੮੪. ਪਕ੍ਖਗਣਨਾਦਿਉਗ੍ਗਹਣਾਨੁਜਾਨਨਕਥਾ

੧੫੬. ਕਤਿਨਂ ਪੂਰਣੀਤਿ ਕਤਿਨਂ ਤਿਥੀਨਂ ਪੂਰਣੀ. ਕੋ ਦਿਵਸੋਤਿ ਕਿਤ੍ਤਕੋ ਦਿਵਸੋ. ਅਯ੍ਯਾਯਤ੍ਤਨ੍ਤਿ ਅਯ੍ਯੇਹਿ ਭਿਕ੍ਖੂਹਿ ਆਯਤ੍ਤਂ ਆਬਦ੍ਧਂ. ਸਂਹਰਿਤ੍ਵਾਤਿ ਪੁਨ ਸਲਾਕਂ ਸਂਹਰਿਤ੍ਵਾ. ਅਯਂ ਪਾਠੋ ਕੇਸੁਚਿ ਅਟ੍ਠਕਥਾਪੋਤ੍ਥਕੇਸੁ ਨਤ੍ਥਿ. ਕਾਲਵਤੋਤਿ ਏਤ੍ਥ ਵਨ੍ਤੁਪਚ੍ਚਯੋ ਸ੍ਵਤ੍ਥੋਤਿ ਆਹ ‘‘ਕਾਲਸ੍ਸੇਵਾ’’ਤਿ. ਏਵਸਦ੍ਦੋ ਪਨ ਸਮ੍ਭਵਤੋ ਯੁਜ੍ਜਿਯਤਿ. ਪਗੇਵਾਤਿ ਪਾਤੋਵ.

੧੫੮. ਸਾਯਮ੍ਪੀਤਿ ਸਾਯਨ੍ਹੇਪਿ. ਪਿਸਦ੍ਦੇਨ ਅਞ੍ਞਮ੍ਪਿ ਸਰਣਕਾਲਂ ਸਮ੍ਪਿਣ੍ਡੇਤਿ.

੧੫੯. ਆਣਾਪੇਤੁਨ੍ਤਿ ਏਤ੍ਥ ਅਨਾਣਾਪੇਤਬ੍ਬਭਿਕ੍ਖੂ ਅਪਨੇਤ੍ਵਾ ਆਣਾਪੇਤਬ੍ਬਭਿਕ੍ਖੂ ਦਸ੍ਸੇਤੁਂ ਵੁਤ੍ਤਂ ‘‘ਕਿਞ੍ਚਿ ਕਮ੍ਮ’’ਨ੍ਤਿਆਦਿ. ਸਦਾਕਾਲਮੇਵ ਕਿਞ੍ਚਿ ਕਮ੍ਮਂ ਕਰੋਨ੍ਤੋਤਿ ਯੋਜਨਾ. ਧਮ੍ਮਕਥਿਕਾਦੀਸੂਤਿਆਦਿਸਦ੍ਦੇਨ ਗਣਵਾਚਕਾਦਯੋ ਸਙ੍ਗਣ੍ਹਾਤਿ. ਵਾਰੇਨਾਤਿ ਪਰਿਯਾਯੇਨ. ਸਮ੍ਮੁਞ੍ਚਨਿਨ੍ਤਿ ਯਟ੍ਠਿਸਮ੍ਮੁਞ੍ਚਨਿਂ ਵਾ ਮੁਟ੍ਠਿਸਮ੍ਮੁਞ੍ਚਨਿਂ ਵਾ. ਸਮਂ, ਸੁਟ੍ਠੁ ਵਾ ਮੁਞ੍ਚਤਿ ਸੋਧੇਤਿ ਇਮਾਯਾਤਿ ਸਮ੍ਮੁਞ੍ਚਨੀ, ਤਾਲੁਜੋ ਪਠਮੋ. ਤਮ੍ਪੀਤਿ ਸਾਖਾਭਙ੍ਗਮ੍ਪਿ.

੧੬੦. ਵੁਤ੍ਤਨਯੇਨੇਵਾਤਿ ਸਮ੍ਮਜ੍ਜਨੇ ਵੁਤ੍ਤਨਯੇਨੇਵ. ਪੁਨ ਆਹਰਿਤਬ੍ਬਾਨੀਤਿ ਸਙ੍ਘਿਕਾਵਾਸਂ ਆਸਨਾਨਿ ਪੁਨ ਆਹਰਿਤਬ੍ਬਾਨਿ. ਤਟ੍ਟਿਕਾਯੋਪੀਤਿ ਵੇਣੁਆਦਿਮਯਾ ਤਟ੍ਟਿਕਾਯੋਪਿ.

੧੬੧. ਕਪਲ੍ਲਿਕਾ ਵਾਤਿ ਕਪਾਲੇਸੁ ਪਰਿਯਾਪਨ੍ਨਾ ਪਦੀਪਕਪਾਲਾ ਵਾ. ਤਨ੍ਤਿ ਤੇਲਾਦਿਂ. ਪਰਿਯੇਸਿਤਬ੍ਬਾਨੀਤਿ ਅਨਵਜ੍ਜਪਰਿਯੇਸਨੇਨ ਪਰਿਯੇਸਿਤਬ੍ਬਾਨਿ.