੫੬. ਅਪਤ੍ਤਕਾਦਿਵਤ੍ਥੁਕਥਾ

੧੧੮. ਯੋ ਪਿਣ੍ਡੋ ਹਤ੍ਥੇਸੁ ਲਬ੍ਭਤੀਤਿ ਯੋਜਨਾ. ਤਦਤ੍ਥਾਯਾਤਿ ਤਸ੍ਸ ਪਿਣ੍ਡਸ੍ਸ ਅਤ੍ਥਾਯ. ਸੇਯ੍ਯਥਾਪਿ ਤਿਤ੍ਥਿਯਾਤਿ ਏਤ੍ਥ ਸੇਯ੍ਯਥਾਪਿਸਦ੍ਦੋ ਉਪਮਤ੍ਥੋ, ਤਿਤ੍ਥਿਯਸਦ੍ਦੋ ਆਜੀਵਕਨਾਮਕੇ ਤਿਤ੍ਥਿਯੇ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਯਥਾਪਿ ਆਜੀਵਕਨਾਮਕਾ ਤਿਤ੍ਥਿਯਾ’’ਤਿ. ਤਸ੍ਮਾ ਆਜੀਵਕਸਙ੍ਖਾਤੇ ਤਿਤ੍ਥਿਯੇ ਉਪਮਂ ਕਤ੍ਵਾ ਉਜ੍ਝਾਯਨ੍ਤੀਤਿ ਆਹ ‘‘ਸੂਪਬ੍ਯਞ੍ਜਨੇਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤੇਤਿ ਆਜੀਵਕਾ. ਕਮ੍ਮਂ ਪਨ ਨ ਕੁਪ੍ਪਤੀਤਿ ਪਤ੍ਤਚੀਵਰੇਸੁ ਅਸਨ੍ਤੇਸੁਪਿ ਕਮ੍ਮਵਾਚਾਯ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਪਰਿਕਿਤ੍ਤਿਤਤ੍ਤਾ ਕਮ੍ਮਂ ਨ ਕੁਪ੍ਪਤੀਤਿ ਅਧਿਪ੍ਪਾਯੋ.

ਯਾਚਿਤਕੇਨਾਤਿ ਏਤ੍ਥ ਯਾਚਿਤੋ ਹੁਤ੍ਵਾ ਗਹਿਤੋ ਯਾਚਿਤਕੋਤਿ ਦਸ੍ਸੇਨ੍ਤੋ ਆਹ ‘‘ਯਾਚਿਤ੍ਵਾ ਗਹਿਤੇਨਾ’’ਤਿ. ‘‘ਈਦਿਸੇਨ ਹੀ’’ਤਿਆਦਿਨਾ ਦੋਸਂ ਦਸ੍ਸੇਤਿ. ਤਸ੍ਮਾਤਿ ਯਸ੍ਮਾ ਆਪਤ੍ਤਿ ਹੋਤਿ, ਤਸ੍ਮਾ. ਤਸ੍ਸਾਤਿ ਉਪਸਮ੍ਪਦਾਪੇਕ੍ਖਸ੍ਸ. ਨਿਰਪੇਕ੍ਖੇਹਿ ਆਚਰਿਯੁਪਜ੍ਝਾਯਾਦੀਹੀਤਿ ਯੋਜਨਾ. ਨਿਸ੍ਸਜ੍ਜਿਤ੍ਵਾਤਿ ਬ੍ਰਹ੍ਮਦੇਯ੍ਯੇਨ ਨਿਸ੍ਸਜ੍ਜਿਤ੍ਵਾ. ਅਨਧਿਟ੍ਠਾਨੁਪਗਾਨਂ ਪਤ੍ਤਚੀਵਰਾਨਂ ਅਪਤ੍ਤਚੀਵਰਤ੍ਤਾ ਵੁਤ੍ਤਂ ‘‘ਅਧਿਟ੍ਠਾਨੁਪਗਂ ਪਤ੍ਤਚੀਵਰ’’ਨ੍ਤਿ. ਪਣ੍ਡੁਪਲਾਸਨ੍ਤਿ ਸਮਣੁਦ੍ਦੇਸਭਾਵਾਪੇਕ੍ਖਂ. ਸੋ ਹਿ ਰੂਲ਼੍ਹਿਵਸੇਨ ਪਣ੍ਡੁਪਲਾਸੋਤਿ ਵੁਚ੍ਚਤਿ. ਅਥ ਵਾ ਯਥਾ ਪਣ੍ਡੁਪਲਾਸੋ ਨ ਹਰਿਤੋ, ਨਾਪਿ ਸੁਕ੍ਖੋ ਹੋਤਿ, ਏਵਂ ਸੋਪਿ ਪਬ੍ਬਜਾਪੇਕ੍ਖੋ ਨ ਗਿਹੀ ਹੋਤਿ, ਨਾਪਿ ਸਾਮਣੇਰੋ, ਤਸ੍ਮਾ ਸਮਣੁਦ੍ਦੇਸਭਾਵਾਪੇਕ੍ਖੋ ‘‘ਪਣ੍ਡੁਪਲਾਸੋ’’ਤਿ ਵੁਚ੍ਚਤਿ.

ਵਸਨ੍ਤਸ੍ਸ ਪਣ੍ਡੁਪਲਾਸਸ੍ਸਾਤਿ ਸਮ੍ਬਨ੍ਧੋ. ਅਨਾਮਟ੍ਠਪਿਣ੍ਡਪਾਤਨ੍ਤਿ ਭਿਕ੍ਖੂਹਿ ਅਨਾਮਸਿਤਬ੍ਬਗ੍ਗਂ ਪਿਣ੍ਡਪਾਤਂ. ਸਾਮਣੇਰਭਾਗਸਮਕੋਤਿ ਸਾਮਣੇਰੇਹਿ ਲਦ੍ਧੇਨ ਭਾਗੇਨ ਸਮਂ ਪਵਤ੍ਤੋ. ਅਸ੍ਸਾਤਿ ਪਣ੍ਡੁਪਲਾਸਸ੍ਸ. ਸਾਮਣੇਰਸ੍ਸ ਸਬ੍ਬਂ ਪਟਿਜਗ੍ਗਨਕਮ੍ਮਂ ਕਾਤੁਂ ਵਟ੍ਟਤਿ ਵਿਯ, ਅਸ੍ਸ ਕਾਤੁਂ ਵਟ੍ਟਤੀਤਿ ਯੋਜਨਾ.