੧੬੭. ਸਤ੍ਥਕਮ੍ਮਪਟਿਕ੍ਖੇਪਕਥਾ

੨੭੯. ਦੁਕ੍ਖੇਨ ਰੁਪਤੀਤਿ ਦੁਰੋਪਯੋਤਿ ਦਸ੍ਸੇਨ੍ਤੋ ਆਹ ‘‘ਦੁਕ੍ਖੇਨ ਰੁਹਤੀ’’ਤਿ. ਸਤ੍ਥਕਮ੍ਮਂ ਵਾ ਵਤ੍ਥਿਕਮ੍ਮਂ ਵਾਤਿ ਏਤ੍ਥ ਸਤ੍ਥੇਨ ਕਾਤਬ੍ਬਂ ਕਮ੍ਮਂ ਸਤ੍ਥਕਮ੍ਮਂ, ਵਤ੍ਥਿਪੀਲ਼ਨਂ ਕਾਤਬ੍ਬਂ ਕਮ੍ਮਂ ਵਤ੍ਥਿਕਮ੍ਮਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਥਾ ਪਟਿਚ੍ਛਨ੍ਨੇ’’ਤਿਆਦਿ. ‘‘ਸੂਚਿਯਾ ਵਾ’’ਤਿਆਦਿਨਾ ਸਤ੍ਥਕਮ੍ਮਨ੍ਤਿ ਏਤ੍ਥ ‘‘ਸਤ੍ਥ’’ਨ੍ਤਿ ਪਦਂ ਉਪਲਕ੍ਖਣਮਤ੍ਤਨ੍ਤਿ ਦਸ੍ਸੇਤਿ. ‘‘ਸਤ੍ਥੇਨ ਵਾ’’ਤਿ ਪਦਂ ‘‘ਛਿਨ੍ਦਨਂ ਵਾ ਫਾਲਨਂ ਵਾ’’ਤਿਪਦੇਹਿ ਯੋਜੇਤਬ੍ਬਂ. ‘‘ਸੂਚਿਯਾ ਵਾ ਕਣ੍ਟਕੇਨ ਵਾ ਸਤ੍ਤਿਕਾਯ ਵਾ’’ਤਿਪਦਾਨਿ ‘‘ਵਿਜ੍ਝਨਂ ਵਾ’’ਤਿ ਪਦੇਨ ਯੋਜੇਤਬ੍ਬਾਨਿ. ‘‘ਪਾਸਾਣਸਕ੍ਖਲਿਕਾਯ ਵਾ ਨਖੇਨ ਵਾ’’ਤਿ ਪਦਾਨਿ ‘‘ਲੇਖਨਂ ਵਾ’’ਤਿ ਪਦੇਨ ਯੋਜੇਤਬ੍ਬਾਨਿ. ਏਤਨ੍ਤਿ ਸਤ੍ਥੇਨ ਛਿਨ੍ਦਨਾਦਿਕਮ੍ਮਂ. ਏਤ੍ਥ ਚਾਤਿ ਸਤ੍ਥਕਮ੍ਮਵਤ੍ਥਿਕਮ੍ਮੇਸੁ. ਤਤ੍ਥ ਪਨਾਤਿ ਸਮ੍ਬਾਧੇ ਪਨ. ਤੇਨਾਤਿ ਖਾਰਾਦਿਨਾ. ਵਚ੍ਚਮਗ੍ਗੇ ਯਾਯ ਭੇਸਜ੍ਜਮਕ੍ਖਿਤਾਦਾਨਵਟ੍ਟਿਯਾ ਖਾਰਕਮ੍ਮਂ ਵਾ ਕਰੋਨ੍ਤਿ, ਯਾਯ ਵੇਲ਼ੁਨਾਲ਼ਿਕਾਯ ਤੇਲਂ ਵਾ ਪਵੇਸੇਨ੍ਤਿ, ਸਾ ਭੇਸਜ੍ਜਮਕ੍ਖਿਤਾਦਾਨਵਟ੍ਟਿ ਵਾ ਸਾ ਵੇਲ਼ੁਨਾਲ਼ਿਕਾ ਵਾ ਵਟ੍ਟਤਿਯੇਵਾਤਿ ਯੋਜਨਾ.

੨੮੦. ਤਂ ਦਿਵਸਨ੍ਤਿ ਤਸ੍ਮਿਂ ਦਿਵਸੇ. ਕਿਞ੍ਚਿ ਸਤ੍ਥਨ੍ਤਿ ਯੋਜਨਾ. ਇਮਾਯਾਤਿ ਸੁਪ੍ਪਿਯਾਯ ਅਞ੍ਞਂ ਕਿਞ੍ਚਿ ਅਦੇਯ੍ਯਂ ਕਿਮ੍ਪਿ ਭਵਿਸ੍ਸਤੀਤਿ ਯੋਜਨਾ. ਯਤ੍ਰ ਨਾਮਾਤਿ ਏਤ੍ਥ ਤ੍ਰਪਚ੍ਚਯੋ ਕਾਰਣਤ੍ਥੇ ਹੋਤੀਤਿ ਆਹ ‘‘ਯਸ੍ਮਾ ਨਾਮਾ’’ਤਿ. ‘‘ਵੀਮਂਸੀ’’ਤਿ ਇਮਿਨਾ ਪਟਿਵੇਕ੍ਖੀਤਿ ਏਤ੍ਥ ਪਟਿਅਵਪੁਬ੍ਬੋ ਇਕ੍ਖਧਾਤੁ ਵੀਮਂਸਨਤ੍ਥੋਤਿ ਦਸ੍ਸੇਤਿ. ਅਸੁਕਮਂਸਨ੍ਤਿ ਅਸੁਕਂ ਮਂਸਂ, ਅਸੁਕਸ੍ਸ ਵਾ ਸਤ੍ਤਸ੍ਸ ਮਂਸਂ.