੨੩੭. ਚਤੁਵਗ੍ਗਕਰਣਾਦਿਕਥਾ

੩੮੮. ਯਦਿਦਂ ਕਮ੍ਮਨ੍ਤਿ ਯੋਜਨਾ. ਤੇਸਨ੍ਤਿ ਸਙ੍ਘਾਨਂ. ਕਮ੍ਮਪ੍ਪਤ੍ਤੋਤਿ ਏਤ੍ਥ ਕਮ੍ਮੇਨ, ਕਮ੍ਮਸ੍ਸ ਵਾ ਪਤ੍ਤੋਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਕਮ੍ਮਂ ਪਤ੍ਤੋ’’ਤਿ. ‘‘ਸਬ੍ਬਕਮ੍ਮੇਸੁ ਕਮ੍ਮਪਤ੍ਤੋ’’ਤਿ ਪਾਲ਼ਿਨਯੇਨ ‘‘ਕਮ੍ਮੇਸੁ ਪਤ੍ਤੋ’’ਤਿ ਅਤ੍ਥੋਪਿ ਯੁਜ੍ਜਤਿ. ਲੋਕਵੋਹਾਰਵਸੇਨ ‘‘ਕਮ੍ਮੇਨ ਕਮ੍ਮਸ੍ਸ ਵਾ ਪਤ੍ਤੋ’’ਤਿ ਅਤ੍ਥੋਪਿ ਯੁਜ੍ਜਤੇਵ.

੩੮੯. ਪਰਿਸਤੋਤਿ ਪਰਿਸਕਾਰਣਾ. ਤਤ੍ਥਾਤਿ ‘‘ਚਤੁਵਗ੍ਗਕਰਣਞ੍ਚੇ ਭਿਕ੍ਖਵੇ’’ਤਿਆਦਿਪਾਠੇ, ਚਤੁਵੀਸਤਿਪੁਗ੍ਗਲੇਸੁ ਵਾ. ਕਮ੍ਮਨਾਨਾਸਂਵਾਸਕੋਤਿ ਉਕ੍ਖੇਪਨੀਯਕਮ੍ਮਕਤੋ. ਲਦ੍ਧਿਨਾਨਾਸਂਵਾਸਕੋਤਿ ਉਕ੍ਖਿਤ੍ਤਾਨੁਵਤ੍ਤਕੋ. ‘‘ਹੁਤ੍ਵਾ’’ਤਿ ਇਮਿਨਾ ‘‘ਭਿਕ੍ਖੁਨੀਚਤੁਤ੍ਥੋ’’ਤਿਆਦੀਸੁ ਚਤੁਵੀਸਤਿਯਾ ਠਾਨੇਸੁ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤਿ. ਭਿਕ੍ਖੁਨੀ ਚਤੁਤ੍ਥੀ ਏਤਸ੍ਸਾਤਿ ਭਿਕ੍ਖੁਨੀਚਤੁਤ੍ਥੋ, ਚਤੁਵਗ੍ਗੋ ਸਙ੍ਘੋਤਿਆਦਿਨਾ ਵਚਨਤ੍ਥੋ ਕਾਤਬ੍ਬੋ.

੩੯੩. ਪਰਿਵਾਸਾਦੀਤਿਆਦਿਸਦ੍ਦੇਨ ਮੂਲਾਯਕਸ੍ਸਨਮਾਨਤ੍ਤਅਬ੍ਭਾਨਾਨਿ ਸਙ੍ਗਣ੍ਹਾਤਿ. ਤੇਸਨ੍ਤਿ ਪਰਿਵਾਸਾਦਿਕਮ੍ਮਾਨਂ. ਪਰਤੋਤਿ ਪਰਸ੍ਮਿਂ ਚੂਲ਼ਵਗ੍ਗੇ (ਚੂਲ਼ਵ. ਅਟ੍ਠ. ੭੫ ਆਦਯੋ).

੩੯੪. ਪਟਿਕੁਟ੍ਠਕਤਕਮ੍ਮਸ੍ਸਾਤਿ ਪਟਿਕੁਟ੍ਠਸ੍ਸ ਹੁਤ੍ਵਾ ਕਤਸ੍ਸ ਕਮ੍ਮਸ੍ਸ. ਪਕਤਤ੍ਤਸ੍ਸਾਤਿ ਏਤ੍ਥ ਪਕਤਿਸੀਲਸਙ੍ਖਾਤੋ ਅਤ੍ਤਾ ਸਭਾਵੋ ਏਤਸ੍ਸਾਤਿ ਪਕਤਤ੍ਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਵਿਪਨ੍ਨਸੀਲਸ੍ਸਾ’’ਤਿ. ਸਙ੍ਘਾਦਿਸੇਸਂ ਅਨਾਪਜ੍ਜਨ੍ਤਸ੍ਸਾਪਿ ਅਵਿਪਨ੍ਨਸੀਲਤ੍ਤਾ ਵੁਤ੍ਤਂ ‘‘ਪਾਰਾਜਿਕਂ ਅਨਜ੍ਝਾਪਨ੍ਨਸ੍ਸਾ’’ਤਿ. ਇਮਿਨਾ ਸਙ੍ਘਾਦਿਸੇਸਂ ਆਪਜ੍ਜਨ੍ਤੋਪਿ ਪਕਤਤ੍ਤੋਯੇਵਾਤਿ ਦਸ੍ਸੇਤਿ. ਸੋਪਿ ਹਿ ਇਧ ਅਵਿਪਨ੍ਨਸੀਲੋ ਨਾਮ, ਅਞ੍ਞਤ੍ਥ ਪਨ ਸਙ੍ਘਾਦਿਸੇਸਸ੍ਸ ਸੀਲਵਿਪਤ੍ਤਿਭਾਵਤੋ ਤਂ ਆਪਜ੍ਜਨ੍ਤੋਪਿ ਵਿਪਨ੍ਨਸੀਲੋਯੇਵ ਨਾਮ. ਆਨਨ੍ਤਰਿਕਸ੍ਸਾਤਿ ਏਤ੍ਥ ਅਨਨ੍ਤਰਸਦ੍ਦਸ੍ਸ ਸਮ੍ਬਨ੍ਧਞ੍ਚ ਣਿਕਪਚ੍ਚਯਸ੍ਸ ਅਤ੍ਥਞ੍ਚ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਅਨਨ੍ਤਰਂ ਨਿਸਿਨ੍ਨਸ੍ਸਾ’’ਤਿ. ਤਤ੍ਥ ‘‘ਅਤ੍ਤਨੋ’’ਤਿ ਇਮਿਨਾ ਅਨਨ੍ਤਰਸਦ੍ਦਸ੍ਸ ਸਮ੍ਬਨ੍ਧਂ ਦਸ੍ਸੇਤਿ. ‘‘ਨਿਸਿਨ੍ਨਸ੍ਸਾ’’ਤਿ ਇਮਿਨਾ ਣਿਕਪਚ੍ਚਯਸ੍ਸ ਅਤ੍ਥਂ ਦਸ੍ਸੇਤਿ.