੭੧. ਸੀਮਾਨੁਜਾਨਨਕਥਾ
੧੩੮. ਨਿਮਿਤ੍ਤਾ ਕਿਤ੍ਤੇਤਬ੍ਬਾਤਿ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਨਿਕਾਰਸ੍ਸ ਹਿ ਆਕਾਰੋ. ਨਿਮਿਤ੍ਤਂ ਕਤੋਤਿ ਏਸੋ ਪਬ੍ਬਤੋ ਨਿਮਿਤ੍ਤਂ ਕਤੋਤਿ ਯੋਜਨਾ. ਏਸੇਵ ਨਯੋ ਪਰਤੋਪਿ. ‘‘ਏਸੇਵ ਨਯੋ’’ਤਿ ਇਮਿਨਾ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ? ਪਾਸਾਣੋ ਭਨ੍ਤੇ, ਏਸੋ ਪਾਸਾਣੋ ਨਿਮਿਤ੍ਤ’’ਨ੍ਤਿ ਅਤ੍ਥਂ ਅਤਿਦਿਸਤਿ. ਏਸੇਵ ਨਯੋ ਸੇਸੇਸੁਪਿ. ਕੇਵਲਂ ਪਨ ਵਨਉਦਕੇਸੁ ‘‘ਏਤਂ ਵਨਂ, ਏਤਂ ਉਦਕ’’ਨ੍ਤਿ ਵਤ੍ਤਬ੍ਬਂ. ਨਦਿਯਂ ‘‘ਏਸਾ ਨਦੀ’’ਤਿ ਵਤ੍ਤਬ੍ਬਾ. ਏਤ੍ਥ ਪਨਾਤਿ ਏਤਿਸ੍ਸਂ ਉਤ੍ਤਰਾਯਂ ਅਨੁਦਿਸਾਯਂ ਪਨ. ਹੀਤਿ ਫਲਜੋਤਕੋ. ਤਤ੍ਥਾਤਿ ‘‘ਨਿਮਿਤ੍ਤਾ ਕਿਤ੍ਤੇਤਬ੍ਬਾ’’ਤਿ ਵਚਨੇ. ਸੀਮਮਣ੍ਡਲਨ੍ਤਿ ਸੀਮਬਿਮ੍ਬਂ. ਸਮ੍ਬਨ੍ਧਨ੍ਤੇਨਾਤਿ ਪੁਰਿਮਨਿਮਿਤ੍ਤੇਨ ਪਚ੍ਛਿਮਨਿਮਿਤ੍ਤਂ ਸਮ੍ਬਨ੍ਧਨ੍ਤੇਨ. ਇਮਿਨਾ ਏਕਨ੍ਤਰਿਕਾਦਿਵਸੇਨ ਨਿਮਿਤ੍ਤਕਿਤ੍ਤਨਂ ਨ ਵਟ੍ਟਤਿ ਨਿਮਿਤ੍ਤੇਨਪਿ ਨਿਮਿਤ੍ਤਾਨਂ ਸਮ੍ਬਨ੍ਧਾਭਾਵਤੋਤਿ ਦਸ੍ਸੇਤਿ. ਪੁਰਿਮਨਿਮਿਤ੍ਤੇਨ ਪਚ੍ਛਿਮਨਿਮਿਤ੍ਤਸ੍ਸ ਸਮ੍ਬਨ੍ਧੇ ਸਤਿ ਅਜ੍ਜ ਏਕਂ ਨਿਮਿਤ੍ਤਂ ਕਿਤ੍ਤੇਤ੍ਵਾ ਸ੍ਵੇ ਏਕਂ ਨਿਮਿਤ੍ਤਂ ਕਿਤ੍ਤੇਤ੍ਵਾਤਿ ਏਵਂ ਕਾਲਨ੍ਤਰੇਪਿ ਨਿਮਿਤ੍ਤਂ ਕਿਤ੍ਤੇਤ੍ਵਾ ਸਮ੍ਮਨਿਤੁਂ ਵਟ੍ਟਤੀਤਿ ਵਦਨ੍ਤਿ.
ਪਬ੍ਬਤੋਤਿ ਏਤ੍ਥ ਪਬ੍ਬਂ ਵੁਚ੍ਚਤਿ ਫਲ਼ੁ, ਤਂ ਏਤਸ੍ਮਿਂ ਅਤ੍ਥੀਤਿ ਪਬ੍ਬਤੋ. ਵਾਲਿਕਰਾਸਿਸ੍ਸ ਸੁਦ੍ਧਪਂਸੁਪਬ੍ਬਤਪਸਙ੍ਗਤ੍ਤਾ ਵੁਤ੍ਤਂ ‘‘ਵਾਲਿਕਰਾਸਿ ਪਨ ਨ ਵਟ੍ਟਤੀ’’ਤਿ. ਇਤਰੋਪੀਤਿ ਵਾਲਿਕਰਾਸਿਤੋ ਅਞ੍ਞੋਪਿ ਤਿਵਿਧੋ ਪਬ੍ਬਤੋ. ਹਤ੍ਥਿਪ੍ਪਮਾਣਤੋਤਿ ਅਡ੍ਢਟ੍ਠਮਰਤਨਹਤ੍ਥਿਪਮਾਣਤੋ. ਚਤੂਸੁ ਦਿਸਾਸੂਤਿ ਵਿਹਾਰਸ੍ਸ ਚਤੂਸੁ ਦਿਸਾਸੁ. ਚਤੂਹਿ ਵਾ ਤੀਹਿ ਵਾਤਿ ਏਤ੍ਥ ਵਾਸਦ੍ਦੇਨ ਤਤੋ ਅਧਿਕਾਨਿਪਿ ਗਹੇਤਬ੍ਬਾਨਿ. ਏਕੇਨ ਵਾ ਨਿਮਿਤ੍ਤੇਨਾਤਿ ਯੋਜਨਾ. ਇਤੋਤਿ ਪਬ੍ਬਤਨਿਮਿਤ੍ਤਤੋ. ਤਸ੍ਮਾਤਿ ਯਸ੍ਮਾ ਏਕੇਨ ਨਿਮਿਤ੍ਤੇਨ ਨ ਵਟ੍ਟਤਿ, ਤਸ੍ਮਾ. ਤਨ੍ਤਿ ਪਬ੍ਬਤਂ. ਤਸ੍ਮਾਤਿ ਏਕਸ੍ਸੇਵ ਨਿਮਿਤ੍ਤਸ੍ਸ ਕਿਤ੍ਤਿਤਤ੍ਤਾ. ਯੋ ਪਬ੍ਬਤੋ ਅਤ੍ਥਿ, ਤਂ ਪਬ੍ਬਤਨ੍ਤਿ ਯੋਜਨਾ. ਅਨ੍ਤੋਤਿ ਪਬ੍ਬਤਸ੍ਸ ਅਨ੍ਤੋ.
ਤਤਿਯਭਾਗਂ ਵਾਤਿ ਏਤ੍ਥ ਵਾਸਦ੍ਦੇਨ ਪਠਮਭਾਗੋਪਿ ਏਕਦੇਸੋਪਿ ਗਹੇਤਬ੍ਬੋ. ਤਸ੍ਸਾਤਿ ਤਤ੍ਤਕਸ੍ਸ ਪਦੇਸਸ੍ਸ. ਤਤਿਯਭਾਗਾਦਿਤੋ ਅਪਰਂ ਸਬ੍ਬਪਬ੍ਬਤਂ ਅਨ੍ਤੋਕਤ੍ਵਾ ਸਮ੍ਮਤਂ ਦਸ੍ਸੇਨ੍ਤੋ ਆਹ ‘‘ਸਚੇ’’ਤਿਆਦਿ.
ਪਾਸਾਣਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਪਸਤਿ ਘਨਭਾਵੇਨ ਬਨ੍ਧਤੀਤਿ ਪਾਸਾਣੋ. ਅਯਗੁਲ਼ੋਪਿ ਪਾਸਾਣਸਙ੍ਖਮੇਵ ਗਚ੍ਛਤਿ ਤੇਨ ਤਸ੍ਸ ਸਦਿਸਤ੍ਤਾ. ਅਯਗੁਲ਼ੋਪੀਤਿ ਏਤ੍ਥ ਪਿਸਦ੍ਦੇਨ ਤਮ੍ਬਕਂਸਵਟ੍ਟਲੋਹਸੁਵਣ੍ਣਰਜਤਾਦਯੋਪਿ ਸਙ੍ਗਣ੍ਹਾਤਿ. ਯੋ ਕੋਚੀਤਿ ਸਿਲਾਪਵਾਲ਼ਮਣਿਆਦੀਸੁ ਯੋ ਕੋਚਿ. ਦ੍ਵਤ੍ਤਿਂਸਪਲਗੁਲ਼ਪਿਣ੍ਡਪਰਿਮਾਣਤਾ ਸਣ੍ਠਾਨਤੋ ਗਹੇਤਬ੍ਬਾ, ਨ ਤੁਲਿਤ੍ਵਾ ਗਣਨਵਸੇਨ. ਖੁਦ੍ਦਕਤਰੋ ਪਾਸਾਣੋਤਿ ਯੋਜਨਾ. ਯੋ ਪਿਟ੍ਠਿਪਾਸਾਣੋ ਵਾ ਯੋ ਉਟ੍ਠਿਤਪਾਸਾਣੋ ਵਾਤਿ ਯੋਜਨਾ ਕਾਤਬ੍ਬਾ – ਉਤ੍ਤਰਵਾਕ੍ਯੇ ਤਸਦ੍ਦਸ੍ਸ ਅਨਿਯਮਨਿਦ੍ਦੇਸਵਚਨਤ੍ਤਾ ‘‘ਪਾਸਾਣਸਙ੍ਖਂਯੇਵਾ’’ਤਿ ਏਤ੍ਥ ਏਵਕਾਰੇਨ ‘‘ਨ ਪਬ੍ਬਤਸਙ੍ਖ’’ਨ੍ਤਿ ਅਤ੍ਥਂ ਦਸ੍ਸੇਤਿ. ਮਹਤੋ ਪਿਟ੍ਠਿਪਾਸਾਣਸ੍ਸਾਤਿ ਆਯਾਮਵਿਤ੍ਥਾਰੁਬ੍ਬੇਧਤੋ ਮਹਨ੍ਤਸ੍ਸ ਪਿਟ੍ਠਿਪਾਸਾਣਸ੍ਸ ਸਕ੍ਕਸ੍ਸ ਪਣ੍ਡੁਕਮ੍ਬਲਪਿਟ੍ਠਿਪਾਸਾਣਸ੍ਸ ਵਿਯ. ਤਨ੍ਤਿ ਪਿਟ੍ਠਿਪਾਸਾਣਂ. ਨ ਵਟ੍ਟਤੀਤਿ ਕਿਤ੍ਤੇਤੁਂ ਨ ਵਟ੍ਟਤਿ. ਹੀਤਿ ਲਦ੍ਧਦੋਸਜੋਤਕੋ. ਤਨ੍ਤਿ ਪਿਟ੍ਠਿਪਾਸਾਣਂ. ਸੀਮਾਯਾਤਿ ਸੀਮਤੋ. ਵਿਹਾਰੋਪੀਤਿ ਨ ਕੇਵਲਂ ਨਿਮਿਤ੍ਤਮੇਵ, ਵਿਹਾਰੋਪਿ. ਪਿਟ੍ਠਿਪਾਸਾਣੋ ਨ ਕਿਤ੍ਤੇਤਬ੍ਬੋਤਿ ਸਮ੍ਬਨ੍ਧੋ. ਕਿਤ੍ਤੇਤ੍ਵਾਤਿ ਏਤ੍ਥ ‘‘ਪਿਟ੍ਠਿਪਾਸਾਣ’’ਨ੍ਤਿ ਯੋਜੇਤਬ੍ਬਂ.
ਵਨਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਵਨਿਯਤਿ ਮਯੂਰਕੋਕਿਲਾਦੀਹਿ ਸਤ੍ਤੇਹਿ ਸਮ੍ਭਜਿਯਤੀਤਿ ਵਨਂ, ਵਨਨ੍ਤਿ ਸਮ੍ਭਜਨ੍ਤਿ ਏਤ੍ਥਾਤਿ ਵਾ ਵਨਂ. ਤਚੋ ਏਵ ਸਾਰੋ ਏਤੇਸਨ੍ਤਿ ਤਚਸਾਰੋ, ਤਾਲਨਾਲ਼ਿਕੇਰਾਦਯੋ. ਆਦਿਸਦ੍ਦੇਨ ਵੇਣੁਆਦਯੋ ਸਙ੍ਗਣ੍ਹਾਤਿ. ਅਨ੍ਤੋ ਸਾਰੋ ਏਤੇਸਨ੍ਤਿ ਅਨ੍ਤੋਸਾਰਾ, ਸਾਕਸਾਲਾਦਯੋ. ਆਦਿਸਦ੍ਦੇਨ ਖਦਿਰਾਦਯੋ ਸਙ੍ਗਣ੍ਹਾਤਿ. ਅਨ੍ਤੋਸਾਰਮਿਸ੍ਸਕਾਨਨ੍ਤਿ ਅਨ੍ਤੋਸਾਰੇਹਿ ਰੁਕ੍ਖੇਹਿ ਮਿਸ੍ਸਕਾਨਂ. ਰੁਕ੍ਖਾਨਂ ਵਨਨ੍ਤਿ ਏਤ੍ਥ ਅਵਯਵਅਵਯਵਿਭਾਵੇਨ ਸਮ੍ਬਨ੍ਧੋ ਵੇਦਿਤਬ੍ਬੋ. ਇਮਿਨਾ ਤਿਣਵਨਂ ਰੁਕ੍ਖਵਨਨ੍ਤਿ ਏਤ੍ਥ ‘‘ਤਿਣਾਨਂ ਵਨ’’ਨ੍ਤਿ ਵਾ ‘‘ਰੁਕ੍ਖਾਨਂ ਵਨ’’ਨ੍ਤਿ ਵਾ ਅਤ੍ਥਂ ਦਸ੍ਸੇਤਿ. ਤਿਣਮੇਵ ਵਨਂ, ਰੁਕ੍ਖੋਯੇਵ ਵਨਨ੍ਤਿ ਅਤ੍ਥੋਪਿ ਯੁਜ੍ਜਤੇਵ. ਚਤ੍ਤਾਰੋ ਵਾ ਪਞ੍ਚ ਵਾ ਰੁਕ੍ਖਾਤਿ ਚਤੁਪਞ੍ਚਰੁਕ੍ਖਾ, ਤੇ ਮਤ੍ਤਂ ਪਮਾਣਮੇਤ੍ਥਾਤਿ ਚਤੁਪਞ੍ਚਰੁਕ੍ਖਮਤ੍ਤਂ ਵਨਂ, ਤਤੋਤਿ ਚਤੁਪਞ੍ਚਰੁਕ੍ਖਮਤ੍ਤਤੋ. ਏਕਦੇਸਨ੍ਤਿ ਵਨਸ੍ਸ ਏਕਦੇਸਂ. ਵਨਮਜ੍ਝੇਤਿ ਵਨਸ੍ਸ ਵੇਮਜ੍ਝੇ, ਵਨਸ੍ਸੂਪਰੀਤਿ ਅਤ੍ਥੋ. ਰੁਕ੍ਖਨ੍ਤਰੇਸੁ ਏਵ ਹਿ ਵਿਹਾਰਂ ਕਰੋਨ੍ਤਿ. ਏਕਦੇਸਨ੍ਤਿ ਵਨਸ੍ਸ ਏਕਦੇਸਂ. ਤਤ੍ਥਾਤਿ ਵਨੇ. ‘‘ਠਿਤਵਨ’’ਨ੍ਤਿ ਪਦਂ ‘‘ਕਿਤ੍ਤੇਤ੍ਵਾ’’ਤਿ ਪਦੇ ਅਵੁਤ੍ਤਕਮ੍ਮਂ, ‘‘ਨ ਕਿਤ੍ਤੇਤਬ੍ਬ’’ਨ੍ਤਿ ਪਦੇ ਵੁਤ੍ਤਕਮ੍ਮਂ.
ਰੁਕ੍ਖਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਰੁਕ੍ਖਿਯਤਿ ਫਲਾਦਿਕਾਮੇਹਿ ਸਂਵਰਿਯਤਿ ਰਕ੍ਖਿਯਤੀਤਿ ਰੁਕ੍ਖੋ, ਮਹਿਯਂ ਰੁਹਤੀਤਿ ਵਾ ਰੁਕ੍ਖੋ. ਜੀਵਮਾਨਕੋਤਿ ਲੋਕਵੋਹਾਰਵਸੇਨ ਮੂਲਙ੍ਕੁਰਾਦਿਹਰਿਤਸਙ੍ਖਾਤਜੀਵਮਾਨਕੋ. ਪਰਿਣਾਹਤੋਤਿ ਵਿਸਾਲਭਾਵਤੋ. ਸੂਚਿਦਣ੍ਡਕਪਮਾਣੋਤਿ ਸੂਚਿਯਾ ਲੇਖਨਿਯਾ ਦਣ੍ਡਭੂਤਵੇਲ਼ੁਪਮਾਣੋ. ਸੋ ਵੇਲ਼ੁ ਕਨਿਟ੍ਠਙ੍ਗੁਲਿਪਮਾਣੋਤਿ ਦਟ੍ਠਬ੍ਬੋ. ਤਤੋਤਿ ਅਟ੍ਠਙ੍ਗੁਲੁਬ੍ਬੇਧਸੂਚਿਦਣ੍ਡਕਪਮਾਣਪਰਿਣਾਹਰੁਕ੍ਖਤੋ. ਵਂਸਨਲ਼ਕਸਰਾਵਾਦੀਸੂਤਿ ਵਂਸੋ ਚ ਨਲ਼ਕੋ ਚ ਸਰਾਵੋ ਚ ਵਂਸਨਲ਼ਕਸਰਾਵਾ, ਤੇ ਆਦਯੋ ਯੇਸਂ ਕਪਾਲਾਦੀਨਨ੍ਤਿ ਵਂਸਨਲ਼ਕਸਰਾਵਾਦਯੋ, ਤੇਸੁ. ਤਤੋਤਿ ਵਂਸਾਦਿਤੋ. ਤਂਖਣਮ੍ਪੀਤਿ ਤਸ੍ਮਿਂ ਨਿਮਿਤ੍ਤਕ੍ਖਣੇਪਿ. ਅਕਾਰਣਨ੍ਤਿ ਅਪਮਾਣਂ. ਏਤਨ੍ਤਿ ਨਵਮੂਲਸਾਖਾਨਿਗ੍ਗਮਨਂ. ਵਤ੍ਤੁਂ ਵਟ੍ਟਤੀਤਿ ਸਾਮਞ੍ਞਨਾਮੇਨਪਿ ਵਿਸੇਸਨਾਮੇਨਪਿ ਵਤ੍ਤੁਂ ਵਟ੍ਟਤਿ. ਇਮਿਨਾ ਪਬ੍ਬਤਾਦੀਸੁਪਿ ‘‘ਪਬ੍ਬਤੋ’’ਤਿ ਸਾਮਞ੍ਞਨਾਮੇਨਪਿ ‘‘ਵਙ੍ਕਪਬ੍ਬਤੋ ਵੇਪੁਲ੍ਲਪਬ੍ਬਤੋ’’ਤਿ ਵਿਸੇਸਨਾਮੇਨਪਿ ਵਤ੍ਤੁਂ ਵਟ੍ਟਤੀਤਿ ਦਸ੍ਸੇਤਿ.
ਮਗ੍ਗਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਮਗ੍ਗਿਯਤਿ ਪਥਿਕੇਹਿ, ਮਗ੍ਗਮੂਲ਼੍ਹੇਹਿ ਵਾ ਅਨ੍ਵੇਸਿਯਤੀਤਿ ਮਗ੍ਗੋ. ਯੋ ਯਾਦਿਸੋ ਜਙ੍ਘਮਗ੍ਗੋ ਵਾ ਸਕਟਮਗ੍ਗੋ ਵਾ ਵਿਨਿਵਿਜ੍ਝਿਤ੍ਵਾ ਦ੍ਵੇ ਤੀਣਿ ਗਾਮਨ੍ਤਰਾਨਿ ਗਚ੍ਛਤਿ, ਸੋ ਤਾਦਿਸੋ ਜਙ੍ਘਮਗ੍ਗੋ ਵਾ ਸਕਟਮਗ੍ਗੋ ਵਾ ਵਟ੍ਟਤੀਤਿ ਯੋਜਨਾ. ਉਕ੍ਕਮਿਤ੍ਵਾਤਿ ਪਕ੍ਕਮਿਤ੍ਵਾ. ਯੋ ਜਙ੍ਘਮਗ੍ਗੋ ਓਤਰਤਿ, ਸੋ ਨ ਵਟ੍ਟਤੀਤਿ ਯੋਜਨਾ. ਅਵਲ਼ਞ੍ਜਾਤਿ ਅਪਰਿਭੋਗਾ. ਗਮਨਂ ਜਨੇਤੀਤਿ ਜਙ੍ਘੋ. ਜਣ੍ਣੁਗੋਪ੍ਫਕਾਨਂ ਮਜ੍ਝਪਦੇਸੋ. ਸਹ ਅਤ੍ਥੇਨ ਪਣਿਯਧਨੇਨਾਤਿ ਸਤ੍ਥੋ, ਜਙ੍ਘੇਨ ਵਿਚਰਨ੍ਤੋ ਸਤ੍ਥੋ ਜਙ੍ਘਸਤ੍ਥੋ. ਸਕਤਿ ਸਮਤ੍ਥੇਤਿ ਭਾਰਂ ਵਹਿਤੁਨ੍ਤਿ ਸਕਟੋ, ਤੇਨ ਵਿਚਰਨ੍ਤੋ ਸਤ੍ਥੋ ਸਕਟਸਤ੍ਥੋ. ਜਙ੍ਘਸਤ੍ਥੋ ਚ ਸਕਟਸਤ੍ਥੋ ਚ ਜਙ੍ਘਸਕਟਸਤ੍ਥਾ, ਤੇਹਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤਨ੍ਤਿ ਨਿਮਿਤ੍ਤਂ.
ਕੋਣਨ੍ਤਿ ਵਿਹਾਰਕੋਣਂ. ਗਤਂ ਪਨ ਮਗ੍ਗਨ੍ਤਿ ਯੋਜਨਾ. ਪਰਭਾਗੇਤਿ ਵਿਹਾਰਂ ਪਰਿਕ੍ਖਿਪਿਤ੍ਵਾ ਗਚ੍ਛਨ੍ਤੇਹਿ ਚਤੂਹਿ ਮਗ੍ਗੇਹਿ ਪਰਭਾਗੇ. ਦਸਸੁ ਨਾਮੇਸੂਤਿ ਸਤਿਪਟ੍ਠਾਨਟ੍ਠਕਥਾਦੀਸੁ ਆਗਤੇਸੁ ‘‘ਮਗ੍ਗੋ ਪਨ੍ਥੋ ਪਥੋ ਪਜ੍ਜੋ’’ਤਿਆਦੀਸੁ, ਅਭਿਧਾਨਾਦੀਸੁ (ਦੀ. ਨਿ. ਅਟ੍ਠ. ੨.੩੭੩; ਮ. ਨਿ. ਅਟ੍ਠ. ੧.੧੦੬) ਚ ਆਗਤੇਸੁ ‘‘ਮਗ੍ਗੋ ਪਨ੍ਥੋ ਪਥੋ ਅਦ੍ਧਾ’’ਤਿਆਦੀਸੁ ਦਸਸੁ ਮਗ੍ਗਨਾਮੇਸੁ. ਯੇਨ ਕੇਨਚਿ ਨਾਮੇਨਾਤਿ ਇਮਿਨਾ ਪਬ੍ਬਤਾਦੀਸੁਪਿ ‘‘ਪਬ੍ਬਤੋ ਗਿਰਿ ਸੇਲੋ ਅਦ੍ਦਿ ਨਗੋ ਅਚਲੋ ਸਿਲੁਚ੍ਚਯੋ ਸਿਖਰੀ ਭੂਧਰੋ’’ਤਿਆਦੀਸੁ ਅਨੇਕੇਸੁ ਨਾਮੇਸੁ ਯੇਨ ਕੇਨਚਿ ਨਾਮੇਨ ਕਿਤ੍ਤੇਤੁਂ ਵਟ੍ਟਤੀਤਿ ਦਸ੍ਸੇਤਿ.
ਵਮ੍ਮਿਕਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਉਪਚਿਕਾਹਿ ਵਮਿਯਤਿ, ਸਰਬੂਘਰਗੋਲਿਕਾਦਯੋ ਸਤ੍ਤੇ ਵਮਤੀਤਿ ਵਾ ਵਮ੍ਮਿਕੋ. ਤਂਦਿਵਸਜਾਤੋਤਿ ਤਸ੍ਮਿਂ ਨਿਮਿਤ੍ਤਕਿਤ੍ਤਿਤਦਿਵਸੇ ਜਾਤੋ. ਤਤੋਤਿ ਅਟ੍ਠਙ੍ਗੁਲੁਬ੍ਬੇਧਗੋਵਿਸਾਣਪਮਾਣਵਮ੍ਮੀਕਤੋ.
ਨਦੀਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਨਦਤਿ ਸਨ੍ਦਤੀਤਿ ਨਦੀ, ਨਦਨ੍ਤੋ ਏਤਿ ਗਚ੍ਛਤੀਤਿ ਵਾ ਨਦੀ. ਯਸ੍ਸਾਤਿ ਨਦਿਯਾ, ਸੋਤਨ੍ਤਿ ਸਮ੍ਬਨ੍ਧੋ. ‘‘ਅਨ੍ਵਦ੍ਧਮਾਸ’’ਨ੍ਤਿਆਦਿਨਾ ਏਕਪਕ੍ਖੇ ਤਿਕ੍ਖਤ੍ਤੁਂ ਏਕਮਾਸੇ ਛਕ੍ਖਤ੍ਤੁਂ ਵਸ੍ਸਨ੍ਤਭਾਵਂ ਦੀਪੇਤਿ. ਵਿਗਤਮਤ੍ਤੇ ਸਤੀਤਿ ਸਮ੍ਬਨ੍ਧੋ. ‘‘ਈਦਿਸੇ’’ਤਿ ਇਮਿਨਾ ‘‘ਅਨ੍ਵਦ੍ਧਮਾਸ’’ਨ੍ਤਿਆਦਿਅਤ੍ਥਂ ਅਤਿਦਿਸਤਿ. ਤਿਮਣ੍ਡਲਨ੍ਤਿ ਹੇਟ੍ਠਾ ਜਾਣੁਮਣ੍ਡਲਂ, ਉਪਰਿ ਨਾਭਿਮਣ੍ਡਲਨ੍ਤਿ ਤਿਮਣ੍ਡਲਂ. ਯਤ੍ਥ ਕਤ੍ਥਚੀਤਿ ਤਿਤ੍ਥੇ ਵਾ ਅਤਿਤ੍ਥੇ ਵਾ. ਉਦਕੇਨ ਤੇਮਿਯਤੀਤਿ ਯੋਜਨਾ, ਤਿਨ੍ਤਿਯਤੀਤਿ ਅਤ੍ਥੋ. ਨ ਕੇਵਲਂ ਨਿਮਿਤ੍ਤੇਯੇਵ ਅਯਂ ਨਦੀ ਹੋਤਿ, ਅਥ ਖੋ ਨਦੀਪਾਰਗਮਨਾਦਿਕੇਪੀਤਿ ਆਹ ‘‘ਭਿਕ੍ਖੁਨਿਯਾ’’ਤਿਆਦਿ. ਇਦਂ ‘‘ਨਦੀਪਾਰਗਮਨੇਪੀ’’ਤਿ ਪਦੇਨੇਵ ਸਮ੍ਬਨ੍ਧਿਤਬ੍ਬਂ.
ਯਾ ਪਨਾਤਿ ਨਦੀ ਪਨ, ਗਤਾਤਿ ਯੋਜਨਾ. ਤਨ੍ਤਿ ਨਦਿਂ. ਵਤਿਨ੍ਤਿ ਪਾਲ਼ਿਂ. ਰੁਕ੍ਖਪਾਦੇਤਿ ਰੁਕ੍ਖਸ੍ਸ ਮੂਲੇ. ਉਦਕਞ੍ਚ ਆਵਰਣਂ ਅਜ੍ਝੋਤ੍ਥਰਿਤ੍ਵਾ ਪਵਤ੍ਤਤਿਯੇਵਾਤਿ ਯੋਜਨਾ. ਯਥਾਤਿ ਯੇਨਾਕਾਰੇਨ. ਅਪਵਤ੍ਤਮਾਨਾ ਹੋਤੀਤਿ ਸਮ੍ਬਨ੍ਧੋ.
ਦੁਬ੍ਬੁਟ੍ਠਿਕਾਲੇਤਿ ਗਿਮ੍ਹਸਦਿਸੇ ਦੁਬ੍ਬੁਟ੍ਠਿਕਾਲੇ. ‘‘ਨਿਰੁਦਕਭਾਵੇਨਾ’’ਤਿ ਇਮਿਨਾ ‘‘ਆਵਰਣਭਾਵੇਨਾ’’ਤਿ ਵਿਸੇਸਨਂ ਨਿਵਤ੍ਤੇਤਿ. ਸਾਤਿ ਉਦਕਮਾਤਿਕਾ. ਸਮ੍ਪਾਦੇਨ੍ਤੀ ਹੁਤ੍ਵਾ ਨਿਚ੍ਚਂ ਪਵਤ੍ਤਤੀਤਿ ਯੋਜਨਾ. ਨਿਮਿਤ੍ਤਂ ਕਾਤੁਂ ਨ ਵਟ੍ਟਤੀਤਿ ਮਨੁਸ੍ਸੇਹਿ ਨੀਹਟਤ੍ਤਾ, ਸਯਞ੍ਚ ਅਗਮਨਤ੍ਤਾ ਨ ਵਟ੍ਟਤਿ. ਯਾ ਪਨਾਤਿ ਉਦਕਮਾਤਿਕਾ ਪਨ. ਮੂਲੇਤਿ ਪਠਮਕਾਲੇ. ਕਾਲਨ੍ਤਰੇਨ ਨਦੀ ਹੋਤੀਤਿ ਸਮ੍ਬਨ੍ਧੋ. ਤਨ੍ਤਿ ਉਦਕਮਾਤਿਕਂ.
ਉਦਕਨਿਮਿਤ੍ਤੇ ਏਵਂ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਉਦਤਿ ਪਸਵਤੀਤਿ ਉਦਕਂ. ਭੂਮਿਗਤਮੇਵ ਉਦਕਨ੍ਤਿ ਸਮ੍ਬਨ੍ਧੋ. ਤਞ੍ਚਾਤਿ ਭੂਮਿਗਤਉਦਕਞ੍ਚ. ਆਵਾਟ…ਪੇ… ਸਮੁਦ੍ਦਾਦੀਸੁ ਠਿਤਂ ਅਪਵਤ੍ਤਨਕਉਦਕਨ੍ਤਿ ਯੋਜਨਾ. ਉਕ੍ਖੇਪਿਮਨ੍ਤਿ ਉਕ੍ਖਿਪਿਤ੍ਵਾ ਗਹਿਤਂ. ਤਨ੍ਤਿ ਵਚਨਂ. ਸੂਕਰਖਤਾਯਪੀਤਿ ਸੂਕਰੇਹਿ ਖਤਾਯ ਵਾਪਿਯਾਪਿ. ਤਂਖਣਞ੍ਞੇਵਾਤਿ ਤਸ੍ਮਿਂ ਨਿਮਿਤ੍ਤੇ ਕਿਤ੍ਤਨਕ੍ਖਣੇਯੇਵ. ਆਵਾਟੋਯੇਵ ਖੁਦ੍ਦਕਟ੍ਠੇਨ ਆਵਾਟਕਂ. ਤਨ੍ਤਿ ਨਿਮਿਤ੍ਤਸਞ੍ਞਾਕਰਣਂ. ਕਾਤੁਞ੍ਚਾਤਿ ਸਯਂ ਕਾਤੁਞ੍ਚ. ਕਾਰਾਪੇਤੁਞ੍ਚਾਤਿ ਪਰੇਹਿ ਕਾਰਾਪੇਤੁਞ੍ਚ. ਕਸ੍ਮਾ ਲਾਭਸੀਮਾਯਂ ਨ ਵਟ੍ਟਤਿ? ਲਾਭਸੀਮਾ ਹਿ ਅਞ੍ਞੇਸਂ ਪੀਲ਼ਨਂ ਕਰੋਤੀਤਿ. ਇਤਿ ਇਮਮਤ੍ਥਂ ਨਯਤੋ ਦਸ੍ਸੇਨ੍ਤੋ ਆਹ ‘‘ਸਮਾਨਸਂਵਾਸਕਸੀਮਾ’’ਤਿਆਦਿ. ਏਤ੍ਥਾਤਿ ਸਮਾਨਸਂਵਾਸਕਸੀਮਾਯਂ.
ਅਟ੍ਠਦਿਸਂ ਸਨ੍ਧਾਯ ਅਟ੍ਠ ਨਿਮਿਤ੍ਤਾਨਿ ਵੁਤ੍ਤਾਨੀਤਿ ਦਟ੍ਠਬ੍ਬਂ. ਸਾਤਿ ਸੀਮਾ. ਏਕੇਨ ਵਾ ਨਿਮਿਤ੍ਤੇਨਾਤਿ ਯੋਜਨਾ. ਤਿਣ੍ਣਂ ਨਿਮਿਤ੍ਤਾਨਂ ਕਿਤ੍ਤਨੇ ਨਿਮਿਤ੍ਤਾਨਂ ਠਿਤਦਿਸਂ ਸਲ੍ਲਕ੍ਖੇਤ੍ਵਾ ‘‘ਪੁਰਤ੍ਥਿਮਾਯ ਦਿਸਾਯਾ’’ਤਿਆਦਿਨਾ ਕਿਤ੍ਤੇਤਬ੍ਬਂ. ਨਿਮਿਤ੍ਤਾਨਂ ਸਤਕਿਤ੍ਤਨੇ ਸੀਮਾਯ ਅਟ੍ਠਦਿਸਂ ਸਲ੍ਲਕ੍ਖੇਤ੍ਵਾ ਏਕਿਸ੍ਸਾਯਪਿ ਦਿਸਾਯ ਬਹੁਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਸਿਙ੍ਘਾਟਕਸਣ੍ਠਾਨਾਤਿ ਤਿਣ੍ਣਂ ਮਗ੍ਗਾਨਂ ਸਮਾਗਮਟ੍ਠਾਨੇ ਸਿਙ੍ਘਾਟਕਸਣ੍ਠਾਨਾ, ਤਿਕੋਣਾ ਨਾਮ ਹੋਤੀਤਿ ਅਧਿਪ੍ਪਾਯੋ. ਚਤੁਰਸ੍ਸਾਤਿ ਸਮਚਤੁਰਸ੍ਸਾ. ਸਿਙ੍ਘਾਟਕਸਣ੍ਠਾਨਾਤਿ ਚਤੁਨ੍ਨਂ ਮਗ੍ਗਾਨਂ ਸਮੋਧਾਨਟ੍ਠਾਨੇ ਸਿਙ੍ਘਾਟਕਸਣ੍ਠਾਨਾ. ਅਡ੍ਢਚਨ੍ਦਮੁਦਿਙ੍ਗਾਦਿਸਣ੍ਠਾਨਾ ਪਨ ਨਿਮਿਤ੍ਤਾਨਂ ਠਿਤਸਣ੍ਠਾਨੇਨ ਹੋਤੀਤਿ ਦਟ੍ਠਬ੍ਬਾ. ਤਨ੍ਤਿ ਸੀਮਂ. ਬਨ੍ਧਿਤੁਕਾਮੇਹਿ ਨਿਸ੍ਸਞ੍ਚਾਰਸਮਯੇ ਬਨ੍ਧਿਤਬ੍ਬਾਤਿ ਸਮ੍ਬਨ੍ਧੋ. ਬਦ੍ਧਸੀਮਵਿਹਾਰਾਨਨ੍ਤਿ ਬਦ੍ਧਾ ਸੀਮਾ ਏਤੇਸੂਤਿ ਬਦ੍ਧਸੀਮਾ, ਤੇ ਏਵ ਵਿਹਾਰਾਤਿ ਬਦ੍ਧਸੀਮਵਿਹਾਰਾ, ਤੇਸਂ. ਦਿਸਾਚਾਰਿਕਭਿਕ੍ਖੂਨਨ੍ਤਿ ਦਿਸਾਸੁ ਚਾਰਿਕਭਿਕ੍ਖੂਨਂ. ਤਤ੍ਥਾਤਿ ਤਸ੍ਮਿਂ ਏਕਗਾਮਖੇਤ੍ਤੇ, ਭਿਕ੍ਖੂਨਂ ਪੇਸੇਤਬ੍ਬਨ੍ਤਿ ਸਮ੍ਬਨ੍ਧੋ. ਏਕਜ੍ਝਨ੍ਤਿ ਏਕਤੋ. ਅਞ੍ਞਾਨਿਪੀਤਿ ਸੀਮਬਨ੍ਧਗਾਮਖੇਤ੍ਤਤੋ ਅਞ੍ਞਾਨਿਪਿ. ਮਹਾਪਦੁਮਤ੍ਥੇਰੋ ਪਨ ਆਹਾਤਿ ਯੋਜਨਾ. ਤਤੋਤਿ ਤੇਹਿ ਨਾਨਾਗਾਮਖੇਤ੍ਤੇਹਿ. ਆਗਨ੍ਤਬ੍ਬਨ੍ਤਿ ਸਾਮੀਚਿਦਸ੍ਸਨਵਸੇਨ ਵੁਤ੍ਤਂ. ਤੇਨਾਹ ‘‘ਆਗਮਨਮ੍ਪਿ ਅਨਾਗਮਨਮ੍ਪਿ ਵਟ੍ਟਤੀ’’ਤਿ. ਏਕਸੀਮਭਾਵਤੋ ਵੁਤ੍ਤਂ ‘‘ਅਨ੍ਤੋਨਿਮਿਤ੍ਤਗਤੇਹਿ ਆਗਨ੍ਤਬ੍ਬ’’ਨ੍ਤਿ.
ਏਵਂ ਸਨ੍ਨਿਪਤਿਤੇਸੁ ਸਨ੍ਤੇਸੁ ਸੀਮਾ ਬਨ੍ਧਿਤਬ੍ਬਾਤਿ ਸਮ੍ਬਨ੍ਧੋ. ਪਰਿਯਨ੍ਤਂ ਕਤ੍ਵਾਤਿ ਹੇਟ੍ਠਿਮਪਰਿਯਨ੍ਤਂ ਕਤ੍ਵਾ.
ਪਬ੍ਬਜ੍ਜੂਪਸਮ੍ਪਦਾਦੀਨਨ੍ਤਿ ਏਤ੍ਥ ਭਣ੍ਡੁਕਮ੍ਮਾਪੁਚ੍ਛਨਂ (ਮਹਾਵ. ਅਟ੍ਠ. ੯੮; ਵਿ. ਸਙ੍ਗ. ਅਟ੍ਠ. ੧੪੪) ਸਨ੍ਧਾਯ ਪਬ੍ਬਜ੍ਜਾਗਹਣਂ ਵੁਤ੍ਤਂ. ਖਣ੍ਡਸੀਮਾਤਿ ਵਿਹਾਰਪਚ੍ਚਨ੍ਤਂ ਖਣ੍ਡਿਤਂ ਵਿਯ ਛਿਨ੍ਦਿਤਂ ਵਿਯ ਪਵਤ੍ਤਾ ਸੀਮਾ ਖਣ੍ਡਸੀਮਾ. ਤਨ੍ਤਿ ਖਣ੍ਡਸੀਮਂ. ਵਤ੍ਤਂ ਜਾਨਿਤਬ੍ਬਨ੍ਤਿ ਏਤ੍ਥ ਵਤ੍ਤਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਸੀਮਨ੍ਤਿ ਖਣ੍ਡਸੀਮਂ. ਯਥਾਤਿ ਯੇਨਾਕਾਰੇਨ ਬਨ੍ਧਿਯਮਾਨੇਤਿ ਸਮ੍ਬਨ੍ਧੋ. ਤਸ੍ਸਾ ਪਮਾਣਂ ਦਸ੍ਸੇਨ੍ਤੋ ਆਹ ‘‘ਸਾ’’ਤਿਆਦਿ. ਸਾਤਿ ਖਣ੍ਡਸੀਮਾ. ਅਬ੍ਭਾਨਕਮ੍ਮੇ ਸਦ੍ਧਿਂ ਕਮ੍ਮਾਰਹੇਨ ਵੀਸਤਿ ਭਿਕ੍ਖੂ ਸਨ੍ਧਾਯ ਵੁਤ੍ਤਂ ‘‘ਏਕਵੀਸਤਿ ਭਿਕ੍ਖੂ’’ਤਿ. ਤਤੋਤਿ ਏਕਵੀਸਤਿਭਿਕ੍ਖੁਤੋ. ਗਣ੍ਹਨ੍ਤੀਪੀਤਿ ਏਤ੍ਥ ਪਿਸਦ੍ਦੋ ਸਹਸ੍ਸਤੋ ਓਰਂ ਪਨ ਪਗੇਵਾਤਿ ਦਸ੍ਸੇਤਿ. ਸਹਸ੍ਸਤੋ ਅਧਿਕਂ ਗਣ੍ਹਨ੍ਤੀਪਿ ਵਿਹਾਰਪਚ੍ਚਨ੍ਤੇ ਖਣ੍ਡਿਤੇ ਖਣ੍ਡਸੀਮਾਯੇਵ ਨਾਮ. ਤਨ੍ਤਿ ਖਣ੍ਡਸੀਮਂ.
ਤਤ੍ਰਾਤਿ ਖਣ੍ਡਸੀਮਮਹਾਸੀਮਾਸੁ ਆਧਾਰੇ ਭੁਮ੍ਮਂ. ਅਥਾਤਿ ਅਨਨ੍ਤਰਂ. ਏਵਨ੍ਤਿ ਇਮਾਯ ਅਵਿਪ੍ਪਵਾਸਕਮ੍ਮਵਾਚਾਯ ਸਮ੍ਮਨਿਯਮਾਨੇ. ਹੀਤਿ ਫਲਜੋਤਕੋ. ਸੀਮਨ੍ਤਿ ਸਮਾਨਸਂਵਾਸਕਸੀਮਂ. ਨ ਸਕ੍ਖਿਸ੍ਸਨ੍ਤੀਤਿ ਪਠਮਂ ਅਵਿਪ੍ਪਵਾਸਂ ਅਸਮੂਹਨਿਤ੍ਵਾ ਸੀਮਂ ਸਮੂਹਨਿਤੁਂ ਨ ਸਕ੍ਖਿਸ੍ਸਨ੍ਤਿ. ਸੀਮਨ੍ਤਰਿਕਪਾਸਾਣਾਤਿ ਦ੍ਵਿਨ੍ਨਂ ਸੀਮਾਨਂ ਅਨ੍ਤਰੇ ਵੇਮਜ੍ਝੇ ਠਪਿਤਾ ਪਾਸਾਣਾ. ਚਤੁਰਙ੍ਗੁਲਪਮਾਣਾਪੀਤਿ ਪਿਸਦ੍ਦੋ ਏਕਙ੍ਗੁਲਿਪਮਾਣਾਪਿ ਵਟ੍ਟਤੀਤਿ ਦਸ੍ਸੇਤਿ.
ਸਮਨ੍ਤਾਤਿ ਖਣ੍ਡਸੀਮਾਯ ਸਮਨ੍ਤਾ. ਅਨੁਪਰਿਯਾਯਨ੍ਤੇਹੀਤਿ ਅਨੁਕ੍ਕਮੇਨ ਖਣ੍ਡਸੀਮਪਰਿਯਾਯਨ੍ਤੇਹਿ ਭਿਕ੍ਖੂਹੀਤਿ ਸਮ੍ਬਨ੍ਧੋ. ਤਤੋਤਿ ਤੇਹਿ ਸੀਮਨ੍ਤਰਿਕਪਾਸਾਣੇਹਿ, ਦ੍ਵਿਨ੍ਨਂ ਸੀਮਾਨਂ ਨਿਮਿਤ੍ਤਾਨਿ ਪਠਮਂ ਕਿਤ੍ਤੇਤ੍ਵਾ ਪਚ੍ਛਾ ਤਾਸੁ ਯਂ ਇਚ੍ਛਨ੍ਤਿ, ਤਂ ਬਨ੍ਧਿਤਬ੍ਬਭਾਵਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਯਥਿਚ੍ਛਿਤਂ ਬਨ੍ਧਿਤੁਂ ਵਟ੍ਟਨ੍ਤੋਪਿ ਪੋਰਾਣਾਚਿਣ੍ਣਂ ਦਸ੍ਸੇਤੁਂ ਵੁਤ੍ਤਂ ‘‘ਏਵਂ ਸਨ੍ਤੇਪੀ’’ਤਿਆਦਿ. ਉਭਿਨ੍ਨਮ੍ਪੀਤਿ ਦ੍ਵੀਸੁ ਸੀਮਾਸੁ ਠਿਤਾਨਂ ਉਭਿਨ੍ਨਮ੍ਪਿ ਕਮ੍ਮਨ੍ਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ, ਯਸ੍ਮਾ ਵਾ.
ਚਸਦ੍ਦੋ ਵਾਕ੍ਯਾਰਮ੍ਭਜੋਤਕੋ. ਏਸਾ ਸੀਮਾ ਨਾਮਾਤਿ ਯੋਜਨਾ. ਤਤ੍ਥਾਤਿ ਪਿਟ੍ਠਿਪਾਸਾਣਾਦੀਸੁ ਪਞ੍ਚਸੁ ਠਾਨੇਸੁ. ਨਿਮਿਤ੍ਤਪਾਸਾਣਾ ਯਥਾਠਾਨੇ ਨ ਤਿਟ੍ਠਨ੍ਤੀਤਿ ਪਿਟ੍ਠਿਪਾਸਾਣਸ੍ਸੁਪਰਿ ਨਿਮਿਤ੍ਤਪਾਸਾਣਂ ਠਪਿਤਮਤ੍ਤਂ ਸਨ੍ਧਾਯ ਵੁਤ੍ਤਂ. ਪਿਟ੍ਠਿਪਾਸਾਣਂ ਪਨ ਵਿਜ੍ਝਿਤ੍ਵਾ ਨਿਮਿਤ੍ਤਪਾਸਾਣਂ ਤਤ੍ਥ ਨਿਖਣਿਤ੍ਵਾ ਯਥਾ ਠਾਨਾ ਨ ਚਾਵੇਨ੍ਤਿ, ਤਥਾ ਠਪੇਨ੍ਤਿ. ਏਵਂ ਸਨ੍ਤੇ ਯਥਾਠਾਨੇ ਤਿਟ੍ਠਨ੍ਤਿਯੇਵਾਤਿ ਦਟ੍ਠਬ੍ਬਂ. ਨ ਸੀਮਾਤਿ ਸੀਮਾਯ ਪਥਵਿਸਨ੍ਧਾਰਕਂ ਉਦਕਂ ਪਰਿਯਨ੍ਤਂਕਤ੍ਵਾ ਗਤਤ੍ਤਾ ਸੀਮਾ ਨ ਝਾਯਤਿ.
ਕੁਟਿਗੇਹੇਪੀਤਿ ਏਤ੍ਥ ਕੁਟੀਤਿ ਚ ਗੇਹਨ੍ਤਿ ਚ ਅਗਾਰਸ੍ਸੇਵ ਨਾਮਂ. ਅਗਾਰਞ੍ਹਿ ਸੀਤਾਦਿਦੁਕ੍ਖਸ੍ਸ ਕੁਟਨਟ੍ਠੇਨ ਛਿਨ੍ਦਨਟ੍ਠੇਨ ਚ ਨਾਨਾਦਬ੍ਬਸਮ੍ਭਾਰਸ੍ਸ ਗਹਣਟ੍ਠੇਨ ਚ ਕੁਟਿਗੇਹਨ੍ਤਿ ਵੁਚ੍ਚਤਿ. ਕੁਟਿ ਏਵ ਗੇਹਂ ਕੁਟਿਗੇਹਂ, ਤਸ੍ਮਿਮ੍ਪਿ. ਭਿਤ੍ਤਿਂ ਅਕਿਤ੍ਤੇਤ੍ਵਾਤਿ ਇਦਂ ਇਟ੍ਠਕਦਾਰੁਮਯਂ ਭਿਤ੍ਤਿਂ ਸਨ੍ਧਾਯ ਵੁਤ੍ਤਂ. ਸਚੇ ਸਿਲਾਮਯਾ ਭਿਤ੍ਤਿ ਨਿਮਿਤ੍ਤੂਪਗਾ ਭਵੇਯ੍ਯ, ਭਿਤ੍ਤਿਪਿ ਕਿਤ੍ਤੇਤਬ੍ਬਾ. ਅਨ੍ਤੋ ਕਰਿਤ੍ਵਾਤਿ ਕੁਟਿਗੇਹਸ੍ਸ ਭਿਤ੍ਤਿਯਾ ਵਾ ਅਨ੍ਤੋ ਕਤ੍ਵਾ. ਪਮੁਖੇਤਿ ਕੁਟਿਗੇਹਸ੍ਸ ਆਲਿਨ੍ਦੇ. ਨਿਬ੍ਬੋਦਕਪਤਨਟ੍ਠਾਨੇਤਿ ਨਿਗ੍ਗਲਿਤ੍ਵਾ ਉਦਕਸ੍ਸ ਪਤਨਟ੍ਠਾਨੇ. ਏਵਂ ਸਮ੍ਮਤਾਯ ਸੀਮਾਯਾਤਿ ਯੋਜਨਾ.
‘‘ਕੁਟ੍ਟਂ ਅਕਿਤ੍ਤੇਤ੍ਵਾ’’ਤਿ ਇਦਂ ਪੁਰਿਮਨਯੇਨੇਵ ਵੇਦਿਤਬ੍ਬਂ. ਅਨ੍ਤੋਤਿ ਲੇਣਸ੍ਸ, ਕੁਟ੍ਟਸ੍ਸ ਵਾ ਅਨ੍ਤੋ. ਓਕਾਸੇਤਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੇ. ਏਵਨ੍ਤਿ ਇਮਿਨਾਕਾਰੇਨ ਸਮ੍ਮਨਿਯਮਾਨੇ. ਅਨ੍ਤੋਤਿ ਭਿਤ੍ਤਿਯਾ ਅਨ੍ਤੋ.
ਹੇਟ੍ਠਾ ਨ ਓਤਰਤੀਤਿ ਹੇਟ੍ਠਾ ਆਕਾਸਤਲਤ੍ਤਾ ਨ ਓਤਰਤਿ. ਨਨੁ ਥਮ੍ਭੇ ਅਨੁਸਾਰਿਤ੍ਵਾ ਓਤਰਣੋ ਭਵੇਯ੍ਯ, ਕਸ੍ਮਾ ਨ ਓਤਰਤੀਤਿ? ਥਮ੍ਭਾਨਮੁਪਰਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਾਭਾਵਤੋਤਿ ਦਟ੍ਠਬ੍ਬਂ. ਹੇਟ੍ਠਾ ਓਤਰਣਾਕਾਰਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਤੁਲਾਨਨ੍ਤਿ ਥਮ੍ਭਾਨਮੁਪਰਿ ਤਿਰਿਯਵਸੇਨ ਠਿਤਾਨਂ ਰੁਕ੍ਖਵਿਸੇਸਾਨਂ. ਉਟ੍ਠਹਿਤ੍ਵਾਤਿ ਭੂਮਿਤੋ ਉਟ੍ਠਹਿਤ੍ਵਾ. ਤੁਲਾਰੁਕ੍ਖੇਹੀਤਿ ਤੁਲਾਸਙ੍ਖਾਤੇਹਿ ਰੁਕ੍ਖੇਹਿ. ‘‘ਏਕਸਮ੍ਬਨ੍ਧੋ’’ਤਿ ਇਮਿਨਾ ਨ ਕੇਵਲਂ ਤੁਲਾਰੁਕ੍ਖੇਹੇਵ ਏਕਸਮ੍ਬਨ੍ਧੋ, ਚਤੂਸੁ ਦਿਸਾਸੁ ਚਤੁਨ੍ਨਂ ਭਿਤ੍ਤੀਨਂ ਅਞ੍ਞਮਞ੍ਞਮ੍ਪਿ ਸਮ੍ਬਨ੍ਧੋਤਿ ਦਸ੍ਸੇਤਿ. ਹੇਟ੍ਠਾਪਿ ਓਤਰਤੀਤਿ ਭਿਤ੍ਤੀਨਮੁਪਰਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਪਹੋਨਕਤ੍ਤਾ ਵੁਤ੍ਤਂ. ਸਚੇ ਥਮ੍ਭਮਤ੍ਥਕੇ…ਪੇ… ਹੋਤੀਤਿ ਇਮਿਨਾ ਬਹੂਹਿ ਥਮ੍ਭੇਹਿ ਕਤਪਾਸਾਦਸ੍ਸ ਏਕੇਕਸ੍ਮਿਂ ਥਮ੍ਭਮਤ੍ਥਕੇ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੇ ਸਤਿ ਹੇਟ੍ਠਾ ਓਤਰਤੀਤਿ ਦਸ੍ਸੇਤਿ. ਨਿਯ੍ਯੂਹਕਾਦੀਸੂਤਿ ਨਾਗਦਨ੍ਤਕਾਦੀਸੁ. ਆਦਿਸਦ੍ਦੇਨ ਭਿਤ੍ਤਿਖਿਲਾਦਯੋ ਸਙ੍ਗਣ੍ਹਾਤਿ. ਭਿਤ੍ਤਿ ਚਾਤਿ ਇਟ੍ਠਕਦਾਰੁਮਯਾ ਭਿਤ੍ਤਿ ਚ. ਸਚੇ ਸਿਲਾਮਯਾ ਭਿਤ੍ਤਿ ਚ ਥਮ੍ਭਾ ਚ ਹੋਨ੍ਤਿ, ਕਿਤ੍ਤੇਤਬ੍ਬਾ. ਭਿਤ੍ਤਿਲਗ੍ਗੇਤਿ ਭਿਤ੍ਤੀਸੁ ਲਗ੍ਗੇ, ਭਿਤ੍ਤੀਨਂ ਵਾ ਲਗ੍ਗਟ੍ਠਾਨੇ. ਹੇਟ੍ਠਾਪਾਸਾਦਸ੍ਸਾਤਿ ਹੇਟ੍ਠਾਪਾਸਾਦੇ ‘‘ਠਿਤ’’ਇਤਿ ਪਦੇ ਸਮ੍ਬਨ੍ਧੋ. ਹੇਟ੍ਠਾਪਾਸਾਦਸ੍ਸ ਵਾ ਥਮ੍ਭਾਨਨ੍ਤਿ ਯੋਜਨਾ. ਹੇਟ੍ਠਾ ਸਮ੍ਮਤਾਯ ਸੀਮਾਯ ਉਪਰਿ ਆਰੋਹਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਨਿਬ੍ਬੋਦਕਪਤਨਟ੍ਠਾਨੇਤਿ ਛਦਨਕੋਟਿਯਂ.
ਤਤ੍ਥਾਤਿ ਤਸ੍ਮਿਂ ਤਲੇ. ਪਿਟ੍ਠਿਪਾਸਾਣੇ ਸੀਮਂ ਬਨ੍ਧਨ੍ਤਿ ਵਿਯ ਬਨ੍ਧਨ੍ਤੀਤਿ ਯੋਜਨਾ. ਤੇਨੇਵ ਪਰਿਚ੍ਛੇਦੇਨਾਤਿ ਤੇਨੇਵ ਤਲਪਰਿਚ੍ਛੇਦੇਨ. ਤਾਲਮੂਲਪਬ੍ਬਤੇਪੀਤਿ ਏਤ੍ਥ ਤਾਲਮੂਲਂ ਨਾਮ ਹੇਟ੍ਠਾ ਮਹਨ੍ਤਂ ਹੁਤ੍ਵਾ ਅਨੁਪੁਬ੍ਬੇਨ ਤਨੁਕਂ ਹੋਤਿ, ਤੇਨ ਸਦਿਸੇ ਪਬ੍ਬਤੇਪਿ. ਵਿਤਾਨਸਣ੍ਠਾਨੋਤਿ ਉਲ੍ਲੋਚਸ੍ਸ ਸਣ੍ਠਾਨੋ. ਚਤੂਸੁ ਦਿਸਾਸੁ ਨਿਗ੍ਗਤਸਾਖਰੁਕ੍ਖਸਣ੍ਠਾਨੋ ਵਾ ਖੁਜ੍ਜਰੁਕ੍ਖਸਣ੍ਠਾਨੋ ਵਾ ਹੋਤਿ. ਯਥਾ ਪਬ੍ਬਤੋ ਵਿਤਾਨਸਣ੍ਠਾਨੋ ਹੋਤਿ, ਏਵਂ ਮੁਦਿਙ੍ਗਸਣ੍ਠਾਨੋ ਵਾ ਹੋਤਿ ਪਣਵਸਣ੍ਠਾਨੋ ਵਾਤਿ ਯੋਜਨਾ. ਤਤ੍ਥ ਮੁਦਿਙ੍ਗੋ ਮਜ੍ਝੇ ਥੂਲੋ ਹੋਤਿ, ਮੂਲੇ ਚ ਅਨ੍ਤੇ ਚ ਤਨੁਕੋ. ਪਣਵੋ ਮਜ੍ਝੇ ਤਨੁਕੋ ਹੋਤਿ, ਮੂਲੇ ਚ ਅਗ੍ਗੇ ਚ ਥੂਲੋ. ਤੇਸਂ ਸਣ੍ਠਾਨੋ ਮੁਦਿਙ੍ਗਸਣ੍ਠਾਨੋ ਵਾ ਪਣਵਸਣ੍ਠਾਨੋ ਵਾ. ਹੇਟ੍ਠਾ ਵਾਤਿ ਮੁਦਿਙ੍ਗਸਣ੍ਠਾਨਸ੍ਸ ਪਬ੍ਬਤਸ੍ਸ ਹੇਟ੍ਠਾ ਵਾ. ਮਜ੍ਝੇ ਵਾਤਿ ਪਣਵਸਣ੍ਠਾਨਸ੍ਸ ਮਜ੍ਝੇ ਵਾ. ਦ੍ਵੇ ਕੂਟਾਨੀਤਿ ਦ੍ਵੇ ਸਿਖਰਾਨਿ. ਕੂਟਨ੍ਤਰਨ੍ਤਿ ਕੂਟਾਨਂ ਮਜ੍ਝਂ. ਚਿਨਿਤ੍ਵਾ ਵਾਤਿ ਇਟ੍ਠਕਸਿਲਾਹਿ ਚਿਨਿਤ੍ਵਾ ਵਾ. ਪੂਰੇਤ੍ਵਾ ਵਾਤਿ ਪਂਸੁਵਾਲਿਕਾਹਿ ਪੂਰੇਤ੍ਵਾ ਵਾ.
ਸਪ੍ਪਫਣਸਦਿਸੋਤਿ ਸਪ੍ਪਸ੍ਸ ਫਣੇਨ ਸਦਿਸੋ, ਖੁਜ੍ਜੋ ਪਬ੍ਬਤੋਤਿ ਅਤ੍ਥੋ. ਆਕਾਸਪਬ੍ਭਾਰਨ੍ਤਿ ਭਿਤ੍ਤਿਯਾ ਅਪਰਿਕ੍ਖਿਤ੍ਤਂ ਆਕਾਸਸਙ੍ਖਾਤਂ ਪਬ੍ਭਾਰਂ. ਸੀਮਪ੍ਪਮਾਣੋਤਿ ਸਦ੍ਧਿਂ ਅਨ੍ਤੋਸੁਸਿਰੇਨ ਸੀਮਪ੍ਪਮਾਣੋ. ਅਗ੍ਗਕੋਟਿਨ੍ਤਿ ਅਗ੍ਗਸਙ੍ਖਾਤਂ ਕੋਟਿਂ. ਸਚੇ ਪਨ ਪਬ੍ਬਤਸ੍ਸ ਹੇਟ੍ਠਾ ਅਨ੍ਤੋਲੇਣਂ ਹੋਤੀਤਿ ਸਮ੍ਬਨ੍ਧੋ. ਉਪਰਿਮਸ੍ਸਾਤਿ ਅਨ੍ਤੋਲੇਣਸ੍ਸ ਉਪਰਿ ਠਿਤਸ੍ਸ. ਪਾਰਤੋਤਿ ਬਾਹਿਰਤੋ. ਅਸ੍ਸਾਤਿ ਪਬ੍ਬਤਸ੍ਸ ਬਹੀਤਿ ਸਮ੍ਬਨ੍ਧੋ. ਓਰਤੋਤਿ ਅਨ੍ਤਤੋ. ਲੇਣਂ ਹੋਤੀਤਿ ਸਮ੍ਬਨ੍ਧੋ. ਕਿਤ੍ਤਕਂ ਮਹਨ੍ਤਨ੍ਤਿ ਆਹ ‘‘ਸੀਮਾਪਰਿਚ੍ਛੇਦਮਤਿਕ੍ਕਮਿਤ੍ਵਾ ਠਿਤ’’ਨ੍ਤਿ. ਕਿਤ੍ਤਕਂ ਖੁਦ੍ਦਕਨ੍ਤਿ ਆਹ ‘‘ਸਬ੍ਬਪਚ੍ਛਿਮਸੀਮਾਪਰਿਮਾਣ’’ਨ੍ਤਿ. ਤਨ੍ਤਿ ਖੁਦ੍ਦਕਂ ਲੇਣਂ. ਅਤਿਖੁਦ੍ਦਕਨ੍ਤਿ ਸਬ੍ਬਪਚ੍ਛਿਮਸੀਮਾਪਰਿਮਾਣਾਭਾਵਤੋ ਅਤਿਖੁਦ੍ਦਕਂ. ਤਤੋਤਿ ਉਪਰਿਸੀਮਤੋ. ਬਹੀਤਿ ਸੀਮਤੋ ਬਹਿ. ‘‘ਯਦਿ ਸੀਮਪ੍ਪਮਾਣਂ, ਸੀਮਾ ਹੋਤਿਯੇਵਾ’’ਤਿ ਇਮਿਨਾ ਯਦਿ ਨ ਸੀਮਪ੍ਪਮਾਣਂ, ਨ ਸੀਮਾ ਹੋਤਿਯੇਵਾਤਿ ਦਸ੍ਸੇਤਿ.
ਤਨ੍ਤਿ ਖਣ੍ਡਸੀਮਂ. ਪੂਰੇਤ੍ਵਾਤਿ ਇਟ੍ਠਕਮਤ੍ਤਿਕਾਦੀਹਿ ਪੂਰੇਤ੍ਵਾ. ਅਟ੍ਟਂ ਬਨ੍ਧਿਤ੍ਵਾਤਿ ਅਟ੍ਟਾਲਕਂ ਬਨ੍ਧਿਤ੍ਵਾ. ਉਮਙ੍ਗਨਦੀਤਿ ਏਤ੍ਥ ਉਕਾਰੋ ਓਕਾਰਵਿਪਰੀਤੋ, ਤਸ੍ਮਾ ਪਥਵਿਯਂ ਓਤਰਿਤ੍ਵਾ ਪਵਿਸਿਤ੍ਵਾ ਮਙ੍ਗਤਿ ਗਚ੍ਛਤੀਤਿ ਉਮਙ੍ਗਾਤਿ ਅਤ੍ਥੋ ਦਟ੍ਠਬ੍ਬੋ. ਉਮਙ੍ਗਾਚ ਸਾ ਨਦੀ ਚੇਤਿ ਉਮਙ੍ਗਨਦੀ. ਤਤ੍ਥਾਤਿ ਉਮਙ੍ਗਨਦਿਯਂ. ਹੇਟ੍ਠਾਪਥਵਿਤਲੇ ਠਿਤੋਤਿ ਸੀਮਾਯ ਹੇਟ੍ਠਾਪਥਵਿਤਲੇ ਇਦ੍ਧਿਯਾ ਠਿਤੋ.
ਸੀਮਾਮਾਲ਼ਕੇਤਿ ਖਣ੍ਡਸੀਮਾਯ ਮਾਲ਼ਕੇ. ਵਟਰੁਕ੍ਖੋਤਿ ਨਿਗ੍ਰੋਧਰੁਕ੍ਖੋ. ਤਤੋਤਿ ਵਟਰੁਕ੍ਖਤੋ. ਨਿਗ੍ਗਤਪਾਰੋਹੋਤਿ ਪਵਦ੍ਧਂਵ ਹੁਤ੍ਵਾ ਰੁਕ੍ਖੋ ਆਰੋਹਤਿ ਅਨੇਨਾਤਿ ਪਾਰੋਹੋ, ਏਕੋ ਮੂਲਵਿਸੇਸੋ. ਨਿਗ੍ਗਤੋ ਪਾਰੋਹੋ ਨਿਗ੍ਗਤਪਾਰੋਹੋ. ਮਹਾਸੀਮਂ ਸੋਧੇਤ੍ਵਾਤਿ ਏਤ੍ਥ ਸੋਧਨਂ ਨਾਮ ਮਹਾਸੀਮਗਤਾਨਂ ਭਿਕ੍ਖੂਨਂ ਹਤ੍ਥਪਾਸਾਨਯਨਂ, ਸੀਮਤੋ ਵਾ ਬਹਿਕਰਣਂ. ਬਹਿਦ੍ਧਾਤਿ ਦ੍ਵੀਹਿ ਸੀਮਾਹਿ ਬਹਿਦ੍ਧਾ. ‘‘ਬਹਿਟ੍ਠਾ’’ਤਿਪਿ ਪਾਠੋ. ਬਹਿ ਠਿਤਾ ਕਾਤਬ੍ਬਾਤਿ ਅਤ੍ਥੋ. ਅਨਾਹਚ੍ਚਾਤਿ ਮਹਾਸੀਮਾਯ ਪਥਵੀਤਲਂ ਵਾ ਤਤ੍ਥਜਾਤਰੁਕ੍ਖਾਦੀਨਿ ਵਾ ਨ ਆਹਨਿਤ੍ਵਾ. ਏਵਨ੍ਤਿ ਯਥਾ ਖਣ੍ਡਸੀਮਾਯ, ਏਵਂ ਤਥਾਤਿ ਅਤ੍ਥੋ. ਸੀਮਾਮਾਲ਼ਕੇਤਿ ਖਣ੍ਡਸੀਮਾਮਾਲ਼ਕੇ.
ਸੀਮਾਮਾਲ਼ਕੇਤਿ ਦ੍ਵਿਨ੍ਨਂ ਸੀਮਾਨਂ ਅਙ੍ਗਣੇ. ਸੀਮਾਮਾਲ਼ਕਸ੍ਸਾਤਿ ਕਮ੍ਮਸ੍ਸ ਕਤਟ੍ਠਾਨਸ੍ਸ ਸੀਮਾਮਾਲ਼ਕਸ੍ਸ. ਵੇਹਾਸਟ੍ਠਿਤਸਾਖਾਯਾਤਿ ਕਮ੍ਮਸ੍ਸ ਅਕਤਟ੍ਠਾਨੇ ਸੀਮਾਮਾਲ਼ਕੇ ਉਟ੍ਠਿਤਾਯ ਵੇਹਾਸੇ ਠਿਤਾਯ ਸਾਖਾਯ. ਤਸ੍ਸਾਤਿ ਭਿਕ੍ਖੁਨੋ ਪਾਦਾ ਵਾ ਨਿਵਾਸਨਪਾਰੁਪਨਂ ਵਾਤਿ ਸਮ੍ਬਨ੍ਧੋ. ਪੁਰਿਮਨਯੇਪੀਤਿ ‘‘ਸੀਮਾਮਾਲ਼ਕੇ ਵਟਰੁਕ੍ਖੋ ਹੋਤੀ’’ਤਿਆਦਿਨਾ ਵੁਤ੍ਤੇ ਪੁਰਿਮਨਯੇਪਿ. ਤਤ੍ਰਾਤਿ ਪੁਰਿਮਨਯੇ. ਉਕ੍ਖਿਪਾਪੇਤ੍ਵਾ ਕਾਤੁਂ ਨ ਵਟ੍ਟਤੀਤਿ ਦ੍ਵੀਹਿ ਸੀਮਾਹਿ ਉਟ੍ਠਿਤਰੁਕ੍ਖਸ੍ਸ ਸਾਖਾ ਵਾ ਤਤੋ ਨਿਗ੍ਗਤਪਾਰੋਹੋ ਵਾ ਦ੍ਵੀਸੁ ਸੀਮਾਸੁ ਪਥਵੀਤਲਂ ਵਾ ਤਤ੍ਥ ਜਾਤਰੁਕ੍ਖਾਦੀਨਿ ਵਾ ਆਹਚ੍ਚ ਠਿਤਤ੍ਤਾ ਉਕ੍ਖਿਪਾਪੇਤ੍ਵਾ ਕਾਤੁਂ ਨ ਵਟ੍ਟਤਿ. ਆਨੇਤਬ੍ਬੋਤਿ ਏਤ੍ਥ ਦ੍ਵਿਕਮ੍ਮਿਕਾਯ ਨੀਧਾਤੁਯਾ ਅਪਧਾਨਕਮ੍ਮਸ੍ਸੇਵ ਵੁਤ੍ਤਤ੍ਤਾ ‘‘ਭਿਕ੍ਖੂ’’ਤਿ ਪਧਾਨਕਮ੍ਮਂ ਅਜ੍ਝਾਹਰਿਤਬ੍ਬਂ. ਅਬ੍ਭੁਗ੍ਗਚ੍ਛਤੀਤਿ ਅਬ੍ਭਂ ਆਕਾਸਂ ਉਗ੍ਗਚ੍ਛਤਿ. ਤਤ੍ਰਾਤਿ ਪਬ੍ਬਤੇ. ਕਸ੍ਮਾ ਆਨੇਤਬ੍ਬੋਤਿ ਆਹ ‘‘ਬਜ੍ਝਮਾਨਾਯੇਵ ਹੀ’’ਤਿਆਦਿ. ਤਤ੍ਥ ਬਜ੍ਝਮਾਨਾਯੇਵਾਤਿ ਕਮ੍ਮਵਾਚਾਯ ਬਜ੍ਝਮਾਨਾਯੇਵ. ਇਮਿਨਾ ਅਬਦ੍ਧਸੀਮਾ ਪਮਾਣਰਹਿਤਂ ਦੇਸਂ ਓਤਰਤੀਤਿ ਦਸ੍ਸੇਤਿ. ਯਂਕਿਞ੍ਚੀਤਿ ਯਂਕਿਞ੍ਚਿ ਪਬ੍ਬਤਾਦਿ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਸ੍ਮਿਂਚਿ ਠਾਨੇ. ਏਕਸਮ੍ਬਨ੍ਧੇਨਾਤਿ ਬਦ੍ਧਸੀਮਾਯ ਏਕਸਮ੍ਬਨ੍ਧੇਨ. ਇਤੀਤਿ ਤਸ੍ਮਾ ਆਨੇਤਬ੍ਬੋਤਿ ਯੋਜਨਾ.
੧੪੦. ਤੀਣਿ ਯੋਜਨਾਨਿ ਤਿਯੋਜਨਂ. ‘‘ਪਮਾਣ’’ਨ੍ਤਿ ਇਮਿਨਾ ਪਰਮਸਦ੍ਦਸ੍ਸ ਅਤਿਰੇਕਉਤ੍ਤਮਤ੍ਥੇ ਨਿਵਤ੍ਤੇਤਿ. ਏਤਿਸ੍ਸਾਤਿ ਸੀਮਾਯ. ਸਮ੍ਮਨਨ੍ਤੇਨ ਭਿਕ੍ਖੁਨਾਤਿ ਸਮ੍ਬਨ੍ਧੋ. ਕੋਣਤੋ ਮਿਨਿਤਂ ਕੋਣਨ੍ਤਿ ਯੋਜਨਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਆਪਤ੍ਤਿਞ੍ਚਾਤਿ ਦੁਕ੍ਕਟਾਪਤ੍ਤਿਞ੍ਚ.
ਪਾਰਯਤੀਤਿ ਅਜ੍ਝੋਤ੍ਥਰਤਿ. ‘‘ਕਿਤਕਾਭਿਧੇਯ੍ਯਲਿਙ੍ਗਾ’’ਤਿ (ਕਚ੍ਚਾਯਨਸਾਰੇ ੪੫ ਗਾਥਾਯਂ) ਵਚਨਤੋ ਅਭਿਧੇਯ੍ਯਭੂਤਂ ਸੀਮਂ ਸਨ੍ਧਾਯ ਇਤ੍ਥਿਲਿਙ੍ਗਵਸੇਨ ਪਾਰਾਤਿ ਵੁਤ੍ਤਂ. ਨਦਿਯਾਤਿ ਉਪਯੋਗਤ੍ਥੇ ਸਾਮਿਵਚਨਂ. ਨਦਿਨ੍ਤਿ ਹਿ ਅਤ੍ਥੋ. ਨਦਿਂ ਅਜ੍ਝੋਤ੍ਥਰਮਾਨਂ ਸੀਮਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਨਦਿਪਾਰਸੀਮਾਯਂ. ਯਤ੍ਥਸ੍ਸਾਤਿ ਏਤ੍ਥ ਯਤ੍ਥ ਅਸ੍ਸਾਤਿ ਪਦਵਿਭਾਗਂ ਦਸ੍ਸੇਨ੍ਤੋ ਆਹ ‘‘ਯਤ੍ਥ ਨਦਿਯਾ’’ਤਿਆਦਿ. ‘‘ਨਦਿਯਾ’’ਤਿ ਇਮਿਨਾ ਯਂਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਧੁਵਨਾਵਾਤਿ ਏਤ੍ਥ ਧੁਵਸਦ੍ਦੋ ਨਿਚ੍ਚਤ੍ਥੋਤਿ ਆਹ ‘‘ਨਿਚ੍ਚਸਞ੍ਚਰਣਨਾਵਾ’’ਤਿ. ਇਮਿਨਾ ਧੁਵੇਨ ਨਿਚ੍ਚੇਨ ਸਞ੍ਚਰਣਨਾਵਾ ਧੁਵਨਾਵਾਤਿ ਵਚਨਤ੍ਥਂ ਦਸ੍ਸੇਤਿ. ਅਸ੍ਸਾਤਿ ਹੋਤਿ, ਭਵੇਯ੍ਯ ਵਾ. ਨਾਵਾਯ ਪਮਾਣਂ ਦਸ੍ਸੇਨ੍ਤੋ ਆਹ ‘‘ਯਾ’’ਤਿਆਦਿ. ਤਤ੍ਥ ਯਾਤਿ ਨਾਵਾ. ਪਾਜਨਪੁਰਿਸੇਨਾਤਿ ਏਤ੍ਥ ਪਾਜਨਂ ਨਾਮ ਏਕੋ ਨਾਵਾਯ ਗਮਨੂਪਕਰਣਵਿਸੇਸੋ. ਸੋ ਹਿ ਪਜਤਿ ਨਾਵਾ ਗਚ੍ਛਤਿ ਅਨੇਨਾਤਿ ਪਾਜਨਨ੍ਤਿ ਵੁਚ੍ਚਤਿ. ਜਕਾਰਸ੍ਸ ਚਕਾਰਂ ਕਤ੍ਵਾ ਪਾਚਨਨ੍ਤਿਪਿ ਯੁਜ੍ਜਤੇਵ. ਤਸ੍ਸ ਗਾਹਕੇਨ ਪੁਰਿਸੇਨ ਸਦ੍ਧਿਨ੍ਤਿ ਅਤ੍ਥੋ. ਸਾ ਨਾਵਾ ਨੀਤਾਤਿ ਸਮ੍ਬਨ੍ਧੋ. ਉਦ੍ਧਂ ਵਾ ਅਧੋ ਵਾਤਿ ਨਦਿਯਾ ਪਟਿਸੋਤਂ ਵਾ ਹੇਟ੍ਠਾਸੋਤਂ ਵਾ. ਥੇਨੇਹਿ ਵਾਤਿ ਚੋਰੇਹਿ ਵਾ. ਕਿਞ੍ਚਾਪਿ ਹਟਾ, ਪਨ ਤਥਾਪਿ ਅਵਸ੍ਸਂ ਲਬ੍ਭਨੇਯ੍ਯਾ, ਧੁਵਨਾਵਾਵ ਹੋਤੀਤਿ ਯੋਜਨਾ. ਵਾਤੇਨ ਵਾਤਿ ਮਾਲੁਤੇਨ ਵਾ ‘‘ਛਿਨ੍ਨ’’ਇਤਿ ਸਮ੍ਬਨ੍ਧੋ. ਵੀਚੀਹੀਤਿ ਤਰਙ੍ਗੇਹਿ. ਤਰਙ੍ਗੋ ਹਿ ਵਿਚਿਤ੍ਤਾਕਾਰੇਨ ਚਿਨੋਤਿ ਵਡ੍ਢਤੀਤਿ ਵੀਚੀਤਿ ਵੁਚ੍ਚਤਿ. ਕਿਞ੍ਚਾਪਿ ਨਦੀਮਜ੍ਝਂ ਨੀਤਾ, ਪਨ ਤਥਾਪਿ ਅਵਸ੍ਸਂ ਆਹਰਿਤਬ੍ਬਾ, ਧੁਵਨਾਵਾਵ ਹੋਤੀਤਿ ਯੋਜਨਾ. ਓਗਤੇਤਿ ਓਤਰਿਤ੍ਵਾ ਗਤੇ. ਥਲਂ ਉਸ੍ਸਾਰਿਤਾਤਿ ਥਲਂ ਉਕ੍ਖਿਪਿਤ੍ਵਾ ਸਾਰਿਤਾ ਪਾਪਿਤਾ ਨਾਵਾਪੀਤਿ ਸਮ੍ਬਨ੍ਧੋ. ਵਿਸਙ੍ਖਤਪਦਰਾਤਿ ਸਙ੍ਖਤਵਿਰਹਿਤਫਲਕਾ ਵਾ. ਧੁਵਨਾਵਾਵ ਹੋਤੀਤਿ ਨਿਮਿਤ੍ਤਕਿਤ੍ਤਨਕਾਲੇ ਨਿਚ੍ਚਸਞ੍ਚਰਣਨਾਵਤ੍ਤਾ ਧੁਵਨਾਵਾਵ ਹੋਤੀਤਿ ਅਧਿਪ੍ਪਾਯੋ. ਤਤ੍ਰਾਤਿ ‘‘ਧੁਵਨਾਵਾ’’ਤਿਵਚਨੇ. ਨਿਮਿਤ੍ਤਂ ਵਾ ਸੀਮਾ ਵਾ ਕਮ੍ਮਵਾਚਾਯ ਗਚ੍ਛਤੀਤਿ ਏਤ੍ਥ ਕਿਞ੍ਚਾਪਿ ਨ ਨਿਮਿਤ੍ਤਂ ਕਮ੍ਮਵਾਚਾਯ ਗਚ੍ਛਤਿ, ਸੀਮਾਯ ਪਨ ਅਵਿਨਾਭਾਵਤੋ ਵੁਤ੍ਤਂ ‘‘ਕਮ੍ਮਵਾਚਾਯ ਗਚ੍ਛਤੀ’’ਤਿ. ਤਸ੍ਮਾਤਿ ਯਸ੍ਮਾਵ ਨਾਵਾਯ ਆਗਚ੍ਛਨ੍ਤਾਪਿ ਭਗਵਤਾ ਅਨੁਞ੍ਞਾਤਾ, ਤਸ੍ਮਾ.
ਯਤ੍ਥਾਤਿ ਨਦਿਪਾਰਸੀਮਸਮ੍ਮਨਨਟ੍ਠਾਨੇ. ਰੁਕ੍ਖਸਙ੍ਘਾਟਮਯੋਤਿ ਰੁਕ੍ਖਸਮੂਹੇਨ ਕਤੋ. ਪਦਰਬਦ੍ਧੋਤਿ ਫਲਕੇਹਿ ਬਦ੍ਧੋ. ਸਞ੍ਚਰਣਯੋਗ੍ਗੋਤਿ ਸਞ੍ਚਰਣਕ੍ਖਮੋ. ਪਾਲ਼ਿਯਂ ‘‘ਅਸ੍ਸਾ’’ਤਿ ਠਾਨੇ ਅਟ੍ਠਕਥਾਯਂ ‘‘ਅਤ੍ਥੀ’’ਤਿ ਵੁਤ੍ਤਤ੍ਤਾ ‘‘ਅਸ੍ਸਾ’’ਤਿਪਦਸ੍ਸ ਹੋਤੀਤਿ ਅਤ੍ਥੋਯੇਵ ਦਟ੍ਠਬ੍ਬੋ. ਤਂਖਣਞ੍ਞੇਵਾਤਿ ਤਸ੍ਮਿਂ ਨਿਮਿਤ੍ਤਕਿਤ੍ਤਕ੍ਖਣੇਯੇਵ. ਰੁਕ੍ਖਂ ਛਿਨ੍ਦਿਤ੍ਵਾ ਕਤੋਤਿ ਸਮ੍ਬਨ੍ਧੋ. ਏਕਪਦਿਕਸੇਤੂਤਿ ਏਕੇਨ ਪਦੇਨ ਗਮਨਯੋਗ੍ਗੋ ਏਕਪਦਿਕੋ, ਸੋਯੇਵ ਸੇਤੂਤਿ ਏਕਪਦਿਕਸੇਤੁ. ਅਕਪ੍ਪਿਯਸੇਤੁਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਤੇਨਾਤਿ ਸੇਤੁਨਾ. ਸਞ੍ਚਰਿਤੁਂ ਨ ਸਕ੍ਕਾ ਹੋਤੀਤਿ ਯੋਜਨਾ.
ਯਤ੍ਥਾਤਿ ਯਸ੍ਮਿਂ ਨਦਿਪਾਰਸੀਮਸਮ੍ਮਨਨਟ੍ਠਾਨੇ. ਅਭਿਮੁਖਤਿਤ੍ਥੇਯੇਵਾਤਿ ਸੀਮਾਯ ਅਭਿਮੁਖਤਿਤ੍ਥੇ ਏਵ. ਧੁਵਨਾਵਾ ਵਾ ਧੁਵਸੇਤੁ ਵਾ ਅਭਿਮੁਖਤਿਤ੍ਥਤੋ ਈਸਕਂ ਉਦ੍ਧਂ ਆਰੋਹਨ੍ਤੋਪਿ ਅਧੋ ਓਰੋਹਨ੍ਤੋਪਿ ਕਪ੍ਪਤੀਤਿ ਦਸ੍ਸੇਨ੍ਤੋ ਆਹ ‘‘ਸਚੇ’’ਤਿਆਦਿ. ਈਸਕਨ੍ਤਿ ਏਕਉਸਭ ਦ੍ਵਿਉਸਭਾਦਿਵਸੇਨ ਮਨਂ ਅਪ੍ਪਮਤ੍ਤਂ. ਉਦ੍ਧਂ ਵਾਤਿ ਅਭਿਮੁਖਤਿਤ੍ਥਤੋ ਉਪਰਿ ਵਾ. ਅਧੋ ਵਾਤਿ ਤਤੋ ਹੇਟ੍ਠਾ ਵਾ. ਗਾਵੁਤਮਤ੍ਤਬ੍ਭਨ੍ਤਰੇਤਿ ਗਾਵੁਤਪਮਾਣਸ੍ਸ ਠਾਨਸ੍ਸ ਅਬ੍ਭਨ੍ਤਰੇ.
ਸਹਨਿਮਿਤ੍ਤਕਿਤ੍ਤਨਵਿਧਿਨਾ ਸਮ੍ਮਨਿਤਬ੍ਬਵਿਧਿਂ ਦਸ੍ਸੇਨ੍ਤੋ ਆਹ ‘‘ਇਮਞ੍ਚ ਪਨਾ’’ਤਿਆਦਿ. ਦ੍ਵੀਸੁ ਤੀਰੇਸੁ ਠਾਤੁਮਸਕ੍ਕੁਣੇਯ੍ਯਤ੍ਤਾ ਵੁਤ੍ਤਂ ‘‘ਏਕਸ੍ਮਿਂ ਤੀਰੇ ਠਤ੍ਵਾ’’ਤਿ. ਤਤੋਤਿ ਨਿਮਿਤ੍ਤਤੋ. ਅਤ੍ਤਾਨਨ੍ਤਿ ਨਿਮਿਤ੍ਤਕਿਤ੍ਤਨਂ ਵਿਨਯਧਰਂ ਸਨ੍ਧਾਯ ਵੁਤ੍ਤਂ. ਪਰਿਕ੍ਖਿਪਨ੍ਤੇਨਾਤਿ ਪਰਿਯਾਯਨ੍ਤੇਨ. ਤਸ੍ਸਾਤਿ ਤਤ੍ਤਕਸ੍ਸ ਪਰਿਚ੍ਛੇਦਸ੍ਸ. ਸਮ੍ਮੁਖਟ੍ਠਾਨੇਤਿ ਅਧੋਸੋਤੇ ਨਦਿਤੀਰੇ ਠਿਤਸ੍ਸ ਨਿਮਿਤ੍ਤਸ੍ਸ ਸਮ੍ਮੁਖਟ੍ਠਾਨੇ. ਤਤੋਤਿ ਨਿਮਿਤ੍ਤਤੋ. ਤਸ੍ਸਾਤਿ ਤਤ੍ਤਕਸ੍ਸ ਪਰਿਚ੍ਛੇਦਸ੍ਸ. ਸਮ੍ਮੁਖਾ ਨਦਿਤੀਰੇ ਨਿਮਿਤ੍ਤਂ ਅਤ੍ਥੀਤਿ ਸਮ੍ਬਨ੍ਧੋ. ਸਙ੍ਘਟੇਤਬ੍ਬਨ੍ਤਿ ਸਮ੍ਬਨ੍ਧਿਤਬ੍ਬਂ. ਅਥਾਤਿ ਨਿਮਿਤ੍ਤਕਿਤ੍ਤਨਤੋ ਪਚ੍ਛਾ. ‘‘ਸਬ੍ਬਨਿਮਿਤ੍ਤਾਨਂ ਅਨ੍ਤੋ ਠਿਤੇ ਭਿਕ੍ਖੂ ਹਤ੍ਥਪਾਸਗਤੇ ਕਤ੍ਵਾ’’ਤਿ ਇਦਂ ਸਬ੍ਬਂ ਏਕਂ ਗਾਮਖੇਤ੍ਤਂ ਬ੍ਯਾਪੇਤ੍ਵਾ ਸਮ੍ਮਨਿਤਭਾਵਂ ਸਨ੍ਧਾਯ ਵੁਤ੍ਤਂ. ਸਚੇ ਸਕਲਂ ਗਾਮਖੇਤ੍ਤਂ ਅਬ੍ਯਾਪੇਤ੍ਵਾ ਏਕਦੇਸੇ ਸਮ੍ਮਨਿਤਂ ਹੋਤਿ, ਨਿਮਿਤ੍ਤਤੋ ਬਹਿ ਠਿਤੇ ਭਿਕ੍ਖੂਪਿ ਹਤ੍ਥਪਾਸਗਤੇ ਕਤ੍ਵਾ ਸਮ੍ਮਨਿਤਬ੍ਬਾ. ਕਮ੍ਮਨ੍ਤਿ ਸੀਮਸਮ੍ਮੁਤਿਕਮ੍ਮਂ. ‘‘ਠਪੇਤ੍ਵਾ ਨਦਿ’’ਨ੍ਤਿਵਚਨਸ੍ਸ ਕਾਰਣਂ ਦਸ੍ਸੇਨ੍ਤੋ ਆਹ ‘‘ਨਦੀ ਪਨ ਬਦ੍ਧਸੀਮਸਙ੍ਖ੍ਯਂ ਨ ਗਚ੍ਛਤੀ’’ਤਿ.
ਦੀਪਕੋ ਹੋਤੀਤਿ ਏਤ੍ਥ ਦੀਪੋਤਿ ਅਨ੍ਤਰਦੀਪੋ. ਸੋ ਹਿ ਯਸ੍ਮਾ ਜਲਮਜ੍ਝੇ ਦਿਪ੍ਪਤਿ, ਯਸ੍ਮਾ ਚ ਦ੍ਵਿਧਾ ਆਪੋ ਏਤ੍ਥ ਸਨ੍ਦਤਿ, ਤਸ੍ਮਾ ਦੀਪੋਤਿ ਵੁਚ੍ਚਤਿ, ਸੋਯੇਵ ਖੁਦ੍ਦਕਟ੍ਠੇਨ ਦੀਪਕੋ. ਕਕਾਰੋ ਹਿ ਖੁਦ੍ਦਕਤ੍ਥਵਾਚਕੋ. ਤਨ੍ਤਿ ਦੀਪਕਂ. ਅਤ੍ਤਨਾਤਿ ਵਿਨਯਧਰੇਨ. ਓਰਿਮਨ੍ਤੇ ਚ ਪਾਰਿਮਨ੍ਤੇ ਚਾਤਿ ਅਧੋਸੋਤੇ ਨਦਿਤੀਰੇ ਠਿਤਸ੍ਸ ਨਿਮਿਤ੍ਤਸ੍ਸ ਸਮ੍ਮੁਖੇ ਓਰਿਮਨ੍ਤੇ ਚ ਪਾਰਿਮਨ੍ਤੇ ਚ. ਪਰਤੀਰੇ ਨਿਮਿਤ੍ਤਂ ਕਿਤ੍ਤੇਤ੍ਵਾਤਿ ਸਮ੍ਬਨ੍ਧੋ. ਕਿਸ੍ਸ ਸਮ੍ਮੁਖਟ੍ਠਾਨੇ ਨਿਮਿਤ੍ਤਨ੍ਤਿ ਆਹ ‘‘ਨਦਿਯਾ ਓਰਿਮਤੀਰੇ ਨਿਮਿਤ੍ਤਸ੍ਸ ਸਮ੍ਮੁਖਟ੍ਠਾਨੇ’’ਤਿ. ਤਤੋਤਿ ਨਿਮਿਤ੍ਤਤੋ. ਸਮ੍ਮੁਖਾ ਨਿਮਿਤ੍ਤਂ ਅਤ੍ਥੀਤਿ ਸਮ੍ਬਨ੍ਧੋ. ਪਾਰਿਮਨ੍ਤੇ ਚ ਓਰਿਮਨ੍ਤੇ ਚਾਤਿ ਪਰਤੀਰੇ ਉਪਰਿਸੋਤੇ ਠਿਤਸ੍ਸ ਨਿਮਿਤ੍ਤਸ੍ਸ ਸਮ੍ਮੁਖੇ ਪਾਰਿਮਨ੍ਤੇ ਚ ਓਰਿਮਨ੍ਤੇ ਚ. ਪਠਮਕਿਤ੍ਤਿਤਨਿਮਿਤ੍ਤੇਨਾਤਿ ਓਰਿਮਤੀਰੇ ਉਪਰਿਸੋਤੇ ਪਠਮਂ ਕਿਤ੍ਤਿਤੇਨ ਨਿਮਿਤ੍ਤੇਨ. ਏਕਾ ਸੀਮਾ ਇਮਸ੍ਸਾਤਿ ਏਕਸੀਮੋ, ਦੀਪਕੋ. ‘‘ਤੀਰਦ੍ਵਯਞ੍ਚਾ’’ਤਿ ਪਦਮਪੇਕ੍ਖਿਤ੍ਵਾ ‘‘ਏਕਸੀਮ’’ਨ੍ਤਿ ਸਮ੍ਬਨ੍ਧਿਤਬ੍ਬਂ. ਵਚ੍ਚਮਨਪੇਕ੍ਖਿਤ੍ਵਾ ‘‘ਏਕਸੀਮਾ’’ਤਿਪਿ ਨਿਚ੍ਚਇਤ੍ਥਿਲਿਙ੍ਗਵਸੇਨ ਪਾਠੋ ਅਤ੍ਥਿ.
ਉਦ੍ਧਂ ਵਾ ਅਧੋ ਵਾਤਿ ਏਤ੍ਥ ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਅਥਾਤਿ ਤਸ੍ਮਿਂ ਅਧਿਕਤਰੇ ਸਤੀਤਿ ਯੋਜਨਾ. ਵਿਹਾਰਸੀਮਪਰਿਚ੍ਛੇਦਨਿਮਿਤ੍ਤਸ੍ਸ ਉਜੁਕਮੇਵਾਤਿ ਸਚੇ ਦੀਪਕੋ ਅਧੋ ਅਧਿਕਤਰੋ ਹੋਤਿ, ਓਰਿਮਤੀਰੇ ਅਧੋਸੋਤੇ ਠਿਤਸ੍ਸ ਵਿਹਾਰਸੀਮਪਰਿਚ੍ਛੇਦਨਿਮਿਤ੍ਤਸ੍ਸ ਉਜੁਕਮੇਵ. ਸਿਖਰਨ੍ਤਿ ਸਿਙ੍ਗਂ. ਤਞ੍ਹਿ ਸਿਖਂ ਮਤ੍ਥਕਂ ਰਾਤਿ ਗਣ੍ਹਾਤੀਤਿ ਸਿਖਰਨ੍ਤਿ ਵੁਚ੍ਚਤਿ. ਤਤੋਤਿ ਦੀਪਕਸ੍ਸ ਪਾਰਿਮਨ੍ਤਨਿਮਿਤ੍ਤਤੋ. ਪਰਤੀਰਨਿਮਿਤ੍ਤਾਨਿ ਕਿਤ੍ਤੇਤ੍ਵਾਤਿ ਸਮ੍ਬਨ੍ਧੋ. ਅਯਂ ਦੀਪਕਸ੍ਸ ਵਿਹਾਰਸੀਮਪਰਿਚ੍ਛੇਦਤੋ ਅਧੋ ਅਧਿਕਤਰੇ ਵਿਨਿਚ੍ਛਯੋ. ਉਦ੍ਧਂ ਅਧਿਕਤਰੇਪਿ ਇਮਿਨਾਨੁਸਾਰੇਨ ਵੇਦਿਤਬ੍ਬੋਤਿ ਸੋ ਨ ਦਸ੍ਸਿਤੋ. ਪਬ੍ਬਤਸਣ੍ਠਾਨਾਤਿ ਪਬ੍ਬਤੇਨ ਸਮਂ ਠਾਨਂ ਏਤਿਸ੍ਸਾਤਿ ਪਬ੍ਬਤਸਣ੍ਠਾਨਾ.
ਉਦ੍ਧਮ੍ਪਿ ਅਧੋਪੀਤਿ ਪਿਸਦ੍ਦੋ ਸਮੁਚ੍ਚਯਤ੍ਥੋ. ਉਭੋਪਿ ਸਿਖਰਾਨੀਤਿ ਉਦ੍ਧਂ ਸਿਖਰਂ, ਅਧੋ ਸਿਖਰਨ੍ਤਿ ਉਭੋਪਿ ਸਿਖਰਾਨਿ. ਮੁਦਿਙ੍ਗਸਣ੍ਠਾਨਾਤਿ ਮੂਲੇ ਚ ਅਗ੍ਗੇ ਚ ਤਨੁਕਸ੍ਸ ਮਜ੍ਝੇ ਥੂਲਸ੍ਸ ਮੁਦਿਙ੍ਗਸ੍ਸ ਸਣ੍ਠਾਨਾ.
ਸਬ੍ਬਪਠਮੇਨ ਨਯੇਨਾਤਿ ਉਦ੍ਧਂ ਅਧਿਕਨਯਸ੍ਸ, ਅਧੋ ਅਧਿਕਨਯਸ੍ਸ, ਉਦ੍ਧਂਅਧੋਅਧਿਕਨਯਸ੍ਸ ਚਾਤਿ ਸਬ੍ਬੇਸਂ ਨਯਾਨਂ ਪਠਮੇਨ ਵਿਹਾਰਸੀਮਦੀਪਕਾਨਂ ਸਮੇਨ ਨਯੇਨ. ਪਣਵਸਣ੍ਠਾਨਾਤਿ ਮੂਲੇ ਚ ਅਗ੍ਗੇ ਚ ਥੂਲਸ੍ਸ ਮਜ੍ਝੇਤਨੁਕਸ੍ਸ ਪਣਵਸ੍ਸ ਸਣ੍ਠਾਨਾ.