੧੮੨. ਕੇਣਿਯਜਟਿਲਵਤ੍ਥੁਕਥਾ

੩੦੦. ਕਾਜੇਹੀਤਿ ਏਤ੍ਥ ਕਾਜਸ੍ਸ ਗਣਨਂ ਦਸ੍ਸੇਨ੍ਤੋ ਆਹ ‘‘ਪਞ੍ਚਹਿ ਕਾਜਸਤੇਹੀ’’ਤਿ. ਏਕੇਨ ਕਾਜੇਨ ਦ੍ਵਿਨ੍ਨਂ ਕੁਟਾਨਂ ਗਹਿਤਤ੍ਤਾ ਵੁਤ੍ਤਂ ‘‘ਕੁਟਸਹਸ੍ਸ’’ਨ੍ਤਿ. ਵੋਤਿ ਤੁਮ੍ਹੇ. ਸੁਟ੍ਠੁ ਪਸਨ੍ਨੋਤਿ ਸਮ੍ਬਨ੍ਧੋ.

ਤਤ੍ਥਾਤਿ ‘‘ਅਟ੍ਠ ਪਾਨਾਨੀ’’ਤਿ ਪਾਠੇ, ਅਟ੍ਠਸੁ ਪਾਨੇਸੁ ਵਾ. ‘‘ਅਮ੍ਬੇਹਿ ਕਤਪਾਨ’’ਨ੍ਤਿ ਇਮਿਨਾ ਮਜ੍ਝੇਲੋਪਸਮਾਸਂ ਦਸ੍ਸੇਤਿ. ਤਤ੍ਥਾਤਿ ਆਮਪਕ੍ਕੇਸੁ. ਕਰੋਨ੍ਤੇਨ ਕਾਤਬ੍ਬਨ੍ਤਿ ਸਮ੍ਬਨ੍ਧੋ. ਆਦਿਚ੍ਚਪਾਕੇਨਾਤਿ ਆਦਿਚ੍ਚਹੇਤੁਨਾ ਪਚਨੇਨ. ਪੁਰੇਭਤ੍ਤਮੇਵ ਕਪ੍ਪਤੀਤਿ ਭਿਕ੍ਖੁਨਾ ਸਯਂ ਕਤਤ੍ਤਾ ਪੁਰੇਭਤ੍ਤਮੇਵ ਕਪ੍ਪਤਿ. ਤੇਨ ਵੁਤ੍ਤਂ ‘‘ਅਨੁਪਸਮ੍ਪਨ੍ਨੇਹੀ’’ਤਿਆਦਿ. ਕਤਂ ਅਮ੍ਬਪਾਨਨ੍ਤਿ ਸਮ੍ਬਨ੍ਧੋ. ਸਬ੍ਬਪਾਨੇਸੂਤਿ ਜਮ੍ਬੁਪਾਨਾਦੀਸੁ ਸਬ੍ਬੇਸੁ ਪਾਨੇਸੁ.

ਤੇਸੂਤਿ ਜਮ੍ਬੁਪਾਨਾਦੀਸੁ ਸਤ੍ਤਸੁ ਪਾਨੇਸੁ. ਪਨਸਦ੍ਦੋ ਵਿਸੇਸਤ੍ਥਜੋਤਕੋ. ਜਮ੍ਬੁਫਲੇਹੀਤਿ ਆਮੇਹਿ ਵਾ ਪਕ੍ਕੇਹਿ ਵਾ ਜਮ੍ਬੁਫਲੇਹਿ. ਅਟ੍ਠਿਕੇਹੀਤਿ ਅਟ੍ਠਿ ਅਸ੍ਮਿਮਤ੍ਥੀਤਿ ਅਟ੍ਠਿਕਂ ਫਲਂ. ਜਾਤਿਰਸੇਨਾਤਿ ਯਥਾਜਾਤੇਨ ਰਸੇਨ. ਇਮਿਨਾ ਮਧੁਸਕ੍ਖਰਕਪ੍ਪੁਰਾਦੀਹਿ ਨ ਯੋਜੇਤਬ੍ਬੋਤਿ ਦਸ੍ਸੇਤਿ. ਤਂ ਪਨਾਤਿ ਮਧੁਕਪਾਨਂ ਪਨ. ਮੁਦ੍ਦਿਕਾਤਿ ਮੁਦ੍ਦਿਕਫਲਾਨਿ. ਸਾਲੁਕੇਤਿ ਕਨ੍ਦੇ. ਸਤ੍ਤਨ੍ਨਂ ਧਞ੍ਞਾਨਂ ਫਲਰਸਨ੍ਤਿ ਤਣ੍ਡੁਲਧੋਵਨੋਦਕਂ. ‘‘ਪਕ੍ਕਡਾਕਰਸ’’ਨ੍ਤਿ ਇਮਿਨਾ ਅਪਕ੍ਕਡਾਕਰਸਂ ਵਟ੍ਟਤੀਤਿ ਦੀਪੇਤਿ. ਹੀਤਿ ਸਚ੍ਚਂ, ਵਿਤ੍ਥਾਰੋ ਵਾ. ਰਸੋਤਿ ਪਕ੍ਕਰਸੋ. ਪਟਿਗ੍ਗਹੇਤ੍ਵਾ ਠਪਿਤਸਬ੍ਬਿਆਦੀਹਿ ਪਕ੍ਕਾਨਂ ਯਾਵਜੀਵਿਕਾਨਂ ਪਤ੍ਤਾਨਂ ਰਸੋਤਿ ਯੋਜਨਾ. ਪਕ੍ਕਂ ਯਾਵਜੀਵਿਕਪਤ੍ਤਰਸਨ੍ਤਿ ਸਮ੍ਬਨ੍ਧੋ. ਯਾਵਕਾਲਿਕਪਤ੍ਤਾਨਮ੍ਪੀਤਿ ਪਿਸਦ੍ਦੋ ਪਗੇਵ ਯਾਵਜੀਵਿਕਪਤ੍ਤਾਨਨ੍ਤਿ ਦਸ੍ਸੇਤਿ. ਯਂ ਪਾਨਨ੍ਤਿ ਯਂ ਮਧੁਕਪੁਪ੍ਫਰਸਪਾਨਂ. ਸੋਤਿ ਮਧੁਕਪੁਪ੍ਫਰਸੋ. ਤੇਨਾਤਿ ਮਧੁਕਪੁਪ੍ਫੇਨ. ਯਤੋ ਕਾਲਤੋ ਪਟ੍ਠਾਯ ਮਜ੍ਜਂ ਨ ਕਰੋਨ੍ਤਿ, ਤਤੋਤਿ ਯੋਜਨਾ. ਉਚ੍ਛੁਰਸੋ ਨਿਕਸਟੋ ਪਚ੍ਛਾਭਤ੍ਤਂ ਵਟ੍ਟਤਿ ਸਤ੍ਤਾਹਕਾਲਿਕਤ੍ਤਾ. ਇਮੇ ਚਤ੍ਤਾਰੋ ਰਸਾਤਿ ਫਲਪਤ੍ਤਪੁਪ੍ਫਉਚ੍ਛੁਰਸਸਙ੍ਖਾਤਾ ਇਮੇ ਚਤ੍ਤਾਰੋ ਰਸਾ. ਅਗ੍ਗਿਹੁਤ੍ਤਮੁਖਾਤਿ ਯਞ੍ਞਾ ਅਗ੍ਗਿਹੁਤਮੁਖਾ, ਅਗ੍ਗਿਹੁਤਸੇਟ੍ਠਾਤਿ ਅਤ੍ਥੋ.