੧੭੮. ਸੀਹਸੇਨਾਪਤਿਵਤ੍ਥੁਕਥਾ

੨੯੦. ਧਮ੍ਮਸ੍ਸ ਚ ਅਨੁਧਮ੍ਮਨ੍ਤਿ ਏਤ੍ਥ ਧਮ੍ਮਸਦ੍ਦੋ ਕਾਰਣਤ੍ਥੋਤਿ ਆਹ ‘‘ਕਾਰਣਸ੍ਸ ਅਨੁਕਾਰਣ’’ਨ੍ਤਿ. ‘‘ਪਰੇਹੀ’’ਤਿ ਪਦਂ ‘‘ਵੁਤ੍ਤ’’ਇਤਿ ਪਦੇ ਕਤ੍ਤਾ. ‘‘ਵੁਤ੍ਤਕਾਰਣੇਨਾ’’ਤਿਪਦਂ ‘‘ਸਕਾਰਣੋ’’ਤਿਪਦੇ ਕਰਣਂ. ਕੋਚਿ ਅਪ੍ਪਮਤ੍ਤਕੋਪਿ ਤੁਮ੍ਹਾਕਂ ਵਾਦੋਤਿ ਯੋਜਨਾ. ‘‘ਵਿਞ੍ਞੂਹੀ’’ਤਿ ਪਦਂ ‘‘ਗਰਹਿਤਬ੍ਬ’’ਇਤਿ ਪਦੇ ਕਤ੍ਤਾ. ‘‘ਗਰਹਿਤਬ੍ਬਕਾਰਣ’’ਨ੍ਤਿ ਪਦਂ ‘‘ਨ ਆਗਚ੍ਛਤੀ’’ਤਿ ਪਦੇ ਕਮ੍ਮਂ. ਅਨਬ੍ਭਕ੍ਖਾਤੁਕਾਮਾਤਿ ਏਤ੍ਥ ਅਭਿਤ੍ਯੂਪਸਗ੍ਗੋ ਅਭਿਭਵਨਤ੍ਥੋ ਆਪੁਬ੍ਬੋ ਖਾਧਾਤੁ ਪਕਥਨਤ੍ਥੋਤਿ ਆਹ ‘‘ਅਭਿਭਵਿਤ੍ਵਾ ਨ ਆਚਿਕ੍ਖਿਤੁਕਾਮਾ’’ਤਿ.

੨੯੩. ਅਨੁਵਿਚ੍ਚਕਾਰਨ੍ਤਿ ਏਤ੍ਥ ਅਨੁਵਿਚ੍ਚਸਦ੍ਦੋ ਵਿਚਧਾਤੁ ਤ੍ਵਾਪਚ੍ਚਯਨ੍ਤੋਤਿ ਆਹ ‘‘ਅਨੁਵਿਚਿਤ੍ਵਾ’’ਤਿ. ‘‘ਚਿਨ੍ਤੇਤ੍ਵਾ’’ਤਿ ਇਮਿਨਾ ਵਿਚਧਾਤੁਯਾ ਞਾਣਤ੍ਥਂ ਦਸ੍ਸੇਤਿ. ‘‘ਕਾਤਬ੍ਬ’’ਨ੍ਤਿ ਇਮਿਨਾ ਕਾਤਬ੍ਬਨ੍ਤਿ ਕਾਰਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਪਟਾਕਨ੍ਤਿ ਧਜਪਟਾਕਂ. ‘‘ਆਹਿਣ੍ਡੇਯ੍ਯੁ’’ਨ੍ਤਿ ਇਮਿਨਾ ਪਰਿਯਾਯੇਯ੍ਯੁਨ੍ਤਿ ਏਤ੍ਥ ਪਰਿਪੁਬ੍ਬਆਪੁਬ੍ਬ ਯਾਧਾਤੁਯਾ ਗਤ੍ਯਤ੍ਥਂ ਦਸ੍ਸੇਤਿ. ਪਾਲ਼ਿਯਂ ‘‘ਪਰਿਹਰੇਯ੍ਯੁ’’ਨ੍ਤਿਪਿ ਪਾਠੋ. ਆਹਿਣ੍ਡੇਯ੍ਯੁਨ੍ਤਿ ਆਹਿਣ੍ਡਨ੍ਤਿ. ਮੁਦ੍ਧਜੋ ਤਤਿਯਕ੍ਖਰੋ. ਓਪਾਨਭੂਤਨ੍ਤਿ ਏਤ੍ਥ ਓਪਾਨੋ ਵਿਯ ਭੂਤੋ ਓਪਾਨਭੂਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪਟਿਯਤ੍ਤਉਦਪਾਨੋ ਵਿਯ ਠਿਤ’’ਨ੍ਤਿ. ‘‘ਉਦਪਾਨੋ’’ਤਿ ਇਮਿਨਾ ਓਪਾਨਸਦ੍ਦੋ ਉਦਪਾਨਤ੍ਥੋਤਿ ਦਸ੍ਸੇਤਿ. ਉਦਪਾਨੋ ਹਿ ਸਬ੍ਬੇ ਜਨਾ ਓਸਰਿਤ੍ਵਾ ਪਿਵਨ੍ਤਿ ਏਤ੍ਥਾਤਿ ਓਪਾਨੋਤਿ ਵੁਚ੍ਚਤਿ. ਇਮੇਸਨ੍ਤਿ ਨਿਗਣ੍ਠਾਨਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸਮ੍ਪਤ੍ਤਾਨਂ ਦਾਨਂ ਦਾਤਬ੍ਬਮੇਵ, ਤਸ੍ਮਾ ਮਾ ਉਪਚ੍ਛਿਨ੍ਦਿਤ੍ਥਾਤਿ ਯੋਜਨਾ. ਉਦ੍ਦਿਸ੍ਸਾਤਿ ਤ੍ਵਾਪਚ੍ਚਯਨ੍ਤਸਦ੍ਦੋ ‘‘ਕਤ’’ਨ੍ਤਿ ਉਤ੍ਤਰਪਦੇਨ ਸਮਾਸੋਤਿ ਆਹ ‘‘ਉਦ੍ਦਿਸਿਤ੍ਵਾ ਕਤ’’ਨ੍ਤਿ. ਏਸੇਵ ਨਯੋ ‘‘ਪਟਿਚ੍ਚਕਮ੍ਮ’’ਨ੍ਤਿ ਏਤ੍ਥਾਪਿ.

੨੯੪. ਪਟਿਚ੍ਚਕਮ੍ਮਨ੍ਤਿ ਏਤਂ ਨਾਮਂ ਨਿਮਿਤ੍ਤਕਮ੍ਮਸ੍ਸ ਅਧਿਵਚਨਨ੍ਤਿ ਯੋਜਨਾ. ਯੋਤਿ ਯੋ ਕੋਚਿ ਜਨੋ. ਵਧਕਸ੍ਸ ਪਾਣਘਾਤਕਮ੍ਮਂ ਹੋਤਿ ਵਿਯ, ਤਸ੍ਸਾਪਿ ਹੋਤੀਤਿ ਯੋਜਨਾ. ਨ ਜੀਰਨ੍ਤੀਤਿ ਏਤ੍ਥ ਜਰਧਾਤੁ ਗਤ੍ਯਤ੍ਥੋਤਿ ਆਹ ‘‘ਨ ਗਚ੍ਛਨ੍ਤੀ’’ਤਿ.