੮੭. ਪਾਰਿਸੁਦ੍ਧਿਦਾਨਕਥਾ

੧੬੪. ਯੇਨ ਕੇਨਚਿ ਅਙ੍ਗਪਚ੍ਚਙ੍ਗੇਨ ਵਿਞ੍ਞਾਪੇਤੀਤਿ ਪਟਿਵਚਨਂ ਨਿਚ੍ਛਾਰੇਤੁਮਸਕ੍ਕੋਨ੍ਤੋ ਯੇਨ ਕੇਨਚਿ ਅਙ੍ਗਪਚ੍ਚਙ੍ਗੇਨ ਵਿਞ੍ਞਾਪੇਤਿ. ਉਭਯਥਾਤਿ ਉਭਯੇਹਿ ਕਾਯਵਾਚਾਸਙ੍ਖਾਤੇਹਿ ਆਕਾਰੇਹਿ. ਕਾਯਵਾਚਾਹਿ ਵਿਞ੍ਞਾਪੇਤੀਤਿ ਸਮ੍ਬਨ੍ਧੋ. ਸਬ੍ਬੇਤਿ ਅਖਿਲਾ ਗਿਲਾਨਾ. ਹਤ੍ਥਪਾਸੇਤਿ ਸਙ੍ਘਸ੍ਸ ਹਤ੍ਥਪਾਸਮ੍ਹਿ. ਸਚੇ ਦੂਰੇ ਹੋਨ੍ਤੀਤਿ ਸਚੇ ਬਹੂ ਗਿਲਾਨਾ ਅਞ੍ਞਮਞ੍ਞਂ ਦੂਰੇ ਹੋਨ੍ਤਿ. ਤਂ ਦਿਵਸਨ੍ਤਿ ਤਸ੍ਮਿਂ ਸਙ੍ਘਅਪ੍ਪਹੋਨਕਦਿਵਸੇ.

ਤਤ੍ਥੇਵ ਪਕ੍ਕਮਤੀਤਿ ਏਤ੍ਥ ਨਿਸ੍ਸਕ੍ਕਤ੍ਥੇ ਥਪਚ੍ਚਯੋਤਿ ਆਹ ‘‘ਤਤੋਵਾ’’ਤਿ, ਪਾਰਿਸੁਦ੍ਧਿਹਾਰਟ੍ਠਾਨਤੋ ਏਵਾਤਿ ਅਤ੍ਥੋ. ‘‘ਗਚ੍ਛਤੀ’’ਤਿ ਇਮਿਨਾ ਕਮੁਧਾਤੁਯਾ ਪਦਵਿਕ੍ਖੇਪਤ੍ਥਂ ਦਸ੍ਸੇਤਿ, ‘‘ਕਤ੍ਥਚੀ’’ਤਿ ਇਮਿਨਾ ਤਸ੍ਸ ਕਮ੍ਮਂ. ਸਾਮਣੇਰੋ ਪਟਿਜਾਨਾਤੀਤਿਆਦੀਸੁ ਪਟਿਜਾਨਨਾਕਾਰਤ੍ਥਸ੍ਸ ਇਤਿਸਦ੍ਦਸ੍ਸ ਲੋਪਭਾਵਂ ਦਸ੍ਸੇਨ੍ਤੋ ਆਹ ‘‘ਸਾਮਣੇਰੋ ਅਹ’’ਨ੍ਤਿ ਏਵਂ ਪਟਿਜਾਨਾਤੀ’’ਤਿਆਦਿ. ਭੂਤਂਯੇਵਾਤਿ ਵਿਜ੍ਜਮਾਨਂਯੇਵ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਸਿਕ੍ਖਂ ਪਚ੍ਚਕ੍ਖਾਤਕੋ ਪਟਿਜਾਨਾਤੀ’’ਤਿਆਦੀਸੁ.

ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੁਨ੍ਨਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਸਙ੍ਘਪ੍ਪਤ੍ਤੋ ਵਿਬ੍ਭਮਤੀ’’ਤਿਆਦੀਸੁ. ਏਤ੍ਥਾਤਿ ਪਾਰਿਸੁਦ੍ਧਿਹਰਣੇ. ਬਹੂਨਮ੍ਪੀਤਿ ਏਤ੍ਥ ਪਿਸਦ੍ਦੇਨ ਏਕੇਨ ਏਕਸ੍ਸਾਪਿ, ਬਹੂਹਿ ਏਕਸ੍ਸਾਪਿ, ਬਹੂਹਿ ਬਹੂਨਮ੍ਪਿ ਆਹਟਾ ਪਾਰਿਸੁਦ੍ਧਿ ਆਹਟਾਵ ਹੋਤੀਤਿ ਦਸ੍ਸੇਤਿ. ਸੋਤਿ ਪਾਰਿਸੁਦ੍ਧਿਹਾਰਕੋ ਭਿਕ੍ਖੁ. ਯੇਸਨ੍ਤਿ ਭਿਕ੍ਖੂਨਂ. ਤਸ੍ਸੇਵਾਤਿ ਪਾਰਿਸੁਦ੍ਧਿਹਾਰਕਸ੍ਸੇਵ. ਇਤਰਾ ਪਨਾਤਿ ਇਤਰੇਸਂ ਪਾਰਿਸੁਦ੍ਧਿ ਪਨ. ਬਿਲ਼ਾਲਸਙ੍ਖਲਿਕਾਤਿ ਏਤ੍ਥ ਬਿਲ਼ਾਲੋਤਿ ਆਖੁਭੁਜੋ. ਸੋ ਹਿ ਬਿਲ਼ਾਸਯਂ ਆਖੁਂ ਗਣ੍ਹਿਤੁਂ ਅਲਤਿ ਸਮਤ੍ਥੇਤੀਤਿ ਬਿਲ਼ਾਲੋਤਿ ਵੁਚ੍ਚਤਿ. ਸਙ੍ਖਲਿਕਾਤਿ ਏਤਂ ਸਤ੍ਤਾਨਂ ਬਨ੍ਧਨੂਪਕਰਣਵਿਸੇਸਸ੍ਸ ਨਾਮਂ. ਬਿਲ਼ਾਲਸ੍ਸ ਸਙ੍ਖਲਿਕਾ ਤੇਨ ਸਮ੍ਬਨ੍ਧਸਮ੍ਬਨ੍ਧਿਭਾਵੇਨ ਸਮ੍ਬਨ੍ਧਤ੍ਤਾਤਿ ਬਿਲ਼ਾਲਸਙ੍ਖਲਿਕਾ. ਇਦਂ ਉਪਲਕ੍ਖਣਮਤ੍ਤਂ ਯੇਸਂ ਕੇਸਞ੍ਚਿ ਸਙ੍ਖਲਿਕਾਯ ਗਹੇਤਬ੍ਬਤ੍ਤਾ. ਤਾਯ ਸਦਿਸਾ ਬਿਲ਼ਾਲਸਙ੍ਖਲਿਕਾ ਪਾਰਿਸੁਦ੍ਧੀਤਿ ਅਤ੍ਥੋ. ਇਦਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਯਥਾ ਸਙ੍ਖਲਿਕਾਯ ਪਠਮਂ ਵਲਯਂ ਦੁਤਿਯਂਯੇਵ ਵਲਯਂ ਪਾਪੁਣਾਤਿ, ਨ ਤਤਿਯਂ, ਏਵਮੇਵ ਪਠਮਂ ਦਿਨ੍ਨਾ ਪਾਰਿਸੁਦ੍ਧਿ ਦੁਤਿਯਮੇਵ ਪਾਪੁਣਾਤਿ, ਨ ਤਤਿਯਨ੍ਤਿ.

ਆਗਨ੍ਤ੍ਵਾਤਿ ਸਙ੍ਘਸ੍ਸ ਹਤ੍ਥਪਾਸਂ ਆਗਨ੍ਤ੍ਵਾ. ਪਾਲ਼ਿਯਂ ਸੁਤ੍ਤੋ ਨ ਆਰੋਚੇਤੀਤਿਆਦੀਸੁ ਹੇਤ੍ਵਤ੍ਥੇ ਪਚ੍ਚਤ੍ਤਵਚਨਂ. ਸੁਤ੍ਤੇਨ ਨਾਰੋਚੇਤੀਤਿ ਹਿ ਅਤ੍ਥੋ. ਪਾਰਿਸੁਦ੍ਧਿਹਾਰਕਸ੍ਸ ਅਨਾਪਤ੍ਤੀਤਿ ਏਤ੍ਥ ਆਪਤ੍ਤੀਤਿ ਅਨ੍ਵਯਤ੍ਥਂ ਅਤ੍ਥਾਪਤ੍ਤਿਤੋ ਦਸ੍ਸੇਨ੍ਤੋ ਆਹ ‘‘ਸਚੇ…ਪੇ… ਆਪਜ੍ਜਤੀ’’ਤਿ. ਅਸ੍ਸਾਤਿ ਭਿਕ੍ਖੁਸ੍ਸ. ਉਭਿਨ੍ਨਮ੍ਪੀਤਿ ਪਾਰਿਸੁਦ੍ਧਿਦਾਯਕਸ੍ਸ, ਤਂਹਾਰਕਸ੍ਸ ਚਾਤਿ ਉਭਿਨ੍ਨਮ੍ਪਿ.