਿ ਪਂਸੁਕੂਲਿਕੇਨ, ਕਿਞ੍ਚਿ ਵਚਨਨ੍ਤਿ ਸਮ੍ਬਨ੍ਧੋ. ਵੁਤ੍ਥਵਸ੍ਸਸ੍ਸ ਪਂਸੁਕੂਲਿਕਸ੍ਸਾਤਿ ਯੋਜਨਾ. ਵਟ੍ਟਤੀਤਿ ਪਂਸੁਕੂਲਿਕਸ੍ਸ ਵਟ੍ਟਤਿ. ਤਸ੍ਮਿਂ ਸੇਨਾਸਨੇਤਿ ਪਂਸੁਕੂਲਿਕੇਨ ਗਹਿਤਸੇਨਾਸਨੇ. ਯੇਸਂ ਪਨਾਤਿ ਮਨੁਸ੍ਸਾਨਂ ਪਨ. ਤੇਸਨ੍ਤਿ ਮਨੁਸ੍ਸਾਨਂ.

ਥੂਪਂ ਕਤ੍ਵਾਤਿ ਚੇਤਿਯਂ ਕਤ੍ਵਾ. ਤਸ੍ਸਾਤਿ ਥੂਪਸ੍ਸ. ਤੇਨ ਭਿਕ੍ਖੁਨਾਤਿ ਵਸ੍ਸਾਵਾਸਿਕਂ ਗਾਹਕਭਿਕ੍ਖੁਨਾ. ਤਨ੍ਤਿ ਭੋਜਨਸਾਲਂ. ਗਾਹੇਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਸਬ੍ਬਮਿਦਨ੍ਤਿ ਸਬ੍ਬਂ ਇਦਂ ਵਚਨਂ.

ਪਾਟਿਪਦਅਰੁਣਤੋਤਿ ਵਸ੍ਸੂਪਨਾਯਿਕਦਿਵਸਸਙ੍ਖਾਤਸ੍ਸ ਪਾਟਿਪਦਸ੍ਸ ਅਰੁਣੁਗ੍ਗਮਨਤੋ. ਵਿਤਕ੍ਕਚਾਰਿਕੋਤਿ ‘‘ਕਤ੍ਥ ਨੁ ਖੋ ਵਸਿਸ੍ਸਾਮੀ’’ਤਿਆਦਿਨਾ ਵਿਤਕ੍ਕੇਨ ਚਰਣੇ ਅਨੁਯੁਤ੍ਤੋ. ਸੇਨਾਸਨਂ ਯਾਚਤੀਤਿ ਸੇਨਾਸਨਗ੍ਗਾਹਾਪਕਂ ਸੇਨਾਸਨਂ ਯਾਚਤਿ. ਗਹਿਤਨ੍ਤਿ ਸਙ੍ਘੇਨ ਗਹਿਤਂ. ਯਤ੍ਥਾਤਿ ਠਾਨੇ. ਵਸ੍ਸੂਪਗਤੇਹਿ ਵਤ੍ਤਬ੍ਬਾਤਿ ਸਮ੍ਬਨ੍ਧੋ. ਪੁਨਪ੍ਪੁਨਂ, ਸਮਂ ਵਾ ਚੇਤਿਯਙ੍ਗਣਾਦਿਂ ਮੁਞ੍ਚਨ੍ਤਿ ਸੋਧੇਨ੍ਤਿ ਇਮਾਹੀਤਿ ਸਮ੍ਮੁਞ੍ਚਨਿਯੋ. ਮੁਚਿਧਾਤੁ ਸੋਧਨਤ੍ਥੇ ਯੁਪਚ੍ਚਯੋ ਕਰਣਤ੍ਥੇ ਹੋਤਿ. ਤਾਲੁਜੋ ਪਠਮਕ੍ਖਰੋ. ਸੁਲਭਾ ਚੇ ਦਣ੍ਡਕਾ, ਏਕੇਕੇਨ ਦ੍ਵੇ ਤਿਸ੍ਸੋ ਯਟ੍ਠਿਸਮ੍ਮੁਞ੍ਚਨਿਯੋ ਬਨ੍ਧਿਤਬ੍ਬਾ. ਸੁਲਭਾ ਚੇ ਸਲਾਕਾ, ਛਪਞ੍ਚਮੁਟ੍ਠਿਸਮ੍ਮੁਞ੍ਚਨਿਯੋ ਬਨ੍ਧਿਤਬ੍ਬਾਤਿ ਅਤ੍ਥੋ. ਪਞ੍ਚ ਪਞ੍ਚ ਉਕ੍ਕਾਤਿ ਅਰਞ੍ਞਵਿਹਾਰੇਸੁ ਪਰਿਸ੍ਸਯਵਿਜਾਨਨਤ੍ਥਂ ਪਞ੍ਚ ਪਞ੍ਚ ਅਗ੍ਗਿਉਕ੍ਕਾ ਕੋਟ੍ਟੇਤਬ੍ਬਾ ਛਿਨ੍ਦਿਤਬ੍ਬਾਤਿ ਅਤ੍ਥੋ.

‘‘ਨਿਬਦ੍ਧਵਤ੍ਤਂ ਠਪੇਤ੍ਵਾ’’ਤਿ ਏਤ੍ਥ ਅਕਤ੍ਤਬ੍ਬਵਤ੍ਤਂ ਦਸ੍ਸੇਨ੍ਤੋ ਆਹ ‘‘ਵਤ੍ਤਂ ਕਰੋਨ੍ਤੇਹਿ ਚਾ’’ਤਿਆਦਿ. ਤਤ੍ਥ ਵਤ੍ਤਂ ਕਰੋਨ੍ਤੇਹਿ ਚ ਏਵਰੂਪਂ ਅਧਮ੍ਮਿਕਵਤ੍ਤਂ ਨ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਹਿ ਸਚ੍ਚਂ, ਸਬ੍ਬੇਵ ਏਤੇ ਉਦ੍ਦੇਸਾਦਯੋ ਪਪਞ੍ਚਾਤਿ ਯੋਜਨਾ. ਪਪਞ੍ਚੇਨ੍ਤਿ ਸਂਸਾਰੇ ਚਿਰਂ ਠਪੇਨ੍ਤੀਤਿ ਪਪਞ੍ਚਾ. ਮੂਗਬ੍ਬਤਨ੍ਤਿ ਮੂਗਾਨਂ ਵਤਂ, ਮੂਗੇਹਿ ਕਤ੍ਤਬ੍ਬਂ ਵਾ, ਮੂਗੇਨ ਵਿਯ ਵਾ ਅਮੂਗੇਹਿ ਕਤ੍ਤਬ੍ਬਂ ਵਤਂ. ਏਵਂ ਅਕਾਤਬ੍ਬਵਤ੍ਤਂ ਦਸ੍ਸੇਤ੍ਵਾ ਇਦਾਨਿ ਕਾਤਬ੍ਬਵਤ੍ਤਂ ਦਸ੍ਸੇਨ੍ਤੋ ਆਹ ‘‘ਪਰਿਯਤ੍ਤਿਧਮ੍ਮੋ ਨਾਮਾ’’ਤਿਆਦਿ. ਤਿਵਿਧਮ੍ਪੀਤਿ ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਪ੍ਪਕਾਰਮ੍ਪਿ. ਅਵਯਵਪਰਿਯਤ੍ਤਿਧਮ੍ਮੋਪਿ ਅਵਯਵਿਪਰਿਯਤ੍ਤਿਧਮ੍ਮਂ, ਅਵਯਵਿਪਰਿਯਤ੍ਤਿਧਮ੍ਮੋ ਵਾ ਅਵਯਵਪਰਿਯਤ੍ਤਿਧਮ੍ਮਂ ਪਤਿਟ੍ਠਾਪੇਤਿ, ਤਸ੍ਮਾ ਪਰਿਯਤ੍ਤਿਧਮ੍ਮੋ ਅਤ੍ਤਨਾਪਿ ਅਤ੍ਤਾਨਂ ਪਤਿਟ੍ਠਾਪੇਸੀਤਿ ਵੇਦਿਤਬ੍ਬਂ. ਉਦ੍ਦਿਸਥਾਤਿ ਪਰਿਯਤ੍ਤਿਂ ਉਦ੍ਦਿਸਥ. ਸੋਧੇਤ੍ਵਾ…ਪੇ… ਉਪਸਮ੍ਪਾਦੇਥਾਤਿ ਏਤ੍ਥ ਸੋਧਨਂ ਨਾਮ ਸਬ੍ਬੇਸਂ ਆਚਾਰਕੁਲਪੁਤ੍ਤਾਨਂ ਉਪਪਰਿਕ੍ਖਨਂ. ਸੋਧੇਤ੍ਵਾ ਨਿਸ੍ਸਯਂ ਦੇਥਾਤਿ ਏਤ੍ਥ ਸੋਧਨਂ ਨਾਮ ਭਿਕ੍ਖੁਸਭਾਗਤਂ ਉਪਪਰਿਕ੍ਖਨਂ. ਹੀਤਿ ਸਚ੍ਚਂ. ਕੁਲਪੁਤ੍ਤੋਤਿ ਆਚਾਰਕੁਲਪੁਤ੍ਤੋ. ਯਤ੍ਤਕਾਨਿ ਧੁਤਙ੍ਗਾਨਿ ਸਮਾਦਿਯਿਤੁਂ ਸਕ੍ਕੋਥਾਤਿ ਯੋਜਨਾ. ਅਨ੍ਤੋਵਸ੍ਸਂ ਨਾਮੇਤਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਮੇਤਂ. ਏਤਸ੍ਮਿਂ ਅਨ੍ਤੋਵਸ੍ਸੇਤਿ ਹਿ ਅਤ੍ਥੋ, ਭਵਿਤਬ੍ਬਨ੍ਤਿਆਦੀਸੁ ਸਮ੍ਬਨ੍ਧਿਤਬ੍ਬਂ. ਸਕਲਦਿਵਸਨ੍ਤਿ ਸਕਲਦਿਵਸਮ੍ਹਿ, ਅਪ੍ਪਮਤ੍ਤੇਹੀਤਿ ਸਮ੍ਬਨ੍ਧੋ. ਏਕਚਾਰਿਕਵਤ੍ਤਨ੍ਤਿ ਏਕਕੇਨ ਚਰਿਤਬ੍ਬਂ ਵਤ੍ਤਂ. ਭਸ੍ਸੇਤਿ ਵਚਨੇ. ਦਸਵਤ੍ਥੁਕਕਥਨ੍ਤਿ ਅਪ੍ਪਿਚ੍ਛਤਾਦਿਦਸਵਤ੍ਥੁਕ ਕਥਂ.

ਵਿਗ੍ਗਾਹਿਕਪਿਸੁਣਫਰੁਸਵਚਨਾਨੀਤਿ ਵਿਗ੍ਗਹਂ ਕਲਹਂ ਜਨੇਤੀਤਿ ਵਿਗ੍ਗਾਹਿਕਂ, ਵਿਗ੍ਗਾਹਿਕਵਚਨਞ੍ਚ ਪਿਸੁਣਵਚਨਞ੍ਚ ਫਰੁਸਵਚਨਞ੍ਚ ਵਿਗ੍ਗਾਹਿਕਪਿਸੁਣਫਰੁਸਵਚਨਾਨਿ. ਮਨਸਿਕਾਰਬਹੁਲਾ ਵਿਹਰਥ ਇਤਿ ਓਵਦਿਤਬ੍ਬਾਤਿ ਯੋਜਨਾ. ਦਨ੍ਤਕਟ੍ਠਖਾਦਨਵਤ੍ਤਨ੍ਤਿ ਹੇਟ੍ਠਾ ਅਦਿਨ੍ਨਾਦਾਨਵਣ੍ਣਨਾਯਂ ਵੁਤ੍ਤਂ ਦਨ੍ਤਕਟ੍ਠਖਾਦਨੇ, ਦਨ੍ਤਕਟ੍ਠਖਾਦਨਸ੍ਸ ਵਾ ਵਤ੍ਤਂ. ‘‘ਪਤ੍ਤਂ ਥਵਿਕਾਯ ਪਕ੍ਖਿਪਨ੍ਤੇਨ ਨ ਕਥੇਤਬ੍ਬ’’ਨ੍ਤਿ ਇਮਿਨਾ ਕਥੇਨ੍ਤੇ ਪਮਾਦੇਨ ਪਤ੍ਤੋ ਭਿਜ੍ਜੇਯ੍ਯਾਤਿ ਪਤ੍ਤਸ੍ਸ ਗੁਤ੍ਤਤ੍ਥਾਯ ਕਥਨਂ ਨਿਵਾਰੇਤਿ. ਆਚਿਕ੍ਖਿਤਬ੍ਬਾਤਿ ਇਤਿਸਦ੍ਦੋ ਪਰਿਸਮਾਪਨਤ੍ਥੋ.

ਕੋਚਿ ਦਾਯਕੋਤਿ ਸਮ੍ਬਨ੍ਧੋ. ਆਗਨ੍ਤੁਕੋ ਭਿਕ੍ਖੂਤਿ ਚੀਵਰਗ੍ਗਾਹਿਤਤੋ ਪਚ੍ਛਾ ਆਗਤੋ ਆਗਨ੍ਤੁਕੋ ਭਿਕ੍ਖੁ. ਸਙ੍ਘਤ੍ਥੇਰੋਤਿ ਆਵਾਸਿਕਸਙ੍ਘਤ੍ਥੇਰੋ. ਪਠਮਭਾਗਨ੍ਤਿ ਪੁਬ੍ਬੇ ਗਾਹਿਤਂ ਪਠਮਭਾਗਂ, ਪਰਿਵਤ੍ਤੇਤ੍ਵਾਤਿ ਪੁਬ੍ਬੇ ਗਾਹਿਤਭਾਗੇਨ ਪਚ੍ਛਾ ਦਾਤਬ੍ਬਂ ਵਸ੍ਸਾਵਾਸਿਕਂ ਪਰਿਵਤ੍ਤੇਤ੍ਵਾ. ਆਗਨ੍ਤੁਕਸ੍ਸ ਵਸ੍ਸਗ੍ਗੇਨ ਪਤ੍ਤਟ੍ਠਾਨੇ ਆਗਨ੍ਤੁਕਸ੍ਸ ਦਾਤਬ੍ਬਨ੍ਤਿ ਯੋਜਨਾ. ‘‘ਆਗਨ੍ਤੁਕਸ੍ਸਾ’’ਤਿ ਪਦਂ ਪੁਬ੍ਬਾਪਰਂ ਅਪੇਕ੍ਖਤਿ. ਤਸ੍ਮਾ ਦ੍ਵਿਨ੍ਨਂ ਪਦਾਨਂ ਮਜ੍ਝੇ ਵੁਤ੍ਤਂ. ਪਠਮਵਸ੍ਸੂਪਗਤਾਤਿ ਪਠਮਵਸ੍ਸੂਪਨਾਯਿਕਦਿਵਸੇ ਵਸ੍ਸੂਪਗਤਾ. ‘‘ਦ੍ਵੇ ਤੀਣਿ ਚਤ੍ਤਾਰੀ’’ਤਿ ਵਚਨਸ੍ਸ ਵਾ ਬਹੂਨਂ ਭਿਕ੍ਖੂਨਂ ਵਾ ਬ੍ਯਾਪਨਤ੍ਥਾਯ ‘‘ਲਦ੍ਧਂ ਲਦ੍ਧ’’ਨ੍ਤਿ ਵਿਚ੍ਛਾਵਸੇਨ ਵੁਤ੍ਤਂ. ਤੇਨ ਪਨਾਤਿ ਆਗਨ੍ਤੁਕੇਨ ਪਨ. ਪਠਮਵਸ੍ਸੂਪਗਤੇਹਿ ਅਪ੍ਪਕੇ ਲਦ੍ਧੇ ਪਚ੍ਛਿਮਵਸ੍ਸੂਪਨਾਯਿਕਦਿਵਸੇ ਦਾਤਬ੍ਬਾਨਂ ਵਸ੍ਸਾਵਾਸਿਕਾਨਂ ਬਹੁਕੇਪਿ ਅਯਂ ਨਯੋ ਞਾਤਬ੍ਬੋਤਿ ਕਤ੍ਵਾ ਨ ਵੁਤ੍ਤੋ.

ਦ੍ਵੀਸੁਪੀਤਿ ਪਠਮ ਦੁਤਿਯਵਸੇਨ ਦ੍ਵੀਸੁਪਿ. ਵਸ੍ਸੂਪਗਤਾ ਭਿਕ੍ਖੂ ਭਿਕ੍ਖਾਯ ਕਿਲਮਨ੍ਤਾ ਵਦਨ੍ਤੀਤਿ ਸਮ੍ਬਨ੍ਧੋ. ਇਧਾਤਿ ਠਾਨੇ. ਵਸਨ੍ਤਾਤਿ ਏਕਤੋ ਵਸਨ੍ਤਾ. ਦ੍ਵੇ ਭਾਗਾ ਹੋਮ ਸਾਧੁ ਵਤਾਤਿ ਯੋਜਨਾ. ਸਾਧੁ ਵਤਾਤਿ ਏਕਂਸੇਨ ਸੁਨ੍ਦਰਾ ਭਵੇਯ੍ਯੁਨ੍ਤਿ ਅਤ੍ਥੋ. ਯੇਸਨ੍ਤਿ ਭਿਕ੍ਖੂਨਂ. ਤਤ੍ਥਾਤਿ ਞਾਤਿਪਵਾਰਿਤਟ੍ਠਾਨੇਸੁ. ਪਵਾਰਣਾਯਾਤਿ ਪਵਾਰਣਾਦਿਵਸੇ. ਤੇਸੂਤਿ ਭਿਕ੍ਖੂਸੁ. ਯੇਤਿ ਭਿਕ੍ਖੂ. ਤਤ੍ਥਾਤਿ ਞਾਤਿਪਵਾਰਿਤਟ੍ਠਾਨੇਸੁ. ਕਸ੍ਮਾ ਅਪਲੋਕੇਤ੍ਵਾ ਦਾਤਬ੍ਬਂ, ਨਨੁ ਤੇ ਸਾਦਿਯਨ੍ਤੀਤਿ ਆਹ ‘‘ਸਾਦਿ ਯਨ੍ਤਾਪਿ ਹੀ’’ਤਿਆਦਿ. ਤਤ੍ਥ ਹੀਤਿ ਯਸ੍ਮਾ. ‘‘ਨੇਵ ਵਸ੍ਸਾਵਾਸਿਕਸ੍ਸ ਸਾਮਿਨੋ’’ਤਿ ਇਮਿਨਾ ਤੇਸਂ ਵਸ੍ਸਚ੍ਛਿਨ੍ਨਤਂ ਦੀਪੇਤਿ. ਨੇਵ ਅਦਾਤੁਂ ਲਭਨ੍ਤੀਤਿ ਪਠਮਮੇਵ ਕਤਿਕਵਤ੍ਤਸ੍ਸ ਕਤਤ੍ਤਾ ਅਦਾਤੁਂ ਨੇਵ ਲਭਨ੍ਤਿ, ਸਬ੍ਬੇਸਂ ਨੋ ਅਮ੍ਹਾਕਨ੍ਤਿ ਯੋਜਨਾ. ਇਧਾਤਿ ਠਾਨੇ. ਤਨ੍ਤਿ ਕਤਿਕਵਤ੍ਤਂ. ਏਕੋ ਭਿਕ੍ਖੂਤਿ ਸਮ੍ਬਨ੍ਧੋ. ਤੇਸਨ੍ਤਿ ਭਿਕ੍ਖੂਨਂ. ਤਤ੍ਥਾਤਿ ਸਭਾਗਟ੍ਠਾਨੇ. ਵਸਿਤ੍ਵਾ ਆਗਤਾਨਂ ਤੇਸਂ ਭਿਕ੍ਖੂਨਨ੍ਤਿ ਯੋਜਨਾ. ਨ ਲਬ੍ਭਤਿ ਇਤਿ ਵੁਤ੍ਤਨ੍ਤਿ ਯੋਜਨਾ. ਇਮੇਸਨ੍ਤਿ ਵਸ੍ਸਾਵਾਸਿਅਪ੍ਪਤ੍ਤਕਾਨਂ ਏਕਚ੍ਚਾਨਂ. ਗਾਹਿਤਸਦਿਸਮੇਵਾਤਿ ਵਸ੍ਸਾਵਾਸਿਕਸ੍ਸ ਗਾਹਿਤੇਨ ਸਦਿਸਮੇਵ. ਤੇਸਮੇਵਾਤਿ ਏਕਚ੍ਚਾਨਮੇਵ.

ਪਕ੍ਕਨ੍ਤੋਪੀਤਿ ਅਞ੍ਞਂ ਠਾਨਂ ਪਕ੍ਕਮਨ੍ਤੋਪਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤੇਨ ਭਿਕ੍ਖੁਨਾ ਕਤਂ ਪਾਨੀਯਉਪਟ੍ਠਪਨਾਦਿਕਮ੍ਮਂ ਭਤਿਨਿਵਿਟ੍ਠਂ ਭਤਿਯਾ ਠਿਤਨ੍ਤਿ ਯੋਜਨਾ. ਅਪਲੋਕਨਕਮ੍ਮਂ ਕਤ੍ਵਾ ਗਾਹਿਤਂ ਸਙ੍ਘਿਕਨ੍ਤਿ ਸਮ੍ਬਨ੍ਧੋ. ਸਙ੍ਘਿਕਨ੍ਤਿ ਤਤ੍ਰੁਪ੍ਪਾਦਂ ਸਨ੍ਧਾਯ ਵੁਤ੍ਤਂ. ਵਿਬ੍ਭਨ੍ਤੋਪੀਤਿ ਪਿਸਦ੍ਦੋ ਪਗੇਵ ਛਿਨ੍ਨਵਸ੍ਸੋਤਿ ਦਸ੍ਸੇਤਿ. ਪਚ੍ਚਯਵਸੇਨੇਵਾਤਿ ਸਦ੍ਧਾਦੇਯ੍ਯਪਚ੍ਚਯਵਸੇਨ. ਵਦਨ੍ਤੀਤਿ ਕੇਚਿ ਵਦਨ੍ਤਿ.

ਦਿਸਂਗਮਿਕੋ ਭਿਕ੍ਖੁ ਵਿਬ੍ਭਮਤੀਤਿ ਸਮ੍ਬਨ੍ਧੋ. ਮਨੁਸ੍ਸੇਤਿ ਵਸ੍ਸਾਵਾਸਿਕਦਾਯਕਮਨੁਸ੍ਸੇ. ਸਮ੍ਮੁਖਾਤਿ ਆਵਾਸਿਕਸ੍ਸ ਸਮ੍ਮੁਖਾ. ਸਮ੍ਪਟਿਚ੍ਛਾਪੇਤ੍ਵਾਤਿ ‘‘ਸੁਟ੍ਠੁ ਦਸ੍ਸਾਮਾ’’ਤਿ ਪਟਿਚ੍ਛਾਪੇਤ੍ਵਾ. ਯਸ੍ਸ ਗਾਹਿਤਨ੍ਤਿ ਯਸ੍ਸ ਭਿਕ੍ਖੁਨੋ ਸੇਨਾਸਨਂ ਗਾਹਿਤਂ. ਸੇਨਾਸਨਸਾਮਿਕਸ੍ਸਾਤਿ ਸੇਨਾਸਨਦਾਯਕਸ੍ਸ ਪੁਤ੍ਤਧੀਤਾਦਯੋਤਿ ਸਮ੍ਬਨ੍ਧੋ. ਸੇਨਾਸਨੇ ਦੇਮਾਤਿ ਸੇਨਾਸਨਸ੍ਸ ਦੇਮ. ਤਤ੍ਥਾਤਿ ਸੇਨਾਸਨੇ. ਏਕਮੇਵ ਵਤ੍ਥਂ ਦਾਤਬ੍ਬਂ. ਕਸ੍ਮਾ? ਪੁਗ੍ਗਲਸ੍ਸ ਅਦਤ੍ਵਾ ਸੇਨਾਸਨਸ੍ਸੇਵ ਦਾਤਬ੍ਬਤ੍ਤਾ. ਵਸ੍ਸਾਵਾਸਿਕਟ੍ਠਿਤਿਕਾਯਾਤਿ ਵਸ੍ਸਾਵਾਸਿਕਗਾਹਿਤਸ੍ਸ ਠਿਤਿਕਾਯ. ਏਸੇਵ ਨਯੋਤਿ ਸੇਨਾਸਨਸ੍ਸੇਵ ਦਿਨ੍ਨਤ੍ਤਾ ਏਸੇਵ ਨਯੋ. ਤਸ੍ਸੇਵ ਹੋਨ੍ਤੀਤਿ ਪੁਗ੍ਗਲਸ੍ਸੇਵ ਦਿਨ੍ਨਤ੍ਤਾ ਤਸ੍ਸੇਵ ਹੋਨ੍ਤਿ.

ਦੁਤਿਯੋ ਥੇਰਾਸਨੇ ਗਾਹਿਤੋ ਹੋਤੀਤਿ ਸਮ੍ਬਨ੍ਧੋ. ਪਠਮਭਾਗਸ੍ਸ ਸਾਮਣੇਰਸ੍ਸ ਗਾਹਿਤਤ੍ਤਾ ਵੁਤ੍ਤਂ ‘‘ਵਰਭਾਗਂ ਸਾਮਣੇਰਸ੍ਸ ਦਤ੍ਵਾ’’ਤਿ. ਉਭੋਪੀਤਿ ਦ੍ਵੇ ਥੇਰਸਾਮਣੇਰੇਪਿ. ਸਯਮੇਵਾਤਿ ਦਾਯਕੋ ਸਯਮੇਵ. ਯਨ੍ਤਿ ਵਸ੍ਸਾਵਾਸਿਕਂ. ਯਸ੍ਸਾਤਿ ਥੇਰਸ੍ਸ ਵਾ ਸਾਮਣੇਰਸ੍ਸ ਵਾ.

ਇਤੋਤਿ ਵੁਤ੍ਤਨਯਤੋ. ਦਹਰਸਾਮਣੇਰਸ੍ਸਾਤਿ ਤਰੁਣਸ੍ਸ ਸਾਮਣੇਰਸ੍ਸ. ਸੋਤਿ ਘਰਸਾਮਿਕੋ. ਨਨ੍ਤਿ ਪਤ੍ਤਜਨਂ. ਯਸ੍ਸਾਤਿ ਭਿਕ੍ਖੁਨੋ. ਤੇਸਨ੍ਤਿ ਮਨੁਸ੍ਸਾਨਂ. ਯਥਾਭੂਤਂ ਆਚਿਕ੍ਖਿਤਬ੍ਬਨ੍ਤਿ ਵਿਬ੍ਭਮਕਾਲਙ੍ਕਤਕਾਰਣਂ ਯਥਾਭੂਤਂ ਆਚਿਕ੍ਖਿਤਬ੍ਬਂ. ਸੁਦ੍ਧਪਂਸੁਕੂਲਿਕਾਯੇਵਾਤਿ ਅਞ੍ਞੇਹਿ ਅਮਿਸ੍ਸਾ ਸੁਦ੍ਧਾ ਪਂਸੁਕੂਲਿਕਾਯੇਵਾਤਿ. ਇਦਂ ਨੇਵਾਸਿਕਵਤ੍ਤਨ੍ਤਿ ਨਿਗਮਨਂ.

ਉਪਨਨ੍ਦਵਤ੍ਥੁਕਥਾ

੩੧੯. ਅਯਮਤ੍ਥੋਤਿ ਅਯਂ ਵਕ੍ਖਮਾਨੋ ਅਤ੍ਥੋ, ਏਵਂ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਤਤ੍ਥਾਤਿ ਗਾਮਕੇ. ਤਨ੍ਤਿ ਸੇਨਾਸਨਂ, ਗਣ੍ਹਨ੍ਤੇਨੇਵਾਤਿ ਸਮ੍ਬਨ੍ਧੋ. ਇਧਾਤਿ ਸਾਵਤ੍ਥਿਯਂ. ਮੁਤ੍ਤਨ੍ਤਿ ਤੇ ਸੇਨਾਸਨਂ ਮੁਞ੍ਚਿਤਂ ਹੋਤਿ. ਤਤ੍ਰਾਪੀਤਿ ਗਾਮਕੇਪਿ. ਉਭਯਤ੍ਥਾਤਿ ਸਾਵਤ੍ਥਿਯਂ, ਗਾਮਕੇ ਚਾਤਿ ਉਭਯਤ੍ਥ.

ਏਤ੍ਥਾਤਿ ਉਪਨਨ੍ਦਵਤ੍ਥੁਸ੍ਮਿਂ. ਕਥਨ੍ਤਿ ਕੇਨ ਪਕਾਰੇਨ ਪਟਿਪ੍ਪਸ੍ਸਮ੍ਭਤਿ. ਇਧਾਤਿ ਸਾਸਨੇ. ਏਕਚ੍ਚੋ ਗਣ੍ਹਾਤੀਤਿ ਸਮ੍ਬਨ੍ਧੋ. ਤਤ੍ਰਾਪੀਤਿ ਸਾਮਨ੍ਤਵਿਹਾਰੇਪਿ. ਤਸ੍ਸਾਤਿ ਭਿਕ੍ਖੁਸ੍ਸ. ਇਧਾਤਿ ਸੇਨਾਸਨੇ. ਆਲਯਮਤ੍ਤਨ੍ਤਿ ਚਿਤ੍ਤੁਪ੍ਪਾਦਮਤ੍ਤਂ. ਇਚ੍ਚਸ੍ਸਾਤਿ ਇਤਿ ਅਸ੍ਸ, ਏਵਂ ਅਸ੍ਸ ਭਿਕ੍ਖੁਸ੍ਸਾਤਿ ਅਤ੍ਥੋ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ‘‘ਗਹਣੇਨ ਗਹਣ’’ਨ੍ਤਿਆਦਿਕੇ ਚਤੁਕ੍ਕੇ. ਯੋ ਪਨ ਗਚ੍ਛਤੀਤਿ ਸਮ੍ਬਨ੍ਧੋ. ਉਪਚਾਰਸੀਮਾਤਿਕ੍ਕਮੇਤਿ ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਵਚਨਂ, ਭਾਵੇਨ ਭਾਵਲਕ੍ਖਣੇ ਵਾ. ਤਤ੍ਥਾਤਿ ਅਞ੍ਞਸ੍ਮਿਂ ਵਿਹਾਰੇ ਪਚ੍ਚਾਗਚ੍ਛਤਿ, ਵਟ੍ਟਤਿ, ਸੇਨਾਸਨਗ੍ਗਾਹੋ ਨ ਪਟਿਪ੍ਪਸ੍ਸਮ੍ਭਤੀਤਿ ਅਧਿਪ੍ਪਾਯੋ.

੩੨੦. ਯੋਤਿ ਭਿਕ੍ਖੁ. ਮਹਨ੍ਤਤਰੋ ਵਾ ਦਹਰਤਰੋ ਵਾਤਿ ਅਤ੍ਤਨੋ ਮਹਨ੍ਤਤਰੋ ਵਾ ਦਹਰਤਰੋ ਵਾ ਹੋਤਿ. ਸੋ ਭਿਕ੍ਖੁ ਤਿਵਸ੍ਸਨ੍ਤਰੋ ਨਾਮਾਤਿ ਯੋਜਨਾ. ਏਕਸ੍ਸ ਭਿਕ੍ਖੁਨੋ ਤਿਣ੍ਣਂ ਵਸ੍ਸਾਨਮਨ੍ਤਰੇ ਠਿਤੋ ਤਿਵਸ੍ਸਨ੍ਤਰੋ ਅਞ੍ਞੋ ਭਿਕ੍ਖੁ. ਤਤ੍ਥਾਤਿ ਭਿਕ੍ਖੂਸੁ. ਇਮੇ ਸਬ੍ਬੇਤਿ ਤਿਵਸ੍ਸਨ੍ਤਰਦ੍ਵਿਵਸ੍ਸਨ੍ਤਰਸਮਾਨਵਸ੍ਸਿਕੇ ਇਮੇ ਭਿਕ੍ਖੂ, ਲਭਨ੍ਤੀਤਿ ਸਮ੍ਬਨ੍ਧੋ. ਯਂ ਤਿਣ੍ਣਂ ਪਹੋਤੀਤਿ ਮਞ੍ਚਪੀਠਵਿਨਿਮੁਤ੍ਤਂ ਯਂ ਆਸਨਂ ਤਿਣ੍ਣਂ ਸੁਖਂ ਨਿਸੀਦਿਤੁਂ ਪਹੋਤਿ, ਤਥਾਰੂਪੇ ਆਸਨੇਪਿ ਦ੍ਵੇ ਦ੍ਵੇ ਹੁਤ੍ਵਾ ਨਿਸੀਦਿਤੁਂ ਲਭਨ੍ਤੀਤਿ ਯੋਜਨਾ. ਅਪਿਸਦ੍ਦੇਨ ਮਞ੍ਚਪੀਠਾਨਿ ਅਪੇਕ੍ਖਤਿ. ਇਦਂ ਪਚ੍ਛਿਮਦੀਘਾਸਨਂ. ਅਨੁਪਸਮ੍ਪਨ੍ਨੇਨਾਪੀਤਿ ਪਿਸਦ੍ਦੋ ਪਗੇਵ ਉਪਸਮ੍ਪਨ੍ਨੇਨਾਤਿ ਦਸ੍ਸੇਤਿ.

ਹਤ੍ਥਿਕੁਮ੍ਭੇਤਿ ਹਤ੍ਥਿਸਿਰੋਪਿਣ੍ਡੇ. ਇਮਿਨਾ ਹਤ੍ਥਿਸਦ੍ਦੇਨ ਹਤ੍ਥਿਕੁਮ੍ਭੋ ਗਹਿਤੋ ਅਵਯਵੂਪਚਾਰੇਨ ਵਾ ਉਤ੍ਤਰਪਦਲੋਪੇਨ ਵਾਤਿ ਦਸ੍ਸੇਤਿ. ਹਤ੍ਥੀ ਵਿਯਾਤਿ ਹਤ੍ਥੀ, ਭੂਮਿਭਾਗੋ, ਹਤ੍ਥਿਮ੍ਹਿ ਪਤਿਟ੍ਠਿਤੋ ਪਾਦਸਙ੍ਖਾਤੋ ਨਖੋ ਇਮਸ੍ਸਾਤਿ ਹਤ੍ਥਿਨਖਕੋ, ਪਾਸਾਦੋ. ਏਤਂ ‘‘ਹਤ੍ਥਿਨਖਕੋ’’ਤਿ ਨਾਮਂ ਏਵਂਕਤਸ੍ਸ ਪਾਸਾਦਸ੍ਸ ਨਾਮਨ੍ਤਿ ਯੋਜਨਾ. ‘‘ਸੁਵਣ੍ਣਰਜਤਾਦਿਵਿਚਿਤ੍ਰਾਨੀ’’ਤਿ ਪਦਂ ‘‘ਕਵਾਟਾਨਿ ਮਞ੍ਚਪੀਠਾਨਿ ਤਾਲਵਣ੍ਟਾਨੀ’’ਤਿ ਸਬ੍ਬਪਦੇਸੁ ਯੋਜੇਤਬ੍ਬਂ. ਯਂਕਿਞ੍ਚਿ ਚਿਤ੍ਤਕਮ੍ਮਕਤਂ ਅਤ੍ਥਿ, ਸਬ੍ਬਂ ਵਟ੍ਟਤੀਤਿ ਯੋਜਨਾ. ਪਾਸਾਦਸ੍ਸ ਦੇਮਾਤਿ ਸਮ੍ਬਨ੍ਧੋ. ਪਾਟੇਕ੍ਕਨ੍ਤਿ ਪਾਸਾਦਤੋ ਵਿਸੁਂ. ਪਟਿਗ੍ਗਹਿਤਮੇਵਾਤਿ ਸਬ੍ਬਂ ਪਟਿਗ੍ਗਹਿਤਮੇਵ ਹੋਤਿ. ਗੋਨਕਾਦੀਨਿ ਅਟ੍ਠਾਰਸ ਅਤ੍ਥਰਣਾਨਿ ਪਰਿਭੁਞ੍ਜਿਤੁਨ੍ਤਿ ਸਮ੍ਬਨ੍ਧੋ. ਗਿਹਿਵਿਕਟਨੀਹਾਰੇਨਾਤਿ ਗਿਹੀਹਿ ਵਿਸੇਸੇਨ ਯਥਾਕਾਮਂ ਕਰਿਯਤੀਤਿ ਗਿਹਿਵਿਕਟਂ, ਗਿਹਿਸਨ੍ਤਕਂ. ‘‘ਗਿਹਿਵਿਕਟ’’ਨ੍ਤਿ ਨੀਹਾਰੋ ਅਭਿਨੀਹਾਰੋ ਗਿਹਿਵਿਕਟਨੀਹਾਰੋ, ਤੇਨ. ਲਬ੍ਭਨ੍ਤੀਤਿ ਨਿਸੀਦਿਤੁਮੇਵ ਲਬ੍ਭਨ੍ਤਿ. ਤਤ੍ਰਾਪੀਤਿ ਧਮ੍ਮਾਸਨੇਪਿ.

ਅਵਿਸ੍ਸਜ੍ਜਿਯਵਤ੍ਥੁਕਥਾ

੩੨੧. ਏਤਾਨੀਤਿ ਗਰੁਭਣ੍ਡਾਨਿ. ਤਤ੍ਥਾਤਿ ਰਾਸਿਵਸੇਨ ਪਞ੍ਚਸੁ ਸਰੂਪਵਸੇਨ ਪਞ੍ਚਵੀਸਤਿਯਾ ਗਰੁਭਣ੍ਡੇਸੁ. ਆਗਨ੍ਤ੍ਵਾ, ਆਭੁਸੋ ਵਾ ਰਮਨ੍ਤਿ ਏਤ੍ਥਾਤਿ ਆਰਾਮੋ. ਤੇਸਂਯੇਵਾਤਿ ਪੁਪ੍ਫਾਰਾਮਫਲਾਰਾਮਾਨਮੇਵ. ‘‘ਠਪਿਤੋਕਾਸੋ’’ਤਿ ਇਮਿਨਾ ਵਤ੍ਥੁਸਦ੍ਦਸ੍ਸ ਭੂਮਿਭੇਦਤ੍ਥਂ ਦਸ੍ਸੇਤਿ. ਵਸਤਿ ਆਰਾਮੋ ਪਤਿਟ੍ਠਹਤਿ ਏਤ੍ਥਾਤਿ ਆਰਾਮਵਤ੍ਥੁ. ਤੇਸੁ ਵਾਤਿ ਏਤ੍ਥ ਵਾਸਦ੍ਦੇਨ ਨਵਭੂਮਿਭਾਗਤੋ ਅਞ੍ਞਸ੍ਸ ਪੋਰਾਣਭੂਮਿਭਾਗਸ੍ਸਪਿ ਆਰਾਮਵਤ੍ਥੁਭਾਵਂ ਵਿਕਪ੍ਪੇਤਿ. ਵਿਸੇਸੇਨ ਚਤੁਇਰਿਯਾਪਥੇ ਹਰਤਿ ਪਵਤ੍ਤੇਤਿ ਏਤ੍ਥਾਤਿ ਵਿਹਾਰੋ. ਤਸ੍ਸਾਤਿ ਵਿਹਾਰਸ੍ਸ. ਚਤੁਨ੍ਨਂ ਮਞ੍ਚਾਨਨ੍ਤਿ ਨਿਦ੍ਧਾਰਣਤ੍ਥੇ ਸਾਮਿਵਚਨਂ. ਅਞ੍ਞਤਰੋ ਮਞ੍ਚੋ ਨਾਮਾਤਿ ਯੋਜਨਾ. ਏਸੇਵ ਨਯੋ ਸੇਸੇਸੁਪਿ. ‘‘ਲੋਹੇਨ ਕਤਾ ਕੁਮ੍ਭੀ’’ਤਿ ਇਮਿਨਾ ਲੋਹਕੁਮ੍ਭੀਤਿ ਏਤ੍ਥ ਮਜ੍ਝੇਲੋਪਸਮਾਸਂ ਦਸ੍ਸੇਤਿ. ਲੋਹਮਯਾ ਕੁਮ੍ਭੀ ਲੋਹਕੁਮ੍ਭੀਤਿ ਵਚਨਤ੍ਥੋਪਿ ਯੁਜ੍ਜਤੇਵ. ‘‘ਏਸੇਵ ਨਯੋ’’ਤਿ ਇਮਿਨਾ ਲੋਹੇਨ ਕਤਂ ਭਾਣਕਂ, ਲੋਹੇਨ ਕਤੋ ਵਾਰਕੋ, ਲੋਹੇਨ ਕਤਂ ਕਟਾਹਨ੍ਤਿ ਅਤ੍ਥਂ ਅਤਿਦਿਸਤਿ. ਏਤ੍ਥਾਤਿ ਭਾਣਕਵਾਰਕਕਟਾਹੇਸੁ. ਅਰਞ੍ਜਰੋਤਿ ਅਤਿਮਹਨ੍ਤਤ੍ਤਾ ਅਰਂ ਖਿਪ੍ਪਂ ਜਰਤਿ ਵਿਨਾਸੇਤੀਤਿ ਅਰਞ੍ਜਰੋ. ਅਥ ਵਾ ਜਲਂ ਗਣ੍ਹਿਤੁਂ ਅਲਨ੍ਤਿ ਅਰਞ੍ਜਰੋ ਲਕਾਰਾਨਂ ਰਕਾਰੇ ਕਤ੍ਵਾ.

ਗਾਥਾਵਸੇਨ ਨਿਗਮਨਂ ਦਸ੍ਸੇਨ੍ਤੋ ਆਹ ‘‘ਏਵ’’ਨ੍ਤਿਆਦਿ. ਤਤ੍ਥ ਏਵਂ ਪਕਾਸਯੀਤਿ ਸਮ੍ਬਨ੍ਧੋ. ਦ੍ਵੇ ਗਰੁਭਣ੍ਡਾਨਿ ਦ੍ਵਿਸਙ੍ਗਹਾਨਿ ਹੋਨ੍ਤਿ, ਤਤਿਯਂ ਗਰੁਭਣ੍ਡਂ ਚਤੁਸਙ੍ਗਹਂ ਹੋਤਿ, ਚਤੁਤ੍ਥਂ ਗਰੁਭਣ੍ਡਂ ਨਵਕੋਟ੍ਠਾਸਂ ਹੋਤਿ, ਪਞ੍ਚਮਂ ਗਰੁਭਣ੍ਡਂ ਅਟ੍ਠਭੇਦਨਂ ਹੋਤਿ, ਇਤਿ ਇਮਿਨਾ ਪਕਾਰੇਨ ਪਞ੍ਚਨਿਮ੍ਮਲਲੋਚਨੋ ਨਾਥੋ ਪਞ੍ਚਹਿ ਰਾਸੀਹਿ ਪਞ੍ਚਵੀਸਵਿਧਂ ਗਰੁਭਣ੍ਡਂ ਪਕਾਸਯੀਤਿ ਯੋਜਨਾ.

ਤਤ੍ਰਾਤਿ ਗਰੁਭਣ੍ਡੇ. ਹੀਤਿ ਵਿਤ੍ਥਾਰੋ. ਸਬ੍ਬਮ੍ਪਿ ਇਦਂ ਗਰੁਭਣ੍ਡਂ ਅਵਿਸ੍ਸਜ੍ਜਿਯਨ੍ਤਿ ਵੁਤ੍ਤਨ੍ਤਿ ਯੋਜਨਾ. ਇਧਾਤਿ ਇਮਸ੍ਮਿਂ ਵਤ੍ਥੁਸ੍ਮਿਂ. ਪਰਿਵਾਰੇ ਪਨ ਆਗਤਨ੍ਤਿ ਸਮ੍ਬਨ੍ਧੋ.

ਪਞ੍ਚ ਰਾਸਯੋ ਮਹੇਸਿਨਾ ਵੁਤ੍ਤਾਤਿ ਯੋਜਨਾ. ਏਤ੍ਥਾਤਿ ਪਰਿਵਾਰੇ.

ਤਤ੍ਰਾਤਿ ‘‘ਪਰਿਵਤ੍ਤਨਵਸੇਨਾ’’ਤਿ ਵਚਨੇ. ਇਦਂ ਗਰੁਭਣ੍ਡਂ ਉਪਨੇਤੁਨ੍ਤਿ ਸਮ੍ਬਨ੍ਧੋ. ਨਿਚ੍ਚਂ ਤਿਟ੍ਠਨ੍ਤੀਤਿ ਥਾਵਰਾ, ਠਾਧਾਤੁ ਵਰਪਚ੍ਚਯੋ, ਠਾਕਾਰਸ੍ਸ ਥਾਕਾਰੋ. ਇਮਿਨਾ ਆਰਾਮਆਰਾਮਵਤ੍ਥੁਵਿਹਾਰਵਿਹਾਰਵਤ੍ਥੂਨਿ ਗਹੇਤਬ੍ਬਾਨਿ. ਅਵਿਸ੍ਸਜ੍ਜਿਯਅਵੇਭਙ੍ਗੀਯਤ੍ਤਾ ਗਰੁ ਅਲਹੁਕਂ ਭਣ੍ਡਂ ਗਰੁਭਣ੍ਡਂ. ਇਮਿਨਾ ਮਞ੍ਚਾਦੀਨਿ ਏਕਵੀਸਤਿ ਗਰੁਭਣ੍ਡਾਨਿ ਗਹੇਤਬ੍ਬਾਨਿ. ਥਾਵਰੇਤਿ ਆਧਾਰੇ ਭੁਮ੍ਮਂ, ਪਰਿਯਾਪਨ੍ਨਨ੍ਤਿ ਸਮ੍ਬਨ੍ਧੋ. ਅਥ ਵਾ ਨਿਦ੍ਧਾਰਣੇ ਭੁਮ੍ਮਂ, ਥਾਵਰੇਸੂਤਿ ਹਿ ਅਤ੍ਥੋ, ਖੇਤ੍ਤਨ੍ਤਿਆਦੀਸੁ ਸਮ੍ਬਨ੍ਧਿਤਬ੍ਬਂ. ਖਿਪਤਿ ਪੁਬ੍ਬਣ੍ਣਬੀਜਮੇਤ੍ਥਾਤਿ ਖੇਤ੍ਤਂ. ਵਸਤਿ ਅਪਰਣ੍ਣਬੀਜਂ ਪਤਿਟ੍ਠਾਤਿ ਏਤ੍ਥਾਤਿ ਵਤ੍ਥੁ, ਤਲੇ ਭੂਮਿਭਾਗੇ ਏਕਤੋ ਵਾ ਦ੍ਵੀਹਿ ਵਾ ਤੀਹਿ ਵਾ ਠਾਨੇਹਿ ਆਵਰਣਂ ਕਰੀਯਤਿ ਏਤ੍ਥਾਤਿ ਤਲ਼ਾਕੋ, ਸਰੋ. ਕਸ੍ਸਕਾਨਂ ਮਤੇਨ ਕਤ੍ਤਬ੍ਬਾਤਿ ਮਾਤਿਕਾ. ਆਰਾਮੇਨ ਪਰਿਵਤ੍ਤੇਤੁਨ੍ਤਿ ਸਮ੍ਬਨ੍ਧੋ. ਕਾਨਿ ਪਰਿਵਤ੍ਤੇਤੁਨ੍ਤਿ ਆਹ ‘‘ਇਮਾਨਿ ਚਤ੍ਤਾਰਿਪੀ’’ਤਿ. ਪਿਸਦ੍ਦੋ ਅਵਯਵਸਮ੍ਪਿਣ੍ਡਨੋ.

ਤਤ੍ਰਾਤਿ ‘‘ਪਰਿਵਤ੍ਤੇਤੁਂ ਵਟ੍ਟਤੀ’’ਤਿ ਵਚਨੇ. ਦੂਰੇਤਿ ਸਙ੍ਘਾਰਾਮਤੋ ਦੂਰਟ੍ਠਾਨੇ. ਯਮ੍ਪੀਤਿ ਨਾਲ਼ਿਕੇਰਫਲਮ੍ਪਿ. ਹਰਨ੍ਤੀਤਿ ਸਙ੍ਘਸ੍ਸ ਹਰਨ੍ਤਿ. ਅਞ੍ਞੇਸਨ੍ਤਿ ਸਙ੍ਘਤੋ ਅਞ੍ਞੇਸਂ ਮਨੁਸ੍ਸਾਨਨ੍ਤਿ ਸਮ੍ਬਨ੍ਧੋ. ਤੇਤਿ ਮਨੁਸ੍ਸਾ. ਸਙ੍ਘੇਨ ਸਮ੍ਪਟਿਚ੍ਛਿਤਬ੍ਬੋਤਿ ਸਮ੍ਬਨ੍ਧੋ. ਰੁਚ੍ਚਤੀਤਿ ਸਙ੍ਘਸ੍ਸਾਰਾਮੇਨ ਮਨੁਸ੍ਸਾਨਮਾਰਾਮਂ, ਮਨੁਸ੍ਸਾਨਮਾਰਾਮੇਨ ਵਾ ਸਙ੍ਘਸ੍ਸਾਰਾਮਂ ਪਰਿਵਤ੍ਤੇਤੁਂ ਰੁਚੀਯਤਿ ਇਚ੍ਛੀਯਤਿ. ਭਿਕ੍ਖੂਨਂ ਆਰਾਮੋਤਿ ਸਮ੍ਬਨ੍ਧੋ. ਅਯਨ੍ਤਿ ਮਨੁਸ੍ਸਾਨਮਾਰਾਮੋ. ਖੁਦ੍ਦਕੋਤਿ ਸਙ੍ਘਾਰਾਮਤੋ ਖੁਦ੍ਦਕੋ. ਆਯਨ੍ਤਿ ਅਯਤਿ ਆਯਸਾਮਿਕੋ ਧਨੇਨ ਵਡ੍ਢਿਂ ਗਚ੍ਛਤਿ ਅਨੇਨਾਤਿ ਆਯੋ, ਤਂ. ਸਮਕਮੇਵਾਤਿ ਸਮਪ੍ਪਮਾਣਮੇਵ, ਆਯਂ ਸਚੇ ਦੇਤੀਤਿ ਸਮ੍ਬਨ੍ਧੋ. ਪਮਾਣਤ੍ਥੇ ਕਪਚ੍ਚਯੋ. ਮਨੁਸ੍ਸਾਨਂ ਰੁਕ੍ਖਾਤਿ ਸਮ੍ਬਨ੍ਧੋ. ਅਤਿਰੇਕਂ ਸਙ੍ਘਸ੍ਸ ਦੇਮਾਤਿ ਸਮ੍ਬਨ੍ਧੋ. ਜਾਨਾਪੇਤ੍ਵਾਤਿ ‘‘ਸਙ੍ਘੇ ਦਿਨ੍ਨਂ ਮਹਪ੍ਫਲ’’ਨ੍ਤਿ (ਮ. ਨਿ. ੩.੩੭੬) ਸਙ੍ਘਸ੍ਸ ਦਿਨ੍ਨਦਾਨਸ੍ਸ ਆਨਿਸਂਸਂ ਮਨੁਸ੍ਸਾਨਂ ਜਾਨਾਪੇਤ੍ਵਾ. ਫਲਧਾਰਿਨੋ ਹੋਨ੍ਤਿ ਨਨੂਤਿ ਯੋਜਨਾ. ਏਵਨ੍ਤਿਆਦਿ ਨਿਗਮਨਂ. ਏਤੇਨੇਵ ਨਯੇਨਾਤਿ ਯੇਨ ਨਯੇਨ ਆਰਾਮੋ ਆਰਾਮੇਨ ਪਰਿਵਤ੍ਤੇਤਬ੍ਬੋ, ਏਤੇਨੇਵ ਨਯੇਨ. ਮਹਨ੍ਤੇਨ ਵਾ ਖੁਦ੍ਦਕੇਨ ਵਾ ਆਰਾਮਵਤ੍ਥੁਨਾ ਚਾਤਿ ਯੋਜਨਾ. ਆਰਾਮ ਆਰਾਮਵਤ੍ਥੁਵਿਹਾਰਵਿਹਾਰਵਤ੍ਥੂਨਿ ਪਰਿਵਤ੍ਤੇਤਬ੍ਬਾਨੀਤਿ ਸਮ੍ਬਨ੍ਧੋ.

ਉਭੋਪੀਤਿ ਗੇਹਪਾਸਾਦਵਸੇਨ ਉਭੋਪਿ. ਤਤ੍ਥਾਤਿ ਗੇਹੇ. ਇਦਂ ਪਨਾਤਿ ਪਾਸਾਦਸਙ੍ਖਾਤਂ ਗੇਹਂ, ਮਨੁਸ੍ਸਾਨਂ ਗੇਹਨ੍ਤਿ ਸਮ੍ਬਨ੍ਧੋ. ਮਹਗ੍ਘੇਨ ਵਾ ਅਪ੍ਪਗ੍ਘੇਨ ਵਾ ਵਿਹਾਰਵਤ੍ਥੁਨਾ ਚਾਤਿ ਯੋਜਨਾ. ਵਿਹਾਰਵਿਹਾਰਵਤ੍ਥੁਆਰਾਮਆਰਾਮਵਤ੍ਥੂਨਿ ਪਰਿਵਤ੍ਤੇਤਬ੍ਬਾਨੀਤਿ ਸਮ੍ਬਨ੍ਧੋ. ਏਵਨ੍ਤਿਆਦਿ ਨਿਗਮਨਂ.

ਗਰੁਭਣ੍ਡੇਨ ਗਰੁਭਣ੍ਡਪਰਿਵਤ੍ਤਨੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਪਂਸ੍ਵਾਗਾਰਕੇਸੂਤਿ ਪਂਸੁਕੀਲ਼ਨਤ੍ਥਾਯ ਕਤੇਸੁ ਅਗਾਰਕੇਸੁ. ਕਪ੍ਪਿਯਮਞ੍ਚਾਤਿ ਸਙ੍ਘਗਣਪੁਗ੍ਗਲਾਨਂ ਕਪ੍ਪਿਯਾ ਸੁਵਣ੍ਣਰਜਤਾਦੀਹਿ ਅਕਤਾ ਮਞ੍ਚਾ. ਵਿਹਾਰਸ੍ਸ ਪਨ ਸੁਵਣ੍ਣਰਜਤਮਯਾਦਿਕਾਪਿ ਕਪ੍ਪਿਯਾ ਮਞ੍ਚਾ ਦਾਤਬ੍ਬਾਤਿ ਸਮ੍ਬਨ੍ਧੋ. ਬਹਿਸੀਮਾਯਾਤਿ ਉਪਚਾਰਸੀਮਤੋ ਬਹਿ. ਤਤ੍ਥਾਤਿ ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ. ਤਤ੍ਥਾਤਿ ਤਸ੍ਸ ਭਿਕ੍ਖੁਨੋ ਵਸਨਟ੍ਠਾਨੇ. ‘‘ਮਹਗ੍ਘੇਨਾ’’ਤਿ ਵੁਤ੍ਤਵਚਨਂ ਨਿਯਮੇਨ੍ਤੋ ਆਹ ‘‘ਸਤਗ੍ਘਨਕੇਨ ਵਾ ਸਹਸ੍ਸਗ੍ਘਨਕੇਨ ਵਾ’’ਤਿ. ਮਞ੍ਚਸਤਨ੍ਤਿ ਮਞ੍ਚਬਹੁਂ. ਏਤੇਸੁਪੀਤਿ ਪੀਠਭਿਸਿਬਿਬ੍ਬੋਹਨੇਸੁਪਿ. ਤਤ੍ਥਾਤਿ ਪੀਠਭਿਸਿਬਿਬ੍ਬੋਹਨੇਸੁ. ਕਪ੍ਪਿਯਂ ਪੀਠਾਦੀਤਿ ਸਮ੍ਬਨ੍ਧੋ. ਅਕਪ੍ਪਿਯਂ ਵਾ ਮਹਗ੍ਘਂ ਕਪ੍ਪਿਯਂ ਵਾਤਿ ਕਪ੍ਪਿਯੇਨ ਵਾ ਮਹਗ੍ਘਕਪ੍ਪਿਯੇਨ ਵਾ ਪਰਿਵਤ੍ਤੇਤ੍ਵਾਤਿ ਸਮ੍ਬਨ੍ਧੋ. ‘‘ਵੁਤ੍ਤਵਤ੍ਥੂਨੀ’’ਤਿ ਪਦਂ ‘‘ਪਰਿਵਤ੍ਤੇਤ੍ਵਾ’’ਤਿ ਪਦੇ ਅਵੁਤ੍ਤਕਮ੍ਮਂ, ‘‘ਗਹੇਤਬ੍ਬਾਨੀ’’ਤਿ ਪਦੇ ਵੁਤ੍ਤਕਮ੍ਮਂ, ਪੁਬ੍ਬਾਪਰਾਪੇਕ੍ਖਪਦਂ.

ਪਸਤਮਤ੍ਤਉਦਕਗਣ੍ਹਕਾਨਿਪੀਤਿ ਏਤ੍ਥ ਪਸਤੋ ਨਾਮ ਕੁਞ੍ਚਿਤਪਾਣਿ. ਸੀਹਲ਼ਦੀਪੇਤਿ ਸੀਹਂ ਲਾਤਿ ਗਣ੍ਹਾਤੀਤਿ ਸੀਹਲ਼ੋ ਲਕਾਰਸ੍ਸ ਲ਼ਕਾਰਂ ਕਤ੍ਵਾ, ਸੀਹਬਾਹੁਨਾਮਕੋ ਰਾਜਾ, ਤਸ੍ਸ ਪੁਤ੍ਤਤ੍ਤਾ ਵਿਜਯਕੁਮਾਰੋਪਿ ਸੀਹਲ਼ੋ ਨਾਮ, ਤੇਨ ਆਦਿਮ੍ਹਿ ਨਿਵਾਸਭਾਵੇਨ ਗਹਿਤਤ੍ਤਾ ਦੀਪੋ ਸੀਹਲ਼ਦੀਪੋ ਨਾਮ, ਤਸ੍ਮਿਂ. ਪਾਦਂ ਗਣ੍ਹਾਤੀਤਿ ਪਾਦਗਣ੍ਹਨੋ, ਸੋਯੇਵ ਪਾਦਗਣ੍ਹਨਕੋ. ਪਾਦੋ ਨਾਮਾਤਿ ‘‘ਪਾਦਗਣ੍ਹਨਕੋ’’ਤਿ ਏਤ੍ਥ ਪਾਦੋ ਨਾਮ. ਯੋ ਲੋਹਵਾਰਕੋ ਮਗਧਨਾਲ਼ਿਯਾ ਪਞ੍ਚਨਾਲ਼ਿਮਤ੍ਤਂ ਗਣ੍ਹਾਤਿ, ਸੋ ਲੋਹਵਾਰਕੋ ਪਾਦੋ ਨਾਮਾਤਿ ਯੋਜਨਾ. ਇਮਿਨਾ ਪਮਾਣਸ੍ਸ ਨਾਮਂ ਪਮਾਣਵਨ੍ਤੇ ਉਪਚਾਰਤੋ ਵੋਹਾਰਨਯਂ ਦਸ੍ਸੇਤਿ. ਤਤੋਤਿ ਪਞ੍ਚਨਾਲ਼ਿਮਤ੍ਤਗਣ੍ਹਨਕਵਾਰਕਤੋ. ਇਮਾਨੀਤਿ ਲੋਹਕੁਮ੍ਭੀਆਦੀਨਿ.

ਭਿਙ੍ਗਾਰ …ਪੇ… ਕਟਚ੍ਛੁਆਦੀਨੀਤਿ ਭਿਙ੍ਗਾਰੋ ਚ ਪਟਿਗ੍ਗਹੋ ਚ ਉਲ਼ੁਙ੍ਕੋ ਚ ਦਬ੍ਬਿ ਚ ਕਟਚ੍ਛੁ ਚ ਪਾਤਿ ਚ ਤਟ੍ਟਕੋ ਚ ਸਰਕੋ ਚ ਸਮੁਗ੍ਗੋ ਚ ਅਙ੍ਗਾਰਕਪਲ੍ਲੋ ਚ ਧੂਮਕਟਚ੍ਛੁ ਚ ਭਿਙ੍ਗਾਰ…ਪੇ… ਧੂਮਕਟਚ੍ਛੁਯੋ, ਤਾ ਆਦਿ ਯੇਸਂ ਤਾਨੀਤਿ ਭਿਙ੍ਗਾਰ…ਪੇ… ਕਟਚ੍ਛੁਆਦੀਨਿ. ਆਦਿਸਦ੍ਦੇਨ ਅਞ੍ਞਾਨਿ ਉਪਕਰਣਾਨਿ ਗਹੇਤਬ੍ਬਾਨਿ. ਭਾਜਨੀਯਾਨੀਤਿ ਭਾਜੇਤਬ੍ਬਾਨਿ. ਕਂਸਲੋਹਾਦੀਤਿਆਦਿਸਦ੍ਦੇਨ ਵਟ੍ਟਲੋਹਂ ਸਙ੍ਗਣ੍ਹਾਤਿ. ਵਟ੍ਟਲੋਹਂ ਨਾਮ ਪੀਤਲੋਹਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਾਰਿਹਾਰਿਯਨ੍ਤਿ ਸਙ੍ਘਿਕਪਰਿਭੋਗਂ ਪਰਿਹਰਿਤ੍ਵਾ ਅਪਨੇਤ੍ਵਾ ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਨਂ, ‘‘ਅਤ੍ਤਸਨ੍ਤਕ’’ਨ੍ਤਿ ਵਾ ਪਰਿਗ੍ਗਹੇਨ ਹਰਿਤ੍ਵਾ ਭੁਞ੍ਜਨਂ ਨ ਵਟ੍ਟਤਿ. ਗਿਹਿਵਿਕਟਨੀਹਾਰੇਨੇਵਾਤਿ ‘‘ਗਿਹਿਵਿਕਟ’’ਨ੍ਤਿ ਅਭਿਨੀਹਾਰੇਨੇਵ.

ਅਞ੍ਞਸ੍ਮਿਮ੍ਪਿ ਕਪ੍ਪਿਯਲੋਹਭਣ੍ਡੇ ਪਰਿਯਾਪਨ੍ਨਾ ਅਞ੍ਜਨੀਤਿ ਯੋਜਨਾ. ਅਥ ਵਾ ਕਪ੍ਪਿਯਲੋਹਭਣ੍ਡੇਤਿ ਨਿਦ੍ਧਾਰਣੇ ਭੁਮ੍ਮਂ, ‘‘ਅਞ੍ਜਨੀ’’ਤਿਆਦਿਨਾ ਸਮ੍ਬਨ੍ਧਿਤਬ੍ਬਂ. ਸੂਚੀਤਿ ਚੀਵਰਾਦਿਸਿਬ੍ਬਨਕਾ ਸੂਚਿ. ਪਣ੍ਣਸੂਚੀਤਿ ਪਣ੍ਣੇ ਲਿਖਨਾ ਸੂਚਿ. ਅਞ੍ਞਮ੍ਪੀਤਿ ਅਞ੍ਜਨਿਆਦਿਤੋ ਅਞ੍ਞਮ੍ਪਿ. ਧੂਮਨੇਤ੍ਤਞ੍ਚ ਫਾਲਞ੍ਚ ਦੀਪਰੁਕ੍ਖੋ ਚ ਦੀਪਕਪਲ੍ਲਕੋ ਚ ਓਲਮ੍ਬਕਦੀਪੋ ਚ ਧੂਮਨੇਤ੍ਤ…ਪੇ… ਓਲਮ੍ਬਕਦੀਪਾ. ਇਤ੍ਥਿਪੁਰਿਸਤਿਰਚ੍ਛਾਨਗਤਸਙ੍ਖਾਤਾਨਿ ਰੂਪਾਨਿ ਏਤੇਸੁ ਅਤ੍ਥੀਤਿ ਇਤ੍ਥਿਪੁਰਿਸਤਿਰਚ੍ਛਾਨਗਤਰੂਪਕਾਨਿ. ਧੂਮਨੇਤ੍ਤ…ਪੇ… ਓਲਮ੍ਬਕਦੀਪਾ ਚ ਤੇ ਇਤ੍ਥਿਪੁਰਿਸਤਿਰਚ੍ਛਾਨਗਤਰੂਪਕਾਨਿ ਚੇਤਿ ਧੂਮਨੇਤ੍ਤ…ਪੇ… ਰੂਪਕਾਨਿ, ਵਿਸੇਸਨਪਰਨਿਪਾਤੋ. ਤਾਨਿ ਵਾ ਅਞ੍ਞਾਨਿ ਵਾ ਭਿਤ੍ਤਿਚ੍ਛਦਨਕਵਾਟਾਦੀਸੁ ਉਪਨੇਤਬ੍ਬਾਨਿ ਲੋਹਭਣ੍ਡਾਨੀਤਿ ਸਮ੍ਬਨ੍ਧੋ. ਲੋਹਖਿਲਕਨ੍ਤਿ ਲੋਹਮਯਂ ਆਣਿਂ. ਪਰਿਹਰਿਤ੍ਵਾਤਿ ‘‘ਅਤ੍ਤਨੋ ਸਨ੍ਤਕ’’ਨ੍ਤਿ ਪਰਿਗ੍ਗਹੇਨ ਹਰਿਤ੍ਵਾ, ਸਙ੍ਘਿਕਪਰਿਭੋਗਗਿਹਿਵਿਕਟਾਨਿ ਵਾ ਅਪਨੇਤ੍ਵਾ. ਖੀਰਪਾਸਾਣਮਯਾਨੀਤਿ ਖੀਰਵਣ੍ਣੇਨ ਪਾਸਾਣੇਨ ਕਤਾਨਿ.

ਸੁਵਣ੍ਣਞ੍ਚ ਰਜਤਞ੍ਚ ਹਾਰਕੂਟਞ੍ਚ ਜਾਤਿਫਲਿਕਞ੍ਚ ਸੁਵਣ੍ਣ…ਪੇ… ਜਾਤਿਫਲਿਕਾਨਿ, ਤੇਹਿ ਕਤਾਨਿ ਭਾਜਨਾਨਿ ਸੁਵਣ੍ਣ…ਪੇ… ਭਾਜਨਾਨਿ. ਸਬ੍ਬਨ੍ਤਿ ਸੁਵਣ੍ਣਰਜਤਾਦਿਸਬ੍ਬਂ. ਵਟ੍ਟਤੀਤਿ ਸਙ੍ਘਗਣਪੁਗ੍ਗਲਾਨਂ ਵਟ੍ਟਤਿ.

ਵਾਸਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ, ਨਿਦ੍ਧਾਰਣੇ ਵਾ ਭੁਮ੍ਮਂ. ਯਾਯ ਵਾਸਿਯਾ ਨ ਸਕ੍ਕਾਤਿ ਸਮ੍ਬਨ੍ਧੋ. ਤਤੋਤਿ ਵਾਸਿਤੋ. ਮਹਤ੍ਤਰੀਸਦ੍ਦੋ ਮਹਨ੍ਤਪਰਿਯਾਯੋ ਅਨਿਪ੍ਫਨ੍ਨਪਾਟਿਪਦਿਕੋ. ਮਹਤ੍ਤਰੀ ਵਾਸੀਤਿ ਸਮ੍ਬਨ੍ਧੋ. ਵੇਜ੍ਜਾਨਨ੍ਤਿ ਭਿਸਕ੍ਕਾਨਂ. ਸਿਰਾਵੇਧਨਫਰਸੁਪੀਤਿ ਪਿਸਦ੍ਦੇਨ ਤਤੋ ਮਹਨ੍ਤਂ ਪਨ ਪਗੇਵਾਤਿ ਦਸ੍ਸੇਤਿ. ਯਾ ਪਨ ਕੁਠਾਰੀ ਆਵੁਧਸਙ੍ਖੇਪੇਨ ਕਤਾਤਿ ਸਮ੍ਬਨ੍ਧੋ. ਅਥ ਵਾ ਆਵੁਧਸਙ੍ਖੇਪੇਨ ਕਤਾ ਯਾ ਪਨ ਕੁਠਾਰੀ ਅਤ੍ਥੀਤਿ ਯੋਜਨਾ. ਅਨਾਮਾਸਾਤਿ ਅਨਾਮਸਿਤਬ੍ਬਾ, ਅਨਾਮਾਸਾਰਹਾਤਿ ਅਤ੍ਥੋ. ਚਤੁਰਙ੍ਗੁਲਮਤ੍ਤੋਪੀਤਿ ਪਿਸਦ੍ਦੋ ਤਤੋ ਅਧਿਕੋ ਪਨ ਪਗੇਵਾਤਿ ਦਸ੍ਸੇਤਿ. ਨਿਖਣਿਤ੍ਵਾ ਖਾਦਤੀਤਿ ਨਿਖਾਦਨਂ. ਚਤੁਰਸ੍ਸਂ ਮੁਖਮੇਤਸ੍ਸਾਤਿ ਚਤੁਰਸ੍ਸਮੁਖਂ. ਦੋਣਿਸਦਿਸਂ ਮੁਖਮੇਤਸ੍ਸਾਤਿ ਦੋਣਿਮੁਖਂ. ਸਮ੍ਮੁਞ੍ਚਨਿਦਣ੍ਡਵੇਧਨਮ੍ਪਿ ਨਿਖਾਦਨਂ ਦਣ੍ਡਬਦ੍ਧਂ ਹੋਤਿ ਚੇਤਿ ਯੋਜਨਾ. ਦਣ੍ਡੇਨ ਬਨ੍ਧਿਤਬ੍ਬਨ੍ਤਿ ਦਣ੍ਡਬਦ੍ਧਂ, ਦਣ੍ਡਂ ਬਦ੍ਧਮੇਤਸ੍ਸਾਤਿ ਵਾ ਦਣ੍ਡਬਦ੍ਧਂ. ‘‘ਅਦਣ੍ਡਕ’’ਨ੍ਤਿ ਵਤ੍ਵਾ ਤਸ੍ਸੇਵਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਫਲਮਤ੍ਤਮੇਵਾ’’ਤਿ. ਨਤ੍ਥਿ ਦਣ੍ਡਮੇਤਸ੍ਸਾਤਿ ਅਦਣ੍ਡਕਂ. ਯਨ੍ਤਿ ਨਿਖਾਦਨਂ. ਪਰਿਹਰਿਤੁਨ੍ਤਿ ਪੁਗ੍ਗਲਿਕਭਾਵੇਨ ਪਰਿਗ੍ਗਹੇਤ੍ਵਾ ਹਰਿਤੁਂ, ਸਙ੍ਘਿਕਭਾਵਂ ਅਪਨੇਤੁਂ ਵਾ. ਸਿਖਰਮ੍ਪਿ ਨਿਖਾਦਨੇਨੇਵ ਸਙ੍ਗਹਿਤਂ ਲਕ੍ਖਣਹਾਰਨਯੇਨ ਸਮਾਨਕਿਚ੍ਚਭਾਵਤੋ. ਸਿਖਰਨ੍ਤਿ ਯੇਨ ਪਰਿਬ੍ਭਮਿਤ੍ਵਾ ਛਿਨ੍ਦਨ੍ਤਿ, ਯੇਹਿ ਮਨੁਸ੍ਸੇਹਿ ਦਿਨ੍ਨਾਨੀਤਿ ਸਮ੍ਬਨ੍ਧੋ. ਤੇਤਿ ਮਨੁਸ੍ਸਾ, ਵਦਨ੍ਤੀਤਿ ਸਮ੍ਬਨ੍ਧੋ. ਨੋਤਿ ਅਮ੍ਹਾਕਂ. ਪਾਕਤਿਕੇਤਿ ਪਕਤਿਯਾ ਠਿਤੇ, ਯਥਾ ਪਠਮਂ ਠਿਤਾ ਹੋਨ੍ਤਿ, ਤਥਾ ਕਰਿਸ੍ਸਾਮਾਤਿ ਅਤ੍ਥੋ. ਸਚੇ ਆਹਰਨ੍ਤੀਤਿ ਸਚੇ ਆਯਾਚਨਂ ਅਕਤ੍ਵਾ ਹਰਨ੍ਤਿ. ਅਨਾਹਰਨ੍ਤਾਪੀਤਿ ਪੁਨ ਅਨਾਹਰਨ੍ਤਾਪਿ.

ਕਮ੍ਮਾਰੋ ਚ ਤਟ੍ਟਕਾਰੋ ਚ ਚੁਨ੍ਦਕਾਰੋ ਚ ਨਲ਼ਕਾਰੋ ਚ ਮਣਿਕਾਰੋ ਚ ਪਤ੍ਤਬਨ੍ਧਕੋ ਚ ਕਮ੍ਮਾਰ…ਪੇ… ਪਤ੍ਤਬਨ੍ਧਕਾ, ਤੇਸਂ. ਅਧਿਕਰਣੀ ਚ ਮੁਟ੍ਠਿਕੋ ਚ ਸਣ੍ਡਾਸੋ ਚ ਤੁਲਾ ਚ ਅਧਿਕਰਣਿ…ਪੇ… ਤੁਲਾ. ਸਙ੍ਘੇ ਦਿਨ੍ਨਕਾਲਤੋਤਿ ਸਙ੍ਘਸ੍ਸ ਦਿਨ੍ਨਕਾਲਤੋ. ਤਿਪੁਂ ਛਿਨ੍ਦਤਿ ਅਨੇਨਾਤਿ ਤਿਪੁਚ੍ਛੇਦਨਂ, ਤਮੇਵ ਸਤ੍ਥਕਂ ਤਿਪੁਚ੍ਛੇਦਨਸਤ੍ਥਕਂ. ਮਹਾਕਤ੍ਤਰਿਞ੍ਚ ਮਹਾਸਣ੍ਡਾਸਞ੍ਚ ਮਹਾਪਿਪ੍ਫਿਲਿਕਞ੍ਚ ਠਪੇਤ੍ਵਾਤਿ ਯੋਜਨਾ. ਕਸ੍ਮਾ ਠਪਿਤਾਨੀਤਿ ਆਹ ‘‘ਮਹਾਕਤ੍ਤਰਿਆਦੀਨਿ ਗਰੁਭਣ੍ਡਾਨੀ’’ਤਿ. ਤਤ੍ਥ ਯਸ੍ਮਾ ਮਹਾਕਤ੍ਤਰਿਆਦੀਨਿ ਗਰੁਭਣ੍ਡਾਨਿ, ਤਸ੍ਮਾ ‘‘ਠਪੇਤ੍ਵਾ ਮਹਾਕਤ੍ਤਰਿ’’ਨ੍ਤਿ ਆਦਿ ਮਯਾ ਵੁਤ੍ਤਨ੍ਤਿ ਯੋਜਨਾ.

ਵਲ੍ਲਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਵੇਤ੍ਤਵਲ੍ਲਿਆਦਿਕਾਤਿ ਵੇਤ੍ਤਸਙ੍ਖਾਤਵਲ੍ਲਿਆਦਿਕਾ. ਅਡ੍ਢਬਹੁਪ੍ਪਮਾਣਾਤਿ ਏਤ੍ਥ –

‘‘ਬ੍ਯਾਮੋ ਸਹਕਰਾ ਬਾਹੁ, ਦ੍ਵੇਪਸ੍ਸਦ੍ਵਯਵਿਤ੍ਥਤਾ’’ਤਿ. –

ਅਭਿਧਾਨੇ (ਅਭਿਧਾਨਪ੍ਪਦੀਪਿਕਾਯਂ ੨੬੯ ਗਾਥਾਯਂ) ਵੁਤ੍ਤਤ੍ਤਾ ਬਾਹੁ ਨਾਮ ਇਧ ਬ੍ਯਾਮੋਵ ਅਧਿਪ੍ਪੇਤੋ. ਤਸ੍ਮਾ ਦ੍ਵੀਸੁ ਪਸ੍ਸੇਸੁ ਵਿਤ੍ਥਤਾਨਂ ਬ੍ਯਾਮਸਙ੍ਖਾਤਾਨਂ ਸਹਕਰਾਨਂ ਦ੍ਵਿਨ੍ਨਂ ਬਾਹੂਨਂ ਅਡ੍ਢੋਤਿ ਅਡ੍ਢਬਾਹੁ, ਤਸ੍ਸ ਪਮਾਣਮੇਤਸ੍ਸਾਤਿ ਅਡ੍ਢਬਾਹੁਪ੍ਪਮਾਣਾਤਿ ਵਚਨਤ੍ਥੋ ਕਾਤਬ੍ਬੋ, ਦੀਘਤੋ ਦ੍ਵਿਹਤ੍ਥਾ ਵਲ੍ਲੀਤਿ ਵੁਤ੍ਤਂ ਹੋਤਿ. ਤਤ੍ਥਜਾਤਕਾਤਿ ਤਿਸ੍ਸਂ ਸਙ੍ਘਸ੍ਸ ਭੂਮਿਯਂ ਜਾਤਕਾ. ਰਕ੍ਖਿਤਗੋਪਿਤਾਤਿ ਸਙ੍ਘੇਨ ਸਯਂ ਰਕ੍ਖਿਤਾ, ਪਰੇਹਿ ਗੋਪਿਤਾ. ਇਮਿਨਾ ਅਰਕ੍ਖਿਤਅਗੋਪਿਤਾ ਗਰੁਭਣ੍ਡਂ ਨ ਹੋਤੀਤਿ ਦਸ੍ਸੇਤਿ. ਸਾਤਿ ਵਲ੍ਲਿ. ਅਤਿਰੇਕਾ ਹੋਤੀਤਿ ਸਮ੍ਬਨ੍ਧੋ. ਉਪਨੇਤੁਨ੍ਤਿ ਤਂ ਵਲ੍ਲਿਂ ਉਪਨੇਤੁਂ. ਸੁਤ੍ਤਞ੍ਚ ਮਕਚਿਵਾਕਞ੍ਚ ਨਾਲ਼ਿਕੇਰਹੀਰਞ੍ਚ ਚਮ੍ਮਞ੍ਚ ਸੁਤ੍ਤ…ਪੇ… ਚਮ੍ਮਾਨਿ, ਤੇਹਿ ਕਤਾ ਸੁਤ੍ਤ…ਪੇ… ਚਮ੍ਮਮਯਾ. ਰਜ੍ਜੁਕਾ ਵਾ ਯੋਤ੍ਤਾਨਿ ਵਾ ਗਰੁਭਣ੍ਡਂ ਹੋਤੀਤਿ ਸਮ੍ਬਨ੍ਧੋ. ਏਕਵਟ੍ਟਾ ਵਾ ਦ੍ਵਿਵਟ੍ਟਾ ਵਾਤਿ ਏਤ੍ਥ ਵਾਸਦ੍ਦੇਨ ਤਿਵਟ੍ਟਾਦਿਂ ਸਙ੍ਗਣ੍ਹਾਤਿ. ਅਵਟ੍ਟੇਤ੍ਵਾ ਦਿਨ੍ਨਂ ਸੁਤ੍ਤਞ੍ਚ ਅਵਟ੍ਟੇਤ੍ਵਾ ਦਿਨ੍ਨਾ ਮਕਚਿਵਾਕਨਾਲ਼ਿਕੇਰਹੀਰਾ ਚਾਤਿ ਯੋਜਨਾ.

ਯੋ ਕੋਚਿ ਵੇਲ਼ੂਤਿ ਸਮ੍ਬਨ੍ਧੋ. ਸੋਪੀਤਿ ਵੇਲ਼ੁਪਿ ਵਟ੍ਟਤੀਤਿ ਸਮ੍ਬਨ੍ਧੋ. ਪਿਸਦ੍ਦੇਨ ਵਲ੍ਲਿਂ ਅਪੇਕ੍ਖਤਿ. ਇਦਮੇਤ੍ਥਾਤਿ ਇਦਂ ਸਬ੍ਬਂ ਏਤ੍ਥ ਵੇਲ਼ੁਮ੍ਹਿ, ਵੇਲ਼ੂਸੁ ਵਾ ਇਦਨ੍ਤਿ ਸਮ੍ਬਨ੍ਧੋ. ਸਮਕਂ ਵਾਤਿ ਗਹਿਤਵੇਲ਼ੁਨਾ ਸਮਪ੍ਪਮਾਣਂ ਵਾ. ਅਤਿਰੇਕਂ ਵਾਤਿ ਤਤੋ ਅਤਿਰੇਕਂ ਵਾ. ਤਂਅਗ੍ਘਨਕਨ੍ਤਿ ਤਸ੍ਸ ਵੇਲ਼ੁਨੋ ਅਗ੍ਘਨਾਰਹਂ. ਫਾਤਿਕਮ੍ਮਨ੍ਤਿ ਵਡ੍ਢਿਕਮ੍ਮਂ. ਤਤ੍ਥੇਵਾਤਿ ਗਣ੍ਹਨਟ੍ਠਾਨੇਵ. ਗਮਨਕਾਲੇਤਿ ਗਣ੍ਹਨਟ੍ਠਾਨਤੋ ਅਞ੍ਞਤ੍ਥ ਗਮਨਕਾਲੇ. ‘‘ਪਹਿਣਿਤ੍ਵਾ ਦਾਤਬ੍ਬੋ’’ਤਿ ਇਮਿਨਾ ਸਯਂ ਵਾ ਆਗਨ੍ਤ੍ਵਾ ਦਾਤਬ੍ਬੋਤਿ ਅਤ੍ਥੋਪਿ ਲਕ੍ਖਣਹਾਰਨਯੇਨ ਗਹੇਤਬ੍ਬੋ ਸਮਾਨਕਿਚ੍ਚਤ੍ਤਾ.

ਮੁਞ੍ਜਪਬ੍ਬਜਸਦ੍ਦੇਨ ਮੁਞ੍ਜਪਬ੍ਬਜਤਿਣਾਨਂ ਪਾਲ਼ਿਯਂ ਵਿਸੁਂ ਗਹਿਤਤ੍ਤਾ ਤਿਣਸਦ੍ਦੇਨ ਤਾਨਿ ਠਪੇਤ੍ਵਾ ਪਾਰਿਸੇਸਞਾਯੇਨ ਅਵਸੇਸਤਿਣਮੇਵ ਗਹੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਮੁਞ੍ਜਂ ਪਬ੍ਬਜਞ੍ਚ ਠਪੇਤ੍ਵਾ’’ਤਿਆਦਿ. ਸਮਾਨਫਲਤ੍ਤਾ ਲਕ੍ਖਣਹਾਰਨਯੇਨ ਪਣ੍ਣਮ੍ਪਿ ਤਿਣੇਨੇਵ ਸਙ੍ਗਹਿਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਯਤ੍ਥਾ’’ਤਿਆਦਿ. ਤਤ੍ਥ ਯਤ੍ਥਾਤਿ ਯਸ੍ਮਿਂ ਠਾਨੇ, ਇਤੀਤਿ ਏਵਂ. ਤਿਣਞ੍ਚ ਗਰੁਭਣ੍ਡਂ ਹੋਤੀਤਿ ਸਮ੍ਬਨ੍ਧੋ. ਤਤ੍ਥਜਾਤਕਂ ਵਾਤਿ ਤਸ੍ਮਿਂ ਸਙ੍ਘਾਰਾਮੇ ਜਾਤਕਂ ਵਾ. ਬਹਾਰਾਮੇਤਿ ਸਙ੍ਘਾਰਾਮਤੋ ਬਹਿ. ਤਮ੍ਪੀਤਿ ਤਿਣਮ੍ਪਿ. ਪਿਸਦ੍ਦੇਨ ਵਲ੍ਲਿਵੇਲ਼ੂ ਅਪੇਕ੍ਖਤਿ. ਅਟ੍ਠਙ੍ਗੁਲਪ੍ਪਮਾਣੋਪੀਤਿ ਦੀਘਤੋ ਅਟ੍ਠਙ੍ਗੁਲਪਮਾਣੋਪਿ. ਰਿਤ੍ਤਪੋਤ੍ਥਕੋਤਿ ਅਲਿਖਿਤਤ੍ਤਾ ਤੁਚ੍ਛੋ ਮਕਚਿਵਤ੍ਥਾਦਿਕੋਪਿ ਪਣ੍ਣਮਯੋਪਿ ਪੋਤ੍ਥਕੋ. ਇਦਞ੍ਚ ਪਣ੍ਣਪਸਙ੍ਗੇਨ ਵੁਤ੍ਤਂ.

ਪਞ੍ਚਵਣ੍ਣਾ ਵਾਤਿ ਨੀਲਪੀਤਲੋਹਿਤੋਦਾਤਮਞ੍ਜਿਟ੍ਠਵਸੇਨ ਪਞ੍ਚਵਣ੍ਣਨਾ ਵਾ. ਤਮ੍ਪੀਤਿ ਮਤ੍ਤਿਕਮ੍ਪਿ. ਪਿਸਦ੍ਦੇਨ ਵਲ੍ਲਿਵੇਲ਼ੁਤਿਣਾਨਿ ਅਪੇਕ੍ਖਤਿ.

ਦਾਰੁਭਣ੍ਡੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਰਕ੍ਖਿਤਗੋਪਿਤੋ ਯੋ ਕੋਚਿ ਦਾਰੁਭਣ੍ਡਕੋ ਅਤ੍ਥੀਤਿ ਯੋਜਨਾ. ਮਹਾਅਟ੍ਠਕਥਾਯਂ ਪਨ ਵੁਤ੍ਤੋਤਿ ਸਮ੍ਬਨ੍ਧੋ.

ਤਤ੍ਰਾਤਿ ਮਹਾਅਟ੍ਠਕਥਾਯਂ, ‘‘ਤੇਨ ਖੋ ਪਨ ਸਮਯੇਨਾ’’ਤਿ ਪਾਲ਼ਿਯਂ ਵਾ. ਇਮੇਸੂਤਿ ਆਸਨ੍ਦਿਕਾਦੀਸੁ. ਏਤ੍ਥਾਤਿ ਪੀਠੇਸੁ, ਪਲਾਲਪੀਠੇਨਾਤਿ ਸਮ੍ਬਨ੍ਧੋ. ਬ੍ਯਗ੍ਘਚਮ੍ਮਓਨਦ੍ਧਨ੍ਤਿ ਬ੍ਯਗ੍ਘਚਮ੍ਮੇਨ ਅਵਨਦ੍ਧਂ. ਵਾਲ਼ਰੂਪਪਰਿਕ੍ਖਿਤ੍ਤਨ੍ਤਿ ਵਾਲ਼ਰੂਪੇਹਿ ਪਰਿਵਾਰਿਤਂ. ਰਤਨਪਰਿਸਿਬ੍ਬਿਤਨ੍ਤਿ ਰਤਨਸੁਤ੍ਤੇਨ ਸਮਨ੍ਤਤੋ ਸਿਬ੍ਬਿਤਂ.

ਏਤੇਸੁਪੀਤਿ ਵਙ੍ਕਫਲਕਾਦੀਸੁਪਿ. ‘‘ਸਙ੍ਖਥਾਲਕਂ ਪਨ ਭਾਜਨੀਯ’’ਨ੍ਤਿ ਪਾਠਸ੍ਸਾਨਨ੍ਤਰਂ ‘‘ਤਥਾ’’ਤਿ ਪਾਠੋ ਅਤ੍ਥਿ, ਸੋ ਏਤ੍ਥ ਨ ਯੁਜ੍ਜਤਿ, ਪਰਤੋ ਪਨ ‘‘ਯੇਨ ਕੇਨਚਿ ਕਤਂ ਗਰੁਭਣ੍ਡਮੇਵਾ’’ਤਿ ਪਾਠਸ੍ਸਾਨਨ੍ਤਰਂ ਯੁਜ੍ਜਤਿ. ਤਤ੍ਥ ਹਿ ਯਥਾ ਯੇਨ ਕੇਨਚਿ ਕਤਂ ਗਰੁਭਣ੍ਡਮੇਵ ਹੋਤਿ, ਤਥਾ ਥਮ੍ਭਤੁਲਾਸੋਪਾਨਫਲਕਾਦੀਸੁ ਦਾਰੁਮਯਂ ਵਾ ਪਾਸਾਣਮਯਂ ਵਾ ਯਂਕਿਞ੍ਚਿ ਗੇਹਸਮ੍ਭਾਰਰੂਪਂ ਗਰੁਭਣ੍ਡਮੇਵਾਤਿ ਅਤ੍ਥੋ.

ਸਬ੍ਬਨ੍ਤਿ ਸਕਲਂ ਉਦਕਤੁਮ੍ਬਪਾਦਕਥਲਿਕਮਣ੍ਡਲਂ. ਏਤੇਸੁਪੀਤਿ ਆਧਾਰਕਾਦੀਸੁਪਿ. ਤਥਾ ਥਮ੍ਭਤਲਾਤਿ ਏਤ੍ਥ ਤਥਾਸਦ੍ਦੇਨ ‘ਗਰੁਭਣ੍ਡਮੇਵਾ’’ਤਿ ਪਦਂ ਅਤਿਦਿਸਤਿ. ਸਙ੍ਘੇ ਦਿਨ੍ਨਨ੍ਤਿ ਸਙ੍ਘਸ੍ਸ ਦਿਨ੍ਨਂ. ਭੂਮਤ੍ਥਰਣਨ੍ਤਿ ਭੂਮਿਯਂ ਅਤ੍ਥਰਿਤਬ੍ਬਂ. ਤਮ੍ਪੀਤਿ ਏਲ਼ਕਚਮ੍ਮਮ੍ਪਿ.

ਉਦੁਕ੍ਖਲਂ ਗਰੁਭਣ੍ਡਮੇਵਾਤਿ ਸਮ੍ਬਨ੍ਧੋ. ਏਸੇਵ ਨਯੋ ਮੁਸਲਨ੍ਤਿਆਦੀਸੁਪਿ. ਏਤੇਸੂਤਿ ਮਞ੍ਚਪਾਦਾਦੀਸੁ. ਅਨੁਞ੍ਞਾਤਵਾਸਿਯਾਤਿ ਭਾਜਨਤ੍ਥਾਯ ਅਨੁਞ੍ਞਾਤਵਾਸਿਯਾ. ਧਮਕਰਣੋਤਿ ਏਤ੍ਥ ‘‘ਸਙ੍ਖਂ ਧਮਤਿ, ਸਙ੍ਖਧਮਕੋ’’ਤਿਆਦੀਸੁ ਵਿਯ ਨਿਸ੍ਸਂਯੋਗਪਾਠੋਯੇਵ ਯੁਜ੍ਜਤਿ. ਤਸ੍ਮਾ ਧਮਤਿ ਵਾਤੇਨ ਪਵਤ੍ਤਤੀਤਿ ਧਮੋ, ਵਾਤਹੇਤੁਕੋ ਸਦ੍ਦੋ, ਧਮਂ ਕਰੋਤੀਤਿ ਧਮਕਰਣੋਤਿ ਵਚਨਤ੍ਥੋ ਕਾਤਬ੍ਬੋ. ਸਬ੍ਬਮੇਤਨ੍ਤਿ ਅਨੁਞ੍ਞਾਤਵਾਸਿਦਣ੍ਡਾਦਿਕਂ ਏਤਂ ਸਬ੍ਬਂ. ਤਤੋਤਿ ਅਨੁਞ੍ਞਾਤਵਾਸਿਦਣ੍ਡਾਦਿਕਤੋ, ਮਹਨ੍ਤਤਰਂ ਵਾਸਿਦਣ੍ਡਾਦਿਕਂ ਗਰੁਭਣ੍ਡਨ੍ਤਿ ਯੋਜਨਾ.

ਯਥਾਜਾਤਮੇਵਾਤਿ ਯਥਾਪਵਤ੍ਤਮੇਵ. ਤੇਹੀਤਿ ਹਤ੍ਥਿਦਨ੍ਤਾਦੀਹਿ, ‘‘ਕਤ’’ਇਤਿ ਪਦੇਨ ਸਮ੍ਬਨ੍ਧਿਤਬ੍ਬਂ. ਤਚ੍ਛਿਤਨਿਟ੍ਠਿਤੋਪੀਤਿ ਤਚ੍ਛਿਤਕਮ੍ਮੇਨ ਨਿਟ੍ਠਿਤੋਪਿ.

ਮਤ੍ਤਿਕਾਭਣ੍ਡੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ, ਉਪਭੋਗੋ ਚ ਪਰਿਭੋਗੋ ਚ ਉਪਭੋਗਪਰਿਭੋਗਂ, ਸਮਾਹਾਰਦ੍ਵਨ੍ਦੋ. ਇਦਂ ਪਦਂ ‘‘ਘਟਪਿਧਾਨਾਦਿਕੁਲਾਲਭਾਜਨ’’ਨ੍ਤਿ ਪਦੇਨੇਵ ਸਮ੍ਬਨ੍ਧਿਤਬ੍ਬਂ. ਥੁਪਿਕਾਤੀਤਿ ਏਤ੍ਥ ਇਤਿਸਦ੍ਦੋ ਇਮਸਦ੍ਦਤ੍ਥੋ. ਇਦਂ ਸਬ੍ਬਂ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਨ੍ਤਿ ਯੋਜਨਾ. ‘‘ਅਨਤਿਰਿਤ੍ਤਪਮਾਣੋ’’ਤਿ ਵਿਸੇਸਨਪਦਂ ‘‘ਘਟਕੋ’’ਤਿ ਵਿਸੇਸ੍ਯਪਦੇਨੇਵ ਸਮ੍ਬਨ੍ਧਿਤਬ੍ਬਂ. ਏਤ੍ਥਾਤਿ ਮਤ੍ਤਿਕਾਭਣ੍ਡੇ, ਆਧਾਰੇ ਵਾ ਨਿਦ੍ਧਾਰਣੇ ਵਾ ਤ੍ਥ ਪਚ੍ਚਯੋ. ਮਤ੍ਤਿਕਾਭਣ੍ਡੇ ਕੁਣ੍ਡਿਕਾ ਭਾਜਨੀਯਕੋਟ੍ਠਾਸਂ ਭਜਤਿ, ਏਵਂ ਲੋਹਭਣ੍ਡੇਪੀਤਿ ਯੋਜਨਾ. ਏਤ੍ਥਾਤਿ ਗਰੁਭਣ੍ਡਵਿਨਿਚ੍ਛਯੇ.

ਨਵਕਮ੍ਮਦਾਨਕਥਾ

੩੨੩. ਭਣ੍ਡਿਕਾਟ੍ਠਪਨਮਤ੍ਤੇਨਾਤਿ ਏਤ੍ਥ ਭਣ੍ਡਿਕਾਟ੍ਠਪਨਂ ਨਾਮ ਭਣ੍ਡਿਕਯੋਜਨਨ੍ਤਿ ਆਹ ‘‘ਕਪੋਤਭਣ੍ਡਿਕਯੋਜਨਮਤ੍ਤੇਨਾ’’ਤਿ. ਅਸ੍ਸਾਤਿ ਭਿਕ੍ਖੁਸ੍ਸ. ਚਿਤਕਧੂਮੋਤਿ ਚਿਤਕੇ ਉਟ੍ਠਿਤੋ ਧੂਮੋ. ਏਤਸ੍ਸੇਵਾਤਿ ਭਿਕ੍ਖੁਸ੍ਸ ਏਵ ਵਿਹਾਰੋਤਿ ਸਮ੍ਬਨ੍ਧੋ. ਧੂਮਕਾਲੇਤਿ ਧੂਮਸ੍ਸ ਉਟ੍ਠਿਤਕਾਲੇ. ‘‘ਅਪਲੋਕੇਤ੍ਵਾ’’ਤਿ ਇਮਿਨਾ ਧੂਮਕਾਲੇ ਅਪਲੋਕਿਤਂ ਧੂਮਕਾਲਿਕਂ. ਧੂਮਕਾਲਿਕਂ ਹੁਤ੍ਵਾਤਿ ਅਤ੍ਥਯੋਜਨਂ ਕਤ੍ਵਾ ਪਾਲ਼ਿਯਂ ‘‘ਪਰਿਯੋਸਿਤਵਿਹਾਰ’’ਨ੍ਤਿ ਪਦੇਨ ਸਮ੍ਬਨ੍ਧਿਤਬ੍ਬਭਾਵਂ ਦਸ੍ਸੇਤਿ. ਕਤਪਰਿਯੋਸਿਤਵਿਹਾਰਨ੍ਤਿ ਕਤਪਰਿਯੋਸਿਤੋ ਵਿਹਾਰੋ ਇਮਸ੍ਸ ਨਵਕਮ੍ਮਸ੍ਸਾਤਿ ਕਤਪਰਿਯੋਸਿਤਵਿਹਾਰਂ. ਇਦਂ ਨਵਕਮ੍ਮਂ ਦੇਨ੍ਤੀਤਿ ਸਮ੍ਬਨ੍ਧੋ. ਯਾਵ ਗੋਪਾਨਸਿਯੋ ਨ ਆਰੋਹਨ੍ਤਿ, ਤਾਵ ਵਿਪ੍ਪਕਤੋ ਨਾਮਾਤਿ ਯੋਜਨਾ. ਤਤੋਤਿ ਗੋਪਾਨਸਿਆਰੋਹਨਤੋ. ਕਞ੍ਚਿਦੇਵ ਸਮਾਦਪੇਤ੍ਵਾ ਕਾਰੇਸ੍ਸਤੀਤਿ ਵਿਹਾਰਸਾਮਿਕੋਯੇਵ ਕਞ੍ਚਿ ਭਿਕ੍ਖੁਂਸਮਾਦਪੇਤ੍ਵਾ ਕਾਰੇਸ੍ਸਤਿ. ਪਞ੍ਚਹਤ੍ਥੇ ਵਿਹਾਰੇਤਿ ਸਮ੍ਬਨ੍ਧੋ. ਛਵਸ੍ਸਿਕਂ ਨਵਕਮ੍ਮਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਅਡ੍ਢਯੋਗੇ. ਸੋਤਿ ਅਡ੍ਢਯੋਗੋ. ਮਹਲ੍ਲਕਂ ਨਿਯਾਮੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਦਸਹਤ੍ਥੇ ਏਕਾਦਸਹਤ੍ਥੇ’’ਤਿ. ਦਸਵਸ੍ਸਿਕਂ ਵਾ ਏਕਾਦਸਵਸ੍ਸਿਕਂ ਵਾ ਨਵਕਮ੍ਮਨ੍ਤਿ ਸਮ੍ਬਨ੍ਧੋ. ਤਤੋਤਿ ਦ੍ਵਾਦਸਹਤ੍ਥਤੋ. ਲੋਹਪਾਸਾਦਸਦਿਸੇਪਿ ਪਾਸਾਦੇਤਿ ਸਮ੍ਬਨ੍ਧੋ. ਤਤੋਤਿ ਦ੍ਵਾਦਸਵਸ੍ਸਿਕਨਵਕਮ੍ਮਤੋ.

ਨਵਕਮ੍ਮਿਕੋਤਿ ਨਵਕਮ੍ਮੇ ਯੁਤ੍ਤਪਯੁਤ੍ਤੋ. ਉਤੁਕਾਲੇਤਿ ਹੇਮਨ੍ਤਗਿਮ੍ਹਕਾਲੇ. ਪਟਿਬਾਹਿਤੁਨ੍ਤਿ ਅਞ੍ਞੇਸਂ ਸਮ੍ਪਤ੍ਤਭਿਕ੍ਖੂਨਂ ਪਟਿਸੇਧੇਤੁਂ. ਆਵਾਸਸਾਮਿਕਸ੍ਸਾਤਿ ਆਵਾਸਦਾਯਕਸ੍ਸ. ਤਸ੍ਸਾਤਿ ਆਵਾਸਸਾਮਿਕਸ੍ਸ. ਵਂਸੇਤਿ ਅਨ੍ਵਯੇ. ਤੇਤਿ ਤਵ. ਸੋਤਿ ਆਵਾਸਸਾਮਿਆਦਿਕੋ. ਭਿਕ੍ਖੂਹਿ ਜਗ੍ਗਿਤਬ੍ਬੋਤਿ ਸਮ੍ਬਨ੍ਧੋ. ਤੇਪੀਤਿ ਞਾਤਿਉਪਟ੍ਠਾਕਾਪਿ. ਤਸ੍ਮਿਮ੍ਪੀਤਿ ਸਙ੍ਘਿਕਪਚ੍ਚਯੇਪਿ. ਬਹੂ ਆਵਾਸੇਤਿ ਸਮ੍ਬਨ੍ਧੋ. ਏਕਂ ਆਵਾਸਨ੍ਤਿ ਯੋਜਨਾ.

ਏਕਂ ਵਾ ਆਵਾਸਨ੍ਤਿ ਸਮ੍ਬਨ੍ਧੋ. ਤਤੋਤਿ ਵਿਸਜ੍ਜਿਤਾਵਾਸੇਹਿ, ਉਪ੍ਪਨ੍ਨਾਨੀਤਿ ਸਮ੍ਬਨ੍ਧੋ. ਕੁਰੁਨ੍ਦਿਯਂ ਪਨ ਵੁਤ੍ਤਂ, ਕਿਨ੍ਤਿ ਵੁਤ੍ਤਨ੍ਤਿ ਯੋਜਨਾ. ਏਕਂ ਮਞ੍ਚਟ੍ਠਾਨਂ ਗਹੇਤ੍ਵਾਤਿ ਏਕਂ ਮਞ੍ਚਟ੍ਠਾਨਂ ਪੁਗ੍ਗਲਿਕਭਾਵੇਨ ਗਹੇਤ੍ਵਾ. ਤਿਭਾਗਨ੍ਤਿ ਤਤਿਯਭਾਗਂ. ਅਯਮੇਵ ਵਾ ਪਾਠੋ. ਏਤ੍ਥਾਤਿ ਨਟ੍ਠਵਿਹਾਰੇ. ਪੁਗ੍ਗਲਿਕਮੇਵਾਤਿ ਪੁਗ੍ਗਲਿਕਂ ਏਵ, ਪੁਗ੍ਗਲਿਕਂ ਇਵ ਵਾ. ਜਗ੍ਗਾਤਿ ਜਗ੍ਗਾਹਿ. ਹੀਤਿ ਫਲਜੋਤਕੋ. ਏਵਂ ਜਗ੍ਗਿਤੋ ਪਨਾਤਿ ਏਵਂ ਜਗ੍ਗਿਤੋ ਵਿਹਾਰੋ ਪਨ. ਤਸ੍ਮਿਨ੍ਤਿ ਜਗ੍ਗਨ੍ਤੇ. ਸਦ੍ਧਿਵਿਹਾਰਿਕਾਦੀਨਂ ਦਾਤੁਕਾਮੋ ਹੋਤੀਤਿ ਸਙ੍ਘਸ੍ਸ ਭਣ੍ਡਟ੍ਠਪਨਂ ਵਾ ਨਵਕਾਨਂ ਵਸਨਟ੍ਠਾਨਂ ਵਾ ਅਦਤ੍ਵਾ ਅਤ੍ਤਨੋਯੇਵ ਸਦ੍ਧਿਵਿਹਾਰਿਕਾਦੀਨਂ ਦਾਤੁਕਾਮੋ ਹੋਤਿ. ਸਦ੍ਧਿਵਿਹਾਰਿਕਾਦੀਨਂ ਦਾਤੁਂ ਲਬ੍ਭਤੀਤਿ ਸਬ੍ਬਵਿਹਾਰਂ ਪੁਗ੍ਗਲਿਕਭਾਵੇਨ ਅਗ੍ਗਹੇਤ੍ਵਾ ਏਕਦੇਸਸ੍ਸੇਵ ਗਹਿਤਤ੍ਤਾ ਸਦ੍ਧਿਵਿਹਾਰਿਕਾਦੀਨਂ ਦਾਤੁਂ ਲਬ੍ਭਤੀਤਿ ਅਤ੍ਥੋ. ਜਗ੍ਗਾਪੇਤਬ੍ਬੋ ਇਤਿ ਵੁਤ੍ਤਨ੍ਤਿ ਯੋਜਨਾ. ਏਤ੍ਥ ‘‘ਵੁਤ੍ਤ’’ਨ੍ਤਿ ਪਾਠੋ ਅਤ੍ਥਿ, ਸੋ ਅਪਾਠੋਯੇਵ ‘‘ਕੁਰੁਨ੍ਦਿਯਂ ਪਨ ਵੁਤ੍ਤ’’ਨ੍ਤਿ ਪਦਸ੍ਸ ਆਕਾਰਤ੍ਤਾ.

ਅਞ੍ਞਂ ਇਦਮ੍ਪਿ ਚ ਵਕ੍ਖਮਾਨਵਚਨਂ ਤਤ੍ਥੇਵ ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਯੋਜਨਾ. ਕਿਨ੍ਤਿ ਵੁਤ੍ਤਨ੍ਤਿ ਆਹ ‘‘ਦ੍ਵੇ ਭਿਕ੍ਖੂ’’ਤਿਆਦਿ. ਦ੍ਵੇ ਭਿਕ੍ਖੂ ਕਰੋਨ੍ਤੀਤਿ ਸਮ੍ਬਨ੍ਧੋ. ਯੇਨਾਤਿ ਭਿਕ੍ਖੁਨਾ. ਸੋਯੇਵ ਸਾਮੀਤਿ ਯੇਨ ਸਾ ਭੂਮਿ ਪਠਮਂ ਗਹਿਤਾ, ਸੋਯੇਵ ਸਾਮੀਤਿ ਅਤ੍ਥੋ. ਪਤਿਰੂਪੇ ਠਾਨੇਤਿ ਪਤਿਰੂਪੇ ਸੇਨਾਸਨਟ੍ਠਾਨੇ. ਤਨ੍ਤਿ ਪੁਗ੍ਗਲਿਕਕਰਣਂ. ਯਂ ਪਨ ਵਯਕਮ੍ਮਨ੍ਤਿ ਯੋਜਨਾ. ਏਤ੍ਥ ਚ ਵਯਕਮ੍ਮਨ੍ਤਿ ਤਸ੍ਮਿਂ ਵਿਹਾਰੇ ਕਤਸ੍ਸ ਕਮ੍ਮਸ੍ਸ ਮੂਲਂ. ਵਿਹਾਰਸ੍ਸ ਮੂਲਂ ਦਾਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਤਸ੍ਸਾਤਿ ਸਙ੍ਘਿਕਂ ਕਰੋਨ੍ਤਸ੍ਸ. ਤਤ੍ਥੇਵਾਤਿ ਕਤਵਿਹਾਰੇ ਏਵ. ਕਤਾਵਾਸੇਤਿ ਸਮੀਪਤ੍ਥੇ ਭੁਮ੍ਮਵਚਨਂ, ਕਤਾਵਾਸਸਮੀਪੇਤਿ ਵੁਤ੍ਤਂ ਹੋਤਿ. ਛਾਯੂਪਗਫਲੂਪਗਾਤਿ ਛਾਯਂ ਉਪਗਚ੍ਛਨ੍ਤਾ ਚ ਫਲਂ ਉਪਗਚ੍ਛਨ੍ਤਾ ਚ, ਛਾਯਾਫਲਾਨਿ ਉਪਹਰਨ੍ਤਾਤਿ ਅਤ੍ਥੋ. ਅਪਲੋਕੇਤ੍ਵਾਤਿ ਸਙ੍ਘਂ ਅਪਲੋਕੇਤ੍ਵਾ. ਸਾਮਿਕਾਤਿ ਰੁਕ੍ਖਸਾਮਿਕਾ. ਹਾਰੇਤਬ੍ਬਾਤਿ ਅਪਨੇਤਬ੍ਬਾ.

‘‘ਸਙ੍ਘਿਕਵਲ੍ਲਿਮਤ੍ਤਮ੍ਪਿ ਅਗ੍ਗਹੇਤ੍ਵਾ’’ਤਿ ਇਮਿਨਾ ਸਙ੍ਘਿਕਂ ਗਹੇਤ੍ਵਾ ਸਙ੍ਘਿਕਾਯ ਭੂਮਿਯਾ ਸਚੇ ਵਿਹਾਰਂ ਕਰੋਤਿ, ਸਙ੍ਘਿਕਮੇਵਾਤਿ ਦਸ੍ਸੇਤਿ. ਦ੍ਵਿਭੂਮਕਤਿਭੂਮਕਾਦੀਸੁ ਪਾਸਾਦੇਸੁ ਉਪਡ੍ਢਭਾਗਂ ਦਸ੍ਸੇਨ੍ਤੋ ਆਹ ‘‘ਪਾਸਾਦੋ ਚੇਵ ਹੋਤੀ’’ਤਿਆਦਿ. ਉਪਰਿ ਪਾਸਾਦੋਤਿ ਸਮ੍ਬਨ੍ਧੋ. ਸੋਤਿ ਵਿਹਾਰਕਾਰਕੋ ਭਿਕ੍ਖੁ, ਤਸ੍ਸ ਹੇਟ੍ਠਾਪਾਸਾਦੋਤਿ ਸਮ੍ਬਨ੍ਧੋ. ਵਿਹਾਰੇਤਿ ਸਙ੍ਘਿਕਵਿਹਾਰੇ, ਵਿਹਾਰਸਮੀਪੇਤਿ ਅਤ੍ਥੋ. ਅਕਤਟ੍ਠਾਨੇਤਿ ਚਯਪਮੁਖਾਨਂ ਅਕਤਪੁਬ੍ਬਟ੍ਠਾਨੇ. ਚਯਂ ਵਾ ਪਮੁਖਂ ਵਾਤਿ ਸਙ੍ਘਿਕਵਿਹਾਰਸ੍ਸ ਚਯਂ ਵਾ ਪਮੁਖਂ ਵਾ. ਬਹਿਕੁਟ੍ਟੇਤਿ ਕੁਟ੍ਟਸ੍ਸ, ਕੁਟ੍ਟਤੋ ਵਾ ਬਹਿ. ਤਸ੍ਸਾਤਿ ਚਯਪਮੁਖਕਾਰਕਸ੍ਸ ਭਿਕ੍ਖੁਸ੍ਸ ਹੋਤੀਤਿ ਸਮ੍ਬਨ੍ਧੋ. ਵਿਸਮਂ ਪਬ੍ਬਤਕਨ੍ਦਰਾਦਿਨ੍ਤਿ ਸਮ੍ਬਨ੍ਧੋ. ਅਪਦੇਤਿ ਸੁਕਰਸ੍ਸ ਅਕਾਰਣੇ. ਕਤਂ ਹੋਤੀਤਿ ਚਯਂ ਵਾ ਪਮੁਖਂ ਵਾ ਕਤਂ ਹੋਤਿ. ਤਤ੍ਥਾਤਿ ਚਯਪਮੁਖੇਸੁ, ਸਙ੍ਘੋ ਅਨਿਸ੍ਸਰੋ ਇਤਿ ਵੁਤ੍ਤਨ੍ਤਿ ਯੋਜਨਾ.

ਵਰਸੇਯ੍ਯਂ ਗਹੇਤੁਨ੍ਤਿ ਸਮ੍ਬਨ੍ਧੋ.

ਪੁਨ ਆਗਨ੍ਤ੍ਵਾਤਿ ਪਕ੍ਕਮਿਤ੍ਵਾ ਪੁਨ ਆਗਨ੍ਤ੍ਵਾ. ਤਸ੍ਸਾਤਿ ਨਵਕਮ੍ਮਗਾਹਕਸ੍ਸ ਭਿਕ੍ਖੁਸ੍ਸ. ਏਤਨ੍ਤਿ ਸੇਨਾਸਨਂ.

ਅਞ੍ਞਤ੍ਰਪਰਿਭੋਗਪਟਿਕ੍ਖੇਪਾਦਿਕਥਾ

੩੨੪. ਨਾਤਿਹਰਨ੍ਤੀਤਿ ਏਤ੍ਥ ਅਤਿਸਦ੍ਦੋ ਹਰਣਤ੍ਥੋ, ਹਰਸਦ੍ਦੋ ਪਰਿਭੁਞ੍ਜਨਤ੍ਥੋਤਿ ਆਹ ‘‘ਅਞ੍ਞਤ੍ਰ ਹਰਿਤ੍ਵਾ ਨ ਪਰਿਭੁਞ੍ਜਨ੍ਤੀ’’ਤਿ. ਯਂ ਮਞ੍ਚਪੀਠਾਦੀਤਿ ਯੋਜਨਾ. ਤਤ੍ਥਾਤਿ ਉਨ੍ਦ੍ਰਿਯਮਹਾਵਿਹਾਰੇ. ਤਨ੍ਤਿ ਮਞ੍ਚਪੀਠਾਦਿਂ. ਤਸ੍ਮਾਤਿ ਯਸ੍ਮਾ ਅਨੁਜਾਨਾਤਿ, ਤਸ੍ਮਾ. ਤਨ੍ਤਿ ਮਞ੍ਚਪੀਠਾਦਿਂ. ਅਞ੍ਞਤ੍ਰਾਤਿ ਅਞ੍ਞਂ ਵਿਹਾਰਂ. ਅਰੋਗਨ੍ਤਿ ਅਨਟ੍ਠਾਜਿਣ੍ਣਤ੍ਤਾ ਅਰੋਗਂ. ਤਸ੍ਮਿਂ ਵਿਹਾਰੇਤਿ ਉਨ੍ਦ੍ਰਿਯਵਿਹਾਰੇ. ਤਸ੍ਮਿਨ੍ਤਿ ਉਨ੍ਦ੍ਰਿਯਵਿਹਾਰੇ. ਤਤੋਤਿ ਉਨ੍ਦ੍ਰਿਯਵਿਹਾਰਤੋ. ਸੁਯੋਜਿਤਾਨੀਤਿ ਸੁਟ੍ਠੁ ਯੋਜਿਤਾਨਿ. ਮੂਲਦਾਨਂ ਵਾ ਪਟਿਪਾਕਤਿਕਂ ਵਾ ਨਤ੍ਥੀਤਿ ਅਧਿਪ੍ਪਾਯੋ. ਛਡ੍ਡਿਤਵਿਹਾਰਤੋਤਿ ਭਿਕ੍ਖੂਹਿ ਅਨਪੇਕ੍ਖੇਨ ਛਡ੍ਡਿਤਸਙ੍ਘਿਕਵਿਹਾਰਤੋ ਚ ਪੁਗ੍ਗਲੇਨ ਸਾਪੇਕ੍ਖੇਨ ਛਡ੍ਡਿਤਪੁਗ੍ਗਲਿਕਵਿਹਾਰਤੋ ਚ. ਆਵਾਸਿਕਕਾਲੇਤਿ ਆਵਾਸਿਕਾਨਂ ਠਿਤਕਾਲੇ. ਤਤੋਤਿ ਛਡ੍ਡਿਤਵਿਹਾਰਤੋ.

ਫਾਤਿਕਮ੍ਮਤ੍ਥਾਯਾਤਿ ਏਤ੍ਥ ਫਾਤਿਸਦ੍ਦੋ ਵਡ੍ਢਨਤ੍ਥੋਤਿ ਆਹ ‘‘ਵਡ੍ਢਿਕਮ੍ਮਤ੍ਥਾਯਾ’’ਤਿ. ਏਤ੍ਥਾਤਿ ‘‘ਫਾਤਿਕਮ੍ਮਤ੍ਥਾਯਾ’’ਤਿ ਪਾਠੇ.

ਚਕ੍ਕਲਿਕਨ੍ਤਿ ਚਕ੍ਕਾਕਾਰੇਨ ਲਾਤਿ ਪਵਤ੍ਤਤਿ, ਚਕ੍ਕਾਕਾਰਂ ਵਾ ਲਾਤਿ ਗਣ੍ਹਾਤੀਤਿ ਚਕ੍ਕਲਂ, ਤਦੇਵ ਚਕ੍ਕਲਿਕਂ, ਪਾਦਪੁਞ੍ਜਨਂ, ‘‘ਕਮ੍ਬਲਾਦੀਹਿ ਵੇਠੇਤ੍ਵਾ ਕਤ’’ਨ੍ਤਿ ਇਮਿਨਾ ਤਸ੍ਸ ਕਰਣਾਕਾਰਂ ਦਸ੍ਸੇਤਿ. ਯੇਹੀਤਿ ਪਾਦੇਹਿ. ਉਦਕਨ੍ਤਿ ਸੇਨਾਸਨਸ੍ਸ ਤਿਨ੍ਤਕਂ ਉਦਕਂ. ਉਦਕਂ ਨ ਪਞ੍ਞਾਯਤੀਤਿ ਯੋਜਨਾ. ਸਉਪਾਹਨੇਨ ਅਕ੍ਕਮਿਤੁਂ ਨ ਵਟ੍ਟਤੀਤਿ ਯੋਜਨਾ.

ਸੁਧਾਭੂਮਿਯਨ੍ਤਿ ਸੁਧਾਯ ਲਿਤ੍ਤਾਯਂ ਭੂਮਿਯਂ. ਪਰਿਭਣ੍ਡਭੂਮਿਯਨ੍ਤਿ ਗੋਮਯਕਸਾਵਪਰਿਭਣ੍ਡਭੂਮਿਯਂ. ਪਾਦਾਤਿ ਮਞ੍ਚਪਾਦਾ. ਤਸ੍ਮਿਨ੍ਤਿ ਚੋਲ਼ਕੇ. ਠਪੇਨ੍ਤਸ੍ਸਾਤਿ ਮਞ੍ਚਪਾਦੇ ਠਪੇਨ੍ਤਸ੍ਸ. ਤਤ੍ਥਾਤਿ ਤੇਸੁ ਭਿਕ੍ਖੂਸੁ. ਨੇਵਾਸਿਕਾਤਿ ਨਿਬਦ੍ਧਂ ਵਸਨ੍ਤੀਤਿ ਨੇਵਾਸਿਕਾ. ਠਪੇਨ੍ਤੀਤਿ ਮਞ੍ਚਪਾਦੇ ਠਪੇਨ੍ਤਿ. ਤਥੇਵਾਤਿ ਯਥਾ ਨੇਵਾਸਿਕਾ ਵਲ਼ਞ੍ਜਨ੍ਤਿ, ਤਥੇਵ ਆਗਨ੍ਤੁਕੇਹਿ ਵਲ਼ਞ੍ਜਿਤੁਂ ਵਟ੍ਟਤੀਤਿ ਅਤ੍ਥੋ.

ਸੇਤਭਿਤ੍ਤਿ ਵਾਤਿ ਏਤ੍ਥ ਵਾਸਦ੍ਦੇਨ ਨੀਲਭਿਤ੍ਤਿਆਦਯੋ ਸਮ੍ਪਿਣ੍ਡੇਤਿ. ‘‘ਦ੍ਵਾਰਮ੍ਪਿ ਵਾਤਪਾਨਮ੍ਪੀ’’ਤਿਆਦਿਨਾ ਸਾਮਞ੍ਞਤੋ ਵੁਤ੍ਤਤ੍ਤਾ ਦ੍ਵਾਰਵਾਤਪਾਨਾਦਯੋ ਅਪਰਿਕਮ੍ਮਕਤਾਪਿ ਨ ਅਪਸ੍ਸਯਿਤਬ੍ਬਾ. ਕੇਨਚਿ ਵਾ ਵਤ੍ਥਾਦਿਨਾਤਿ ਸਮ੍ਬਨ੍ਧੋ.

‘‘ਹੁਤ੍ਵਾ’’ਤਿ ਇਮਿਨਾ ‘‘ਧੋਤਪਾਦਕਾ’’ਤਿ ਪਦਸ੍ਸ ‘‘ਨਿਪਜ੍ਜਿਤੁ’’ਨ੍ਤਿ ਪਦੇ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ, ‘‘ਭਿਕ੍ਖੂ’’ਤਿ ਪਦੇ ਕਾਰਕਵਿਸੇਸਨਭਾਵਂ ਨਿਵਤ੍ਤੇਤਿ. ਕਸ੍ਮਿਂ ਠਾਨੇ ਨਿਪਜ੍ਜਿਤੁਂ ਕੁਕ੍ਕੁਚ੍ਚਾਯਨ੍ਤੀਤਿ ਆਹ ‘‘ਧੋਤੇਹਿ ਪਾਦੇਹਿ ਅਕ੍ਕਮਿਤਬ੍ਬਟ੍ਠਾਨੇ’’ਤਿ. ‘‘ਅਕ੍ਕਮਿਤਬ੍ਬਟ੍ਠਾਨਸ੍ਸੇਤਂ ਅਧਿਵਚਨ’’ਨ੍ਤਿ ਇਮਿਨਾ ‘‘ਧੋਤਪਾਦਕੇ’’ਤਿ ਪਾਠਸ੍ਸ ਧੋਤੋ ਪਾਦੋ ਤਿਟ੍ਠਤਿ ਏਤ੍ਥ ਠਾਨੇਤਿ ਧੋਤਪਾਦਕਂ, ਤਸ੍ਮਿਂ ਧੋਤਪਾਦਕੇਤਿ ਅਤ੍ਥਂ ਦਸ੍ਸੇਤਿ. ਏਤਨ੍ਤਿ ‘‘ਧੋਤਪਾਦਕੇ’’ਤਿ ਨਾਮਂ. ‘‘ਪਚ੍ਚਤ੍ਥਰਿਤ੍ਵਾ’’ਤਿ ਏਤ੍ਥ ਕੇਨ ਪਚ੍ਚਤ੍ਥਰਿਤ੍ਵਾਤਿ ਆਹ ‘‘ਪਚ੍ਚਤ੍ਥਰਣੇਨਾ’’ਤਿ. ‘‘ਅਤ੍ਤਨੋ ਸਨ੍ਤਕੇਨਾ’’ਤਿ ਇਮਿਨਾ ਸਙ੍ਘਿਕੇਨ ਪਚ੍ਚਤ੍ਥਰਣੇਨ ਪਚ੍ਚਤ੍ਥਰਣਂ ਪਟਿਕ੍ਖਿਪਤਿ. ਨਿਦ੍ਦਾਯਤੋਪੀਤਿ ਨਿਦ੍ਦਾਯਕਾਰਣਾਪਿ, ਸਂਕੁਟਿਤੇਤਿ ਸਮ੍ਬਨ੍ਧੋ. ਅਥ ਵਾ ਨਿਦ੍ਦਾਯਤੋਪੀਤਿ ਨਿਦ੍ਦਾਯਨ੍ਤਸ੍ਸਪਿ. ‘‘ਸਰੀਰਾਵਯਵੋ’’ਤਿ ਪਦੇ ਸਾਮ੍ਯਤ੍ਥਛਟ੍ਠੀ, ‘‘ਆਪਤ੍ਤਿਯੇਵਾ’’ਤਿ ਪਦੇ ਸਮ੍ਪਦਾਨਂ. ਲੋਮੇਸੁ ਫੁਸਨ੍ਤੇਸੂਤਿ ਸਮ੍ਬਨ੍ਧੋ. ‘‘ਪਰਿਭੋਗਸੀਸੇਨਾ’’ਤਿ ਇਮਿਨਾ ਪਰਿਭੋਗਂ ਅਕਤ੍ਵਾ ਕੇਨਚਿ ਕਮ੍ਮੇਨ ਸਰੀਰਾਵਯਵੇਨ ਫੁਸਨ੍ਤਸ੍ਸ ਅਨਾਪਤ੍ਤੀਤਿ ਦਸ੍ਸੇਤਿ. ਹਤ੍ਥਤਲੇਨ ਫੁਸਿਤੁਂ ਪਾਦਤਲੇਨ ਫੁਸਿਤੁਂ ਵਾ ਅਕ੍ਕਮਿਤੁਂ ਵਾਤਿ ਯਥਾਲਾਭਯੋਜਨਾ ਦਟ੍ਠਬ੍ਬਾ. ‘‘ਪਰਿਭੋਗਸੀਸੇਨਾ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਞ੍ਚਪੀਠਂ ਨੀਹਰਨ੍ਤਸ੍ਸਾ’’ਤਿਆਦਿ.

ਸਙ੍ਘਭਤ੍ਤਾਦਿਅਨੁਜਾਨਨਕਥਾ

੩੨੫. ‘‘ਸਙ੍ਘਸ੍ਸ ਭਤ੍ਤ’’ਨ੍ਤਿ ਇਮਿਨਾ ਸਙ੍ਘਭਤ੍ਤਨ੍ਤਿ ਪਦਸ੍ਸ ਛਟ੍ਠੀਸਮਾਸਂ ਦਸ੍ਸੇਤਿ. ਸਙ੍ਘਸ੍ਸ ਅਤ੍ਥਾਯ ਆਭਤਂ ਭਤ੍ਤਂ ਕਾਤੁਂ ਨ ਸਕ੍ਕੋਨ੍ਤੀਤਿ ਯੋਜਨਾ. ਉਦ੍ਦੇਸਭਤ੍ਤਨ੍ਤਿਆਦੀਸੁ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ‘‘ਉਦ੍ਦੇਸੇਨ ਲਦ੍ਧਭਿਕ੍ਖੂਨਂ ਭਤ੍ਤਂ ਕਾਤੁ’’ਨ੍ਤਿ ਇਮਿਨਾ ਉਦ੍ਦੇਸੇਨ ਲਦ੍ਧਭਿਕ੍ਖੂਨਂ ਕਾਤਬ੍ਬਂ ਭਤ੍ਤਂ ਉਦ੍ਦੇਸਭਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਤਥੇਵਾਤਿ ਯਥਾ ਸਙ੍ਘਤੋ ਉਦ੍ਦਿਸਿਤ੍ਵਾ ਲਦ੍ਧਭਿਕ੍ਖੂ, ਤਥੇਵ. ਪਰਿਚ੍ਛਿਨ੍ਦਿਤ੍ਵਾਤਿ ‘‘ਏਕਂ ਵਾ’’ਤਿਆਦਿਨਾ ਪਰਿਚ੍ਛਿਨ੍ਦਿਤ੍ਵਾ. ਤੇਸਨ੍ਤਿ ਲਦ੍ਧਭਿਕ੍ਖੂਨਂ. ਇਮਿਨਾ ਨਿਮਨ੍ਤੇਤ੍ਵਾ ਲਦ੍ਧਭਿਕ੍ਖੂਨਂ ਕਾਤਬ੍ਬਂ ਭਤ੍ਤਂ ਨਿਮਨ੍ਤਨਭਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਸਲਾਕਾਯੋ ਛਿਨ੍ਦਿਤ੍ਵਾ’’ਤਿ ਇਮਿਨਾ ਸਲਾਕਾਯੋ ਛਿਨ੍ਦਿਤ੍ਵਾ ਕਾਤਬ੍ਬਂ ਭਤ੍ਤਂ ਸਲਾਕਭਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਪਕ੍ਖਿਕਨ੍ਤਿ ਉਪੋਸਥਿਕਨ੍ਤਿ ਪਾਟਿਪਦਿਕਨ੍ਤਿ ਏਵਂ ਨਿਯਾਮੇਤ੍ਵਾਤਿ ਯੋਜਨਾ. ਪਞ੍ਚਮੀਆਦੀਸੁ ਪਕ੍ਖੇਸੁ ਕਾਤਬ੍ਬਂ ਪਕ੍ਖਿਕਂ. ਉਪੋਸਥੇ ਕਾਤਬ੍ਬਂ ਉਪੋਸਥਿਕਂ. ਪਾਟਿਪਦੇ ਕਾਤਬ੍ਬਂ ਪਾਟਿਪਦਿਕਂ, ਤਮੇਵ ਭਤ੍ਤਂ ਪਾਟਿਪਦਿਕਭਤ੍ਤਂ. ਉਦ੍ਦੇਸਭਤ੍ਤਂ ਨਿਮਨ੍ਤਨਨ੍ਤਿ ਏਤ੍ਥ ਇਤਿਸਦ੍ਦੋ ਆਦ੍ਯਤ੍ਥੋ, ਉਦ੍ਦੇਸਭਤ੍ਤਂ ਨਿਮਨ੍ਤਨਨ੍ਤਿਆਦਿਂ ਇਮਂ ਵੋਹਾਰਂ ਪਤ੍ਤਾਨੀਤਿ ਹਿ ਅਤ੍ਥੋ. ਉਦ੍ਦੇਸਭਤ੍ਤਾਦੀਨਿਯੇਵ ਅਨੁਜਾਨਨਮਕਤ੍ਵਾ ਕਸ੍ਮਾ ਸਙ੍ਘਭਤ੍ਤਮ੍ਪਿ ਅਨੁਜਾਨਾਤੀਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਤਤ੍ਥ ਯਸ੍ਮਾ ਸਕ੍ਖਿਸ੍ਸਨ੍ਤੀਤਿ ਸਮ੍ਬਨ੍ਧੋ. ਤੇਤਿ ਮਨੁਸ੍ਸਾ. ਤਮ੍ਪੀਤਿ ਸਙ੍ਘਭਤ੍ਤਮ੍ਪਿ. ਪਿਸਦ੍ਦੇਨ ਉਦ੍ਦੇਸਭਤ੍ਤਾਦੀਨਿ ਅਪੇਕ੍ਖਤਿ.

ਸਙ੍ਘਭਤ੍ਤਾਦੀਨਂ ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ‘‘ਸਙ੍ਘਭਤ੍ਤਂ ਉਦ੍ਦੇਸਭਤ੍ਤ’’ਨ੍ਤਿਆਦਿਪਾਠੇ, ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ, ਸਙ੍ਘਭਤ੍ਤਾਦੀਸੁ ਵਾ ਨਿਦ੍ਧਾਰਣੇ ਭੁਮ੍ਮਂ, ਭੁਞ੍ਜਨ੍ਤਾਨਂ ਅਮ੍ਹਾਕਂ ਅਜ੍ਜ ਦਸ ਦ੍ਵਾਦਸ ਦਿਵਸਾ ਅਹੇਸੁਨ੍ਤਿ ਯੋਜਨਾ. ਅਞ੍ਞਤੋਤਿ ਅਞ੍ਞਸ੍ਮਾ ਠਾਨਾ. ਤਤ੍ਥਾਤਿ ਸਙ੍ਘਭਤ੍ਤੇ. ਵਤ੍ਤਬ੍ਬਾਤਿ ਮਨੁਸ੍ਸਾ ਵਤ੍ਤਬ੍ਬਾ. ਤਨ੍ਤਿ ਸਙ੍ਘਭਤ੍ਤਂ, ਧਾਤੁਕਮ੍ਮਂ, ‘‘ਅਮ੍ਹਾਕ’’ਨ੍ਤਿ ਕਾਰਿਤਕਮ੍ਮਂ. ਤਨ੍ਤਿ ਸਙ੍ਘਭਤ੍ਤਂ.

ਉਦ੍ਦੇਸਭਤ੍ਤਕਥਾ

ਅਯਂ ਨਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਰਞ੍ਞਾ ਵਾ ਪਹਿਤੇਤਿ ਸਮ੍ਬਨ੍ਧੋ. ਸਚੇ ਅਤ੍ਥੀਤਿ ਸਚੇ ਠਿਤਿਕਾ ਅਤ੍ਥਿ. ਉਦ੍ਦੇਸਕੇਨਾਤਿ ਭਤ੍ਤੁਦ੍ਦੇਸਕੇਨ. ਨ ਅਤਿਕ੍ਕਾਮੇਤਬ੍ਬਨ੍ਤਿ ਉਦ੍ਦੇਸਭਤ੍ਤਂ ਨ ਅਤਿਕ੍ਕਾਮੇਤਬ੍ਬਂ. ਤੇ ਪਨਾਤਿ ਪਿਣ੍ਡਪਾਤਿਕਾ ਪਨ. ਠਿਤਿਕਂ ਠਪੇਤ੍ਵਾਤਿ ਠਿਤਿਕਂ ਠਿਤਟ੍ਠਾਨੇ ਠਪੇਤ੍ਵਾ ਮੁਞ੍ਚਿਤ੍ਵਾਤਿ ਅਤ੍ਥੋ. ਤੇਸਨ੍ਤਿ ਮਹਾਥੇਰਾਨਂ. ਯੋਜਨਨ੍ਤਰਿਕਵਿਹਾਰਤੋਪੀਤਿ ਯੋਜਨੇਨ ਬ੍ਯਵਧਾਨੇ ਠਿਤਵਿਹਾਰਤੋਪਿ. ਠਿਤਟ੍ਠਾਨਤੋਤਿ ਠਿਤਿਕਾਯ ਠਿਤਟ੍ਠਾਨਤੋ. ਅਸਮ੍ਪਤ੍ਤਾਨਮ੍ਪੀਤਿ ਭਤ੍ਤੁਦ੍ਦੇਸਟ੍ਠਾਨਂ ਅਸਮ੍ਪਤ੍ਤਾਨਮ੍ਪਿ. ਵਡ੍ਢਿਤਾ ਨਾਮ ਸੀਮਾਤਿ ਉਪਚਾਰਸੀਮਾ ਵਡ੍ਢਿਤਾ ਨਾਮ. ਸਙ੍ਘਨਵਕਸ੍ਸ ਦਿਨ੍ਨੇਪੀਤਿ ਯਾਵ ਦੁਤਿਯਭਾਗੋ ਨ ਦਾਤਬ੍ਬੋ, ਤਾਵ ਸਙ੍ਘਨਵਕਸ੍ਸ ਦਿਨ੍ਨੇਪਿ. ਵਸ੍ਸਗ੍ਗੇਨਾਤਿ ਗਣਿਯਤੀਤਿ ਗਂ, ਵਸ੍ਸਮੇਵ ਗਂ ਵਸ੍ਸਗ੍ਗਂ, ਤੇਨ ਵਸ੍ਸਗ੍ਗੇਨ, ਵਸ੍ਸਗਣਨਾਯਾਤਿ ਵੁਤ੍ਤਂ ਹੋਤਿ. ਯਦਿ ‘‘ਵਸ੍ਸਗ੍ਘੇਨਾ’’ਤਿ ਚਤੁਤ੍ਥਕ੍ਖਰੇਨ ਪਾਠੋ ਭਵੇਯ੍ਯ, ਏਵਂ ਸਤਿ ਵਸ੍ਸਪਰਿਚ੍ਛੇਦੇਨਾਤਿ ਅਤ੍ਥੋ ਦਟ੍ਠਬ੍ਬੋ, ਅਯਮੇਵ ਯੁਤ੍ਤਤਰੋ.

ਏਕਸ੍ਮਿਂ ਵਿਹਾਰੇਤਿ ਏਕਿਸ੍ਸਂ ਵਿਹਾਰਸੀਮਾਯਂ. ਤਸ੍ਮਿਂਯੇਵ ਭਤ੍ਤੁਦ੍ਦੇਸਟ੍ਠਾਨੇਤਿ ਏਤ੍ਥ ਏਵਸਦ੍ਦੇਨ ਅਞ੍ਞਸ੍ਮਿਂ ਠਾਨੇ ਗਾਹਣਂ ਪਟਿਕ੍ਖਿਪਤਿ. ਏਕੋਤਿ ਏਕੋ ਦਾਯਕੋ. ਤੇਨਾਤਿ ਪਹਿਤਭਿਕ੍ਖੁਨਾ. ਸੋ ਅਤ੍ਥੋਤਿ ਸੋ ਹੇਤੁ. ਤਂਦਿਵਸਨ੍ਤਿ ਤਸ੍ਮਿਂ ਪਹਿਤਦਿਵਸੇ. ਪਮੁਸ੍ਸਤੀਤਿ ਸਤਿਪਵਾਸੇਨ ਮੁਸ੍ਸਤਿ. ਭੋਜਨਸਾਲਾਯਾਤਿ ਭਤ੍ਤੁਦ੍ਦੇਸਟ੍ਠਾਨਸਙ੍ਖਾਤਾਯ ਭੋਜਨਸਾਲਾਯ. ਯਾ ਪਕਤਿਟ੍ਠਿਤਿਕਾਤਿ ਯੋਜਨਾ. ‘‘ਏਕਾਬਦ੍ਧਾ ਹੋਨ੍ਤੀ’’ਤਿ ਵੁਤ੍ਤਵਚਨਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਞ੍ਞਮਞ੍ਞਂ ਦ੍ਵਾਦਸਹਤ੍ਥਨ੍ਤਰਂ ਅਵਿਜਹਿਤ੍ਵਾ’’ਤਿ. ਨਵਂ ਠਿਤਿਕਨ੍ਤਿ ਭਤ੍ਤੁਦ੍ਦੇਸਟ੍ਠਾਨੇ ਠਪਿਤਪਕਤਿਟ੍ਠਿਤਿਕਤੋ ਅਞ੍ਞਂ ਨਵਂ ਠਿਤਿਕਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤਨ੍ਤਿ ਉਦ੍ਦੇਸਭਤ੍ਤਂ. ‘‘ਸ੍ਵੇ’’ਤਿ ਨਿਯਾਮੇਤ੍ਵਾ ਵੁਤ੍ਤਤ੍ਤਾ ਦੁਤਿਯਦਿਵਸੇ ਨ ਲਬ੍ਭਤਿ.

ਕੋਚੀਤਿ ਦਾਯਕੋ. ਸਕਵਿਹਾਰੇ ਠੀਤਿਕਾਵਸੇਨੇਵ ਗਾਹੇਤਬ੍ਬਨ੍ਤਿ ਯਂ ਵਿਹਾਰਂ ਗਚ੍ਛਨ੍ਤਿ, ਤਤ੍ਥ ਅਪਵਿਟ੍ਠਤ੍ਤਾ ਸਕਵਿਹਾਰੇ ਠਿਤਿਕਾਵਸੇਨੇਵ ਗਾਹੇਤਬ੍ਬਂ. ਦਿਨ੍ਨਂ ਪਨ ਭਤ੍ਤਂ ਗਾਹੇਤਬ੍ਬਨ੍ਤਿ ਸਮ੍ਬਨ੍ਧੋ. ਸਮ੍ਪਤ੍ਤਾਨਨ੍ਤਿ ਦਿਨ੍ਨਟ੍ਠਾਨਂ ਸਮ੍ਪਤ੍ਤਾਨਂ. ਤਤ੍ਥਾਤਿ ਦਿਨ੍ਨਟ੍ਠਾਨਂ, ਸਮ੍ਪਤ੍ਤਾਨਂਯੇਵਾਤਿ ਸਮ੍ਬਨ੍ਧੋ. ਤਸ੍ਸ ਵਿਹਾਰਸ੍ਸਾਤਿ ਪਵਿਟ੍ਠਵਿਹਾਰਸ੍ਸ. ਤਸ੍ਮਿਂ ਤਸ੍ਮਿਂ ਠਾਨੇਤਿ ਗਾਮਦ੍ਵਾਰਵੀਥਿਚਤੁਕ੍ਕਸਙ੍ਖਾਤੇ ਤਸ੍ਮਿਂ ਤਸ੍ਮਿਂ ਠਾਨੇ. ਅਨ੍ਤੋਉਪਚਾਰਗਤਾਨਨ੍ਤਿ ਏਤ੍ਥ ਅਨ੍ਤੋਉਪਚਾਰੋ ਨਾਮ ਦ੍ਵਾਦਸਹਤ੍ਥਬ੍ਭਨ੍ਤਰਂ.

ਗਾਮਦ੍ਵਾਰੂਪਚਾਰ ਵੀਥਿਚਤੁਕ੍ਕੂਪਚਾਰ ਘਰੂਪਚਾਰੇਸੁ ਤੀਸੁ ਘਰੂਪਚਾਰਸ੍ਸ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਘਰੂਪਚਾਰੋ ਚੇਤ੍ਥਾ’’ਤਿਆਦਿ. ਏਤ੍ਥਾਤਿ ਤੀਸੁ ਉਪਚਾਰੇਸੁ. ਘਰੂਪਚਾਰੋ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਏਕੋ ਉਪਚਾਰੋ ਏਤ੍ਥਾਤਿ ਏਕੂਪਚਾਰਂ ਘਰਂ. ਇਮੇਸਨ੍ਤਿ ਚਤੁਨ੍ਨਂ ਘਰਾਨਂ. ਤਤ੍ਥਾਤਿ ਚਤੂਸੁ ਘਰੇਸੁ. ਏਕਕੁਲਸ੍ਸ ਯਂ ਘਰਨ੍ਤਿ ਸਮ੍ਬਨ੍ਧੋ. ਏਕਵਲ਼ਞ੍ਜਨ੍ਤਿ ਏਕਦ੍ਵਾਰੇਨ ਸਮਾਨਪਰਿਭੋਗਂ. ਤਤ੍ਥਾਤਿ ਏਕੂਪਚਾਰੇ.

ਯਂ ਪਨ ਏਕਂ ਘਰਂ ਕਤਨ੍ਤਿ ਸਮ੍ਬਨ੍ਧੋ. ਸੁਖਵਿਹਾਰਤ੍ਥਾਯਾਤਿ ਕਲਹਂ ਵਿਚ੍ਛਿਨ੍ਦਿਤ੍ਵਾ ਸੁਖਵਿਹਾਰਤ੍ਥਾਯ. ਤਸ੍ਮਿਂ ਤਸ੍ਮਿਂ ਠਾਨੇਤਿ ਭਿਤ੍ਤਿਯਾ ਪਰਿਚ੍ਛਿਨ੍ਨੇ ਤਸ੍ਮਿਂ ਤਸ੍ਮਿਂ ਠਾਨੇ.

ਯਸ੍ਮਿਂ ਪਨ ਘਰੇ ਨਿਸੀਦਾਪੇਨ੍ਤੀਤਿ ਸਮ੍ਬਨ੍ਧੋ. ਯਮ੍ਪਿ ਨਿਵੇਸਨਨ੍ਤਿ ਯੋਜਨਾ.

ਯੋ ਪਨ ਉਦ੍ਦੇਸਲਾਭੋ ਉਪ੍ਪਜ੍ਜਤਿ, ਸੋ ਪਾਪੁਣਾਤੀਤਿ ਯੋਜਨਾ. ਕਿਞ੍ਚਾਪਿ ਦਿਸ੍ਸਨ੍ਤਿ, ਤਥਾਪੀਤਿ ਯੋਜਨਾ.

ਯੋ ਪਨਾਤਿ ਭਿਕ੍ਖੁ ਪਨ, ਲਭਤੀਤਿ ਸਮ੍ਬਨ੍ਧੋ. ਅਞ੍ਞਸ੍ਮਿਨ੍ਤਿ ਅਤ੍ਤਨਾ ਅਞ੍ਞਸ੍ਮਿਂ. ਤੇਨਾਤਿ ਉਦ੍ਦੇਸਭਤ੍ਤਂ ਲਭਨ੍ਤੇਨ ਭਿਕ੍ਖੁਨਾ.

ਕਾਲਂ ਪਟਿਮਾਨੇਨ੍ਤੇਸੂਤਿ ਭੋਜਨਕਾਲਂ ਪਟਿਮਾਨੇਨ੍ਤੇਸੁ ਭਿਕ੍ਖੂਸੁ, ਨਿਸਿਨ੍ਨੇਸੂਤਿ ਸਮ੍ਬਨ੍ਧੋ. ਕੋਚਿ ਮਨੁਸ੍ਸੋ ਵਦਤੀਤਿ ਸਮ੍ਬਨ੍ਧੋ. ਸਙ੍ਘੁਦ੍ਦੇਸਪਤ੍ਤਂ ਦੇਥ ਇਤਿ ਵਾਤਿ ਯੋਜਨਾ. ‘‘ਏਸੇਵ ਨਯੋ’’ਤਿ ਇਮਿਨਾ ਪਤ੍ਤਸ੍ਸ ਠਾਨੇ ਭਿਕ੍ਖੁਂ ਪਕ੍ਖਿਪਿਤ੍ਵਾ ਵੁਤ੍ਤੇ ਅਤਿਦਿਸਤਿ.

ਏਤ੍ਥਾਤਿ ਉਦ੍ਦੇਸਭਤ੍ਤੇ, ਏਵਂਵਚਨੇ ਵਾ. ਪੇਸਲੋਤਿ ਪਿਯਸੀਲੋ. ਤੇਨਾਤਿ ਉਦ੍ਦੇਸਕੇਨ. ਕਿਨ੍ਤਿ ਜਾਨਾਤੀਤਿ ਆਹ ‘‘ਦਸਵਸ੍ਸੇਨ ਲਦ੍ਧ’’ਨ੍ਤਿ. ਤਸ੍ਸਾਤਿ ਉਦ੍ਦੇਸਕਸ੍ਸ, ਵਚਨਨ੍ਤਿ ਸਮ੍ਬਨ੍ਧੋ. ਅਪ੍ਪਸਦ੍ਦਾਤਿ ਸਣਿਕਸਦ੍ਦਾ. ‘‘ਅਪਸਦ੍ਦਾ’’ਤਿਪਿ ਪਾਠੋ, ਨਿਸ੍ਸਦ੍ਦਾਤਿ ਅਤ੍ਥੋ. ਸਬ੍ਬਨਵਕਸ੍ਸਾਤਿ ਸਬ੍ਬੇਸਂ ਭਿਕ੍ਖੂਨਂ ਨਵਕਸ੍ਸ. ਛਾਯਾਯਪਿ ਪੁਚ੍ਛਿਯਮਾਨਾਯਾਤਿ ਅਨਾਦਰੇ ਭੁਮ੍ਮਵਚਨਂ, ਸਾਮਿਵਚਨਂ ਵਾ. ਨ ਲਭਤੀਤਿ ਪਾਪੁਣਾਪਿਤਤ੍ਤਾ ਨ ਲਭਤਿ. ਨਿਸਿਨ੍ਨਸ੍ਸਾਪਿ ਨਿਦ੍ਦਾਯਨ੍ਤਸ੍ਸਾਪੀਤਿ ਅਨਾਦਰੇ ਸਾਮਿਵਚਨਂ, ਭਿਕ੍ਖੁਸ੍ਸ ਨਿਸਿਨ੍ਨਸ੍ਸਾਪਿ ਨਿਦ੍ਦਾਯਨ੍ਤਸ੍ਸਾਪੀਤਿ ਅਤ੍ਥੋ. ਹੀਤਿ ਸਚ੍ਚਂ. ਏਤਂ ਭਾਜਨੀਯਭਣ੍ਡਂ ਨਾਮਾਤਿ ਯੋਜਨਾ. ਤਤ੍ਥਾਤਿ ‘‘ਸਮ੍ਪਤ੍ਤਸ੍ਸੇਵ ਪਾਪੁਣਾਤੀ’’ਤਿ ਵਚਨੇ. ਉਪਚਾਰੇਨਾਤਿ ਦ੍ਵਾਦਸਹਤ੍ਥੂਪਚਾਰੇਨ. ਤਸ੍ਮਿਨ੍ਤਿ ਅਨ੍ਤੋਪਰਿਕ੍ਖੇਪੇ.

ਕੋਚਿ ਉਪਾਸਕੋ ਪਹਿਣਾਤੀਤਿ ਸਮ੍ਬਨ੍ਧੋ. ਪਣੀਤਭੋਜਨਾਨਨ੍ਤਿ ਪਣੀਤਭੋਜਨੇਹਿ. ਉਦਕਸ੍ਸਾਤਿ ਉਦਕੇਨ, ਪੂਰੇਤ੍ਵਾਤਿ ਸਮ੍ਬਨ੍ਧੋ. ਆਗਤਾ ਮਨੁਸ੍ਸਾਤਿ ਸਮ੍ਬਨ੍ਧੋ. ਯੇਨਾਤਿ ਭਿਕ੍ਖੁਨਾ. ਯਨ੍ਤਿ ਵਤ੍ਥੁ. ਤਿਚੀਵਰਪਰਿਵਾਰਨ੍ਤਿ ਤਿਚੀਵਰੇਨ ਪਰਿਵਾਰਿਤਂ, ਤਿਚੀਵਰਪਰਿਵਾਰਵਨ੍ਤਂ ਵਾ ਉਦ੍ਦੇਸਭਤ੍ਤਨ੍ਤਿ ਅਤ੍ਥੋ. ਹਿ ਸਚ੍ਚਂ ਅਸ੍ਸ ਭਿਕ੍ਖੁਸ੍ਸ ਪੁਞ੍ਞਵਿਸੇਸੋ ਈਦਿਸੋਤਿ ਯੋਜਨਾ. ਨਨੁ ਉਦਕਂਪਿਸ੍ਸ ਪੁਞ੍ਞਵਿਸੇਸਂ, ਕਸ੍ਮਾ ਅਞ੍ਞਂ ਉਦ੍ਦੇਸਭਤ੍ਤਂ ਲਭਤੀਤਿ ਆਹ ‘‘ਉਦਕਂ ਪਨਾ’’ਤਿਆਦਿ.

ਗਹੇਤ੍ਵਾ ਆਗਤਾ ਤੇ ਮਨੁਸ੍ਸਾਤਿ ਯੋਜਨਾ. ਤੇਸਨ੍ਤਿ ਮਹਾਥੇਰਾਦੀਨਂ. ਦਹਰਸਾਮਣੇਰੇਹੀਤਿ ਦਹਰੇਹਿ ਸਾਮਣੇਰੇਹਿ, ਲਦ੍ਧੇਸੂਤਿ ਸਮ੍ਬਨ੍ਧੋ.

ਤਤ੍ਥਾਤਿ ਉਦ੍ਦੇਸਭਤ੍ਤੇ. ਪੁਰਤੋਤਿ ਮਹਾਥੇਰਾਨਂ ਪੁਰਤੋ. ਪਤ੍ਤੇਤਿ ਸਙ੍ਘੁਦ੍ਦੇਸਪਤ੍ਤੇ, ਅਗਾਹਿਤੇਯੇਵਾਤਿ ਸਮ੍ਬਨ੍ਧੋ. ਆਹਟਮ੍ਪਿ ਉਦ੍ਦੇਸਭਤ੍ਤਨ੍ਤਿ ਸਮ੍ਬਨ੍ਧੋ.

ਏਕੋ ਵਦਤੀਤਿ ਸਮ੍ਬਨ੍ਧੋ. ਸੋਤਿ ਮਨੁਸ੍ਸੋ, ਭਣਤੀਤਿ ਸਮ੍ਬਨ੍ਧੋ. ਯਥਾ ਤੇ ਰੁਚ੍ਚਤਿ, ਤਥਾ ਵਤ੍ਵਾ ਆਹਰਾਤਿ ਯੋਜਨਾ. ਵਿਸ੍ਸਟ੍ਠਦੂਤੋ ਨਾਮਾਤਿ ਅਤ੍ਤਨੋ ਰੁਚਿਂ ਵਿਸ੍ਸਜ੍ਜਿਤ੍ਵਾ ਤਸ੍ਸ ਰੁਚਿਯਾ ਵਿਸ੍ਸਟ੍ਠੋ ਦੂਤੋ ਨਾਮ. ਪਟਿਪਾਟਿਪਤ੍ਤਂ ਵਾਤਿ ਸਙ੍ਘਤੋ ਪਟਿਪਾਟਿਯਾ ਲਦ੍ਧਂ ਪਤ੍ਤਂ ਵਾ, ਇਦਂ ਨਿਮਨ੍ਤਨਭਤ੍ਤਂ ਸਨ੍ਧਾਯ ਵੁਤ੍ਤਂ. ਯਂ ਇਚ੍ਛਤੀਤਿ ਵਿਸ੍ਸਟ੍ਠਦੂਤੋ ਯਂ ਇਚ੍ਛਤਿ. ਸੋਤਿ ਬਾਲੋ, ਨ ਵਤ੍ਤਬ੍ਬੋਤਿ ਸਮ੍ਬਨ੍ਧੋ. ਪੁਚ੍ਛਾਸਭਾਗੇਨ ਵਦੇਯ੍ਯਾਤਿ ਸਮ੍ਬਨ੍ਧੋ. ਤਤੋਤਿ ਵਦਨਕਾਰਣਾ.

ਕੂਟਟ੍ਠਿਤਿਕਾ ਨਾਮਾਤਿ ਅਞ੍ਞੇਹਿ ਉਦ੍ਦੇਸਭਤ੍ਤੇਹਿ ਮਿਸ੍ਸੇਤ੍ਵਾ ਉਜੁਕਟ੍ਠਿਤਿਕਾਯ ਪਵਤ੍ਤਿਤ੍ਵਾ ਕੂਟੇਨ ਪਵਤ੍ਤਾ ਠਿਤਿਕਾ ਨਾਮ ਹੋਤਿ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਰਞ੍ਞੋ ਵਾ ਹੀ’’ਤਿਆਦਿ. ਏਕਚਾਰਿਕਭਤ੍ਤਾਨੀਤਿ ਪਤਿ ਏਕਂ ਕਤ੍ਵਾ ਚਰਿਤਬ੍ਬਾਨਿ ਭਕ੍ਖਿਤਬ੍ਬਾਨੀਤਿ ਏਕਚਾਰਿਕਾਨਿ, ਅਞ੍ਞੇਹਿ ਉਦ੍ਦੇਸਭਤ੍ਤੇਹਿ ਅਮਿਸ੍ਸੇਤ੍ਵਾ ਪਤਿ ਏਕਂ ਕਤ੍ਵਾ ਭਕ੍ਖਿਤਬ੍ਬਾਨੀਤਿ ਵੁਤ੍ਤਂ ਹੋਤਿ, ਤਾਨਿਯੇਵ ਭਤ੍ਤਾਨਿ ਏਕਚਾਰਿਕਭਤ੍ਤਾਨਿ. ਏਕਚ੍ਚੇ ਭਿਕ੍ਖੂ ਗਤਾਤਿ ਸਮ੍ਬਨ੍ਧੋ. ਤੇਸੂਤਿ ਏਕਚ੍ਚੇਸੁ ਭਿਕ੍ਖੂਸੁ. ਤਙ੍ਖਣਂਯੇਵਾਤਿ ਤਸ੍ਮਿਂ ਨਿਸਿਨ੍ਨਕ੍ਖਣੇਯੇਵ. ਪੁਨ ਤਙ੍ਖਣਂਯੇਵਾਤਿ ਤਸ੍ਮਿਂ ਗਾਹਣਕ੍ਖਣੇਯੇਵ. ‘‘ਪਣੀਤਭਤ੍ਤ’’ਨ੍ਤਿ ਵੁਤ੍ਤੇ ‘‘ਕਤਿਵਸ੍ਸਤੋ ਪਟ੍ਠਾਯਾ’’ਤਿ ਵਦਨ੍ਤਿ, ‘‘ਏਤ੍ਤਕਵਸ੍ਸਤੋ ਨਾਮਾ’’ਤਿ ਵੁਤ੍ਤੇਤਿ ਯੋਜਨਾ. ਗਾਹਿਤੇਤਿ ਠਿਤਿਕਂ ਅਜਾਨਨ੍ਤੇਹਿ ਆਗਨ੍ਤੁਕੇਹਿ ਪਤ੍ਤੇ ਗਾਹਿਤੇ. ਆਗਤੇਹਿਪਿ ਠਿਤਿਕਂ ਜਾਨਨਕਭਿਕ੍ਖੂਹੀਤਿ ਸਮ੍ਬਨ੍ਧੋ. ਏਸੇਵ ਨਯੋ ਪਰਤੋਪਿ. ਭਿਕ੍ਖੂਯੇਵ ਆਗਚ੍ਛਨ੍ਤੂਤਿ ਪਤ੍ਤਂ ਅਗ੍ਗਹੇਤ੍ਵਾ ਭਿਕ੍ਖੂਯੇਵ ਆਗਚ੍ਛਨ੍ਤੂਤਿ ਅਧਿਪ੍ਪਾਯੋ.

ਨੇਤਿ ਠਿਤਿਕਂ ਅਜਾਨਨ੍ਤੇ ਆਗਨ੍ਤੁਕੇ. ਰਾਜਾ ਭੋਜੇਤ੍ਵਾਤਿ ਰਾਜਾ ਅਤ੍ਤਨੋ ਗੇਹੇ ਭੋਜੇਤ੍ਵਾ. ਨੇਸਨ੍ਤਿ ਆਗਨ੍ਤੁਕਾਨਂ, ਪਤ੍ਤੇਪੀਤਿ ਸਮ੍ਬਨ੍ਧੋ. ਯਂ ਆਹਟਨ੍ਤਿ ਯਂ ਭਤ੍ਤਂ ਅਭੁਞ੍ਜਿਤ੍ਵਾ ਆਹਟਂ. ਤਂ ਨ ਗਾਹੇਤਬ੍ਬਨ੍ਤਿ ਤਂ ਭਤ੍ਤਂ ਠਿਤਿਕਾਯ ਨ ਗਾਹੇਤਬ੍ਬਂ ਥੋਕਤ੍ਤਾ. ਨੇਸਨ੍ਤਿ ਆਗਨ੍ਤੁਕਾਨਂ. ਗੀਵਾ ਹੋਤੀਤਿ ਇਣਂ ਹੋਤਿ. ਇਣਂ ਨਾਮ ਪਟਿਦਾਤਬ੍ਬਸਭਾਵੋ ਹੋਤਿ, ਤਸ੍ਮਾ ਪਟਿਦਾਤਬ੍ਬਨ੍ਤਿ ਅਧਿਪ੍ਪਾਯੋ. ਏਤ੍ਥਾਤਿ ਠਿਤਿਕਂ ਅਜਾਨਿਤ੍ਵਾ ਭੁਤ੍ਤਟ੍ਠਾਨੇ. ਤਾਵ ਨਿਸੀਦਿਤਬ੍ਬਨ੍ਤਿ ਤਾਵ ਆਗਮੇਤ੍ਵਾ ਨਿਸੀਦਿਤਬ੍ਬਂ. ਪਤ੍ਤਟ੍ਠਾਨੇਨ ਗਾਹਣਮ੍ਪਿ ਗੀਵਾਸਦਿਸੋਤਿ ਪੁਰਿਮਥੇਰਸ੍ਸ ਮਤਿ ਭਵੇਯ੍ਯ. ਏਵਞ੍ਹਿ ਸਤਿ ਦ੍ਵਿਨ੍ਨਂ ਥੇਰਾਨਂ ਵਾਦੋ ਸਦਿਸੋਯੇਵ.

ਏਕੋ ਪਿਣ੍ਡਪਾਤੋਤਿ ਸਮ੍ਬਨ੍ਧੋ. ਤਥਾਰੂਪੋਤਿ ਤਿਚੀਵਰਪਰਿਵਾਰੋ ਸਤਗ੍ਘਨਕੋ. ਅਯਨ੍ਤਿ ਪਿਣ੍ਡਪਾਤੋ. ਇਤਿ ਵੁਤ੍ਤਂ ਅਟ੍ਠਕਥਾਸੁ.

ਏਕੋ ਭਿਕ੍ਖੂਤਿ ਸਮ੍ਬਨ੍ਧੋ. ਅਨ੍ਤਰਾਭਟ੍ਠਕੋਤਿ ਉਦ੍ਦੇਸਭਤ੍ਤਸ੍ਸ ਅਨ੍ਤਰੇ ਵੇਮਜ੍ਝੇ ਭਸ੍ਸਤਿ ਗਲਤੀਤਿ ਅਨ੍ਤਰਾਭਟ੍ਠਕੋ. ਪਰਿਪੁਣ੍ਣਵਸ੍ਸੋ ਯੋ ਪਨ ਸਾਮਣੇਰੋਤਿ ਯੋਜਨਾ. ਤਸ੍ਸ ਉਪਸਮ੍ਪਜ੍ਜਿਤਸਾਮਣੇਰਸ੍ਸ ਠਿਤਿਕਾ ਅਤਿਕ੍ਕਨ੍ਤਾਤਿ ਸਮ੍ਬਨ੍ਧੋ. ਸੋਤਿ ਉਦ੍ਦੇਸਭਤ੍ਤਪਤ੍ਤੋ ਭਿਕ੍ਖੁ. ਸਮੀਪੇਤਿ ਅਤ੍ਤਨੋ ਸਮੀਪੇ. ਤਞ੍ਚੇ ਥੇਯ੍ਯਾਯ ਹਰਨ੍ਤੀਤਿ ਤਂ ਪਤ੍ਤਂ ਪਤ੍ਤਹਾਰਕਾ ਥੇਯ੍ਯਾਯ ਹਰਨ੍ਤਿ ਚੇ. ਗੀਵਾ ਹੋਤੀਤਿ ਪਤ੍ਤਦਾਪਕਸ੍ਸ ਗੀਵਾ ਹੋਤਿ. ਸੋ ਭਿਕ੍ਖੂਤਿ ਸਮੀਪੇ ਨਿਸਿਨ੍ਨੋ ਸੋ ਭਿਕ੍ਖੁ. ਅਸ੍ਸਾਤਿ ਪਤ੍ਤਦਾਪਕਸ੍ਸ. ‘‘ਅਯ’’ਨ੍ਤਿ ਪੋਤ੍ਥਕੇਸੁ ਪਾਠੋ ਅਤ੍ਥਿ, ਸੋ ਨ ਸੁਨ੍ਦਰੋ. ਤਤੋਤਿ ਉਦ੍ਦੇਸਭਤ੍ਤਘਰਤੋ. ‘‘ਸੁਹਟੋ’’ਤਿ ਵਚਨਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਭਤ੍ਤਸ੍ਸ ਦਿਨ੍ਨਤ੍ਤਾ ਗੀਵਾ ਨ ਹੋਤੀ’’ਤਿ.

ਸਾਦਿਯਨਕੋਤਿ ਉਦ੍ਦੇਸਭਤ੍ਤਸਾਦਿਯਨਕੋ, ਹੋਤੀਤਿ ਸਮ੍ਬਨ੍ਧੋ. ਦਸਹਿਪਿ ਪਤ੍ਤੇਹਿ ਭਤ੍ਤਂ ਆਹਰਾਪੇਤ੍ਵਾਤਿ ਯੋਜਨਾ. ਭਿਕ੍ਖੁਦਤ੍ਤਿਯਂ ਨਾਮਾਤਿ ਭਿਕ੍ਖੁਨਾ ਦਤ੍ਤਿਯਂ ਨਾਮ. ਸੋ ਭਿਕ੍ਖੂਤਿ ਸਾਦਿਯਨਕੋ ਸੋ ਭਿਕ੍ਖੁ. ਤੇ ਭਿਕ੍ਖੂਤਿ ਪਿਣ੍ਡਪਾਤਿਕੇ ਤੇ ਭਿਕ੍ਖੂ. ਏਥ ਭਨ੍ਤੇ ਮਯ੍ਹਂ ਸਹਾਯਾ ਹੋਥ ਇਤਿ ਵਤ੍ਵਾਤਿ ਸਮ੍ਬਨ੍ਧੋ. ਤਸ੍ਸਾਤਿ ਉਪਾਸਕਸ੍ਸ. ਤਤ੍ਥਾਤਿ ਉਪਾਸਕਸ੍ਸ ਘਰੇ. ਤਸ੍ਸੇਵਾਤਿ ਸਾਦਿਯਨਕਸ੍ਸੇਵ. ਇਤਰੇਤਿ ਨਵਪਿਣ੍ਡਪਾਤਿਕਾ. ਨੇਸਨ੍ਤਿ ਦਸਨ੍ਨਂ ਭਿਕ੍ਖੂਨਂ. ਤਸ੍ਸ ਭਿਕ੍ਖੁਨੋਤਿ ਸਾਦਿਯਨਕਸ੍ਸ ਭਿਕ੍ਖੁਨੋ. ਭੁਤ੍ਤਾਵੀਨਨ੍ਤਿ ਭੁਤ੍ਤਵਨ੍ਤਾਨਂ.

ਤੇਤਿ ਨਵਪਿਣ੍ਡਪਾਤਿਕਾ, ਵੁਤ੍ਤਾ ਗਚ੍ਛਨ੍ਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਉਪਾਸਕਸ੍ਸ ਘਰੇ. ਤਤ੍ਰਾਤਿ ਦਸਸੁ ਭਿਕ੍ਖੂਸੁ. ਮਧੁਰੇਨ ਸਰੇਨ ਅਨੁਮੋਦਨਂ ਕਰੋਨ੍ਤਸ੍ਸ ਏਕਸ੍ਸ ਧਮ੍ਮਕਥਂ ਸੁਤ੍ਵਾਤਿ ਯੋਜਨਾ. ਅਕਤਭਾਗੋ ਨਾਮਾਤਿ ਪੁਬ੍ਬੇ ਨ ਕਰਿਯਿਤ੍ਥਾਤਿ ਅਕਤੋ, ਸੋਯੇਵ ਭਾਗੋ ਕੋਟ੍ਠਾਸੋਤਿ ਅਕਤਭਾਗੋ, ਆਗਨ੍ਤੁਕਭਾਗੋ ਨਾਮਾਤਿ ਅਤ੍ਥੋ.

ਏਕੋ ਉਪਾਸਕੋ ਦੇਤੀਤਿ ਸਮ੍ਬਨ੍ਧੋ. ਇਮਨ੍ਤਿ ਖਾਦਨੀਯਭੋਜਨੀਯਂ. ਪਤ੍ਤਸਾਮਿਕਸ੍ਸ ਦਾਤਬ੍ਬਨ੍ਤਿ ਯੋਜਨਾ. ਠਪੇਤ੍ਵਾਤਿ ਪਕਤਿਯਾ ਠਪੇਤ੍ਵਾ. ‘‘ਸਬ੍ਬੋ ਸਙ੍ਘੋ ਭੁਞ੍ਜਤੂ’’ਤਿ ਵਤ੍ਵਾ ਚ ਕਿਞ੍ਚਿ ਅਵਤ੍ਵਾ ਚ ਗਤੇਪਿ ਪਠਮਮੇਵ ‘‘ਸਬ੍ਬਂ ਸਙ੍ਘਿਕਂ ਪਤ੍ਤਂ ਦੇਥਾ’’ਤਿ ਵੁਤ੍ਤਤ੍ਤਾ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ.

ਪਾਤਿਯਾ ਆਹਰਿਤ੍ਵਾਤਿ ਸਮ੍ਬਨ੍ਧੋ. ਏਕੇਕਂ ਆਲੋਪਨ੍ਤਿ ਏਕੇਕਸ੍ਸ ਭਿਕ੍ਖੁਸ੍ਸ ਏਕੇਕਂ ਆਲੋਪਂ. ਅਚ੍ਛਤੀਤਿ ਵਸਤਿ. ਕਸ੍ਸ ਤੇਤਿ ਕਸ੍ਸ ਅਤ੍ਥਾਯ ਤਯਾ, ਆਨੀਤਨ੍ਤਿ ਯੋਜਨਾ. ‘‘ਏਕੇਨ ਭਿਕ੍ਖੁਨਾ’’ਤਿ ਪਦਂ ‘‘ਗਾਹੇਤਬ੍ਬ’’ਨ੍ਤਿ ਪਦੇ ਕਾਰਿਤਕਮ੍ਮਂ, ‘‘ਭਤ੍ਤ’’ਨ੍ਤਿ ਧਾਤੁਕਮ੍ਮਂ ਤਬ੍ਬਪਚ੍ਚਯੋ ਵਦਤਿ.

ਕਿਂ ਆਹਰੀਯਤੀਤਿ ਅਵਤ੍ਵਾਤਿ ਕਿਂ ਵਤ੍ਥੁ ਤਯਾ ਆਹਰੀਤੀਤਿ ਉਪਾਸਕਂ ਅਪੁਚ੍ਛਿਤ੍ਵਾ. ‘‘ਕਿਂ ਆਹਰਿਸ੍ਸਸੀ’’ਤਿਪਿ ਪਾਠੋ, ਕਿਂ ਵਤ੍ਥੁਂ ਤ੍ਵਂ ਆਹਰਿਸ੍ਸਸੀਤਿ ਅਤ੍ਥੋ. ਸਪਰਿਵਾਰਾਯ ਯਾਗੁਯਾ ਚ ਮਹਗ੍ਘਾਨਂ ਫਲਾਨਞ੍ਚ ਪਣੀਤਾਨਂ ਖਜ੍ਜਕਾਨਞ੍ਚ ਤਥਾ ਆਵੇਣਿਕਾ ਠਿਤਿਕਾ ਕਾਤਬ੍ਬਾਤਿ ਯੋਜਨਾ. ਏਕਾ ਏਵ ਠਿਤਿਕਾਤਿ ਸਮਾਨਾ ਏਵ ਠਿਤਿਕਾ. ਤਥਾ ਫਾਣਿਤਸ੍ਸਾਤਿ ਏਤ੍ਥ ਤਥਾਸਦ੍ਦੇਨ ‘‘ਏਕਾ ਏਵ ਠਿਤਿਕਾ ਵਟ੍ਟਤੀ’’ਤਿ ਪਦਂ ਅਤਿਦਿਸਤਿ.

ਇਤਿ ਉਦ੍ਦੇਸਭਤ੍ਤਕਥਾਯ ਯੋਜਨਾ ਸਮਤ੍ਤਾ.

ਨਿਮਨ੍ਤਨਭਤ੍ਤਕਥਾ

ਨਿਮਨ੍ਤਨਂ ਪੁਗ੍ਗਲਿਕਂ ਸਙ੍ਘਿਕਞ੍ਚਾਤਿ ਦੁਵਿਧਂ. ਤਤ੍ਥ ਪੁਗ੍ਗਲਿਕਂ ਸਨ੍ਧਾਯ ਵੁਤ੍ਤਂ ‘‘ਪੁਗ੍ਗਲਿਕਂ ਚੇ ਸਯਮੇਵ ਇਸ੍ਸਰੋ’’ਤਿ. ‘‘ਏਤ੍ਤਕੇ ਭਿਕ੍ਖੂ ਸਙ੍ਘਤੋ ਉਦ੍ਦਿਸਥਾ’’ਤਿਆਦੀਨਿ ਅਵਤ੍ਵਾ ‘‘ਏਤ੍ਤਕਾਨਂ ਭਿਕ੍ਖੂਨਂ ਭਤ੍ਤਂ ਗਣ੍ਹਥਾ’’ਤਿ ਨਿਮਨ੍ਤੇਤ੍ਵਾ ਦਿਨ੍ਨਂ ਸਙ੍ਘਿਕਂ ਨਿਮਨ੍ਤਨਂ ਨਾਮ. ਏਤ੍ਥਾਤਿ ਨਿਮਨ੍ਤਨੇ. ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤੀਤਿ ‘‘ਭਿਕ੍ਖ’’ਨ੍ਤਿ ਕਪ੍ਪਿਯਵੋਹਾਰੇਨ ਵੁਤ੍ਤਤ੍ਤਾ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ਪਟਿਪਾਟਿਯਾਤਿ ਸਙ੍ਘਤੋ ਲਦ੍ਧਪਟਿਪਾਟਿਯਾ. ਆਗਤਮਨੁਸ੍ਸੋ ਵਦਤੀਤਿ ਸਮ੍ਬਨ੍ਧੋ. ਵਿਚ੍ਛਿਨ੍ਦਿਤ੍ਵਾਤਿ ‘‘ਤੁਮ੍ਹੇ ਚ ਗਚ੍ਛਥਾ’’ਤਿ ਵਚਨਂ ਵਿਚ੍ਛਿਨ੍ਦਿਤ੍ਵਾ.

ਨਿਮਨ੍ਤਨਭਤ੍ਤਘਰਤੋਤਿ ਨਿਮਨ੍ਤਨਭਤ੍ਤਸ੍ਸ ਦਿਨ੍ਨਘਰਤੋ. ਏਕੋ ਆਹਰਤੀਤਿ ਸਮ੍ਬਨ੍ਧੋ. ਪੂਰੇਤ੍ਵਾਤਿ ਭਤ੍ਤਸ੍ਸ ਪੂਰੇਤ੍ਵਾ. ਤਨ੍ਤਿ ਭਤ੍ਤਂ. ਇਧਾਪੀਤਿ ਨਿਮਨ੍ਤਨੇਪਿ.

ਤਤੋਤਿ ਵਦਨਕਾਰਣਾ. ‘‘ਸੋ ਭਿਕ੍ਖੂ’’ਤਿ ਪਦਂ ‘‘ਅਸ੍ਸਾ’’ਤਿ ਪਦੇ ਪਕਤਿਕਤ੍ਤਾ, ‘‘ਜਿਗੁਚ੍ਛਨੀਯੋ’’ਤਿ ਪਦਂ ਤਤ੍ਥੇਵ ਵਿਕਤਿਕਤ੍ਤਾ. ਅਸ੍ਸਾਤਿ ਭਵੇਯ੍ਯ, ਹੋਤਿ ਵਾ. ‘‘ਪਤ੍ਤਤ੍ਥਾਯ ਆਗਤੋਮ੍ਹੀ’’ਤਿ ਵਦਨ੍ਤਸ੍ਸ ਤਸ੍ਸ ਪਤ੍ਤੋ ਦਾਤਬ੍ਬੋਤਿ ਯੋਜਨਾ. ਭਤ੍ਤਾਹਰਣਕਪਤ੍ਤਨ੍ਤਿ ਭਤ੍ਤਂ ਆਹਰਤਿ ਅਨੇਨਾਤਿ ਭਤ੍ਤਾਹਰਣਕੋ, ਸੋਯੇਵ ਪਤ੍ਤੋ ਭਤ੍ਤਾਹਰਣਕਪਤ੍ਤੋ, ਤਂ. ਪਟਿਪਾਟਿਭਤ੍ਤਨ੍ਤਿ ਪਟਿਪਾਟਿਯਾ ਲਦ੍ਧਂ ਭਤ੍ਤਂ.

ਆਲੋਪਭਤ੍ਤਟ੍ਠਿਤਿਕਤੋਤਿ ਏਕੇਕਆਲੋਪੇਨ ਲਦ੍ਧਸ੍ਸ ਭਤ੍ਤਸ੍ਸ ਠਿਤਿਕਤੋ. ਆਲੋਪਸਙ੍ਖੇਪੇਨਾਤਿ ਏਕੇਕਸ੍ਮਿਂ ਆਲੋਪੇ ਤਂਸਂਖਿਪਨੇਨ. ਅਯਂ ਨਯੋ ਉਦ੍ਦੇਸਭਤ੍ਤਤੋ ਵਿਸੇਸੋ. ਕਸ੍ਸ ਤੇ ਆਭਤਨ੍ਤਿ ਕਸ੍ਸ ਅਤ੍ਥਾਯ ਤਯਾ ਆਭਤਨ੍ਤਿ ਯੋਜਨਾ. ਸਙ੍ਘਸ੍ਸ ਮੇ ਭਤ੍ਤਨ੍ਤਿ ਸਙ੍ਘਸ੍ਸ ਅਤ੍ਥਾਯ ਮਯਾ ਭਤ੍ਤਂ ਆਭਤਂ. ਥੇਰਾਨਂ ਮੇ ਭਤ੍ਤਨ੍ਤਿ ਥੇਰਾਨਂ ਮਯਾ ਭਤ੍ਤਂ ਆਭਤਂ.

ਉਪਾਸਕੋ ਪਹਿਣਾਤੀਤਿ ਸਮ੍ਬਨ੍ਧੋ. ਇਮੇ ਤਯੋ ਜਨਾਤਿ ਸਙ੍ਘਤ੍ਥੇਰੋ ਚ ਗਨ੍ਥਧੁਤਙ੍ਗਵਸੇਨ ਅਭਿਞ੍ਞਾਤੋ ਚ ਭਤ੍ਤੁਦ੍ਦੇਸਕੋ ਚਾਤਿ ਇਮੇ ਤਯੋ ਜਨਾ. ਪੁਚ੍ਛਿਤੁਨ੍ਤਿ ‘‘ਕਿਂ ਸਙ੍ਘਤੋ ਗਣ੍ਹਾਮਿ, ਉਦਾਹੁ ਯੇ ਜਾਨਾਮਿ, ਤੇਹਿ ਸਦ੍ਧਿਂ ਆਗਚ੍ਛਾਮੀ’’ਤਿ ਪੁਚ੍ਛਿਤੁਂ. ਆਰੁਹਿਯਿਤ੍ਥਾਤਿ ਆਰੂਲ਼੍ਹਾ. ਅਤ੍ਤਨਵਮੇਹੀਤਿ ਅਤ੍ਤਾ ਨਵਮੋ ਏਤੇਸਨ੍ਤਿ ਅਤ੍ਤਨਵਮਾ, ਤੇਹਿ ਭਿਕ੍ਖੂਹੀਤਿ ਸਮ੍ਬਨ੍ਧੋ. ਹੀਤਿ ਯਸ੍ਮਾ. ਏਤੇ ਭਿਕ੍ਖੂਤਿ ਸਙ੍ਘਤ੍ਥੇਰਾਦਯੋ ਤਯੋ ਏਤੇ ਭਿਕ੍ਖੂ. ਤੇਨਾਤਿ ਗਨ੍ਥਧੁਤਙ੍ਗਾਦੀਹਿ ਅਨਭਿਞ੍ਞਾਤੇਨ ਭਿਕ੍ਖੁਨਾ ਪਟਿਪਜ੍ਜਿਤਬ੍ਬਨ੍ਤਿ ਸਮ੍ਬਨ੍ਧੋ. ਨਿਸ੍ਸਿਤਕੇ ਵਾ, ਯੇ ਭਿਕ੍ਖੂ ਜਾਨਾਥ, ਤੇ ਭਿਕ੍ਖੂ ਵਾ ਗਹੇਤ੍ਵਾਤਿ ਯੋਜਨਾ. ਅਤ੍ਤਨਾ ਅਞ੍ਞੋ ਗਾਮੋ ਗਨ੍ਤਬ੍ਬੋਤਿ ਸਮ੍ਬਨ੍ਧੋ. ਸੋਯੇਵ ਗਾਮੋਤਿ ਨਿਮਨ੍ਤਨਗਾਮੋਯੇਵ.

ਤਤ੍ਰਾਤਿ ਅਸਨਸਾਲਾਯਂ. ਉਸ੍ਸਵਾਦੀਸੂਤਿ ਛਣਾਦੀਸੁ. ਆਦਿਸਦ੍ਦੇਨ ਅਞ੍ਞੇਨ ਕੇਨਚਿ ਕਾਰਣੇਨ ਮਨੁਸ੍ਸਾਨਂ ਬਹੁਸਨ੍ਨਿਪਾਤਂ ਸਙ੍ਗਣ੍ਹਾਤਿ. ਤਦਾਤਿ ਤਸ੍ਮਿਂ ਨਿਮਨ੍ਤਨਕਾਲੇ. ਸਨ੍ਨਿਪਾਤਟ੍ਠਾਨਤੋਤਿ ਭਿਕ੍ਖੂਨਂ ਸਨ੍ਨਿਪਾਤਟ੍ਠਾਨਤੋ. ਯਥਾਸਤ੍ਤੀਤਿ ਸਤ੍ਤਿਯਾ ਅਨੁਰੂਪਂ, ਸਤ੍ਤਿਂ ਅਨਤਿਕ੍ਕਮਿਤ੍ਵਾਤਿ ਅਤ੍ਥੋ. ਏਤ੍ਥ ਚ ਸਤ੍ਤਿਸਦ੍ਦਸ੍ਸ ਕੁਨ੍ਤਸਙ੍ਖਾਤਸ੍ਸ ਸਤ੍ਥਸ੍ਸਪਿ ਵਾਚਕਤ੍ਤਾ ਤਂ ਪਟਿਕ੍ਖਿਪਨ੍ਤੋ ਆਹ ‘‘ਯਥਾਬਲ’’ਨ੍ਤਿ.

ਸਙ੍ਘਤ੍ਥੇਰੋ ਵਾ ਆਗਚ੍ਛਨ੍ਤੀਤਿ ਸਮ੍ਬਨ੍ਧੋ. ਬਹੁਕਤ੍ਤਾਰਮਪੇਕ੍ਖਿਤ੍ਵਾ ‘‘ਆਗਚ੍ਛਨ੍ਤੀ’’ਤਿ ਬਹੁਵਚਨਵਸੇਨ ਵੁਤ੍ਤਂ. ਏਕਵਾਰਨ੍ਤਿ ਏਕਸ੍ਮਿਂ ਦਿਵਸੇ, ਆਗਮਨਦਿਵਸੇਤਿ ਅਤ੍ਥੋ. ਪਟਿਬਦ੍ਧਕਾਲਤੋਤਿ ਤਤ੍ਥੇਵ ਸਕਟ੍ਠਾਨੇ ਵਾਸਸ੍ਸ ਨਿਬਦ੍ਧਕਾਲਤੋ. ਦੁਤਿਯਵਾਰੇਤਿ ਦੁਤਿਯਦਿਵਸੇ. ਅਭਿਨਵਆਗਨ੍ਤੁਕਾਵਾਤਿ ਅਨਾਗਮਨਪੁਬ੍ਬਾ ਅਭਿਨਵਾ ਆਗਨ੍ਤੁਕਾਵ. ਤਤ੍ਰਾਤਿ ਤਸ੍ਮਿਂ ਪਤ੍ਤਟ੍ਠਾਨੇ. ਤੇਸਨ੍ਤਿ ਅਭਿਨਵਆਗਨ੍ਤੁਕਾਨਂ. ਏਤ੍ਥਾਤਿ ਅਨਾਗਤਪੁਬ੍ਬਟ੍ਠਾਨੇ.

ਸਬ੍ਬਤ੍ਥਾਤਿ ਸਬ੍ਬੇਸੁ ਸਕਟ੍ਠਾਨਆਗਨ੍ਤੁਕਟ੍ਠਾਨੇਸੁ. ਤੇਨਾਤਿ ਅਤਿਲਾਭਿਨਾ ਭਿਕ੍ਖੁਨਾ. ਅਵਿਸੇਸੇਤ੍ਵਾਤਿ ਵਿਸੇਸਮਕਤ੍ਵਾ.

ਸਲਾਕਭਤ੍ਤਕਥਾ

ਸਲਾਕਭਤ੍ਤਂ ਪਨ ਏਵਂ ਵੇਦਿਤਬ੍ਬਨ੍ਤਿ ਯੋਜਨਾ. ‘‘ਵਚਨਤੋ’’ਤਿ ਪਦਂ ‘‘ਦਾਤਬ੍ਬਾ’’ਤਿ ਪਦੇ ਞਾਪਕਹੇਤੁ. ਸਲਾਕਾਯ ਵਾਤਿ ਕੁਸਦਣ੍ਡੇ ਵਾ. ਅਸੁਕਸ੍ਸ ਨਾਮਾਤਿ ਅਸੁਕਸ੍ਸ ਨਾਮ ਉਪਾਸਕਸ੍ਸ. ਉਪਨਿਬਨ੍ਧਿਤ੍ਵਾਤਿ ਲਿਖਿਤ੍ਵਾ, ਛਿਨ੍ਦਿਤ੍ਵਾਤਿ ਅਤ੍ਥੋ. ‘‘ਓਪੁਞ੍ਜਿਤ੍ਵਾ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੁਨਪ੍ਪੁਨਂ ਹੇਟ੍ਠੁਪਰਿਯਵਸੇਨ ਆਲੋਲ਼ੇਤ੍ਵਾ’’ਤਿ. ਭਤ੍ਤੁਦ੍ਦੇਸਕੇਨ ਦਾਤਬ੍ਬਾਤਿ ਸਮ੍ਬਨ੍ਧੋ.