੧੧੪. ਸਙ੍ਘਭੇਦੇ ਅਨਾਪਤ੍ਤਿਵਸ੍ਸਚ੍ਛੇਦਕਥਾ

੨੦੨. ਭਿਨ੍ਨੋਤਿ ਏਤ੍ਥ ਤਪਚ੍ਚਯਸ੍ਸ ਅਤੀਤਤ੍ਥੇ ਅਯੁਤ੍ਤਭਾਵਂ ਦਸ੍ਸੇਨ੍ਤੋ ਆਹ ‘‘ਭਿਨ੍ਨੇ ਸਙ੍ਘੇ ਕਰਣੀਯਂ ਨਤ੍ਥੀ’’ਤਿ. ਯੋ ਪਨਾਤਿ ਸਙ੍ਘੋ ਪਨ. ਇਦਂ ‘‘ਭਿਜ੍ਜਿਸ੍ਸਤੀ’’ਤਿਪਦੇ ਕਤ੍ਤਾ, ‘‘ਆਸਙ੍ਕਿਤੋ’’ਤਿਪਦੇ ਕਮ੍ਮਂ. ‘‘ਭਿਜ੍ਜਿਸ੍ਸਤੀ’’ਤਿ ਇਮਿਨਾ ਭਿਨ੍ਨੋਤਿ ਏਤ੍ਥ ਤਪਚ੍ਚਯਸ੍ਸ ਅਨਾਗਤਤ੍ਥੇ ਪਵਤ੍ਤਭਾਵਂ ਦਸ੍ਸੇਤਿ. ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋਤਿ ਏਤ੍ਥ ਕਿਂ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋਤਿ ਦਟ੍ਠਬ੍ਬੋਤਿ ਆਹ ‘‘ਨ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋਤਿ ਦਟ੍ਠਬ੍ਬੋ’’ਤਿ. ਏਤਨ੍ਤਿ ਭਿਕ੍ਖੁਨੀਹਿ ਅਭਿਨ੍ਨਭਾਵਂ. ਏਤਾ ਪਨਾਤਿ ਭਿਕ੍ਖੁਨਿਯੋ ਪਨ. ਤਨ੍ਤਿ ਸਙ੍ਘਂ. ਏਤਨ੍ਤਿ ‘‘ਸਮ੍ਬਹੁਲਾਹਿ ਭਿਕ੍ਖੁਨੀਹਿ ਸਙ੍ਘੋ ਭਿਨ੍ਨੋ’’ਤਿ ਵਚਨਂ.