੫੮. ਅਲਜ੍ਜੀਨਿਸ੍ਸਯਵਤ੍ਥੁਕਥਾ

੧੨੦. ‘‘ਅਲਜ੍ਜੀਨਂ ਓਵਾਦ’’ਨ੍ਤਿ ਪਾਠਸੇਸੇਨ ਯੋਜਿਤੇ ਸਾਮ੍ਯਤ੍ਥੇ ਸਾਮਿਵਚਨਮ੍ਪਿ ਯੁਜ੍ਜਤੇਵ. ਤਂ ਨਯਂ ਅਦਸ੍ਸੇਤ੍ਵਾ ‘‘ਉਪਯੋਗਤ੍ਥੇ ਸਾਮਿਵਚਨ’’ਨ੍ਤਿ ਵੁਤ੍ਤਂ. ‘‘ਭਿਕ੍ਖੂਹਿ ਸਭਾਗਤ’’ਨ੍ਤਿ ਇਮਿਨਾ ਭਿਕ੍ਖੂਹਿ ਸਮਾਨੋ ਸੀਲਾਦਿਗੁਣਸਙ੍ਖਾਤੋ ਭਾਗੋ ਇਮਸ੍ਸਾਤਿ ਭਿਕ੍ਖੁਸਭਾਗੋ, ਤਸ੍ਸ ਭਾਵੋ ਭਿਕ੍ਖੁਸਭਾਗਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ‘‘ਲਜ੍ਜਿਭਾਵ’’ਨ੍ਤਿ ਇਮਿਨਾ ਭਾਵਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਨਵਟ੍ਠਾਨਨ੍ਤਿ ਅਭਿਨਵਟ੍ਠਾਨਂ. ਗਤੇਨ ਭਿਕ੍ਖੁਨਾਤਿ ਸਮ੍ਬਨ੍ਧੋ.

ਥੇਰੋਤਿ ਨਿਸ੍ਸਯਦਾਯਕੋ ਥੇਰੋ. ਗਹੇਤੁਕਾਮੋਤਿ ਨਿਸ੍ਸਯਂ ਗਹੇਤੁਕਾਮੋ. ਆਚਾਰਨ੍ਤਿ ਨਿਸ੍ਸਯਪਟਿਪਨ੍ਨਸ੍ਸ ਆਚਾਰਂ. ਤਦਹੇਵਾਤਿ ਤਸ੍ਮਿਂ ਗਤਅਹਨਿ ਏਵ. ਆਭੋਗਸ੍ਸ ਕਤਤ੍ਤਾ, ਅਰੁਣੁਗ੍ਗਮਨਸ੍ਸ ਚ ਅਜਾਨਨਤ੍ਤਾ ਵੁਤ੍ਤਂ ‘‘ਅਨਾਪਤ੍ਤੀ’’ਤਿ. ਅਰੁਣੁਗ੍ਗਮਨਂ ਅਜਾਨਨ੍ਤੋਪਿ ਆਭੋਗਸ੍ਸ ਅਕਤਤ੍ਤਾ ਵੁਤ੍ਤਂ ‘‘ਅਰੁਣੁਗ੍ਗਮਨੇ ਦੁਕ੍ਕਟ’’ਨ੍ਤਿ. ‘‘ਦ੍ਵੇ ਤੀਣਿ ਦਿਵਸਾਨੀ’’ਤਿ ਪਦੇਨ ਚਤੁ ਪਞ੍ਚ ਛ ਦਿਵਸਾਨਿਪਿ ਗਹੇਤਬ੍ਬਾਨਿ ਲਕ੍ਖਣਹਾਰਨਯੇਨ ਅਨਿਸ੍ਸਿਤੇਨ ਵਸਿਤਬ੍ਬਭਾਵੇਨ ਸਮਾਨਫਲਤ੍ਤਾ. ਤੇਨਾਹ ‘‘ਸਤ੍ਤਾਹਂ ਵਸਿਸ੍ਸਾਮੀ’’ਤਿ. ਲਦ੍ਧਪਰਿਹਾਰੋਤਿ ਲਦ੍ਧੋ ਪਰਿਹਾਰੋ ਆਪਤ੍ਤਿਅਪਨਯਨਂ ਯੇਨਾਤਿ ਲਦ੍ਧਪਰਿਹਾਰੋ.