੫੯. ਗਮਿਕਾਦਿਨਿਸ੍ਸਯਵਤ੍ਥੁਕਥਾ

੧੨੧. ‘‘ਕਰਣੀਯਨਿਸ੍ਸਯੋ’’ਤਿ ਇਮਿਨਾ ਨਿਸ੍ਸਯਗਹਣਂ ਨਿਸ੍ਸਯੋ ਉਤ੍ਤਰਪਦਲੋਪਵਸੇਨ, ਸੋ ਕਰਣੀਯੋ ਇਮਸ੍ਸਾਤਿ ਨਿਸ੍ਸਯਕਰਣੀਯੋਤਿ ਵਿਸੇਸਨਪਰਨਿਪਾਤਭਾਵਂ ਦਸ੍ਸੇਤਿ. ਨਿਸ੍ਸਯਂ ਅਲਭਮਾਨੇਨਾਤਿ ਏਤ੍ਥ ਕਿਂ ਨਿਸ੍ਸਯਸ੍ਸ ਅਲਭਨਂ ਨਾਮਾਤਿ ਆਹ ‘‘ਅਤ੍ਤਨਾ’’ਤਿਆਦਿ. ਵੁਤ੍ਥਪੁਬ੍ਬਨ੍ਤਿ ਵਸਿਤਪੁਬ੍ਬਂ. ਏਕਰਤ੍ਤਂ ਵਸਨ੍ਤੇਨਾਪੀਤਿ ਪਿਸਦ੍ਦੋ ਦ੍ਵਿਰਤ੍ਤਾਦਿਕੇ ਕਾ ਨਾਮ ਕਥਾਤਿ ਦਸ੍ਸੇਤਿ. ਵਿਸ੍ਸਮਨ੍ਤੋ ਵਾ ਸਤ੍ਥਂ ਪਰਿਯੇਸਨ੍ਤੋ ਵਾ ਹੁਤ੍ਵਾਤਿ ਯੋਜਨਾ. ਨਾਵਾਯ ਗਚ੍ਛਨ੍ਤਸ੍ਸਾਤਿ ਨਾਵਾਯ ਅਦ੍ਧਾਨਮਗ੍ਗਂ ਪਟਿਪਨ੍ਨਸ੍ਸ.

ਯਾਚਿਯਮਾਨੇਨਾਤਿ ਏਤ੍ਥ ਬਹੁਕਤ੍ਤੁਪਸਙ੍ਗਤ੍ਤਾ ਵੁਤ੍ਤਂ ‘‘ਤੇਨ ਗਿਲਾਨੇਨਾ’’ਤਿ. ‘‘ਮਾਨੇਨਾ’’ਤਿ ਇਮਿਨਾ ਯਾਚਿਤੁਮਸਕ੍ਕੁਣੇਯ੍ਯਤਾਦੀਨਿ ਨਿਵਤ੍ਤੇਤਿ.

ਫਾਸੁ ਹੋਤੀਤਿ ਏਤ੍ਥ ਆਵਾਸਸਪ੍ਪਾਯਾਦਿਵਸੇਨ ਫਾਸੁ ਹੋਤੀਤਿ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਸਮਥਵਿਪਸ੍ਸਨਾਨਂ ਪਟਿਲਾਭਵਸੇਨਾ’’ਤਿ. ਹੀਤਿ ਸਚ੍ਚਂ. ਇਮਂ ਪਰਿਹਾਰਨ੍ਤਿ ਇਮਂ ਫਾਸੁਵਿਹਾਰਪਰਿਹਾਰਂ. ਥਾਮਗਤਾਯ ਵਿਪਸ੍ਸਨਾਯਾਤਿ ਯੋਜਨਾ. ਸਮਥੋ ਵਾ ਤਰੁਣੋ ਹੋਤੀਤਿ ਯੋਜਨਾ. ਏਤਸ੍ਸੇਵਾਤਿ ਤਰੁਣਸਮਥਵਿਪਸ੍ਸਨਿਕਸ੍ਸੇਵ ਭਿਕ੍ਖੁਨੋ. ਤਸ੍ਸ ਨਿਸ੍ਸਾਯਾਤਿ ਏਤ੍ਥ ਤਸ੍ਸ ਓਵਾਦਂ ਨਿਸ੍ਸਾਯਾਤਿ ਯੋਜਨਾ. ਅਥ ਵਾ ਉਪਯੋਗਤ੍ਥੇ ਸਾਮਿਵਚਨਂ. ਤਂ ਨਿਸ੍ਸਯਦਾਯਕਂ ਨਿਸ੍ਸਾਯਾਤਿ ਹਿ ਅਤ੍ਥੋ. ਯਤ੍ਤਕੋ ਕਾਲੋ ਆਸਲ਼੍ਹੀਪੁਣ੍ਣਮਾ ਅਤ੍ਥਿ, ਤਤ੍ਤਕਂ ਕਾਲਨ੍ਤਿ ਯੋਜਨਾ. ‘‘ਆਸਲ਼੍ਹੀਪੁਣ੍ਣਮਾ’’ਤਿ ਏਤ੍ਥ ‘‘ਯਾਵਾ’’ਤਿ ਨਿਪਾਤਪਯੋਗਤ੍ਤਾ ਅਭਿਵਿਧਿਅਵਝਤ੍ਥੇ ਨਿਸ੍ਸਕ੍ਕਵਚਨਂ ਦਟ੍ਠਬ੍ਬਂ. ਯਤ੍ਥਾਤਿ ਯਸ੍ਮਿਂ ਠਾਨੇ.

੧੨੨. ਪਾਲ਼ਿਯਂ ਗੋਤ੍ਤੇਨਪੀਤਿ ਏਤ੍ਥ ਪਿਸਦ੍ਦੇਨ ਨ ਕੇਵਲਂ ਨਾਮੇਨੇਵ, ਅਥ ਖੋ ਗੋਤ੍ਤੇਨਪਿ ਸਾਵੇਤੁਨ੍ਤਿ ਦਸ੍ਸੇਤਿ. ਤਸ੍ਮਾ ‘‘ਆਯਸ੍ਮਤੋ ਪਿਪ੍ਪਲਿਸ੍ਸਾ’’ਤਿ ਨਾਮਂ ਸਾਵੇਤ੍ਵਾਤਿਪਿ ‘‘ਆਯਸ੍ਮਤੋ ਮਹਾਕਸ੍ਸਪਸ੍ਸਾ’’ਤਿ ਗੋਤ੍ਤਂ ਸਾਵੇਤ੍ਵਾਪਿ ਅਨੁਸਾਵੇਤਬ੍ਬਂ. ਤੇਨ ਵੁਤ੍ਤਂ ‘‘ਮਹਾਕਸ੍ਸਪਸ੍ਸਾ’’ਤਿਆਦਿ. ਇਮਿਨਾ ‘‘ਕੋਨਾਮੋ ਤੇ ਉਪਜ੍ਝਾਯੋ? ਉਪਜ੍ਝਾਯੋ ਮੇ ਭਨ੍ਤੇ ਆਯਸ੍ਮਾ ਮਹਾਕਸ੍ਸਪੋ ਨਾਮਾ’’ਤਿਆਦੀਸੁ ਗੋਤ੍ਤਮ੍ਪਿ ਨਾਮੇਨੇਵ ਸਙ੍ਗਹਿਤਨ੍ਤਿ ਸਿਦ੍ਧਂ ਹੋਤਿ.

੧੨੩. ਏਕਾਨੁਸਾਵਨੇਤਿ ਪਦਸ੍ਸ ਸਮਾਨਾਧਿਕਰਣਬਾਹਿਰਤ੍ਥਸਮਾਸਭਾਵਂ ਨਿਵਤ੍ਤੇਨ੍ਤੋ ਆਹ ‘‘ਏਕਤੋ ਅਨੁਸਾਵਨੇ’’ਤਿ. ਤਤ੍ਥ ਏਕਤੋਤਿ ਏਕਕ੍ਖਣੇ, ਏਕਪਹਾਰੇਨ ਵਾ. ਵਕ੍ਖਤਿ ਹਿ ‘‘ਏਕਕ੍ਖਣੇ’’ਤਿ ਚ ‘‘ਏਕਪਹਾਰੇਨੇਵਾ’’ਤਿ ਚ. ਇਮਿਨਾ ਏਕਤੋ ਅਨੁਸਾਵਨਮੇਤੇਸਨ੍ਤਿ ਏਕਾਨੁਸਾਵਨਾਤਿ ਅਸਮਾਨਾਧਿਕਰਣਬਾਹਿਰਤ੍ਥਸਮਾਸਂ ਦਸ੍ਸੇਤਿ. ਏਕੇਨਾਤਿ ਏਕੇਨ ਅਨੁਸਾਵਨਾਚਰਿਯੇਨ. ਏਕਸ੍ਸਾਤਿ ਏਕਸ੍ਸ ਉਪਸਮ੍ਪਦਾਪੇਕ੍ਖਸ੍ਸ. ‘‘ਏਕਕ੍ਖਣੇ’’ਤਿ ਇਮਿਨਾ ‘‘ਏਕਤੋ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ‘‘ਉਪਸਮ੍ਪਾਦੇਤੁ’’ਨ੍ਤਿ ਦ੍ਵਿਨ੍ਨਂ ਉਪਸਮ੍ਪਦਾਪੇਕ੍ਖਾਨਂ ਉਪਸਮ੍ਪਾਦੇਤੁਂ.

ਪੁਰਿਮਨਯੇਨੇਵਾਤਿ ‘‘ਏਕੇਨ ਏਕਸ੍ਸ, ਅਞ੍ਞੇਨ ਇਤਰਸ੍ਸਾ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨੇਵ. ਏਕਤੋ ਅਨੁਸਾਵਨੇ ਕਾਤੁਨ੍ਤਿ ‘‘ਏਕੇਨ ਏਕਸ੍ਸ, ਅਞ੍ਞੇਨ ਅਞ੍ਞਸ੍ਸ, ਇਤਰੇਨ ਇਤਰਸ੍ਸਾ’’ਤਿ ਏਵਂ ਤੀਹਿ ਆਚਰਿਯੇਹਿ ਤਿਣ੍ਣਂ ਉਪਸਮ੍ਪਦਾਪੇਕ੍ਖਾਨਂ ਏਕਕ੍ਖਣੇ ਅਨੁਸਾਵਨੇ ਕਾਤੁਂ. ਤਞ੍ਚ ਖੋਤਿ ਏਤ੍ਥ ਤਸਦ੍ਦਸ੍ਸ ‘‘ਅਨੁਸਾਵਨੇ ਕਾਤੁ’’ਨ੍ਤਿ ਪਦਸ੍ਸੇਵ ਅਤ੍ਥਵਿਸਯਤਂ ਦਸ੍ਸੇਤੁਂ ਵੁਤ੍ਤਂ ‘‘ਅਨੁਸਾਵਨਕਿਰਿਯ’’ਨ੍ਤਿ. ਦ੍ਵੇ ਵਾ ਤਯੋ ਵਾਤਿ ਏਤ੍ਥ ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਸਚੇ ਏਕੇਨਾਚਰਿਯੇਨ ਦ੍ਵੇ ਅਨੁਸਾਵੇਤਿ, ‘‘ਅਯਂ ਬੁਦ੍ਧਰਕ੍ਖਿਤੋ ਚ ਅਯਂ ਧਮ੍ਮਰਕ੍ਖਿਤੋ ਚਾ’’ਤਿ ਅਨੁਸਾਵੇਤਬ੍ਬਾ. ਸਚੇ ਤਯੋ ਅਨੁਸਾਵੇਤਿ, ‘‘ਅਯਂ ਬੁਦ੍ਧਰਕ੍ਖਿਤੋ ਚ ਅਯਂ ਧਮ੍ਮਰਕ੍ਖਿਤੋ ਚ ਅਯਂ ਸਙ੍ਘਰਕ੍ਖਿਤੋ ਚਾ’’ਤਿ ਅਨੁਸਾਵੇਤਬ੍ਬਾ. ਯਥਾ ਏਕੇਨਾਚਰਿਯੇਨ ਦ੍ਵੇ ਵਾ ਤਯੋ ਵਾ ਏਕਤੋ ਅਨੁਸਾਵੇਤਬ੍ਬਾ, ਏਵਂ ਦ੍ਵੀਹਿ ਵਾ ਤੀਹਿ ਵਾ ਆਚਰਿਯੇਹਿ ਏਕੋ ਅਨੁਸਾਵੇਤਬ੍ਬੋਤਿਪਿ ਵਦਨ੍ਤਿ. ਏਕੇਨ ਉਪਜ੍ਝਾਯੇਨ ਕਰਣਭੂਤੇਨ, ਏਕੋ ਉਪਜ੍ਝਾਯੋ ਹੁਤ੍ਵਾਤਿ ਵਾ ਅਤ੍ਥੋ. ‘‘ਏਕਪਹਾਰੇਨੇਵਾ’’ਤਿ ਇਮਿਨਾ ‘‘ਏਕਤੋ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਦ੍ਵੇ ਤਿਸ੍ਸੋ ਕਮ੍ਮਵਾਚਾਤਿ ਦ੍ਵੀਹਿ ਆਚਰਿਯੇਹਿ ਦ੍ਵੇ, ਤੀਹਿ ਆਚਰਿਯੇਹਿ ਤਿਸ੍ਸੋ ਕਮ੍ਮਵਾਚਾ. ਏਕੇਨ ਉਪਜ੍ਝਾਯੇਨ ਅਨੁਸਾਵਨੇ ਏਕੋ ਵਾ ਦ੍ਵੇ ਵਾ ਤਯੋ ਵਾ ਆਚਰਿਯਾ ਵਟ੍ਟਨ੍ਤਿ, ਨਾਨੁਪਜ੍ਝਾਯੇਨ ਅਨੁਸਾਵਨੇ ਪਨ ਨਾਨਾਚਰਿਯਾ ਏਵ ਵਟ੍ਟਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਤਿਸ੍ਸਤ੍ਥੇਰੋਤਿ ਕਮ੍ਮਵਾਚਾਚਰਿਯਭੂਤੋ ਤਿਸ੍ਸਤ੍ਥੇਰੋ. ਸੁਮਨਤ੍ਥੇਰਸ੍ਸਾਤਿ ਉਪਜ੍ਝਾਯਭੂਤਸ੍ਸ ਸੁਮਨਤ੍ਥੇਰਸ੍ਸ. ਇਦਨ੍ਤਿ ਨਾਨੁਪਜ੍ਝਾਯੇਨ ਏਕਸ੍ਸਾਚਰਿਯਸ੍ਸਾਨੁਸਾਵਨਂ. ਏਸ ਪਟਿਕ੍ਖੇਪੋਤਿ ‘‘ਨ ਤ੍ਵੇਵ ਨਾਨੁਪਜ੍ਝਾਯੇਨਾ’’ਤਿ ਏਸੋ ਪਟਿਕ੍ਖੇਪੋ.