੧. ਖੁਦ੍ਦਾਨੁਖੁਦ੍ਦਕਸਿਕ੍ਖਾਪਦਕਥਾ

੪੪੧. ਪਞ੍ਚਸਤਿਕਕ੍ਖਨ੍ਧਕੇ ‘‘ਚਤ੍ਤਾਰਿ…ਪੇ… ਖੁਦ੍ਦਕਾਨੀ’’ਤਿ ਏਵਮਾਦਿ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਪਰਿਯਾਯੇਨਾਤਿ ਕਾਰਣੇਨ. ਧੂਮਕਾਲਿਕਨ੍ਤਿ ਏਤ੍ਥ ਧੂਮਸ੍ਸ ਕਾਲੋ ਧੂਮਕਾਲੋ, ਧੂਮਸ੍ਸ ਉਟ੍ਠਿਤਕਾਲੋਤਿ ਅਤ੍ਥੋ. ਸੋ ਏਤਸ੍ਸਤ੍ਥੀਤਿ ਧੂਮਕਾਲਿਕਂ, ਸਿਕ੍ਖਾਪਦਪਞ੍ਞਤ੍ਤਂ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਾਵਾ’’ਤਿਆਦਿ.

੪੪੩. ਇਦਨ੍ਤਿ ‘‘ਕਤਮਾਨਿ ਪਨ ਭਨ੍ਤੇ ਖੁਦ੍ਦਾਨੁਖੁਦ੍ਦਕਾਨਿ ਸਿਕ੍ਖਾਪਦਾਨੀ’’ਤਿ ਅਪੁਚ੍ਛਨਂ. ‘‘ਤਯਾ’’ਤਿ ਇਮਿਨਾ ਇਦਂ ਤੇਤਿ ਏਤ੍ਥ ਤੇਸਦ੍ਦਸ੍ਸ ‘‘ਤੁਯ੍ਹਂ, ਤਵਾ’’ਤਿ ਅਤ੍ਥੇ ਪਟਿਕ੍ਖਿਪਤਿ. ਆਪਤ੍ਤਿਨ੍ਤਿ ਦੁਕ੍ਕਟਾਪਤ੍ਤਿਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤੇਤਿ ਥੇਰਾ. ‘‘ਸਙ੍ਘੋ…ਪੇ… ਨ ਸਮੁਚ੍ਛਿਨ੍ਦਤੀ’’ਤਿ ਏਤਂ ਵਚਨਂ ਅਨੁਸ੍ਸਾਵਿਤਨ੍ਤਿ ਯੋਜਨਾ. ‘‘ਦੇਸੇਹਿ ਤਂ ਆਵੁਸੋ ਦੁਕ੍ਕਟ’’ਨ੍ਤਿ ਇਦਮ੍ਪਿ ਚ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਥੇਰੋ ਪਨਾਤਿ ਆਨਨ੍ਦਤ੍ਥੇਰੋ ਪਨ ਆਹਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਅਪੁਚ੍ਛਨੇ. ਯਥਾਤਿ ਯੇਨਾਕਾਰੇਨ. ਚਤੂਸੁ ਠਾਨੇਸੂਤਿ ‘‘ਭਗਵਤੋ ਵਸ੍ਸਿਕਸਾਟਿਕਂ ਅਕ੍ਕਮਿਤ੍ਵਾ ਸਿਬ੍ਬੇਸੀ’’ਤਿਆਦੀਸੁ ਚਤੂਸੁ ਠਾਨੇਸੁ. ਏਤ੍ਥਾਤਿ ਪਞ੍ਚਸਤਿਕਕ੍ਖਨ੍ਧਕੇ.

ਇਤਿ ਪਞ੍ਚਸਤਿਕਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.