੧੭੦. ਯਾਗੁਮਧੁਗੋਲ਼ਕਾਦਿਕਥਾ

੨੮੨. ਏਕਕੋਤਿ ਏਤ੍ਥ ਏਕਤੋ ਅਸਹਾਯਤ੍ਥੇ ਕਪਚ੍ਚਯੋਤਿ ਆਹ ‘‘ਨਤ੍ਥਿ ਮੇ ਦੁਤਿਯੋ’’ਤਿ. ਸੋਤਿ ਬ੍ਰਾਹ੍ਮਣੋ. ਵਯਂ ਕਤ੍ਵਾਤਿ ਪਰਿਬ੍ਬਯਂ ਕਤ੍ਵਾ, ਪਟਿਯਾਦਾਪੇਸਿ ਕਿਰਾਤਿ ਯੋਜਨਾ. ਅਨੁਮੋਦਨਗਾਥਾਯਾਤਿ ਅਨੁਮੋਦਨਪਕਾਸਕਾਯ ਗਾਥਾਯ. ‘‘ਪਤ੍ਥਯਤਂ ਇਚ੍ਛਤ’’ਨ੍ਤਿ ਪਦਾਨਂ ਅਲਮਤ੍ਥਪਯੋਗੇ ਸਮ੍ਪਦਾਨਤ੍ਤਾ ਵੁਤ੍ਤਂ ‘‘ਅਲਮੇਵ ਦਾਤੁਨ੍ਤਿ ਇਮਿਨਾ ਸਮ੍ਬਨ੍ਧੋ’’ਤਿ. ਸੋਯੇਵ ਗਹੇਤਬ੍ਬੋਤਿ ‘‘ਦਾਤੁ’’ਨ੍ਤਿਭਾਵਸ੍ਸ ਕਤ੍ਤੁਭਾਵੇਨ ਸੋ ਏਵ ਪਾਠੋ ਗਹੇਤਬ੍ਬੋਤਿ ਅਤ੍ਥੋ.

੨੮੩. ਯਾ ਯਾਗੁ ਪਵਾਰਣਂ ਜਨੇਤਿ, ਸਾ ਯਾਗੁ ਭੋਜ੍ਜਯਾਗੁ ਨਾਮਾਤਿ ਯੋਜਨਾ. ਯਨ੍ਤਿ ਕਾਲਂ. ‘‘ਆਦਿਂ ਕਤ੍ਵਾ’’ਤਿ ਇਮਿਨਾ ਯਦਗ੍ਗੇਨਾਤਿ ਏਤ੍ਥ ਅਗ੍ਗਸਦ੍ਦੋ ਆਦ੍ਯਤ੍ਥੋ ਕਿਰਿਯਾਵਿਸੇਸਨਤ੍ਥੇ ਕਰਣਵਚਨਨ੍ਤਿ ਦਸ੍ਸੇਤਿ. ‘‘ਸਗ੍ਗਨਿਬ੍ਬਤ੍ਤਕਪੁਞ੍ਞ’’ਨ੍ਤਿ ਇਮਿਨਾ ਸਗ੍ਗਾਤਿ ਏਤ੍ਥ ਫਲੂਪਚਾਰਂ ਦਸ੍ਸੇਤਿ. ਸੋਤਿ ਗੁਲ਼ੋ.

੨੮੪. ਤਥਾਰੂਪੇਨਾਤਿ ਤਥਾਸਭਾਵੇਨ. ਗੁਲ਼ਸ੍ਸ ਅਨੁਰੂਪਸਭਾਵੇਨਾਤਿ ਅਤ੍ਥੋ.