੧੬੩. ਗੁਲ਼ਾਦਿਅਨੁਜਾਨਨਕਥਾ

੨੭੨. ਹੀਤਿ ਸਚ੍ਚਂ. ਪਕ੍ਕਤ੍ਤਾਤਿ ਮੁਗ੍ਗਾਨਂ ਪਕ੍ਕਭਾਵਤੋ. ਤੇਤਿ ਮੁਗ੍ਗਾ.

੨੭੪. ਅਕਪ੍ਪਿਯਕੁਟਿਯਨ੍ਤਿ ਅਕਪ੍ਪਿਯਕੁਟਿਯਾ ਅਨ੍ਤੋ. ਅਸ੍ਸਾਤਿ ਭਿਕ੍ਖੁਨੋ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਤਮ੍ਪੀਤਿ ਉਣ੍ਹਯਾਗੁਮ੍ਪਿ. ਪਿਸਦ੍ਦੇਨ ਪਗੇਵ ਆਮਿਸਂ ਪਚਿਤੁਨ੍ਤਿ ਦਸ੍ਸੇਤਿ. ਉਤ੍ਤਣ੍ਡੁਲਭਤ੍ਤਨ੍ਤਿ ਪਕ੍ਕਤਣ੍ਡੁਲਤੋ ਵਿਯੋਗੋਤਿ ਉਤ੍ਤਣ੍ਡੁਲੋ, ਉਕਾਰੋ ਹਿ ਵਿਯੋਗਤ੍ਥਵਾਚਕੋ, ਅਪਕ੍ਕਤਣ੍ਡੁਲੋਤਿ ਅਤ੍ਥੋ. ਉਤ੍ਤਣ੍ਡੁਲਮਯਂ ਭਤ੍ਤਨ੍ਤਿ ਉਤ੍ਤਣ੍ਡੁਲਭਤ੍ਤਂ. ਸਕਿਂ ਕੁਥਿਤੇਸੁ ਖੀਰਤਕ੍ਕਾਦੀਸੁ ਅਗ੍ਗਿਂ ਦਾਤੁਂ ਵਟ੍ਟਤੀਤਿ ਯੋਜਨਾ. ਬਿਲ਼ਾਲਾਦੀਨਂ ਸਤ੍ਤਾਨਂ ਸਮੂਹੋ ਰੂਲ਼੍ਹੀਵਸੇਨ ਉਕ੍ਕਪਿਣ੍ਡਕੋਤਿ ਵੁਚ੍ਚਤੀਤਿ ਆਹ ‘‘ਬਿਲ਼ਾਲਮੂਸਿਕਗੋਧਾਮਙ੍ਗੁਸਾ’’ਤਿ. ਵਿਘਾਸਾਦਭਾਵੇਨ ਨਿਹਤਮਾਨਤ੍ਤਾ ਕਾਯਵਾਚਂ ਦਮੇਤੀਤਿ ਦਮਕੋ ਵਿਘਾਸਾਦੋਤਿ ਆਹ ‘‘ਵਿਘਾਸਾਦਾ’’ਤਿ.

੨੭੬. ਤਤੋ ਨੀਹਟਨ੍ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਯਤ੍ਥਾ’’ਤਿਆਦਿ. ਯਤ੍ਥਾਤਿ ਯਸ੍ਮਿਂ ਠਾਨੇ. ਨੀਹਟਨ੍ਤਿ ਨੀਹਰਿਤ੍ਵਾ ਹਰਿਤਂ.

੨੭੮. ਵਨਟ੍ਠਂ ਪੋਕ੍ਖਰਟ੍ਠਨ੍ਤਿ ਏਤ੍ਥ ਵਨੇ ਤਿਟ੍ਠਤੀਤਿ ਵਨਟ੍ਠੋ, ਪੋਕ੍ਖਰੇ ਤਿਟ੍ਠਤੀਤਿ ਪੋਕ੍ਖਰਟ੍ਠੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਵਨੇ ਚੇਵਾ’’ਤਿਆਦਿ. ‘‘ਪਦੁਮਿਨਿਗਚ੍ਛੇ’’ਤਿ ਇਮਿਨਾ ਪੋਕ੍ਖਰਸਦ੍ਦੋ ਪਦੁਮਵਾਚਕੋਤਿ ਦਸ੍ਸੇਤਿ. ਯਸ੍ਸ ਬੀਜਂ ਅਙ੍ਕੁਰਂ ਨ ਜਨੇਤਿ, ਤਂ ਫਲਂ ਅਬੀਜਂ ਨਾਮਾਤਿ ਯੋਜਨਾ.