੧੧੦. ਪਞ੍ਚਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਕਥਾ

੧੯੩. ਪਗੇਵ ਪਹਿਤੇਤਿ ਇਮਿਨਾ ‘‘ਅਪਹਿਤੇਪਿ ਗਨ੍ਤਬ੍ਬ’’ਨ੍ਤਿ ਏਤ੍ਥ ਪਿਸਦ੍ਦਸ੍ਸ ਸਮ੍ਭਾਵਨਤ੍ਥਂ ਦਸ੍ਸੇਤਿ. ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਸਨ੍ਤਿਕਂ ਗਨ੍ਤਬ੍ਬਭਾਵਸ੍ਸ ਕਾਰਣਂ ਵਿਭਜਿਤ੍ਵਾ ਦਸ੍ਸੇਨ੍ਤੋ ਆਹ ‘‘ਭਿਕ੍ਖੁ ਗਿਲਾਨੋ ਹੋਤੀ’’ਤਿਆਦਿ. ਦਸਹੀਤਿ ‘‘ਸਙ੍ਘੋ ਕਮ੍ਮਂ ਕਤ੍ਤੁਕਾਮੋ ਹੋਤਿ, ਕਤਂ ਵਾ ਸਙ੍ਘੇਨ ਕਮ੍ਮਂ ਹੋਤੀ’’ਤਿ ਇਦਂ ਅਙ੍ਗਂ ਏਕਂ ਕਤ੍ਵਾ ਦਸਹਿ. ਨਵਹੀਤਿ ਪਰਿਵਾਸਾਰਹਂ ਅਪਨੇਤ੍ਵਾ ਨਵਹਿ. ਚਤੂਹੀਤਿ ਗਿਲਾਨਅਨਭਿਰਤਿਕੁਕ੍ਕੁਚ੍ਚਦਿਟ੍ਠਿਗਤਉਪ੍ਪਨ੍ਨਸਙ੍ਖਾਤੇਹਿ ਚਤੂਹਿ. ਇਤਿ ਇਮੇਹਿ ਛਹੀਤਿ ਯੋਜਨਾ. ਸਾਮਣੇਰਸ੍ਸਪਿ ਛਹੀਤਿ ਏਤ੍ਥ ਛਨ੍ਨਂ ਸਰੂਪਂ ਵਿਤ੍ਥਾਰੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਆਦਿਤੋ’’ਤਿਆਦਿ. ਤਂ ਸੁਵਿਞ੍ਞੇਯ੍ਯਮੇਵ. ਸਾਮਣੇਰਿਯਾ ਸਨ੍ਤਿਕਂ ਪਞ੍ਚਹਿ ਗਨ੍ਤਬ੍ਬਨ੍ਤਿ ਯੋਜਨਾ. ਪਰਤੋਤਿ ਪਰਸ੍ਮਾ, ਪਰਸ੍ਮਿਂ ਵਾ. ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯੇ ਞਾਤਕਾ ਵਾ ਯੇ ਅਞ੍ਞਾਤਕਾ ਵਾ ਅਤ੍ਥਿ, ਤੇਸਮ੍ਪੀਤਿ ਯੋਜਨਾ. ਤਨ੍ਤਿ ਵਚਨਂ.