੧੭੩. ਪਾਟਲਿਗਾਮਵਤ੍ਥੁਕਥਾ

੨੮੫. ਯਥਾ ਸਬ੍ਬਂ ਸਨ੍ਥਤਂ ਹੋਤਿ, ਏਵਂ ਤਥਾ ਸਬ੍ਬਸਨ੍ਥਰਿਸਨ੍ਥਤਨ੍ਤਿ ਯੋਜਨਾ.

੨੮੬. ਸੁਨਿਧੋ ਚ ਵਸ੍ਸਕਾਰੋ ਚਾਤਿ ਏਤ੍ਥ ਚਕਾਰੇਹਿ ਦ੍ਵਨ੍ਦਵਾਕ੍ਯਂ ਦਸ੍ਸੇਤਿ. ਆਯਮੁਖਪਚ੍ਛਿਨ੍ਦਨਤ੍ਥਨ੍ਤਿ ਸੁਙ੍ਕਮੁਖਸ੍ਸ ਪਚ੍ਛੇਦਨਤ੍ਥਂ. ‘‘ਘਰਵਤ੍ਥੂਨੀ’’ਤਿ ਇਮਿਨਾ ਵਤ੍ਥੁਸਦ੍ਦਸ੍ਸ ਕਾਰਣਦਬ੍ਬਤ੍ਥੇ ਪਟਿਕ੍ਖਿਪਿਤ੍ਵਾ ਭੂਭੇਦਤ੍ਥਂ ਦੀਪੇਤਿ. ਤਾ ਦੇਵਤਾ ਨਾਮੇਨ੍ਤਿ ਕਿਰਾਤਿ ਯੋਜਨਾ. ਯਥਾਨੁਰੂਪਨ੍ਤਿ ਯਂ ਯਂ ਭੋਗਬਲਾਨੁਰੂਪਂ. ਲੋਕੇਤਿ ਸਤ੍ਤਲੋਕੇ. ਸਦ੍ਦੋਤਿ ਕਿਤ੍ਤਿਘੋਸੋ. ਤੇਨੇਵਾਤਿ ਤੇਨ ਸਦ੍ਦਸ੍ਸ ਅਬ੍ਭੁਗ੍ਗਤਹੇਤੁਨਾ ਏਵ. ‘‘ਓਸਰਣਟ੍ਠਾਨਂ ਨਾਮਾ’’ਤਿ ਇਮਿਨਾ ਅਰਿਯਂ ਆਯਤਨਨ੍ਤਿ ਏਤ੍ਥ ਆਯਤਨਸਦ੍ਦੋ ਸਮੋਸਰਣਟ੍ਠਾਨਤ੍ਥੋਤਿ ਦਸ੍ਸੇਤਿ. ਯਤ੍ਤਕਂ ਕਯਵਿਕ੍ਕਯਟ੍ਠਾਨਂ ਨਾਮਾਤਿ ਸਮ੍ਬਨ੍ਧੋ. ‘‘ਵਾਣਿਜਾਨਂ…ਪੇ… ਕਯਵਿਕ੍ਕਯਟ੍ਠਾਨਂ ਨਾਮਾ’’ਤਿ ਇਮਿਨਾ ਵਣਿਜਾ ਪਤਨ੍ਤਿ ਸਨ੍ਨਿਪਤਨ੍ਤਿ ਏਤ੍ਥਾਤਿ ਵਣਿਪ੍ਪਤੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਵਣਿਜਪਤੋ’’ਤਿ ਵਤ੍ਤਬ੍ਬੇ ਜਕਾਰਲੋਪੋਤਿ ਦਟ੍ਠਬ੍ਬੋ. ਪਾਲ਼ਿਯਂ ‘‘ਤੇਸ’’ਨ੍ਤਿ ਪਾਠਸੇਸਸ੍ਸ ਅਜ੍ਝਾਹਰਿਤਬ੍ਬਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਤੇਸਂ ਅਰਿਯਾਯਤਨਵਾਣਿਜਪਤਾਨ’’ਨ੍ਤਿ. ਤੇਸਨ੍ਤਿ ਚ ਸਾਮ੍ਯਤ੍ਥੇ ਸਾਮਿਵਚਨਂ, ਨਿਦ੍ਧਾਰਣਤ੍ਥੇ ਵਾ ਵਿਭਤ੍ਤਅਪਾਦਾਨਤ੍ਥੇ ਵਾ. ਇਦਨ੍ਤਿ ਪੁਰਂ. ਪੁਟਭੇਦਨਨ੍ਤਿ ਏਤ੍ਥ ਪੁਟਂ ਭਿਨ੍ਦਨ੍ਤਿ ਏਤ੍ਥਾਤਿ ਪੁਟਭੇਦਨਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਭਣ੍ਡਿਕਭੇਦਨਟ੍ਠਾਨ’’ਨ੍ਤਿ. ‘‘ਸਮੁਚ੍ਚਯਤ੍ਥੋ ਵਾਸਦ੍ਦੋ’’ਤਿ ਵੁਤ੍ਤਵਚਨਂ ਵਿਤ੍ਥਾਰੇਨ੍ਤੋ ਆਹ ‘‘ਤਤ੍ਰ ਹੀ’’ਤਿਆਦਿ. ਤਤ੍ਥ ਤਤ੍ਰਾਤਿ ਪਾਟਲਿਪੁਤ੍ਤੇ, ਤੀਸੁ ਵਾ ਅਗ੍ਗਿਉਦਕਮਿਥੁਭੇਦੇਸੁ. ‘‘ਅਞ੍ਞਮਞ੍ਞਭੇਦਾ’’ਤਿ ਇਮਿਨਾ ਮਿਥੁਭੇਦਾਤਿ ਏਤ੍ਥ ਮਿਥੁਸਦ੍ਦਸ੍ਸ ਅਞ੍ਞਮਞ੍ਞਵੇਵਚਨਭਾਵਂ ਦਸ੍ਸੇਤਿ. ਉਲ਼ੁਮ੍ਪਕੁਲ੍ਲਸਦ੍ਦਾਨਂ ਅਤ੍ਥੇ ਸਮਾਨੇਪਿ ਕਰਣਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਉਲ਼ੁਮ੍ਪ’’ਨ੍ਤਿਆਦਿ. ਉਲ਼ੁ ਵੁਚ੍ਚਤਿ ਉਦਕਂ, ਤਤੋ ਪਾਤਿ ਰਕ੍ਖਤੀਤਿ ਉਲ਼ੁਮ੍ਪੋ. ਕਂ ਵੁਚ੍ਚਤਿ ਉਦਕਂ, ਤਸ੍ਮਿਂ ਉਲਤਿ ਗਚ੍ਛਤੀਤਿ ਕੁਲ੍ਲੋ.

ਅਣ੍ਣਵਨ੍ਤਿ ਏਤ੍ਥ ਅਣ੍ਣਵੋ ਨਾਮ ਕਿਂ ਸਮੁਦ੍ਦਸ੍ਸ ਨਾਮਨ੍ਤਿ ਆਹ ‘‘ਅਣ੍ਣਵ’’ਨ੍ਤਿਆਦਿ. ‘‘ਅਣ੍ਣਵ’’ਨ੍ਤਿ ਏਤਂ ਨਾਮਂ ਉਦਕਟ੍ਠਾਨਸ੍ਸ ਅਧਿਵਚਨਨ੍ਤਿ ਯੋਜਨਾ. ਅਣ੍ਣੋ ਵੁਚ੍ਚਤਿ ਉਦਕਂ, ਤਂ ਏਤਸ੍ਮਿਂ ਅਤ੍ਥੀਤਿ ਅਣ੍ਣਵੋ. ਸਰਸਦ੍ਦਸ੍ਸ ਅਕਾਰਾਦਿਮ੍ਹਿ ਚ ਕਣ੍ਡੇ ਚ ਪਵਤ੍ਤਨਤੋ ਵੁਤ੍ਤਂ ‘‘ਸਰਨ੍ਤਿ ਇਧ ਨਦੀ ਅਧਿਪ੍ਪੇਤਾ’’ਤਿ. ਇਧਾਤਿ ਇਮਿਸ੍ਸਂ ਗਾਥਾਯਂ. ਇਦਨ੍ਤਿ ਅਤ੍ਥਜਾਤਂ.

ਯੇਤਿ ਅਰਿਯਾ. ਤੇਤਿ ਅਰਿਯਾ, ਤਰਨ੍ਤੀਤਿ ਸਮ੍ਬਨ੍ਧੋ. ਵਿਸਜ੍ਜਪਲ੍ਲਲਾਨੀਤਿ ਏਤ੍ਥ ਵਿਸਜ੍ਜਸਦ੍ਦੋ ਤ੍ਵਾਪਚ੍ਚਯਨ੍ਤੋ, ਪਲ੍ਲਲਸਦ੍ਦੋ ਨਿਨ੍ਨਟ੍ਠਾਨਵਾਚਕੋਤਿ ਆਹ ‘‘ਵਿਸਜ੍ਜ…ਪੇ… ਨਿਨ੍ਨਟ੍ਠਾਨਾਨੀ’’ਤਿ. ਅਯਂ ਪਨ ਜਨੋ ਕੁਲ੍ਲਂ ਬਨ੍ਧਤੀਤਿ ਯੋਜਨਾ. ਤਿਣ੍ਣਾ ਮੇਧਾਵਿਨੋ ਜਨਾ ਇਤਿ ਵੁਤ੍ਤਂ ਹੋਤੀਤਿ ਯੋਜਨਾ.

੨੮੭. ਅਨਨੁਬੋਧਾਤਿ ਏਤ੍ਥ ਕਾਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਅਬੁਜ੍ਝਨੇਨਾ’’ਤਿ. ਸਨ੍ਧਾਵਿਤਂ ਸਂਸਰਿਤਨ੍ਤਿ ਏਤ੍ਥ ਤਪਚ੍ਚਯਸ੍ਸ ਕਮ੍ਮਤ੍ਥਂ ਸਨ੍ਧਾਯ ਵੁਤ੍ਤਂ ‘‘ਮਯਾ ਚ ਤੁਮ੍ਹੇਹਿ ਚਾ’’ਤਿ. ਇਮਿਨਾ ਕਤ੍ਤੁਤ੍ਥੇ ਸਾਮਿਵਚਨਨ੍ਤਿ ਦਸ੍ਸੇਤਿ. ‘‘ਅਥ ਵਾ’’ਤਿਆਦਿਨਾ ਤਪਚ੍ਚਯਸ੍ਸ ਭਾਵਤ੍ਥਂ ਦਸ੍ਸੇਤਿ. ਸਂਸਿਤਨ੍ਤਿ ਏਤ੍ਥ ਸਰਧਾਤੁਯਾ ਰਕਾਰੋ ਲੋਪੋਤਿ ਆਹ ‘‘ਸਂਸਰਿਤ’’ਨ੍ਤਿ. ‘‘ਤਣ੍ਹਾਰਜ੍ਜੂ’’ਤਿ ਇਮਿਨਾ ਭਵਤੋ ਭਵਂ ਨੇਤੀਤਿ ਭਵਨੇਤ੍ਤੀਤਿ ਵਚਨਤ੍ਥੇਨ ਤਣ੍ਹਾਰਜ੍ਜੁ ਭਵਨੇਤ੍ਤਿ ਨਾਮਾਤਿ ਦਸ੍ਸੇਤਿ.

੨੮੯. ਵਣ੍ਣਵਤ੍ਥਾਲਙ੍ਕਾਰਾਨਿ ਸਾਮਞ੍ਞਵਸੇਨ ‘‘ਨੀਲਾ’’ਤਿ ਵੁਤ੍ਤਾਨੀਤਿ ਆਹ ‘‘ਨੀਲਾਤਿ ਇਦਂ ਸਬ੍ਬਸਙ੍ਗਾਹਕ’’ਨ੍ਤਿ. ਤਤ੍ਥਾਤਿ ‘‘ਨੀਲਾ’’ਤਿਆਦਿਪਾਠੇ. ਤੇਸਨ੍ਤਿ ਲਿਚ੍ਛਵੀਨਂ. ਪਕਤਿਵਣ੍ਣਾ ਨੀਲਾ ਨ ਹੋਨ੍ਤੀਤਿ ਯੋਜਨਾ. ਏਤਨ੍ਤਿ ‘‘ਨੀਲਾ’’ਤਿਆਦਿਵਚਨਂ. ਪਟਿਵਤ੍ਤੇਸੀਤਿ ਏਤ੍ਥ ਵਤੁਧਾਤੁ ਉਪਸਗ੍ਗਵਸੇਨ ਵਾ ਅਤ੍ਥਾਤਿਸਯਵਸੇਨ ਵਾ ਪਹਰਣਤ੍ਥੋਤਿ ਆਹ ‘‘ਪਹਾਰੇਸੀ’’ਤਿ. ‘‘ਸਜਨਪਦ’’ਨ੍ਤਿ ਇਮਿਨਾ ਸਾਹਾਰਨ੍ਤਿ ਏਤ੍ਥ ਆਹਾਰਸਦ੍ਦੋ ਜਨਪਦਤ੍ਥੋਤਿ ਦਸ੍ਸੇਤਿ. ਜਨਪਦੋ ਹਿ ਯਸ੍ਮਾ ਨਗਰਸ੍ਸ ਪਰਿਵਾਰਭਾਵੇਨ ਆਹਰਿਤਬ੍ਬੋ, ਇਮਸ੍ਮਾ ਚ ਰਾਜਪੁਰਿਸਾ ਬਲਿਂ ਆਹਰਨ੍ਤਿ, ਤਸ੍ਮਾ ਆਹਾਰੋਤਿ ਵੁਤ੍ਤੋ. ਸਜਨਪਦਂ ਵੇਸਾਲਿਂ ਦਜ੍ਜੇਯ੍ਯਾਥਾਤਿ ਯੋਜਨਾ. ਅਙ੍ਗੁਲਿਂ ਫੋਟੇਸੁਨ੍ਤਿ ਏਤ੍ਥ ਫੁਟਧਾਤੁ ਸਞ੍ਚਲਨਤ੍ਥੋਤਿ ਆਹ ‘‘ਅਙ੍ਗੁਲਿਂ ਚਾਲੇਸੁ’’ਨ੍ਤਿ. ਇਤ੍ਥਿਕਾਯਾਤਿ ਇਤ੍ਥੀਯੇਵ ਪੁਰਿਸਤੋ ਖੁਦ੍ਦਕਟ੍ਠੇਨ ਇਤ੍ਥਿਕਾ, ਤਾਯ.