੫੭. ਹਤ੍ਥਚ੍ਛਿਨ੍ਨਾਦਿਵਤ੍ਥੁਕਥਾ

੧੧੯. ਹਤ੍ਥਚ੍ਛਿਨ੍ਨਾਦਿਵਤ੍ਥੂਸੁ ਹਤ੍ਥਾ ਛਿਨ੍ਨਾ ਯਸ੍ਸਾਤਿ ਹਤ੍ਥਚ੍ਛਿਨ੍ਨੋਤਿਆਦਿਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਸਾ’’ਤਿਆਦਿ. ਮਣਿਬਨ੍ਧੇਤਿ ਪਕੋਟ੍ਠਨ੍ਤੇ. ਸੋ ਹਿ ਯਸ੍ਮਾ ਏਤ੍ਥ ਮਣਿਸਙ੍ਖਾਤਂ ਅਲਙ੍ਕਾਰਵਿਕਤਿਂ ਬਨ੍ਧਤਿ, ਤਸ੍ਮਾ ਮਣਿਬਨ੍ਧੋਤਿ ਵੁਚ੍ਚਤਿ. ਕਪ੍ਪਰੇਤਿ ਕਪੋਣਿਯਂ. ਸਾ ਹਿ ਪਰੇਸਂ ਪਿਟ੍ਠੀਸੁ ਕਪਤਿ ਹਿਂਸਤਿ ਅਨੇਨਾਤਿ ‘‘ਕਪ੍ਪਰੋ’’ਤਿ ਵੁਚ੍ਚਤਿ. ਯਸ੍ਸ ਹਤ੍ਥਾ ਛਿਨ੍ਨਾ ਹੋਨ੍ਤਿ, ਅਯਂ ਹਤ੍ਥਚ੍ਛਿਨ੍ਨੋ ਨਾਮਾਤਿ ਯੋਜਨਾ. ਏਸੇਵ ਨਯੋ ਸੇਸੇਸੁਪਿ. ਏਕੋ ਵਾ ਪਾਦੋਤਿ ਯੋਜਨਾ. ਹੇਟ੍ਠਾ ‘‘ਏਕੋ ਵਾ ਦ੍ਵੇ ਵਾ ਹਤ੍ਥਾ’’ਤਿ ਏਤ੍ਥਾਪਿ ਏਸੇਵ ਨਯੋ. ਚਤੂਸੁ ਹਤ੍ਥਪਾਦੇਸੁ ਦ੍ਵੇ ਵਾਤਿ ਏਕੋ ਹਤ੍ਥੋ, ਏਕੋ ਪਾਦੋਤਿ ਦ੍ਵੇ ਵਾ. ਕਣ੍ਣਾਤਿ ਸਦ੍ਦਗ੍ਗਹਾ. ਤੇ ਹਿ ਕਣ੍ਣਤਿ ਸਵਤਿ ਏਤੇਹੀਤਿ ਕਣ੍ਣਾਤਿ ਵੁਚ੍ਚਨ੍ਤਿ. ਕਣ੍ਣਾਬਦ੍ਧੇਤਿ ਕਣ੍ਣਚ੍ਛਿਦ੍ਦਸ੍ਸ ਆਬਦ੍ਧੇ. ਸਙ੍ਘਾਟੇਤੁਨ੍ਤਿ ਸਙ੍ਘਟਨਂ ਕਾਤੁਂ, ਆਬਨ੍ਧਨਂ ਕਾਤੁਨ੍ਤਿ ਅਤ੍ਥੋ. ਅਜਪਦਕੇਤਿ ਅਜਪਦਸਣ੍ਠਾਨੇ ਠਾਨੇ. ਨਾਸਾਤਿ ਘਾਨਾਨਿ. ਤਾਨਿ ਹਿ ਨਾਸਤਿ ਅਬ੍ਯਤ੍ਤਸਦ੍ਦਂ ਕਰੋਤਿ ਏਤਾਹੀਤਿ ਨਾਸਾਤਿ ਵੁਚ੍ਚਨ੍ਤਿ. ਨਾਸਿਕਾਤਿ ਨਾਸਾਯੇਵ. ਸਣ੍ਠਾਪੇਤੁਨ੍ਤਿ ਸੁਟ੍ਠੁ ਠਪੇਤੁਂ, ਪਕਤਿਯਾ ਠਪੇਤੁਨ੍ਤਿ ਅਤ੍ਥੋ. ਨਖਸੇਸਨ੍ਤਿ ਨਖੋਯੇਵ ਸੇਸੋ ਛਿਨ੍ਨਙ੍ਗੁਲਿਤੋਤਿ ਨਖਸੇਸੋ, ਤਂ. ਅਗ੍ਗੇ ਪੁਰੇ ਉਟ੍ਠਹਤੀਤਿ ਅਙ੍ਗੁਟ੍ਠੋ. ‘‘ਵੁਤ੍ਤਨਯੇਨੇਵਾ’’ਤਿ ਇਮਿਨਾ ‘‘ਨਖਸੇਸਂ ਅਦਸ੍ਸੇਤ੍ਵਾ’’ਤਿ ਵਚਨਂ ਅਤਿਦਿਸਤਿ. ਕਣ੍ਡਰਨਾਮਕਾਤਿ ਮਹਾਸਿਰਨਾਮਕਾ. ਤੇ ਹਿ ਕਂ ਸਰੀਰਂ ਧਾਰੇਨ੍ਤੀਤਿ ਕਣ੍ਡਰਾਤਿ ਵੁਚ੍ਚਨ੍ਤਿ ਧਕਾਰਸ੍ਸ ਡਕਾਰਂ ਕਤ੍ਵਾ. ਯੇਸੂਤਿ ਕਣ੍ਡਰੇਸੁ, ਨਿਦ੍ਧਾਰਣੇ ਭੁਮ੍ਮਂ.

ਯਸ੍ਸ ਵਗ੍ਗੁਲਿਪਕ੍ਖਕਾ ਵਿਯ ਅਙ੍ਗੁਲਿਯੋ ਸਮ੍ਬਨ੍ਧੋ ਹੋਨ੍ਤਿ, ਅਯਂ ਫਣਹਤ੍ਥਕੋ ਨਾਮਾਤਿ ਯੋਜਨਾ. ਏਤਨ੍ਤਿ ਫਣਹਤ੍ਥਕਂ. ਛਲ਼ਙ੍ਗੁਲਾਦਯੋਪਿ ਫਣਹਤ੍ਥਕੇਯੇਵ ਸਙ੍ਗਹੇਤਬ੍ਬਾਤਿ ਆਹ ‘‘ਯਸ੍ਸਪਿ ਛ ਅਙ੍ਗੁਲਿਯੋ’’ਤਿਆਦਿ. ਯਸ੍ਸਪਿ ਛ ਅਙ੍ਗੁਲਿਯੋ ਹੋਨ੍ਤਿ, ਅਯਮ੍ਪਿ ਫਣਹਤ੍ਥਕੋ ਨਾਮ ਉਪਚਾਰੇਨ.

ਖੁਜ੍ਜੋਤਿ ਏਤ੍ਥ ਖੁਜ੍ਜੋ ਸਰੀਰੋ ਯਸ੍ਸਤ੍ਥੀਤਿ ਖੁਜ੍ਜੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਖੁਜ੍ਜਸਰੀਰੋ’’ਤਿ. ਕਸ੍ਮਾ ਖੁਜ੍ਜੋਤਿ ਆਹ ‘‘ਉਰਸ੍ਸ ਵਾ’’ਤਿਆਦਿ. ਯਸ੍ਸ ਪਨ ਵਙ੍ਕਂ, ਅਯਮ੍ਪਿ ਖੁਜ੍ਜੋ ਨਾਮਾਤਿ ਯੋਜਨਾ. ਵਙ੍ਕਨ੍ਤਿ ਚ ਕੁਟਿਲਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਬ੍ਰਹ੍ਮੁਜੁਗਤ੍ਤੋਤਿ ਉਜੁਂ ਗਤ੍ਤਂ ਉਜੁਗਤ੍ਤਂ, ਬ੍ਰਹ੍ਮੁਨੋ ਉਜੁਗਤ੍ਤਂ ਵਿਯ ਉਜੁਗਤ੍ਤਂ ਇਮਸ੍ਸ ਮਹਾਪੁਰਿਸਸ੍ਸਾਤਿ ਬ੍ਰਹ੍ਮੁਜੁਗਤ੍ਤੋ, ਮਹਾਪੁਰਿਸੋ.

ਸਂਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਜਙ੍ਘਵਾਮਨਸ੍ਸ ਹੀ’’ਤਿਆਦਿ. ਯੇਸਨ੍ਤਿ ਉਭਿਨ੍ਨਂ ਕਾਯਾਨਂ. ਭੂਤਾਨਨ੍ਤਿ ਅਮਨੁਸ੍ਸਾਨਂ ਪਿਸਾਚਕਪੇਤਾਨਂ. ਅਤ੍ਤਭਾਵੋ ਹੋਤਿ ਵਿਯਾਤਿ ਯੋਜਨਾ. ਪਰਿਵਟੁਮੋਤਿ ਪਰਿਸਮਨ੍ਤਤੋ ਵਟ੍ਟੁਲਸਰੀਰੋ.

ਗਲਗਣ੍ਡੀਤਿ ਏਤ੍ਥ ਗਲੇ ਗਣ੍ਡੋ ਯਸ੍ਸਤ੍ਥੀਤਿ ਗਲਗਣ੍ਡੀਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਸ੍ਸਾ’’ਤਿਆਦਿ. ਏਤਨ੍ਤਿ ‘‘ਗਲਗਣ੍ਡੀ’’ਤਿ ਏਤਂ ਵਚਨਂ. ਤਤ੍ਥਾਤਿ ਗਲਗਣ੍ਡਿਪਬ੍ਬਾਜਨੇ. ਯਨ੍ਤਿ ਵਚਨਂ.

ਸਿਪਦੀਤਿ ਏਤ੍ਥ ਸਿਥਿਲਂ ਪਦਂ ਇਮਸ੍ਸਾਤਿ ਸਿਪਦੀਤਿ ਵੁਤ੍ਤੇ ਭਾਰਪਾਦੋਯੇਵ ਗਹੇਤਬ੍ਬੋਤਿ ਆਹ ‘‘ਭਾਰਪਾਦੋ ਵੁਚ੍ਚਤੀ’’ਤਿ. ਭਾਰਂ ਪਾਦਂ ਯਸ੍ਸਾਤਿ ਭਾਰਪਾਦੋ. ਏਤੇ ਦ੍ਵੇ ਥੂਲਪਾਦਰੋਗੀਸੁ ਵਤ੍ਤਨ੍ਤੀਤਿ ਦਟ੍ਠਬ੍ਬਂ. ਸਞ੍ਜਾਤਪਿਲ਼ਕੋਤਿ ਸਞ੍ਜਾਤਫੋਟੋ. ਉਪਨਾਹਨ੍ਤਿ ਭੁਸਂ ਬਨ੍ਧਨਂ. ਉਦਕਆਵਾਟੇਤਿ ਉਦਕੇਨ ਪੁਣ੍ਣਾਯਂ ਕਾਸੁਯਂ. ਉਦਕਵਾਲਿਕਾਯਾਤਿ ਉਦਕਤਿਨ੍ਤੇਨ ਮਰੁਨਾ. ਯਥਾ ਸਿਰਾ ਪਞ੍ਞਾਯਨ੍ਤਿ, ਏਵਂ ਮਿਲਾਪੇਤੁਨ੍ਤਿ ਯੋਜਨਾ. ਈਦਿਸਨ੍ਤਿ ਸਿਰਾਪਞ੍ਞਾਯਨਜਙ੍ਘਤੇਲਨਾਲ਼ਿਕਸਭਾਵਂ. ਤਥਾਤਿ ਯਥਾ ਪਬ੍ਬਜ੍ਜਾਕਾਲੇ ਕਰੋਤਿ, ਤਥਾ ਕਤ੍ਵਾਤਿ ਅਤ੍ਥੋ.

ਪਾਪਰੋਗੀਤਿ ਏਤ੍ਥ ਪਾਪਰੋਗਸ੍ਸ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਅਰਿਸ’’ਇਤਿਆਦਿ. ਤਤ੍ਥ ਅਰਿਸੋ ਚ ਭਗਨ੍ਦਰੋ ਚ ਪਿਤ੍ਤਞ੍ਚ ਸੇਮ੍ਹੋ ਚ ਕਾਸੋ ਚ ਸੋਸੋ ਚਾਤਿ ਦ੍ਵਨ੍ਦੋ, ਤੇ ਆਦਯੋ ਯੇਸਂ ਤੇਤਿ ਅਰਿਸ…ਪੇ… ਸੋਸਾਦਯੋ. ਆਦਿਸਦ੍ਦੇਨ ਹੇਟ੍ਠਾ ਵੁਤ੍ਤੇ ਆਬਾਧੇ ਸਙ੍ਗਣ੍ਹਾਤਿ. ਤਤ੍ਥ ਪਿਤ੍ਤਸੇਮ੍ਹਸਦ੍ਦੇਹਿ ਤਂਸਮੁਟ੍ਠਾਨੋ ਰੋਗੋ ਗਹੇਤਬ੍ਬੋ. ‘‘ਨਿਚ੍ਚਾਤੁਰੋ’’ਤਿ ਇਮਿਨਾ ਪਾਪਰੋਗੀਤਿ ਏਤ੍ਥ ਮਨ੍ਤੁਤ੍ਥੇ ਪਵਤ੍ਤਸ੍ਸ ਈਪਚ੍ਚਯਸ੍ਸ ਨਿਚ੍ਚਯੋਗਤ੍ਥਂ ਦਸ੍ਸੇਤਿ.

ਪਰਿਸਦੂਸਨੋਤਿ ਏਤ੍ਥ ਇਤਿਸਦ੍ਦੋ ਨਾਮਪਰਿਯਾਯੋ, ਪਰਿਸਦੂਸਨੋ ਨਾਮਾਤਿ ਹਿ ਅਤ੍ਥੋ. ਯੋ ਅਤ੍ਤਨੋ ਵਿਰੂਪਤਾਯ ਪਰਿਸਂ ਦੂਸੇਤਿ, ਅਯਂ ਪਰਿਸਦੂਸਨੋ ਨਾਮਾਤਿ ਯੋਜਨਾ. ਛਸਰੀਰਦੋਸਂ ਆਦਿਂ ਕਤ੍ਵਾ ਪਰਿਸਦੂਸਨਭਾਵਂ ਵਿਤ੍ਥਾਰੇਨ੍ਤੋ ਆਹ ‘‘ਅਤਿਦੀਘੋ ਵਾ’’ਤਿਆਦਿ. ਅਤਿਦੀਘੋ ਵਾਤਿ ਏਤ੍ਥ ਨ ਕੇਵਲਂ ਪਰੇਸਂ ਦ੍ਵਙ੍ਗੁਲਾਦਿਮਤ੍ਤਦੀਘੋ, ਅਥ ਖੋ ਦਿਗੁਣਾਦਿਦੀਘੋਵਾਧਿਪ੍ਪੇਤੋਤਿ ਆਹ ‘‘ਅਞ੍ਞੇਸ’’ਨ੍ਤਿਆਦਿ. ਨਾਭਿਪਦੇਸੋਤਿ ਅਤ੍ਤਨੋ ਨਾਭਿਪਦੇਸੋ. ਯਥਾ ਹਿ ਅਤਿਦੀਘੇ ਪਰਵਚਨੇਨ ਅਤਿਦੀਘਸ੍ਸ ਸਰੂਪਂ ਵੇਦਿਤਬ੍ਬਂ, ਤਥਾ ਅਤਿਰਸ੍ਸਾਦੀਸੁਪਿ ਅਤਿਰਸ੍ਸਸਰੂਪਨ੍ਤਿ ਦਟ੍ਠਬ੍ਬਂ. ਮਹੋਦਰੋਤਿ ਮਹਾਉਦਰੋ. ਕਪ੍ਪਸੀਸੋ ਵਾਤਿ ਹਤ੍ਥਿਸੀਸੋ ਵਿਯ ਯੁਗਸੀਸੋ ਵਾ. ਕਪ੍ਪਸਦ੍ਦੋ ਹੇਤ੍ਥ ਯੁਗਤ੍ਥਵਾਚਕੋ. ਕਣ੍ਣਿਕਕੇਸੋ ਵਾਤਿ ਕਣ੍ਣਿਕਸਦਿਸੇਹਿ ਕੇਸੇਹਿ ਸਮਨ੍ਨਾਗਤੋ. ‘‘ਜਾਤਿਪਲਿਤੇਹੀ’’ਤਿ ਇਮਿਨਾ ਜਰਾਵਾਤੇਨ ਪਹਤਂ ਪਲਿਤਂ ਨਿਵਤ੍ਤੇਤਿ. ਪਕਤਿਤਮ੍ਬਕੇਸੋਤਿ ਏਤ੍ਥ ਪਕਤਿਸਦ੍ਦੇਨ ਕੇਨਚਿ ਪਯੋਗੇਨ ਤਮ੍ਬਕੇਸਂ ਨਿਵਤ੍ਤੇਤਿ. ਆਵਟ੍ਟਸੀਸੋਤਿ ਪੁਨਪ੍ਪੁਨਂ ਵਟ੍ਟਤੀਤਿ ਆਵਟ੍ਟੋ, ਕੇਸਾਵਟ੍ਟੋ, ਸੋ ਏਤਸ੍ਸ ਸੀਸੇ ਅਤ੍ਥੀਤਿ ਆਵਟ੍ਟਸੀਸੋ. ਉਦ੍ਧਗ੍ਗੇਹੀਤਿ ਉਦ੍ਧਂ ਕੋਟੀਹਿ. ਜਾਲਬਦ੍ਧੇਨ ਵਿਯਾਤਿ ਜਾਲੇਨ ਬਦ੍ਧੇਨ ਇਵ.

ਸਮ੍ਬਦ੍ਧਭਮੁਕੋ ਵਾਤਿ ਅਞ੍ਞਮਞ੍ਞਸਮ੍ਬਦ੍ਧਭਮੁਕੋ ਵਾ. ਮਕ੍ਕਟਭਮੁਕੋਤਿ ਮਕ੍ਕਟਸ੍ਸ ਭਮੁ ਵਿਯ ਭਮੁ ਏਤਸ੍ਸਾਤਿ ਮਕ੍ਕਟਭਮੁਕੋ. ਵਾਸਿਕੋਣੇਨਾਤਿ ਤਚ੍ਛਨੀਕੋਟਿਯਾ. ਵਿਸਮਚਕ੍ਕਲੋਤਿ ਏਤ੍ਥ ਚਕ੍ਕਾਕਾਰੇਨ ਲਾਤਿ ਪਵਤ੍ਤਤਿ, ਚਕ੍ਕਾਕਾਰਂ ਵਾ ਲਾਤਿ ਗਣ੍ਹਾਤੀਤਿ ਚਕ੍ਕਲੋ. ਕੇਕਰੋਤਿ ਵਲਿਰੋ. ਸੋ ਹਿ ਕੁਚ੍ਛਿਤਂ ਕਰੋਤੀਤਿ ਕੇਕਰੋਤਿ ਵੁਚ੍ਚਤਿ. ਕਕ੍ਕਟਸ੍ਸੇਵਾਤਿ ਕਕ੍ਕਟਸ੍ਸ ਇਵ. ਮੂਸਿਕਕਣ੍ਣੋਤਿ ਆਖੁਕਣ੍ਣੋ. ਜਟੁਕਕਣ੍ਣੋਤਿ ਵਗ੍ਗੁਲਿਕਣ੍ਣੋ. ਅਵਿਦ੍ਧਕਣ੍ਣੋਤਿ ਅਚ੍ਛਿਦ੍ਦਕਣ੍ਣੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸੋਤਿ ਅਵਿਦ੍ਧਕਣ੍ਣੋ. ਕਣ੍ਣੇ ਭਗਨ੍ਦਰੋ ਏਤਸ੍ਸਾਤਿ ਕਣ੍ਣਭਗਨ੍ਦਰੋ, ਸੋਯੇਵ ਕਣ੍ਣਭਗਨ੍ਦਰਿਕੋ. ਗਣ੍ਡੋ ਕਣ੍ਣੇ ਏਤਸ੍ਸਾਤਿ ਗਣ੍ਡਕਣ੍ਣੋ. ਪਗ੍ਘਰਿਤਪੁਬ੍ਬੇਨਾਤਿ ਪਗ੍ਘਰਿਤਪੂਯੇਨ. ਟਙ੍ਕਿਤੋ ਕਣ੍ਣੋ ਯਸ੍ਸਾਤਿ ਟਙ੍ਕਿਤਕਣ੍ਣੋ. ਗੋਭਤ੍ਤਨਾਲ਼ਿਕਾਯਾਤਿ ਗੁਨ੍ਨਂ ਭਤ੍ਤਪਾਨਤ੍ਥਂ ਕਤਾਯ ਨਾਲ਼ਿਕਾਯ. ਬਿਲ਼ਾਰਕ੍ਖਿ ਵਿਯ ਅਤਿਪਿਙ੍ਗਲਂ ਅਕ੍ਖਿ ਏਤਸ੍ਸਾਤਿ ਅਤਿਪਿਙ੍ਗਲਕ੍ਖਿ. ਮਧੁਵਣ੍ਣੋ ਵਿਯ ਪਿਙ੍ਗਲਂ ਅਕ੍ਖਿ ਏਤਸ੍ਸਾਤਿ ਮਧੁਪਿਙ੍ਗਲਕ੍ਖਿ. ਨਿਪ੍ਪਖੁਮਕ੍ਖੀਤਿ ਏਤ੍ਥ ਪਖੁਮਂ ਵੁਚ੍ਚਤਿ ਅਕ੍ਖਮ੍ਹਿ ਜਾਤਂ ਲੋਮਂ. ਤਞ੍ਹਿ ਅਕ੍ਖਿਨੋ ਪਕ੍ਖਦ੍ਵਯੇ ਜਾਤਤ੍ਤਾ ਪਖੁਮਨ੍ਤਿ ਵੁਚ੍ਚਤਿ. ਨਤ੍ਥਿ ਪਖੁਮਂ ਅਕ੍ਖਿਮ੍ਹਿ ਏਤਸ੍ਸਾਤਿ ਨਿਪ੍ਪਖੁਮਕ੍ਖਿ. ਅਸ੍ਸੁਪਗ੍ਘਰਣਂ ਅਕ੍ਖਿਮ੍ਹਾ ਏਤਸ੍ਸਾਤਿ ਅਸ੍ਸੁਪਗ੍ਘਰਣਕ੍ਖਿ. ਪੁਪ੍ਫਂ ਸਞ੍ਜਾਤਂ ਯਸ੍ਸ ਅਕ੍ਖਿਨੋਤਿ ਪੁਪ੍ਫਿਤਂ. ਪੁਪ੍ਫਿਤਂ ਅਕ੍ਖਿ ਯਸ੍ਸਾਤਿ ਪੁਪ੍ਫਿਤਕ੍ਖਿ. ਅਕ੍ਖਿਪਾਕੇਨਾਤਿ ਅਕ੍ਖਿਨੋ ਦਲਪਰਿਯਨ੍ਤੇਸੁ ਪਚ੍ਚਨਕੇਨ ਰੋਗੇਨ.

ਚਿਪਿਟਨਾਸਿਕੋਤਿ ਅਨੁਨ੍ਨਤਨਾਸਿਕੋ. ਸੁਕਤੁਣ੍ਡਸਦਿਸਾਯਾਤਿ ਸੁਵਾਨਂ ਮੁਖੇਨ ਸਦਿਸਾਯ.

ਪਟਙ੍ਗਮਣ੍ਡੂਕਸ੍ਸੇਵਾਤਿ ਪਟਙ੍ਗਨਾਮਕਸ੍ਸ ਮਣ੍ਡੂਕਸ੍ਸ ਮੁਖਨਿਮਿਤ੍ਤਂ ਇਵ ਮੁਖਨਿਮਿਤ੍ਤਂਯੇਵਾਤਿ ਯੋਜਨਾ. ਉਕ੍ਖਲਿਮੁਖਵਟ੍ਟਿਸਦਿਸੇਹੀਤਿ ਉਕ੍ਖਲਿਯਾ ਮੁਖਵਟ੍ਟਿਨਾ ਸਦਿਸੇਹਿ. ਭੇਰਿਚਮ੍ਮਸਦਿਸੇਹੀਤਿ ਭੇਰਿਯਾ ਮੁਖੇ ਨਹਿਤਚਮ੍ਮੇਨ ਸਦਿਸੇਹਿ. ਏਲ਼ਮੁਖੋਤਿ ਏਲ਼ਾਯ ਨਿਚ੍ਚਪਗ੍ਘਰਿਤਂ ਮੁਖਮੇਤਸ੍ਸੇਤਿ ਏਲ਼ਮੁਖੋ. ਉਪ੍ਪਕ੍ਕਮੁਖੋਤਿ ਉਪ੍ਪਕ੍ਕਂ ਕੁਥਿਕਂ ਮੁਖਮੇਤਸ੍ਸਾਤਿ ਉਪ੍ਪਕ੍ਕਮੁਖੋ. ਸਙ੍ਖਤੁਣ੍ਡਕੋਤਿ ਸਙ੍ਖਸ੍ਸ ਤੁਣ੍ਡੇਨ ਸਦਿਸੋ ਓਟ੍ਠੋ ਏਤਸ੍ਸਾਤਿ ਸਙ੍ਖਤੁਣ੍ਡਕੋ.

ਅਟ੍ਠਕਦਨ੍ਤਸਦਿਸੇਹੀਤਿ ਅਟ੍ਠਕਨਾਮਕਸ੍ਸ ਨਙ੍ਗਲਸ੍ਸ ਦਨ੍ਤੇਹਿ ਸਦਿਸੇਹਿ. ਦਨ੍ਤੇ ਪਿਦਹਿਤੁਨ੍ਤਿ ਸਮ੍ਬਨ੍ਧੋ. ਦਨ੍ਤਨ੍ਤਰੇਤਿ ਦਨ੍ਤਵਿਵਰੇ, ਦਨ੍ਤਮਜ੍ਝੇ ਵਾ. ਕਲਨ੍ਦਕਦਨ੍ਤੋ ਵਿਯਾਤਿ ਕਾਲ਼ਕਾਨਂ ਦਨ੍ਤੋ ਵਿਯ.

ਮਹਾਹਨੁਕੋਤਿ ਮਹਨ੍ਤੋ ਹਨੁ ਏਤਸ੍ਸਾਤਿ ਮਹਾਹਨੁਕੋ. ਚਿਪਿਟਹਨੁਕੋਤਿ ਅਨੁਨ੍ਨਤਹਨੁਕੋ. ਨਿਮ੍ਮਸ੍ਸੁਦਾਠਿਕੋਤਿ ਨਤ੍ਥਿ ਮਸ੍ਸੁ ਚ ਦਾਠਿ ਚ ਏਤਸ੍ਸਾਤਿ ਨਿਮ੍ਮਸ੍ਸੁਦਾਠਿਕੋ. ਭਟ੍ਠਅਂਸਕੂਟੋਤਿ ਭਟ੍ਠੋ ਪਤਿਤੋ ਅਂਸਕੂਟੋ ਇਮਸ੍ਸਾਤਿ ਭਟ੍ਠਅਂਸਕੂਟੋ. ਗੋਧਾਗਤ੍ਤੋਤਿ ਗੋਧਾਯ ਗਤ੍ਤਂ ਵਿਯ ਗਤ੍ਤਂ ਇਮਸ੍ਸਾਤਿ ਗੋਧਾਗਤ੍ਤੋ. ਸਬ੍ਬਂਪੇਤਨ੍ਤਿ ਸਬ੍ਬਮ੍ਪਿ ਏਤਂ ‘‘ਕਚ੍ਛੁਗਤ੍ਤੋ’’ਤਿਆਦਿਵਚਨਂ. ਏਤ੍ਥਾਤਿ ‘‘ਕਚ੍ਛੁਗਤ੍ਤੋ’’ਤਿਆਦਿਵਚਨੇ. ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ.

ਭਟ੍ਠਕਟਿਕੋਤਿ ਭਟ੍ਠਾ ਪਨ੍ਨਾ ਕਟਿ ਏਤਸ੍ਸਾਤਿ ਭਟ੍ਠਕਟਿਕੋ. ਅਚ੍ਚੁਗ੍ਗਤੇਹਿ ਆਨਿਸਦਮਂਸੇਹੀਤਿ ਸਮ੍ਬਨ੍ਧੋ. ਵਾਤਣ੍ਡਿਕੋਤਿ ਵਾਤੇਨ ਪੂਰਿਤੋ ਅਣ੍ਡਕੋਸੋ ਏਤਸ੍ਸਾਤਿ ਵਾਤਣ੍ਡਿਕੋ. ਸਙ੍ਘਟ੍ਟਨਜਾਣੁਕੋਤਿ ਅਨ੍ਤੋ ਨਤਤ੍ਤਾ ਅਞ੍ਞਮਞ੍ਞਂ ਸਙ੍ਘਟ੍ਟਨਂ ਜਾਣੁ ਏਤਸ੍ਸਾਤਿ ਸਙ੍ਘਟ੍ਟਨਜਾਣੁਕੋ. ਵਿਕਟੋਤਿ ਤਿਰਿਯਗਮਨਪਾਦੋ. ਉਪਡ੍ਢਪਿਣ੍ਡਿਕਸ੍ਸ ਅਤ੍ਥਂ ਸਹ ਭੇਦੇਨ ਦਸ੍ਸੇਨ੍ਤੋ ਆਹ ‘‘ਸੋ ਦੁਵਿਧੋ’’ਤਿਆਦਿ. ਤਤ੍ਥ ਦੁਵਿਧੋ ਸੋ ਉਪਡ੍ਢਪਿਣ੍ਡਿਕੋ ਸਮਨ੍ਨਾਗਤੋਤਿ ਯੋਜਨਾ. ਅਥ ਵਾ ਸੋ ਉਪਡ੍ਢਪਿਣ੍ਡਿਕੋ ਹੇਟ੍ਠਾ ਓਰੂਲ਼੍ਹਾਹਿ ਮਹਨ੍ਤੀਹਿ ਜਙ੍ਘਪਿਣ੍ਡਿਕਾਹਿ ਸਮਨ੍ਨਾਗਤੋ ਵਾ ਉਪਰਿ ਆਰੂਲ਼੍ਹਾਹਿ ਮਹਨ੍ਤੀਹਿ ਜਙ੍ਘਪਿਣ੍ਡਿਕਾਹਿ ਸਮਨ੍ਨਾਗਤੋ ਵਾਤਿ ਦੁਵਿਧੋਤਿ ਯੋਜਨਾ. ਪਿਟ੍ਠਿਕਪਾਦੋਤਿ ਪਿਟ੍ਠਿਯਂ ਉਟ੍ਠਿਤੋ ਪਾਦੋ ਏਤਸ੍ਸਾਤਿ ਪਿਟ੍ਠਿਕਪਾਦੋ. ਗਣ੍ਡਿਕਙ੍ਗੁਲਿ ਵਾਤਿ ਗਣ੍ਡੇਨ ਉਟ੍ਠਿਤੋ ਅਙ੍ਗੁਲਿ ਏਤਸ੍ਸਾਤਿ ਗਣ੍ਡਿਕਙ੍ਗੁਲਿ. ਸਬ੍ਬੋਪੇਸਾਤਿ ਏਸ ਸਬ੍ਬੋਪਿ ਜਨੋ. ਪਰਿਸਂ ਦੂਸੇਤੀਤਿ ਪਰਿਸਦੂਸਨੋ.

ਪੁਬ੍ਬਾਦੀਹੀਤਿਆਦਿਸਦ੍ਦੇਨ ਚਕ੍ਖੁਪਸਾਦਸ੍ਸ ਅਨ੍ਤਰਾਯਕਰਾਨਿ ਅਞ੍ਞਾਨਿਪਿ ਵਤ੍ਥੂਨਿ ਗਹੇਤਬ੍ਬਾਨਿ. ਦ੍ਵੀਹਿ ਵਾ ਅਕ੍ਖੀਹਿ, ਏਕੇਨ ਵਾ ਅਕ੍ਖਿਨਾਤਿ ਯੋਜਨਾ. ਉਭਯਮ੍ਪੀਤਿ ਦ੍ਵਿਨ੍ਨਂ ਅਟ੍ਠਕਥਾਚਰਿਯਾਨਂ ਉਭਯਮ੍ਪਿ ਵਚਨਂ. ਪਾਲ਼ਿਯਂ ‘‘ਅਨ੍ਧਂ ਪਬ੍ਬਾਜੇਨ੍ਤੀ’’ਤਿ ਅਵਤ੍ਵਾ ‘‘ਕਾਣਂ ਪਬ੍ਬਾਜੇਨ੍ਤੀ’’ਤਿ ਵੁਤ੍ਤਤ੍ਤਾ ‘‘ਪਰਿਯਾਯੇਨਾ’’ਤਿ ਵੁਤ੍ਤਂ. ਮਹਾਅਟ੍ਠਕਥਾਯਞ੍ਹਿ ‘‘ਜਚ੍ਚਨ੍ਧੋ’’ਤਿ ਇਮਿਨਾ ਦ੍ਵੇਅਕ੍ਖਿਕਾਣਂ ਸਨ੍ਧਾਯ ਵੁਤ੍ਤਂ. ਕੁਣੀਤਿ ਕੁਣਨਂ ਸਂਕੋਚਨਂ ਕੁਣਂ, ਤਮੇਤਸ੍ਸਤ੍ਥੀਤਿ ਕੁਣੀ. ਖਞ੍ਜੋਤਿ ਖਞ੍ਜਤਿ ਗਤਿਵੇਕਲ੍ਲਭਾਵੇਨ ਪਵਤ੍ਤਤੀਤਿ ਖਞ੍ਜੋ. ਕੁਣ੍ਡਪਾਦਕੋਤਿ ਏਤ੍ਥ ਕੁਣ੍ਡੋਤਿ ਖਞ੍ਜਸ੍ਸੇਵ ਨਾਮਂ. ਖਞ੍ਜੋ ਹਿ ਕੁਡਤਿ ਗਮਨਂ ਪਟਿਹਨਤੀਤਿ ਕੁਣ੍ਡੋਤਿ ਵੁਚ੍ਚਤਿ. ਕਸ੍ਮਾ ਕੁਣ੍ਡਪਾਦਕੋ? ਕਸ੍ਮਾ ਪਿਟ੍ਠਿਪਾਦਮਜ੍ਝੇਨ ਚਙ੍ਕਮਨ੍ਤੋਤਿ ਆਹ ‘‘ਮਜ੍ਝੇ ਸਂਕੁਟਿਤਪਾਦਤ੍ਤਾ’’ਤਿ. ਇਮਿਨਾ ਹਿ ਕੁਣ੍ਡਪਾਦਸ੍ਸ ਚ ਪਿਟ੍ਠਿਪਾਦਮਜ੍ਝੇਨ ਚਙ੍ਕਮਨਸ੍ਸ ਚ ਹੇਤੁਂ ਦਸ੍ਸੇਤਿ. ਏਸੇਵ ਨਯੋ ਅਨਨ੍ਤਰਵਾਕ੍ਯੇਪਿ. ਸਬ੍ਬੋਪੇਸਾਤਿ ਏਸ ਸਬ੍ਬੋਪਿ ਜਨੋ.

ਪਕ੍ਖਹਤੋਤਿ ਏਤ੍ਥ ਏਕੋ ਪਕ੍ਖੋ ਹਤੋ ਵਿਨਾਸੋ ਏਤਸ੍ਸਾਤਿ ਪਕ੍ਖਹਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਏਕੋ ਹਤ੍ਥੋ ਵਾ’’ਤਿਆਦਿ. ‘‘ਪਕ੍ਖਪਾਤੋ’’ਤਿਪਿ ਪਾਠੋ, ਸੋ ਅਪਾਠੋਯੇਵ. ਪਕ੍ਖਸਦ੍ਦੋ ਹਿ ਕੋਟ੍ਠਾਸਵਾਚਕੋ, ਨ ਪਙ੍ਗੁਲਪਰਿਯਾਯੋ, ਪੀਠਸਬ੍ਬੀ ਵੁਚ੍ਚਤੀਤਿ ਪੀਠੇਨ ਸਬ੍ਬਤਿ ਗਚ੍ਛਤਿ ਸੀਲੇਨਾਤਿ ਪੀਠਸਬ੍ਬੀ ਵੁਚ੍ਚਤਿ. ‘‘ਜਿਣ੍ਣਭਾਵੇਨ ਦੁਬ੍ਬਲੋ’’ਤਿ ਇਮਿਨਾ ਜੀਰਣਂ ਜਰਾ, ਤਾਯ ਦੁਬ੍ਬਲੋ ਜਰਾਦੁਬ੍ਬਲੋਤਿ ਵਚਨਤ੍ਥਂ ਦਸ੍ਸੇਤਿ. ਬਲਵਾ ਹੋਤੀਤਿ ਆਗਨ੍ਤੁਕਰੋਗਾਨਮਭਾਵੇਨ ਬਲਵਾ ਹੋਤਿ, ‘‘ਵਚੀਭੇਦੋ ਨਪ੍ਪਵਤ੍ਤਤੀ’’ਤਿ ਇਮਿਨਾ ਮੁਖਮਤ੍ਤਮੇਵ ਗਚ੍ਛਤਿ ਪਵਤ੍ਤਤਿ, ਨ ਵਚੀਭੇਦੋ ਏਤ੍ਥ ਜਨੇਤਿ ਮੂਗੋਤਿ ਦਸ੍ਸੇਤਿ. ਯਸ੍ਸ ਵਚੀਭੇਦੋ ਨ ਪਵਤ੍ਤਤਿ, ਅਯਂ ਮੂਗੋ ਨਾਮਾਤਿ ਯੋਜਨਾ. ਮਮ੍ਮਨਨ੍ਤਿ ਖਲਿਤਵਚਨਂ. ਯੋ ਏਕਮੇਵ ਅਕ੍ਖਰਂ ਚਤੁਪਞ੍ਚਕ੍ਖਤ੍ਤੁਂ ਵਦਤਿ, ਤਸ੍ਸੇਤਮਧਿਵਚਨਂ.

ਬਧੀਰੋਤਿ ਸੁਤਿਹੀਨੋ. ਸੋ ਹਿ ਹਨਨਂ ਸੋਤਪਸਾਦਸ੍ਸ ਨਾਸਨਂ ਵਧੋ, ਤਂ ਈਰਤਿ ਗਚ੍ਛਤੀਤਿ ਬਧੀਰੋਤਿ ਵੁਚ੍ਚਤਿ. ਯੋ ਸਬ੍ਬੇਨ ਸਬ੍ਬਂ ਨ ਸੁਣਾਤਿ, ਅਯਂ ਬਧੀਰੋ ਨਾਮਾਤਿ ਯੋਜਨਾ. ਇਮਿਨਾ ਨਟ੍ਠਪਸਾਦਤਂ ਦਸ੍ਸੇਤਿ. ਉਭਯਦੋਸਵਸੇਨਾਤਿ ਉਪਲਕ੍ਖਣਵਸੇਨ ਵੁਤ੍ਤਂ ਅਨ੍ਧਮੂਗਬਧਿਰਪਬ੍ਬਾਜਨੇ ਤਿਦੋਸਵਸੇਨਪਿ ਵੁਤ੍ਤਤ੍ਤਾ. ਤੇਤਿ ਹਤ੍ਥਚ੍ਛਿਨ੍ਨਾਦਯੋ ਦ੍ਵਤ੍ਤਿਂਸਜਨੇ. ਓਸਾਰਣਂ ਅਪਤ੍ਤੋ ਪੁਗ੍ਗਲੋ ਅਤ੍ਥਿ, ਤਂ ਪੁਗ੍ਗਲਂ ਸਙ੍ਘੋ ਓਸਾਰੇਤਿ ਚੇਤਿ ਯੋਜਨਾ. ਓਸਾਰੇਤੀਤਿ ਸਙ੍ਘੇ ਪਵੇਸੇਤਿ.