੧੬੦. ਪਞ੍ਚਭੇਸਜ੍ਜਾਦਿਕਥਾ

੨੬੦. ਭੇਸਜ੍ਜਕ੍ਖਨ੍ਧਕੇ ਸਰਦਕਾਲੇ ਉਪ੍ਪਨ੍ਨੋ ਸਾਰਦਿਕੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਰਦਕਾਲੇ ਉਪ੍ਪਨ੍ਨੇਨਾ’’ਤਿ. ‘‘ਪਿਤ੍ਤਾਬਾਧੇਨਾ’’ਤਿ ਇਮਿਨਾ ਆਬਾਧਸ੍ਸ ਸਰੂਪਂ ਦਸ੍ਸੇਤਿ. ਪਿਤ੍ਤਾਬਾਧਸ੍ਸ ਕਾਰਣਂ ਵਿਤ੍ਥਾਰੇਨ੍ਤੋ ਆਹ ‘‘ਤਸ੍ਮਿਂ ਹੀ’’ਤਿਆਦਿ. ਤੇਨਾਤਿ ਹੇਤੁਨਾ. ਤੇਸਨ੍ਤਿ ਭਿਕ੍ਖੂਨਂ. ਕੋਟ੍ਠਬ੍ਭਨ੍ਤਰਗਤਨ੍ਤਿ ਕੋਟ੍ਠਸ੍ਸ ਅਬ੍ਭਨ੍ਤਰਂ ਗਤਂ. ਅਨ੍ਤਸ੍ਸ ਅਨ੍ਤੋ ਪਵਿਸਨਂ ਹੋਤੀਤਿ ਅਧਿਪ੍ਪਾਯੋ. ਆਹਾਰਤ੍ਥਨ੍ਤਿ ਆਹਾਰਸ੍ਸ ਕਿਚ੍ਚਂ, ਆਹਾਰੇਨ ਵਾ ਕਤ੍ਤਬ੍ਬਂ ਕਿਚ੍ਚਂ.

੨੬੧. ਨਚ੍ਛਾਦੇਨ੍ਤੀਤਿ ਤਾਨਿ ਭੇਸਜ੍ਜਾਨਿ ਭੋਜਨਾਨਿ ਨਚ੍ਛਾਦੇਨ੍ਤਿ. ਕਸ੍ਮਾ? ਭੋਜਨਾਨਂ ਅਜੀਰਣਤ੍ਤਾ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਨ ਜੀਰਨ੍ਤੀ’’ਤਿ. ਨਚ੍ਛਾਦਤ੍ਤਾ ਨ ਵਾਤਰੋਗਂ ਪਟਿਪ੍ਪਸ੍ਸਮ੍ਭੇਤੁਂ ਸਕ੍ਕੋਨ੍ਤਿ. ਏਤ੍ਥ ਚ ‘‘ਨ ਜੀਰਨ੍ਤੀ’’ਤਿ ਇਮਿਨਾ ਨਚ੍ਛਾਦਨਸ੍ਸ ਕਾਰਣਂ ਦਸ੍ਸੇਤਿ. ‘‘ਨ ਵਾਤ…ਪੇ… ਸਕ੍ਕੋਨ੍ਤੀ’’ਤਿ ਇਮਿਨਾ ਤਸ੍ਸੇਵ ਫਲਂ ਦਸ੍ਸੇਤੀਤਿ ਦਟ੍ਠਬ੍ਬਂ. ‘‘ਸਿਨਿਦ੍ਧਾਨੀ’’ਤਿ ਇਮਿਨਾ ਸਿਨਿਹਨ੍ਤੀਤਿ ਸੇਨੇਹਿਕਾਨੀਤਿ ਅਤ੍ਥਂ ਦਸ੍ਸੇਤਿ. ਭਤ੍ਤਚ੍ਛਨ੍ਨਕੇਨਾਤਿ ਏਤ੍ਥ ਭਤ੍ਤਸ੍ਸ ਅਚ੍ਛਨ੍ਨਕਂ ਨਾਮ ਭਤ੍ਤਸ੍ਸ ਅਰੋਚਿਕਂ ਭਤ੍ਤਸ੍ਸ ਰੁਚਿਯਾ ਅਨੁਪ੍ਪਾਦਕਨ੍ਤਿ ਆਹ ‘‘ਭਤ੍ਤਾਰੋਚਕੇਨਾ’’ਤਿ.

੨੬੨. ਅਚ੍ਛਵਸਨ੍ਤਿਆਦੀਸੁ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਪਾਲ਼ਿਯਂ ‘‘ਪਟਿਗ੍ਗਹਿਤਂ ਨਿਪ੍ਪਕ੍ਕਂ ਸਂਸਟ੍ਠ’’ਨ੍ਤਿ ਪਦਾਨਂ ਕਿਰਿਯਾਵਿਸੇਸਨਂ ਕਤ੍ਵਾ ‘‘ਪਰਿਭੁਞ੍ਜਿਤੁ’’ਨ੍ਤਿ ਪਦੇਨ ਸਮ੍ਬਨ੍ਧਿਤਬ੍ਬਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਕਾਲੇ ਪਟਿਗ੍ਗਹਿਤਨ੍ਤਿ ਆਦੀਸੂ’’ਤਿਆਦਿ. ਤੇਲਪਰਿਭੋਗੇਨ ਪਰਿਭੁਞ੍ਜਿਤੁਨ੍ਤਿ ਏਤ੍ਥ ਕਿਤ੍ਤਕਂ ਕਾਲਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤਬ੍ਬਨ੍ਤਿ ਆਹ ‘‘ਸਤ੍ਤਾਹਕਾਲ’’ਨ੍ਤਿ.