੬੩. ਉਪਸਮ੍ਪਦਾਵਿਧਿਕਥਾ

੧੨੬. ਤਂ ਉਪਜ੍ਝਨ੍ਤਿ ਤਂ ਉਪਜ੍ਝਾਯਂ. ‘‘ਉਪਜ੍ਝਾ’’ਤਿ ਚ ‘‘ਉਪਜ੍ਝਾਯੋ’’ਤਿ ਚ ਹਿ ਅਤ੍ਥਤੋ ਏਕਂ, ਬ੍ਯਞ੍ਜਨਮੇਵ ਨਾਨਂ ਯਥਾ ‘‘ਸਭਾ ਸਭਾਯ’’ਨ੍ਤਿ. ਏਤ੍ਥ ਉਪਜ੍ਝਾਸਦ੍ਦੋ ਰਾਜਾਦਿਗਣੋ (ਰੁਪਸਿਦ੍ਧਿ ੫੯੯ ਸੁਤ੍ਤੇ; ਸਦ੍ਦਨੀਤਿ ੧੧੪੦ ਸੁਤ੍ਤੇ), ਉਪਜ੍ਝਾਯਸਦ੍ਦੋ ਪੁਰਿਸਾਦਿਗਣੋ. ਸਭਾਸਦ੍ਦੋ ਇਤ੍ਥਿਲਿਙ੍ਗੋ, ਸਭਾਯਸਦ੍ਦੋ ਪੁਲ੍ਲਿਙ੍ਗੋ ਵਾ ਨਪੁਂਸਕਲਿਙ੍ਗੋ ਵਾ. ‘‘ਵਿਤ੍ਥਾਯਨ੍ਤੀ’’ਤਿ ਸਦ੍ਦੋ ਨਾਮਧਾਤੂਤਿ ਆਹ ‘‘ਵਿਤ੍ਥਦ੍ਧਗਤ੍ਤਾ ਹੋਨ੍ਤੀ’’ਤਿ. ਵਿਤ੍ਥਸਦ੍ਦੋ ਹਿ ਦਬ੍ਬਵਾਚਕਤ੍ਤਾ ਨਾਮਸਦ੍ਦੋ, ਵਿਕਾਰੇਨ ਥਦ੍ਧੋ ਗਤ੍ਤੋ ਏਤੇਸਨ੍ਤਿ ਵਿਤ੍ਥਾ, ਦ੍ਧਕਾਰਸ੍ਸ ਲੋਪਂ ਕਤ੍ਵਾ, ਤਤੋ ਆਯਪਚ੍ਚਯੋ ਹੋਤਿ. ਯਨ੍ਤਿ ਯਂ ਅਨ੍ਤਰਾਯਜਾਤਂ. ਤਵ ਸਰੀਰੇਤਿ ਤੁਯ੍ਹਂ ਕਾਯੇ. ‘‘ਨਿਬ੍ਬਤ੍ਤ’’ਨ੍ਤਿ ਇਮਿਨਾ ‘‘ਜਾਤ’’ਨ੍ਤਿ ਏਤ੍ਥ ਜਨਧਾਤੁਯਾ ਜਨਨਤ੍ਥਂ ਦਸ੍ਸੇਤਿ, ‘‘ਵਿਜ੍ਜਮਾਨ’’ਨ੍ਤਿ ਇਮਿਨਾ ਜਨੀਧਾਤੁਯਾ ਪਾਤੁਭਾਵਤ੍ਥਂ ਦਸ੍ਸੇਤਿ. ਸਨ੍ਤਨ੍ਤਿ ਸਂਵਿਜ੍ਜਮਾਨਂ. ਇਤਿਆਦਿ ਕਥੇਤਬ੍ਬਨ੍ਤਿ ਯੋਜਨਾ.