੧੭੯. ਕਪ੍ਪਿਯਭੂਮਿਅਨੁਜਾਨਨਕਥਾ

੨੯੫. ਬਹਾਰਾਮਕੋਟ੍ਠਕੇਤਿ ਏਤ੍ਥ ਸਮੀਪਤ੍ਥੇ ਭੁਮ੍ਮਵਚਨਨ੍ਤਿ ਆਹ ‘‘ਬਹਾਰਾਮਕੋਟ੍ਠਕਸਮੀਪੇਤਿ ਆਰਾਮਕੋਟ੍ਠਕਸ੍ਸ ਬਹਿ ਸਮੀਪੇਤਿ ਅਤ੍ਥੋ’’ਤਿ. ਅਚ੍ਛਨ੍ਤੀਤਿ ਵਸਨ੍ਤਿ. ਏਤਨ੍ਤਿ ‘‘ਪਚ੍ਚਨ੍ਤਿਮ’’ਨ੍ਤਿ ਏਤਂ ਵਚਨਂ. ਧੁਰਵਿਹਾਰੋਪੀਤਿ ਪਧਾਨਵਿਹਾਰੋਪਿ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਅਨੁਪਗੇਯੇਵਾਤਿ ਪਾਤੋਯੇਵ. ਓਰਵਸਦ੍ਦਨ੍ਤਿ ਉਚ੍ਚਰਵਸਙ੍ਖਾਤਂ ਸਦ੍ਦਂ. ਕਪਿਲਸੁਤ੍ਤਪਰਿਯੋਸਾਨੇਤਿ ਸੁਤ੍ਤਨਿਪਾਤੇ (ਸੁ. ਨਿ. ਅਟ੍ਠ. ੨.ਕਪਿਲਸੁਤ੍ਤਵਣ੍ਣਨਾ) ਸਙ੍ਗਹਿਤਸ੍ਸ ਕਪਿਲਸੁਤ੍ਤਸ੍ਸ ਪਰਿਯੋਸਾਨੇ. ਪਞ੍ਚਸਤਾਨਂ ਕੇਵਟ੍ਟਪੁਰਿਸਾਨਨ੍ਤਿ ਸਮ੍ਬਨ੍ਧੋ.

ਉਸ੍ਸਾਵਨਨ੍ਤਿਕਾਦੀਸੁ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਯੋ ਵਿਹਾਰੋ ਕਰਿਯਤੀਤਿ ਸਮ੍ਬਨ੍ਧੋ. ਭੂਮਿਯਾ ਗਤਿ ਵਿਯ ਗਤਿ ਏਤੇਸਨ੍ਤਿ ਭੂਮਿਗਤਿਕਾ. ਪਤਿਟ੍ਠਾਪੇਨ੍ਤੇਹਿ ਬਹੂਹਿ ਭਿਕ੍ਖੂਹਿ ਪਤਿਟ੍ਠਾਪੇਤਬ੍ਬੋਤਿ ਸਮ੍ਬਨ੍ਧੋ. ਨਿਚ੍ਛਾਰੇਨ੍ਤੇਹਿ ਭਿਕ੍ਖੂਹੀਤਿ ਯੋਜਨਾ. ਸਯਨ੍ਤਿ ਭਿਕ੍ਖੁ. ਤਂ ਪਨਾਤਿ ‘‘ਸਙ੍ਘਸ੍ਸ ਕਪ੍ਪਿਯਕੁਟਿਂ ਅਧਿਟ੍ਠਾਮੀ’’ਤਿ ਵਚਨਂ ਪਨ. ਅਵਤ੍ਵਾਪੀਤਿ ਪਿਸਦ੍ਦੋ ਤਥਾ ‘‘ਵਤ੍ਵਾਪੀ’’ਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਅਟ੍ਠਕਥਾਸੂਤਿ ਮਹਾਅਟ੍ਠਕਥਾਦੀਸੁ ਤੀਸੁ ਅਟ੍ਠਕਥਾਸੁ. ਏਤ੍ਥਾਤਿ ਉਸ੍ਸਾਵਨਨ੍ਤਿਕਕੁਟਿਯਂ. ‘‘ਸਮਕਾਲਂ ਵਟ੍ਟਤੀ’’ਤਿ ਵਚਨਂ ਦਲ਼੍ਹੀਕਰੋਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਵਚਨੇਤਿ ‘‘ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਚਨੇ. ਤਸ੍ਮਿਨ੍ਤਿ ਥਮ੍ਭੇ. ਤੇਨੇਵਾਤਿ ਅਕਤਭਾਵੇਨੇਵ. ਹੀਤਿ ਸਚ੍ਚਂ. ਏਤ੍ਥਾਤਿ ਬਹੂਸੁ.

ਯਤੋਤਿ ਇਟ੍ਠਕਸਿਲਾਮਤ੍ਤਿਕਾਪਿਣ੍ਡਤੋ. ਵੁਤ੍ਤਨਯੇਨੇਵਾਤਿ ‘‘ਬਹੂਹਿ ਸਮ੍ਪਰਿਵਾਰੇਤ੍ਵਾ ਕਪ੍ਪਿਯਕੁਟਿਂ ਕਰੋਮਾ’’ਤਿ ਵੁਤ੍ਤਨਯੇਨੇਵ. ਇਟ੍ਠਕਾਦਯੋਤਿ ‘‘ਕਪ੍ਪਿਯਕੁਟਿਂ ਕਰੋਮਾ’’ਤਿ ਅਧਿਟ੍ਠਾਤਬ੍ਬਇਟ੍ਠਕਾਦਯੋ. ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਥਾਤਿ ਯਥਾ ਅਨ੍ਧਕਟ੍ਠਕਥਾਯਂ ਵੁਤ੍ਤਂ, ਤਥਾ. ਥਮ੍ਭਾਦੀਨਿ ਉਕ੍ਖਿਪਿਤ੍ਵਾ ਪਤਿਟ੍ਠਾਪਨਞ੍ਚ ‘‘ਕਪ੍ਪਿਯਕੁਟਿਂ ਕਰੋਮਾ’’ਤਿ ਸਾਵਨਞ੍ਚ ਅਨ੍ਤਂ ਪਰਿਯੋਸਾਨਮੇਤਿਸ੍ਸਾਤਿ ਉਸ੍ਸਾਵਨਨ੍ਤਿਕਾ.

ਤਾਸੂਤਿ ਦ੍ਵੀਸੁ ਗੋਨਿਸਾਦਿਕਾਸੁ. ਯਤ੍ਥਾਤਿ ਕੁਟਿਯਂ. ਨੇਵ ਆਰਾਮੋ ਪਰਿਕ੍ਖਿਤ੍ਤੋ ਹੋਤੀਤਿ ਸਮ੍ਬਨ੍ਧੋ. ਪੁਨ ਯਤ੍ਥਾਤਿ ਕੁਟਿਯਂ. ਅਯਨ੍ਤਿ ਕੁਟਿ. ਉਭਯਤ੍ਥਾਪੀਤਿ ਆਰਾਮਵਿਹਾਰਗੋਨਿਸਾਦਿਕਾਸੁ ਦ੍ਵੀਸੁਪਿ. ਬਹੁਤਰਂ ਪਰਿਕ੍ਖਿਤ੍ਤੋਪਿ ਪਰਿਕ੍ਖਿਤ੍ਤੋਯੇਵ ਨਾਮਾਤਿ ਯੋਜਨਾ. ਏਤ੍ਥਾਤਿ ਉਪਡ੍ਢਪਰਿਕ੍ਖਿਤ੍ਤਬਹੁਤਰਪਰਿਕ੍ਖਿਤ੍ਤਆਰਾਮੇ. ਗਾਵੋ ਪਵਿਸਿਤ੍ਵਾ ਯਥਾਸੁਖਂ ਨਿਸੀਦਨ੍ਤਿ ਏਤ੍ਥਾਤਿ ਗੋਨਿਸਾਦਾ ਗੋਸਾਲਾ. ਗੋਨਿਸਾਦਾ ਵਿਯਾਤਿ ਗੋਨਿਸਾਦਿਕਾ ਕੁਟਿ.

ਮਨੁਸ੍ਸਾ ਵਦਨ੍ਤੀਤਿ ਸਮ੍ਬਨ੍ਧੋ. ਏਸਾਤਿ ਕੁਟਿ. ਵੁਤ੍ਤੇਪੀਤਿ ਪਿਸਦ੍ਦੇ, ‘‘ਕਪ੍ਪਿਯਕੁਟਿਂ ਦੇਮਾ’’ਤਿ ਵਾਕ੍ਯਂ ਅਪੇਕ੍ਖਤਿ. ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯਸ੍ਮਾ ਵਟ੍ਟਤਿ, ਤਸ੍ਮਾਤਿ ਯੋਜਨਾ. ਤੇਸਨ੍ਤਿ ਸੇਸਸਹਧਮ੍ਮਿਕਦੇਵਮਨੁਸ੍ਸਾਨਂ. ਤੇਹੀਤਿ ਸੇਸਸਹਧਮ੍ਮਿਕਦੇਵਮਨੁਸ੍ਸੇਹਿ. ਪੁਨਪਿ ਵੁਤ੍ਤਂ, ਕਿਂ ਵੁਤ੍ਤਨ੍ਤਿ ਆਹ ‘‘ਭਿਕ੍ਖੁਸ੍ਸ…ਪੇ… ਹੋਤੀ’’ਤਿ. ਅਪੀਤਿ ਤਦਞ੍ਞੇਸਂ. ਤਨ੍ਤਿ ਵਚਨਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸਙ੍ਘਸ੍ਸ ਸਨ੍ਤਕਮੇਵ ਵਾ ਭਿਕ੍ਖੁਸ੍ਸ ਸਨ੍ਤਕਮੇਵ ਵਾਤਿ ਯੋਜਨਾ. ਇਤਿ ਤਸ੍ਮਾ ਸੁਵੁਤ੍ਤਨ੍ਤਿ ਸਮ੍ਬਨ੍ਧੋ. ਗਹਪਤੀਨਂ ਸਨ੍ਤਕਂ ਗਹਪਤਿ ਕੁਟਿ. ‘‘ਕਮ੍ਮਵਾਚਂ ਸਾਵੇਤ੍ਵਾ’’ਤਿ ਇਦਂ ਉਪਲਕ੍ਖਣਮਤ੍ਤਂ ਕਮ੍ਮਵਾਚਮਵਤ੍ਵਾ ਅਪਲੋਕਨੇਨਪਿ ਕਪ੍ਪਿਯਤ੍ਤਾ. ਕਮ੍ਮਵਾਚਾਯ ਵਾ ਅਪਲੋਕਨੇਨ ਵਾ ਸਮ੍ਮਨਿਤਬ੍ਬਾਤਿ ਸਮ੍ਮੁਤਿ ਕੁਟਿ. ਇਤਿਸਦ੍ਦੋ ਪਰਿਸਮਾਪਨਤ੍ਥੋ.

ਯਂ ਆਮਿਸਂ ਵੁਤ੍ਥਂ, ਸਬ੍ਬਂ ਤਂ ਆਮਿਸਨ੍ਤਿਯੋਜਨਾ. ਅਕਪ੍ਪਿਯਭੂਮਿਯਂ ਸਹਸੇਯ੍ਯਪਹੋਨਕੇ ਗੇਹੇ ਵੁਤ੍ਥਂ ਠਪਿਤਨ੍ਤਿ ਸਮ੍ਬਨ੍ਧੋ. ਯਂ ਪਨ ਸਙ੍ਘਿਕਂ ਵਾ ਪੁਗ੍ਗਲਿਕਂ ਵਾ ਅਤ੍ਥੀਤਿ ਯੋਜਨਾ. ਤੇਸਂਯੇਵਾਤਿ ਭਿਕ੍ਖੁਭਿਕ੍ਖੁਨੀਨਮੇਵ. ਏਕਰਤ੍ਤਮ੍ਪਿ ਠਪਿਤਂ ਯਂ ਸਨ੍ਤਕਂ ਅਤ੍ਥੀਤਿ ਯੋਜਨਾ. ਤਨ੍ਤਿ ਸਙ੍ਘਿਕਾਦਿ. ਤਤ੍ਥਾਤਿ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪਹੋਨਕਗੇਹੇ. ਏਤਨ੍ਤਿ ਅਨ੍ਤੋਵੁਤ੍ਥਅਨ੍ਤੋਪਕ੍ਕਸਙ੍ਖਾਤਂ ਯਾਵਯਾਮਕਾਲਿਕਂ, ‘‘ਨ ਕਪ੍ਪਤੀ’’ਤਿ ਬ੍ਯਤਿਰੇਕਸ੍ਸ ਅਨ੍ਵਯਂ ਦਸ੍ਸੇਨ੍ਤੋ ਆਹ ‘‘ਸਤ੍ਤਾਹਕਾਲਿਕਂ ਪਨਾ’’ਤਿਆਦਿ.

ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ. ਤਤ੍ਰ ਵਚਨੇਤਿ ਹਿ ਅਤ੍ਥੋ. ਸਾਮਣੇਰੋ ਦੇਤੀਤਿ ਸਮ੍ਬਨ੍ਧੋ. ਯਂਕਿਞ੍ਚਿ ਤਣ੍ਡੁਲਾਦਿਕਂ ਆਮਿਸਨ੍ਤਿ ਯੋਜਨਾ. ਮੁਖਸਨ੍ਨਿਧਿ ਨਾਮਾਤਿ ਆਪਤ੍ਤਿਯਾ ਮੁਖੋ ਉਪਾਯੋ ਸਨ੍ਨਿਧਿ ਨਾਮਾਤਿ ਅਤ੍ਥੋ. ਤਤ੍ਥਾਤਿ ਮਹਾਪਚ੍ਚਰਿਯਂ, ਮੁਖਸਨ੍ਨਿਧਿਅਨ੍ਤੋਵੁਤ੍ਥੇਸੁ ਵਾ. ਭਿਕ੍ਖੁ ਪਚਿਤ੍ਵਾ ਪਰਿਭੁਞ੍ਜਤੀਤਿ ਸਮ੍ਬਨ੍ਧੋ. ਆਮਿਸਸਂਸਟ੍ਠਨ੍ਤਿ ਆਮਿਸੇਨ ਸਂਸਗ੍ਗਂ.

ਜਹਿਤਵਤ੍ਥੁਕਾਤਿ ਜਹਿਤਂ ਵਤ੍ਥੁ ਏਤਾਸਨ੍ਤਿ ਜਹਿਤਵਤ੍ਥੁਕਾ. ਉਸ੍ਸਾਵਨਨ੍ਤਿਕਾ ਕਤਾਤਿ ਸਮ੍ਬਨ੍ਧੋ. ਸਾਤਿ ਉਸ੍ਸਾਵਨਨ੍ਤਿਕਾ. ਯੋ ਯੋਤਿ ਥਮ੍ਭੋ ਵਾ ਭਿਤ੍ਤਿਪਾਦੋ ਵਾ. ਇਟ੍ਠਕਾਦੀਹਿ ਕਤਾ ਉਸ੍ਸਾਵਨਨ੍ਤਿਕਾਤਿ ਯੋਜਨਾ. ਚਯਸ੍ਸਾਤਿ ਅਧਿਟ੍ਠਾਨਸ੍ਸ. ਯੇਹਿ ਪਨ ਇਟ੍ਠਕਾਦੀਹੀਤਿਆਦਿਸਦ੍ਦੇਨ ਥਮ੍ਭਸਿਲਾਮਤ੍ਤਿਕਾਯੋ ਸਙ੍ਗਣ੍ਹਾਤਿ. ਤਦਞ੍ਞੇਸੂਤਿ ਤੇਹਿ ਅਧਿਟ੍ਠਿਤਇਟ੍ਠਕਾਦੀਹਿ ਅਞ੍ਞੇਸੁ.

ਪਾਕਾਰਾਦਿਪਰਿਕ੍ਖੇਪੇਤਿ ਉਪਚਾਰਸੀਮਾਪਰਿਚ੍ਛਿਨ੍ਨਸ੍ਸ ਆਰਾਮਸ੍ਸ ਪਾਕਾਰਾਦਿਨਾ ਪਰਿਕ੍ਖੇਪੇ ਕਤੇ. ਪਾਕਾਰਾਦੀਤਿ ਆਦਿਸਦ੍ਦੇਨ ਵਤਿਂ ਸਙ੍ਗਣ੍ਹਾਤਿ. ਕਪ੍ਪਿਯਕੁਟਿਂ ਲਦ੍ਧੁਂ ਵਟ੍ਟਤੀਤਿ ਗੋਨਿਸਾਦਿਕਾਯ ਅਭਾਵੇਨ ਸੇਸਾਸੁ ਤੀਸੁ ਕਪ੍ਪਿਯਕੁਟੀਸੁ ਯਂਕਿਞ੍ਚਿ ਕਪ੍ਪਿਯਕੁਟਿਂ ਲਦ੍ਧੁਂ ਵਟ੍ਟਤੀਤਿ ਅਤ੍ਥੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਇਤਰਾ ਪਨਾਤਿ ਉਸ੍ਸਾਵਨਨ੍ਤਿਕਗੋਨਿਸਾਦਿਕਾਹਿ ਅਞ੍ਞਾ. ਦ੍ਵੇਤਿ ਉਭੋ ਗਹਪਤਿਸਮ੍ਮੁਤਿਯੋ, ਜਹਿਤਵਤ੍ਥੁਕਾਵ ਹੋਨ੍ਤੀਤਿ ਸਮ੍ਬਨ੍ਧੋ. ਪਕ੍ਖਪਾਸਕਮਣ੍ਡਲਨ੍ਤਿ ਦ੍ਵੇ ਪਕ੍ਖੇ ਅਪਤਨਤ੍ਥਾਯ ਪਸਤਿ ਬਨ੍ਧਤੀਤਿ ਪਕ੍ਖਪਾਸਕੋ, ਮਣ੍ਡਲਨ੍ਤਿ ਛਦਨਕੋਟਿਗੋਪਾਨਸੀਨਂ ਉਪਰਿ ਠਪਿਤਕਟ੍ਠਵਿਸੇਸੋ, ਪਕ੍ਖਪਾਸਕੋ ਚ ਮਣ੍ਡਲਞ੍ਚ ਪਕ੍ਖਪਾਸਕਮਣ੍ਡਲਂ.

ਯਤ੍ਰਾਤਿ ਯਸ੍ਮਿਂ ਠਾਨੇ. ਅਨੁਪਸਮ੍ਪਨ੍ਨਸ੍ਸ ਦਤ੍ਵਾਤਿ ਅਨਪੇਕ੍ਖਵਿਸ੍ਸਜ੍ਜਨੇਨ ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ. ਚੀਵਰਵਿਕਪ੍ਪਨਂ ਵਿਯ ਸਾਪੇਕ੍ਖਵਿਸ੍ਸਜ੍ਜਨਮ੍ਪਿ ਵਟ੍ਟਤੀਤਿ ਵਦਨ੍ਤਿ. ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ. ਸੋਤਿ ਕਰਵੀਕਤਿਸ੍ਸਤ੍ਥੇਰੋ, ਪਸ੍ਸਿਤ੍ਵਾ ਪੁਚ੍ਛੀਤਿ ਸਮ੍ਬਨ੍ਧੋ. ਥੇਰੋਤਿ ਮਹਾਸਿਵਤ੍ਥੇਰੋ. ਲੂਖਦਿਵਸੇਤਿ ਅਸਿਨਿਦ੍ਧਦਿਵਸੇ. ਤਤੋਤਿ ਬ੍ਰਵਨਤੋ, ਪਰਨ੍ਤਿ ਸਮ੍ਬਨ੍ਧੋ. ਨਨ੍ਤਿ ਮਹਾਸਿਵਤ੍ਥੇਰਂ. ਪਮੁਖੇਤਿ ਗਬ੍ਭਸ੍ਸ ਪਮੁਖੇ. ਤਨ੍ਤਿ ਸਬ੍ਬਿਕੁਮ੍ਭਿਂ. ਬਹੀਤਿ ਵਿਹਾਰਸ੍ਸ ਬਹਿ. ਸੋਤਿ ਮਹਾਸਿਵਤ੍ਥੇਰੋ.