੭. ਕਥਿਨਕ੍ਖਨ੍ਧਕਂ

੧੮੭. ਕਥਿਨਾਨੁਜਾਨਨਕਥਾ

੩੦੬. ਕਥਿਨਕ੍ਖਨ੍ਧਕੇ ਪਾਵੇਯ੍ਯਕਾਤਿ ਏਤ੍ਥ ਪਾਵਾਰਟ੍ਠੇ ਨਿਵਸਨ੍ਤੀਤਿ ਪਾਵੇਯ੍ਯਕਾਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਾਵਾਰਟ੍ਠਵਾਸਿਨੋ’’ਤਿ. ਤਤ੍ਥਾਤਿ ਪਾਵਾਨਾਮਕੇ ਰਟ੍ਠੇ. ਏਕੋ ਪਿਤਾ ਏਤੇਸਨ੍ਤਿ ਏਕਪਿਤੁਕਾ. ਤੇ ਚ ਤੇ ਭਾਤਰੋ ਚੇਤਿ ਏਕਪਿਤੁਕਭਾਤਰੋ, ਤੇਸਂ. ਏਤਨ੍ਤਿ ‘‘ਪਾਵੇਯ੍ਯਕਾ’’ਤਿ ਏਤਂ ਨਾਮਂ. ਤੇਸੂਤਿ ਪਾਵੇਯ੍ਯਕੇਸੁ. ‘‘ਧੁਤਙ੍ਗਸਮਾਦਾਨਵਸੇਨਾ’’ਤਿ ਵਿਸੇਸਨਸ੍ਸ ਬ੍ਯਵਚ੍ਛੇਦਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਨ ਅਰਞ੍ਞਵਾਸਮਤ੍ਤੇਨਾ’’ਤਿ. ਵਿਸੇਸਨਞ੍ਹਿ ਦੁਵਿਧਂ ਬ੍ਯਵਚ੍ਛੇਦਂ, ਤਪ੍ਪਾਕਟਿਕਰਣਞ੍ਚਾਤਿ. ਤੇਸਨ੍ਤਿ ਪਾਵੇਯ੍ਯਕਾਨਂ. ਪਿਣ੍ਡਪਾਤਿਕਾਦਿਭਾਵੇਪੀਤਿ ਸਮ੍ਬਨ੍ਧੋ. ਪਿਸਦ੍ਦੋ ਆਰਞ੍ਞਕਂ ਅਪੇਕ੍ਖਤਿ. ਏਤਨ੍ਤਿ ‘‘ਸਬ੍ਬੇ ਆਰਞ੍ਞਕਾ’’ਤਿਆਦਿ ਏਤਂ ਵਚਨਂ. ਇਮੇ ਪਨਾਤਿ ਪਾਵੇਯ੍ਯਕਾ ਪਨ. ਉਦਕਸਂਗਹੇਤਿ ਏਤ੍ਥ ਉਦਕੇਨ ਸਂਗਹੇਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ ‘‘ਉਦਕੇਨ ਸਂਗਹਿਤੇ’’ਤਿ. ‘‘ਥਲੇ ਚ ਨਿਨ੍ਨੇ ਚਾ’’ਤਿ ਇਮਿਨਾ ‘‘ਉਦਕਸਂਗਹੇ’’ਤਿ ਪਦਸ੍ਸ ਸਰੂਪਂ ਦਸ੍ਸੇਤਿ.

ਉਦਕਚਿਕ੍ਖਲ੍ਲੋਤਿ ਉਦਕੇਨ ਲੋਲ਼ਿਤੋ ਚਿਕ੍ਖਲ੍ਲੋ ਉਦਕਚਿਕ੍ਖਲ੍ਲੋ. ਓਕਪੁਣ੍ਣੇਹੀਤਿ ਏਤ੍ਥ ਓਕਸਦ੍ਦੋ ਉਦਕਵੇਵਚਨੋਤਿ ਆਹ ‘‘ਉਦਕਪੁਣ੍ਣੇਹੀ’’ਤਿ. ਉਦਕਞ੍ਹਿ ਉਚਯਤਿ ਸਮਵਾਯਭਾਵੇਨ ਪਵਤ੍ਤਤੀਤਿ ਓਕਨ੍ਤਿ ਵੁਚ੍ਚਤਿ. ਤੇਸਨ੍ਤਿ ਪਾਵੇਯ੍ਯਕਾਨਂ. ਘਨਾਨੀਤਿ ਨਿਰਨ੍ਤਰਾਨਿ. ਤੇਸੂਤਿ ਚੀਵਰੇਸੁ. ਤੇਨਾਤਿ ਚੀਵਰਾਨਂ ਘਨਤ੍ਤਾ, ਉਦਕਸ੍ਸ ਚ ਨ ਪਗ੍ਘਰਣਤ੍ਤਾ. ਭਗਵਤਾ ‘‘ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਤ੍ਥਾ’’ਤਿ ਪੁਚ੍ਛਿਯਮਾਨਾਪਿ ਤੇ ਭਿਕ੍ਖੂ ਯਥਾਪੁਚ੍ਛਿਤਂ ਅਵਤ੍ਵਾ ਕਸ੍ਮਾ ਫਾਸੁਕਪਦਂ ਅਪਨੇਤ੍ਵਾ ‘‘ਅਵਿਵਦਮਾਨਾ ਵਸ੍ਸਂ ਵਸਿਮ੍ਹਾ’’ਤਿ ਅਵੋਚੁਨ੍ਤਿ ਆਹ ‘‘ਅਵਿਵਦਮਾਨਾ ਵਸ੍ਸਂ ਵਸਿਮ੍ਹਾਤਿ ਏਤ੍ਥਾ’’ਤਿਆਦਿ. ਉਕ੍ਕਣ੍ਠਿਤਤਾਯ ਚਾਤਿ ਏਤ੍ਥ ਚਸਦ੍ਦੋ ‘‘ਫਾਸੁਤਾਯ ਅਭਾਵੇਨਾ’’ਤਿ ਏਤ੍ਥਾਪਿ ਯੋਜੇਤਬ੍ਬੋ. ਸੇਨਾਸਨਫਾਸੁਤਾਯ ਅਭਾਵੇਨ ਚ ਭਗਵਤੋ ਦਸ੍ਸਨਾਲਾਭੇਨ ਉਕ੍ਕਣ੍ਠਿਤਤਾਯ ਚਾਤਿ ਹਿ ਅਤ੍ਥੋ. ਅਨਮਤਗ੍ਗਿਯਕਥਨ੍ਤਿ ਸਂਯੁਤ੍ਤਨਿਕਾਯੇ ਅਨਮਤਗ੍ਗਿਯਸੁਤ੍ਤਨ੍ਤਕਥਂ (ਸਂ. ਨਿ. ੨.੧੩੫). ਸਬ੍ਬੇਵ ਤੇ ਪਾਵੇਯ੍ਯਕਾ ਭਿਕ੍ਖੂਤਿ ਯੋਜਨਾ. ਤਨ੍ਤਿ ਅਨਮਤਗ੍ਗਿਯਕਥਂ. ਤਤੋਤਿ ਧਮ੍ਮਕਥਨਤੋ, ਪਰਨ੍ਤਿ ਸਮ੍ਬਨ੍ਧੋ. ਭਗਵਾ ਆਮਨ੍ਤੇਸੀਤਿ ਸਮ੍ਬਨ੍ਧੋ. ਏਕਂ ਚੀਵਰਨ੍ਤਿ ਸਙ੍ਘਾਟਿਂ. ਸਨ੍ਤਰੁਤ੍ਤਰੇਨਾਤਿ ਸਹ ਅਨ੍ਤਰੇਨਾਤਿ ਸਨ੍ਤਰਂ, ਸਨ੍ਤਰਞ੍ਚ ਤਂ ਉਤ੍ਤਰਞ੍ਚੇਤਿ ਸਨ੍ਤਰੁਤ੍ਤਰਂ, ਤੇਨ. ਅਸ੍ਸੁਤਿ ਭਵੇਯ੍ਯੁਂ. ਅਭਵਿਸ੍ਸਂਸੂਤਿ ਹਿ ਅਤ੍ਥੋ. ਸਤ੍ਤਮੀਵਿਭਤ੍ਤਿਕਾਲਾਤਿਪਤ੍ਤਿਵਿਭਤ੍ਤੀਨਂ ਸਮਾਨਤ੍ਥਭਾਵੋ ਸਦ੍ਦਸਤ੍ਥੇਸੁ ਵੁਤ੍ਤੋਯੇਵ. ਚਸਦ੍ਦੋ ਉਪਨ੍ਯਾਸਤ੍ਥੋ. ਏਸ ਕਥਿਨਤ੍ਥਾਰੋ ਨਾਮਾਤਿ ਯੋਜਨਾ. ਅਨੁਜਾਨਿਤੁਕਾਮੋ ਹੁਤ੍ਵਾਤਿ ਸਮ੍ਬਨ੍ਧੋ.

ਤਤ੍ਥਾਤਿ ‘‘ਅਨੁਜਾਨਾਮਿ ਭਿਕ੍ਖਵੇ’’ਤਿਆਦਿਪਾਠੇ. ਵੋਕਾਰਸ੍ਸ ਨਿਪਾਤਮਤ੍ਤੇ ਸਤਿ ਕਥਮਤ੍ਥੋ ਭਵਿਸ੍ਸਤੀਤਿ ਆਹ ‘‘ਅਤ੍ਥਤਕਥਿਨਾਨਨ੍ਤਿ ਅਤ੍ਥੋ’’ਤਿ. ਅਤ੍ਥਤਕਥਿਨਾਨਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਲਦ੍ਧਗੁਣਂ ਦਸ੍ਸੇਨ੍ਤੋ ਆਹ ‘‘ਏਵਞ੍ਹੀ’’ਤਿਆਦਿ. ਹਿਸਦ੍ਦੋ ਲਦ੍ਧਗੁਣਜੋਤਕੋ. ਪਰਤੋਤਿ ਪਰਮ੍ਹਿ. ‘‘ਸੋ ਤੁਮ੍ਹਾਕ’’ਨ੍ਤਿ ਵਾ ‘‘ਸੋ ਵੋ’’ਤਿ ਵਾ ਅਵਤ੍ਵਾ ‘‘ਸੋ ਨੇਸਂ ਭਵਿਸ੍ਸਤੀ’’ਤਿ ਵੁਤ੍ਤਤ੍ਤਾ ਵੋ-ਕਾਰੋ ਨਿਪਾਤਮਤ੍ਤੋਤਿ ਅਧਿਪ੍ਪਾਯੋ. ‘‘ਵੋਤਿ ਸਾਮਿਵਚਨਮੇਵੇਤ’’ਨ੍ਤਿ ਇਮਿਨਾ ਵੋ ਤੁਮ੍ਹਾਕਨ੍ਤਿ ਅਤ੍ਥਂ ਦਸ੍ਸੇਤਿ. ਏਵਂ ਸਤਿ ‘‘ਪਰਤੋ ਸੋ ਨੇਸ’’ਨ੍ਤਿ ਏਤ੍ਥ ਕਥਮਤ੍ਥੋ ਭਵਿਸ੍ਸਤੀਤਿ ਆਹ ‘‘ਸੋ ਨੇਸਨ੍ਤਿ ਏਤ੍ਥ ਪਨਾ’’ਤਿਆਦਿ. ਯੇ ਤੁਮ੍ਹੇ ਅਤ੍ਥਤਕਥਿਨਾ, ਤੇਸਂ ਤੁਮ੍ਹਾਕਨ੍ਤਿ ਯੋਜਨਾ. ਕਥਿਨਸਦ੍ਦੋ ਥਿਰਤ੍ਥਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋ. ਅਨਾਮਨ੍ਤਚਾਰਾਦਿਕਾਨਂ ਪਞ੍ਚਾਨਿਸਂਸਾਨਂ ਅਨ੍ਤੋਕਰਣਸਮਤ੍ਥਭਾਵੇ ਥਿਰਨ੍ਤਿ ਅਤ੍ਥੋ.

ਤਤ੍ਥਾਤਿ ਅਨਾਮਨ੍ਤਚਾਰਾਦੀਸੁ ਪਞ੍ਚਾਨਿਸਂਸੇਸੁ. ਅਨਾਮਨ੍ਤਚਾਰੋਤਿ ਏਤ੍ਥ ਚਰਣਂ ਚਾਰੋ, ਅਨਾਮਨ੍ਤੇਤ੍ਵਾ ਚਾਰੋ ਅਨਾਮਨ੍ਤਚਾਰੋਤਿ ਦਸ੍ਸੇਨ੍ਤੋ ਆਹ ‘‘ਅਨਾਮਨ੍ਤੇਤ੍ਵਾ ਚਰਣ’’ਨ੍ਤਿ. ‘‘ਅਸਮਾਦਾਯ ਚਰਣ’’ਨ੍ਤਿ ਇਮਿਨਾ ਅਸਮਾਦਾਨਚਾਰੋਤਿ ਏਤ੍ਥ ਪੁਬ੍ਬਪਦੇ ਤ੍ਵਾਪਚ੍ਚਯਸ੍ਸ ਅਨਾਦੇਸਂ ਕਤ੍ਵਾ ਅਸਮਾਦਾਨਚਾਰੋਤਿ ਵੁਤ੍ਤਨ੍ਤਿ ਦਸ੍ਸੇਤਿ. ਯਾਵਤਤ੍ਥਚੀਵਰਨ੍ਤਿ ਏਤ੍ਥ ਆਕਾਰਲੋਪੇਨ ਸਨ੍ਧੀਤਿ ਆਹ ‘‘ਯਾਵਤਾ ਚੀਵਰੇਨ ਅਤ੍ਥੋ’’ਤਿ. ‘‘ਯਾਵਦਤ੍ਥਚੀਵਰ’’ਨ੍ਤਿਪਿ ਪਾਠੋ, ਏਵਂ ਸਤਿ ਦਕਾਰੋ ਪਦਸਨ੍ਧਿਮਤ੍ਤੋ. ਯਾਵਸਦ੍ਦੋ ਪਰਿਚ੍ਛੇਦਤ੍ਥਵਾਚਕੋ, ਨ ਅਭਿਵਿਝਤ੍ਥਵਾਚਕੋ. ਅਤ੍ਥਸਦ੍ਦੇਨ ਸਮਾਸੋ ਹੋਤਿ. ਯੋ ਚ ਤਤ੍ਥ ਚੀਵਰੁਪ੍ਪਾਦੋਤਿ ਏਤ੍ਥ ਤਤ੍ਥਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਕਥਿਨਤ੍ਥਾਰਸੀਮਾਯ’’ਨ੍ਤਿ. ਤਤ੍ਰੁਪ੍ਪਾਦੇਨਾਤਿ ਤਤ੍ਰ ਕਥਿਨਤ੍ਥਾਰਸੀਮਾਯਂ ਉਪ੍ਪਾਦੇਨ ਮੂਲੇਨ. ‘‘ਚੀਵਰਂ ਉਪ੍ਪਜ੍ਜਤੀ’’ਤਿ ਇਮਿਨਾ ਚੀਵਰੁਪ੍ਪਾਦੋਤਿ ਏਤ੍ਥ ਚੀਵਰਮੇਵ ਉਪ੍ਪਾਦੋ ਚੀਵਰੁਪ੍ਪਾਦੋਤਿ ਵਿਸੇਸਨਪਰਪਦਤ੍ਤਂ ਦਸ੍ਸੇਤਿ.

ਕੇਤਿ ਕਿਤ੍ਤਕਾ. ਇਦਂ ‘‘ਗਣਵਸੇਨਾ’’ਤਿ ਵਚਨਂ ਸਨ੍ਧਾਯ ਵੁਤ੍ਤਂ. ਅਥ ਵਾ ਕੇਤਿ ਕਿਨ੍ਨਾਮ ਵੁਤ੍ਥਵਸ੍ਸਾ. ਇਦਂ ‘‘ਵੁਤ੍ਥਵਸ੍ਸਵਸੇਨਾ’’ਤਿ ਵਚਨਂ ਸਨ੍ਧਾਯ ਵੁਤ੍ਤਂ. ਸਤਸਹਸ੍ਸਮ੍ਪਿ ਜਨਾ ਲਭਨ੍ਤੀਤਿ ਯੋਜਨਾ. ਪਿਸਦ੍ਦੇਨ ਤਤੋ ਅਧਿਕਮ੍ਪਿ ਲਭਨ੍ਤੀਤਿ ਦਸ੍ਸੇਤਿ. ਛਿਨ੍ਨਵਸ੍ਸਾ ਵਾਤਿ ਪੁਰਿਮਿਕਾਯ ਉਪਗਨ੍ਤ੍ਵਾ ਛਿਨ੍ਨਵਸ੍ਸਾ ਵਾ. ਅਞ੍ਞਸ੍ਮਿਂ ਵਿਹਾਰੇਤਿ ਕਥਿਨਤ੍ਥਾਰਵਿਹਾਰਤੋ ਅਪਰਸ੍ਮਿਂ ਵਿਹਾਰੇ. ਸਬ੍ਬੇ ਛਿਨ੍ਨਵਸ੍ਸਾਦਿਕਾ ਭਿਕ੍ਖੂ ਪੁਰਿਮਿਕਾਯ ਵਸ੍ਸੂਪਗਤਾਨਂ ਭਿਕ੍ਖੂਨਂ ਗਣਪੂਰਕਾ ਹੋਨ੍ਤੀਤਿ ਯੋਜਨਾ. ਇਤਰੇਸਂਯੇਵਾਤਿ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਪਠਮਪਵਾਰਣਾਯ ਪਵਾਰਿਤਾਨਮੇਵ. ਪਰਿਪੁਣ੍ਣਵਸ੍ਸੋਤਿ ਪਰਿਪੁਣ੍ਣੋ ਵੀਸਤਿਵਸ੍ਸੋ, ਅਚ੍ਛਿਨ੍ਨਵਸ੍ਸੋ ਵਾ. ਸੋਤਿ ਸਾਮਣੇਰੋ. ਇਤਿ ਏਤ੍ਥਾਪੀਤਿ ਏਵਂ ਏਤੇਸੁ ਤੀਸੁ ਵਾਰੇਸੁਪਿ.

ਕੇਨ ਦਿਨ੍ਨਂ ਕਥਿਨਚੀਵਰਂ ਵਟ੍ਟਤੀਤਿ ਯੋਜਨਾ. ਯੇਨ ਕੇਨਚਿ ਦਿਨ੍ਨਂ ਚੀਵਰਂ ਵਟ੍ਟਤੀਤਿ ਸਮ੍ਬਨ੍ਧੋ. ਤਨ੍ਤਿ ਵਤ੍ਤਂ. ਅਜਾਨਨ੍ਤੋਤਿ ਅਜਾਨਨਹੇਤੁ. ਹੇਤ੍ਵਤ੍ਥੇ ਹਿ ਅਨ੍ਤਪਚ੍ਚਯੋ. ਤਸ੍ਸਾਤਿ ਕਥਿਨਦਾਯਕਸ੍ਸ. ਏਵਨ੍ਤਿ ਇਮਿਨਾ ਵਕ੍ਖਮਾਨਨਯੇਨ. ਅਞ੍ਞਤਰਪਹੋਨਕਂ ਵਤ੍ਥਨ੍ਤਿ ਸਮ੍ਬਨ੍ਧੋ. ਤਸ੍ਸਾਤਿ ਕਥਿਨਚੀਵਰਸ੍ਸ. ਏਤ੍ਤਕਾ ਨਾਮ ਸੂਚਿਯੋ ਵਟ੍ਟਤੀਤਿ ਸਮ੍ਬਨ੍ਧੋ. ਇਤਿ ਆਚਿਕ੍ਖਿਤਬ੍ਬਨ੍ਤਿ ਯੋਜਨਾ.

ਕਥਿਨਤ੍ਥਾਰਕੇਨਾਪਿ ਵਤ੍ਤਂ ਜਾਨਿਤਬ੍ਬਨ੍ਤਿ ਸਮ੍ਬਨ੍ਧੋ. ਪਿਸਦ੍ਦੋ ਕਥਿਨਦਾਯਕਂ ਅਪੇਕ੍ਖਤਿ. ਵਤ੍ਤਂ ਵਿਤ੍ਥਾਰੇਨ੍ਤੋ ਆਹ ‘‘ਤਨ੍ਤਵਾਯਗੇਹਤੋ ਹੀ’’ਤਿਆਦਿ. ਆਭਤਸਨ੍ਤਾਨੇਨੇਵਾਤਿ ਆਭਤਸਨ੍ਤਤਿਯਾ ਏਵ. ਖਲਿਮਕ੍ਖਿਤਸਾਟਕੋਤਿ ਅਹਤਸਾਟਕੋ. ਸੋ ਹਿ ਖਲੇਨ ਤਕ੍ਕੇਨ ਕਞ੍ਜਿਕੇਨ ਮਕ੍ਖਿਤਸਾਟਕਤ੍ਤਾ ‘‘ਖਲਿਮਕ੍ਖਿਤਸਾਟਕੋ’’ਤਿ ਵੁਚ੍ਚਤਿ. ਕਥਿਨਤ੍ਥਾਰਸਾਟਕਨ੍ਤਿ ਕਥਿਨਤ੍ਥਾਰਤ੍ਥਾਯ ਦਿਨ੍ਨਂ ਸਾਟਕਂ. ਤਦਹੇਵਾਤਿ ਤਸ੍ਮਿਂ ਦਿਨ੍ਨਅਹਨਿ ਏਵ. ਤਸ੍ਮਿਨ੍ਤਿ ਪਠਮਂ ਦਿਨ੍ਨੇ ਕਥਿਨਤ੍ਥਾਰਸਾਟਕੇ. ਅਞ੍ਞਾਨਿ ਚਾਤਿ ਕਥਿਨਸਾਟਕਤੋ ਅਞ੍ਞਾਨਿ ਚ. ਚਸਦ੍ਦੇਨ ਨ ਕਥਿਨਸਾਟਕਮੇਵ ਆਹਰਤਿ, ਅਞ੍ਞਾਨਿ ਚਾਤਿ ਦਸ੍ਸੇਤਿ. ਯੋਤਿ ਕਥਿਨਦਾਯਕੋ. ਇਤਰੋਤਿ ਪਠਮਂ ਕਥਿਨਦਾਯਕੋ. ਯਥਾ ਤਥਾ ਓਵਦਿਤ੍ਵਾਤਿ ਤਵ ਸਨ੍ਤਕਤੋ ਏਤਸ੍ਸ ਸਨ੍ਤਕਂ ਸਙ੍ਘਸ੍ਸ ਬਹੁਪਕਾਰਂ, ਸਙ੍ਘਸ੍ਸ ਬਹੁਪਕਾਰਤ੍ਤਂ ਤਯਾਪਿ ਇਚ੍ਛਿਤਬ੍ਬਂ, ਏਵਮਿਚ੍ਛਨ੍ਤਸ੍ਸ ਬਹੁਪੁਞ੍ਞਨ੍ਤਿ ਯੇਨ ਤੇਨਾਕਾਰੇਨ ਓਵਦਿਤ੍ਵਾ.

ਕੇਨ ਭਿਕ੍ਖੁਨਾਤਿ ਸਮ੍ਬਨ੍ਧੋ. ਯਸ੍ਸ ਸਙ੍ਘੋ ਕਥਿਨਚੀਵਰਂ ਦੇਤਿ, ਤੇਨ ਭਿਕ੍ਖੁਨਾ ਅਤ੍ਥਰਿਤਬ੍ਬਨ੍ਤਿ ਯੋਜਨਾ. ਕਸ੍ਸ ਭਿਕ੍ਖੁਸ੍ਸਾਤਿ ਸਮ੍ਬਨ੍ਧੋ. ਯੋ ਜਿਣ੍ਣਚੀਵਰੋ ਹੋਤਿ, ਤਸ੍ਸ ਦਾਤਬ੍ਬਨ੍ਤਿ ਯੋਜਨਾ. ਮਹਤੀ ਪਰਿਸਾ ਏਤਸ੍ਸਾਤਿ ਮਹਾਪਰਿਸੋ ਥੇਰੋ. ‘‘ਨਵਕਤਰੋ ਸਕ੍ਕੋਤਿ, ਤਸ੍ਸ ਦਾਤਬ੍ਬ’’ਨ੍ਤਿ ਵਚਨਸ੍ਸ ਅਨੇਕਨ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਅਪਿ ਚਾ’’ਤਿਆਦਿ. ਅਪਿ ਚਾਤਿ ਏਕਨ੍ਤੇਨ. ਤਦਤ੍ਥਾਯਾਤਿ ਤਸ੍ਸ ਜਿਣ੍ਣਚੀਵਰਸ੍ਸ ਅਤ੍ਥਾਯ. ਅਸ੍ਸਾਤਿ ਭਿਕ੍ਖੁਸ੍ਸ. ਪੇਲਵੋਤਿ ਵਿਰਲ਼ੋ. ਤੇਨਾਪੀਤਿ ਕਥਿਨਤ੍ਥਾਰਕੇਨਾਪਿ. ਤਨ੍ਤਿ ਵਿਧਿਂ. ਦਾਨਕਮ੍ਮਵਾਚਾਤਿ ਦਾਨਕਾਰਣਕਮ੍ਮਵਾਚਾ.

ਏਵਂ ਦਿਨ੍ਨੇ ਪਨ ਕਥਿਨੇ ਨਿਟ੍ਠਾਪੇਤਬ੍ਬਾਨੀਤਿ ਯੋਜਨਾ. ਏਕੇਨਾਪੀਤਿ ਪਿਸਦ੍ਦੇਨ ਪਗੇਵ ਬਹੂਹਿ ਪਨਾਤਿ ਦਸ੍ਸੇਤਿ. ਬੁਦ੍ਧਪ੍ਪਸਤ੍ਥਨ੍ਤਿ ਬੁਦ੍ਧੇਹਿ ਪਸਤ੍ਥਂ. ਅਤੀਤੇ ਕਪ੍ਪਸਤਸਹਸ੍ਸਮਤ੍ਥਕੇਤਿ ਯੋਜਨਾ. ਤਸ੍ਸਾਤਿ ਪਦੁਮੁਤ੍ਤਰਸ੍ਸ. ਕਥਿਨਂ ਗਣ੍ਹਿ ਕਿਰਾਤਿ ਯੋਜਨਾ. ਤਨ੍ਤਿ ਕਥਿਨਂ, ਸਤ੍ਥਾ ਅਕਾਸੀਤਿ ਸਮ੍ਬਨ੍ਧੋ.

ਕਤਪਰਿਯੋਸਿਤਂ ਕਥਿਨਂ ਕਿਂ ਕਾਤਬ੍ਬਨ੍ਤਿ ਆਹ ‘‘ਕਤਪਰਿਯੋਸਿਤਂ ਪਨਾ’’ਤਿਆਦਿ. ਕਥਿਨਂ ਗਹੇਤ੍ਵਾ ਅਤ੍ਥਰਿਤਬ੍ਬਨ੍ਤਿ ਸਮ੍ਬਨ੍ਧੋ. ‘‘ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ’’ਤਿ ਪਦਂ ‘‘ਵਚਨੀਯੋ’’ਤਿ ਪਦੇ ਸੁਦ੍ਧਕਤ੍ਤਾ, ‘‘ਅਨੁਮੋਦਾਪੇਤਬ੍ਬ’’ਨ੍ਤਿ ਪਦੇ ਕਾਰਿਤਕਤ੍ਤਾ. ਕਿਂ ਵਚਨੀਯੋਤਿ ਆਹ ‘‘ਅਤ੍ਥਤਂ…ਪੇ… ਅਨੁਮੋਦਥਾ’’ਤਿ. ‘‘ਤੇਹਿ ਅਨੁਮੋਦਕੇਹਿ ਭਿਕ੍ਖੁਹੀ’’ਤਿ ਪਦਂ ‘‘ਵਚਨੀਯੋ’’ਤਿ ਪਦੇ ਅਵੁਤ੍ਤਕਤ੍ਤਾ, ‘‘ਅਨੁਮੋਦਾਪੇਤਬ੍ਬ’’ਨ੍ਤਿ ਪਦੇ ਕਾਰਿਤਕਮ੍ਮਂ ਅਵੁਤ੍ਤਕਮ੍ਮਂ, ਵਾ. ‘‘ਕਥਿਨ’’ਨ੍ਤਿ ਧਾਤੁਕਮ੍ਮਂ ਵਾ ਵੁਤ੍ਤਕਮ੍ਮਂ ਵਾ ਉਪਨੇਤਬ੍ਬਂ. ਕਿਂ ਵਚਨੀਯੋਤਿ ਆਹ ‘‘ਅਤ੍ਥਤਂ…ਪੇ… ਅਨੁਮੋਦਾਮਾ’’ਤਿ. ਇਤਰੇਹਿ ਚਾਤਿ ਅਨੁਮੋਦਕੇਹਿ ਚ. ਸਬ੍ਬੇਸਨ੍ਤਿ ਅਤ੍ਥਾਰਕਅਨੁਮੋਦਕਾਨਂ. ਹੀਤਿ ਸਚ੍ਚਂ. ਏਤਨ੍ਤਿ ਸਬ੍ਬੇਸਂ ਅਤ੍ਥਤਭਾਵਂ, ‘‘ਦ੍ਵਿਨ੍ਨਂ…ਪੇ… ਅਨੁਮੋਦਕਸ੍ਸ ਚਾ’’ਤਿ ਵਚਨਂ ਵਾ.

ਏਵਂ ਕਥਿਨੇ ਅਤ੍ਥਤੇ ਸਤਿ ਪਨਾਤਿ ਯੋਜਨਾ. ਯੇਨਾਤਿ ਭਿਕ੍ਖੁਨਾ. ਅਵਿਚਾਰੇਤ੍ਵਾਵਾਤਿ ‘‘ਕਥਿਨਤ੍ਥਾਰਕਸ੍ਸ ਦੇਮਾ’’ਤਿ ਵਾ ‘‘ਸਙ੍ਘਸ੍ਸ ਦੇਮਾ’’ਤਿ ਵਾ ਅਵਿਚਾਰੇਤ੍ਵਾ ਏਵ. ਸੇਸਚੀਵਰਾਨਿਪੀਤਿ ਕਥਿਨਤ੍ਥਾਰਚੀਵਰਤੋ ਸੇਸਚੀਵਰਾਨਿਪਿ. ਸਙ੍ਘੇਨ ਦਾਤਬ੍ਬਾਨੀਤਿ ਸਮ੍ਬਨ੍ਧੋ. ‘‘ਅਪਲੋਕੇਤ੍ਵਾ’’ਤਿ ਇਮਿਨਾ ਕਮ੍ਮਵਾਚਾਯ ਕਿਚ੍ਚਾਭਾਵਂ ਦਸ੍ਸੇਤਿ. ਵਸ੍ਸਾਵਾਸਿਕਟ੍ਠਿਤਿਕਾਯਾਤਿ ਵਸ੍ਸਾਵਾਸਕਾਲੇ ਪਵਤ੍ਤਾਯ ਠਿਤਿਕਾਯ. ਗਰੁਭਣ੍ਡਨ੍ਤਿ ਮਞ੍ਚਬਿਬ੍ਬੋਹਨਾਦਿਗਰੁਭਣ੍ਡਂ. ਏਕਸੀਮਾਯਾਤਿ ਏਕਾਯ ਉਪਚਾਰਸੀਮਾਯ.

੩੦੮. ਯਥਾ ਚਾਤਿ ਏਤ੍ਥ ਯਥਾਸਦ੍ਦੋ ਯਂਸਦ੍ਦਤ੍ਥੋ. ਯੇਨ ਵਿਧਿਨਾਤਿ ਹਿ ਅਤ੍ਥੋ. ਮਹਾਭੂਮਿਕਨ੍ਤਿ ਮਹਾਵਿਸਯਂ. ਚਤੁਵੀਸਤਿਆਕਾਰਵਨ੍ਤਤਾਯ ਮਹਾਵਿਤ੍ਥਾਰਿਕਨ੍ਤਿ ਵੁਤ੍ਤਂ ਹੋਤਿ. ਤਤੋਤਿ ਅਨਤ੍ਥਤਲਕ੍ਖਣਤੋ. ਪਰਿਵਾਰੇਪੀਤਿ ਪਿਸਦ੍ਦੋ ਨ ਇਧ ਏਵਾਤਿ ਦਸ੍ਸੇਤਿ.

ਤਤ੍ਥਾਤਿ ਚਤੁਵੀਸਤਿਯਾ ਆਕਾਰੇਸੁ. ਉਲ੍ਲਿਖਿਤਮਤ੍ਤੇਨਾਤਿ ਏਤ੍ਥ ਪਮਾਣਸ੍ਸ ਉਗ੍ਗਹਣਤ੍ਥਂ ਨਖਾਦੀਹਿ ਲਿਖਨਂ ਉਲ੍ਲਿਖਿਤਂ, ਉਲ੍ਲਿਖਿਤਂ ਮਤ੍ਤਂ ਪਮਾਣਂ ਉਲ੍ਲਿਖਿਤਮਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਦੀਘਤੋ ਚ ਪੁਥੁਲਤੋ ਚ ਪਮਾਣਗਹਣਮਤ੍ਤੇਨਾ’’ਤਿ. ਤਮੇਵਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਪਮਾਣਂ ਹੀ’’ਤਿਆਦਿ. ਦਸ੍ਸੇਨ੍ਤੋ ਹੁਤ੍ਵਾ ਉਲ੍ਲਿਖਤੀਤਿ ਯੋਜਨਾ. ਪਞ੍ਚਕਨ੍ਤਿ ਪਞ੍ਚਪਮਾਣਂ, ਪਞ੍ਚਸਮੂਹਂ ਵਾ ਖਣ੍ਡਂ. ਵਾਸਦ੍ਦੇਨ ਅਞ੍ਞਾਨਿਪਿ ਤੇਰਸਕਾਦੀਨਿ ਸਙ੍ਗਣ੍ਹਾਤਿ. ਮੋਘਸੁਤ੍ਤਕਾਰੋਪਨਮਤ੍ਤੇਨਾਤਿ ਮੋਘਸੁਤ੍ਤਸ੍ਸ ਚੀਵਰਸ੍ਸੂਪਰਿ ਆਰੋਪਨਮਤ੍ਤੇਨ. ਦੀਘਸਿਬ੍ਬਿਤਮਤ੍ਤੇਨਾਤਿ ਦੀਘਤੋ ਸਿਬ੍ਬਿਤਮਤ੍ਤੇਨ. ਮੁਦ੍ਦਿਯਪਟ੍ਟਬਨ੍ਧਨਮਤ੍ਤੇਨਾਤਿ ਮੁਦ੍ਦਿਯਪਟ੍ਟਸ੍ਸ ਬਨ੍ਧਨਮਤ੍ਤੇਨ. ਦ੍ਵੇ ਚਿਮਿਲਿਕਾਯੋਤਿ ਦ੍ਵੇ ਪਿਲੋਤਿਕਾਯੋ. ਪਠਮਚਿਮਿਲਿਕਾਤਿ ਕਥਿਨਚਿਮਿਲਿਕਤੋ ਅਞ੍ਞਾ ਅਤ੍ਤਨੋ ਪਕਤਿਚਿਮਿਲਿਕਾ ਘਟੇਤ੍ਵਾ ਠਪਿਤਾ ਹੋਤੀਤਿ ਯੋਜਨਾ. ‘‘ਤਂ ਪਠਮਚਿਮਿਲਿਕ’’ਨ੍ਤਿ ਪਾਠਸੇਸਂ ਅਜ੍ਝਾਹਰਿਤ੍ਵਾ ਕਥਿਨਸਾਟਕਸ੍ਸ ਕੁਚ੍ਛਿਚਿਮਿਲਿਕਂ ਕਤ੍ਵਾਤਿ ਇਮਿਨਾ ਸਮ੍ਬਨ੍ਧਿਤਬ੍ਬਂ. ਪਕਤਿਚੀਵਰਸ੍ਸਾਤਿ ਅਤ੍ਤਨੋ ਪਕਤਿਚੀਵਰਸ੍ਸ. ਪਕਤਿਪਟ੍ਟਬਨ੍ਧਚੀਵਰਨ੍ਤਿ ਪਕਤਿਪਟ੍ਟੇਨ ਬਨ੍ਧਚੀਵਰਂ. ਪਿਟ੍ਠਿਅਨੁਵਾਤਾਰੋਪਨਮਤ੍ਤੇਨਾਤਿ ਦੀਘਤੋ ਅਨੁਵਾਤਸ੍ਸ ਚੀਵਰਸ੍ਸੂਪਰਿ ਆਰੋਪਨਮਤ੍ਤੇਨ. ਦੀਘਾਨੁਵਾਤਞ੍ਹਿ ਪਾਰੁਪਨਕਾਲੇ ਪਿਟ੍ਠਿਯਂ ਠਿਤਤ੍ਤਾ ਪਿਟ੍ਠਿਅਨੁਵਾਤਨ੍ਤਿ ਵੁਚ੍ਚਤਿ. ਕੁਚ੍ਛਿਅਨੁਵਾਤਾਰੋਪਨਮਤ੍ਤੇਨਾਤਿ ਪੁਥੁਲਤੋ ਅਨੁਵਾਤਸ੍ਸ ਚੀਵਰਸ੍ਸੂਪਰਿ ਆਰੋਪਨਮਤ੍ਤੇਨ. ਪੁਥੁਲਾਨੁਵਾਤਞ੍ਹਿ ਪਾਰੁਪਨਕਾਲੇ ਕੁਚ੍ਛਿਯਂ ਠਿਤਤ੍ਤਾ ਕੁਚ੍ਛਿਅਨੁਵਾਤਨ੍ਤਿ ਵੁਚ੍ਚਤਿ. ਆਗਨ੍ਤੁਕਪਟ੍ਟਾਰੋਪਨਮਤ੍ਤੇਨਾਤਿ ਆਗਨ੍ਤੁਕਪਟ੍ਟਸ੍ਸ ਚੀਵਰਸ੍ਸੂਪਰਿ ਆਰੋਪਨਮਤ੍ਤੇਨ. ਵਾਤਿ ਅਥਵਾ.

ਸਾਰੁਪ੍ਪਨ੍ਤਿ ਸਮਣਾਨੁਚ੍ਛਵਿਕਂ. ਪਰਿਕਥਾਯਾਤਿ ਪਰਿਯਾਯੇਨ ਉਪ੍ਪਾਦਿਤਾਯ ਕਥਾਯ. ਅਤਿਉਕ੍ਕਟ੍ਠਂ ਵਟ੍ਟਤੀਤਿ ਅਤਿਉਕ੍ਕਟ੍ਠਂ ਏਵ ਵਟ੍ਟਤਿ. ਓਤਿਣ੍ਣਸਦਿਸਮੇਵਾਤਿ ਓਤਿਣ੍ਣੇਨ ਵਤ੍ਥੇਨ ਸਦਿਸਮੇਵ ਕਥਿਨਚੀਵਰਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਦੁਵਿਧੇਸੁ ਸਨ੍ਨਿਧੀਸੁ. ਤਦਹੇਵਾਤਿ ਤਸ੍ਮਿਂ ਦਿਨ੍ਨਅਹਨਿ ਏਵ.

ਰਤ੍ਤਿਨਿਸ੍ਸਗ੍ਗਿਯੇਨਾਤਿ ਰਤ੍ਤਿਅਤਿਕ੍ਕਨ੍ਤਂ ਹੁਤ੍ਵਾ ਨਿਸ੍ਸਗ੍ਗਿਯੇਨ. ਅਞ੍ਞੇਨਾਤਿ ਤਿਚੀਵਰਤੋ ਅਞ੍ਞੇਨ. ਸਮਣ੍ਡਲਿਕਤਨ੍ਤਿ ਸਹ ਮਹਾਮਣ੍ਡਲਅਡ੍ਢਮਣ੍ਡਲੇਨ ਕਤਂ.

੩੦੯. ਏਵਂ ਚਤੁਵੀਸਤਿਆਕਾਰਂ ਅਨਤ੍ਥਤਲਕ੍ਖਣਂ ਦਸ੍ਸੇਤ੍ਵਾ ਇਦਾਨਿ ਸਤ੍ਤਰਸਾਕਾਰਂ ਅਤ੍ਥਤਲਕ੍ਖਣਂ ਦਸ੍ਸੇਨ੍ਤੋ ਆਹ ‘‘ਅਹਤੇਨਾ’’ਤਿਆਦਿ. ਤਤ੍ਥ ਪਰਿਭੋਗਂ ਨ ਹਨਿਤ੍ਥ ਨ ਗਚ੍ਛਿਤ੍ਥਾਤਿ ਅਹਤਂ, ਪਰਿਭੋਗੇਨ ਨ ਹਨਿਤਬ੍ਬਂ ਨ ਹਿਂਸਿਤਬ੍ਬਨ੍ਤਿ ਵਾ ਅਹਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਪਰਿਭੁਤ੍ਤੇਨਾ’’ਤਿ. ‘‘ਅਹਤਸਦਿਸੇਨਾ’’ਤਿ ਇਮਿਨਾ ਅਹਤਕਪ੍ਪੇਨਾਤਿ ਏਤ੍ਥ ਕਪ੍ਪਸਦ੍ਦੋ ਸਦਿਸਤ੍ਥੋਤਿ ਦਸ੍ਸੇਤਿ. ਪਾਪਣਿਕੇਨਾਤਿ ਏਤ੍ਥ ਪਸਾਰਿਤੋ ਆਪਣੋ ਪਾਪਣੋ, ਤਸ੍ਮਿਂ ਪਤਿਤਂ ਪਾਪਣਿਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਆਪਣਦ੍ਵਾਰੇ ਪਤਿਤ’’ਨ੍ਤਿ. ‘‘ਪਿਲੋਤਿਕ’’ਨ੍ਤਿ ਇਮਿਨਾ ਣਿਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਵੁਤ੍ਤਵਿਪਲ੍ਲਾਸੇਨੇਵਾਤਿ ਵੁਤ੍ਤੇਹਿ ‘‘ਨਿਮਿਤ੍ਤਕਤੇਨਾ’’ਤਿਆਦੀਹਿ ਵਿਪਲ੍ਲਾਸੇਨ ਏਵ. ਤਤ੍ਥਾਤਿ ਪਰਿਵਾਰੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਇਧਾਤਿ ਕਥਿਨਕ੍ਖਨ੍ਧਕੇ. ਅਵੁਚ੍ਚਮਾਨੇਨ ਤੇਨ ਵਚਨੇਨ ਪਰਿਹਾਯਤੀਤਿ ਸਮ੍ਬਨ੍ਧੋ.

੩੧੦. ਤਤ੍ਥਾਤਿ ‘‘ਕਥਞ੍ਚ ਭਿਕ੍ਖਵੇ ਉਬ੍ਭਤਂ ਹੋਤਿ ਕਥਿਨ’’ਨ੍ਤਿਆਦਿਪਾਠੇ. ਜਨੇਤ੍ਤਿਯੋ ਮਾਤਰੋਤਿ ਯੋਜਨਾ. ਇਮਿਨਾ ਧਮ੍ਮੇਨ ਪੁਤ੍ਤੇ ਮਾਨੇਤੀਤਿ ਮਾਤਾ, ਧਮ੍ਮੇਨ ਪੁਤ੍ਤੇਹਿ ਮਾਨਿਯਤੀਤਿ ਵਾ ਮਾਤਾ, ਸਾ ਵਿਯ ਹੋਨ੍ਤੀਤਿ ਮਾਤਿਕਾਤਿ ਦਸ੍ਸੇਤਿ. ਕਥਿਨੁਬ੍ਭਾਰਨ੍ਤਿ ਚ ਕਥਿਨੁਦ੍ਧਾਰਨ੍ਤਿ ਚ ਅਤ੍ਥਤੋ ਸਦਿਸਂ. ਏਤਾਤਿ ਏਤਾ ਪਦਜਾਤਿਯੋ. ਤਾਸੂਤਿ ਅਟ੍ਠਸੁ ਮਾਤਿਕਾਸੁ. ਅਸ੍ਸਾਤਿ ਕਥਿਨੁਬ੍ਭਾਰਸ੍ਸ.

੧੮੮. ਆਦਾਯਸਤ੍ਤਕਕਥਾ

੩੧੧. ਨ ਪਚ੍ਚੇਸ੍ਸਨ੍ਤਿ ਏਤ੍ਥ ਪਤੀਤ੍ਯੂਪਸਗ੍ਗਸ੍ਸ ਪੁਨਤ੍ਥਂ, ਇਧਾਤੁਯਾ ਚ ਗਤ੍ਯਤ੍ਥਂ ਦਸ੍ਸੇਨ੍ਤੋ ਆਹ ‘‘ਨ ਪੁਨ ਆਗਮਿਸ੍ਸ’’ਨ੍ਤਿ. ਏਵਂ ਪਕ੍ਕਮਤੋ ਛਿਜ੍ਜਤੀਤਿ ਸਮ੍ਬਨ੍ਧੋ.

ਏਤਞ੍ਚਾਤਿ ਪਕ੍ਕਮਨਨ੍ਤਿਕਂ, ਕਥਿਨੁਦ੍ਧਾਰਞ੍ਚ. ਤਾਹਨ੍ਤਿ ਤੇ ਅਹਂ. ਤੇਤਿ ਤੁਯ੍ਹਂ.

ਅਞ੍ਞਨ੍ਤਿ ਅਤ੍ਤਨੋ ਵਿਹਾਰਤੋ ਅਞ੍ਞਂ. ਏਵਂ ਹੋਤੀਤਿ ਏਸੋ ਪਰਿਵਿਤਕ੍ਕੋ ਹੋਤਿ. ਸੋਤਿ ਆਵਾਸਪਲਿਬੋਧੋ. ਆਦਿਚ੍ਚਬਨ੍ਧੁਨਾ ਵੁਤ੍ਤੋਤਿ ਯੋਜਨਾ.

ਦ੍ਵੇ ਪਲਿਬੋਧਾ ਏਕਤੋ ਛਿਜ੍ਜਨ੍ਤੀਤਿ ਸਮ੍ਬਨ੍ਧੋ. ਅਪੁਬ੍ਬਂ ਅਚਰਿਮਨ੍ਤਿ ਏਕਪਹਾਰੇਨੇਵ. ਸੋ ਪਲਿਬੋਧੂਪਚ੍ਛੇਦੋ ਕਸ੍ਮਾ ਵਿਤ੍ਥਾਰਤੋ ਨ ਵੁਤ੍ਤੋਤਿ ਆਹ ‘‘ਸੋ ਪਨਾ’’ਤਿਆਦਿ. ਸੋ ਪਨਾਤਿ ਪਲਿਬੋਧੂਪਚ੍ਛੇਦੋ ਪਨ. ਨ ਵੁਤ੍ਤੋਤਿ ਸਮ੍ਬਨ੍ਧੋ. ਏਤ੍ਥਾਤਿ ਇਮਸ੍ਮਿਂ ਕਥਿਨੁਬ੍ਭਾਰੇ. ਕਸ੍ਮਾ ਅਯਂ ਕਥਿਨੁਦ੍ਧਾਰੋ ‘‘ਨਾਸਨਨ੍ਤਿਕੋ’’ਤਿ ਵੁਤ੍ਤੋਤਿ ਆਹ ‘‘ਯਸ੍ਮਾ’’ਤਿਆਦਿ. ਤਸ੍ਸਾਤਿ ਭਿਕ੍ਖੁਨੋ.

ਆਸਾਵਚ੍ਛੇਦਿਕੇ ਛਿਜ੍ਜਤੀਤਿ ਸਮ੍ਬਨ੍ਧੋ. ਅਯਂ ਪਨਾਤਿ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ ਪਨ. ਅਨੇਕਪਭੇਦੋ ਹੋਤੀਤਿ ਸਮ੍ਬਨ੍ਧੋ. ਤਸ੍ਸਾਤਿ ਭਿਕ੍ਖੁਸ੍ਸ. ਵੁਤ੍ਤੋਤਿ ਅਯਂ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ ਵੁਤ੍ਤੋਤਿ ਯੋਜਨਾ. ਏਤ੍ਥ ਪਨਾਤਿ ਇਮਸ੍ਮਿਂ ਪਨ ਠਾਨੇ. ਤਤ੍ਥਾਤਿ ਸੀਮਾਤਿਕ੍ਕਨ੍ਤਿਕੇ.

੩੧੨-੩੨੫. ਏਵਨ੍ਤਿਆਦਿ ਨਿਗਮਨਂ. ਸਤ੍ਤਕੇਤਿ ਅਟ੍ਠਸੁ ਮਾਤਿਕਾਸੁ ਆਸਾਵਚ੍ਛੇਦਤੋ ਸੇਸੇ ਸਤ੍ਤਪਮਾਣੇ, ਸਤ੍ਤਸਮੂਹੇ ਵਾ. ਤੇਯੇਵਾਤਿ ਸਤ੍ਤਕੇ ਏਵ. ਤਤੋਤਿ ਵਾਰਤੋ. ਯੇ ਯੇਤਿ ਕਥਿਨੁਦ੍ਧਾਰਾ. ਇਤਰੇਹੀਤਿ ਆਸਾਵਚ੍ਛੇਦਤੋ ਅਞ੍ਞੇਹਿ. ਯੇ ਪਲਿਬੋਧਾ ਵੁਤ੍ਤਾਤਿ ਸਮ੍ਬਨ੍ਧੋ. ਆਵਾਸੋ ਚਜੀਯਤਿ ਅਨੇਨਾਤਿ ਚਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੇਨ ਚਿਤ੍ਤੇਨਾ’’ਤਿਆਦਿ. ਤਨ੍ਤਿ ਚਿਤ੍ਤਂ. ‘‘ਏਸੇਵ ਨਯੋ’’ਤਿ ਇਮਿਨਾ ਆਵਾਸੋ ਵਮੀਯਤਿ ਅਨੇਨਾਤਿ ਵਨ੍ਤਂ. ਆਵਾਸਤੋ ਮੁਚ੍ਚਤਿ ਅਨੇਨਾਤਿ ਮੁਤ੍ਤਨ੍ਤਿ ਵਚਨਤ੍ਥਂ ਅਤਿਦਿਸਤਿ. ਸਬ੍ਬਤ੍ਥਾਤਿ ਸਬ੍ਬਸ੍ਮਿਂ ਕਥਿਨਕ੍ਖਨ੍ਧਕੇ.

ਇਤਿ ਕਥਿਨਕ੍ਖਨ੍ਧਕਵਣ੍ਣਨਾਯ ਯੋਜਨਾ ਸਮਤ੍ਤਾ.