੧੮੦. ਮੇਣ੍ਡਕਗਹਪਤਿਵਤ੍ਥੁਕਥਾ

੨੯੬. ‘‘ਬਹਿਦ੍ਵਾਰੇ’’ਤਿ ਏਤ੍ਥ ਕਸ੍ਸ ਬਹਿਦ੍ਵਾਰੇਤਿ ਆਹ ‘‘ਧਞ੍ਞਾਗਾਰਸ੍ਸ ਬਹਿਦ੍ਵਾਰੇ’’ਤਿ. ਆਲ਼ਕਥਾਲਿਕਨ੍ਤਿ ਏਤ੍ਥ ਆਲ਼ਕਤਣ੍ਡੁਲਪਚਨਕਂ ਗਣ੍ਹਕਥਾਲਿ ਆਲ਼ਕਥਾਲਿ, ਤਾਯ ਪਚਿਤਂ ਭਤ੍ਤਂ ਆਲ਼ਕਥਾਲਿਕਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਆਲ਼ਕਤਣ੍ਡੁਲਪਚਨਕਥਾਲਿਕ’’ਨ੍ਤਿ. ਬ੍ਯਞ੍ਜਨਭਣ੍ਡਿਕਨ੍ਤਿ ਬ੍ਯਞ੍ਜਨਪਰਿਕ੍ਖਾਰਿਕਂ, ਬ੍ਯਞ੍ਜਨਪਰਿਵਾਰਕਨ੍ਤਿ ਅਤ੍ਥੋ. ਇਮਿਨਾ ਸੂਪਭਿਞ੍ਜਨਕਨ੍ਤਿ ਏਤ੍ਥ ਸੂਪਸਦ੍ਦੋ ਬ੍ਯਞ੍ਜਨਵਾਚਕੋ, ਭਿਞ੍ਜਨਕਸਦ੍ਦੋ ਭਣ੍ਡਿਕਪਰਿਯਾਯੋਤਿ ਦਸ੍ਸੇਤਿ. ਦਾਸਕਮ੍ਮਕਰਪੋਰਿਸਨ੍ਤਿ ਏਤ੍ਥ ਦਾਸਪੋਰਿਸਾ ਚ ਕਮ੍ਮਕਰਪੋਰਿਸਾ ਚ ਦਾਸਕਮ੍ਮਕਰਪੋਰਿਸਂ, ਸਮਾਹਾਰਦ੍ਵਨ੍ਦੋ ਪੁਬ੍ਬਪਦੇ ਉਤ੍ਤਰਲੋਪੋ, ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਦਾਸਪੁਰਿਸੇ ਚ ਕਮ੍ਮਕਰਪੁਰਿਸੇ ਚਾ’’ਤਿ. ਪੋਰਿਸਸਦ੍ਦੋਪਿ ਪੁਰਿਸਸਦ੍ਦੇਨ ਸਮਾਨੋ ‘‘ਪੁਰਿਸੋ ਏਵ ਪੋਰਿਸੋ’’ਤਿ ਅਤ੍ਥੇਨ. ਧੁਵਭਤ੍ਤੇਨਾਤਿ ਏਤ੍ਥ ਧੁਵਸਦ੍ਦੋ ਨਿਚ੍ਚਪਰਿਯਾਯੋਤਿ ਆਹ ‘‘ਨਿਚ੍ਚਕਾਲ’’ਨ੍ਤਿ. ਦੁਯ੍ਹੇਨ ਖੀਰੇਨਾਤਿ ਸਮ੍ਬਨ੍ਧੋ. ‘‘ਮੇਣ੍ਡਕਵਤ੍ਥੁਸ੍ਮਿਂ ਪਨਾ’’ਤਿ ਪਾਠਤੋ ਪਟ੍ਠਾਯ ਯਾਵ ‘‘ਖਣਞ੍ਞੇਵ ਦੁਯ੍ਹੇਨਾ’’ਤਿ ਪਾਠਾ ਕੇਸੁਚਿਯੇਵ ਅਟ੍ਠਕਥਾਪੋਤ੍ਥਕੇਸੁ ਅਤ੍ਥਿ. ਏਤ੍ਥਾਤਿ ਮੇਣ੍ਡਕਵਤ੍ਥੁਮ੍ਹਿ. ਗੋਰਸੇਤਿ ਗਵਯੇਹਿ ਨਿਬ੍ਬਤ੍ਤੇ ਖੀਰਦਧਿਤਕ੍ਕਨਵਨੀਤਸਬ੍ਬਿਸਙ੍ਖਾਤੇ ਰਸੇ. ਪਾਥੇਯ੍ਯਨ੍ਤਿ ਪਥਸ੍ਸ ਹਿਤਂ ਪਾਥੇਯ੍ਯਂ. ਞਤ੍ਵਾਤਿ ਪਾਥੇਯ੍ਯਮਿਚ੍ਛਤੀਤਿ ਞਤ੍ਵਾ. ਭਿਕ੍ਖਾਚਾਰਵਤ੍ਤੇਨ ਵਾਤਿ ਅਞ੍ਞਾਤਕਅਪਵਾਰਿਤਟ੍ਠਾਨਤੋ ਭਿਕ੍ਖਾਚਾਰਵਤ੍ਤੇਨ ਵਾ. ਯਾਚਿਤ੍ਵਾਪੀਤਿ ਪਿਸਦ੍ਦੋ ਪਗੇਵ ਭਿਕ੍ਖਾਚਾਰਵਤ੍ਤੇਨਾਤਿ ਦਸ੍ਸੇਤਿ. ਯਤ੍ਤਕੇਨ ਪਾਥੇਯ੍ਯੇਨਾਤਿ ਸਮ੍ਬਨ੍ਧੋ.