੫. ਖੁਦ੍ਦਕਵਤ੍ਥੁਕ੍ਖਨ੍ਧਕਂ
ਖੁਦ੍ਦਕਵਤ੍ਥੁਕਥਾ
੨੪੩. ਖੁਦ੍ਦਕਵਤ੍ਥੁਕ੍ਖਨ੍ਧਕੇ ਮੁਟ੍ਠਿਕਮਲ੍ਲਾਤਿ ਮੁਟ੍ਠਿਕੇਨ ਮਥਨ੍ਤਿ ਅਞ੍ਞਮਞ੍ਞਂ ਹਿਂਸਨ੍ਤੀਤਿ ਮੁਟ੍ਠਿਕਮਲ੍ਲਾ. ਇਮਿਨਾ ਪਾਲ਼ਿਯਂ ਪਦਸ੍ਸ ਹੇਟ੍ਠੁਪਰਿਯਂ ਦਸ੍ਸੇਤਿ. ਗਾਮਮੁਦਵਾਤਿ ਏਤ੍ਥ ਛਵਿਰਾਗਮਣ੍ਡਨਾਨੁਯੁਤ੍ਤੇਨ ਮੁਦੋ ਮੋਦਨਂ ਏਤੇਸਮਤ੍ਥੀਤਿ ਮੁਦਵਾ, ਗਾਮੇ ਵਸਨ੍ਤਾ ਮੁਦਵਾ ਗਾਮਮੁਦਵਾਤਿ ਦਸ੍ਸੇਨ੍ਤੋ ਆਹ ‘‘ਛਵਿਰਾਗਮਣ੍ਡਨਾਨੁਯੁਤ੍ਤਾ ਨਾਗਰਿਕਮਨੁਸ੍ਸਾ’’ਤਿ. ‘‘ਵਣ੍ਣਵਾ ਅਹੇਸੁ’’ਨ੍ਤਿਆਦੀਸੁ (ਪਾਰਾ. ੧੯੩; ਪਾਚਿ. ੬੭) ਵਿਯ ਵਚਨਂ ਦਟ੍ਠਬ੍ਬਂ. ਥਮ੍ਭੇਤਿ ਏਤ੍ਥ ਨ ਯਤ੍ਥ ਕਤ੍ਥਚਿ ਥਮ੍ਭੋ ਹੋਤਿ, ਅਥ ਖੋ ਨ੍ਹਾਨਤਿਤ੍ਥੇ ਨਿਖਣਿਤ੍ਵਾ ਠਪਿਤਥਮ੍ਭੋਯੇਵਾਤਿ ਆਹ ‘‘ਨ੍ਹਾਨਤਿਤ੍ਥੇ ਨਿਖਣਿਤ੍ਵਾ ਠਪਿਤਤ੍ਥਮ੍ਭੇ’’ਤਿ.
ਇਟ੍ਠਕਾਸਿਲਾਦਾਰੁਕੁਟ੍ਟਾਨਨ੍ਤਿ ਇਟ੍ਠਕਾਕੁਟ੍ਟਸਿਲਾਕੁਟ੍ਟਦਾਰੁਕੁਟ੍ਟਾਨਂ. ਅਟ੍ਠਪਦਾਕਾਰੇਨਾਤਿ ਅਟ੍ਠਪਦਫਲਕਾਕਾਰੇਨ. ਰਾਜਿਯੋਤਿ ਲੇਖਾਯੋ. ਤਤ੍ਥਾਤਿ ਅਟ੍ਟਾਨੇ, ਆਕਿਰਿਤ੍ਵਾਤਿ ਸਮ੍ਬਨ੍ਧੋ. ਗਨ੍ਧਬ੍ਬਹਤ੍ਥਕੋਤਿ ਗਨ੍ਧਬ੍ਬਾਨਂ ਵੀਣਾਹਤ੍ਥੋ ਵਿਯਾਤਿ ਗਨ੍ਧਬ੍ਬਹਤ੍ਥਕੋ. ਦਾਰੂਹਿ ਕਤਤ੍ਤਾ ਵੁਤ੍ਤਂ ‘‘ਦਾਰੁਮਯਹਤ੍ਥੇਨਾ’’ਤਿ. ਤੇਨਾਤਿ ਗਨ੍ਧਬ੍ਬਹਤ੍ਥੇਨ, ਗਹੇਤ੍ਵਾਤਿ ਸਮ੍ਬਨ੍ਧੋ. ਕੁਰੁਵਿਨ੍ਦਕਪਾਸਾਣਚੁਣ੍ਣਾਨੀਤਿ ਏਵਂਨਾਮਕਸ੍ਸ ਪਾਸਾਣਸ੍ਸ ਚੁਣ੍ਣਾਨਿ. ਤਨ੍ਤਿ ਕਤਗੁਲ਼ਿਕਕਲਾਪਕਂ, ਗਹੇਤ੍ਵਾਤਿ ਸਮ੍ਬਨ੍ਧੋ. ਵਿਗ੍ਗਯ੍ਹਾਤਿ ਅਞ੍ਞਮਞ੍ਞਸ੍ਸ ਸਰੀਰੇ ਦਲ਼੍ਹਂ ਗਹੇਤ੍ਵਾਤਿ ਦਸ੍ਸੇਨ੍ਤੋ ਆਹ ‘‘ਅਞ੍ਞਮਞ੍ਞਂ ਸਰੀਰੇਨ ਸਰੀਰ’’ਨ੍ਤਿ. ਮਕਰਦਨ੍ਤਕੇਤਿ ਮਕਰਨਾਮਕਸ੍ਸ ਮਚ੍ਛਸ੍ਸ ਦਨ੍ਤਸਦਿਸੇ ਦਨ੍ਤੇ. ਮਲ੍ਲਕਮੂਲਸਣ੍ਠਾਨੇਨਾਤਿ ਖੇਲ਼ਪਟਿਗ੍ਗਹਪਾਦਸਣ੍ਠਾਨੇਨ. ਗਿਲਾਨਸ੍ਸਾਪੀਤਿ ਪਿਸਦ੍ਦੋ ਅਗਿਲਾਨਸ੍ਸ ਪਗੇਵਾਤਿ ਦਸ੍ਸੇਤਿ.
੨੪੪. ਦਨ੍ਤੇਤਿ ਮਕਰਦਨ੍ਤੇ. ਅਕਤਂ ਮਲ੍ਲਕਂ ਅਕਤਮਲ੍ਲਕਂ. ਕਪਾਲਖਣ੍ਡਂ ਵਾਤਿ ਵਾਸਦ੍ਦੋ ਸਮੁਚ੍ਚਯਤ੍ਥੋ. ਕਾਸਫੁਲ੍ਲਵਿਰਹਿਤਤ੍ਤਾ ਵਤ੍ਥਵਟ੍ਟਿ ਉਕ੍ਕਾਸਿਕਾ ਨਾਮ. ਨਤ੍ਥਿ ਕਾਸਂ ਫੁਲ੍ਲਮੇਤਿਸ੍ਸਾਤਿ ਉਕ੍ਕਾਸਾ, ਸਾ ਏਵ ਉਕ੍ਕਾਸਿਕਾ. ਯਸ੍ਸ ਕਸ੍ਸਚੀਤਿ ਗਿਲਾਨਾਗਿਲਾਨਸ੍ਸ ਵਾ ਜਰਾਦੁਬ੍ਬਲਤਰੁਣਬਲਵਸ੍ਸ ਵਾ. ਪਿਟ੍ਠਿਨ੍ਤਿ ਪਿਟ੍ਠਿਯਂ, ਅਯਮੇਵ ਵਾ ਪਾਠੋ. ਪਾਣਿਤਲਸ੍ਸ ਪੁਥੁਟ੍ਠਾਨਂ ਪੁਥੁਪਾਣਿ, ਤੇਨ ਕਤਂ ਪੁਥੁਪਾਣਿਕਂ, ਹਤ੍ਥਪਰਿਕਮ੍ਮਂ, ਤੇਨ ਵੁਤ੍ਤਂ ‘‘ਹਤ੍ਥਪਰਿਕਮ੍ਮਂ ਵੁਚ੍ਚਤੀ’’ਤਿ. ਸਬ੍ਬੇਸਨ੍ਤਿ ਨ੍ਹਾਯਨ੍ਤਾਨਂ ਵਾ ਅਨ੍ਹਾਯਨ੍ਤਾਨਂ ਵਾ ਸਬ੍ਬੇਸਂ.
੨੪੫. ਕਣ੍ਣਤੋਤਿ ਕਣ੍ਣਚ੍ਛਿਦ੍ਦਤੋ. ਮੁਤ੍ਤੋਲਮ੍ਬਕਾਦਿਵਲ੍ਲਿਸਦਿਸਤ੍ਤਾ ਵਲ੍ਲਿਕਾ ਨਾਮ. ਪਲਮ੍ਬਕਸੁਤ੍ਤਨ੍ਤਿ ਪਰਿਮੁਞ੍ਚਿਤ੍ਵਾ ਲਮ੍ਬਿਯਤਿ ਅਨੇਨਾਤਿ ਪਲਮ੍ਬਕਂ, ਤਮੇਵ ਸੁਤ੍ਤਂ ਪਲਮ੍ਬਕਸੁਤ੍ਤਂ. ਵਲਯਨ੍ਤਿ ਨਿਯੁਰਂ.
੨੪੬. ਦ੍ਵੀਹਿ ਮਾਸੇਹਿ ਨਿਯੁਤ੍ਤਂ ਦੁਮਾਸਿਕਂ. ਦ੍ਵੇ ਅਙ੍ਗੁਲਾਨਿ ਏਤਸ੍ਸਾਤਿ ਦੁਵਙ੍ਗੁਲਂ, ਕੇਸੋ. ਉਭਯੇਨਪੀਤਿ ਦੁਮਾਸਿਕਦੁਵਙ੍ਗੁਲਸਙ੍ਖਾਤੇਨ ਉਭਯੇਨਪਿ. ਅਯਮ੍ਪਿ ਉਕ੍ਕਟ੍ਠਪਰਿਚ੍ਛੇਦੋਵ ਵੁਤ੍ਤੋਤਿ ਯੋਜਨਾ. ਤਤੋਤਿ ਦੁਮਾਸਿਕਦੁਵਙ੍ਗੁਲਤੋ.
ਓਸਣ੍ਠੇਨ੍ਤੀਤਿ ਏਤ੍ਥ ਓਲਿਖਿਤ੍ਵਾ ਸਮਂ ਪਤਿਟ੍ਠਾਪੇਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਓਲਿਖਿਤ੍ਵਾ ਸਨ੍ਨਿਸੀਦਾਪੇਨ੍ਤੀ’’ਤਿ. ਦਨ੍ਤਮਯਾਦੀਸੂਤਿ ਆਦਿਸਦ੍ਦੇਨ ਅਟ੍ਠਿਮਯਾਦਯੋ ਸਙ੍ਗਣ੍ਹਾਤਿ. ਹਤ੍ਥਫਣੇਨਾਤਿ ਹਤ੍ਥਸਙ੍ਖਾਤੇਨ ਫਣੇਨ. ਚਿਕ੍ਖਲ੍ਲੇਨਾਤਿ ਚਿਕ੍ਖਲ੍ਲਸਦਿਸੇਨ ਨਿਯ੍ਯਾਸੇਨ. ਉਦਕਤੇਲੇਨਾਤਿ ਏਤ੍ਥ ਉਦਕਞ੍ਚ ਤੇਲਞ੍ਚਾਤਿ ਚ ਉਦਕਸਙ੍ਖਾਤੇਨ ਤੇਲੇਨਾਤਿ ਚ ਅਤ੍ਥਂ ਨਿਵਤ੍ਤੇਨ੍ਤੋ ਆਹ ‘‘ਉਦਕਮਿਸ੍ਸਕੇਨ ਤੇਲੇਨਾ’’ਤਿ. ਇਮਿਨਾ ਉਦਕੇਨ ਮਿਸ੍ਸਕਂ ਤੇਲਂ ਉਦਕਤੇਲਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਉਟ੍ਠਲੋਮੇਤਿ ਉਟ੍ਠਿਤਲੋਮੇ. ਹਤ੍ਥਂ ਤੇਮੇਤ੍ਵਾਤਿ ਹਤ੍ਥਂ ਉਦਕਤੇਲੇਨ ਤੇਮੇਤ੍ਵਾ. ਉਣ੍ਹਾਭਿਤਤ੍ਤਰਜੋਕਿਣ੍ਣਸਿਰਾਨਮ੍ਪੀਤਿ ਉਣ੍ਹੇਨ ਅਭਿਤਤ੍ਤੋ ਚ ਰਜੇਹਿ ਓਕਿਣ੍ਣਸਿਰੋ ਚ ਉਣ੍ਹਾਭਿਤਤ੍ਤਰਜੋਕਿਣ੍ਣਸਿਰਾ, ਅਥ ਵਾ ਉਣ੍ਹੇਨ ਅਭਿਤਤ੍ਤੋ ਸਿਰੋ ਏਤੇਸਨ੍ਤਿ ਉਣ੍ਹਾਭਿਤਤ੍ਤਸਿਰਾ, ਰਜੇਹਿ ਓਕਿਣ੍ਣੋ ਸਿਰੋ ਏਤੇਸਨ੍ਤਿ ਰਜੋਕਿਣ੍ਣਸਿਰਾ, ਉਣ੍ਹਾਭਿਤਤ੍ਤਸਿਰਾ ਚ ਰਜੋਕਿਣ੍ਣਸਿਰਾ ਚ ਉਣ੍ਹਾਭਿਤਤ੍ਤਰਜੋਕਿਣ੍ਣਸਿਰਾ, ਪੁਬ੍ਬਪਦੇ ਉਤ੍ਤਰਪਦਲੋਪੋ, ਤੇਸਮ੍ਪਿ. ਅਲ੍ਲਹਤ੍ਥੇਨਾਤਿ ਅਦ੍ਦਹਤ੍ਥੇਨ, ਅਯਮੇਵ ਵਾ ਪਾਠੋ.
੨੪੭. ਯੇਸੁ ਕਂਸਪਤ੍ਤਾਦੀਸੁ ਮੁਖਨਿਮਿਤ੍ਤਂ ਪਞ੍ਞਾਯਤਿ, ਸਬ੍ਬਾਨਿ ਤਾਨਿ ਕਂਸਪਤ੍ਤਾਦੀਨਿਪੀਤਿ ਯੋਜਨਾ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਸ੍ਮਿਂਚਿ ਆਦਾਸੇ ਵਾ ਉਦਕਪਤ੍ਤੇ ਵਾਤਿ ਸਮ੍ਬਨ੍ਧੋ. ਸਞ੍ਛਵਿ ਨੁ ਖੋਤਿ ਸਞ੍ਜਾਤਾ ਛਵਿ ਨੁ ਖੋ, ਅਹਂ ਜਿਣ੍ਣੋ ਅਮ੍ਹਿ ਨੁ ਖੋ, ਨੋਤਿ ਯੋਜਨਾ.
ਮੁਖਂ ਆਲਿਮ੍ਪਨ੍ਤੀਤਿ ਏਤ੍ਥ ਕੇਹਿ ਆਲਿਮ੍ਪਨ੍ਤੀਤਿ ਆਹ ‘‘ਵਿਪ੍ਪਸਨ੍ਨਛਵਿਰਾਗਕਰੇਹਿ ਮੁਖਲੇਪਨੇਹੀ’’ਤਿ. ‘‘ਮਨੋਸਿਲਾਯਾ’’ਤਿ ਇਮਿਨਾ ਮਨੋਸਿਲਾ ਏਵ ਮਨੋਸਿਲਿਕਾਤਿ ਦਸ੍ਸੇਤਿ. ਤਾਨੀਤਿ ਲਞ੍ਛਨਾਨਿ. ਹਰਿਤਾਲਾਦੀਹਿਪੀਤਿ ਪਿਸਦ੍ਦੇਨ ਨ ਕੇਵਲਂ ਮਨੋਸਿਲਿਕਾਯ ਏਵ, ਅਥ ਖੋ ਹਰਿਤਾਲਾਦੀਹਿਪੀਤਿ ਦਸ੍ਸੇਤਿ.
੨੪੮. ਨ ਭਿਕ੍ਖਵੇ ਨਚ੍ਚਂ ਵਾਤਿਆਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਨਿਚ੍ਚਾਪੇਨ੍ਤਸ੍ਸ ਵਾਤਿ ਪਰੇਹਿ ਨਚ੍ਚਾਪੇਨ੍ਤਸ੍ਸ ਵਾ. ਸਾਧੁਗੀਤਨ੍ਤਿ ਸੁਨ੍ਦਰਂ ਅਨਿਚ੍ਚਤਾਦਿਪਟਿਸਂਯੁਤ੍ਤਂ ਗੀਤਂ, ਸਜ੍ਜਨਾਨਂ ਵਾ. ਦਨ੍ਤਗੀਤਮ੍ਪਿ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਯਨ੍ਤਿ ਗੀਤਂ. ਪੁਬ੍ਬਭਾਗੇਤਿ ਗਾਯਨਤੋ ਪੁਬ੍ਬਭਾਗੇ. ਗਾਯਾਪੇਨ੍ਤਸ੍ਸਾਪੀਤਿ ਪਰੇਹਿ ਵਾ ਗਾਯਾਪੇਨ੍ਤਸ੍ਸਾਪਿ. ਯਂ ਪਨਾਤਿ ਕਿਰਿਯਾਪਰਾਮਸਨਂ. ਯਂ ਪਹਰਤਿ, ਤਤ੍ਥ ਪਹਰਣੇ ਅਨਾਪਤ੍ਤੀਤਿ ਯੋਜਨਾ. ਸਬ੍ਬਨ੍ਤਿ ਅਖਿਲਂ ਨਚ੍ਚਗੀਤਵਾਦਿਤਂ. ਪਸ੍ਸਤੋਤਿ ਪਸ੍ਸਨ੍ਤਸ੍ਸ ਚ ਸੁਣਨ੍ਤਸ੍ਸ ਚ. ਸਵਨਮ੍ਪਿ ਹਿ ਏਕਸੇਸੇਨ ਵਾ ਸਾਮਞ੍ਞਨਿਦ੍ਦੇਸੇਨ ਵਾ ਪਸ੍ਸਨੇਨੇਵ ਸਙ੍ਗਹਿਤਂ. ਵਿਹਾਰਤੋਤਿ ਅਨਚ੍ਚਅਗੀਤਅਵਾਦਿਤਟ੍ਠਾਨਵਿਹਾਰਤੋ. ਵਿਹਾਰਨ੍ਤਿ ਨਚ੍ਚਗੀਤਵਾਦਿਤਟ੍ਠਾਨਵਿਹਾਰਂ. ਅਸਨਸਾਲਾਯਾਤਿ ਗਾਮੇ ਠਿਤਾਯ ਅਸਨਸਾਲਾਯ.
੨੪੯. ਸਰਕਿਰਿਯਨ੍ਤਿ ਸਰਸ੍ਸ ਕਿਰਿਯਂ. ਇਮਿਨਾ ਸਰਕੁਤ੍ਤਿਨ੍ਤਿ ਏਤ੍ਥ ਸਰਸ੍ਸ ਕਰਣਂ ਸਰਕੁਤ੍ਤੀਤਿ ਵਚਨਤ੍ਥਂ ਦਸ੍ਸੇਤਿ. ਅਲਦ੍ਧਂ ਸਮਾਧਿਨ੍ਤਿ ਸਮ੍ਬਨ੍ਧੋ. ਪਚ੍ਛਿਮਾ ਜਨਤਾਤਿ ਏਤ੍ਥ ਸਮੂਹਿਂ ਅਵਯਵਂ ਵਿਨਾ ਸਮੂਹਸ੍ਸ ਅਵਯਵਿਨੋ ਅਭਾਵਾ ਤਾਪਚ੍ਚਯੋ ਸ੍ਵਤ੍ਥੋਪਿ ਹੋਤੀਤਿ ਆਹ ‘‘ਪਚ੍ਛਿਮੋ ਜਨੋ’’ਤਿ. ਤਂ ਤਂ ਵਤ੍ਤਨ੍ਤਿ ਸੁਤ੍ਤਨ੍ਤਵਤ੍ਤਾਦਿਂ ਤਂ ਤਂ ਵਤ੍ਤਂ. ਅਕ੍ਖਰਾਨਿ ਵਿਨਾਸੇਤ੍ਵਾਤਿ ਅਞ੍ਞਥਾ ਵਤ੍ਤਬ੍ਬਾਨਿ ਅਕ੍ਖਰਾਨਿ ਅਞ੍ਞਥਾ ਵਦਨੇਨ ਚ ਦੀਘਾਦੀਨਿ ਰਸ੍ਸਾਦਿਵਦਨੇਨ ਚ ਵਿਨਾਸੇਤ੍ਵਾ. ਧਮ੍ਮੇ ਪਨਾਤਿ ਏਤ੍ਥ ਸਦ੍ਦੋ ਪਨ ਵਿਸੇਸਜੋਤਕੋ. ਗੀਤਤੋ ਵਿਸੇਸੋਵ ਵੇਦਿਤਬ੍ਬੋਤਿ ਹਿ ਅਤ੍ਥੋ. ਸੁਤ੍ਤਨ੍ਤਵਤ੍ਤਨ੍ਤਿ ਸੁਤ੍ਤਨ੍ਤਸ੍ਸ ਉਚ੍ਚਾਰਣਂ ਵਤ੍ਤਂ. ਏਸੇਵ ਨਯੋ ‘‘ਜਾਤਕਵਤ੍ਤਂ ਗਾਥਾਵਤ੍ਤ’’ਨ੍ਤਿ ਏਤ੍ਥਾਪਿ. ਤਨ੍ਤਿ ਵਤ੍ਤਂ. ਯਦਿ ਪਨ ਤਂ ਵਿਨਾਸੇਤ੍ਵਾ ਅਤਿਦੀਘਂ ਕਾਤੁਂ ਨ ਵਟ੍ਟਤਿ, ਏਵਂ ਸਤਿ ਯਥਾ ਸੁਤ੍ਤਨ੍ਤਵਤ੍ਤਾਦੀਨਿ ਹੋਨ੍ਤਿ, ਤਥਾ ਕਥਂ ਦਸ੍ਸੇਤਬ੍ਬਾਨੀਤਿ ਆਹ ‘‘ਚਤੁਰਸ੍ਸੇਨ ਵਤ੍ਤੇਨਾ’’ਤਿਆਦਿ. ਤਤ੍ਥ ਚਤੁਰਸ੍ਸੇਨ ਵਤ੍ਤੇਨਾਤਿ ਪਰਿਪੁਣ੍ਣੇਨ ਉਚ੍ਚਾਰਣਵਤ੍ਤੇਨ. ਪਰਿਮਣ੍ਡਲਾਨੀਤਿ ਸਮਨ੍ਤਤੋ ਮਣ੍ਡਲਾਨਿ ਬਿਮ੍ਬਾਨਿ ਪੁਣ੍ਣਾਨੀਤਿ ਅਤ੍ਥੋ. ‘‘ਸਰੇਨ ਭਣਿਤ’’ਨ੍ਤਿ ਇਮਿਨਾ ਸਰਭਞ੍ਞਨ੍ਤਿ ਏਤ੍ਥ ਸਰੇਨ ਭਣਿਤਬ੍ਬਨ੍ਤਿ ਸਰਭਞ੍ਞਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਸਰਭਞ੍ਞੇ ਕਿਰ ਅਤ੍ਥੀਤਿ ਸਮ੍ਬਨ੍ਧੋ. ਤਰਙ੍ਗਵਤ੍ਥਾਦੀਨਂ ਉਚ੍ਚਾਰਣਵਿਧਾਨਾਨਿ (ਵਜਿਰ. ਟੀ. ਚੂਲ਼ਵਗ੍ਗ ੨੪੯; ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੨੪੯; ਵਿ. ਵਿ. ਟੀ. ਚੂਲ਼ਵਗ੍ਗ ੨.੨੪੮-੯) ਏਤਰਹਿ ਨਤ੍ਥਿ. ਦ੍ਵਤ੍ਤਿਂਸਵਤ੍ਤਾਨੀਤਿ ਚ ਸਙ੍ਖ੍ਯਾਮਤ੍ਤਮੇਵ ਅਤ੍ਥਿ, ਨ ਸਙ੍ਖ੍ਯੇਯ੍ਯਂ. ਤਸ੍ਮਾ ਟੀਕਾਸੁ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੨੪੯; ਵਜਿਰ. ਟੀ. ਚੂਲ਼ਵਗ੍ਗ. ੨੪੯) ‘‘ਤਰਙ੍ਗਵਤ੍ਤਾਦੀਨਂ ਉਚ੍ਚਾਰਣਵਿਧਾਨਾਨਿ ਨਟ੍ਠਪਯੋਗਾਨੀ’’ਤਿ ਵੁਤ੍ਤਂ. ਅਤ੍ਥੀਤਿ ਸਂਵਿਜ੍ਜਨ੍ਤਿ. ਅਯਞ੍ਹਿ ਅਤ੍ਥਿਸਦ੍ਦੋ ਨਿਪਾਤੋ. ਤੇਸੂਤਿ ਦ੍ਵਤ੍ਤਿਂਸਵਤ੍ਤੇਸੁ. ਯਨ੍ਤਿ ਵਤ੍ਤਂ. ਉਚ੍ਚਾਰਣਵਿਧਾਨਾਨਿ ਨਟ੍ਠਪਯੋਗਾਨਿਪਿ ਤੇਸਂ ਸਬ੍ਬੇਸਂ ਸਾਮਞ੍ਞਲਕ੍ਖਣਂ ਦਸ੍ਸੇਨ੍ਤੋ ਆਹ ‘‘ਸਬ੍ਬੇਸ’’ਨ੍ਤਿਆਦਿ. ਤਤ੍ਥ ਸਬ੍ਬੇਸਨ੍ਤਿ ਦ੍ਵਤ੍ਤਿਂਸਵਤ੍ਤਾਨਂ, ਲਕ੍ਖਣਨ੍ਤਿ ਸਮ੍ਬਨ੍ਧੋ. ‘‘ਅਵਿਨਾਸੇਤ੍ਵਾ’’ਤਿ ਵਤ੍ਵਾ ਤਮੇਵਤ੍ਥਂ ਪਾਕਟਂ ਕਰੋਨ੍ਤੋ ਆਹ ‘‘ਵਿਕਾਰਂ ਅਕਤ੍ਵਾ’’ਤਿ. ਤਤ੍ਥ ਵਿਕਾਰਕਰਣਂ ਨਾਮ ਯਤ੍ਤਕਾਹਿ ਮਤ੍ਤਾਹਿ ਅਕ੍ਖਰਂ ਪਰਿਪੁਣ੍ਣਂ ਹੋਤਿ, ਤਤੋ ਅਧਿਕਮਤ੍ਤਾਯੁਤ੍ਤਂ ਕਤ੍ਵਾ ਕਥਨਂ, ਤਥਾ ਅਕਤ੍ਵਾ ਸਮਣਸਾਰੁਪ੍ਪੇਨ ਚਤੁਰਸ੍ਸੇਨ ਨਯੇਨ ਪਵਤ੍ਤਨਂਯੇਵ ਲਕ੍ਖਣਨ੍ਤਿ ਅਤ੍ਥੋ.
ਬਾਹਿਰਲੋਮਿਂ ਉਣ੍ਣਿਨ੍ਤਿ ਏਤ੍ਥ ‘‘ਬਾਹਿਰਲੋਮਿ’’ਨ੍ਤਿ ਪਦਂ ਭਾਵਨਪੁਂਸਕਨ੍ਤਿ ਆਹ ‘‘ਉਣ੍ਣਲੋਮਾਨਿ ਬਹਿ ਕਤ੍ਵਾ’’ਤਿ. ‘‘ਉਣ੍ਣਪਾਵਾਰ’’ਨ੍ਤਿ ਇਮਿਨਾ ਉਣ੍ਣੀਤਿ ਏਤ੍ਥ ਉਤ੍ਤਰਪਦਲੋਪਂ ਦਸ੍ਸੇਤਿ. ਅਥ ਵਾ ਪਾਵਾਰਪਦੇਨ ਉਣ੍ਣਾ ਏਤਸ੍ਸ ਅਤ੍ਥੀਤਿ ਉਣ੍ਣੀਤਿ ਕਤ੍ਵਾ ਤਦ੍ਧਿਤਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ‘‘ਤਥਾ ਧਾਰੇਨ੍ਤਸ੍ਸ ਦੁਕ੍ਕਟ’’ਨ੍ਤਿ ਵਚਨਸ੍ਸ ਅਤ੍ਥਾਪਤ੍ਤਿਨਯਂ ਦਸ੍ਸੇਨ੍ਤੋ ਆਹ ‘‘ਲੋਮਾਨਿ ਅਨ੍ਤੋ ਕਤ੍ਵਾ ਪਾਰੁਪਿਤੁਂ ਵਟ੍ਟਤੀ’’ਤਿ.
੨੫੧. ਅਙ੍ਗਜਾਤਂ ਛਿਨ੍ਦਨ੍ਤਸ੍ਸੇਵਾਤਿ ਅਙ੍ਗਜਾਤਮੇਵ ਛਿਨ੍ਦਨ੍ਤਸ੍ਸਾਤਿ ਯੋਜਨਾ. ਅਥ ਵਾ ਅਙ੍ਗਜਾਤਂ ਛਿਨ੍ਦਨ੍ਤਸ੍ਸ ਥੁਲ੍ਲਚ੍ਚਯਮੇਵਾਤਿ ਯੋਜਨਾ. ਅਹਿਕੀਟਦਟ੍ਠਾਦੀਸੁ ਨਿਮਿਤ੍ਤਭੂਤੇਸੁ ਛਿਨ੍ਦਨ੍ਤਸ੍ਸਾਤਿ ਯੋਜਨਾ.
੨੫੨. ਉਪ੍ਪਨ੍ਨਾ ਹੋਤੀਤਿ ਪਟਿਲਾਭਵਸੇਨ ਉਪ੍ਪਨ੍ਨਾ ਹੋਤਿ. ਉਪ੍ਪਨ੍ਨਭਾਵਂ ਪਾਕਟਂ ਕਰੋਨ੍ਤੋ ਆਹ ‘‘ਸੋ’’ਤਿਆਦਿ. ਤਤ੍ਥ ਸੋਤਿ ਰਾਜਗਹਕੋ ਸੇਟ੍ਠਿ, ਕੀਲ਼ਤੀਤਿ ਸਮ੍ਬਨ੍ਧੋ. ਤਸ੍ਸਾਤਿ ਸੇਟ੍ਠਿਸ੍ਸ. ਇਦਂ ਪਦਂ ‘‘ਜਾਲੇ’’ਤਿ ਪਦੇ ਸਾਮ੍ਯਤ੍ਥਛਟ੍ਠੀ, ‘‘ਉਪ੍ਪਨ੍ਨਾ ਹੋਤੀ’’ਤਿ ਪਦੇ ਸਮ੍ਪਦਾਨਂ. ਤਨ੍ਤਿ ਚਨ੍ਦਨਗਣ੍ਠਿਂ. ਅਸ੍ਸਾਤਿ ਸੇਟ੍ਠਿਸ੍ਸ. ਇਦਂ ਪਦਂ ‘‘ਪੁਰਿਸਾ’’ਤਿ ਪਦੇ ਸਾਮ੍ਯਤ੍ਥਛਟ੍ਠੀ, ‘‘ਅਦਂਸੂ’’ਤਿ ਪਦੇ ਸਮ੍ਪਦਾਨਂ. ਵਿਕੁਬ੍ਬਨਿਦ੍ਧੀਤਿ ਵਿਵਿਧਂ, ਵਿਕਾਰਂ ਵਾ ਕੁਬ੍ਬਨਵਸੇਨ ਪਵਤ੍ਤਾ ਇਦ੍ਧਿ (ਪਟਿ. ਮ. ੩.੧੨-੧੬; ਵਿਸੁਦ੍ਧਿ. ੨.੩੬੯-੩੭੩). ਅਧਿਟ੍ਠਾਨਿਦ੍ਧੀਤਿ ਅਧਿਟ੍ਠਾਨਵਸੇਨ ਪਵਤ੍ਤਾ ਇਦ੍ਧਿ (ਪਟਿ. ਮ. ੩.੧੨-੧੬; ਵਿਸੁਦ੍ਧਿ. ੨.੩੬੯-੩੭੩).
ਗਿਹੀ ਉਪਨਾਮੇਨ੍ਤੀਤਿ ਸਮ੍ਬਨ੍ਧੋ. ਬ੍ਯਞ੍ਜਨਂ ਕਤ੍ਵਾਤਿ ਬ੍ਯਞ੍ਜਨਂ ਪਕ੍ਖਿਪਨਂ ਕਤ੍ਵਾ. ਤਨ੍ਤਿ ਸੁਵਣ੍ਣਤਟ੍ਟਿਕਾਦਿਂ. ਆਮਸਿਤੁਮ੍ਪੀਤਿ ਪਿਸਦ੍ਦੋ ਪਗੇਵ ਪਟਿਗ੍ਗਣ੍ਹਿਤੁਨ੍ਤਿ ਦਸ੍ਸੇਤਿ. ਸਙ੍ਘਿਕਪਰਿਭੋਗੇਨ ਵਾਤਿ ਵਾਸਦ੍ਦੋ ਪਨਸਦ੍ਦਤ੍ਥੋ. ਸਙ੍ਘਿਕਪਰਿਭੋਗੇਨ ਪਨਾਤਿ ਹਿ ਅਤ੍ਥੋ. ਗਿਹਿਵਿਕਟਾਨਿ ਵਾਤਿ ਵਾਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਗਿਹਿਵਿਕਟਾਨਿ ਭਾਜਨਾਨਿਪਿ ਵਟ੍ਟਨ੍ਤੀਤਿ ਹਿ ਅਤ੍ਥੋ. ਕਂਸਲੋਹਵਟ੍ਟਲੋਹਾਨਂ ਸਭਾਗਤ੍ਤਾ ਵੁਤ੍ਤਂ ‘‘ਕਂਸ…ਪੇ… ਸਙ੍ਗਹਿਤੋ’’ਤਿ.
੨੫੩. ‘‘ਲਿਖਿਤੁ’’ਨ੍ਤਿ ਏਤਂ ਵੁਤ੍ਤਨ੍ਤਿ ਯੋਜਨਾ. ਪਕਤਿਮਣ੍ਡਲਨ੍ਤਿ ਏਤ੍ਥ ਕਿਂ ਮਕਰਦਨ੍ਤਮਤ੍ਤਮ੍ਪਿ ਅਚ੍ਛਿਨ੍ਨਮਣ੍ਡਲਨ੍ਤਿ ਆਹ ‘‘ਮਕਰਦਨ੍ਤਚ੍ਛਿਨ੍ਨਕਮਣ੍ਡਲਮੇਵਾ’’ਤਿ.
੨੫੪. ਪਹਰਿਤ੍ਵਾਤਿ ਆਵਟ੍ਟਨਤੋ ਅਞ੍ਞਮਞ੍ਞਂ ਪਹਰਿਤ੍ਵਾ. ਤਯੋ ਪਤ੍ਤੇ ਉਪਰੁਪਰਿ ਠਪੇਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਭੂਮਿਆਧਾਰਕੋ ਨਾਮ ਭੂਮਿਯਾ ਆਸਨ੍ਨੋ ਦਨ੍ਤਾਦੀਹਿ ਕਤੋ ਵਲਯਾਧਾਰਕੋ. ਦਾਰੁਆਧਾਰਕੋ ਨਾਮ ਏਕਦਾਰੁਨਾ ਕਤੋ ਆਧਾਰਕੋ. ਦਣ੍ਡਾਧਾਰਕੋ ਨਾਮ ਚਤੁਦਣ੍ਡਤੋ ਪਟ੍ਠਾਯ ਬਹੂਹਿ ਦਣ੍ਡੇਹਿ ਕਤੋ ਆਧਾਰਕੋ. ਤਤ੍ਥਾਤਿ ਭਮਕੋਟਿਸਦਿਸਦਾਰੁ ਆਧਾਰਕਤਿਦਣ੍ਡਕਾਧਾਰੇਸੁ. ਗਹੇਤ੍ਵਾ ਏਵਾਤਿ ਪਤ੍ਤਂ ਗਹੇਤ੍ਵਾ ਏਵ, ਏਕਮੇਵ ਠਪੇਤਬ੍ਬਂ ਇਤਿ ਵੁਤ੍ਤਨ੍ਤਿ ਯੋਜਨਾ.
ਤਤ੍ਥੇਵਾਤਿ ਮਿਡ੍ਢਨ੍ਤੇਯੇਵ. ਵਿਤ੍ਥਿਣ੍ਣਾਯਾਤਿ ਵਿਤ੍ਥਾਰਾਯ. ਬਾਹਿਰਪਸ੍ਸੇਤਿ ਕੁਟ੍ਟਸ੍ਸ ਬਾਹਿਰਪਸ੍ਸੇ. ਕਤਾਯਾਤਿ ਕੁਟ੍ਟਸ੍ਸ ਥਿਰਭਾਵਤ੍ਥਂ ਕਤਾਯ. ਏਤ੍ਥਾਤਿ ਪਰਿਭਣ੍ਡਨ੍ਤੇ.
ਯਂ ਵਤ੍ਥਂ ਪਤ੍ਥਰਿਤ੍ਵਾ ਪਤ੍ਤੋ ਠਪਿਯਤੀਤਿ ਵਤ੍ਥਂ ਚੋਲ਼ਕਂ ਨਾਮਾਤਿ ਯੋਜਨਾ. ਤਸ੍ਮਿਂ ਪਨਾਤਿ ਚੋਲ਼ਕੇ ਪਨ. ਯਤ੍ਥਾਤਿ ਯਸ੍ਸਂ ਵਾਲਿਕਾਯਂ. ਨ ਦੁਸ੍ਸਤੀਤਿ ਪਤ੍ਤੋ ਨ ਦੁਸ੍ਸਤਿ. ਪਤ੍ਤਮਾਲ਼ਕਨ੍ਤਿ ਪਤ੍ਤਸ੍ਸ ਠਪਨਤ੍ਥਾਯ ਕਤਂ ਅਟ੍ਟਂ. ਭਣ੍ਡਕੁਕ੍ਖਲ਼ਿਕਾਤਿ ਪਤ੍ਤਾਦਿਭਣ੍ਡਕਾਨਂ ਪਕ੍ਖਿਪਨਾ ਉਕ੍ਖਲ਼ਿਕਾ. ਯਤ੍ਥ ਕਤ੍ਥਚੀਤਿ ਭਿਤ੍ਤਿਖੀਲਾਦਿਕੇ ਯਸ੍ਮਿਂ ਕਸ੍ਮਿਂਚਿ. ਲਗ੍ਗੇਨ੍ਤਸ੍ਸਾਤਿ ਪਤ੍ਤਂ ਥਵਿਕਾਯ ਲਗ੍ਗੇਨ੍ਤਸ੍ਸ. ਨਿਸੀਦਨਸਯਨਤ੍ਥਂ ਵਾ ਕਤਂ ਹੋਤੂਤਿ ਯੋਜਨਾ. ਅਞ੍ਞੇਨਾਤਿ ਪਤ੍ਤਤੋ ਅਞ੍ਞੇਨ. ਅਟ੍ਟਕਛਨ੍ਨੇਨਾਤਿ ਅਟ੍ਟਪਤਿਰੂਪੇਨ, ਅਟ੍ਟਕਸਦਿਸੇਨਾਤਿ ਅਤ੍ਥੋ. ਤਤ੍ਥਾਤਿ ਅਟ੍ਟਕਛਨ੍ਨੇਨ ਠਪਿਤੇ ਮਞ੍ਚਪੀਠੇ. ਅਂਸੇ ਬਦ੍ਧਿਯਤਿ ਅਨੇਨਾਤਿ ਅਂਸਬਦ੍ਧੋ, ਸੋਯੇਵ ਅਂਸਬਦ੍ਧਕੋ, ਤੇਨ ਲਗ੍ਗੇਤ੍ਵਾਤਿ ਸਮ੍ਬਨ੍ਧੋ. ਛਤ੍ਤੇ ਠਪੇਤੁਂ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਭਤ੍ਤੇਨ ਪੂਰੋ ਭਤ੍ਤਪੂਰੋ, ਪਤ੍ਤੋ. ਬਨ੍ਧਿਤ੍ਵਾ ਠਪਿਤੇ ਛਤ੍ਤੇ ਵਾ ਅਟ੍ਟਕਂ ਕਤ੍ਵਾ ਠਪਿਤੇ ਛਤ੍ਤੇ ਵਾਤਿ ਯੋਜਨਾ. ਯੋ ਕੋਚਿ ਭਤ੍ਤਪੂਰੋਪਿ ਤੁਚ੍ਛਪਤ੍ਤੋਪੀਤਿ ਸਮ੍ਬਨ੍ਧੋ.
੨੫੫. ਯਸ੍ਸਾਤਿ ਭਿਕ੍ਖੁਨੋ. ਹਤ੍ਥੇ ਪਤ੍ਤੋ ਅਤ੍ਥਿ, ਸੋ ਏਵ ਭਿਕ੍ਖੁ ਪਤ੍ਤਹਤ੍ਥੋ ਨ ਹੋਤਿ, ਅਪਿਚ ਖੋ ਪਨ ਹਤ੍ਥੇ ਵਾ ਪਿਟ੍ਠਿਪਾਦੇ ਵਾ ਯਤ੍ਥ ਕਤ੍ਥਚਿ ਸਰੀਰਾਵਯਵੇ ਪਤ੍ਤਸ੍ਮਿਂ ਸਤੀਤਿ ਯੋਜਨਾ. ਏਸੇਵ ਨਯੋ ਅਨਨ੍ਤਰਵਾਕ੍ਯੇਪਿ. ਇਮੇਹਿ ਵਾਕ੍ਯੇਹਿ ‘‘ਪਤ੍ਤਹਤ੍ਥੋ’’ਤਿ ਚ ‘‘ਕਵਾਟਂ ਪਣਾਮੇਤੁ’’ਨ੍ਤਿ ਚ ਉਪਲਕ੍ਖਣਮਤ੍ਤਮੇਵਾਤਿ ਦਸ੍ਸੇਤਿ. ਸੂਚਿਂ ਵਾ ਅਵਾਪੁਰਿਤੁਨ੍ਤਿ ਸਮ੍ਬਨ੍ਧੋ. ਕੁਞ੍ਚਿਕਾਯ ਵਾਤਿ ਵਾਸਦ੍ਦੋ ‘‘ਸਰੀਰਾਵਯਵੇਨਾ’’ਤਿ ਪਦਂ ਅਪੇਕ੍ਖਤਿ.
ਲਾਬੁਕਟਾਹਨ੍ਤਿ ਲਮ੍ਬਤੀਤਿ ਲਾਬੁ, ਲਾਬੁਯਾ ਕਟਾਹਂ ਲਾਬੁਕਟਾਹਂ. ‘‘ਤਾਵਕਾਲਿਕ’’ਨ੍ਤਿ ਇਮਿਨਾ ਏਕਵਾਰਮੇਵ ਤੇਨ ਆਮਿਸਂ ਗਹੇਤ੍ਵਾ ਪਰਿਭੁਞ੍ਜਿਤ੍ਵਾ ਛਡ੍ਡੇਤਬ੍ਬਨ੍ਤਿ ਦਸ੍ਸੇਤਿ. ਘਟਿਕਪਾਲਨ੍ਤਿ ਭਾਜਨਕਪਾਲਂ. ਅਭੁਂ ਮੇਤਿ ਅਵਡ੍ਢਿ ਮਯ੍ਹਂ, ਉਪ੍ਪਜ੍ਜਿਤ੍ਥਾਤਿ ਅਤ੍ਥੋ. ‘‘ਅਭੁ ਮੇ’’ਤਿ (ਮ. ਨਿ. ਅਟ੍ਠ. ੨.੧੪੯; ਮ. ਨਿ. ਟੀ. ੨.੧੪੯) ਵਤ੍ਤਬ੍ਬੇ ਨਿਗ੍ਗਹਿਤਾਗਮਵਸੇਨ ਏਵਂ ਵੁਤ੍ਤਂ. ਉਤ੍ਰਾਸਵਚਨਨ੍ਤਿ ਉਤ੍ਰਾਸੇਨ ਵਚਨਕਾਰਣਂ ਪਦਂ. ਦਿਨ੍ਨਕਮੇਵਾਤਿ ਪਰੇਹਿ ਦਿਨ੍ਨਕਮੇਵ ਆਮਿਸਨ੍ਤਿ ਸਮ੍ਬਨ੍ਧੋ.
ਚਮ੍ਬੇਤ੍ਵਾਤਿ ਮੁਖੇਨ ਚਮ੍ਬੇਤ੍ਵਾ. ਅਪਵਿਦ੍ਧਾਮਿਸਾਨੀਤਿ ਛਡ੍ਡਿਤਾਨਿ ਆਮਿਸਾਨਿ. ਏਤੇਸੂਤਿ ਚਲਕਾਦੀਸੁ. ਅਨੁਚ੍ਛਿਟ੍ਠਂ ਸੁਦ੍ਧਪਤ੍ਤਨ੍ਤਿ ਨਤ੍ਥਿ ਉਚ੍ਛਿਟ੍ਠੋ ਏਤ੍ਥਾਤਿ ਅਨੁਚ੍ਛਿਟ੍ਠੋ, ਸੁਦ੍ਧਪਤ੍ਤੋ, ਤਂ. ਉਚ੍ਛਿਟ੍ਠਹਤ੍ਥੇਨਾਤਿ ਉਚ੍ਛਿਟ੍ਠੋ ਏਤ੍ਥ ਅਤ੍ਥੀਤਿ ਉਚ੍ਛਿਟ੍ਠੋ, ਸੋਯੇਵ ਹਤ੍ਥੋ ਉਚ੍ਛਿਟ੍ਠਹਤ੍ਥੋ, ਤੇਨ. ਵਾਮਹਤ੍ਥੇਨ ਆਸਿਞ੍ਚਿਤ੍ਵਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੁਦ੍ਧਪਤ੍ਤੇ. ਏਤ੍ਤਾਵਤਾਪੀਤਿ ਏਤ੍ਤਕੇਨ ਏਕਉਦਕਗੇਣ੍ਡੁਸਗਹਣਮਤ੍ਤੇਨਾਪਿ. ਸੋਤਿ ਸੁਦ੍ਧਪਤ੍ਤੋ. ਹਤ੍ਥਂ ਪਨਾਤਿ ਉਚ੍ਛਿਟ੍ਠਹਤ੍ਥਮ੍ਪਿ. ਪਨਸਦ੍ਦੋ ਹੇਤ੍ਥ ਸਮ੍ਪਿਣ੍ਡਨਤ੍ਥੋ. ਯਂ ਅਟ੍ਠਿਂ ਵਾ ਯਂ ਚਲਕਂ ਵਾਤਿ ਯੋਜਨਾ. ਤਤ੍ਥਾਤਿ ਮਚ੍ਛਮਂਸਫਲਾਦੀਸੁ. ਤਨ੍ਤਿ ਅਟ੍ਠਿਚਲਕਂ. ਯਂ ਪਨਾਤਿ ਅਟ੍ਠਿਚਲਕਾਦਿਂ ਪਨ, ਪਟਿਖਾਦਿਤੁਕਾਮੋਤਿ ਸਮ੍ਬਨ੍ਧੋ, ਪੁਨ ਖਾਦਿਤੁਕਾਮੋਤਿ ਅਤ੍ਥੋ. ਤਤ੍ਥੇਵਾਤਿ ਪਤ੍ਤੇ ਏਵ. ਕਤ੍ਵਾਤਿ ਠਪਨਂ ਕਤ੍ਵਾ. ਯਂ ਕਿਞ੍ਚਿ ਅਟ੍ਠਿਕਣ੍ਟਕਾਦਿਨ੍ਤਿ ਸਮ੍ਬਨ੍ਧੋ.
੨੫੬. ਸਤ੍ਥਕਵੇਠਨਕਨ੍ਤਿ ਸਤ੍ਥਕਸ੍ਸ ਵੇਠਨਕਰਣਂ. ਪਿਪ੍ਫਲਿਕਂ ਵਾ ਦਣ੍ਡਸਤ੍ਥਕਂ ਨਾਮਾਤਿ ਯੋਜਨਾ. ਪਿਪ੍ਫਾਲੇਤਿ ਏਤਾਯਾਤਿ ਪਿਪ੍ਫਲਿ, ਸਾਯੇਵ ਪਿਪ੍ਫਲਿਕਂ. ਅਞ੍ਞਮ੍ਪੀਤਿ ਪਿਪ੍ਫਲਿਕਤੋ ਅਞ੍ਞਮ੍ਪਿ. ਯਂਕਿਞ੍ਚਿ ਦਣ੍ਡਂ ਯੋਜੇਤ੍ਵਾ ਕਤਸਤ੍ਥਕਂ ਵਾ ਦਣ੍ਡਸਤ੍ਥਕਂ ਨਾਮਾਤਿ ਯੋਜਨਾ. ਇਮਿਨਾ ਦਣ੍ਡੇਨ ਯੋਜਿਤਂ ਸਤ੍ਥਕਂ ਦਣ੍ਡਸਤ੍ਥਕਨ੍ਤਿ ਵਚਨਤ੍ਥਂ ਦਸ੍ਸੇਤਿ.
ਮਲਗ੍ਗਹਿਤਾਤਿ ਅਯਮਲਗ੍ਗਹਿਤਾ. ਕਿਣ੍ਣੇਨਾਤਿ ਮਦਿਰਾਦਿਬੀਜੇਨ ਕਿਣ੍ਣੇਨ. ਤੇਨਾਤਿ ਪਾਸਾਣਚੁਣ੍ਣਸਙ੍ਖਾਤੇਨ ਸਰਿਤਕੇਨ. ਮਕ੍ਖੇਤੁਨ੍ਤਿ ਸੂਚਿਂ ਮਕ੍ਖੇਤੁਂ. ਮਕ੍ਖਿਤਮਧੁਸਿਤ੍ਥਕਂ ਤਂ ਸਰਿਤਕਂ ਪਰਿਭਿਜ੍ਜਤੀਤਿ ਯੋਜਨਾ. ਮਧੁਸਿਤ੍ਥਕਪਿਲੋਤਿਕਨ੍ਤਿ ਮਧੁਸਿਤ੍ਥਕੇਨ ਮਕ੍ਖਿਤਂ ਪਿਲੋਤਿਕਂ. ਤਤ੍ਥਾਤਿ ਨਿਸ੍ਸੇਣਿਯਂ. ਯਾਯ ਰਜ੍ਜੁਯਾ ਕਥਿਨੇ ਬਨ੍ਧਨ੍ਤਿ, ਸਾ ਰਜ੍ਜੁ ਕਥਿਨਰਜ੍ਜੁ ਨਾਮਾਤਿ ਯੋਜਨਾ. ਤਤ੍ਥਾਤਿ ਦੀਘਸ੍ਸ ਭਿਕ੍ਖੁਨੋ ਪਮਾਣੇਨ ਕਤੇ ਕਥਿਨੇ. ਦਣ੍ਡਕੇਤਿ ਕਥਿਨਦਣ੍ਡਕਮ੍ਹਿ. ਤਸ੍ਸਾਤਿ ਦੀਘਸ੍ਸ ਭਿਕ੍ਖੁਨੋ ਪਮਾਣੇਨ ਕਤਸ੍ਸ ਕਥਿਨਸ੍ਸ. ਇਤਰਸ੍ਸ ਭਿਕ੍ਖੁਨੋਤਿ ਦੀਘਭਿਕ੍ਖੁਤੋ ਇਤਰਸ੍ਸ ਰਸ੍ਸਭਿਕ੍ਖੁਨੋ.
ਦਣ੍ਡਕਥਿਨਪਮਾਣੇਨ ਕਤਸ੍ਸ ਕਟਸਾਰਕਸ੍ਸਾਤਿ ਯੋਜਨਾ. ‘‘ਦੁਗੁਣਕਰਣ’’ਨ੍ਤਿ ਇਮਿਨਾ ਪਿਦਲਕਨ੍ਤਿ ਦੁਗੁਣਕਰਣਸਙ੍ਖਾਤਸ੍ਸ ਕਿਰਿਯਾਵਿਸੇਸਸ੍ਸ ਨਾਮਨ੍ਤਿ ਦਸ੍ਸੇਤਿ. ਵਿਨਨ੍ਧਨਰਜ੍ਜੁਨ੍ਤਿ ਵਿਸੇਸੇਨ ਨਹਿਯਤਿ ਬਨ੍ਧਿਯਤਿ ਏਤਾਯਾਤਿ ਵਿਨਨ੍ਧਨਾ, ਸਾਯੇਵ ਰਜ੍ਜੁ ਵਿਨਨ੍ਧਨਰਜ੍ਜੁ, ਤਮੇਵਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਵਿਨਨ੍ਧਿਤੁਂ ਰਜ੍ਜੁ’’ਨ੍ਤਿ. ਵਿਨਨ੍ਧਨਸੁਤ੍ਤਕਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਤੇਨ ਸੁਤ੍ਤਕੇਨਾਤਿ ਵਿਨਨ੍ਧਨਸੁਤ੍ਤਕੇਨ. ਤਤ੍ਥਾਤਿ ਖੁਦ੍ਦਕਨਿਸ੍ਸੇਣਿਯਂ ਕਾਚਿ ਸੁਤ੍ਤਨ੍ਤਰਿਕਾਯੋਤਿ ਸਮ੍ਬਨ੍ਧੋ. ਪਮਾਣਸਞ੍ਞਾਕਰਣਨ੍ਤਿ ਸੁਤ੍ਤਨ੍ਤਰਿਕਪਮਾਣਸ੍ਸ ਸਞ੍ਞਾਕਰਣਂ. ਕਾਲ਼ਸੁਤ੍ਤੇਨ ਸਞ੍ਞਾਕਰਣਂ ਵਿਯ ਹਲਿਦ੍ਦਿਸੁਤ੍ਤੇਨ ਸਞ੍ਞਾਕਰਣਨ੍ਤਿ ਯੋਜਨਾ. ਅਙ੍ਗੁਲਿਯਾ ਪਟਿਗ੍ਗਣ੍ਹਨ੍ਤੀਤਿ ਏਤ੍ਥ ‘‘ਪਟਿਗ੍ਗਣ੍ਹਨ੍ਤੀ’’ਤਿ ਪਦਸ੍ਸ ‘‘ਅਙ੍ਗੁਲਿਯਾ’’ਤਿ ਕਰਣਸ੍ਸੇਵ ਵੁਤ੍ਤਤ੍ਤਾ ਕਮ੍ਮਸ੍ਸ ਅਵੁਤ੍ਤਤ੍ਤਾ ਤਸ੍ਸ ਕਮ੍ਮਂ ਦਸ੍ਸੇਤੁਂ ਵੁਤ੍ਤਂ ‘‘ਸੂਚਿਮੁਖ’’ਨ੍ਤਿ. ਅਙ੍ਗੁਲਿਕੋਸਕਨ੍ਤਿ ਅਙ੍ਗੁਲਿਕਞ੍ਚੁਕਂ.
੨੫੭. ਪਾਤਿਚਙ੍ਕੋਟਕਾਦਿਨ੍ਤਿ ਏਤ੍ਥ ਪਾਤਿ ਨਾਮ ਪਟਿਗ੍ਗਹਸਣ੍ਠਾਨੇਨ ਕਤੋ ਸੂਚਿਆਦਿਭਣ੍ਡਟ੍ਠਪਨੋ ਭਾਜਨਵਿਸੇਸੋ. ਆਕਿਰਿਤ੍ਵਾਤਿ ਪਕ੍ਖਿਪਿਤ੍ਵਾ. ਓਧੁਨਿਤ੍ਵਾਤਿ ਪਪ੍ਫੋਟੇਤ੍ਵਾ. ਘਨਦਣ੍ਡਕਨ੍ਤਿ ਨਿਰਨ੍ਤਰਦਣ੍ਡਕਂ. ਅਨ੍ਤੋਕਤ੍ਵਾਤਿ ਕਥਿਨਸ੍ਸ ਅਨ੍ਤੋਕਤ੍ਵਾ.
੨੫੮. ਵਿਨਨ੍ਧਿਤ੍ਵਾਤਿ ਚੋਲ਼ਕੇਨ ਵਿਨਨ੍ਧਿਤ੍ਵਾ.
੨੫੯. ਅਪਰਿਸ੍ਸਾਵਨਕਸ੍ਸੇਵ ਭਿਕ੍ਖੁਨੋਤਿ ਯੋਜਨਾ. ਯੋ ਪਨ ਯਾਚਤੀਤਿ ਸਮ੍ਬਨ੍ਧੋ. ਮਜ੍ਝੇਦਣ੍ਡਕੇਤਿ ਦਣ੍ਡਕਸ੍ਸ ਮਜ੍ਝੇ. ਉਦਕਨ੍ਤਿ ਅਕਪ੍ਪਿਯਉਦਕਂ. ਤਨ੍ਤਿ ਉਦਕਂ. ਯਨ੍ਤਿ ਪਰਿਸ੍ਸਾਵਨਂ. ਉਦਕਂ ਪਰਿਸੁਦ੍ਧਂ ਹੁਤ੍ਵਾ ਸਵਤਿ ਗਚ੍ਛਤਿ ਪਵਤ੍ਤਤਿ ਅਨੇਨਾਤਿ ਪਰਿਸ੍ਸਾਵਨਂ. ਯਂ ਉਦਕੇ ਓਤ੍ਥਰਿਤ੍ਵਾ ਘਟੇਨ ਉਦਕਂ ਗਣ੍ਹਨ੍ਤਿ, ਤਂ ਓਤ੍ਥਰਕਂ ਨਾਮਾਤਿ ਯੋਜਨਾ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਤਂ ਹੀ’’ਤਿਆਦਿ. ਤਨ੍ਤਿ ਪਰਿਸ੍ਸਾਵਨਂ, ਬਨ੍ਧਿਤ੍ਵਾਤਿ ਸਮ੍ਬਨ੍ਧੋ. ਤੇਸੂਤਿ ਚਤੂਸੁ ਖਾਣੁਕੇਸੁ. ਸਬ੍ਬਪਰਿਯਨ੍ਤੇਤਿ ਸਬ੍ਬਪਰਿਸ੍ਸਾਵਨਸ੍ਸ ਪਰਿਯਨ੍ਤੇ ਮੋਚੇਤ੍ਵਾਤਿ ਸਮ੍ਬਨ੍ਧੋ. ਓਤ੍ਥਰਿਤ੍ਵਾਤਿ ਓਗਾਹੇਤ੍ਵਾ. ਚੀਵਰਕੁਟਿਕਾਤਿ ਚੀਵਰੇਨ ਕਤਾ ਕੁਟਿਕਾ, ਸਾ ਮਕਸਾਨਂ ਪਰਿਤ੍ਤਾਣਤ੍ਥਂ ਕਤਤ੍ਤਾ ਮਕਸਕੁਟਿਕਾਤਿ ਵੁਚ੍ਚਤਿ.
੨੬੦. ਸੇਮ੍ਹਾਦਿਦੋਸੁਸ੍ਸਨ੍ਨਕਾਯਾਤਿ ਸੇਮ੍ਹਾਦਿਦੋਸੇਹਿ ਉਸ੍ਸਨ੍ਨਕਾਯਾ. ਅਗ੍ਗਲ਼ਤ੍ਥਮ੍ਭੋਤਿ ਕਵਾਟਤ੍ਥਮ੍ਭੋ. ਯਤ੍ਥਾਤਿ ਅਗ੍ਗਲ਼ਤ੍ਥਮ੍ਭੇ. ਤਤ੍ਥਾਤਿ ਦ੍ਵਾਰਬਾਹਾਯ. ਤਤ੍ਥਾਤਿ ਅਗ੍ਗਲ਼ਪਾਸਕੇ. ਧੂਮੋ ਨਿਕ੍ਖਮਤਿ ਏਤੇਨਾਤਿ ਧੂਮਨੇਤ੍ਤੋ, ਛਿਦ੍ਦੋ. ਤੇਨ ਵੁਤ੍ਤਂ ‘‘ਧੂਮਨਿਕ੍ਖਮਨਛਿਦ੍ਦ’’ਨ੍ਤਿ. ‘‘ਗਨ੍ਧੇਹੀ’’ਤਿ ਇਮਿਨਾ ‘‘ਵਾਸੇਤੁ’’ਨ੍ਤਿ ਪਦਸ੍ਸ ਕਰਣਂ ਦਸ੍ਸੇਤਿ. ‘‘ਉਦਕਟ੍ਠਪਨਟ੍ਠਾਨ’’ਨ੍ਤਿ ਇਮਿਨਾ ਉਦਕਟ੍ਠਾਨਨ੍ਤਿ ਏਤ੍ਥ ਉਦਕਸ੍ਸ ਠਪਨਂ ਠਾਨਂ ਉਦਕਟ੍ਠਾਨਨ੍ਤਿ ਮਜ੍ਝੇਪਦਲੋਪਸਮਾਸਂ ਦਸ੍ਸੇਤਿ. ਤਤ੍ਥਾਤਿ ਉਦਕਟ੍ਠਾਨੇ. ਕੋਟ੍ਠਕੋਤਿ ਏਤ੍ਥ ਨ ਯਤ੍ਥ ਕਤ੍ਥਚਿ, ਯਸ੍ਸ ਕਸ੍ਸਚਿ ਵਾ ਕੋਟ੍ਠਕੋ ਹੋਤਿ, ਅਪਿ ਚ ਖੋ ਪਨ ਦ੍ਵਾਰੇ ਏਵ, ਦ੍ਵਾਰਸ੍ਸੇਵ ਵਾ ਕੋਟ੍ਠਕੋਤਿ ਆਹ ‘‘ਦ੍ਵਾਰਕੋਟ੍ਠਕੋ’’ਤਿ.
੨੬੧. ਪਰਿਕਮ੍ਮਨ੍ਤਿ ਪਿਟ੍ਠਿਆਦਿਪਰਿਕਮ੍ਮਂ. ਪਟਿਚ੍ਛਾਦਿਯਤਿ ਇਮਾਯਾਤਿ ਪਟਿਚ੍ਛਾਦਿ, ਵਤ੍ਥਮੇਵ ਪਟਿਚ੍ਛਾਦਿ ਵਤ੍ਥਪਟਿਚ੍ਛਾਦਿ. ਉਦਕਂ ਨ ਹੋਤੀਤਿ ਏਤ੍ਥ ਪਾਨੋਦਕਂ ਨਿਵਤ੍ਤੇਨ੍ਤੋ ਆਹ ‘‘ਨ੍ਹਾਨੋਦਕਂ ਨ ਹੋਤੀ’’ਤਿ.
੨੬੨. ਪਣ੍ਣਿਕਾਨਂ ਤੁਲਂ ਵਿਯ ਉਦਕਉਬ੍ਬਾਹਨਕਤੁਲਨ੍ਤਿ ਯੋਜਨਾ. ਦੀਘਵਰਤ੍ਤਾਦੀਹੀਤਿਆਦਿਸਦ੍ਦੇਨ ਰਜ੍ਜੁ ਆਦਯੋ ਸਙ੍ਗਣ੍ਹਾਤਿ. ਅਰਹਤ੍ਥਘਟਿਯਨ੍ਤਂ ਨਾਮ ਚਕ੍ਕਸਣ੍ਠਾਨਂ ਅਨੇਕਾਰਂ ਅਰੇ ਅਰੇ ਘਟਾਨਿ ਬਨ੍ਧਿਤ੍ਵਾ ਏਕੇਨ ਵਾ ਦ੍ਵੀਹਿ ਵਾ ਪਰਿਬ੍ਭਮਿਯਮਾਨਂ ਯਨ੍ਤਂ. ਅਰਸਙ੍ਖਾਤੇਸੁ ਹਤ੍ਥੇਸੁ ਘਟਾ ਬਨ੍ਧਿਤਬ੍ਬਾ ਏਤ੍ਥਾਤਿ ਅਰਹਤ੍ਥਘਟਿ, ਤਮੇਵ ਯਨ੍ਤਂ ਅਰਹਤ੍ਥਘਟਿਯਨ੍ਤਂ. ਚਮ੍ਮਭਾਜਨਨ੍ਤਿ ਚਮ੍ਮਮਯਂ ਭਾਜਨਂ. ਅਪਰਿਕ੍ਖਿਤ੍ਤਾ ਹੋਤੀਤਿ ਚਨ੍ਦਨਿਕਾ ਅਪਾਕਾਰਾ ਹੋਤਿ. ਉਦਕਪੁਞ੍ਜਨਂ ਵਟ੍ਟਤੀਤਿ ਸਮ੍ਬਨ੍ਧੋ. ਤਸ੍ਮਿਨ੍ਤਿ ਉਦਕਪੁਞ੍ਜਨੇ. ‘‘ਉਦਕਪੁਞ੍ਜਨੀ’’ਤਿਪਿ ਪਾਠੋ. ਏਵਂ ਸਤਿ ਤਾਯ ਉਦਕਪੁਞ੍ਜਨਿਯਾਤਿ ਅਤ੍ਥੋ. ਪਚ੍ਚੁਦ੍ਧਰਿਤੁਨ੍ਤਿ ਅਪਨੇਤੁਂ.
੨੬੩. ਆ ਸਮਨ੍ਤਤੋ ਵਿਦ੍ਧਂ ਪਕ੍ਖਪਾਸਕਮੇਤ੍ਥਾਤਿ ਆਵਿਦ੍ਧਪਕ੍ਖਪਾਸਕਂ. ਮਣ੍ਡਲੇਤਿ ਕਣ੍ਣਿਕਮਣ੍ਡਲਮ੍ਹਿ. ਕਤਂ ਕੂਟਞ੍ਚ ਛਦਨਞ੍ਚ ਏਤ੍ਥਾਤਿ ਕਤਕੂਟਚ੍ਛਦਨਂ, ਜਨ੍ਤਾਘਰਂ, ਤਸ੍ਸ. ਏਤਨ੍ਤਿ ‘‘ਨਿਲ੍ਲੇਖਜਨ੍ਤਾਘਰ’’ਨ੍ਤਿ ਏਤਂ ਨਾਮਂ. ‘‘ਚਤ੍ਤਾਰੋ ਮਾਸੇ’’ਤਿ ਇਮਿਨਾ ‘‘ਚਤੁਮਾਸ’’ਨ੍ਤਿ ਦਿਗੁਸਮਾਸਸ੍ਸ ਵਾਕ੍ਯਂ ਦਸ੍ਸੇਤਿ.
੨੬੪. ਨਮਤਕਨ੍ਤਿ ਏਤ੍ਥ ਹੇਟ੍ਠਾ ਵੁਤ੍ਤਨਮਤਕਤੋ (ਚੂਲ਼ਵ. ਅਟ੍ਠ. ੨੫੬) ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਏਲ਼ਕਲੋਮੇਹੀ’’ਤਿਆਦਿ. ਅਵਾਯਿਮਨ੍ਤਿ ਵਾਯਿਤ੍ਵਾ ਨ ਕਤਂ. ਚਮ੍ਮਖਣ੍ਡਪਰਿਹਾਰੇਨਾਤਿ ਚਮ੍ਮਖਣ੍ਡਂ ਵਿਯ ਅਧਿਟ੍ਠਾਨਵਿਕਪ੍ਪਨਅਪਨਯਨੇਨ, ਪਰਿਭੁਞ੍ਜਿਤਬ੍ਬਨ੍ਤਿ ਅਤ੍ਥੋ. ਪੇਲ਼ਾਯਾਤਿ ਅਟ੍ਠਂਸਾਦਿਆਕਾਰੇਨ ਕਤਾਯ ਮਞ੍ਜੂਸਾਯ. ਏਤਨ੍ਤਿ ‘‘ਆਸਿਤ੍ਤਕੂਪਧਾਨ’’ਨ੍ਤਿ ਏਤਂ ਨਾਮਂ. ਦਾਰੁਮਯਾਪੀਤਿ ਪਿਸਦ੍ਦੋ ਨ ਤਮ੍ਬਲੋਹਰਜਤਮਯਾ ਏਵਾਤਿ ਦਸ੍ਸੇਤਿ. ਏਤ੍ਥੇਵਾਤਿ ਮਲ਼ੋਰਿਕਾਯਮੇਵ. ਆਧਾਰਕਸਙ੍ਖੇਪਗਮਨਤੋਤਿ ਆਧਾਰਕੇ ਸਙ੍ਖੇਪਂ ਗਮਨਤੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪੁਬ੍ਬੇ ਪਤ੍ਤਰਕ੍ਖਨਤ੍ਥਂ ਆਧਾਰਕੋ ਅਨੁਞ੍ਞਾਤੋ, ਇਦਾਨਿ ਭੁਞ੍ਜਨਤ੍ਥਨ੍ਤਿ ਦਟ੍ਠਬ੍ਬਂ. ਏਕੋ ਭਿਕ੍ਖੁ ਗਚ੍ਛਤੀਤਿ ਸਮ੍ਬਨ੍ਧੋ. ਸੇਸਕਨ੍ਤਿ ਗਹੇਤਬ੍ਬਫਲਪੂਵੇਹਿ ਸੇਸਕਂ. ਤਸ੍ਮਿਂ ਖਣੇਤਿ ਤਸ੍ਮਿਂ ਭੁਞ੍ਜਨਕ੍ਖਣੇ.
੨੬੫. ਏਕੇਕੇਨਪਿ ਅਙ੍ਗੇਨਾਤਿ ਪਿਸਦ੍ਦੋ ਸਮ੍ਭਾਵਨਤ੍ਥੋ, ਤਤੋ ਪਨ ਅਧਿਕੇਹਿ ਅਙ੍ਗੇਹਿ ਪਗੇਵਾਤਿ ਹਿ ਅਤ੍ਥੋ. ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਨਿਕ੍ਕੁਜ੍ਜਿਤੁਨ੍ਤਿ ਸਮ੍ਬਨ੍ਧੋ. ਤਸ੍ਸਾਤਿ ਉਪਾਸਕਸ੍ਸ. ਨ ਗਹੇਤਬ੍ਬੋਤਿ ਸਙ੍ਘੇਨ ਨ ਗਹੇਤਬ੍ਬੋ. ਅਸੁਕਸ੍ਸ ਉਪਾਸਕਸ੍ਸਾਤਿ ਸਮ੍ਬਨ੍ਧੋ. ਉਕ੍ਕੁਜ੍ਜਨਕਾਲੇਤਿ ਪਤ੍ਤਸ੍ਸ ਉਕ੍ਕੁਜ੍ਜਨਕਾਲੇ. ਯਾਚਾਪੇਤ੍ਵਾਤਿ ਪਤ੍ਤਨਿਕੁਜ੍ਜਿਤੇਨ ਉਪਾਸਕੇਨ ਯਾਚਾਪੇਤ੍ਵਾ. ਹਤ੍ਥਪਾਸਨ੍ਤਿ ਸਙ੍ਘਸ੍ਸ ਹਤ੍ਥਪਾਸਂ.
੨੬੮. ਪੁਰਕ੍ਖਤ੍ਵਾਤਿ ਏਤ੍ਥ ਪੁਰਸਦ੍ਦਸ੍ਸ ਅਗ੍ਗਤ੍ਥਭਾਵਞ੍ਚ ਕਰਸਦ੍ਦਸ੍ਸ ਖਾਦੇਸਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਅਗ੍ਗਤੋ ਕਤ੍ਵਾ’’ਤਿ. ਸੋਤਿ ਬੋਧਿਰਾਜਕੁਮਾਰੋ, ਸਨ੍ਥਰੀਤਿ ਸਮ੍ਬਨ੍ਧੋ. ਲਚ੍ਛਾਮੀਤਿ ਲਭਿਸ੍ਸਾਮਿ, ਏਸ ਬੋਧਿਰਾਜਕੁਮਾਰੋ ਪੁਤ੍ਤਲਾਭਾਯ ਅਭਬ੍ਬੋਤਿ ਯੋਜਨਾ. ਅਕ੍ਕਮਨੇ ਦੋਸਂ ਦਸ੍ਸੇਨ੍ਤੋ ਆਹ ‘‘ਯਦੀ’’ਤਿਆਦਿ. ਪਚ੍ਛਾਤਿ ਅਕ੍ਕਮਨਤੋ ਪਚ੍ਛਾ. ਅਯਨ੍ਤਿ ਭਗਵਾ. ਇਦਨ੍ਤਿ ਕਾਰਣਂ. ਤਾਵਾਤਿ ਸਿਕ੍ਖਾਪਦਪਞ੍ਞਤ੍ਤਿਤੋ, ਸਿਕ੍ਖਾਪਦਪਞ੍ਞਤ੍ਤਿਯਾ ਵਾ ਪਠਮਂ. ਪਰਿਭਵਤੋਤਿ ਗਿਹੀਨਂ ਪਰਿਭਵਤੋ.
ਮਙ੍ਗਲਤ੍ਥਾਯਾਤਿ ਅਰੋਗਾਦਿਕਸ੍ਸ ਮਙ੍ਗਲਸ੍ਸ ਅਤ੍ਥਾਯ. ਧੋਤਪਾਦਕਨ੍ਤਿ ਏਤ੍ਥ ਧੋਤੇਹਿ ਪਾਦੇਹਿ ਅਕ੍ਕਮਨਟ੍ਠਾਨੇ ਅਤ੍ਥਰਿਤਂ ਧੋਤਪਾਦਕਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਧੋਤਪਾਦਕਂ ਨਾਮਾ’’ਤਿਆਦਿ. ਤਤ੍ਥ ‘‘ਪਚ੍ਚਤ੍ਥਰਣਂ ਅਤ੍ਥਤ’’ਨ੍ਤਿ ਇਮਿਨਾ ‘‘ਧੋਤਪਾਦਕ’’ਨ੍ਤਿ ਏਤ੍ਥ ਣਿਕਪਚ੍ਚਯਸ੍ਸ ਅਤ੍ਥਰਿਤਤ੍ਥੇ ਪਵਤ੍ਤਭਾਵਂ ਦਸ੍ਸੇਤਿ.
੨੬੯. ਪਦੁਮਕਣ੍ਣਿਕਾਕਾਰਨ੍ਤਿ ਪਦੁਮਕਣ੍ਣਿਕਸਣ੍ਠਾਨਂ. ਕਤਂ ਪਾਦਘਂਸਨਂ ਕਤਕਂ ਨਾਮਾਤਿ ਯੋਜਨਾ. ਤਨ੍ਤਿ ਕਤਕਂ, ਪਟਿਕ੍ਖਿਤ੍ਤਮੇਵਾਤਿ ਸਮ੍ਬਨ੍ਧੋ. ਪੋਤ੍ਥਕੇਸੁ ਤਂਸਦ੍ਦੋ ਗਲਿਤੋਤਿ ਦਟ੍ਠਬ੍ਬੋ. ਬਾਹੁਲ੍ਲਿਕਾਨੁਯੋਗਤ੍ਤਾਤਿ ਪਚ੍ਚਯਬਹੁਲਭਾਵਾਯ ਅਨੁਯੋਗਤ੍ਤਾ. ਪਾਸਾਣਫੇਣਕੋਪੀਤਿ ਪਾਸਾਣਅਬ੍ਬੁਦਮ੍ਪਿ. ਬੀਜਨੀਤਿ ਚਤੁਰਸ੍ਸਬੀਜਨੀ. ਤਨ੍ਤਿ ਵਿਧੂਪਨਂ, ਕਤਂ ਹੋਤੂਤਿ ਸਮ੍ਬਨ੍ਧੋ. ਇਧਾਪਿ ਤਂਸਦ੍ਦੋ ਗਲਿਤੋ. ਵੇਲ਼ੁਦਨ੍ਤਵਿਲੀਵੇਹਿ ਵਾ ਮੋਰਪਿਞ੍ਛੇਹਿ ਵਾ ਚਮ੍ਮਵਿਕਤੀਹਿ ਵਾ ਕਤਂ ਹੋਤੂਤਿ ਯੋਜਨਾ. ਸਬ੍ਬਂ ਵਿਧੂਪਨਨ੍ਤਿ ਸਮ੍ਬਨ੍ਧੋ. ਪਾਲ਼ਿਯਂ ਤਾਲਵਣ੍ਟਨ੍ਤਿ ਸਹ ਵਣ੍ਟੇਨ ਕਤਂ ਤਾਲਂ ਤਾਲਵਣ੍ਟਂ, ਤਾਲਸਦ੍ਦੇਨ ਤਂਮਯਾ ਮਣ੍ਡਲਬੀਜਨੀ ਗਹੇਤਬ੍ਬਾ ਵਿਕਾਰੀਵਿਕਾਰਭਾਵੇਨ ਸਮ੍ਬਨ੍ਧਤ੍ਤਾ. ਮਕਸਬੀਜਨੀਤਿ ਮਕਸਾਨਂ ਪਲਾਯਨਕਬੀਜਨੀ, ਦਨ੍ਤਮਯਵਿਸਾਣਮਯਦਣ੍ਡਕਾਪਿ ਮਕਸਬੀਜਨੀ ਵਟ੍ਟਤੀਤਿ ਯੋਜਨਾ. ‘‘ਵਾਕਮਯਬੀਜਨਿਯਾ’’ਤਿ ਪਦਂ ‘‘ਸਙ੍ਗਹਿਤਾ’’ਤਿ ਪਦੇ ਆਧਾਰੋ, ਕਰਣਂ ਵਾ.
੨੭੦. ਯਸ੍ਸਾਤਿ ਭਿਕ੍ਖੁਸ੍ਸ ਚਕ੍ਖੁਂ ਵਾ ਦੁਬ੍ਬਲਂ ਹੋਤੀਤਿ ਯੋਜਨਾ. ਅਞ੍ਞੋਤਿ ਕਾਯਡਾਹਾਦੀਹਿ ਆਬਾਧੇਹਿ ਅਞ੍ਞੋ, ਕੋਚਿ ਆਬਾਧੋ ਵਾ ਉਪ੍ਪਜ੍ਜਤੀਤਿ ਯੋਜਨਾ. ‘‘ਵਸ੍ਸੇ ਪਨਾ’’ਤਿ ਪਦਂ ‘‘ਚੀਵਰਗੁਤ੍ਤਤ੍ਥ’’ਨ੍ਤਿ ਪਦੇ ਏਵ ਸਮ੍ਬਨ੍ਧਿਤਬ੍ਬਂ. ਚੀਵਰਗੁਤ੍ਤਤ੍ਥਨ੍ਤਿ ਚੀਵਰਸ੍ਸ ਵਸ੍ਸਤੇਮਨਤੋ ਗੁਤ੍ਤਤ੍ਥਂ, ਵਾਲ਼ਮਿਗਚੋਰਭਯੇਸੁ ਸਨ੍ਤੇਸੂਤਿ ਸਮ੍ਬਨ੍ਧੋ. ਤਾਲਪਣ੍ਣਾਦਿਨਾ ਏਕੇਨ ਪਣ੍ਣੇਨ ਕਤਂ ਛਤ੍ਤਂ ਏਕਪਣ੍ਣਚ੍ਛਤ੍ਤਂ. ਸਬ੍ਬਤ੍ਥੇਵਾਤਿ ਸਬ੍ਬੇਸੁ ਏਵ ਗਾਮਾਰਞ੍ਞੇਸੁ.
‘‘ਅਸਿ ਅਸ੍ਸਾ’’ਤਿ ਇਮਿਨਾ ਅਸਿਸ੍ਸਾਤਿ ਪਦਸ੍ਸ ਅਨਵਕਾਸਵਿਧਿਂ ਦਸ੍ਸੇਤਿ. ਅਸੀਤਿ ਖਗ੍ਗੋ. ਅਸ੍ਸਾਤਿ ਚੋਰਸ੍ਸ, ਅਸੀਤਿ ਸਮ੍ਬਨ੍ਧੋ. ਵਿਜ੍ਜੋਤਲਤੀਤਿ ਏਤ੍ਥ ਅਲਪਚ੍ਚਯੋ ਰੂਪਸਿਦ੍ਧਿਮਤ੍ਤੋਵਾਤਿ ਆਹ ‘‘ਵਿਜ੍ਜੋਤਤੀ’’ਤਿ. ‘‘ਚਤੁਹਤ੍ਥੋਯੇਵਾ’’ਤਿ ਇਮਿਨਾ ਪਮਾਣਯੁਤ੍ਤੋਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਤਤੋਤਿ ਚਤੁਹਤ੍ਥਤੋ. ਸਬ੍ਬੇਸਨ੍ਤਿ ਗਿਲਾਨਾਗਿਲਾਨਾਨਂ. ‘‘ਸਕ੍ਕਾ ਪਨਾ’’ਤਿ ਪਦਂ ‘‘ਨ ਵਟ੍ਟਤੀ’’ਤਿ ਪਦੇ ਕਤ੍ਤਾ, ‘‘ਦਾਤਬ੍ਬਾ’’ਤਿ ਪਦੇ ਕਮ੍ਮਂ. ਸਮ੍ਮਨ੍ਨਿਤ੍ਵਾਵ ਦਾਤਬ੍ਬਾ, ਨ ਵਿਨਾ ਸਮ੍ਮੁਤਿਯਾਤਿ ਅਧਿਪ੍ਪਾਯੋ.
੨੭੩. ਆਗਤਨ੍ਤਿ ਉਦਰਿਯਤੋ ਨਿਕ੍ਖਮਿਤ੍ਵਾ ਆਗਤਂ. ਉਗ੍ਗਾਰਨ੍ਤਿ ਗਲਤੋ ਉਗ੍ਗਾਰਂ ਭੋਜਨਨ੍ਤਿ ਸਮ੍ਬਨ੍ਧੋ. ਸਨ੍ਧਾਰੇਤ੍ਵਾਤਿ ਪਤਿਟ੍ਠਾਪੇਤ੍ਵਾ. ਅਸਨ੍ਧਾਰਿਤਮੇਵ ਹੁਤ੍ਵਾਤਿ ਸਮ੍ਬਨ੍ਧੋ.
ਯਨ੍ਤਿ ਖਾਦਨੀਯਭੋਜਨੀਯਂ, ਪਤਿਤਨ੍ਤਿ ਸਮ੍ਬਨ੍ਧੋ. ਤਨ੍ਤਿ ਖਾਦਨੀਯਭੋਜਨੀਯਂ, ਗਹੇਤ੍ਵਾ ਪਰਿਭੁਞ੍ਜਿਤੁਨ੍ਤਿ ਸਮ੍ਬਨ੍ਧੋ. ਇਦਨ੍ਤਿ ਵਚਨਂ.
੨੭੪. ਕੁਬ੍ਬਂ ਕਰਿਸ੍ਸਾਮੀਤਿ ਏਤ੍ਥ ਕਰਿਯਤਿ ਉਚ੍ਚਾਰਿਯਤੀਤਿ ਕੁਬ੍ਬਨ੍ਤਿ ਵੁਤ੍ਤੇ ਸਦ੍ਦੋਤਿ ਆਹ ‘‘ਸਦ੍ਦਂ ਕਰਿਸ੍ਸਾਮੀ’’ਤਿ. ਸਦ੍ਦਨ੍ਤਿ ‘‘ਅਯਂ ਮਂ ਭਿਕ੍ਖੁ ਵਿਪ੍ਪਕਰੋਤੀ’’ਤਿ ਉਚ੍ਚਾਸਦ੍ਦਂ. ਨਖਾਦੀਹੀਤਿਆਦਿਸਦ੍ਦੇਨ ਮੁਖਕੁਟ੍ਟੇ ਸਙ੍ਗਣ੍ਹਾਤਿ. ਅਨੁਰਕ੍ਖਨਤ੍ਥਨ੍ਤਿ ਅਨੁਦਯੇਨ ਪਾਲਨਤ੍ਥਂ. ਨਖਚ੍ਛੇਦਨਨ੍ਤਿ ਨਖਂ ਛਿਨ੍ਦਤਿ ਅਨੇਨਾਤਿ ਨਖਚ੍ਛੇਦਨਂ, ਸਤ੍ਥਕਾਦਿ. ਵੀਸਤਿਮਟ੍ਠਨ੍ਤਿ ਏਤ੍ਥ ਵੀਸਤਿਯਾ ਨਖਾਨਂ ਮਟ੍ਠਂ ਵੀਸਤਿਮਟ੍ਠਨ੍ਤਿ ਦਸ੍ਸੇਨ੍ਤੋ ਆਹ ‘‘ਵੀਸਤਿਪਿ ਨਖੇ’’ਤਿਆਦਿ. ਲਿਖਿਤਮਟ੍ਠੇਤਿ ਲਿਖਿਤੇ ਹੁਤ੍ਵਾ ਮਟ੍ਠੇ. ਕਾਰਾਪੇਨ੍ਤੀਤਿ ਨਹਾਪਿਤੇ ਕਾਰਾਪੇਨ੍ਤਿ. ਨਖਤੋਤਿ ਨਖਤੋ ਵਾ ਨਖਨ੍ਤਰਤੋ ਵਾ. ਅਪਕਡ੍ਢਿਤੁਨ੍ਤਿ ਕਡ੍ਢਿਤ੍ਵਾ ਅਪਨੇਤੁਂ.
੨੭੫. ਖੁਰਕੋਸਕਨ੍ਤਿ ਖੁਰਸ੍ਸ ਠਪਨਕਂ. ਕਤ੍ਤਰਿਯਾਤਿ ਕਨ੍ਤਿਯਤਿ ਛਿਨ੍ਦਿਯਤਿ ਇਮਾਯਾਤਿ ਕਤ੍ਤਰਿ, ਅਯੋਮਯੋ ਏਕੋ ਉਪਕਰਣਵਿਸੇਸੋ, ਤਾਯ. ‘‘ਛੇਦਾਪੇਨ੍ਤੀ’’ਤਿ ਇਮਿਨਾ ਕਪ੍ਪਾਪੇਨ੍ਤੀਤਿ ਏਤ੍ਥ ਕਪ੍ਪਸਦ੍ਦਸ੍ਸ ਵਿਧ੍ਯਤ੍ਥਂ ਅਧਿਪ੍ਪਾਯੇਨ ਦਸ੍ਸੇਤਿ. ਮਸ੍ਸੁਂ ਵਡ੍ਢਾਪੇਨ੍ਤੀਤਿ ਏਤ੍ਥ ਮਸ੍ਸੁਂ ਵਡ੍ਢੇਤ੍ਵਾ ਰੁਹਾਪੇਨ੍ਤੀਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਮਸ੍ਸੁਂ ਦੀਘਂ ਕਾਰਾਪੇਨ੍ਤੀ’’ਤਿ. ਏਲ਼ਕਮਸ੍ਸੂਤਿ ਏਲ਼ਕਸ੍ਸ ਵਿਯ ਮਸ੍ਸੂਤਿ ਏਲ਼ਕਮਸ੍ਸੁ. ‘‘ਗੋਲੋਮਿਕ’’ਨ੍ਤਿ ਵੁਚ੍ਚਤੀਤਿ ਸਮ੍ਬਨ੍ਧੋ. ‘‘ਚਤੁਕੋਣ’’ਨ੍ਤਿ ਇਮਿਨਾ ਚਤੁਰਸ੍ਸਨ੍ਤਿ ਏਤ੍ਥ ਅਂਸਸਦ੍ਦੋ ਕੋਣਤ੍ਥੋਤਿ ਦਸ੍ਸੇਤਿ. ਚਤੁਰਸ੍ਸਨ੍ਤਿ ਏਤ੍ਥ ਹਿ ‘‘ਚਤੁਰਂਸ’’ਨ੍ਤਿ ਵਤ੍ਤਬ੍ਬੇ ਨਿਗ੍ਗਹਿਤਸ੍ਸ ਲੋਪਂ ਕਤ੍ਵਾ ਪਰਸ੍ਸ ਸਕਾਰਸ੍ਸ ਦ੍ਵੇਭਾਵਂ ਕਤ੍ਵਾ ‘‘ਚਤੁਰਸ੍ਸ’’ਨ੍ਤਿ ਵੁਤ੍ਤਂ. ਲੋਮਸਂਹਰਣਨ੍ਤਿ ਲੋਮਾਨਂ ਅਪਨਯਨਂ. ਲੋਮਰਾਜਿਟ੍ਠਪਨਨ੍ਤਿ ਲੋਮਲੇਖਾਠਪਨਂ. ਸਬ੍ਬਤ੍ਥਾਤਿ ਸਬ੍ਬੇਸੁ, ਮਸ੍ਸੁਕਪ੍ਪਨਾਦੀਸੂਤਿ ਸਮ੍ਬਨ੍ਧੋ. ਗਣ੍ਡਵਣਰੁਧਿਆਬਾਧਪਚ੍ਚਯਾਤਿ ਗਣ੍ਡੋ ਚ ਵਣੋ ਚ ਰੁਧਿ ਚ ਗਣ੍ਡਵਣਰੁਧਯੋ, ਤੇਯੇਵ ਆਬਾਧਾ ਗਣ੍ਡਵਣਰੁਧਿਆਬਾਧਾ, ਤੇਸਂ ਪਚ੍ਚਯਾ. ਵਣੋਤਿ ਮਹਨ੍ਤੋ ਵਣੋ. ਰੁਧੀਤਿ ਖੁਦ੍ਦਕੋ ਵਣੋ. ਸਕ੍ਖਰਾਦੀਹੀਤਿ ਸਕ੍ਖਰਮਧੁਸਿਤ੍ਥਕੇਹਿ. ਸਣ੍ਡਾਸੋਤਿ ਸੁਟ੍ਠੁ ਲੋਮਂ ਡਂਸਤੀਤਿ ਸਣ੍ਡਾਸੋ. ਯਨ੍ਤਿ ਲੋਮਂ, ਠਿਤਨ੍ਤਿ ਸਮ੍ਬਨ੍ਧੋ. ਕਤ੍ਥ ਠਿਤਨ੍ਤਿ ਆਹ ‘‘ਭਮੁਕਾਯ ਵਾ’’ਤਿਆਦਿ. ਕਿਂ ਹੁਤ੍ਵਾ ਠਿਤਨ੍ਤਿ ਆਹ – ‘‘ਉਗ੍ਗਨ੍ਤ੍ਵਾ ਵਿਭਚ੍ਛਂ ਠਿਤ’’ਨ੍ਤਿ, ਵਿਭਚ੍ਛਂ ਹੁਤ੍ਵਾ ਠਿਤਨ੍ਤਿ ਯੋਜਨਾ. ਵਿਸੇਸੇਨ ਸੋਭਣਂ ਭਕ੍ਖਤੀਤਿ ਵਿਭਚ੍ਛੋ, ਅਸੋਭਣੋ. ‘‘ਵਿਗਚ੍ਛ’’ਨ੍ਤਿਪਿ ਪਾਠੋ, ਵਿਰੂਪਂ ਗਚ੍ਛਤਿ, ਗਮਯਤੀਤਿ ਵਾ ਵਿਗਚ੍ਛੋ. ਤਤ੍ਥ ਪੁਰਿਮਪਾਠੋਯੇਵ ਮੂਲਪਾਠੋਤਿ ਦਟ੍ਠਬ੍ਬੋਤਿ. ਪਲਿਤਂ ਵਾ ਅਪਲਿਤਂ ਵਾ ਤਾਦਿਸਂ ਲੋਮਨ੍ਤਿ ਯੋਜਨਾ.
੨੭੭. ਕਂਸਪਤ੍ਥਰਿਕਾਤਿ ਏਤ੍ਥ ਕਂਸਆਪਣੇ ਪਤ੍ਥਰਨ੍ਤਿ ਪਸਾਰੇਨ੍ਤੀਤਿ ਕਂਸਪਤ੍ਥਰਿਕਾਤਿ ਵੁਤ੍ਤੇ ਕਂਸਭਣ੍ਡਵਾਣਿਜਾ ਗਹੇਤਬ੍ਬਾਤਿ ਆਹ ‘‘ਕਂਸਭਣ੍ਡਵਾਣਿਜਾ’’ਤਿ. ਵਾਸਿਦਣ੍ਡਾਦੀਨਂ ਅਪਾਤਨਤ੍ਥਂ ਬਨ੍ਧਤਿ ਅਨੇਨ ਲੋਹੇਨਾਤਿ ਬਨ੍ਧਨਂ, ਤਮੇਵ ਮਤ੍ਤਂ ਅਪ੍ਪਨ੍ਤਿ ਬਨ੍ਧਨਮਤ੍ਤਂ.
੨੭੮. ਨਿਕ੍ਖਮਨ੍ਤੇਨਾਤਿ ਆਰਾਮਤੋ ਨਿਕ੍ਖਮਨ੍ਤੇਨ. ਯਤ੍ਥਾਤਿ ਯਸ੍ਮਿਂ ਠਾਨੇ. ‘‘ਸਰਿਤ੍ਵਾ’’ਤਿ ਇਮਿਨਾ ਅਸਰਿਤ੍ਵਾ ਪਿਣ੍ਡਾਯ ਚਰਿਤਬ੍ਬਨ੍ਤਿ ਦਸ੍ਸੇਤਿ. ਬਹੁਰਜ੍ਜੁਕਨ੍ਤਿ ਬਹੂ ਰਜ੍ਜੁਯੋ ਏਤਸ੍ਸਾਤਿ ਬਹੁਰਜ੍ਜੁਕਂ. ਇਮਿਨਾ ਕਲਾਪੇਨ ਬਹੁਰਜ੍ਜੂਨਂ ਸਮੂਹੇਨ ਕਤ੍ਤਬ੍ਬਨ੍ਤਿ ਕਲਾਪੁਕਨ੍ਤਿ ਵਚਨਤ੍ਥਂ ਦਸ੍ਸੇਤਿ, ਇਕਾਰਸ੍ਸੁਕਾਰੋ. ਦੇਡ੍ਡੁਭਕਨ੍ਤਿ ਏਤ੍ਥ ਦੇਡ੍ਡੁਭਸਦ੍ਦੇਨ ਤਸ੍ਸ ਸੀਸਂ ਗਹੇਤਬ੍ਬਂ ਏਕਦੇਸੂਪਚਾਰੇਨ, ਦੇਡ੍ਡੁਭਂ ਵਿਯਾਤਿ ਦੇਡ੍ਡੁਭਕਂ, ਸਦਿਸਤ੍ਥੇ ਕਪਚ੍ਚਯੋ ਹੋਤਿ. ਤੇਨ ਵੁਤ੍ਤਂ ‘‘ਉਦਕਸਪ੍ਪਸੀਸਸਦਿਸ’’ਨ੍ਤਿ. ‘‘ਮੁਰਜਵਟ੍ਟਿਸਣ੍ਠਾਨ’’ਨ੍ਤਿ ਇਮਿਨਾ ਮੁਰਜਸਦ੍ਦੇਨ ਮੁਰਜਵਟ੍ਟਿ ਗਹੇਤਬ੍ਬਾ ਤਸ੍ਸ ਵਿਕਾਰਤ੍ਤਾ, ਤੇਨ ਸਦਿਸਂ ਮੁਰਜਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਵੇਠੇਤ੍ਵਾਤਿ ਬਹੁਰਜ੍ਜੁਕੇ ਏਕਤੋ ਵੇਠੇਤ੍ਵਾ. ਮਦ੍ਦਵੀਣਸਦ੍ਦੋ ਪਾਮਙ੍ਗਪਰਿਯਾਯੋ. ਮਦ੍ਦਵੀਣਂ ਵਿਯਾਤਿ ਮਦ੍ਦਵੀਣਂ. ਤੇਨ ਵੁਤ੍ਤਂ ‘‘ਪਾਮਙ੍ਗਸਣ੍ਠਾਨ’’ਨ੍ਤਿ. ‘‘ਪਗੇਵ ਬਹੂਨੀ’’ਤਿ ਇਮਿਨਾ ‘‘ਏਕਮ੍ਪੀ’’ਤਿ ਏਤ੍ਥ ਪਿਸਦ੍ਦਸ੍ਸ ਸਮ੍ਭਾਵਨਤ੍ਥਂ ਦਸ੍ਸੇਤਿ. ਮਚ੍ਛਕਣ੍ਟਕਵਾਯਿਮਾਤਿ ਮਚ੍ਛਕਣ੍ਟਕਂ ਵਿਯ ਦਸ੍ਸੇਤ੍ਵਾ ਵਾਯਿਮਾ. ਕੁਞ੍ਜਰਚ੍ਛਿਕਾਦਿਭੇਦਾਤਿ ਵਾਰਣਅਚ੍ਛਿਕਾਦਿਭੇਦਾ. ਵਾਰਣੋ ਹਿ ਕੁਂ ਭੂਮਿਂ ਜਰਾਪੇਤੀਤਿ ਕੁਞ੍ਜਰੋਤਿ (ਵਿ. ਵ. ਅਟ੍ਠ. ੩੧; ਅ. ਨਿ. ਟੀ. ੧.੧.੨) ਚ ਕੁਞ੍ਜੇ ਨਿਕੁਞ੍ਜੇ ਰਮਤੀਤਿ ਕੁਞ੍ਜਰੋਤਿ ਚ ਵੁਚ੍ਚਤਿ. ਤਸ੍ਸ ਅਚ੍ਛਿ ਵਿਯਾਤਿ ਕੁਞ੍ਜਰਚ੍ਛਿਕਂ, ਤਂ ਆਦਿ ਯੇਸਂ ਤਾਨੀਤਿ ਕੁਞ੍ਜਰਚ੍ਛਿਕਾਦੀਨਿ, ਤੇਸਂ ਭੇਦਾਤਿ ਕੁਞ੍ਜਰਚ੍ਛਿਕਾਦਿਭੇਦਾ. ਆਦਿਸਦ੍ਦੇਨ ਗੋਣਚ੍ਛਿਕਾਦਯੋ ਸਙ੍ਗਣ੍ਹਾਤਿ. ‘‘ਕੁਞ੍ਚਿਕਾਕੋਸਕਸਣ੍ਠਾਨ’’ਨ੍ਤਿ ਇਮਿਨਾ ਸੂਕਰਸ੍ਸ ਅਨ੍ਤਂ ਵਿਯ ਸੂਕਰਨ੍ਤਕਨ੍ਤਿ ਅਤ੍ਥਂ ਦਸ੍ਸੇਤਿ. ਸੂਕਰਸ੍ਸ ਹਿ ਅਨ੍ਤਂ ਕੁਞ੍ਚਿਕਾਕੋਸਕਂ ਵਿਯ ਮਜ੍ਝੇ ਸੁਸਿਰੋ ਹੋਤਿ. ਸੂਕਰਨ੍ਤਕਂ ਅਨੁਲੋਮੇਤੀਤਿ ਸੂਕਰਨ੍ਤਕੇਨ ਅਨੁਲੋਮੇਤਿ. ਦਸਾਸੁਯੇਵਾਤਿ ਕਾਯਬਨ੍ਧਨਸ੍ਸ ਅਨ੍ਤੇਸੁਯੇਵ. ਏਤ੍ਥਾਤਿ ਦਸਾਸੁ. ‘‘ਚਤੁਨ੍ਨਂ ਉਪਰਿ ਨ ਵਟ੍ਟਤੀ’’ਤਿ ਇਮਿਨਾ ਮੁਰਜਦਸਾ ਤਤੋ ਉਪਰਿ ਵਟ੍ਟਤੀਤਿ ਦਸ੍ਸੇਤਿ. ਵੇਠੇਤ੍ਵਾਤਿ ਰਜ੍ਜੁਂ ਵਤ੍ਥੇਨ ਵੇਠੇਤ੍ਵਾ. ਮੁਦ੍ਦਿਕਸਣ੍ਠਾਨੇਨਾਤਿ ਵਰਕਸੀਸਸਣ੍ਠਾਨੇਨ. ਏਵਂ ਸਿਬ੍ਬਿਤਾਤਿ ਏਵਂ ਸਿਬ੍ਬਿਯਮਾਨਾ. ਹੀਤਿ ਫਲਜੋਤਕੋ. ਪਾਸਨ੍ਤੋਤਿ ਪਾਸਕੋਟਿ.
੨੮੦. ਓਲਮ੍ਬਕਂ ਕਤ੍ਵਾ ਨਿਵਤ੍ਥਂ ਹਤ੍ਥਿਸੋਣ੍ਡਕਂ ਨਾਮਾਤਿ ਯੋਜਨਾ. ਚੋਲ਼ਿਕਇਤ੍ਥੀਨਨ੍ਤਿ ਚੋਲ਼ਰਟ੍ਠੇ ਨਿਵਾਸੀਨਂ ਇਤ੍ਥੀਨਂ. ਹਤ੍ਥਿਯਾ ਸੋਣ੍ਡੋ ਵਿਯ ਹਤ੍ਥਿਸੋਣ੍ਡਕਂ ਨਿਵਤ੍ਥਂ. ਮਚ੍ਛਵਾਲਂ ਵਿਯਾਤਿ ਮਚ੍ਛਵਾਲਕਂ. ਚਤ੍ਤਾਰੋ ਕਣ੍ਣਾ ਏਤਸ੍ਸ ਨਿਵਤ੍ਥਸ੍ਸਾਤਿ ਚਤੁਕਣ੍ਣਕਂ. ਤਾਲਵਣ੍ਟਂ ਵਿਯਾਤਿ ਤਾਲਵਣ੍ਟਕਂ. ਸਤਂ ਵਲਿਨੋ ਏਤਸ੍ਸ ਨਿਵਤ੍ਥਸ੍ਸਾਤਿ ਸਤਵਲਿਕਂ. ‘‘ਅਨੇਕਕ੍ਖਤ੍ਤੁ’’ਨ੍ਤਿ ਇਮਿਨਾ ‘‘ਸਤਵਲਿਕ’’ਨ੍ਤਿ ਏਤ੍ਥ ਸਤਸਦ੍ਦਸ੍ਸ ਅਨੇਕਤ੍ਥਵਾਚਕਤਂ ਦਸ੍ਸੇਤਿ. ‘‘ਵਾਮਦਕ੍ਖਿਣਪਸ੍ਸੇਸੁ ਵਾ’’ਤਿ ਇਮਿਨਾ ਪੁਰਿਮਨਿਵਤ੍ਥਂ ਕਟਿਤੋ ਪਟ੍ਠਾਯ ਹੇਟ੍ਠਾ ਨਿਵਤ੍ਥਂ ਨਾਮਾਤਿ ਦਸ੍ਸੇਤਿ.
ਸਂਵਲ੍ਲਿਤ੍ਵਾ ਨਿਵਤ੍ਥਂ ਸਂਵਲ੍ਲਿਯਂ. ਮਲ੍ਲੋ ਚ ਕਮ੍ਮਕਾਰੋ ਚ ਮਲ੍ਲਕਮ੍ਮਕਾਰਾ, ਤੇ ਆਦਯੋ ਯੇਸਂ ਤੇਤਿ ਮਲ੍ਲਕਮ੍ਮਕਾਰਾਦਯੋ. ਆਦਿਸਦ੍ਦੇਨ ਧੁਤ੍ਤਾਦਯੋ ਸਙ੍ਗਣ੍ਹਾਤਿ. ਯਮ੍ਪਿ ਨਿਵਤ੍ਥਂ ਨਿਵਾਸੇਨ੍ਤਿ, ਸਬ੍ਬਂ ਤਂ ਨਿਵਤ੍ਥਂ ਨ ਵਟ੍ਟਤੀਤਿ ਯੋਜਨਾ. ਏਕਂ ਵਾ ਕੋਣਨ੍ਤਿ ਸਮ੍ਬਨ੍ਧੋ. ਕੋਣੇਤਿ ਅਨ੍ਤਰਵਾਸਕਸ੍ਸ ਕੋਣੇ. ‘‘ਤਥਾ’’ਤਿ ਇਮਿਨਾ ‘‘ਏਕਂ ਵਾ ਦ੍ਵੇ ਵਾ ਕੋਣੇ ਉਕ੍ਖਿਪਿਤ੍ਵਾ ਅਨ੍ਤਰਵਾਸਕਸ੍ਸ ਉਪਰਿ ਲਗ੍ਗੇਨ੍ਤੀ’’ਤਿ ਅਤ੍ਥਂ ਅਤਿਦਿਸਤਿ. ਅਨ੍ਤੋਕਾਸਾਵਸ੍ਸ ਦਸ੍ਸੇਤ੍ਵਾਤਿ ਸਮ੍ਬਨ੍ਧੋ. ਦ੍ਵੇ ਨਿਵਾਸੇਨ੍ਤੇਨ ਅਗਿਲਾਨੇਨਾਤਿ ਯੋਜਨਾ. ਸਗੁਣਨ੍ਤਿ ਅਨ੍ਤੋਕਾਸਾਵੇਨ ਬਹਿਕਾਸਾਵਂ ਸਮਾਨਗੁਣਂ ਕਤ੍ਵਾ. ਇਤੀਤਿਆਦਿ ਨਿਗਮਨਂ. ਯਞ੍ਚਾਤਿ ਯਂ ਨਿਵਤ੍ਥਞ੍ਚ. ਇਧਾਤਿ ਖੁਦ੍ਦਕਵਤ੍ਥੁਕ੍ਖਨ੍ਧਕੇ. ਯਞ੍ਚ ਸੇਖਿਯਵਣ੍ਣਨਾਯਂ (ਪਾਚਿ. ਅਟ੍ਠ. ੫੭੬ ਆਦਯੋ) ਪਟਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਸਬ੍ਬਂ ਤਂ ਨਿਵਤ੍ਥਨ੍ਤਿ ਯੋਜਨਾ. ਨਿਬ੍ਬਿਕਾਰਂ ਕਤ੍ਵਾਤਿ ਸਮ੍ਬਨ੍ਧੋ. ਉਭੋ ਕਣ੍ਣੇਤਿ ਹੇਟ੍ਠਾ ਠਿਤੇ ਉਭੋ ਕਣ੍ਣੇ ਉਪਰਿ ਚ ਠਿਤੇ ਉਭੋ ਕਣ੍ਣੇ. ਤਨ੍ਤਿ ਪਰਿਮਣ੍ਡਲਪਾਰੁਪਨਂ.
ਤਤ੍ਥਾਤਿ ‘‘ਗਿਹਿਪਾਰੁਤ’’ਨ੍ਤਿ ਵਚਨੇ ਯਂਕਿਞ੍ਚਿ ਅਞ੍ਞਥਾਪਾਰੁਤਂ ਅਤ੍ਥੀਤਿ ਸਮ੍ਬਨ੍ਧੋ. ਤਸ੍ਮਾਤਿ ਯਸ੍ਮਾ ਗਿਹਿਪਾਰੁਤਂ ਨਾਮ, ਤਸ੍ਮਾ, ਪਰਿਮਣ੍ਡਲਂ ਪਾਰੁਪਿਤਬ੍ਬਨ੍ਤਿ ਸਮ੍ਬਨ੍ਧੋ. ‘‘ਯਥਾ ਪਾਰੁਪਨ੍ਤਿ, ਯਥਾ ਚ ਠਪੇਨ੍ਤੀ’’ਤਿਆਦਿਨਾ ਯੋਜਨਾ ਕਾਤਬ੍ਬਾ. ਤਸ੍ਸੇਵਾਤਿ ਦੀਘਸਾਟਕਸ੍ਸੇਵ. ਤਸ੍ਸੇਵਾਤਿ ਸਾਟਕਸ੍ਸੇਵ. ਪਾਲ਼ਿਕਾਰਕੋਤਿ ਪਾਲ਼ਿਂ ਗਣ੍ਹਨ੍ਤਂ ਵਾ ਵਾਚੇਨ੍ਤਂ ਵਾ ਕਾਰਕੋ. ਤਥਾਤਿ ਯਥਾ ਪਾਰੁਪਨ੍ਤਿ, ਤਥਾ.
੨੮੧. ਕੁਹਿਞ੍ਚਿ ਠਾਨਂ ਗਚ੍ਛਤੋ ਰਞ੍ਞੋਤਿ ਯੋਜਨਾ. ‘‘ਪਰਿਕ੍ਖਾਰਭਣ੍ਡਵਹਨਮਨੁਸ੍ਸਾ’’ਤਿ ਇਮਿਨਾ ਤੇ ਮਨੁਸ੍ਸਾ ਮੁਣ੍ਡਂ ਸੀਸਂ ਚੋਲ਼ਕੇਨ ਵੇਠੇਨ੍ਤੀਤਿ ਮੁਣ੍ਡਵੇਠਿਨੋ ਨਾਮਾਤਿ ਦਸ੍ਸੇਤਿ. ਅਧਿਪ੍ਪਾਯੋਤਿ ਉਜ੍ਝਾਯਨ੍ਤਾਨਂ ਮਨੁਸ੍ਸਾਨਮਧਿਪ੍ਪਾਯੋ. ਅਨ੍ਤਰਾਕਾਜਨ੍ਤਿ ਏਤ੍ਥ ਅਨ੍ਤਰਾਸਦ੍ਦੋ ਮਜ੍ਝਤ੍ਥਵਾਚਕੋਤਿ ਆਹ ‘‘ਮਜ੍ਝੇ’’ਤਿ. ‘‘ਲਗ੍ਗੇਤ੍ਵਾ’’ਤਿਆਦਿਨਾ ਕਾਜਸ੍ਸ ਅਨ੍ਤਰੇ ਲਗ੍ਗੇਤ੍ਵਾ ਵਹਿਤਬ੍ਬਂ ਅਨ੍ਤਰਾਕਾਜਨ੍ਤਿ ਵਚਨਤ੍ਥਂ ਦਸ੍ਸੇਤਿ.
੨੮੨. ‘‘ਚਕ੍ਖੂਨਂ ਹਿਤ’’ਨ੍ਤਿ ਇਮਿਨਾ ਅਚਕ੍ਖੁਸ੍ਸਨ੍ਤਿ ਏਤ੍ਥ ਸ੍ਸਪਚ੍ਚਯੋ ਚਕ੍ਖੁਸਦ੍ਦਤੋ ਹਿਤਤ੍ਥੇ ਹੋਤੀਤਿ ਦਸ੍ਸੇਤਿ. ਪਮਾਣਙ੍ਗੁਲੇਨਾਤਿ ਵਡ੍ਢਕੀਨਂ ਪਮਾਣਯੁਤ੍ਤੇਨ ਅਙ੍ਗੁਲੇਨ.
੨੮੩. ‘‘ਤਿਣਵਨਾਦੀਸੂ’’ਤਿ ਇਮਿਨਾ ਦਾਯਂ ਆਲਿਮ੍ਪੇਨ੍ਤੀਤਿ ਏਤ੍ਥ ਦਾਯਸਦ੍ਦੋ ਵਨਵਾਚਕੋਤਿ ਦਸ੍ਸੇਤਿ. ‘‘ਅਗ੍ਗਿਂ ਦੇਨ੍ਤੀ’’ਤਿ ਇਮਿਨਾ ਆਪੁਬ੍ਬੋ ਲਿਪਿਧਾਤੁ ਉਪਸਗ੍ਗਵਸੇਨ ਅਗ੍ਗਿਦਾਨਤ੍ਥੋਤਿ ਦਸ੍ਸੇਤਿ. ਪਰਿਤ੍ਤਨ੍ਤਿ ਏਤ੍ਥ ਸਮਨ੍ਤਤੋ ਤਾਯਤਿ ਅਨੇਨਾਤਿ ਪਰਿਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਪ੍ਪਹਰਿਤਕਰਣੇਨ ਵਾ ਪਰਿਖਾਖਣੇਨ ਵਾ ਪਰਿਤ੍ਤਾਣ’’ਨ੍ਤਿ. ਏਤ੍ਥਾਤਿ ਪਰਿਤ੍ਤਕਰਣੇ. ਦਾਤੁਂ ਲਬ੍ਭਤੀਤਿ ਸਯਂ ਦਾਤੁਂ ਲਬ੍ਭਤਿ. ਹਰਿਤੁਨ੍ਤਿ ਅਪਨੇਤੁਂ. ਪਤ੍ਤਂ ਵਾ ਅਪਤ੍ਤਂ ਵਾ ਅਗ੍ਗਿਨ੍ਤਿ ਸਮ੍ਬਨ੍ਧੋ. ਤਥਾਤਿ ਅਗ੍ਗਿਦਾਨਾਦਿਨਾ ਆਕਾਰੇਨ. ਉਦਕੇਨ ਨਿਬ੍ਬਾਪੇਨ੍ਤੇਨ ਭਿਕ੍ਖੁਨਾਤਿ ਸਮ੍ਬਨ੍ਧੋ.
੨੮੪. ਸਤਿ ਕਰਣੀਯੇਤਿ ਏਤ੍ਥ ਕਰਣੀਯਸਦ੍ਦੋ ਕਿਚ੍ਚਪਰਿਯਾਯੋਤਿ ਆਹ ‘‘ਸੁਕ੍ਖਕਟ੍ਠਾਦਿਗ੍ਗਹਣਕਿਚ੍ਚੇ’’ਤਿ. ‘‘ਸੁਕ੍ਖਕਟ੍ਠਾਦਿਗ੍ਗਹਣ’’ ਇਤਿ ਪਦੇਨ ਕਿਚ੍ਚਸਰੂਪਂ ਦਸ੍ਸੇਤਿ. ‘‘ਪੁਰਿਸਪ੍ਪਮਾਣ’’ਨ੍ਤਿ ਇਮਿਨਾ ਪੋਰਿਸਿਯਨ੍ਤਿ ਏਤ੍ਥ ਣਿਯਪਚ੍ਚਯੋ ਪਮਾਣਤ੍ਥੇ ਹੋਤੀਤਿ ਦਸ੍ਸੇਤਿ. ਪੁਰਿਸਪ੍ਪਮਾਣਂ ਨਾਮ ਉਪਰਿ ਬਾਹੁਦ੍ਵਯਤਤਸ੍ਸ ਪੁਰਿਸਸ੍ਸ ਪਮਾਣਂ. ਦਿਸ੍ਵਾ ਵਾ ਹੁਤ੍ਵਾ ਵਾ ਦਿਸ੍ਵਾਤਿ ਯੋਜਨਾ. ਅਤਿਉਚ੍ਚਮ੍ਪੀਤਿ ਪਿਸਦ੍ਦੋ ਸਮ੍ਭਾਵਨਤ੍ਥੋ. ਨੀਚਂ ਪਨ ਰੁਕ੍ਖਂ ਪਗੇਵਾਤਿ ਹਿ ਅਤ੍ਥੋ.
੨੮੫. ਕਲ੍ਯਾਣਵਾਕ੍ਕਰਣਾਤਿ ਏਤ੍ਥ ਕਰਿਯਤਿ ਉਚ੍ਚਾਰਿਯਤੀਤਿ ਕਰਣੋ, ਸਦ੍ਦੋ, ਵਾਚਾਯੇਵ ਕਰਣੋ ਵਾਕ੍ਕਰਣੋ, ਕਲ੍ਯਾਣੋ ਵਾਕ੍ਕਰਣੋ ਏਤੇਸਨ੍ਤਿ ਕਲ੍ਯਾਣਵਾਕ੍ਕਰਣਾਤਿ ਦਸ੍ਸੇਨ੍ਤੋ ਆਹ ‘‘ਮਧੁਰਸਦ੍ਦਾ’’ਤਿ. ਵੇਦਂ ਵਿਯਾਤਿ ਸੁਤਿਂ ਵਿਯ. ਵਾਚਨਾਮਗ੍ਗਨ੍ਤਿ ਵਾਚਨਾਯ ਉਪਾਯਂ. ਸਕਾਤਿ ਸਮ੍ਮਾਸਮ੍ਬੁਦ੍ਧਸਙ੍ਖਾਤਸ੍ਸ ਸਸ੍ਸ ਅਤ੍ਤਨੋ ਏਸਾ ਸਕਾ. ਤੇਨ ਵੁਤ੍ਤਂ ‘‘ਸਮ੍ਮਾਸਮ੍ਬੁਦ੍ਧੇਨਾ’’ਤਿ. ਸਮ੍ਮਾਸਮ੍ਬੁਦ੍ਧੇਨ ਹਿ ਮਾਗਧਨਿਰੁਤ੍ਤਿਯਾ ਏਵ ਧਮ੍ਮੋ ਭਾਸਿਤੋ, ਤਸ੍ਮਾ ਸਾ ਮਾਗਧਨਿਰੁਤ੍ਤਿ ਸਕਾ ਨਾਮਾਤਿ ਵੁਚ੍ਚਤਿ. ਨਿਰੁਤ੍ਤੀਤਿ ਅਤ੍ਥਂ ਨੀਹਰਿਤ੍ਵਾ ਵੁਚ੍ਚਤੇ ਇਮਾਯ ਸਦ੍ਦਪਞ੍ਞਤ੍ਤਿਯਾਤਿ ਨਿਰੁਤ੍ਤਿ, ਵਚਧਾਤੁਸ੍ਸ ਵਕਾਰਸ੍ਸ ਉਕਾਰੋ, ਸਬ੍ਬਵੋਹਾਰੋ ਲਬ੍ਭਤਿ. ਇਧ ਪਨ ‘‘ਸਕਾਯਾ’’ਤਿ ਵੁਤ੍ਤਤ੍ਤਾ ਮਾਗਧਵੋਹਾਰੋ ਏਵ. ਤੇਨ ਵੁਤ੍ਤਂ ‘‘ਮਾਗਧਵੋਹਾਰੋ’’ਤਿ. ‘‘ਸਭਾਵਨਿਰੁਤ੍ਤੀ’’ਤਿਪਿ ਪਾਠੋ. ਏਵਞ੍ਹਿ ਸਤਿ ਸਬ੍ਬਸਤ੍ਤਾਨਂ ਸਭਾਵੇਨ ਪਵਤ੍ਤਾ ਮੂਲਭਾਸਾਭੂਤਾ ਮਾਗਧਨਿਰੁਤ੍ਤਿਯੇਵ.
੨੮੬. ਲੋਕਾਯਤਂ ਨਾਮ ਤਿਤ੍ਥਿਯਸਤ੍ਥਨ੍ਤਿ ਸਮ੍ਬਨ੍ਧੋ. ਇਮਿਨਾਵ ਕਾਰਣੇਨਾਤਿ ‘‘ਸੇਤੋ ਕਾਕੋ, ਕਸ੍ਮਾ? ਅਟ੍ਠੀਨਂ ਸੇਤਤ੍ਤਾ. ਰਤ੍ਤੋ ਬਕੋ, ਕਸ੍ਮਾ? ਲੋਹਿਤਸ੍ਸ ਰਤ੍ਤਤ੍ਤਾ’’ ਇਤਿ (ਮ. ਨਿ. ਅਟ੍ਠ. ੨.੨੨੩; ਸਂ. ਨਿ. ਅਟ੍ਠ. ੩.੫.੧੦੮੦; ਅ. ਨਿ. ੧੦.੬੯-੭੦) ਇਮਿਨਾ ਏਵ ਕਾਰਣੇਨ.
੨੮੮. ਅਨ੍ਤਰਾ ਅਹੋਸੀਤਿ ਏਤ੍ਥ ਅਨ੍ਤਰਸਦ੍ਦੋ ਬ੍ਯਵਧਾਨਤ੍ਥੋਤਿ ਆਹ ‘‘ਅਨ੍ਤਰਿਤਾ ਅਹੋਸਿ ਪਟਿਚ੍ਛਨ੍ਨਾ’’ਤਿ. ਤੇਨ ਸਦ੍ਦੇਨ ਧਮ੍ਮਕਥਾ ਬ੍ਯਵਧਾਨਾ ਅਹੋਸੀਤਿ ਅਤ੍ਥੋ.
੨੮੯. ਆਬਾਧਪ੍ਪਚ੍ਚਯਾਤਿ ਏਤ੍ਥ ਆਬਾਧਸ੍ਸ ਭੇਸਜ੍ਜਸਙ੍ਖਾਤੋ ਪਚ੍ਚਯੋ ਆਬਾਧਪਚ੍ਚਯੋਤਿ ਦਸ੍ਸੇਨ੍ਤੋ ਆਹ ‘‘ਯਸ੍ਸਾ’’ਤਿਆਦਿ. ਇਮਿਨਾ ਆਬਾਧੋਯੇਵ ਪਚ੍ਚਯੋ ਆਬਾਧਪਚ੍ਚਯੋਤਿ ਅਤ੍ਥਂ ਪਟਿਕ੍ਖਿਪਤਿ.
੨੯੩. ਦੁਕ੍ਕਟਵਤ੍ਥੁ ਨਾਮ ਅਕਪ੍ਪਿਯਵੋਹਾਰਾਦਿਨਾ ਮਾਲਾਵਚ੍ਛਰੋਪਨਾਦਿ, ਪਾਚਿਤ੍ਤਿਯਵਤ੍ਥੁ ਨਾਮ ਮਾਲਾਵਚ੍ਛਰੋਪਨਾਦਿਅਤ੍ਥਾਯ ਪਥਵੀਖਣਨਾਦਿ. ਪਹਰਣੀਤਿ ਪਹਰਤਿ ਇਮਾਯਾਤਿ ਪਹਰਣੀ. ਏਤਨ੍ਤਿ ‘‘ਪਹਰਣੀ’’ਤਿ ਏਤਂ ਨਾਮਂ. ਯਸ੍ਸ ਕਸ੍ਸਚਿ ਆਵੁਧਸਙ੍ਖਾਤਸ੍ਸ ਲੋਹਭਣ੍ਡਸ੍ਸਾਤਿ ਸਮ੍ਬਨ੍ਧੋ. ਤਨ੍ਤਿ ਆਵੁਧਸਙ੍ਖਾਤਂ ਲੋਹਭਣ੍ਡਂ. ਵੁਤ੍ਤਮੇਵਾਤਿ ‘‘ਕਤਕਂ ਨਾਮ ਪਦੁਮਕਣ੍ਣਿਕਾਕਾਰ’’ਨ੍ਤਿਆਦਿਨਾ (ਚੂਲ਼ਵ. ਅਟ੍ਠ. ੨੬੯) ਵੁਤ੍ਤਮੇਵ. ਧਨਿਯਸ੍ਸੇਵਾਤਿ ਧਨਿਯਸ੍ਸ ਏਵ. ਅਞ੍ਞੇਸਞ੍ਹਿ ਕਤਾਯ ਸਬ੍ਬਮਤ੍ਤਿਕਾਮਯਕੁਟਿਯਾ ਅਪਾਕਟਤ੍ਤਾ ਵੁਤ੍ਤਂ ‘‘ਧਨਿਯਸ੍ਸੇਵਾ’’ਤਿ. ਅਥ ਵਾ ਧਨਿਯਸ੍ਸ ਸਬ੍ਬਮਤ੍ਤਿਕਾਮਯਕੁਟਿ ਇਵਾਤਿ ਯੋਜਨਾ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਖੁਦ੍ਦਕਵਤ੍ਥੁਕ੍ਖਨ੍ਧਕੇ.
ਇਤਿ ਖੁਦ੍ਦਕਵਤ੍ਥੁਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.