੧੨. ਸਤ੍ਤਸਤਿਕਕ੍ਖਨ੍ਧਕਂ
ਦਸਵਤ੍ਥੁਕਥਾ
੪੪੭. ਸਤ੍ਤਸਤਿਕਕ੍ਖਨ੍ਧਕੇ ਵਡ੍ਢੇਨ੍ਤਿ ਕਟਸਿਨ੍ਤਿ ਏਤ੍ਥ ਕਟਸੀਸਦ੍ਦੋ ਸੁਸਾਨਭੂਮਿਵਾਚਕੋਤਿ ਦਸ੍ਸੇਨ੍ਤੋ ਆਹ ‘‘ਪੁਨਪ੍ਪੁਨਂ ਕਲ਼ੇਵਰਂ ਨਿਕ੍ਖਿਪਮਾਨਾ ਭੂਮਿਂ ਵਡ੍ਢੇਨ੍ਤੀ’’ਤਿ. ਤਤ੍ਥ ਕਲ਼ੇਵਰਨ੍ਤਿ ਦੇਹਂ. ਤਞ੍ਹਿ ਕਲ਼ੇ ਅਙ੍ਗਪਚ੍ਚਙ੍ਗਾਨਂ ਅਵਯਵੇ ਸਮ੍ਪਿਣ੍ਡੇਤ੍ਵਾ ਵਰਿਯਤਿ ਇਚ੍ਛਿਯਤੀਤਿ ਕਲ਼ੇਵਰਨ੍ਤਿ ਵੁਚ੍ਚਤਿ. ਏਵਂ ਘੋਰਂ ਕਟਸਿਂ ਵਡ੍ਢੇਨ੍ਤਾਵ ਪੁਨਬ੍ਭਵਂ ਆਦਿਯਨ੍ਤੀਤਿ ਯੋਜਨਾ.
੪੫੪. ਪਾਪਕਂ ਨੋ ਆਵੁਸੋ ਕਤਨ੍ਤਿ ਏਤ੍ਥ ਨੋਸਦ੍ਦੋ ਅਮ੍ਹਸਦ੍ਦਕਾਰਿਯੋ, ਛਟ੍ਠੀਕਤ੍ਤਾ ਚ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਆਵੁਸੋ ਅਮ੍ਹੇਹਿ ਪਾਪਕਂ ਕਤ’’ਨ੍ਤਿ.
੪੫੫. ‘‘ਪਿਯਵਚਨ’’ਨ੍ਤਿ ਇਮਿਨਾ ਕਤਮੇਨ ਤ੍ਵਂ ਭੂਮਿ-ਵਿਹਾਰੇਨਾਤਿ ਏਤ੍ਥ ਭੂਮਿਸਦ੍ਦੋ ਪਿਯਵਾਚਕੋ ਰੁਲ਼੍ਹੀਸਦ੍ਦੋਤਿ ਦਸ੍ਸੇਤਿ. ‘‘ਆਮਨ੍ਤੇਤੀ’’ਤਿ ਇਮਿਨਾ ਆਲਪਨਪਦਨ੍ਤਿ ਦਸ੍ਸੇਤਿ. ਆਵੁਸੋ ਭੂਮੀਤਿ ਅਤ੍ਥੋ. ਕੁਲ੍ਲਵਿਹਾਰੋ ਨਾਮ ਮੇਤ੍ਤਾਵਿਹਾਰੋ, ਸੋ ਚ ਹੇਟ੍ਠਿਮਝਾਨਤ੍ਤਯੇ ਯੁਤ੍ਤਤ੍ਤਾ ਉਤ੍ਤਾਨਵਿਹਾਰੋਤਿ ਆਹ ‘‘ਉਤ੍ਤਾਨਵਿਹਾਰੇਨਾ’’ਤਿ.
੪੫੭. ਸਾਵਤ੍ਥਿਯਾਤਿ ਸਾਵਤ੍ਥਿਨਗਰੇ. ਸੁਤ੍ਤਵਿਭਙ੍ਗੇਤਿ ਪਦਭਾਜਨੀਯੇ. ਪਟਿਕ੍ਖਿਤ੍ਤਭਾਵਂ ਵਿਤ੍ਥਾਰੇਨ੍ਤੋ ਆਹ ‘‘ਤਤ੍ਰ ਹੀ’’ਤਿਆਦਿ. ਤਤ੍ਰਾਤਿ ਸੁਤ੍ਤਵਿਭਙ੍ਗੇ, ਪਟਿਕ੍ਖਿਤ੍ਤਂ ਹੋਤੀਤਿ ਸਮ੍ਬਨ੍ਧੋ. ਤਤ੍ਰਾਤਿ ‘‘ਸਨ੍ਨਿਧਿਕਾਰਕੇ ਅਸਨ੍ਨਿਧਿਕਾਰਕਸਞ੍ਞੀ’’ਤਿਆਦਿਵਚਨੇ. ਏਕੇ ਆਚਰਿਯਾ ਏਵਂ ਮਞ੍ਞਨ੍ਤੀਤਿ ਯੋਜਨਾ. ਕਿਨ੍ਤਿ ਮਞ੍ਞਨ੍ਤੀਤਿ ਆਹ ‘‘ਯੋ ਪਨ ਭਿਕ੍ਖੂ’’ਤਿਆਦਿ. ਅਲੋਣਕਂ ਯਮ੍ਪਿ ਆਮਿਸਨ੍ਤਿ ਯੋਜਨਾ. ਤੇਨਾਤਿ ਪੁਰੇਪਰਿਗ੍ਗਹਿਤਲੋਣੇਨ. ਤਨ੍ਤਿ ਆਮਿਸਂ. ਤਦਹੁਪਟਿਗ੍ਗਹਿਤਮੇਵਾਤਿ ਤਸ੍ਮਿਂ ਅਹਨਿ ਪਟਿਗ੍ਗਹਿਤਮੇਵ. ਤਸ੍ਮਾਤਿ ਯਸ੍ਮਾ ਤਦਹੁਪਟਿਗ੍ਗਹਿਤਮੇਵ, ਤਸ੍ਮਾ. ਵਦਤੋਤਿ ਵਦਨ੍ਤਸ੍ਸ, ਭਗਵਤੋ ਵਚਨੇਨਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਅਲੋਣਕਾਮਿਸਪਰਿਭੁਞ੍ਜਨੇ, ਦੁਕ੍ਕਟੇਨ ਭਵਿਤਬ੍ਬਂ ਇਤਿ ਮਞ੍ਞਨ੍ਤੀਤਿ ਯੋਜਨਾ. ਤੇਤਿ ਏਕੇ ਆਚਰਿਯਾ. ਦੁਕ੍ਕਟੇਨਪੀਤਿ ਪਿਸਦ੍ਦੇਨ ਪਗੇਵ ਪਾਚਿਤ੍ਤਿਯੇਨਾਤਿ ਦਸ੍ਸੇਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤ੍ਥਾਤਿ ਯਾਵਜੀਵਿਕਯਾਵਕਾਲਿਕੇਸੁ. ਯਾਵਜੀਵਿਕਂ ਨ ਤਦਹੁਪਟਿਗ੍ਗਹਿਤਂ, ਯਾਵਕਾਲਿਕਮੇਵ ਤਦਹੁਪਟਿਗ੍ਗਹਿਤਨ੍ਤਿ ਯੋਜਨਾ. ਤਦਹੁਪਟਿਗ੍ਗਹਿਤਞ੍ਚ ਯਾਵਕਾਲਿਕਨ੍ਤਿ ਸਮ੍ਬਨ੍ਧੋ. ਤਂ ਦੁਕ੍ਕਟਂ ਤੁਮ੍ਹੇ ਯਦਿ ਮਞ੍ਞਥਾਤਿ ਯੋਜਨਾ. ਯਾਵਜੀਵਿਕਮਿਸ੍ਸਨ੍ਤਿ ਲੋਣਸਙ੍ਖਾਤੇਨ ਯਾਵਜੀਵਿਕੇਨ ਸਂਸਟ੍ਠਂ. ਬ੍ਯਞ੍ਜਨਮਤ੍ਤਨ੍ਤਿ ਵਿਕਾਲੇ ਨ ਕਪ੍ਪਤੀਤਿ ਬ੍ਯਞ੍ਜਨਮਤ੍ਤਂ.
ਏਤ੍ਥਾਤਿ ‘‘ਯਾਵਕਾਲਿਕੇਨ ਭਿਕ੍ਖਵੇ’’ਤਿਆਦਿਵਚਨੇ (ਮਹਾਵ. ੩੦੫) ਤਦਹੁਪਟਿਗ੍ਗਹਿਤਂ ਯਾਵਜੀਵਿਕਨ੍ਤਿ ਯੋਜਨਾ. ਯਾਵਕਾਲਿਕਸ੍ਸ ਗਤਿ ਵਿਯ ਗਤਿ ਏਤਸ੍ਸਾਤਿ ਯਾਵਕਾਲਿਕਗਤਿਕਂ. ਤਸ੍ਮਾ ਦੁਕ੍ਕਟਂ ਨ ਹੋਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਪੁਰੇਪਟਿਗ੍ਗਹਿਤਲੋਣੇਨ ਆਮਿਸਪਰਿਭੁਞ੍ਜਨੇ. ਤਦਹੁਪਟਿਗ੍ਗਹਿਤਂ ਯਾਵਕਾਲਿਕੇਨ ਸਮ੍ਭਿਨ੍ਨਰਸਂ ਯਾਵਜੀਵਿਕਨ੍ਤਿ ਯੋਜਨਾ. ਤਨ੍ਤਿ ਯਥਾਵੁਤ੍ਤਂ ਯਾਵਜੀਵਿਕਂ, ਵਿਕਾਲਭੋਜਨਪਾਚਿਤ੍ਤਿਯਾ ਏਵ ਕਾਰਣਂ ਹੋਤੀਤਿ ਯੋਜਨਾ. ਏਵਨ੍ਤਿ ਤਥਾ, ਅਜ੍ਜ ਪਟਿਗ੍ਗਹਿਤਮ੍ਪਿ ਯਾਵਜੀਵਿਕਨ੍ਤਿ ਸਮ੍ਬਨ੍ਧੋ. ਅਪਰਜ੍ਜੁ ਪਟਿਗ੍ਗਹਿਤੇਨ ਯਾਵਕਾਲਿਕੇਨਾਤਿ ਯੋਜਨਾ. ਤਨ੍ਤਿ ਯਾਵਜੀਵਿਕੇਨ ਸਮ੍ਮਿਸ੍ਸਂ ਯਾਵਕਾਲਿਕਂ, ਅਜਾਨਨ੍ਤੋਪੀਤਿ ਸਮ੍ਬਨ੍ਧੋ. ਇਦਨ੍ਤਿ ਯਥਾਵੁਤ੍ਤਂ ਯਾਵਕਾਲਿਕਂ. ਤਤੋਤਿ ਸਨ੍ਨਿਧਿਭੋਜਨਪਾਚਿਤ੍ਤਿਯਤੋ. ਹੀਤਿ ਸਚ੍ਚਂ. ‘‘ਸਾਵਤ੍ਥਿਯਾ ਸੁਤ੍ਤਵਿਭਙ੍ਗੇ’’ਤਿ ਇਦਂ ਬ੍ਯਾਕਰਣਂ ਪਰਿਸੁਦ੍ਧਨ੍ਤਿ ਯੋਜਨਾ.
‘‘ਰਾਜਗਹੇ ਉਪੋਸਥਸਂਯੁਤ੍ਤੇ’’ਤਿ ਇਦਂ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਉਪੋਸਥਸਂਯੁਤ੍ਤੇਤਿ ਉਪੋਸਥੇਨ ਸਮ੍ਬਨ੍ਧੇ ਉਪੋਸਥਕ੍ਖਨ੍ਧਕੇ. ਕਿਂ ਸਨ੍ਧਾਯ ਵੁਤ੍ਤਨ੍ਤਿ ਆਹ ‘‘ਨ ਭਿਕ੍ਖਵੇ…ਪੇ… ਦੁਕ੍ਕਟਸ੍ਸਾਤਿ (ਮਹਾਵ. ੧੪੧) ਏਤਂ ਸਨ੍ਧਾਯਾ’’ਤਿ. ਅਤਿਸਾਰੇਤਿ ਅਤਿਕ੍ਕਮਿਤ੍ਵਾ ਸਰਣੇ ਗਮਨੇ ਪਵਤ੍ਤਨੇਤਿ ਅਤ੍ਥੋ. ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਂ. ‘‘ਚਮ੍ਪੇਯ੍ਯਕੇ ਵਿਨਯਵਤ੍ਥੁਸ੍ਮਿ’’ਨ੍ਤਿ ਇਦਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਚਮ੍ਪੇਯ੍ਯਕ੍ਖਨ੍ਧਕੇ ਆਗਤ’’ਨ੍ਤਿ ਇਮਿਨਾ ਚਮ੍ਪੇਯ੍ਯੇ ਆਗਤਂ ਚਮ੍ਪੇਯ੍ਯਕਨ੍ਤਿ ਵਚਨਤ੍ਥਂ ਦਸ੍ਸੇਤਿ.
ਧਮ੍ਮਿਕਨ੍ਤਿ ਭੂਤੇਨ ਪਵਤ੍ਤਂ. ਸੁਤ੍ਤਵਿਭਙ੍ਗੇ ਹਿ ਯਸ੍ਮਾ ਆਗਤਨ੍ਤਿ ਸਮ੍ਬਨ੍ਧੋ. ਦਸਾਯੇਵਾਤਿ ਦਸਾਯਮੇਵ, ਆਧਾਰੇ ਚੇਤਂ ਭੁਮ੍ਮਂ. ਵਿਦਤ੍ਥਿਮਤ੍ਤਾਤਿ ਵਿਦਤ੍ਥਿਪਮਾਣਾ. ਦਸਾਯ ਵਿਨਾਤਿ ਦਸਂ ਵਜ੍ਜੇਤ੍ਵਾ. ਤਂ ਪਮਾਣਨ੍ਤਿ ਵਿਦਤ੍ਥਿਤ੍ਤਯਸਙ੍ਖਾਤਂ ਤਂ ਪਮਾਣਂ ਕਰੋਨ੍ਤਸ੍ਸ ਵੁਤ੍ਤਪਾਚਿਤ੍ਤਿਯਂ ਆਪਜ੍ਜਤੀਤਿ ਸਮ੍ਬਨ੍ਧੋ. ‘‘ਤਂ ਅਤਿਕ੍ਕਾਮਯਤੋ ਛੇਦਨਕਂ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੫੩੩) ਇਦਂ ਵਚਨਂ ਆਗਤਮੇਵ ਹੋਤੀਤਿ ਯੋਜਨਾ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਸਤ੍ਤਸਤਿਕਕ੍ਖਨ੍ਧਕੇ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ
ਸਤ੍ਤਸਤਿਕਕ੍ਖਨ੍ਧਕਵਣ੍ਣਨਾਯ
ਯੋਜਨਾ ਸਮਤ੍ਤਾ.
ਦ੍ਵਿਵਗ੍ਗਸਙ੍ਗਹਾਤਿ ਮਹਾਵਗ੍ਗਚੂਲ਼ਵਗ੍ਗਵਸੇਨ ਦ੍ਵੀਹਿ ਵਗ੍ਗੇਹਿ ਸਙ੍ਗਹਿਤਾ. ਦ੍ਵਾਵੀਸਤਿਪਭੇਦਨਾਤਿ ਮਹਾਵਗ੍ਗੇ ਦਸ, ਚੂਲ਼ਵਗ੍ਗੇ ਦ੍ਵਾਦਸਾਤਿ ਏਵਂ ਦ੍ਵਾਵੀਸਤਿਪਕਾਰਾ. ਪਞ੍ਚਕ੍ਖਨ੍ਧਦੁਕ੍ਖਪ੍ਪਹਾਯਿਨੋਤਿ ਪਞ੍ਚਕ੍ਖਨ੍ਧਸਙ੍ਖਾਤਂ ਦੁਕ੍ਖਂ ਪਜਹਨਸੀਲਸ੍ਸ, ਭਗਵਤੋਤਿ ਸਮ੍ਬਨ੍ਧੋ. ਆਸਾਪੀਤਿ ਇਚ੍ਛਾਪਿ. ਅਯਂ ਪਨੇਤ੍ਥ ਯੋਜਨਾ-ਪਞ੍ਚਕ੍ਖਨ੍ਧਦੁਕ੍ਖਪ੍ਪਹਾਯਿਨੋ ਭਗਵਤੋ ਸਾਸਨੇ ਦ੍ਵਿਵਗ੍ਗਸਙ੍ਗਹਾ ਦ੍ਵਾਵੀਸਤਿਪਭੇਦਨਾ ਯੇ ਖਨ੍ਧਕਾ ਭਗਵਤਾ ਵੁਤ੍ਤਾ, ਤੇਸਂ ਖਨ੍ਧਕਾਨਂ ਏਸਾ ਵਣ੍ਣਨਾ ਅਨ੍ਤਰਾਯਂ ਵਿਨਾ ਯਥਾ ਸਿਦ੍ਧਾ, ਏਵਂ ਤਥਾ ਪਾਣੀਨਂ ਕਲ੍ਯਾਣਾ ਆਸਾਪਿ ਸਿਜ੍ਝਨ੍ਤੂਤਿ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ
ਚੂਲ਼ਵਗ੍ਗਸਂਵਣ੍ਣਨਾਯ
ਯੋਜਨਾ ਸਮਤ੍ਤਾ.
ਜਾਦਿਲਞ੍ਛਿਤਨਾਮੇਨ, ਨੇਕਾਨਂ ਵਾਚਿਤੋ ਮਯਾ;
ਚੂਲ਼ਵਗ੍ਗਖਨ੍ਧਕਸ੍ਸ, ਸਮਤ੍ਤੋ ਯੋਜਨਾਨਯੋਤਿ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ