੪. ਸਮਥਕ੍ਖਨ੍ਧਕਂ

੧. ਸਮ੍ਮੁਖਾਵਿਨਯਕਥਾ

੧੮੬-੭. ਸਮਥਕ੍ਖਨ੍ਧਕੇ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਛ ਮਾਤਿਕਾਪਦਾਨੀਤਿ ਵਾਕ੍ਯਮ੍ਪਿ ਸਮਾਸੋਪਿ ਯੁਤ੍ਤੋਯੇਵ. ਤਤ੍ਥ ਸਮਾਸੋ ਪਨ ਅਸਮਾਹਾਰਦਿਗੁਯੇਵ. ‘‘ਨਿਕ੍ਖਿਪਿਤ੍ਵਾ’’ਤਿ ਪਦਂ ‘‘ਵੁਤ੍ਤੋ’’ਤਿ ਪਦੇ ਪੁਬ੍ਬਕਾਲਕਿਰਿਯਾਵਿਸੇਸਨਂ, ਤੁਲ੍ਯਤ੍ਥੋ ਵਾ. ਵਿਤ੍ਥਾਰੋਤਿ ਵਿਭਙ੍ਗੋ. ਤਤ੍ਥਾਤਿ ਵਿਭਙ੍ਗੇ. ਸਞ੍ਞਾਪੇਤੀਤਿ ਏਤ੍ਥ ਸਞ੍ਞਂ ਕਤ੍ਵਾ ਜਾਨਾਪੇਤੀਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਪਰਿਤੋਸੇਤ੍ਵਾ ਜਾਨਾਪੇਤੀ’’ਤਿ. ਇਮਿਨਾ ਸਂਪੁਬ੍ਬੋ ਞਾਧਾਤੁ ਪਰਿਤੋਸਨਤ੍ਥਂ ਅਨ੍ਤੋਕਤ੍ਵਾ ਅਵਬੋਧਨਤ੍ਥੋ ਹੋਤੀਤਿ ਦਸ੍ਸੇਤਿ. ਕਾਰਣਪਤਿਰੂਪਕਾਨੀਤਿ ਕਾਰਣਸ੍ਸ ਪਟਿਭਾਗਾਨਿ. ਨਿਜ੍ਝਾਪੇਤੀਤਿ ਏਤ੍ਥ ਝੇਧਾਤੁ ਓਲੋਕਨਤ੍ਥੋਤਿ ਆਹ ‘‘ਓਲੋਕੇਤੀ’’ਤਿ. ਯਥਾਤਿ ਯੇਨਾਕਾਰੇਨ, ਕਰਿਯਮਾਨੇਤਿ ਸਮ੍ਬਨ੍ਧੋ. ਸੋਤਿ ਧਮ੍ਮਵਾਦੀ. ਪਰਤੋਪਿ ਏਸੇਵ ਨਯੋ. ‘‘ਪੁਨਪ੍ਪੁਨ’’ਨ੍ਤਿ ਇਮਿਨਾ ਅਨੁਪੇਕ੍ਖਤੀਤਿ ਏਤ੍ਥ ਅਨੁਸਦ੍ਦੋ ਨ ਉਪਚ੍ਛਿਨ੍ਨਤ੍ਥੋਤਿ ਦਸ੍ਸੇਤਿ. ਪੇਕ੍ਖਤਿ ਅਨੁਪੇਕ੍ਖਤੀਤਿ ਏਤ੍ਥ ਇਕ੍ਖਧਾਤੁ ‘‘ਦਸ੍ਸੇਤਿ ਅਨੁਦਸ੍ਸੇਤੀ’’ਤਿ ਏਤ੍ਥ ਦਿਸਧਾਤੁਯਾ ਸਦਿਸਤ੍ਥੋਤਿ ਆਹ ‘‘ਦਸ੍ਸੇਤਿ…ਪੇ… ਪਰਿਯਾਯਵਚਨਾਨੀ’’ਤਿ. ਤੇਸਞ੍ਞੇਵਾਤਿ ‘‘ਪੇਕ੍ਖਤਿ ਅਨੁਪੇਕ੍ਖਤੀ’’ਤਿ ਪਦਾਨਞ੍ਞੇਵ. ਪਰਿਯਾਯਵਚਨਾਨੀਤਿ ਵੇਵਚਨਸਦ੍ਦਾ ਅਤ੍ਥੇ ਪਰਿਬ੍ਯਤ੍ਤਿਂ ਅਯਨ੍ਤਿ ਗਚ੍ਛਨ੍ਤਿ ਇਮੇਹੀਤਿ ਪਰਿਯਾਯਾਨਿ, ਤਾਨਿਯੇਵ ਵਚਨਾਨਿ ਪਰਿਯਾਯਵਚਨਾਨਿ. ਸੋਤਿ ਅਧਮ੍ਮਵਾਦੀ. ਮੋਹੇਤ੍ਵਾਤਿ ਧਮ੍ਮਵਾਦੀਪੁਗ੍ਗਲਾਦਿਂ ਮੋਹਾਪੇਤ੍ਵਾ.

੧੮੮. ਧਮ੍ਮਵਾਦੀ ਪੁਗ੍ਗਲੋ ਦਸ੍ਸੇਤੀਤਿ ਸਮ੍ਬਨ੍ਧੋ. ਅਮੋਹੇਤ੍ਵਾਤਿ ਅਧਮ੍ਮਵਾਦੀਪੁਗ੍ਗਲਾਦਿਂ ਅਮੋਹਾਪੇਤ੍ਵਾ, ਅਵਿਪਰੀਤਂ ਜਾਨਾਪੇਤ੍ਵਾਤਿ ਅਤ੍ਥੋ.

੨. ਸਤਿਵਿਨਯਕਥਾ

੧੯੫. ਪਰਮ੍ਮੁਖਂ ਵਿਨੇਤਿ ਵਿਨਾਸੇਤੀਤਿ ਵਿਨਯੋ, ਪਰਮ੍ਮੁਖਂ ਵਿਨੇਤਿ ਵਿਨਾਸੇਤਿ ਅਨੇਨਾਤਿ ਵਾ ਵਿਨਯੋ, ਵਿਨਯਕਮ੍ਮਂ. ਸਙ੍ਘਧਮ੍ਮਵਿਨਯਪੁਗ੍ਗਲਸਮ੍ਮੁਖਾਨਂ ਦਾਤਬ੍ਬੋ ਵਿਨਯੋ ਸਮ੍ਮੁਖਾਵਿਨਯੋ. ਪਞ੍ਚਿਮਾਨੀਤਿ ਏਤ੍ਥ ਪਞ੍ਚਨ੍ਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਸੁਦ੍ਧਸ੍ਸਾ’’ਤਿਆਦਿ. ਅਨੁਵਦਿਤਸ੍ਸ ਦਾਨਨ੍ਤਿ ਸਮ੍ਬਨ੍ਧੋ. ਏਤਾਨੀਤਿ ਪਞ੍ਚ ਅਙ੍ਗਾਨਿ. ‘‘ਏਕੇਕਅਙ੍ਗਵਸੇਨ ਨ ਲਬ੍ਭਨ੍ਤੀ’’ਤਿ ਇਮਿਨਾ ਸਮੁਦਾਯਵਾਕ੍ਯਨਿਬ੍ਬਤ੍ਤਿਭਾਵਤੋ ਪਞ੍ਚਙ੍ਗਵਸੇਨੇਵ ਲਬ੍ਭਨ੍ਤੀਤਿ ਦਸ੍ਸੇਤਿ. ਦੇਸਨਾਮਤ੍ਤਮੇਵੇਤਨ੍ਤਿ ‘‘ਪਞ੍ਚਿਮਾਨੀ’’ਤਿ ਏਤਂ ਵਚਨਂ ਦੇਸਨਾਮਤ੍ਤਮੇਵ, ਨ ਅਵਯਵਵਾਕ੍ਯਨਿਬ੍ਬਤ੍ਤਿਵਚਨਨ੍ਤਿ ਅਧਿਪ੍ਪਾਯੋ. ਧਮ੍ਮਨ੍ਤਿ ਭੂਤਂ. ਏਤ੍ਥਾਤਿ ‘‘ਪਞ੍ਚਿਮਾਨਿ ਭਿਕ੍ਖਵੇ’’ਤਿਆਦਿਵਚਨੇ. ਤਤ੍ਥ ਚਾਤਿ ‘‘ਪਞ੍ਚਿਮਾਨਿ ਭਿਕ੍ਖਵੇ’’ਤਿਆਦਿਵਚਨੇ ਚ. ਅਨੁਵਦਨ੍ਤੀਤਿ ਏਤ੍ਥ ਅਨੁਦ੍ਧਂਸਨੇਨ ਵਦਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਚੋਦੇਨ੍ਤੀ’’ਤਿ. ਅਯਂ ਪਨ ਸਤਿਵਿਨਯੋ ਦਾਤਬ੍ਬੋਤਿ ਸਮ੍ਬਨ੍ਧੋ. ਅਨਾਗਾਮਿਨੋਪੀਤਿ ਪਿਸਦ੍ਦੋ ਸਮ੍ਭਾਵਨੇ, ਸਕਦਾਗਾਮਿਆਦਿਕੇ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ. ਸੋ ਚ ਖੋਤਿ ਸਤਿਵਿਨਯੋ ਚ. ਚੋਦਿਯਮਾਨੇਯੇਵਾਤਿ ਚੋਦਿਯਮਾਨਸ੍ਸੇਵ, ਅਯਮੇਵ ਵਾ ਪਾਠੋ. ਤਸ੍ਮਿਨ੍ਤਿ ਸਤਿਵਿਨਯਸ੍ਮਿਂ ਦਿਨ੍ਨੇਤਿ ਸਮ੍ਬਨ੍ਧੋ. ਅਚੋਦਿਤਤ੍ਤਾ ਕਥਾ ਨ ਰੂਹਤੀਤਿ ਆਹ ‘‘ਚੋਦੇਨ੍ਤੋਪੀ’’ਤਿਆਦਿ. ਆਪਜ੍ਜਤੀਤਿ ਚੋਦਕੋ ਆਪਜ੍ਜਤਿ. ਚੋਦਨਾਦਿਅਸਾਰੁਪ੍ਪੇ ਵਿਨੇਤਿ ਵਿਨਾਸੇਤੀਤਿ ਵਿਨਯੋ, ਵਿਨੇਤਿ ਵਿਨਾਸੇਤਿ ਅਨੇਨਾਤਿ ਵਾ ਵਿਨਯੋ, ਵਿਨਯਕਮ੍ਮਂ. ਸਤਿਵੇਪੁਲ੍ਲਪਤ੍ਤਸ੍ਸ ਦਾਤਬ੍ਬੋ ਵਿਨਯੋ ਸਤਿਵਿਨਯੋ.

੩. ਅਮੂਲ਼੍ਹਵਿਨਯਕਥਾ

੧੯੬. ਭਾਸਿਤਪਰਿਕਨ੍ਤਨ੍ਤਿ ਏਤ੍ਥ ਭਾਸਿਤਪਰਿਕਨ੍ਤਸਦ੍ਦਾਨਂ ਕਰਣਾਪੇਕ੍ਖਤ੍ਤਾ ਵਿਸੁਂ ਕਰਣਂ ਦਸ੍ਸੇਨ੍ਤੋ ਆਹ ‘‘ਵਾਚਾਯ ਭਾਸਿਤਂ, ਕਾਯੇਨ ਪਰਿਕਨ੍ਤ’’ਨ੍ਤਿ. ‘‘ਪਰਿਕ੍ਕਮੇਤ੍ਵਾ ਕਤ’’ਨ੍ਤਿ ਇਮਿਨਾ ਪਰਿਕਮਤੀਤਿ ਪਰਿਕਨ੍ਤਂ, ਪਰਿਕਨ੍ਤਂ ਹੁਤ੍ਵਾ ਕਤਂ ਪਰਿਕਨ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਪਰਿਕ੍ਕਮੇਤ੍ਵਾਤਿ ਅਤਿਕ੍ਕਮਿਤ੍ਵਾ. ਸਰਤਾਯਸ੍ਮਾਤਿ ਏਤ੍ਥ ਉਕਾਰਲੋਪਸਨ੍ਧਿਂ ਦਸ੍ਸੇਨ੍ਤੋ ਆਹ ‘‘ਸਰਤੁ ਆਯਸ੍ਮਾ’’ਤਿ. ‘‘ਏਵਰੂਪਿਯਾ ਆਪਤ੍ਤਿਯਾ’’ਤਿ ਇਮਿਨਾ ਆਪਜ੍ਜਿਤਾਤਿ ਏਤ੍ਥ ਤੁਪਚ੍ਚਯਯੋਗਭਾਵਤੋ ਕਮ੍ਮਤ੍ਥਛਟ੍ਠਿਯਾਪਿ ਸਮ੍ਭਵਭਾਵਂ ਦਸ੍ਸੇਤਿ. ਤੁਪਚ੍ਚਯਯੋਗੇ ਕਮ੍ਮਤ੍ਥਛਟ੍ਠੀ ਅਨਿਚ੍ਚਂ ਹੋਤਿ, ਤਸ੍ਮਾ ਪਾਲ਼ਿਯਂ ‘‘ਏਵਰੂਪਿਯਾ ਆਪਤ੍ਤਿਯਾ’’ਤਿ ਕਮ੍ਮਤ੍ਥਛਟ੍ਠੀਭਾਵੇਨ ਅਵਤ੍ਵਾ ‘‘ਏਵਰੂਪਿਂ ਆਪਤ੍ਤਿ’’ਨ੍ਤਿ ਕਮ੍ਮਤ੍ਥਦੁਤਿਯਾਭਾਵੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਸ੍ਸਾਤਿ ‘‘ਆਪਜ੍ਜਿਤ੍ਵਾ’’ਤਿ ਪਾਠਸ੍ਸ. ‘‘ਪਠਮਂ ਪਚ੍ਛਾ’’ਤਿ ਪਦੇਹਿ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਚੋਦਕਸ੍ਸ ਕਥਂ ਵਿਨੇਤਿ ਵਿਨਾਸੇਤੀਤਿ ਵਿਨਯੋ, ਚੋਦਕਸ੍ਸ ਕਥਂ ਵਿਨੇਤਿ ਵਿਨਾਸੇਤਿ ਅਨੇਨਾਤਿ ਵਾ ਵਿਨਯੋ. ਪਠਮਂ ਮੂਲ਼੍ਹਭਾਵਂ ਉਪਗਨ੍ਤ੍ਵਾ ਪਚ੍ਛਾ ਅਮੂਲ਼੍ਹਸ੍ਸ ਦਾਤਬ੍ਬੋ ਵਿਨਯੋ ਅਮੂਲ਼੍ਹਵਿਨਯੋ.

੪. ਪਟਿਞ੍ਞਾਤਕਰਣਕਥਾ

੨੦੦. ਪਟਿਜਾਨਿਯਤੇ, ਪਟਿਜਾਨਨਂ ਵਾ ਪਟਿਞ੍ਞਾ, ਤਾਯ ਕਾਰੇਤਬ੍ਬਂ.

੫. ਯੇਭੁਯ੍ਯਸਿਕਾਕਥਾ

੨੦੨. ਯੇਭੁਯ੍ਯਸਿਕਾਤਿ ਏਤ੍ਥ ਯੇਭੁਯ੍ਯੇਨ ਪਵਤ੍ਤਾ ਯੇਭੁਯ੍ਯਸਿਕਾ, ਧਮ੍ਮਵਾਦੀਨਂ ਯੇਭੁਯ੍ਯਤਾਸਮ੍ਪਾਦਿਕਾ ਕਿਰਿਯਾਤਿ ਦਸ੍ਸੇਨ੍ਤੋ ਆਹ ‘‘ਯਸ੍ਸਾ ਕਿਰਿਯਾਯਾ’’ਤਿਆਦਿ. ਤਤ੍ਥ ਯਸ੍ਸਾ ਕਿਰਿਯਾਯਾਤਿ ਯਸ੍ਸਾ ਯੇਭੁਯ੍ਯਤਾਸਮ੍ਪਾਦਿਕਾਯ ਕਿਰਿਯਾਯ. ਏਸਾਤਿ ਯੇਭੁਯ੍ਯਤਾਸਮ੍ਪਾਦਿਕਾ ਕਿਰਿਯਾ.

੨੦੪. ਓਰਮਤ੍ਤਕਨ੍ਤਿ ਏਤ੍ਥ ਓਰਸਦ੍ਦੋ ਚ ਮਤ੍ਤਸਦ੍ਦੋ ਚ ਸਮੂਹਂ ਕਤ੍ਵਾ ਪਰਿਤ੍ਤਵਾਚਕੋ ਅਪ੍ਪਮਤ੍ਤਵਾਚਕੋਤਿ ਆਹ ‘‘ਪਰਿਤ੍ਤਂ ਅਪ੍ਪਮਤ੍ਤਕ’’ਨ੍ਤਿ. ‘‘ਭਣ੍ਡਨਮਤ੍ਤਮੇਵਾ’’ਤਿ ਇਮਿਨਾ ਨ ਮਹਨ੍ਤਂ ਵਿਵਾਦਾਧਿਕਰਣਂ ਹੋਤੀਤਿ ਦਸ੍ਸੇਤਿ. ਨ ਚ ਗਤਿਗਤਨ੍ਤਿ ਏਤ੍ਥ ਚਿਰਕਾਲਭਾਵਂ ਨ ਚ ਗਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਦ੍ਵੇ ਤਯੋ…ਪੇ… ਅਵਿਨਿਚ੍ਛਿਤ’’ਨ੍ਤਿ. ਤਤ੍ਥ ਤਤ੍ਥੇਵਾਤਿ ਤਸ੍ਮਿਂ ਤਸ੍ਮਿਂ ਵਿਵਾਦਾਧਿਕਰਣਜਾਤਆਵਾਸੇ ਏਵ, ਨ ਚ ਸਰਿਤਸਾਰਿਤਪਦਾਨਂ ਸੁਦ੍ਧਕਾਰਿਤਕਿਰਿਯਭਾਵਂ ਦਸ੍ਸੇਨ੍ਤੋ ਆਹ ‘‘ਸਯਂ ਸਰਿਤਂ ਵਾ ਅਞ੍ਞੇਹਿ ਸਾਰਿਤਂ ਵਾ ਨ ਹੋਤੀ’’ਤਿ. ਤੇਹਿ ਭਿਕ੍ਖੂਹੀਤਿ ਵਿਵਾਦਕਾਰਕੇਹਿ ਭਿਕ੍ਖੂਹਿ. ‘‘ਸਲਾਕਂ ਗਾਹੇਨ੍ਤੋ’’ਤਿ ਇਮਿਨਾ ‘‘ਜਾਨਾਤੀ’’ਤਿ ਪਦਸ੍ਸ ਕਤ੍ਤਾਰਂ ਦਸ੍ਸੇਤਿ. ਇਮਿਨਾ ਨੀਹਾਰੇਨਾਤਿ ਇਮਿਨਾ ਕਾਰਣੇਨ. ਅਪਿ ਨਾਮਾਤਿ ਇਮਿਨਾ ਅਪ੍ਪੇਵਨਾਮਸਦ੍ਦੋ ਅਪਿਨਾਮਪਰਿਯਾਯੋਤਿ ਦਸ੍ਸੇਤਿ. ਅਸ੍ਸੂਤਿ ਭਵੇਯ੍ਯੁਂ. ਇਮਿਨਾ ‘‘ਪਾਲ਼ਿਯਂ ਅਧਮ੍ਮਵਾਦੀ ਬਹੁਤਰਾ ਭਵੇਯ੍ਯੁਂ, ਅਪ੍ਪੇਵ ਨਾਮ ਸਾਧੂ’’ਤਿ ਯੋਜਨਾਨਯਂ ਦਸ੍ਸੇਤਿ. ‘‘ਅਯਮਸ੍ਸ ਅਜ੍ਝਾਸਯੋ ਹੋਤੀ’’ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਅਸ੍ਸਾਤਿ ਸਲਾਕਗਾਹਸ੍ਸ. ਦ੍ਵੀਸੁਪੀਤਿ ‘‘ਜਾਨਾਤਿ ਸਙ੍ਘੋ ਭਿਜ੍ਜਿਸ੍ਸਤੀ’’ਤਿ ਚ ‘‘ਅਪ੍ਪੇਵ ਨਾਮ ਸਙ੍ਘੋ ਭਿਜ੍ਜੇਯ੍ਯਾ’’ਤਿ ਚ ਦ੍ਵੀਸੁਪਿ ਪਦੇਸੁ.

‘‘ਅਧਮ੍ਮੇਨ ਗਣ੍ਹਨ੍ਤੀ’’ਤਿ ਏਤ੍ਥ ‘‘ਗਣ੍ਹਨ੍ਤੀ’’ਤਿ ਕਿਰਿਯਾਪਦਸ੍ਸ ਅਧਮ੍ਮਵਾਦਿਨੋ ਏਵ ਕਤ੍ਤਾ ਨਾਮਾਤਿ ਆਹ ‘‘ਅਧਮ੍ਮਵਾਦਿਨੋ’’ਤਿ. ‘‘ਦ੍ਵੇ ਧਮ੍ਮਵਾਦਿਨੋ’’ਤਿ ਇਮਿਨਾ ‘‘ਵਗ੍ਗਾ ਗਣ੍ਹਨ੍ਤੀ’’ਤਿ ਏਤ੍ਥ ‘‘ਗਣ੍ਹਨ੍ਤੀ’’ਤਿ ਕਿਰਿਯਾਪਦਸ੍ਸ ਧਮ੍ਮਵਾਦਿਨੋ ਏਵ ਕਤ੍ਤਾ ਨਾਮਾਤਿ ਦਸ੍ਸੇਤਿ. ਨ ਚ ਯਥਾਦਿਟ੍ਠਿਯਾ ਗਣ੍ਹਨ੍ਤੀਤਿ ਏਤ੍ਥ ਧਮ੍ਮਵਾਦਿਨੋ ਹੁਤ੍ਵਾ ਧਮ੍ਮਵਾਦਿਸਲਾਕਂ ਅਗ੍ਗਹੇਤ੍ਵਾ ਅਧਮ੍ਮਵਾਦਿਸਲਾਕਸ੍ਸ ਗਹਣਂ ਨ ਚ ਯਥਾਦਿਟ੍ਠਿਯਾ ਗਣ੍ਹਨ੍ਤਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਧਮ੍ਮਵਾਦਿਨੋ ਹੁਤ੍ਵਾ’’ਤਿਆਦਿ. ਪਟਿਵਤ੍ਤੇਤ੍ਵਾਤਿ ਇਮਮੇਵਤ੍ਥਂ ਪਟਿਸੇਧੇਤ੍ਵਾ. ‘‘ਪਰਿਵਤ੍ਤੇਤ੍ਵਾ’’ਤਿਪਿ ਪਾਠੋ, ਹੇਟ੍ਠੁਪਰਿਯਾਯਂ ਕਤ੍ਵਾਤਿ ਅਤ੍ਥੋ. ਤੇਤਿ ਧਮ੍ਮਵਾਦਿਨੋ. ਏਤ੍ਥਾਤਿ ਸਮਥਕ੍ਖਨ੍ਧਕੇ.

੬. ਤਸ੍ਸਪਾਪਿਯਸਿਕਾਕਥਾ

੨੦੭. ਅਸੁਚੀਤਿ ਏਤ੍ਥ ਨਤ੍ਥਿ ਸੁਚੀਨਿ ਕਾਯਵਚੀਕਮ੍ਮਾਨਿ ਏਤਸ੍ਸਾਤਿ ਅਸੁਚੀਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਸੁਚੀਹਿ ਕਾਯਵਚੀਕਮ੍ਮੇਹਿ ਸਮਨ੍ਨਾਗਤੋ’’ਤਿ. ਏਸੇਵ ਨਯੋ ਅਲਜ੍ਜੀਤਿ ਏਤ੍ਥਾਪਿ. ਸਾਨੁਵਾਦੋਤਿ ਏਤ੍ਥ ਅਨੁਵਾਦਉਪਵਾਦਸਦ੍ਦਾਨਂ ਪਰਿਯਾਯਤ੍ਤਾ ਵੁਤ੍ਤਂ ‘‘ਸਉਪਵਾਦੋ’’ਤਿ. ਇਤਿ ਪਞ੍ਚਾਤਿ ਇਮਾਨਿ ਪਞ੍ਚ ਅਙ੍ਗਾਨਿ. ਏਤ੍ਥਾਤਿ ਤਸ੍ਸਪਾਪਿਯਸਿਕਕਮ੍ਮੇ. ਇਦਨ੍ਤਿ ਕਮ੍ਮਂ ਵੁਚ੍ਚਤੀਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਯੋ ਪੁਗ੍ਗਲੋ ਪਾਪਿਯੋਤਿ ਯੋਜਨਾ. ਪਾਪੁਸ੍ਸਨ੍ਨਤਾਯਾਤਿ ਲਾਮਕੁਸ੍ਸਨ੍ਨਤਾਯ. ਇਮਿਨਾ ਅਯਞ੍ਚ ਪਾਪੋ ਅਯਞ੍ਚ ਪਾਪੋ, ਅਯਮਿਮੇਸਂ ਵਿਸੇਸੇਨ ਪਾਪੋਤਿ ਪਾਪਿਯੋਤਿ ਚ ਪਾਪਾਨਂ ਅਤਿਸਯੇਨ ਪਾਪੋਤਿ ਪਾਪਿਯੋਤਿ ਚ ਵਚਨਤ੍ਥੋ ਦਸ੍ਸਿਤੋ. ਤਸ੍ਸਾਤਿ ਪੁਗ੍ਗਲਸ੍ਸ. ਇਮਿਨਾ ਤਸ੍ਸ ਪਾਪਿਯਸ੍ਸ ਕਤ੍ਤਬ੍ਬਂ ਤਸ੍ਸਪਾਪਿਯਸਿਕਂ, ਤਮੇਵ ਕਮ੍ਮਂ ਤਸ੍ਸਪਾਪਿਯਸਿਕਕਮ੍ਮਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਕੇਸੁਚਿ ਪੋਤ੍ਥਕੇਸੁ ਯਕਾਰੇ ਦ੍ਵੇਭਾਵੋ ਅਤ੍ਥਿ, ਸੋ ਅਯੁਤ੍ਤੋਯੇਵ. ‘‘ਯੇਭੁਯ੍ਯਸਿਕਾ’’ਤਿ ਏਤ੍ਥ ਯਕਾਰੇ ਦ੍ਵੇਭਾਵਸ੍ਸ ਦਸ੍ਸਨਤੋ ਏਤ੍ਥਾਪਿ ਦ੍ਵੇਭਾਵੋ ਯੁਤ੍ਤੋ ਭਵੇਯ੍ਯਾਤਿ ਲਿਖਨ੍ਤੀਤਿ ਦਟ੍ਠਬ੍ਬਂ.

੭. ਤਿਣਵਤ੍ਥਾਰਕਾਦਿਕਥਾ

੨੧੨. ਕਕ੍ਖਲ਼ਤਾਯ ਵਾਲ਼ਤਾਯਾਤਿ ਏਤ੍ਥ ਕਕ੍ਖਲ਼ਸ੍ਸ ਭਾਵੋ ਕਕ੍ਖਲ਼ਤਾ, ਵਾਲ਼ਸ੍ਸ ਭਾਵੋ ਵਾਲ਼ਤਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਕਕ੍ਖਲ਼ਭਾਵਾਯ ਚੇਵ ਵਾਲ਼ਭਾਵਾਯ ਚਾ’’ਤਿ. ਇਮਿਨਾ ਤਾਪਚ੍ਚਯਸ੍ਸ ਸਮੂਹਤ੍ਥਞ੍ਚ ਸ੍ਵਤ੍ਥਞ੍ਚ ਪਟਿਕ੍ਖਿਪਤਿ. ‘‘ਕਕ੍ਖਲ਼ਤਾਯ ਵਾਲ਼ਤਾਯਾ’’ਤਿ ਬ੍ਯਞ੍ਜਨਤੋਯੇਵ ਨਾਨਂ, ਨ ਅਤ੍ਥਤੋ. ਭੇਦਾਯਾਤਿ ਏਤ੍ਥ ਅਞ੍ਞਸ੍ਸ ਭੇਦਂ ਪਟਿਕ੍ਖਿਪਨ੍ਤੋ ਆਹ ‘‘ਸਙ੍ਘਭੇਦਾਯਾ’’ਤਿ. ਗਿਲਾਨੇਪੀਤਿ ਪਿਸਦ੍ਦੋ ਅਞ੍ਞੇ ਪਨ ਕਾ ਕਥਾਤਿ ਦਸ੍ਸੇਤਿ. ਤਤ੍ਥੇਵਾਤਿ ਅਧਿਕਰਣਵੂਪਸਮਟ੍ਠਾਨੇਯੇਵ. ‘‘ਏਕਤੋ’’ਤਿ ਇਮਿਨਾ ਏਕਜ੍ਝਨ੍ਤਿ ਪਦਸ੍ਸ ‘‘ਏਕਤੋ’’ਤਿ ਪਦੇਨ ਸਮਾਨਤਂ ਦਸ੍ਸੇਤਿ, ਏਕਸਦ੍ਦਤੋ ਜ੍ਝਪਚ੍ਚਯੋ ਚ ਤੋਪਚ੍ਚਯੋ ਚ ਵਿਸੇਸੋ, ‘‘ਤਿਣਵਤ੍ਥਾਰਕਸਦਿਸਤ੍ਤਾ’’ਤਿ ਇਮਿਨਾ ਸਦਿਸੂਪਚਾਰਂ ਦਸ੍ਸੇਤਿ. ਤਿਣੇਹਿ ਅਵਤ੍ਥਰਿਤਬ੍ਬਨ੍ਤਿ ਤਿਣਵਤ੍ਥਾਰਂ, ਗੂਥਮੁਤ੍ਤਂ, ਤਿਣਵਤ੍ਥਾਰਮਿਵ ਤਿਣਵਤ੍ਥਾਰਕਂ. ਏਤ੍ਥ ਅਧਿਕਰਣਮੇਵ ਮੁਖ੍ਯਤੋ ਲਬ੍ਭਤਿ, ਸਮਥੋ ਪਨ ਫਲੂਪਚਾਰਤੋ, ਸਦਿਸਤ੍ਥੇ ਕਪਚ੍ਚਯੋ. ਤਮੇਵਤ੍ਥਂ ਪਾਕਟਂ ਕਰੋਨ੍ਤੋ ਆਹ ‘‘ਯਥਾ ਹੀ’’ਤਿਆਦਿ. ਘਟ੍ਟਿਯਮਾਨਂ ਗੂਥਂ ਵਾ ਮੁਤ੍ਤਂ ਵਾਤਿ ਯੋਜਨਾ. ‘‘ਘਟ੍ਟਿਯਮਾਨ’’ਨ੍ਤਿ ਪਦਂ ਹੇਤੁਅਨ੍ਤੋਗਧਵਿਸੇਸਨਂ, ‘‘ਬਾਧਤੀ’’ਤਿ ਇਮਿਨਾ ਸਮ੍ਬਨ੍ਧਿਤਬ੍ਬਂ. ਸੁਪ੍ਪਟਿਚ੍ਛਾਦਿਤਸ੍ਸ ਪਨ ਅਸ੍ਸ ਗੂਥਮੁਤ੍ਤਸ੍ਸਾਤਿ ਯੋਜਨਾ. ‘‘ਸੁਪ੍ਪਟਿਚ੍ਛਾਦਿਤਸ੍ਸਾ’’ਤਿ ਪਦਮ੍ਪਿ ਹੇਤੁਅਨ੍ਤੋਗਧਵਿਸੇਸਨਮੇਵ, ‘‘ਨ ਬਾਧਤੀ’’ਤਿ ਇਮਿਨਾ ਸਮ੍ਬਨ੍ਧਿਤਬ੍ਬਂ. ਯਂ ਅਧਿਕਰਣਂ ਸਂਵਤ੍ਤਤੀਤਿ ਸਮ੍ਬਨ੍ਧੋ. ਮੂਲਾਨੁਮੂਲਨ੍ਤਿ ਮੂਲਞ੍ਚ ਅਨੁਮੂਲਞ੍ਚ ਮੂਲਾਨੁਮੂਲਂ. ਤਨ੍ਤਿ ਅਧਿਕਰਣਂ. ਇਮਿਨਾ ਕਮ੍ਮੇਨਾਤਿ ਤਿਣਵਤ੍ਥਾਰਕਕਮ੍ਮੇਨ. ਗੂਥਂ ਤਿਣੇਹਿ ਪਟਿਚ੍ਛਨ੍ਨਂ ਸੁਵੂਪਸਨ੍ਤਂ ਹੋਤਿ ਵਿਯ ਤਿਣਵਤ੍ਥਾਰਕੇਨ ਪਟਿਚ੍ਛਨ੍ਨਂ ਸੁਵੂਪਸਨ੍ਤਂ ਹੋਤੀਤਿ ਯੋਜਨਾ. ਇਤੀਤਿ ਤਸ੍ਮਾ.

੨੧੩. ਥੁਲ੍ਲਵਜ੍ਜਨ੍ਤਿ ਏਤ੍ਥ ਥੁਲ੍ਲਚ੍ਚਯਸ੍ਸਾਪਿ ਥੁਲ੍ਲਵਜ੍ਜਤ੍ਤਾ ਇਧ ਪਾਰਾਜਿਕਸਙ੍ਘਾਦਿਸੇਸਮੇਵਾਧਿਪ੍ਪੇਤਨ੍ਤਿ ਆਹ ‘‘ਪਾਰਾਜਿਕਞ੍ਚੇਵ ਸਙ੍ਘਾਦਿਸੇਸਞ੍ਚਾ’’ਤਿ. ਗਿਹਿਪਟਿਸਂਯੁਤ੍ਤਨ੍ਤਿ ਏਤ੍ਥ ਗਿਹੀਨਂ ਪਟਿਸਂਯੁਤ੍ਤਂ ਗਿਹਿਪਟਿਸਂਯੁਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਗਿਹੀਨ’’ਨ੍ਤਿਆਦਿ. ‘‘ਹੀਨੇਨਾ’’ਤਿ ਪਦਂ ‘‘ਖੁਂਸਨਵਮ੍ਭਨ’’ ਇਤਿ ਪਦੇਨੇਵ ਸਮ੍ਬਨ੍ਧਿਤਬ੍ਬਂ. ਧਮ੍ਮਿਕਪਟਿਸ੍ਸਵੇਸੂਤਿ ਨਿਮਿਤ੍ਤਤ੍ਥੇ ਭੁਮ੍ਮਵਚਨਂ.

੨੧੪. ਕਮ੍ਮਵਾਚਾਪਰਿਯੋਸਾਨੇ ਵੁਟ੍ਠਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਅਧਿਕਰਣਵੂਪਸਮਟ੍ਠਾਨੇ. ਅਞ੍ਞਾਵਿਹਿਤਾਪੀਤਿ ਅਧਿਕਰਣਵਿਨਿਚ੍ਛਯਤੋ ਅਞ੍ਞਸ੍ਮਿਂ ਠਾਨੇ ਚਿਤ੍ਤਂ ਆਵਿਹਿਤਾਪਿ ਠਪਿਤਾਪਿ. ਉਪਸਮ੍ਪਦਮਣ੍ਡਲਤੋਤਿ ਉਪਸਮ੍ਪਦਸੀਮਬਿਮ੍ਬਤੋ, ਯੇ ਪਨਾਤਿ ਭਿਕ੍ਖੂ ਪਨ, ਦਿਟ੍ਠਾਵਿਕਮ੍ਮਂ ਕਰੋਨ੍ਤੀਤਿ ਵਾ ਅਨਾਗਤਾਤਿ ਵਾ ਨਿਸਿਨ੍ਨਾਤਿ ਵਾ ਸਮ੍ਬਨ੍ਧੋ. ਤੇਹਿ ਵਾਤਿ ਅਧਿਕਰਣਂ ਵਿਨਿਚ੍ਛਿਨਨ੍ਤੇਹਿ ਭਿਕ੍ਖੂਹਿ ਵਾ. ਤਤ੍ਥਾਤਿ ਅਧਿਕਰਣਵਿਨਿਚ੍ਛਿਤਟ੍ਠਾਨਂ. ਛਨ੍ਦਂ ਦਤ੍ਵਾਤਿ ਛਨ੍ਦਂ ਸਙ੍ਘਸ੍ਸ ਦਤ੍ਵਾ. ਪਰਿਵੇਣਾਦੀਸੂਤਿਆਦਿਸਦ੍ਦੇਨ ਆਵਾਸਾਦਯੋ ਸਙ੍ਗਣ੍ਹਾਤਿ. ਤੇਤਿ ਭਿਕ੍ਖੂ.

੮. ਅਧਿਕਰਣਕਥਾ

੨੧੫. ਵਿਪਚ੍ਚਤਾਯਾਤਿ ਏਤ੍ਥ ਵਿਕਾਰਭਾਵੇਨ ਪਤਤਿ ਪਵਤ੍ਤਤੀਤਿ ਵਿਪਚ੍ਚਂ, ਚਿਤ੍ਤਦੁਕ੍ਖਂ, ਤਦੇਵ ਵਿਪਚ੍ਚਤਾ, ਤਦਤ੍ਥਾਯਾਤਿ ਦਸ੍ਸੇਨ੍ਤੋ ਆਹ ‘‘ਚਿਤ੍ਤਦੁਕ੍ਖਤ੍ਥ’’ਨ੍ਤਿ. ‘‘ਫਰੁਸਵਚਨ’’ਨ੍ਤਿ ਇਮਿਨਾ ਵੋਹਾਰ ਸਦ੍ਦੋ ਵਚਨਪਰਿਯਾਯੋਤਿ ਦਸ੍ਸੇਤਿ. ਯੋ ਤਤ੍ਥਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਤੇਸੁ ਅਨੁਵਦਨ੍ਤੇਸੂ’’ਤਿ. ਯੋ ਉਪਵਾਦੋਤਿ ਯੋਜਨਾ. ‘‘ਅਨੁਵਦਨਾ’’ਤਿ ਏਤਂ ਪਦਨ੍ਤਿ ਯੋਜਨਾ. ਆਕਾਰਦਸ੍ਸਨਨ੍ਤਿ ਅਨੁਵਦਨਸ੍ਸ ਆਕਾਰਦਸ੍ਸਨਂ, ਦਸ੍ਸਨਹੇਤੁ ਵਾ. ‘‘ਪੁਨਪ੍ਪੁਨ’’ਨ੍ਤਿ ਇਮਿਨਾ ਅਨੁਸਮ੍ਪਵਙ੍ਕਤਾਤਿ ਏਤ੍ਥ ਅਨੁਸਦ੍ਦਸ੍ਸ ਨ ਉਪਚ੍ਛਿਨ੍ਨਤ੍ਥਂ ਦਸ੍ਸੇਤਿ. ਤਤ੍ਥੇਵਾਤਿ ਅਨੁਵਦਨੇ ਏਵ. ਸਮ੍ਪਵਙ੍ਕਤਾਤਿ ਸਮ੍ਮਾ ਪਕਾਰੇਨ ਨਿਨ੍ਨਪੋਨਪਬ੍ਭਾਰਤਾ. ਅਬ੍ਭੁਸ੍ਸਹਨਤਾਤਿ ਏਤ੍ਥ ਅਤਿਰੇਕਂ ਉਸ੍ਸਾਹਨਤਾਤਿ ਦਸ੍ਸੇਨ੍ਤੋ ਆਹ ‘‘ਕਸ੍ਮਾ’’ਤਿਆਦਿ. ਅਨੁਬਲਪ੍ਪਦਾਨਨ੍ਤਿ ਏਤ੍ਥ ਪੁਨਪ੍ਪੁਨਂ ਬਲਸ੍ਸ ਪਦਾਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਪੁਰਿਮਵਚਨਸ੍ਸਾ’’ਤਿਆਦਿ.

ਕਿਚ੍ਚਯਤਾਤਿ ਏਤ੍ਥ ‘‘ਮਾ ਪਣ੍ਡਿਚ੍ਚਯ’’ਨ੍ਤਿਆਦੀਸੁ (ਜਾ. ੨.੨੨.੧) ਵਿਯ ਬ੍ਯਞ੍ਜਨਵਡ੍ਢਨਵਸੇਨ ਯਕਾਰਾਗਮੋਤਿ ਆਹ ‘‘ਕਿਚ੍ਚਮੇਵ ਕਿਚ੍ਚਯ’’ਨ੍ਤਿ. ‘‘ਉਭਯਂਪੇਤਂ ਸਙ੍ਘਸ੍ਸੇਵ ਅਧਿਵਚਨ’’ਨ੍ਤਿ ਇਮਿਨਾ ਕਿਚ੍ਚਕਰਣੀਯਸਦ੍ਦੋ ਕਤ੍ਤੁਵਾਚਕੋਤਿ ਦਸ੍ਸੇਤਿ, ਸਙ੍ਘੋ ਹਿ ਕਰੋਤੀਤਿ ਵਚਨਤ੍ਥੇਨ ਕਿਚ੍ਚੋਤਿ ਚ ਕਰਣੀਯੋਤਿ ਚ ਵੁਚ੍ਚਤਿ. ਤਸ੍ਸ ਭਾਵੋ, ਕਿਚ੍ਚਯਤਾ ਕਰਣੀਯਤਾਤਿ ਵੁਤ੍ਤੇ ਸਙ੍ਘਕਮ੍ਮਂਯੇਵ ਲਬ੍ਭਤਿ. ਤੇਨ ਵੁਤ੍ਤਂ ‘‘ਉਭਯਂਪੇਤਂ ਸਙ੍ਘਕਮ੍ਮਸ੍ਸੇਵ ਅਧਿਵਚਨ’’ਨ੍ਤਿ. ਯਦਿ ਕਮ੍ਮਵਾਚਕੋ ਭਵੇਯ੍ਯ, ‘‘ਕਤ੍ਤਬ੍ਬਨ੍ਤਿ ਕਿਚ੍ਚਂ, ਕਰਣੀਯ’’ਨ੍ਤਿ ਵੁਤ੍ਤੇਯੇਵ ਸਙ੍ਘਕਮ੍ਮਸ੍ਸ ਲਭਨਤੋ ਤਾਪਚ੍ਚਯੋ ਸ੍ਵਤ੍ਥੋ ਭਵੇਯ੍ਯ. ਏਵਞ੍ਹਿ ਸਤਿ ਕਿਚ੍ਚਯਸ੍ਸ ਭਾਵੋ ਕਿਚ੍ਚਯਤਾ ਕਰਣੀਯਸ੍ਸ ਭਾਵੋ ਕਰਣੀਯਤਾਤਿ ਵਚਨਤ੍ਥੋ ਨ ਕਤ੍ਤਬ੍ਬੋ ਭਵੇਯ੍ਯ, ਕਤੋ ਚ, ਤਸ੍ਮਾ ਨ ਕਮ੍ਮਵਾਚਕੋਤਿ ਦਟ੍ਠਬ੍ਬਂ. ਤਸ੍ਸੇਵਾਤਿ ਸਙ੍ਘਕਮ੍ਮਸ੍ਸੇਵ. ਤਤ੍ਥਾਤਿ ਅਪਲੋਕਨਾਦੀਸੁ ਚਤੂਸੁ ਕਮ੍ਮੇਸੁ. ਸੀਮਟ੍ਠਕਸਙ੍ਘਨ੍ਤਿ ‘‘ਉਪਚਾਰਸੀਮਾਦੀਸੁ ਠਿਤਂ ਸਙ੍ਘਂ. ਸੋਧੇਤ੍ਵਾਤਿ ਏਤ੍ਥ ਸੋਧਨਂ ਨਾਮ ਸੀਮਟ੍ਠਕਸਙ੍ਘਸ੍ਸ ਹਤ੍ਥਪਾਸਨਯਨਂ, ਛਨ੍ਦਾਰਹਾਨਂ ਛਨ੍ਦਸ੍ਸ ਆਹਰਣਂ, ਸੀਮਤੋ ਬਹਿਕਰਣਂ. ਤਮੇਵਤ੍ਥਂ ਏਕਦੇਸਤੋ ਦਸ੍ਸੇਤੁਂ ਵੁਤ੍ਤਂ ‘‘ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾ’’ਤਿ. ਅਪਲੋਕੇਤਿ ਆਪੁਚ੍ਛਤਿ ਅਨੇਨਾਤਿ ਅਪਲੋਕਨਂ, ਤਂਯੇਵ ਕਮ੍ਮਂ ਅਪਲੋਕਨਕਮ੍ਮਂ. ਵੁਤ੍ਤਨਯੇਨੇਵਾਤਿ ‘‘ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ’’ਤਿਆਦਿਨਾ ਵੁਤ੍ਤਨਯੇਨੇਵ. ‘‘ਸੁਣਾਤੁ ਮੇ’’ਤਿਆਦਿਨਾ ਸਙ੍ਘਗਣਪੁਗ੍ਗਲੇ ਞਾਪੇਤਿ ਏਤਾਯਾਤਿ ਞਤ੍ਤਿ, ਸਾਯੇਵ ਕਮ੍ਮਂ ਞਤ੍ਤਿਕਮ੍ਮਂ, ਞਤ੍ਤਿਯੇਵ ਦੁਤਿਯਂ ਞਤ੍ਤਿਦੁਤਿਯਂ, ਤਮੇਵ ਕਮ੍ਮਂ ਞਤ੍ਤਿਦੁਤਿਯਕਮ੍ਮਂ. ਏਤ੍ਥ ਕਿਞ੍ਚਾਪਿ ਞਤ੍ਤਿ ਪਠਮਂ ਠਪਿਤਾ, ਕਮ੍ਮਵਾਚਾਯੇਵ ਦੁਤਿਯਾ ਹੋਤਿ, ‘‘ਫਸ੍ਸਪਞ੍ਚਮਾ’’ਤਿਆਦੀਸੁ (ਧਾਤੁ. ੩੧੬) ਵਿਯ ਪਨ ਪਟਿਲੋਮਵਸੇਨ ਵੋਹਾਰਂ ਕਤ੍ਵਾ ‘‘ਞਤ੍ਤਿਦੁਤਿਯਾ’’ਤਿ ਵੁਤ੍ਤਂ. ਫਸ੍ਸਪਞ੍ਚਮਾਤਿ ਏਤ੍ਥ ਕਿਞ੍ਚਾਪਿ ਧਮ੍ਮਸਙ੍ਗਣਿਯਂ (ਧ. ਸ. ੧ ਆਦਯੋ) ‘‘ਫਸ੍ਸੋ ਹੋਤਿ, ਵੇਦਨਾ ਹੋਤਿ, ਸਞ੍ਞਾ ਹੋਤਿ, ਚੇਤਨਾ ਹੋਤਿ, ਚਿਤ੍ਤਂ ਹੋਤੀ’’ਤਿ ਫਸ੍ਸਂ ਪਠਮਂ ਵੁਤ੍ਤਂ, ਪਟਿਲੋਮਵਸੇਨ ਪਨ ਵੋਹਾਰਂ ਕਤ੍ਵਾ ‘‘ਫਸ੍ਸਪਞ੍ਚਮਾ’’ਤਿ ਧਾਤੁਕਥਾਯਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਸੇਵ ਨਯੋ ਞਤ੍ਤਿ ਚਤੁਤ੍ਥਕਮ੍ਮੇਪਿ. ਏਕਾਯ ਚ ਅਨੁਸਾਵਨਾਯਾਤਿ ਞਤ੍ਤਿਤੋ ਅਨੁਪਚ੍ਛਾ ਸਾਵੇਤਬ੍ਬਾਤਿ ਅਨੁਸਾਵਨਾ, ਤਾਯ, ਤੀਹਿ ਚ ਅਨੁਸਾਵਨਾਹੀਤਿ ਞਤ੍ਤਿਤੋਅਨੁ ਪਚ੍ਛਾ, ਪੁਨਪ੍ਪੁਨਂ ਵਾ ਤਿਕ੍ਖਤ੍ਤੁਂ ਸਾਵੇਤਬ੍ਬਾਤਿ ਅਨੁਸਾਵਨਾ, ਤਾਹਿ. ਤਤ੍ਥਾਤਿ ਚਤੂਸੁ ਕਮ੍ਮੇਸੁ.

ਅਪਲੋਕੇਤ੍ਵਾਵਾਤਿ ਏਤ੍ਥ ਏਵਫਲਂ ਦਸ੍ਸੇਨ੍ਤੋ ਆਹ ‘‘ਞਤ੍ਤਿਕਮ੍ਮਾਦਿਵਸੇਨ ਨ ਕਾਤਬ੍ਬ’’ਨ੍ਤਿ. ਞਤ੍ਤਿਕਮ੍ਮਮ੍ਪੀਤਿ ਪਿਸਦ੍ਦੇਨ ਨ ਕੇਵਲਂ ਅਪਲੋਕਨਕਮ੍ਮਮੇਵ, ਅਥ ਖੋ ਞਤ੍ਤਿਕਮ੍ਮਮ੍ਪੀਤਿ ਦਸ੍ਸੇਤਿ. ਞਤ੍ਤਿਦੁਤਿਯਕਮ੍ਮਂ ਪਨਾਤਿ ਏਤ੍ਥ ਪਨਸਦ੍ਦੋ ਵਿਸੇਸਤ੍ਥਜੋਤਕੋ, ਪਕ੍ਖਨ੍ਤਰਜੋਤਕੋ ਵਾ. ਤਤ੍ਥਾਤਿ ਦ੍ਵੀਸੁ ਕਮ੍ਮੇਸੁ. ਗਰੁਕਾਨੀਤਿ ਅਲਹੁਕਾਨਿ. ਅਵਸੇਸਾਨੀਤਿ ਛਹਿ ਕਮ੍ਮੇਹਿ ਅਵਸੇਸਾਨਿ, ਏਵਰੂਪਾਨਿ ਲਹੁਕਕਮ੍ਮਾਨੀਤਿ ਸਮ੍ਬਨ੍ਧੋ. ‘‘ਅਵਸੇਸਾ’’ਤਿਪਿ ਪਾਠੋ, ਸਮ੍ਮੁਤਿਯੋਤਿ ਸਮ੍ਬਨ੍ਧੋ. ਅਪਲੋਕੇਤ੍ਵਾਪੀਤਿ ਪਿਸਦ੍ਦੋ ਞਤ੍ਤਿਦੁਤਿਯਕਮ੍ਮਵਾਚਂ ਸਾਵੇਤ੍ਵਾਪੀਤਿ ਸਮ੍ਪਿਣ੍ਡੇਤਿ. ਅਞ੍ਞਤ੍ਥਾਪੋਹਨਂ ਦਸ੍ਸੇਨ੍ਤੋ ਆਹ ‘‘ਞਤ੍ਤਿਕਮ੍ਮਞਤ੍ਤਿਚਤੁਤ੍ਥਕਮ੍ਮਵਸੇਨ ਪਨ ਨ ਕਾਤਬ੍ਬਮੇਵਾ’’ਤਿ. ਞਤ੍ਤਿਚਤੁਤ੍ਥਕਮ੍ਮਂ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਸਮਥਕ੍ਖਨ੍ਧਕੇ.

ਵਿਤ੍ਥਾਰਤੋ ਪਨ ਆਗਤੋਯੇਵਾਤਿ ਸਮ੍ਬਨ੍ਧੋ. ਏਤੇਸਨ੍ਤਿ ਚਤੁਨ੍ਨਂ ਕਮ੍ਮਾਨਂ. ਯਂ ਪਨ ਅਤ੍ਥਜਾਤਂ ਅਨੁਤ੍ਤਾਨਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਚਤੂਸੁ ਕਮ੍ਮੇਸੁ. ਤਨ੍ਤਿ ਅਤ੍ਥਜਾਤਂ. ਏਵਨ੍ਤਿ ਏਵਂ ਕਮ੍ਮਵਗ੍ਗੇਯੇਵ ਵਣ੍ਣਯਮਾਨੇ. ਹੀਤਿ ਲਦ੍ਧਗੁਣਜੋਤਕੋ. ਸੁਵਿਞ੍ਞੇਯ੍ਯਾਤਿ ਸੁਖੇਨ ਵਿਞ੍ਞਾਤਬ੍ਬਾ.

੨੧੬. ਪਾਲ਼ਿਵਸੇਨੇਵਾਤਿ ਨ ਅਟ੍ਠਕਥਾਵਸੇਨਾਤਿ ਅਧਿਪ੍ਪਾਯੋ.

੨੨੦. ਯੇਨਾਤਿ ਚਿਤ੍ਤੁਪ੍ਪਾਦੇਨ. ਇਮਿਨਾ ਵਿਵਦਨ੍ਤਿ ਅਨੇਨਾਤਿ ਵਿਵਾਦੋਤਿ ਵਚਨਤ੍ਥਂ ਦਸ੍ਸੇਤਿ. ਸਮਥੇਹਿ ਚਾਤਿ ਚਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਨ ਕੇਵਲਂ ਵਿਵਾਦੋਯੇਵ, ਅਥ ਖੋ ਅਧਿਕਰਣਞ੍ਚਾਤਿ ਸਮ੍ਪਿਣ੍ਡੇਤਿ, ਅਥ ਵਾ ਸਮਥੇਹਿ ਚਾਤਿ ਸਮਥੇਹਿ ਏਵ. ਇਮਿਨਾ ਸਮਥੇਹਿ ਅਧਿਕਰੀਯਤਿ ਵੂਪਸਮੀਯਤੀਤਿ ਅਧਿਕਰਣਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਵਿਵਾਦੋਯੇਵ ਅਧਿਕਰਣਂ ਵਿਵਾਦਾਧਿਕਰਣਂ. ਏਵਮਾਦਿਨਾ ਨਯੇਨਾਤਿ ਆਦਿਸਦ੍ਦੇਨ ਅਨੁਦ੍ਧਂਸਨੇਨ ਵਦਨ੍ਤਿ ਅਨੇਨ ਚਿਤ੍ਤੁਪ੍ਪਾਦੇਨਾਤਿ ਅਨੁਵਾਦੋਤਿਆਦਯੋ ਵਚਨਤ੍ਥੇ ਸਙ੍ਗਣ੍ਹਾਤਿ.

੨੨੨. ਸਨ੍ਧਾਯਭਾਸਿਤਵਸੇਨਾਤਿ ਲੋਕਵਜ੍ਜਂ ਸਨ੍ਧਾਯ ਭਾਸਿਤਸ੍ਸ ਵਚਨਸ੍ਸ ਵਸੇਨ. ਸਨ੍ਧਾਯਭਾਸਿਤਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਯਸ੍ਮਿਂ ਹੀ’’ਤਿਆਦਿ. ਤਤ੍ਥ ਪਥਵਿਖਣਨਾਦਿਕੇ ਯਸ੍ਮਿਂ ਆਪਤ੍ਤਾਧਿਕਰਣੇਤਿ ਯੋਜਨਾ. ਤਸ੍ਮਿਨ੍ਤਿ ਕੁਸਲਚਿਤ੍ਤਙ੍ਗੇ ਆਪਤ੍ਤਾਧਿਕਰਣੇ. ਤਸ੍ਮਾਤਿ ਯਸ੍ਮਾ ਨ ਸਕ੍ਕਾ ਵਤ੍ਤੁਂ, ਤਸ੍ਮਾ. ਇਦਨ੍ਤਿ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਚਨਂ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਨ੍ਧਾਯ ਅਵੁਤ੍ਤਂ ਦਸ੍ਸੇਤ੍ਵਾ ਸਨ੍ਧਾਯ ਵੁਤ੍ਤਂ ਦਸ੍ਸੇਨ੍ਤੋ ਆਹ ‘‘ਇਦਂ ਪਨ ਸਨ੍ਧਾਯ ਵੁਤ੍ਤ’’ਨ੍ਤਿ. ਤਤ੍ਥ ਇਦਂ ਪਨਾਤਿ ਕਾਰਣਂ ਪਨ ਸਨ੍ਧਾਯਾਤਿ ਸਮ੍ਬਨ੍ਧੋ. ਯਂ ਆਪਤ੍ਤਾਧਿਕਰਣਨ੍ਤਿ ਯੋਜਨਾ. ‘‘ਲੋਕਵਜ੍ਜ’’ਨ੍ਤਿ ਪਦੇ ਤੁਲ੍ਯਾਧਿਕਰਣਂ. ਲੋਕਸ੍ਮਿਂ, ਲੋਕੇਹਿ ਵਾ ਵਜ੍ਜੇਤਬ੍ਬਨ੍ਤਿ ਲੋਕਵਜ੍ਜਂ. ਤਨ੍ਤਿ ਆਪਤ੍ਤਾਧਿਕਰਣਂ. ਤਤ੍ਥਾਤਿ ਆਪਤ੍ਤਾਧਿਕਰਣੇ. ਵਿਕਪ੍ਪੋਤਿ ਵਿਵਿਧਾ ਕਪ੍ਪਨਂ, ਵਿਵਿਧਤਕ੍ਕੋ ਵਾ. ਯਂ ਪਨਾਤਿ ਆਪਤ੍ਤਾਧਿਕਰਣਂ ਪਨ. ‘‘ਪਣ੍ਣਤ੍ਤਿਵਜ੍ਜ’’ਨ੍ਤਿ ਪਦੇ ਤੁਲ੍ਯਾਧਿਕਰਣਂ. ਭਗਵਤੋ ਪਞ੍ਞਤ੍ਤਿਯਾ ਹੇਤੁਭੂਤਾਯ ਵਜ੍ਜੇਤਬ੍ਬਨ੍ਤਿ ਪਣ੍ਣਤ੍ਤਿਵਜ੍ਜਂ. ਤਨ੍ਤਿ ਆਪਤ੍ਤਾਧਿਕਰਣਂ, ਅਕੁਸਲਂ ਹੋਤੀਤਿ ਸਮ੍ਬਨ੍ਧੋ. ਕਿਞ੍ਚੀਤਿ ਅਪ੍ਪਮਤ੍ਤਕਂ, ਆਪਤ੍ਤਾਨਾਪਤ੍ਤਿਂ ਅਜਾਨਨ੍ਤਸ੍ਸ ਆਪਜ੍ਜਨਤੋਤਿ ਸਮ੍ਬਨ੍ਧੋ. ਤਸ੍ਮਾਤਿ ਯਸ੍ਮਾ ਅਬ੍ਯਾਕਤਂ ਹੋਤਿ, ਤਸ੍ਮਾ. ਤਤ੍ਥਾਤਿ ਪਣ੍ਣਤ੍ਤਿਵਜ੍ਜਭੂਤੇ ਆਪਤ੍ਤਾਧਿਕਰਣੇ. ‘‘ਆਪਤ੍ਤਾਧਿਕਰਣਂ…ਪੇ… ਕੁਸਲ’’ਨ੍ਤਿ ਇਦਂ ਵਚਨਂ ਵੁਤ੍ਤਨ੍ਤਿ ਯੋਜਨਾ.

ਯਦਿ ਕੁਸਲਚਿਤ੍ਤੋ ਆਪਜ੍ਜਤਿ, ਅਥ ਨਨੁ ਆਪਤ੍ਤਾਧਿਕਰਣਂ ਕੁਲਲਨ੍ਤਿ ਵਤ੍ਤਬ੍ਬੋ ਭਵੇਯ੍ਯਾਤਿ ਆਹ ‘‘ਸਚੇ ਪਨਾ’’ਤਿਆਦਿ. ਯਨ੍ਤਿ ਆਪਤ੍ਤਾਧਿਕਰਣਂ. ‘‘ਇਦਂ ਵੁਚ੍ਚਤਿ…ਪੇ… ਕੁਸਲ’’ਨ੍ਤਿ ਵਦੇਯ੍ਯ ਸਚੇਤਿ ਯੋਜਨਾ. ਏਲ਼ਕਲੋਮਞ੍ਚ ਪਦਸੋਧਮ੍ਮਞ੍ਚ ਏਲ਼ਕਲੋਮਪਦਸੋਧਮ੍ਮਾਨਿ, ਤਾਨਿ ਆਦੀਨਿ ਯੇਸਂ ਤਾਨੀਤਿ ਏਲ਼ਕਲੋਮਪਦਸੋਧਮ੍ਮਾਦੀਨਿ, ਤਾਨਿ ਸਮੁਟ੍ਠਾਨਾਨਿ ਯਾਸਨ੍ਤਿ ਏਲ਼ਕਲੋਮਪਦਸੋਧਮ੍ਮਾਦਿਸਮੁਟ੍ਠਾਨਾ, ਤਾਸਂ ਆਪਤ੍ਤੀਨਮ੍ਪੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਏਲ਼ਕਲੋਮਪਦਸੋਧਮ੍ਮਾਦਿਸਮੁਟ੍ਠਾਨਾਸੁ ਆਪਤ੍ਤੀਸੁ. ਆਪਤ੍ਤਿਯਾ ਅਙ੍ਗਨ੍ਤਿ ਆਪਤ੍ਤਿਯਾ ਕਾਰਣਂ. ਏਵਂ ਆਪਤ੍ਤਿਯਾ ਅਨਙ੍ਗਂ ਦਸ੍ਸੇਤ੍ਵਾ ਤਸ੍ਸਾਯੇਵ ਅਙ੍ਗਂ ਦਸ੍ਸੇਨ੍ਤੋ ਆਹ ‘‘ਕਾਯਵਚੀਵਿਞ੍ਞਤ੍ਤਿਵਸੇਨ ਪਨਾ’’ਤਿਆਦਿ. ਤਤ੍ਥ ਚਲਿਤਪ੍ਪਵਤ੍ਤਾਨਨ੍ਤਿ ਚਲਿਤੇਨ ਹੇਤੁਭੂਤੇਨ ਪਵਤ੍ਤਾਨਂ. ਅਥ ਵਾ ਚਲਿਤੋ ਚ ਕਾਯੋ, ਪਵਤ੍ਤਾ ਚ ਵਾਚਾਤਿ ਚਲਿਤਪ੍ਪਵਤ੍ਤਾ, ਤਾਸਂ ਚਲਿਤਪ੍ਪਵਤ੍ਤਾਨਂ ਕਾਯਵਾਚਾਨਂ. ਤਞ੍ਚਾਤਿ ਕਾਯਵਾਚਾਨਂ ਅਞ੍ਞਤਰਞ੍ਚ. ਅਬ੍ਯਾਕਤਨ੍ਤਿ ਏਤ੍ਥ ਇਤਿਸਦ੍ਦੋ ਪਰਿਸਮਾਪਨਤ੍ਥੋ.

ਅਯਮਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਤੇਨਾਤਿ ਚਿਤ੍ਤੇਨ. ‘‘ਇਦਂ…ਪੇ… ਸਦ੍ਧਿ’’ਨ੍ਤਿ ਇਮਿਨਾ ਸਞ੍ਜਾਨਨ੍ਤੋਤਿ ਏਤ੍ਥ ਸਂਸਦ੍ਦਸ੍ਸ ਸੁਨ੍ਦਰਤ੍ਥਂ ਸਹ ਆਕਾਰੇਨ ਦਸ੍ਸੇਤਿ. ‘‘ਵੀਤਿਕ੍ਕਮ…ਪੇ… ਕਪ੍ਪੇਤ੍ਵਾ’’ਤਿ ਇਮਿਨਾ ਚੇਚ੍ਚਾਤਿ ਪਦਸ੍ਸ ਅਤ੍ਥਂ ਸਹ ਵਿਸੇਸਨੇਨ ਦਸ੍ਸੇਤਿ. ‘‘ਉਪਕ੍ਕਮਵਸੇਨ…ਪੇ… ਪੇਸੇਤ੍ਵਾ’’ਤਿ ਇਮਿਨਾ ਅਭਿਵਿਤਰਿਤ੍ਵਾਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਪਾਲ਼ਿਯਂ ਯਂਸਦ੍ਦੋਵੀਤਿਕ੍ਕਮਵਿਸਯੋਤਿ ਆਹ ‘‘ਯਂ ਆਪਤ੍ਤਾਧਿਕਰਣਂ ਵੀਤਿਕ੍ਕਮ’’ਨ੍ਤਿ. ‘‘ਆਪਜ੍ਜਤੀ’’ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਏਵਂ ਵੀਤਿਕ੍ਕਮਤੋ ਤਸ੍ਸ ਭਿਕ੍ਖੁਨੋਤਿ ਯੋਜਨਾ.

ਅਬ੍ਯਾਕਤਵਾਰੇਪੀਤਿ ਪਿਸਦ੍ਦੋ ਅਕੁਸਲਵਾਰਂ ਅਪੇਕ੍ਖਤਿ. ਤਸ੍ਸਾਤਿ ਚਿਤ੍ਤਸ੍ਸ. ਅਜਾਨਨ੍ਤੋਤਿਆਦੀਨਂ ਪਦਾਨਮਤ੍ਥੋ ਅਕੁਸਲਵਾਰੇ ਵੁਤ੍ਤਪਟਿਪਕ੍ਖਵਸੇਨ ਵੇਦਿਤਬ੍ਬੋ. ਯਂ ਆਪਤ੍ਤਾਧਿਕਰਣਨ੍ਤਿਆਦੀਨਂ ਪਦਾਨਮਤ੍ਥੋ ਅਕੁਸਲਵਾਰੇਨ ਸਦਿਸੋਯੇਵ.

੨੨੪. ਅਯਂ ਵਿਵਾਦੋ ਨੋ ਅਧਿਕਰਣਨ੍ਤਿਆਦੀਸੁ ਏਵਮਤ੍ਥੋ ਵੇਦਿਤਬ੍ਬੋਤਿ ਸਮ੍ਬਨ੍ਧੋ.

੯. ਅਧਿਕਰਣਵੂਪਸਮਨਸਮਥਕਥਾ

੨੨੮. ਚਤੁਵਗ੍ਗਕਰਣੇ ਕਮ੍ਮੇਤਿ ਸੀਮਸਮ੍ਮੁਤਿਆਦਿਕਮ੍ਮੇ. ਪਞ੍ਚਵਗ੍ਗਕਰਣੇਤਿ ਪਚ੍ਚਨ੍ਤਿਮੇਸੁ ਜਨਪਦੇਸੁ ਉਪਸਮ੍ਪਦਾਦਿਕਮ੍ਮੇ. ਦਸਵਗ੍ਗਕਰਣੇਤਿ ਮਜ੍ਝਿਮੇਸੁ ਜਨਪਦੇਸੁ ਉਪਸਮ੍ਪਦਕਮ੍ਮੇ. ਵੀਸਤਿਵਗ੍ਗਕਰਣੇਤਿ ਅਬ੍ਭਾਨਕਮ੍ਮੇ. ਕਮ੍ਮਪ੍ਪਤ੍ਤਾਤਿ ਕਮ੍ਮਸ੍ਸ ਪਤ੍ਤਾ ਯੁਤ੍ਤਾ ਅਨੁਰੂਪਾ.

੨੩੦. ਸਮ੍ਪਟਿਚ੍ਛਿਤਬ੍ਬਨ੍ਤਿ ਪਟਿਗ੍ਗਣ੍ਹਿਤਬ੍ਬਂ. ਸਮ੍ਪਟਿਚ੍ਛਿਤ੍ਵਾ ਚ ਪਨ ਅਤਿਕ੍ਕਾਮੇਤਬ੍ਬਨ੍ਤਿ ਸਮ੍ਬਨ੍ਧੋ. ਭਣ੍ਡਕਨ੍ਤਿ ਚੀਵਰਾਦਿਭਣ੍ਡਕਂ. ਮਾਨਨਿਗ੍ਗਹਤ੍ਥਾਯਾਤਿ ਭਣ੍ਡਨਜਾਤਾਨਂ ਮਾਨਸ੍ਸ ਨਿਗ੍ਗਹਤ੍ਥਾਯ. ਕਤਿਪਾਹਨ੍ਤਿ ਕਤਿਪਯਾਹਂ, ਦ੍ਵੀਹਤੀਹਨ੍ਤਿ ਅਤ੍ਥੋ.

੨੩੧. ਅਨਨ੍ਤਾਨਿ ਚੇਵ ਭਸ੍ਸਾਨੀਤਿ ਏਤ੍ਥ ਅਨਨ੍ਤਸਦ੍ਦੋ ਅਪਰਿਮਾਣਸਦ੍ਦੇਨ ਅਤ੍ਥਤੋ ਏਕੋਤਿ ਆਹ ‘‘ਅਪਰਿਮਾਣਾਨੀ’’ਤਿ. ‘‘ਵਚਨਾਨੀ’’ਤਿ ਇਮਿਨਾ ਭਸ੍ਸਸਦ੍ਦੋ ਵਚਨਪਰਿਯਾਯੋਤਿ ਦਸ੍ਸੇਤਿ. ਉਬ੍ਬਾਹਿਕਾਯ ਸਮ੍ਮਨਿਤਬ੍ਬੋਤਿ ਕੇਨ ਸਮ੍ਮਨਿਤਬ੍ਬੋਤਿ ਆਹ ‘‘ਅਪਲੋਕੇਤ੍ਵਾ ਵਾ’’ਤਿਆਦਿ. ਇਮਿਨਾ ਅਪਲੋਕਨਕਮ੍ਮੇਨ ਵਾ ਞਤ੍ਤਿਦੁਤਿਯਕਮ੍ਮੇਨ ਵਾ ਸਮ੍ਮਨਿਤਬ੍ਬੋਤਿ ਦਸ੍ਸੇਤਿ. ਅਨਨ੍ਤਾਨਿ ਭਸ੍ਸਾਨਿ ਧਮ੍ਮਕਥਿਕਂ ਉਦ੍ਧਰਿਤ੍ਵਾ ਬਾਹਤਿ ਪਟਿਸੇਧੇਤਿ ਇਮਾਯ ਸਮ੍ਮੁਤਿਯਾਤਿ ਉਬ੍ਬਾਹਿਕਾ, ਤਾਯ. ਏਵਂ ਸਮ੍ਮਤੇਹਿ ਪਨ ਭਿਕ੍ਖੂਹਿ ਵਿਨਿਚ੍ਛਿਤਬ੍ਬਨ੍ਤਿ ਸਮ੍ਬਨ੍ਧੋ. ਵਿਸੁਂ ਨਿਸੀਦਿਤ੍ਵਾ ਤਸ੍ਸਾਯੇਵ ਪਰਿਸਾਯ ਨਿਸੀਦਿਤ੍ਵਾ ਵਾਤਿ ਯੋਜਨਾ. ਅਞ੍ਞੇਹੀਤਿ ਸਮ੍ਮਤਭਿਕ੍ਖੂਹਿ ਅਞ੍ਞੇਹਿ.

੨੩੩. ਤਤ੍ਰਸ੍ਸਾਤਿ ਏਤ੍ਥ ਤਤ੍ਰ ਅਸ੍ਸਾਤਿ ਪਦਵਿਭਾਗਂ ਕਤ੍ਵਾ ਤਸਦ੍ਦੋ ਪਰਿਸਵਿਸਯੋ ਪਸਿਦ੍ਧਵਿਸਯੋ, ਅਸ੍ਸਸਦ੍ਦੋ ਆਖ੍ਯਾਤਿਕੋਤਿ ਆਹ ‘‘ਤਸ੍ਸਂ ਪਰਿਸਤਿ ਭਵੇਯ੍ਯਾ’’ਤਿ. ‘‘ਨੇਵ ਸੁਤ੍ਤਂ ਆਗਤ’’ਨ੍ਤਿ ਸਾਮਞ੍ਞਤੋ ਵੁਤ੍ਤੇਪਿ ‘‘ਨੋ ਸੁਤ੍ਤਵਿਭਙ੍ਗੋ’’ਤਿ ਵਕ੍ਖਮਾਨਤ੍ਤਾ ਮਾਤਿਕਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਨ ਮਾਤਿਕਾ ਆਗਤਾ’’ਤਿ. ਵਿਨਯੋਪੀਤਿ ਖਨ੍ਧਕਵਿਨਯੋਪਿ. ਪਿਸਦ੍ਦੇਨ ਸੁਤ੍ਤਵਿਭਙ੍ਗਂ ਅਪੇਕ੍ਖਤਿ. ਬ੍ਯਞ੍ਜਨਚ੍ਛਾਯਾਯਾਤਿ ਏਤ੍ਥ ਛਾਯਾਸਦ੍ਦੋ ਪਟਿਬਿਮ੍ਬੇ ਚ ਪਭਾਯ ਚ ਹੋਤੀਤਿ ਆਹ ‘‘ਬ੍ਯਞ੍ਜਨਮਤ੍ਤਮੇਵਾ’’ਤਿ, ਬ੍ਯਞ੍ਜਨਪਟਿਬਿਮ੍ਬਿਕਬ੍ਯਞ੍ਜਨਪਭਾਵਨ੍ਤਭੂਤਂ ਅਤ੍ਥਂ ਅਗ੍ਗਹੇਤ੍ਵਾ ਬ੍ਯਞ੍ਜਨਪਟਿਬਿਮ੍ਬਬ੍ਯਞ੍ਜਨਪਭਾਮਤ੍ਤਮੇਵ ਗਹੇਤ੍ਵਾਤਿ ਅਧਿਪ੍ਪਾਯੋ. ‘‘ਪਟਿਸੇਧੇਤੀ’’ਤਿ ਇਮਿਨਾ ਪਟਿਬਾਹਸਦ੍ਦੋ ਪਟਿਸੇਧਤ੍ਥੋਯੇਵ, ਨ ਮਦ੍ਦਨਤ੍ਥੋਤਿ ਦਸ੍ਸੇਤਿ. ਪਟਿਬਾਹਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਜਾਤਰੂਪਰਜਤਖੇਤ੍ਤਵਤ੍ਥੁਪਟਿਗ੍ਗਹਣਾਦੀਸੂ’’ਤਿਆਦਿ. ਕਿਨ੍ਤਿ ਕੇਨ ਕਾਰਣੇਨ, ਕਸ੍ਮਾ ਕਾਰਣਾ ਵਾ. ਇਮੇਤਿ ਜਾਤਰੂਪਾਦਿਪਟਿਗ੍ਗਾਹਕੇ ਭਿਕ੍ਖੂ. ਕਾਰੇਥਾਤਿ ਤੁਮ੍ਹੇ ਕਾਰੇਯ੍ਯਾਥ. ਏਯ੍ਯਾਥਸ੍ਸ ਹਿ ਏਥਾਦੇਸੋ. ਪੁਚ੍ਛਾਯਂ ਸਤ੍ਤਮੀਵਿਭਤ੍ਤਿ ਹੋਤਿ. ਸੁਤ੍ਤੇਤਿ ਸੁਤ੍ਤਨ੍ਤਪਿਟਕੇ. ਅਪਰੋ ਧਮ੍ਮਕਥਿਕੋ ਵਦਤੀਤਿ ਸਮ੍ਬਨ੍ਧੋ. ਇਮੇਸਨ੍ਤਿ ਓਲਮ੍ਬੇਤ੍ਵਾ ਨਿਵਾਸੇਨ੍ਤਾਨਂ. ਏਤ੍ਥਾਤਿ ਓਲਮ੍ਬੇਤ੍ਵਾ ਨਿਵਾਸਨੇ.

੨੩੪. ਬਹੁਤਰਾ ਭਿਕ੍ਖੂਤਿ ਏਤ੍ਥ ਦ੍ਵਿਗੁਣਤਿਗੁਣਾਦਿਨਾ ਅਧਿਕਾ ਏਵ ਬਹੁਤਰਾ ਨਾਮਾਤਿ ਆਹ ‘‘ਏਕੇਨਪਿ ਅਧਿਕਾ ਬਹੁਤਰਾਵਾ’’ਤਿ. ‘‘ਕੋ ਪਨ ਵਾਦੋ’’ਤਿਆਦਿਨਾ ‘‘ਏਕੇਨਪੀ’’ਤਿ ਏਤ੍ਥ ਪਿਸਦ੍ਦਸ੍ਸ ਗਰਹਤ੍ਥਂ ਦਸ੍ਸੇਤਿ.

ਤਿਵਿਧਸਲਾਕਗ੍ਗਾਹਕਥਾ

੨੩੫. ਸਞ੍ਞਤ੍ਤਿਯਾਤਿ ਏਤ੍ਥ ਸਞ੍ਞਾਪਨਂ ਸਞ੍ਞਤ੍ਤਿ, ਤਦਤ੍ਥਾਯਾਤਿ ਦਸ੍ਸੇਨ੍ਤੋ ਆਹ ‘‘ਸਞ੍ਞਾਪਨਤ੍ਥਾਯਾ’’ਤਿ. ਗੂਹਿਤਬ੍ਬੋਤਿ ਗੂਲ਼੍ਹੋ, ਸੋਯੇਵ ਗੂਲ਼੍ਹਕੋ, ਸਲਾਕਗ੍ਗਾਹੋ ਕਾਤਬ੍ਬੋਤਿ ਸਮ੍ਬਨ੍ਧੋ. ਵਿਵਰਿਤਬ੍ਬੋਤਿ ਵਿਵਟੋ, ਸੋਯੇਵ ਵਿਵਟਕੋ. ਸਸ੍ਸ ਅਤ੍ਤਨੋ ਕਣ੍ਣਸਮੀਪੇ ਜਪ੍ਪੀਯਤਿ ਕਥੀਯਤੀਤਿ ਸਕਣ੍ਣਜਪ੍ਪੋ, ਸੋਯੇਵ ਸਕਣ੍ਣਜਪ੍ਪਕੋ. ‘‘ਨਿਮਿਤ੍ਤਸਞ੍ਞਂ ਆਰੋਪੇਤ੍ਵਾ’’ਤਿ ਇਮਿਨਾ ਵਣ੍ਣਾਵਣ੍ਣਾਯੋ ਕਤ੍ਵਾਤਿ ਏਤ੍ਥ ਵਣ੍ਣਸਦ੍ਦੋ ਸਣ੍ਠਾਨਵਾਚਕੋਤਿ ਦਸ੍ਸੇਤਿ. ਸੁਸਣ੍ਠਾਨਦੁਸਣ੍ਠਾਨਾ ਸਲਾਕਾਯੋ ਕਤ੍ਵਾਤਿ ਅਤ੍ਥੋ. ਤਤੋਤਿ ਵਿਸਭਾਗਕਰਣਤੋ ਪਰਂ ਗਹੇਤਬ੍ਬੋਤਿ ਸਮ੍ਬਨ੍ਧੋ. ਸਬ੍ਬਾਪਿ ਤਾ ਸਲਾਕਾਯੋਤਿ ਯੋਜਨਾ. ਕਤ੍ਵਾਤਿ ਪਕ੍ਖਿਪਨਂ ਕਤ੍ਵਾ. ਵੁਤ੍ਤਨਯੇਨਾਤਿ ‘‘ਅਲਜ੍ਜੁਸ੍ਸਨ੍ਨਾਯਾ’’ਤਿਆਦਿਨਾ ਵੁਤ੍ਤਨਯੇਨ. ‘‘ਯਾਵਤਤਿਯ’’ਨ੍ਤਿ ਇਮਿਨਾ ਪਚ੍ਚੁਕ੍ਕਡ੍ਢਿਤਬ੍ਬਨ੍ਤਿ ਏਤ੍ਥ ਪੁਨਪ੍ਪੁਨਂ ਉਦ੍ਧਂ ਕਡ੍ਢਿਤਬ੍ਬਨ੍ਤਿ ਅਤ੍ਥਂ ਦਸ੍ਸੇਤਿ. ਅਤਿਰੇਕਜਾਤੇਤਿ ਅਧਮ੍ਮਵਾਦੀਹਿ ਅਤਿਰੇਕਤੋ ਜਾਤੇ ਸਤੀਤਿ ਸਮ੍ਬਨ੍ਧੋ. ਯਾਵਤਤਿਯਮ੍ਪੀਤਿ ਪਿਸਦ੍ਦੋ ਤਤੋ ਊਨੇ ਏਕਦ੍ਵੇਵਾਰੇ ਪਨ ਕਾ ਨਾਮ ਕਥਾਤਿ ਦਸ੍ਸੇਤਿ.

ਸਕਣ੍ਣਜਪ੍ਪਕੇ ਪਨ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਸਚੇ ਸਙ੍ਘਤ੍ਥੇਰੋ ਗਣ੍ਹਾਤੀਤਿ ਸਮ੍ਬਨ੍ਧੋ. ਸੋਤਿ ਸਙ੍ਘਤ੍ਥੇਰੋ. ਵਯੋਅਨੁਪ੍ਪਤ੍ਤਾਤਿ ਪਚ੍ਛਿਮਵਯਂ ਅਨੁਪ੍ਪਤ੍ਤਾ. ਏਤਨ੍ਤਿ ਅਧਮ੍ਮਵਾਦਿਸਲਾਕਂ. ਅਸ੍ਸਾਤਿ ਸਙ੍ਘਤ੍ਥੇਰਸ੍ਸ. ਇਤਰਾ ਸਲਾਕਾਤਿ ਅਧਮ੍ਮਵਾਦਿਸਲਾਕਾਹਿ ਅਞ੍ਞਾ ਧਮ੍ਮਵਾਦਿਸਲਾਕਾ. ਸੋਤਿ ਸਙ੍ਘਤ੍ਥੇਰੋ. ਤਨ੍ਤਿ ਧਮ੍ਮਵਾਦਿਸਲਾਕਂ. ਤਤੋਤਿ ਨੇਵ ਅਵਬੁਜ੍ਝਨਕਾਰਣਾ. ਵੁਤ੍ਤਨਯਮੇਵਾਤਿ ਗੂਲ਼੍ਹਕੇ ਵੁਤ੍ਤਨਯਮੇਵ. ਵਿਵਟੋ ਅਤ੍ਥੋ ਇਮਸ੍ਸਾਤਿ ਵਿਵਟਤ੍ਥੋ.

ਤਸ੍ਸਪਾਪਿਯਸਿਕਾਵਿਨਯਕਥਾ

੨੩੮. ਪਾਰਾਜਿਕਸਾਮਨ੍ਤਂ ਨਾਮਾਤਿ ਪਾਰਾਜਿਕਸ੍ਸ ਆਸਨ੍ਨਂ ਨਾਮ. ਅਦਿਨ੍ਨਾਦਾਨਾਦੀਸੂਤਿ ਆਦਿਸਦ੍ਦੇਨ ਮਨੁਸ੍ਸਵਿਗ੍ਗਹ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕੇ ਸਙ੍ਗਣ੍ਹਾਤਿ. ਨਿਬ੍ਬੇਠਯਮਾਨਨ੍ਤਿ ਵੇਠਨਰਹਿਤਂ, ਤਮੇਨਂ ਭਿਕ੍ਖੁਨ੍ਤਿ ਸਮ੍ਬਨ੍ਧੋ. ਇਮਿਨਾ ਨਿਬ੍ਬੇਠੇਨ੍ਤਨ੍ਤਿ ਏਤ੍ਥ ਅਨ੍ਤਸਦ੍ਦੋ ਮਾਨਸਦ੍ਦਪਰਿਯਾਯੋਤਿ ਦਸ੍ਸੇਤਿ. ਅਤਿਵੇਠੇਤੀਤਿ ਏਤ੍ਥ ਕੇਹਿ ਅਤਿਵੇਠੇਤੀਤਿ ਆਹ ‘‘ਇਙ੍ਘਾਯਸ੍ਮਾਤਿਆਦਿਵਚਨੇਹੀ’’ਤਿ. ਤੇਨਾਤਿ ਚੋਦਕੇਨ. ਮਨ੍ਤਿ ਮਮਂ. ਆਹਾਤਿ ਚੁਦਿਤਕੋ ਆਹ. ਏਤਸ੍ਸਾਤਿ ਅਵਜਾਨਨਪਟਿਜਾਨਨਾਦਿਕਾਰਕਸ੍ਸ ਪਾਪਿਯਸ੍ਸ ਪੁਗ੍ਗਲਸ੍ਸ. ਸੀਲਵਾ ਭਵਿਸ੍ਸਤੀਤਿ ਪਾਪਿਯੋ ਪੁਗ੍ਗਲੋ ਸਚੇ ਸੀਲਵਾ ਭਵਿਸ੍ਸਤਿ. ਪਟਿਪ੍ਪਸ੍ਸਦ੍ਧਿਨ੍ਤਿ ਪਾਪਿਯਭਾਵਤੋ ਪਟਿਪ੍ਪਸ੍ਸਮ੍ਭਨਂ. ਨੋ ਚੇਤਿ ਸੀਲਵਾ ਨੋ ਭਵਿਸ੍ਸਤਿ ਚੇ. ਤਥਾ ਨਾਸਿਤੋਤਿ ਤੇਨ ਤਸ੍ਸ ਪਾਪਿਯਸਿਕਕਮ੍ਮਕਰਣੇਨ ਨਾਸਂ ਗਤੋ ਭਵਿਸ੍ਸਤਿ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਸਮਥਕ੍ਖਨ੍ਧਕੇ.

ਇਤਿ ਸਮਥਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.