੬੪. ਚਤ੍ਤਾਰੋਨਿਸ੍ਸਯਾਦਿਕਥਾ

੧੨੮. ਉਪਸਮ੍ਪਨ੍ਨਸਮਨਨ੍ਤਰਮੇਵਾਤਿ ਉਪਸਮ੍ਪਨ੍ਨੋ ਹੁਤ੍ਵਾ ਸਮਨਨ੍ਤਰਮੇਵ, ਨ ਕਾਲਨ੍ਤਰੇਤਿ ਅਤ੍ਥੋ. ਏਕਪੋਰਿਸਾਤਿ ਏਤ੍ਥ ਪੋਰਿਸਸਦ੍ਦੋ ਉਪਰਿ ਵਿਤ੍ਥਤੇ ਭੁਜਪਮਾਣੇ ਚ ਪੋਸਪਮਾਣੇ ਚ ਵਤ੍ਤਤਿ. ਪੁਰਿਸਸ੍ਸ ਪਮਾਣਾ ਪੋਰਿਸਾ, ਪਮਾਣਤ੍ਥੇ ਣਪਚ੍ਚਯੋ. ਛਾਯਾਤਿ ਆਤਪਾਭਾਵੋ. ਮੇਤਬ੍ਬਾਤਿ ਪਮੇਤਬ੍ਬਾ. ‘‘ਵਸ੍ਸਾਨੋ’’ਤਿਆਦਿ ‘‘ਉਤੁਪਮਾਣਂ ਆਚਿਕ੍ਖਿਤਬ੍ਬ’’ਨ੍ਤਿ ਏਤ੍ਥ ਆਚਿਕ੍ਖਣਾਕਾਰਦਸ੍ਸਨਂ. ਉਤੁਨੋ ਪਮਾਣਨ੍ਤਿ ਅਤ੍ਥਂ ਨਿਵਾਰੇਨ੍ਤੋ ਆਹ ‘‘ਏਤ੍ਥ ਚਾ’’ਤਿਆਦਿ. ਅਰਤਿ ਪੁਨਪ੍ਪੁਨਂ ਗਚ੍ਛਤੀਤਿ ਉਤੁ, ਪਮਿਯਤਿ ਸਂਵਚ੍ਛਰੋ ਪਰਿਚ੍ਛਿਜ੍ਜਿਯਤਿ ਅਨੇਨਾਤਿ ਪਮਾਣਂ. ਯਤ੍ਤਕੇਹਿ ਦਿਵਸੇਹਿ ਅਪਰਿਪੁਣ੍ਣੋਤਿ ਸਮ੍ਬਨ੍ਧੋ. ਯਸ੍ਸਾਤਿ ਦਿਵਸਭਾਗਸ੍ਸ. ਯੋ ਉਤੁ ਅਪਰਿਪੁਣ੍ਣੋ, ਤਸ੍ਸ ਉਤੁਨੋਤਿ ਪਾਠਸੇਸੋ ਯੋਜੇਤਬ੍ਬੋ. ‘‘ਉਤੁਪਮਾਣਂ ਆਚਿਕ੍ਖਿਤਬ੍ਬਂ, ਦਿਵਸਭਾਗੋ ਆਚਿਕ੍ਖਿਤਬ੍ਬੋ’’ਤਿ ਪਦਾਨਂ ਅਪਰਮ੍ਪਿ ਅਤ੍ਥਵਿਕਪ੍ਪਂ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਤਤ੍ਥ ਅਯਂ ਨਾਮ ਉਤੂਤਿ ਅਯਂ ਉਤੁ ਵਸ੍ਸਾਨੋ ਨਾਮਾਤਿ ਵਾ ਹੇਮਨ੍ਤੋ ਨਾਮਾਤਿ ਵਾ ਗਿਮ੍ਹੋ ਨਾਮਾਤਿ ਵਾ. ਪੁਬ੍ਬਨ੍ਹੋਤਿ ਅਹਸ੍ਸ ਪੁਬ੍ਬੋ ਪੁਬ੍ਬਨ੍ਹੋ. ਤਤ੍ਥ ਪਚ੍ਛਿਮਨਯੋਵ ਪਾਸਂਸਤਰੋ. ਕਸ੍ਮਾ? ਪੁਰਿਮਨਯੇ ਉਤੁਪਰਿਪੁਣ੍ਣੇ ਦਿਵਸਭਾਗਾਚਿਕ੍ਖਣਸ੍ਸ ਅਭਾਵਾ, ਪਚ੍ਛਿਮਨਯੇ ਪਨ ਪਰਿਪੁਣ੍ਣਂ ਵਾ ਅਪਰਿਪੁਣ੍ਣਂ ਵਾ ਉਤੁਪਮਾਣਂ ਆਚਿਕ੍ਖਿਤਬ੍ਬਂ. ਉਪਸਮ੍ਪਨ੍ਨਦਿਵਸਭਾਗੋਵ ‘‘ਪੁਬ੍ਬਨ੍ਹੋ’’ਤਿ ਵਾ ‘‘ਸਾਯਨ੍ਹੋ’’ਤਿ ਵਾ ਆਚਿਕ੍ਖਿਤਬ੍ਬੋ. ਸਂਗੀਤੀਤਿ ਏਤ੍ਥ ਸਂ ਏਕਤੋ ਕਤ੍ਵਾ ਗਾਯਿਤਬ੍ਬਾ ਕਥੇਤਬ੍ਬਾਤਿ ਸਂਗੀਤੀਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਇਦਮੇਵ ਸਬ੍ਬਂ ਏਕਤੋ ਕਤ੍ਵਾ’’ਤਿਆਦਿ. ਤਤ੍ਥ ਕਿਨ੍ਤਿ ਕਿਂ ਉਤੁਂ. ਇਦਂ ਨਾਮਾਤਿ ਇਦਂ ਨਾਮ ਉਤੁਂ. ਵਦੇਯ੍ਯਾਸੀਤਿ ਆਗਨ੍ਤੁਕਾਨਂ ਵੁਡ੍ਢਨਵਕਭਾਵਾਦਿਞਾਪਨਤ੍ਥਂ ਕਥੇਯ੍ਯਾਸਿ.

੧੨੯. ਦੁਤਿਯਨ੍ਤਿ ਸਹਾਯਂ ਭਿਕ੍ਖੁਂ ਵਾ ਸਾਮਣੇਰਂ ਵਾ ਪੁਰਿਸਂ ਵਾ. ਅਕਰਣੀਯਾਨੀਤਿ ਉਪਸਮ੍ਪਨ੍ਨੇਹਿ ਅਕਤ੍ਤਬ੍ਬਾਨਿ. ਪਣ੍ਡੁਪਲਾਸੋਤਿ ਏਤ੍ਥ ਪਣ੍ਡੂਤਿ ਸੇਤਪੀਤਮਿਸ੍ਸੋ ਵਣ੍ਣੋ, ਪਲਾਸਸਦ੍ਦੋ ਪਣ੍ਣਵਾਚਕੋ, ਨ ਹਰਿਤਵਾਚਕੋ, ਨਾਪਿ ਕਿਂਸੁਕਦੁਮਵਾਚਕੋਤਿ ਦਸ੍ਸੇਨ੍ਤੋ ਆਹ ‘‘ਪਣ੍ਡੁਵਣ੍ਣੋ ਪਣ੍ਣੋ’’ਤਿ. ਪਣ੍ਡੁਪਲਾਸੋਤਿ ਸਮਾਸੋਪਿ ਬ੍ਯਾਸੋਪਿ ਯੁਤ੍ਤੋਯੇਵ. ਸਮਾਸਕਾਲੇ ਪਣ੍ਡੁ ਯਸ੍ਸਤ੍ਥੀਤਿ ਪਣ੍ਡੁ, ਸੋਯੇਵ ਪਲਾਸੋ ਪਣ੍ਡੁਪਲਾਸੋਤਿ ਕਾਤਬ੍ਬੋ. ਪੁਪ੍ਫਫਲਾਦਿਂ ਬਨ੍ਧਤੀਤਿ ਬਨ੍ਧਨਨ੍ਤਿ ਵਚਨਤ੍ਥੇਨ ਬਨ੍ਧਨਸਦ੍ਦੋ ਵਣ੍ਟਪਰਿਯਾਯੋਤਿ ਆਹ ‘‘ਵਣ੍ਟਤੋ’’ਤਿ. ਪੁਥੁਸਿਲਾਤਿ (ਮ. ਨਿ. ਅਟ੍ਠ. ੩.੬੦) ਏਤ੍ਥ ਪੁਥੁਸਦ੍ਦੋ ਮਹਨ੍ਤਪਰਿਯਾਯੋਤਿ ਆਹ ‘‘ਮਹਾਸਿਲਾ’’ਤਿ.

੧੩੦. ਤਸ੍ਸਾਤਿ ਉਕ੍ਖੇਪਨੀਯਕਮ੍ਮਾਰਹਸ੍ਸ ਭਿਕ੍ਖੁਨੋ. ਸਾਮਗ੍ਗੀਤਿ ਸਙ੍ਘਸਾਮਗ੍ਗੀ. ਤੇਨਾਤਿ ਉਕ੍ਖੇਪਨੀਯਕਮ੍ਮਾਰਹੇਨ ਭਿਕ੍ਖੁਨਾ. ਸਮ੍ਭੋਗੇਤਿ ਆਮਿਸੇਨ ਚ ਧਮ੍ਮੇਨ ਚ ਸਮ੍ਭੋਗਹੇਤੁ. ਏਤ੍ਥ ਸਹਸੇਯ੍ਯਾਪਿ ਸਙ੍ਗਹਿਤਾ ਆਪਤ੍ਤਿਭਾਵਤੋ. ਅਨਾਪਤ੍ਤੀਤਿ ਅਨੁਕ੍ਖਿਤ੍ਤਕਭਾਵਤੋ ਪਾਚਿਤ੍ਤਿਯਾਪਤ੍ਤਿਯਾ ਅਨਾਪਤ੍ਤਿ, ਅਲਜ੍ਜਿਲਕ੍ਖਣਾਭਾਵਤੋ ਦੁਕ੍ਕਟੇਨ ਅਨਾਪਤ੍ਤੀਤਿ ਦਟ੍ਠਬ੍ਬਂ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਦ੍ਵਾਸਤ੍ਤਤਿਅਧਿਕਵਤ੍ਥੁਸਤਪਟਿਮਣ੍ਡਿਤਸ੍ਸ ਮਹਾਖਨ੍ਧਕਸ੍ਸ

ਅਤ੍ਥਵਣ੍ਣਨਾਯ ਯੋਜਨਾ ਸਮਤ੍ਤਾ.