੪. ਪਟਿਸਾਰਣੀਯਕਮ੍ਮਕਥਾ

੩੩. ਸੁਧਮ੍ਮਵਤ੍ਥੁਸ੍ਮਿਂ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਅਨਪਲੋਕੇਤ੍ਵਾਤਿ ਏਤ੍ਥ ਅਪਪੁਬ੍ਬੋ ਲੋਕਸਦ੍ਦੋ ਆਪੁਚ੍ਛਨਤ੍ਥੋਤਿ ਆਹ ‘‘ਨ ਆਪੁਚ੍ਛਿਤ੍ਵਾ’’ਤਿ.

੩੪. ਕਿਨ੍ਤਿ ਕਿਂ ਨਾਮ ਖਾਦਨੀਯਭੋਜਨੀਯਂ. ਵੋਤਿ ਤੁਮ੍ਹੇਹਿ. ਗਹਪਤੀਤਿ ਆਲਪਨਪਦਂ. ਥੇਰਾਨਂ ਅਤ੍ਥਾਯਾਤਿ ਸਮ੍ਬਨ੍ਧੋ. ਪਟਿਯਤ੍ਤਨ੍ਤਿ ਪਟਿਯਾਦਿਤਂ. ‘‘ਏਤਂ ਅਵੋਚਾ’’ਤਿ ਇਮਿਨਾ ਏਤਦਵੋਚਾਤਿ ਏਤ੍ਥ ਨਿਗ੍ਗਹਿਤਾਦੇਸਸਨ੍ਧਿਂ ਦਸ੍ਸੇਤਿ. ਯਦਿਦਨ੍ਤਿ ਸਦ੍ਦੋ ‘‘ਤਿਲਸਂਗੁਲ਼ਿਕਾ’’ਤਿ ਪਦੇਨ ਯੋਜਿਤਤ੍ਤਾ ਇਤ੍ਥਿਲਿਙ੍ਗੋਤਿ ਆਹ ‘‘ਯਾ ਅਯ’’ਨ੍ਤਿ. ਤਿਲਸਕ੍ਖਲਿਕਾਤਿ ਤਿਲੇਨ ਸਂਸਟ੍ਠਾ ਸਕ੍ਖਲਿਕਾ. ‘‘ਸਾ ਨਤ੍ਥੀ’’ਤਿ ਇਮਿਨਾ ਉਤ੍ਤਰਵਾਕ੍ਯੇ ਯਂਸਦ੍ਦਸ੍ਸ ਪੁਬ੍ਬਵਾਕ੍ਯੇ ਤਂਸਦ੍ਦਾਪੇਕ੍ਖਤਂ ਦਸ੍ਸੇਤਿ. ਏਕੋ ਪੁਰਿਸੋਤਿ ਸਮ੍ਬਨ੍ਧੋ. ਪੂਵਿਯੋਤਿ ਪੂਵਂ, ਪੂਵੇਨ ਵਾ ਕਯਵਿਕ੍ਕਯੋ. ਤੇਨਾਤਿ ਕਾਰਣੇਨ. ਨਨ੍ਤਿ ਗਹਪਤਿਂ. ਥੇਰੋਤਿ ਸੁਧਮ੍ਮਤ੍ਥੇਰੋ. ਯਦੇਵ ਕਿਞ੍ਚੀਤਿ ਏਤ੍ਥ ਕਿਞ੍ਚਿ ਏਵ ਯਂ ਵਚਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਿਞ੍ਚਿਦੇਵ ਤਿਲਸਂਗੁਲ਼ਿਕਾਵਚਨ’’ਨ੍ਤਿ. ਇਦਨ੍ਤਿ ਇਮਂ ਅਤ੍ਥਂ. ਸੋਤਿ ਕੁਕ੍ਕੁਟਪੋਤਕੋ. ਕਾਕਵਸ੍ਸਿਤਨ੍ਤਿ ਕਾਕਸ੍ਸ ਵਸ੍ਸਿਤਂ, ਨੇਵ ਅਕਾਸੀਤਿ ਸਮ੍ਬਨ੍ਧੋ. ਤਯਾਪੀਤਿ ਪਿਸਦ੍ਦੋ ਕੁਕ੍ਕੁਟਪੋਤਕਂ ਅਪੇਕ੍ਖਤਿ. ਨੇਵ ਭਿਕ੍ਖੁਵਚਨਂ ਵੁਤ੍ਤਂ, ਨ ਗਿਹਿਵਚਨਂ ਵੁਤ੍ਤਂ, ਇਤਿ ਇਮਮਤ੍ਥਂ ਦਸ੍ਸੇਤੀਤਿ ਯੋਜਨਾ.

ਅਧਮ੍ਮਕਮ੍ਮਾਦਿਦ੍ਵਾਦਸਕਕਥਾ

੩੯. ਪੁਰਿਮੇਹਿ ਕਮ੍ਮੇਹੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਅਙ੍ਗੇਸੁ. ਯਥਾ ਪਰਿਸਕ੍ਕਿਯਮਾਨੇ ਗਿਹਿਨੋ ਲਾਭਂ ਨ ਲਭਨ੍ਤੀਤਿ ਯੋਜਨਾ. ਪਰਿਪੁਬ੍ਬੋ ਸਕ੍ਕਧਾਤੁ ਪਰਕ੍ਕਮਤ੍ਥੋਤਿ ਆਹ ‘‘ਪਰਕ੍ਕਮਨ੍ਤੋ’’ਤਿ. ਤਤ੍ਥਾਤਿ ਅਨਤ੍ਥਾਦੀਸੁ. ਅਤ੍ਥਭਙ੍ਗੋਤਿ ਗਿਹੀਨਂ ਅਤ੍ਥਸ੍ਸ ਭਙ੍ਗੋ. ਅਵਸਨਨ੍ਤਿ ਗਿਹੀਨਂ ਅਵਸਨਂ. ਗਿਹੀਨਨ੍ਤਿ ਏਤ੍ਥ ਸਾਮ੍ਯਤ੍ਥੇ ਸਾਮਿਵਚਨਨ੍ਤਿ ਆਹ ‘‘ਗਿਹੀਨਂ ਸਨ੍ਤਿਕੇ’’ਤਿ. ਯਥਾ ਕਰਿਯਮਾਨੇ ਸਚ੍ਚੋ ਹੋਤਿ, ਏਵਂ ਨ ਕਰੋਤੀਤਿ ਯੋਜਨਾ. ਏਕਙ੍ਗੇਨਾਪੀਤਿ ਪਿਸਦ੍ਦੋ ਸਮ੍ਭਾਵਨਤ੍ਥੋ, ਤਤੋ ਅਧਿਕੇਹਿ ਅਙ੍ਗੇਹਿ ਕਾ ਨਾਮ ਕਥਾਤਿ ਦਸ੍ਸੇਤਿ. ਏਤ੍ਥਾਤਿ ਪਟਿਸਾਰਣੀਯਕਮ੍ਮੇ. ਪਟਿਮੁਖਂ ਅਤ੍ਤਨੋ ਦੋਸਂ ਸਰਾਪੇਤਬ੍ਬਂ ਅਨੇਨ ਵਿਨਯਕਮ੍ਮੇਨਾਤਿ ਪਟਿਸਾਰਣੀਯਂ, ਤਮੇਵ ਕਮ੍ਮਂ ਪਟਿਸਾਰਣੀਯਕਮ੍ਮਂ.