੭. ਸਙ੍ਘਭੇਦਕਕ੍ਖਨ੍ਧਕਂ

ਛਸਕ੍ਯਪਬ੍ਬਜ੍ਜਾਕਥਾ

੩੩੦. ਸਙ੍ਘਭੇਦਕਕ੍ਖਨ੍ਧਕੇ ਅਭਿਞ੍ਞਾਤਾ ਅਭਿਞ੍ਞਾਤਾਤਿ ਏਤ੍ਥ ਅਭਿਪੁਬ੍ਬੋ ਞਾਤਸਦ੍ਦੋ ਪਾਕਟਤ੍ਥੋਤਿ ਆਹ ‘‘ਪਾਕਟਾ ਪਾਕਟਾ’’ਤਿ. ਕਾਲ਼ੁਦਾਯਿਪ੍ਪਭੂਤਯੋਤਿ ਕਾਲ਼ੁਦਾਯਿਆਦਯੋ. ਪਰਿਵਾਰੇਹਿ ਸਦ੍ਧਿਂ ਦਸ ਦੂਤਾ ਚ ਅਞ੍ਞੇ ਚ ਬਹੂ ਜਨਾ ਸਕ੍ਯਕੁਮਾਰਾ ਨਾਮਾਤਿ ਯੋਜਨਾ. ਅਮ੍ਹੇਸੂਤਿ ਸਕ੍ਯਕੁਲਸਙ੍ਖਾਤੇਸੁ ਅਮ੍ਹੇਸੁ, ਨਿਦ੍ਧਾਰਣੇ ਭੁਮ੍ਮਂ. ਇਮਿਨਾ ਪਾਠਸੇਸਂ ਦਸ੍ਸੇਤਿ. ‘‘ਕੁਲਤੋ’’ਤਿ ਇਮਿਨਾ ‘‘ਕੁਲਾ’’ਤਿ ਏਤ੍ਥ ਨਿਸ੍ਸਕ੍ਕਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ਘਰਾਵਾਸਤ੍ਥਨ੍ਤਿ ਏਤ੍ਥ ਘਰੇ ਆਵਸਨ੍ਤਾਨਂ ਮਨੁਸ੍ਸਾਨਂ ਕਿਚ੍ਚਨ੍ਤਿ ਦਸ੍ਸੇਨ੍ਤੋ ਆਹ ‘‘ਘਰਾਵਾਸੇ ਯ’’ਨ੍ਤਿਆਦਿ. ਤਤ੍ਥ ਯਨ੍ਤਿ ਯਂਕਿਞ੍ਚਿ. ਉਦਕਂ ਨਿਨ੍ਨੇਤਬ੍ਬਨ੍ਤਿ ਏਤ੍ਥ ਉਦਕਂ ਨੀਹਰਿਤ੍ਵਾ ਨੇਤਬ੍ਬਂ ਅਪਨੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਯਥਾ ਉਦਕਂ ਸਬ੍ਬਟ੍ਠਾਨੇਸੁ ਸੁਸਂ ਹੋਤੀ’’ਤਿ. ਸੁਸਨ੍ਤਿ ਸੁਕ੍ਖਂ. ਤਿਣਾਨੀਤਿ ਸਸ੍ਸਦੂਸਕਾਨਿ ਤਿਣਾਨਿ. ‘‘ਉਦ੍ਧਰਿਤਬ੍ਬਾਨੀ’’ਤਿ ਇਮਿਨਾ ਨਿਦ੍ਧਾਪੇਤਬ੍ਬਨ੍ਤਿ ਏਤ੍ਥ ਧੁਧਾਤੁਯਾ ਪਪ੍ਫੋਟਨਧਂਸਨਤ੍ਥੇ ਦਸ੍ਸੇਤਿ. ਭੁਸਾਤਿ ਸਸ੍ਸਨਾਲ਼ਦਣ੍ਡਾ, ਤੇਹਿ ਮਿਸ੍ਸਾ ਪਲਾਲਾ ਭੁਸਿਕਾ. ਓਫੁਣਾਪੇਤਬ੍ਬਨ੍ਤਿ ਏਤ੍ਥ ਫੁਣਧਾਤੁਯਾ ਅਵਕਿਰਣਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਪਨੇਤਬ੍ਬ’’ਨ੍ਤਿ. ਤ੍ਵਞ੍ਞੇਵ ਘਰਾਵਾਸਤ੍ਥੇਨ ਉਪਜਾਨਾਤਿ ਏਤ੍ਥ ਘਰਾਵਾਸਤ੍ਥੇਨਾਤਿ ਉਪਯੋਗਤ੍ਥੇ ਕਰਣਵਚਨਂ. ਉਪਜਾਨਾਤਿ ਉਪਤ੍ਯੂਪਸਗ੍ਗੋ ਧਾਤ੍ਵਤ੍ਥਾਨੁਵਤ੍ਤਕੋ, ਹਿਵਿਭਤ੍ਤਿ ਚ ਲੋਪੋ ਹੋਤਿ, ਤੇਨ ਵੁਤ੍ਤਂ ‘‘ਤ੍ਵਞ੍ਞੇਵ ਘਰਾਵਾਸਤ੍ਥਂ ਜਾਨਾਹੀ’’ਤਿ. ਅਹਨ੍ਤਿ ਭਦ੍ਦਿਯਕੁਮਾਰਨਾਮਕੋ ਅਹਂ. ਤਯਾਤਿ ਅਨੁਰੁਦ੍ਧਕੁਮਾਰਨਾਮਕੇਨ ਤਯਾ. ‘‘ਸਦ੍ਧਿਂ ਪਬ੍ਬਜਿਸ੍ਸਾਮੀ’’ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਸੇਸਨ੍ਤਿ ‘‘ਸਦ੍ਧਿਂ ਪਬ੍ਬਜਿਸ੍ਸਾਮੀ’’ਤਿ ਵਚਨਂ.

੩੩੧. ਨਿਪ੍ਪਾਤਿਤਾਤਿ ਏਤ੍ਥ ਨਿਕ੍ਖਮਿਤ੍ਵਾ ਗਮਾਪਿਤਾਤਿ ਦਸ੍ਸੇਨ੍ਤੋ ਆਹ ‘‘ਨਿਕ੍ਖਾਮਿਤਾ’’ਤਿ. ਮਾਨਸ੍ਸਿਨੋਤਿ ਏਤ੍ਥ ਮਾਨਂ ਸਯਨ੍ਤਿ ਨਿਸ੍ਸਯਨ੍ਤੀਤਿ ਮਾਨਸ੍ਸਿਨੋਤਿ ਦਸ੍ਸੇਨ੍ਤੋ ਆਹ ‘‘ਮਾਨਸ੍ਸਯਿਨੋ’’ਤਿ.

੩੩੨. ਯਸ੍ਸਨ੍ਤਰਤੋ ਨ ਸਨ੍ਤਿ ਕੋਪਾਤਿ ਏਤ੍ਥ ਅਨ੍ਤਰਸਦ੍ਦੋ ਚਿਤ੍ਤਵਾਚਕੋ, ਤੋਪਚ੍ਚਯੋ ਚ ਸਤ੍ਤਮ੍ਯਤ੍ਥਵਾਚਕੋਤਿ ਦਸ੍ਸੇਨ੍ਤੋ ਆਹ ‘‘ਯਸ੍ਸ ਚਿਤ੍ਤੇ’’ਤਿ. ਕਸ੍ਮਾ ਕੋਪਾ ਨ ਸਨ੍ਤੀਤਿ ਆਹ ‘‘ਤਤਿਯਮਗ੍ਗੇਨ ਸਮੂਹਤਤ੍ਤਾ’’ਤਿ. ਅਨਾਗਾਮਿਮਗ੍ਗੇਨ ਦੋਸਸ੍ਸ ਸਮੂਹਤਤ੍ਤਾ ਯਸ੍ਸ ਖੀਣਾਸਵਸ੍ਸ ਚਿਤ੍ਤੇ ਕੋਪਾ ਨ ਸਨ੍ਤੀਤਿ ਅਧਿਪ੍ਪਾਯੋ. ਇਤਿ ਭਵਾਭਵਤਞ੍ਚ ਵੀਤਿਵਤ੍ਤੋਤਿ ਏਤ੍ਥ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਤਤ੍ਥ ਯਸ੍ਮਾ ਪਨ ਵੁਚ੍ਚਤਿ, ਤਸ੍ਮਾ ਏਵਮਤ੍ਥੋ ਦਟ੍ਠਬ੍ਬੋਤਿ ਯੋਜਨਾ. ਵਿਭਵੋਤਿ ਪਾਪਂ ਵੁਚ੍ਚਤੀਤਿ ਸਮ੍ਬਨ੍ਧੋ. ਨਨੁ ਪਾਲ਼ਿਯਂ ‘‘ਵਿਭਵੋ’’ਤਿ ਨਤ੍ਥਿ, ‘‘ਅਭਵੋ’’ਤਿ ਏਵ ਅਤ੍ਥਿ, ਅਥ ਕਸ੍ਮਾ ‘‘ਵਿਭਵੋਤਿ ਅਭਵੋ’’ਤਿ ਵੁਤ੍ਤਨ੍ਤਿ ਆਹ ‘‘ਵਿਭਵੋਤਿ ਚ ਅਭਵੋਤਿ ਚ ਅਤ੍ਥਤੋ ਏਕਮੇਵਾ’’ਤਿ. ਇਮਿਨਾ ਸਦ੍ਦਤੋਯੇਵ ਨਾਨਨ੍ਤਿ ਦਸ੍ਸੇਤਿ. ਯਾ ਏਸਾ ਭਵਾਭਵਤਾ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਅਨੇਕਪ੍ਪਕਾਰਾ’’ਤਿ ਇਮਿਨਾ ਇਤਿਸਦ੍ਦਸ੍ਸ ਪਕਾਰਤ੍ਥਂ ਦਸ੍ਸੇਤਿ. ਚਤੂਹਿਪਿ ਮਗ੍ਗੇਹਿ ਵੀਤਿਵਤ੍ਤੋਤਿ ਸਮ੍ਬਨ੍ਧੋ. ਤਸ੍ਸਾਤਿ ਖੀਣਾਸਵਸ੍ਸ.

੩੩੩. ਅਹਿਮੇਖਲਿਕਾਤਿ ਮੇਖਲਾ ਵਿਯ ਮੇਖਲਿਕਾ, ਅਹਿਮੇਵ ਮੇਖਲਿਕਾ ਅਹਿਮੇਖਲਿਕਾ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਹਿਂ ਕਟਿਯਂ ਬਨ੍ਧਿਤ੍ਵਾ’’ਤਿ.

੩੩੪. ਸਮ੍ਮਨ੍ਨਤੀਤਿ ਏਤ੍ਥ ‘‘ਸਮ੍ਮਾਨੇਤੀ’’ਤਿ ਚੁਰਾਦਿਗਣਿਕਧਾਤੁਵਸੇਨ ਵਤ੍ਤਬ੍ਬੇ ਦਿਵਾਦਿਗਣਿਕਧਾਤੁਵਸੇਨ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਸਮ੍ਮਾਨੇਤੀ’’ਤਿ. ਅਚਿਨ੍ਤੇਯ੍ਯੋ ਹਿ ਪਾਲ਼ਿਨਯੋ. ਸਮ੍ਮਾਨੇਤੀਤਿ ਸਮ੍ਮਾਨਂ ਕਰੋਤਿ. ਯਨ੍ਤਿ ਕਮ੍ਮਂ. ਸੋਤਿ ਸਤ੍ਥਾ. ਇਮਿਨਾ ਯਂ ਤੁਮੋਤਿ ਏਤ੍ਥ ਤੁਮੋਤਿ ਰੁਲ਼੍ਹੀਸਦ੍ਦੋ ਇਧ ‘‘ਸੋ’’ਤਿ ਸਬ੍ਬਨਾਮਸਦ੍ਦੇਨ ਸਦਿਸਤ੍ਥੋਤਿ ਦਸ੍ਸੇਤਿ.

ਪਕਾਸਨੀਯਕਮ੍ਮਾਦਿਕਥਾ

੩੩੬. ‘‘ਖੇਲ਼ਸਦਿਸਾ’’ਤਿ ਇਮਿਨਾ ਮਿਚ੍ਛਾਜੀਵੇਨ ਉਪ੍ਪਨ੍ਨਪਚ੍ਚਯਾਨਂ ਸਦਿਸੂਪਚਾਰੇਨ ਖੇਲ਼ਭਾਵਂ ਦਸ੍ਸੇਤਿ. ਤਸ੍ਮਾ ਖੇਲ਼ਾ ਵਿਯਾਤਿ ਖੇਲ਼ੋ, ਮਿਚ੍ਛਾਜੀਵਪਚ੍ਚਯਾ, ਖੇਲ਼ੇ ਅਸਤਿ ਭਕ੍ਖਤਿ ਅਜ੍ਝੋਹਰਤੀਤਿ ਖੇਲ਼ਾਸਕੋਤਿ ਵਚਨਤ੍ਥੋ ਕਾਤਬ੍ਬੋ. ਏਤਰਹਿ ਪਾਲ਼ਿਯਂ, ਅਟ੍ਠਕਥਾਯਞ੍ਚ ‘‘ਖੇਲ਼ਾਪਕਸ੍ਸਾ’’ਤਿ ਓਟ੍ਠਜੇਨ ਪਠਮਕ੍ਖਰੇਨ ਪਾਠੋ ਅਤ੍ਥਿ.

੩੪੦. ਪਤ੍ਥਦ੍ਧੇਨਾਤਿ ਏਤ੍ਥ ਭੂਸੋ ਥਦ੍ਧੋ ਪਤ੍ਥਦ੍ਧੋ, ਬਾਲ਼੍ਹਥਦ੍ਧੋਤਿ ਅਤ੍ਥੋ. ਤੇਨ ਵੁਤ੍ਤਂ ‘‘ਨਿਚ੍ਚਲੇਨਾ’’ਤਿ. ਪੋਤ੍ਥਕਰੂਪਸਦਿਸੇਨਾਤਿ ਏਤ੍ਥ ਪੋਤ੍ਥਕਰੂਪਂ ਨਾਮ ਵਤ੍ਥਦਨ੍ਤਾਦਿਮਯਂ, ਤੇਨ ਸਦਿਸੋ ਪੋਤ੍ਥਕਰੂਪਸਦਿਸੋ, ਤੇਨ.

੩੪੨. ਰਾਜਞਾਤਕਾ ਨਾਮਾਤਿ ਏਤ੍ਥ ਰਞ੍ਞਾ ਜਾਨਿਯਨ੍ਤਿ ‘‘ਅਮ੍ਹਾਕਂ ਗਰੂ’’ਤਿ ਰਾਜਞਾਤਾ, ਤੇਯੇਵ ਰਾਜਞਾਤਕਾਤਿ ਅਤ੍ਥੋ ਦਟ੍ਠਬ੍ਬੋ. ਤਦਤ੍ਥਂ ਅਧਿਪ੍ਪਾਯੇਨ ਦਸ੍ਸੇਨ੍ਤੋ ਆਹ ‘‘ਰਾਜਾ ਅਮ੍ਹੇ ਜਾਨਾਤੀ’’ਤਿਆਦਿ. ਪਹਟ੍ਠਕਣ੍ਣਵਾਲੋਤਿ ਪਹਟ੍ਠੋ ਕਣ੍ਣੋ ਚ ਵਾਲੋ ਚ ਏਤਸ੍ਸਾਤਿ ਪਹਟ੍ਠਕਣ੍ਣਵਾਲੋ. ਬਨ੍ਧਨਿਚ੍ਚਲੇਤਿ ਰਜ੍ਜੁਵਲ੍ਲੀਹਿ ਬਨ੍ਧੋ ਵਿਯ ਨਿਚ੍ਚਲੇ, ਪਹਟ੍ਠਕਣ੍ਣਵਾਲੇਤਿ ਸਮ੍ਬਨ੍ਧੋ. ‘‘ਕਤ੍ਵਾ’’ਤਿ ਇਮਿਨਾ ‘‘ਅਭਿਧਾਵੀ’’ਤਿ ਪਦੇ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ.

ਦੁਕ੍ਖਞ੍ਹਿ ਕੁਞ੍ਜਰ ਨਾਗਮਾਸਦੋਤਿ ਏਤ੍ਥ ਕੁਞ੍ਜਰਸਦ੍ਦਸ੍ਸ ਆਮਨ੍ਤਨਪਦਭਾਵਂ ਆਵਿਕਰੋਨ੍ਤੋ ਆਹ ‘‘ਭੋ ਕੁਞ੍ਜਰਾ’’ਤਿ. ਨਾਗਸਦ੍ਦਸ੍ਸ ਅਹਿਨਾਗਹਤ੍ਥਿਨਾਗੇਸੁ ਪਵਤ੍ਤਨਤੋ ਵੁਤ੍ਤਂ ‘‘ਬੁਦ੍ਧਨਾਗ’’ਨ੍ਤਿ. ਆਸਦੋਤਿ ਪਦਸ੍ਸ ਆਕੋਧੇਨ ਸਦਨਂ ਉਪਗਮਨਂ ਆਸਦੋਤਿ ਦਸ੍ਸੇਨ੍ਤੋ ਆਹ ‘‘ਵਧਕਚਿਤ੍ਤੇਨ ਉਪਗਮਨਂ ਨਾਮਾ’’ਤਿ. ਦੁਕ੍ਖਨ੍ਤਿ ਏਤਰਹਿ ਚ ਆਯਤਿਞ੍ਚ ਦੁਕ੍ਖਕਾਰਣਂ. ਦੁਕ੍ਖਂ ਹੀਤਿ ਹਿਸਦ੍ਦੋ ਪਦਪੂਰਣਮਤ੍ਤਂ, ਅਥ ਵਾ ਦੁਕ੍ਖਮੇਵਾਤਿ ਅਤ੍ਥੋ. ‘‘ਬੁਦ੍ਧਨਾਗਂ ਘਾਤਕਸ੍ਸਾ’’ਤਿ ਇਮਿਨਾ ਨਾਗਂ ਹਨਤੀਤਿ ਨਾਗਹਤੋਤਿ ਵਚਨਤ੍ਥਂ ਦਸ੍ਸੇਤਿ.

ਪਟਿਕੁਟਿਯੋਵ ਓਸਕ੍ਕੀਤਿ ਏਤ੍ਥ ਤਥਾਗਤਸ੍ਸ ਪਟਿਮੁਖਂ ਕੁਟੇਨ ਗਮਨਮੇਤਸ੍ਸਾਤਿ ਪਟਿਕੁਟਿਯੋ, ਪਟਿਕੁਟਿਯੋ ਏਵ ਹੁਤ੍ਵਾ ਓਸਕ੍ਕੀਤਿ ਦਸ੍ਸੇਨ੍ਤੋ ਆਹ ‘‘ਤਥਾਗਤਾਭਿਮੁਖੋਯੇਵ ਪਿਟ੍ਠਿਮੇਹਿ ਪਾਦੇਹਿ ਓਸਕ੍ਕੀ’’ਤਿ. ‘‘ਨ ਜਾਨਾਤੀ’’ਤਿ ਇਮਿਨਾ ਲਕ੍ਖ ਦਸ੍ਸਨਙ੍ਕੇਸੂਤਿ ਧਾਤੁਪਾਠੇਸੁ (ਪਾਣਿਨੀ ੧੫੩੯ ਸਦ੍ਦਨੀਤਿਧਾਤੁਮਾਲਾਯਂ ੧੮ ਦਕਾਰਨ੍ਤਧਾਤੁ) ਵੁਤ੍ਤੇਸੁ ਅਤ੍ਥੇਸੁ ਇਧ ਦਸ੍ਸਨਤ੍ਥੋਤਿ ਦਸ੍ਸੇਤਿ. ਨ ਲਕ੍ਖਿਤਬ੍ਬੋਤਿ ਅਞ੍ਞੇਹਿ ਸਪ੍ਪੁਰਿਸੇਹਿ ਨ ਲਕ੍ਖਿਤਬ੍ਬੋਤਿ ਅਤ੍ਥੋ. ਏਤ੍ਥ ਣ੍ਯਪਚ੍ਚਯੋ ਕਤ੍ਤੁਕਮ੍ਮੇਸੁ ਹੋਤਿ, ਯਕਾਰਸ੍ਸ ਕਕਾਰਂ ਕਤ੍ਵਾ ਅਲਕ੍ਖਿਕੋਤਿ ਵੁਤ੍ਤਂ.

੩੪੩. ‘‘ਭੁਞ੍ਜਿਤਬ੍ਬਭੋਜਨ’’ਨ੍ਤਿ ਇਮਿਨਾ ਤਿਕਭੋਜਨਨ੍ਤਿ ਏਤ੍ਥ ਯੁਪਚ੍ਚਯਸ੍ਸ ਕਮ੍ਮਤ੍ਥਭਾਵਂ ਦਸ੍ਸੇਤਿ. ਤਨ੍ਤਿ ਤਿਕਭੋਜਨਂ. ਯਥਾਧਮ੍ਮੋਤਿ ‘‘ਗਣਭੋਜਨੇ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੦੯) ਵੁਤ੍ਤਾਯ ਮਾਤਿਕਾਵਿਭਙ੍ਗਪਾਲ਼ਿਯਾ ਅਨੁਰੂਪਂ. ਪਞ੍ਚਵਤ੍ਥੁਯਾਚਨਕਥਾਤਿ ਪਞ੍ਚ ਵਤ੍ਥੂਨਿ ਯਾਚਨਸ੍ਸ ਕਥਾ. ਆਯੁਕਪ੍ਪਨ੍ਤਿ ਅਵੀਚਿਮਹਾਨਿਰਯੇ ਆਯੁਕਪ੍ਪਂ ਸਨ੍ਧਾਯ ਵੁਤ੍ਤਂ. ਅਵੀਚਿਮਹਾਨਿਰਯੇ ਆਯੁਕਪ੍ਪੋ ਨਾਮ ਏਕੋ ਅਨ੍ਤਰਕਪ੍ਪੋਤਿ ਜਿਨਾਲਙ੍ਕਾਰਟੀਕਾਦੀਸੁ (ਮਿ. ਪ. ੪.੧.੩; ਕਥਾ. ਅਟ੍ਠ. ੬੫੪-੬੫੭; ਇਤਿਵੁ. ਅਟ੍ਠ. ੧੮; ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੩੪੩; ਅ. ਨਿ. ਟੀ. ੩.੬੬੨) ਵੁਤ੍ਤੋ. ‘‘ਏਕੋ ਅਸਙ੍ਖ੍ਯੇਯ੍ਯਕਪ੍ਪੋ’’ਤਿ ਸਮ੍ਮੋਹਵਿਨੋਦਨਾਦੀਸੁ (ਵਿਭ. ਅਟ੍ਠ. ੮੦੯; ਮ. ਨਿ. ਅਟ੍ਠ. ੩.੧੨੮; ਵਿ. ਵਿ. ਟੀ. ੧.੪੧੦; ਵਜਿਰ. ਟੀ. ਪਾਰਾਜਿਕਣ੍ਡ ੪੧੦) ਵੁਤ੍ਤੋ. ਸੇਟ੍ਠਂ ਪੁਞ੍ਞਨ੍ਤਿ ਮਹਨ੍ਤਂ ਪੁਞ੍ਞਂ. ਇਮਿਨਾ ਬ੍ਰਹਂ ਪੁਞ੍ਞਨ੍ਤਿ ਬ੍ਰਹਸਦ੍ਦੋ ਮਹਨ੍ਤਤ੍ਥੋਤਿ ਦਸ੍ਸੇਤਿ. ਬ੍ਰਹ ਵੁਦ੍ਧਿਯਨ੍ਤਿ ਧਾਤੁਪਾਠੇਸੁ (ਪਾਣਿਨੀ ੭੩੫; ਸਦ੍ਦਨੀਤਿਧਾਤੁਮਾਲਾਯਂ ੧੬ ਹਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਬ੍ਰਹਸਦ੍ਦੋ ਮਹਨ੍ਤਵਾਚਕੋ ਹੋਤਿ. ਬ੍ਰਹਧਾਤੁਤੋ ਅਪਚ੍ਚਯਂ ਕਤ੍ਵਾ ‘‘ਬ੍ਰਹਾ’’ਤਿਪਿ, ਮਪਚ੍ਚਯਂ ਕਤ੍ਵਾ ‘‘ਬ੍ਰਹ੍ਮਾ’’ਤਿਪਿ ਪਾਠੋ ਅਤ੍ਥਿ. ਆਯੁਕਪ੍ਪਮੇਵਾਤਿ ਸਗ੍ਗੇਸੁ ਆਯੁਕਪ੍ਪਮੇਵ.

ਸਙ੍ਘਭੇਦਕਥਾ

੩੪੪. ਸੋਤਿ ਦੇਵਦਤ੍ਤੋ, ਗਤੋ ਕਿਰਾਤਿ ਸਮ੍ਬਨ੍ਧੋ. ਤਤ੍ਥੇਵਾਤਿ ਵਿਹਾਰਸੀਮਾਯਮੇਵ. ਆਵੇਣਿਕਨ੍ਤਿ ਭਿਕ੍ਖੁਸਙ੍ਘਤੋ ਆਵੇਣਿਕਂ.

੩੪੫. ਆਗਿਲਾਯਤੀਤਿ ਏਤ੍ਥ ਆਤ੍ਯੂਪਸਗ੍ਗੋ ਅਭਿਭਵਨਤ੍ਥੋ, ਗਿਲੇਧਾਤੁ ਬਾਧਨਤ੍ਥੋਤਿ ਆਹ ‘‘ਵੇਦਨਾਭਿਭੂਤਾ ਬਾਧਤੀ’’ਤਿ. ਤਨ੍ਤਿ ਪਿਟ੍ਠਿਂ. ਪਰਸ੍ਸ ਚਿਤ੍ਤਂ ਆਦਿਸਿਤ੍ਵਾ ਦੇਸਯਤਿ ਏਤਾਯਾਤਿ ਆਦੇਸਨਾ, ਸਾ ਏਵ ਪਾਟਿਹਾਰਿਯਂ ਆਦੇਸਨਾਪਾਟਿਹਾਰਿਯਂ. ਅਨੁਸਾਸਤਿ ਏਤਾਯਾਤਿ ਅਨੁਸਾਸਨੀ, ਇਮਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਏਵਮ੍ਪਿ ਤੇ’’ਤਿਆਦਿ.

੩੪੬. ਮਮਾਨੁਕ੍ਰੁਬ੍ਬਨ੍ਤਿ ਏਤ੍ਥ ਅਨੁਤ੍ਯੂਪਸਗ੍ਗੋ ਅਨੁਕਿਰਿਯਤ੍ਥੋ ਕਰਧਾਤੁ ਅਨ੍ਤਪਚ੍ਚਯੋ ਗਚ੍ਛਨ੍ਤਾਦਿਗਣੋਤਿ ਦਸ੍ਸੇਨ੍ਤੋ ਆਹ ‘‘ਮਮਾਨੁਕਿਰਿਯਂ ਕੁਰੁਮਾਨੋ’’ਤਿ. ‘‘ਦੁਕ੍ਖਿਤੋ’’ਤਿ ਇਮਿਨਾ ਕਪਣੋਤਿ ਏਤ੍ਥ ਕਪਧਾਤੁ ਹਿਂਸਨਤ੍ਥੋਤਿ ਦਸ੍ਸੇਤਿ. ਮਹਾਵਰਾਹਸ੍ਸਾਤਿ ਵਰਾਹਸਦ੍ਦਸ੍ਸ ਸੂਕਰਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਮਹਾਨਾਗਸ੍ਸਾ’’ਤਿ. ‘‘ਪਥਵਿ’’ਨ੍ਤਿ ਇਮਿਨਾ ਮਹਿਂ ਵਿਕੁਬ੍ਬਤੋਤਿ ਏਤ੍ਥ ਮਹੀਸਦ੍ਦਸ੍ਸ ਏਵਂਨਾਮਕਂ ਮਹਾਨਦਿਂ ਪਟਿਕ੍ਖਿਪਤਿ. ‘‘ਪਦਾਲੇਨ੍ਤਸ੍ਸਾ’’ਤਿ ਇਮਿਨਾ ਕਰਧਾਤੁਯਾ ਵਿਤ੍ਯੂਪਸਗ੍ਗਵਸੇਨ ਪਦਾਲਨਤ੍ਥਂ ਦਸ੍ਸੇਤਿ. ਭਿਸਂ ਘਸਮਾਨਸ੍ਸਾਤਿ ਏਤ੍ਥ ਮਾਨਸਦ੍ਦੋ ਕਤ੍ਵਤ੍ਥੋਤਿ ਆਹ ‘‘ਭਿਸਂ ਘਸਨ੍ਤਸ੍ਸਾ’’ਤਿ. ਘਸਨ੍ਤਸ੍ਸਾਤਿ ਭਕ੍ਖਨ੍ਤਸ੍ਸ. ਨਦੀਨਾਮਕਂ ਤਂ ਪੋਕ੍ਖਰਣਿਨ੍ਤਿ ਯੋਜਨਾ. ਇਮਿਨਾ ਨਦੀਸੁ ਜਗ੍ਗਤੋਤਿ ਏਤ੍ਥ ਨਦੀ ਨਾਮ ਪੋਕ੍ਖਰਣੀਤਿ ਦਸ੍ਸੇਤਿ. ਜਗ੍ਗਤੋਤਿ ਹਤ੍ਥਿਯੂਥਂ ਪਾਲੇਨ੍ਤਸ੍ਸ.

੩੪੭. ‘‘ਸੁਤਾਤਿ ਸੋਤਾ’’ਤਿ ਇਮਿਨਾ ਪਾਲ਼ਿਯਾ ਦ੍ਵਿਧਾਭਾਵਂ ਦਸ੍ਸੇਤਿ. ‘‘ਨਿਸ੍ਸਨ੍ਦੇਹੋ’’ਤਿ ਇਮਿਨਾ ਅਸਨ੍ਦਿਦ੍ਧੋਤਿ ਏਤ੍ਥ ਦਿਹਧਾਤੁਂ ਦਸ੍ਸੇਤਿ, ਦਿਸਧਾਤੁਂ ਨਿਵਤ੍ਤੇਤਿ.

੩੫੦. ਬੁਦ੍ਧਸਹਸ੍ਸੇਨਪੀਤਿ ਪਿਸਦ੍ਦੋ ਗਰਹਤ੍ਥੋ, ਪਗੇਵ ਏਕੇਨ ਬੁਦ੍ਧੇਨਾਤਿ ਦਸ੍ਸੇਤਿ.

‘‘ਸਤ੍ਤੋ’’ਤਿ ਇਮਿਨਾ ਕੋਚਿਸਦ੍ਦਸ੍ਸ ਪਧਾਨਪਦਂ ਦਸ੍ਸੇਤਿ. ਅਟ੍ਠਾਤਿ ਆਖ੍ਯਾਤਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਠਿਤੋ’’ਤਿ. ਦੇਵਦਤ੍ਤੋਤਿ ਮੇ ਸੁਤਨ੍ਤਿ ਏਤ੍ਥ ‘‘ਮੇ’’ਤਿ ਪਦਂ ਭਗਵਨ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਭਗਵਤਾ’’ਤਿ. ਤਦੇਵਾਤਿ ਸੁਤਮੇਵ. ਇਦਨ੍ਤਿ ‘‘ਦੇਵਦਤ੍ਤੋਤਿ ਮੇ ਸੁਤ’’ਨ੍ਤਿ ਵਚਨਂ. ਅਨੁਚਿਨਾਤੀਤਿ ਅਨੁਵਡ੍ਢੇਤਿ. ‘‘ਪਤ੍ਵਾ’’ਤਿ ਇਮਿਨਾ ਆਸਜ੍ਜਨਨ੍ਤਿ ਏਤ੍ਥ ਸਦਧਾਤੁਯਾ ਗਤ੍ਯਤ੍ਥਂ, ਕਿਰਿਯਾਵਿਸੇਸਨਞ੍ਚ ਦਸ੍ਸੇਤਿ. ਅਵੀਚਿਨਿਰਯਂ ਪਤ੍ਤੋਤਿ ਏਤ੍ਥ ਇਦਾਨਿ ਨ ਦੇਵਦਤ੍ਤੋ ਅਵੀਚਿਨਿਰਯਂ ਪਤ੍ਤੋ ਹੋਤਿ, ਆਯਤਿਂ ਪਨ ਅਵੀਚਿਨਿਰਯੇ ਅਵਸ੍ਸਮ੍ਭਾਵਿਯਤ੍ਤਾ ‘‘ਅਵੀਚਿਨਿਰਯਂ ਪਤ੍ਤੋ’’ਤਿ ਵੁਤ੍ਤਨ੍ਤਿ ਆਹ ‘‘ਆਸਂਸਾਯਂ ਅਤੀਤਵਚਨ’’ਨ੍ਤਿ. ਆਸਂਸਾਯਨ੍ਤਿ ਅਵਸ੍ਸਮ੍ਭਾਵਿਯਤ੍ਥੇ. ਭੇਸ੍ਮਾ ਹਿ ਉਦਧੀ ਮਹਾਤਿ ਏਤ੍ਥ ਭੇਸ੍ਮਾਸਦ੍ਦੋ ਭਯਾਨਕਪਰਿਯਾਯੋਤਿ ਆਹ ‘‘ਭਯਾਨਕੋ’’ਤਿ.

ਉਪਾਲਿਪਞ੍ਹਾਕਥਾ

੩੫੧. ਏਕਤੋਤਿ ਏਤ੍ਥ ਤੋਪਚ੍ਚਯਸ੍ਸ ਸਤ੍ਤਮ੍ਯਤ੍ਥੇ ਪਵਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਧਮ੍ਮਵਾਦੀਪਕ੍ਖੇ’’ਤਿ. ‘‘ਅਨੁਨਯਨ੍ਤੋ’’ਤਿ ਇਮਿਨਾ ਅਨੁਸ੍ਸਾਵੇਤੀਤਿ ਏਤ੍ਥ ਅਨੁਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ਅਨੁਨਯਨ੍ਤੋਤਿ ਪੁਨਪ੍ਪੁਨਂ ਨਯਨ੍ਤੋ. ਸਾਵਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਨ ਤੁਮ੍ਹਾਕਂਯੇਵਾ’’ਤਿਆਦਿ. ਅਯਂ ਅਧਮ੍ਮੋ ਵਾ ਅਯਂ ਅਵਿਨਯੋ ਵਾ ਇਦਂ ਅਸਤ੍ਥੁਸਾਸਨਂ ਵਾ ਯਦਿ ਭਵੇਯ੍ਯਾਤਿ ਯੋਜਨਾ. ‘‘ਬੋਧੇਤੀ’’ਤਿ ਇਮਿਨਾ ਸਾਵੇਤੀਤਿ ਏਤ੍ਥ ਸੁਧਾਤੁਯਾ ਅਤ੍ਥਂ ਦਸ੍ਸੇਤਿ. ‘‘ਅਨੁਸ੍ਸਾਵੇਤ੍ਵਾ’’ਤਿ ਇਮਿਨਾ ‘‘ਅਨੁਸ੍ਸਾਵੇਤਿ, ਸਲਾਕਂ ਗਾਹੇਤੀ’’ਤਿ ਏਤ੍ਥ ਅਨੁਸ੍ਸਾਵਨਕਿਰਿਯਾ ਪੁਬ੍ਬਭਾਗੇ ਪਵਤ੍ਤਾ, ਸਲਾਕਗ੍ਗਾਹਕਿਰਿਯਾ ਪਚ੍ਛਾਭਾਗੇਤਿ ਦਸ੍ਸੇਤਿ.

ਏਤ੍ਤਾਵਤਾਤਿ ਏਤ੍ਤਕੇਨ ਅਨੁਸ੍ਸਾਵਨਸਲਾਕਗ੍ਗਾਹਮਤ੍ਤੇਨ. ਨ ਪਨ ਸਙ੍ਘੋ ਭਿਨ੍ਨੋ ਹੋਤਿ, ਅਨੁਸ੍ਸਾਵੇਤ੍ਵਾ ਸਲਾਕਂ ਗਾਹੇਤ੍ਵਾ ਆਵੇਣਿਕਂ ਸਙ੍ਘਕਮ੍ਮੇ ਕਤੇਯੇਵ ਸਙ੍ਘੋ ਭਿਨ੍ਨੋ ਹੋਤੀਤਿ ਅਧਿਪ੍ਪਾਯੋ.

ਏਤ੍ਥ ਠਤ੍ਵਾ ਕਸ੍ਸਚਿ ਚੋਦਕਸ੍ਸ ਅਨੁਯੋਗੋ ਸਿਯਾਤਿ ਯੋਜਨਾ. ਕਿਨ੍ਤਿ ਸਿਯਾਤਿ ਆਹ ‘‘ਏਵਂ ਦੇਵਦਤ੍ਤੋ’’ਤਿਆਦਿ. ਤਤ੍ਥ ਏਵਨ੍ਤਿ ਪਕਤਤ੍ਤੇ ਸਙ੍ਘੇ ਭਿਨ੍ਦੇ ਸਤੀਤਿ ਅਤ੍ਥੋ. ਕਥਨ੍ਤਿ ਕੇਨਾਕਾਰੇਨ. ਪੁਨ ਕਥਨ੍ਤਿ ਕਸ੍ਮਾ ਕਾਰਣਾ. ਰਞ੍ਞੋਤਿ ਅਜਾਤਸਤ੍ਤੁਰਞ੍ਞੋ, ਕਾਰਿਤਕਮ੍ਮਂ. ‘‘ਘਾਤਾਪਿਤਤ੍ਤਾ’’ਤਿ ਬਿਮ੍ਬਿਸਾਰਰਾਜਾਨਂ ਘਾਤਾਪਿਤਤ੍ਤਾ. ਤਤ੍ਥਾਤਿ ‘‘ਭਿਕ੍ਖੁ ਖੋ ਉਪਾਲੀ’’ਤਿਆਦਿਵਚਨੇ, ਠਤ੍ਵਾ ਪਰਿਹਾਰਂ ਵਦਾਮਾਤਿ ਯੋਜਨਾ. ਵਿਰਦ੍ਧਤ੍ਤਾਤਿ ਵਿਰਾਧਿਤਤ੍ਤਾ. ਤਮਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਤੇਨ ਹੀ’’ਤਿਆਦਿ. ਤਤ੍ਥ ਤੇਨ ਹੀਤਿ ਉਯ੍ਯੋਜਨਤ੍ਥੇ ਨਿਪਾਤੋ. ਏਵਞ੍ਹੀਤਿ ਏਵਮੇਵ. ਤਸ੍ਸਾਤਿ ਦੇਵਦਤ੍ਤਸ੍ਸ. ਕੁਮਾਰੋ ਪਨਾਤਿ ਅਜਾਤਸਤ੍ਤੁਕੁਮਾਰੋ ਪਨ, ਕਤਮਤ੍ਤੇਯੇਵ ਨ ਵੁਤ੍ਤਾਤਿ ਸਮ੍ਬਨ੍ਧੋ. ਤਸ੍ਸਾਤਿ ਦੇਵਦਤ੍ਤਸ੍ਸ. ਤਸ੍ਮਾਤਿ ਯਸ੍ਮਾ ਸਙ੍ਘਭੇਦਤੋ ਪੁਬ੍ਬੇ ਰੁਹਿਤੁਪ੍ਪਾਦਕਮ੍ਮਂ ਕਰੋਨ੍ਤਸ੍ਸਾਪਿ ਪਚ੍ਛਾ ਅਭਬ੍ਬਭਾਵੋ ਰੋਪਿਤੋ, ਤਸ੍ਮਾ.

ਭੇਦਕਰਵਤ੍ਥੂਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਧਮ੍ਮਾਧਮ੍ਮਾਦੀਨਂ ਸੁਤ੍ਤਨ੍ਤਵਿਨਯਪਰਿਯਾਯੇਨ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਸੁਤ੍ਤਨ੍ਤਪਰਿਯਾਯੇਨਾ’’ਤਿਆਦਿ. ਤਤ੍ਥ ਸੁਤ੍ਤਨ੍ਤਪਰਿਯਾਯੇਨਾਤਿ ਸੁਤ੍ਤਨ੍ਤਦੇਸਨਾਯ, ਸੁਤ੍ਤਨ੍ਤਦੇਸਨਾਨਯਤੋਤਿ ਵੁਤ੍ਤਂ ਹੋਤਿ. ਤਥਾਤਿ ਤਤੋ ਅਞ੍ਞਥਾ.

ਤਤ੍ਥਾਤਿ ਦ੍ਵੀਸੁ ਧਮ੍ਮਾਧਮ੍ਮੇਸੁ. ਏਵਂ ਅਮ੍ਹਾਕਨ੍ਤਿ ਏਵਂ ਕਰਿਯਮਾਨੇ ਅਮ੍ਹਾਕਂ. ਏਵਂ ਸੁਤ੍ਤਨ੍ਤਪਰਿਯਾਯੇਨ ਧਮ੍ਮਾਧਮ੍ਮਾਨਂ ਵਿਸੇਸਂ ਦਸ੍ਸੇਤ੍ਵਾ ਇਦਾਨਿ ਵਿਨਯਪਰਿਯਾਯੇਨ ਤੇਸਂ ਤਂ ਦਸ੍ਸੇਨ੍ਤੋ ਆਹ ‘‘ਵਿਨਯਪਰਿਯਾਯੇਨ ਪਨਾ’’ਤਿਆਦਿ. ਭੂਤੇਨ ਵਤ੍ਥੁਨਾ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਏਵਂ ‘‘ਅਭੂਤੇਨ ਵਤ੍ਥੁਨਾ’’ਤਿ ਏਤ੍ਥਾਪਿ.

ਏਵਂ ਦ੍ਵਿਨ੍ਨਂ ਪਰਿਯਾਯਾਨਂ ਵਸੇਨ ਧਮ੍ਮਾਧਮ੍ਮਦੁਕਸ੍ਸ ਵਿਸੇਸਂ ਦਸ੍ਸੇਤ੍ਵਾ ਇਦਾਨਿ ਵਿਨਯਾਵਿਨਯਦੁਕਸ੍ਸ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਸੁਤ੍ਤਨ੍ਤਪਰਿਯਾਯੇਨਾ’’ਤਿਆਦਿ. ਤਤ੍ਥ ਸੁਤ੍ਤਨ੍ਤਨਯੇਨ ਰਾਗਾਦਯੋ ਵਿਨੇਤੀਤਿ ਵਿਨਯੋ, ਵਿਨਯਨਯੇਨ ਕਾਯਂ ਵਾਚਂ ਵਿਨੇਤੀਤਿ ਵਿਨਯੋਤਿ ਵਚਨਤ੍ਥੋ ਕਾਤਬ੍ਬੋ.

ਏਵਂ ਦ੍ਵਿਨ੍ਨਂ ਪਰਿਯਾਯਾਨਂ ਵਸੇਨ ਵਿਨਯਾਵਿਨਯਦੁਕਸ੍ਸ ਵਿਸੇਸਂ ਦਸ੍ਸੇਤ੍ਵਾ ਇਦਾਨਿ ਭਾਸਿਤਾਭਾਸਿਤਦੁਕਸ੍ਸ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਸੁਤ੍ਤਨ੍ਤਪਰਿਯਾਯੇਨ ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿ. ਤਤ੍ਥ ‘‘ਅਟ੍ਠਙ੍ਗਿਕੋ ਮਗ੍ਗੋ’’ਤਿ ਇਦਂ ਵਚਨਂ ਤਥਾਗਤੇਨ ਭਾਸਿਤਂ ਲਪਿਤਨ੍ਤਿ ਯੋਜਨਾ.

ਏਵਂ ਦ੍ਵਿਨ੍ਨਂ ਪਰਿਯਾਯਾਨਂ ਵਸੇਨ ਭਾਸਿਤਾਭਾਸਿਤਦੁਕਸ੍ਸ ਵਿਸੇਸਂ ਦਸ੍ਸੇਤ੍ਵਾ ਇਦਾਨਿ ਆਚਿਣ੍ਣਾਨਾਚਿਣ੍ਣਦੁਕਸ੍ਸ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਸੁਤ੍ਤਨ੍ਤਪਰਿਯਾਯੇਨ ਦੇਵਸਿਕ’’ਨ੍ਤਿਆਦਿ. ਤਤ੍ਥ ‘‘ਦੇਵਸਿਕ’’ਨ੍ਤਿ ਪਦਂ ‘‘ਸਮਾਪਜ੍ਜਨਂ, ਵੋਲੋਕਨ’’ਨ੍ਤਿ ਤੀਸੁਯੇਵ ਪਦੇਸੁ ਯੋਜੇਤਬ੍ਬਂ. ਅਟ੍ਠੁਪ੍ਪਤ੍ਤਿਵਸੇਨਾਤਿ ਕਾਰਣੁਪ੍ਪਤ੍ਤਿਵਸੇਨ. ਕਾਰਣਞ੍ਹਿ ਅਰਤਿ ਫਲਂ ਏਤਸ੍ਮਾਤਿ ਅਤ੍ਥੋਤਿ ਵੁਚ੍ਚਤਿ, ਅਤ੍ਥਸ੍ਸ ਉਪ੍ਪਤ੍ਤਿ ਅਤ੍ਥੁਪ੍ਪਤ੍ਤਿ, ਸਾਯੇਵ ਅਟ੍ਠੁਪ੍ਪਤ੍ਤਿ ਤ੍ਥਕਾਰਸ੍ਸ ਟ੍ਠਕਾਰਂ ਕਤ੍ਵਾ, ਅਟ੍ਠੁਪ੍ਪਤ੍ਤਿਯਾ ਵਸੋ ਅਟ੍ਠੁਪ੍ਪਤ੍ਤਿਵਸੋ, ਤੇਨ. ਇਦਂ ਪਦਂ ‘‘ਸੁਤ੍ਤਨ੍ਤਦੇਸਨਾ ਜਾਤਕਕਥਾ’’ਤਿ ਦ੍ਵੀਹਿਪਿ ਪਦੇਹਿ ਯੋਜੇਤਬ੍ਬਂ. ਇਦਨ੍ਤਿ ਫਲਸਮਾਪਤ੍ਤਿਸਮਾਪਜ੍ਜਨਾਦਿ. ਆਚਿਣ੍ਣਨ੍ਤਿ ਆ ਬਨ੍ਧਿਤਂ, ਪੁਨਪ੍ਪੁਨਂ ਵਾ ਉਪਚਿਤਂ ਵਡ੍ਢਿਤਂ, ਪਗੁਣਂ ਵਾ. ਚਾਰਿਯਪਕ੍ਕਮਨਨ੍ਤਿ ਚਾਰਿਯਤ੍ਥਂ ਪਕ੍ਕਮਨਂ.

ਏਵਂ ਦ੍ਵਿਨ੍ਨਂ ਪਰਿਯਾਯਾਨਂ ਵਸੇਨ ਆਚਿਣ੍ਣਾਨਾਚਿਣ੍ਣਦੁਕਸ੍ਸ ਵਿਸੇਸਂ ਦਸ੍ਸੇਤ੍ਵਾ ਇਦਾਨਿ ਪਞ੍ਞਤ੍ਤਦੁਕਸ੍ਸ ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਸੁਤ੍ਤਨ੍ਤਪਰਿਯਾਯੇਨ ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿ. ਤਂ ਭਾਸਿਤਾਭਾਸਿਤਦੁਕਸਦਿਸਮੇਵ. ਏਵਂ ਦ੍ਵਿਨ੍ਨਂ ਸੁਤ੍ਤਨ੍ਤਵਿਨਯਪਰਿਯਾਯਾਨਂ ਵਸੇਨ ਪਞ੍ਚਨ੍ਨਂ ਦੁਕਾਨਂ ਵਿਸੇਸੋ ਦਸ੍ਸਿਤੋ.

ਆਪਤ੍ਤਾਨਾਪਤ੍ਤਿਦੁਕੇ ‘‘ਨ ਮੋਚਨਾਧਿਪ੍ਪਾਯਸ੍ਸਾ’’ਤਿ ਪਾਠਸ੍ਸ ਅਨਨ੍ਤਰੇ ਪਚ੍ਛਿਮਵਾਕ੍ਯੇ ਠਿਤੋ ਆਦਿਸਦ੍ਦੋ ਆਨੇਤਬ੍ਬੋ. ਇਤਿ ਆਦਿਨਾ ਨਯੇਨਾਤਿ ਹਿ ਅਤ੍ਥੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਸਿਕ੍ਖਾਪਦੇ. ਇਦਂ ਪਦਂ ਪਚ੍ਛਿਮਵਾਕ੍ਯੇਪਿ ਅਨੁਵਤ੍ਤੇਤਬ੍ਬਂ.

ਲਹੁਕਗਰੁਕਦੁਕੇ ਪਞ੍ਚਾਪਤ੍ਤਿਕ੍ਖਨ੍ਧਾਤਿ ਥੁਲ੍ਲਚ੍ਚਯਪਾਚਿਤ੍ਤਿਯਪਾਟਿਦੇਸਨੀਯਦੁਕ੍ਕਟਦੁਬ੍ਭਾਸਿਤਵਸੇਨ ਪਞ੍ਚ ਆਪਤ੍ਤਿਰਾਸਯੋ. ਦ੍ਵੇ ਆਪਤ੍ਤਿਕ੍ਖਨ੍ਧਾਤਿ ਪਾਰਾਜਿਕਸਙ੍ਘਾਦਿਸੇਸਵਸੇਨ ਦ੍ਵੇ ਆਪਤ੍ਤਿਰਾਸਯੋ.

ਸਾਵਸੇਸਾਨਾਵਸੇਸਦੁਕੇ ਛ ਆਪਤ੍ਤਿਕ੍ਖਨ੍ਧਾਤਿ ਪਾਰਾਜਿਕਾਪਤ੍ਤਿਤੋ ਅਵਸੇਸਾ ਛ ਆਪਤ੍ਤਿਰਾਸਯੋ.

ਦੁਟ੍ਠੁਲ੍ਲਾਦੁਟ੍ਠੁਲ੍ਲਦੁਕੇ ਲਹੁਕਗਰੁਕਦੁਕਸਦਿਸਮੇਵ. ਅਯਂ ਪਨ ਵਿਸੇਸੋ – ਗਰੁਕਾਪਤ੍ਤਿ ਦੁਟ੍ਠੁਲ੍ਲਾ ਨਾਮ, ਲਹੁਕਾਪਤ੍ਤਿ ਅਦੁਟ੍ਠੁਲ੍ਲਾ ਨਾਮਾਤਿ ਏਵਂ ਵਿਨਯਪਰਿਯਾਯਵਸੇਨੇਵ ਚਤੁਨ੍ਨਂ ਦੁਕਾਨਂ ਵਿਸੇਸੋ ਦਸ੍ਸਿਤੋ.

ਏਤ੍ਥਾਤਿ ‘‘ਅਧਮ੍ਮਂ ਧਮ੍ਮੋਤਿ ਦੀਪੇਨ੍ਤੀ’’ਤਿਆਦਿਵਚਨੇ. ਚਤੁਨ੍ਨਂ ਸਙ੍ਘਕਮ੍ਮਾਨਨ੍ਤਿ ਅਪਲੋਕਨਾਦਿਵਸੇਨ ਚਤੁਨ੍ਨਂ ਸਙ੍ਘਕਮ੍ਮਾਨਂ. ਕਰੋਨ੍ਤੇਹਿ ਹੇਤੁਭੂਤੇਹਿ, ਹੇਤ੍ਵਤ੍ਥੇ ਚੇਤਂ ਕਰਣਵਚਨਂ.

ਤਤ੍ਥਾਤਿ ‘‘ਤੇ ਇਮੇਹੀ’’ਤਿਆਦਿਵਚਨੇ. ਅਪਕਸ੍ਸਨ੍ਤੀਤਿ ਏਤ੍ਥ ਕਸਧਾਤੁਸ੍ਸ ਗਤ੍ਯਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਰਿਸਂ ਆਕਡ੍ਢਨ੍ਤੀ’’ਤਿ. ਵਿਜਟੇਨ੍ਤੀਤਿ ਵਿਜਟਂ ਕਰੋਨ੍ਤਿ, ਵਿਸੁਂ ਕਰੋਨ੍ਤੀਤਿ ਅਤ੍ਥੋ. ਏਕਮਨ੍ਤਂ ਉਸ੍ਸਾਦੇਨ੍ਤੀਤਿ ਏਕਸ੍ਮਿਂ ਅਨ੍ਤੇ ਉਸ੍ਸਦਂ ਕਰੋਨ੍ਤਿ. ਅਵਪਕਸ੍ਸਨ੍ਤੀਤਿ ਏਤ੍ਥ ਦ੍ਵਿਨ੍ਨਂ ਉਪਸਗ੍ਗਾਨਂ ਵਸੇਨ ਅਤਿਵਿਯਤ੍ਥੋ ਦਟ੍ਠਬ੍ਬੋਤਿ ਆਹ ‘‘ਅਤਿ ਵਿਯ ਆਕਡ੍ਢਨ੍ਤੀ’’ਤਿ. ਅਤਿਵਿਯਤ੍ਥਂ ਆਵਿਕਰੋਨ੍ਤੋ ਆਹ ‘‘ਯਥਾ ਵਿਸਂਸਟ੍ਠਾਵ ਹੋਨ੍ਤਿ, ਏਵਂ ਕਰੋਨ੍ਤੀ’’ਤਿ. ਯਥਾਤਿ ਯੇਨਾਕਾਰੇਨ ਕਰਿਯਮਾਨੇਤਿ ਸਮ੍ਬਨ੍ਧੋ. ‘‘ਵਿਸੁ’’ਨ੍ਤਿ ਇਮਿਨਾ ਆਵੇਣਿਸਦ੍ਦੋ ‘‘ਵਿਸੁ’’ਨ੍ਤਿਅਤ੍ਥਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋਤਿ ਦਸ੍ਸੇਤਿ. ਵਤ੍ਥੂਸੂਤਿ ਭੇਦਕਰਵਤ੍ਥੂਸੁ. ਇਮਂ ਗਣ੍ਹਥਾਤਿ ਇਮਂ ਵਾਦਂ ਗਣ੍ਹਥ. ਵਿਸੁਨ੍ਤਿ ਆਵੇਣਿਂ. ਇਮਸ੍ਮਿਂ ਖਨ੍ਧਕੇ ਵੁਤ੍ਤਵਚਨਂ ਪਰਿਵਾਰਪਾਲ਼ਿਯਾ ਸਂਸਨ੍ਦੇਨ੍ਤੋ ਆਹ ‘‘ਪਰਿਵਾਰੇ ਪਨਾ’’ਤਿਆਦਿ. ਤਤ੍ਥ ਪਞ੍ਚਹਿ ਆਕਾਰੇਹੀਤਿ ‘‘ਕਮ੍ਮੇਨ ਉਦ੍ਦੇਸੇਨ ਵੋਹਰਨ੍ਤੋ ਅਨੁਸ੍ਸਾਵਨੇਨ ਸਲਾਕਗ੍ਗਾਹੇਨਾ’’ਤਿ (ਪਰਿ. ੪੫੮) ਏਵਂ ਪਞ੍ਚਹਿ ਕਾਰਣੇਹਿ. ਤਸ੍ਸਾਤਿ ਪਰਿਵਾਰੇ ਵੁਤ੍ਤਵਚਨਸ੍ਸ. ਇਧਾਤਿ ਇਮਸ੍ਮਿਂ ਸਙ੍ਘਭੇਦਕਕ੍ਖਨ੍ਧਕੇ, ਵੁਤ੍ਤੇਨ ਇਮਿਨਾ ਸਙ੍ਘਭੇਦਲਕ੍ਖਣੇਨਾਤਿ ਯੋਜਨਾ. ‘‘ਅਤ੍ਥਤੋ ਨਾਨਾਕਰਣਂ ਨਤ੍ਥੀ’’ਤਿ ਇਮਿਨਾ ਸਦ੍ਦਤੋ ਨਾਨਾਕਰਣਂ ਅਤ੍ਥੀਤਿ ਦੀਪੇਤਿ. ਅਸ੍ਸਾਤਿ ਸਙ੍ਘਭੇਦਲਕ੍ਖਣਸ੍ਸ. ਤਂ ਪਨ ਨਾਨਾਕਰਣਾਭਾਵਨ੍ਤਿ ਯੋਜਨਾ. ਤਤ੍ਥੇਵਾਤਿ ਪਰਿਵਾਰੇ ਏਵ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਸਙ੍ਘਭੇਦਕਕ੍ਖਨ੍ਧਕੇ.

ਇਤਿ ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.