੫. ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਕਥਾ

੪੬. ਸਂਸਥਾਤਿ ਏਤ੍ਥ ਸਂਸਧਾਤੁਯਾ ਕਥਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਆਰੋਚੇਥਾ’’ਤਿ. ਤੁਮ੍ਹੇ ਸਂਸਥ, ਕਥੇਥਾਤਿ ਅਤ੍ਥੋ.

੫੦. ਭਣ੍ਡਨਕਾਰਕੋ ਹੋਤੀਤਿਆਦਿ ਕਾਰਣੂਪਚਾਰਵਸੇਨ ਵੁਤ੍ਤੋਤਿ ਆਹ ‘‘ਭਣ੍ਡਨਾਦਿਪਚ੍ਚਯਾ’’ਤਿਆਦਿ. ਭਣ੍ਡਨਕਾਰਕਾਦਿ ਕਾਰਣਂ, ਤੇਨ ਆਪਨ੍ਨਾ ਆਪਤ੍ਤਿ ਫਲਂ, ਤਸ੍ਸਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਾਤਬ੍ਬਨ੍ਤਿ ਅਧਿਪ੍ਪਾਯੋ. ਤਸ੍ਸਾਤਿ ਆਪਤ੍ਤਿਯਾ.

੫੧. ਏਤ੍ਥਾਤਿ ਉਕ੍ਖੇਪਨੀਯਕਮ੍ਮੇ. ਤਤ੍ਥਾਤਿ ਤੇਚਤ੍ਤਾਲੀਸਵਤ੍ਤੇਸੁ. ਅਨੁਦ੍ਧਂਸੇਤਬ੍ਬੋਤਿ ਏਤ੍ਥ ਧਂਸਧਾਤੁਯਾ ਗਤ੍ਯਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਨ ਚੋਦੇਤਬ੍ਬੋ’’ਤਿ. ‘‘ਰਜੋਨੁਦ੍ਧਂਸਤੀ’’ਤਿਆਦੀਸੁ (ਬੁ. ਵਂ. ੨.੧੦੧) ਹਿ ਧਂਸਧਾਤੁ ਗਤ੍ਯਤ੍ਥੇ ਵਤ੍ਤਤਿ. ‘‘ਨ ਭਿਕ੍ਖੁ ਭਿਕ੍ਖੂਹੀ’’ਤਿ ਏਤ੍ਥ ਸੋਯੇਵ ਭਿਕ੍ਖੁ ਤੇਹੇਵ ਭਿਕ੍ਖੂਹੀਤਿ ਅਤ੍ਥਂ ਨਿਵਾਰੇਨ੍ਤੋ ਆਹ ‘‘ਅਞ੍ਞੋ ਭਿਕ੍ਖੁ ਅਞ੍ਞੇਹਿ ਭਿਕ੍ਖੂਹੀ’’ਤਿ. ਨ ਗਿਹਿਦ੍ਧਜੋਤਿ ਏਤ੍ਥ ਗਿਹੀਨਂ ਧਜੋ ਗਿਹਿਦ੍ਧਜੋਤਿ ਵੁਤ੍ਤੇ ਓਦਾਤਵਤ੍ਥਾਦੀਨੀਤਿ ਆਹ ‘‘ਓਦਾਤਵਤ੍ਥਾਨੀ’’ਤਿਆਦਿ. ਨ ਤਿਤ੍ਥਿਯਾਦਿਪਦਤ੍ਤਯਨ੍ਤਿ ‘‘ਨ ਤਿਤ੍ਥਿਯਾ ਸੇਵਿਤਬ੍ਬਾ, ਭਿਕ੍ਖੂ ਸੇਵਿਤਬ੍ਬਾ, ਭਿਕ੍ਖੁਸਿਕ੍ਖਾਯ ਸਿਕ੍ਖਿਤਬ੍ਬ’’ਨ੍ਤਿ ਪਦਾਨਂ ਤਯਂ. ‘‘ਨ ਅਪਸਾਦੇਤਬ੍ਬੋ’’ਤਿ ਇਮਿਨਾ ਨ ਆਸਾਦੇਤਬ੍ਬੋਤਿ ਏਤ੍ਥ ਆਪੁਬ੍ਬਸਦਧਾਤੁਯਾ ਅਪਪੁਬ੍ਬਸਦਧਾਤੁਯਾ ਸਮਾਨਭਾਵਂ ਦਸ੍ਸੇਤਿ. ‘‘ਅਨ੍ਤੋ ਵਾ ਬਹਿ ਵਾਤਿ’’ ਏਤ੍ਥ ਕਸ੍ਸ ਅਨ੍ਤੋ ਵਾ ਬਹਿ ਵਾਤਿ ਆਹ ‘‘ਵਿਹਾਰਸ੍ਸਾ’’ਤਿ. ਸੇਸਂ ਸਬ੍ਬਂਵਤ੍ਤਨ੍ਤਿ ਯੋਜਨਾ. ਇਮਿਨਾਤਿ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮੇਨ.

੬੫. ਤਸ੍ਸਾਤਿ ਆਪਤ੍ਤਿਯਾ. ਇਧਾਤਿ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਕਤੇ ਉਕ੍ਖੇਪਨੀਯਕਮ੍ਮੇ. ਆਪਤ੍ਤਿਅਦਸ੍ਸਨਾਦੀਸੁ ਉਦ੍ਧਰਿਤ੍ਵਾ ਖਿਪੀਯਤਿ ਅਪਨੀਯਤਿ ਅਨੇਨ ਵਿਨਯਕਮ੍ਮੇਨਾਤਿ ਉਕ੍ਖੇਪਨੀਯਂ, ਤਮੇਵ ਕਮ੍ਮਂ ਉਕ੍ਖੇਪਨੀਯਕਮ੍ਮਂ.

ਇਤਿ ਕਮ੍ਮਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.