੫੫. ਅਨੁਪਜ੍ਝਾਯਕਾਦਿਵਤ੍ਥੁਕਥਾ

੧੧੭. ਤੇਨ ਖੋ ਪਨ ਸਮਯੇਨਾਤਿ ਏਤ੍ਥ ਤਸਦ੍ਦਸ੍ਸ ਅਨਿਯਮਨਿਦ੍ਦੇਸਭਾਵਂ ਦਸ੍ਸੇਨ੍ਤੋ ਆਹ ‘‘ਯੇਨ ਸਮਯੇਨਾ’’ਤਿ. ਸਿਕ੍ਖਾਪਦਂ ਅਪਞ੍ਞਤ੍ਤਂ ਹੋਤੀਤਿ ‘‘ਨ ਭਿਕ੍ਖਵੇ ਅਨੁਪਜ੍ਝਾਯਕੋ ਉਪਸਮ੍ਪਾਦੇਤਬ੍ਬੋ’’ਤਿ ਸਿਕ੍ਖਾਪਦਂ ਅਪਞ੍ਞਤ੍ਤਂ ਹੋਤਿ. ‘‘ਉਪਜ੍ਝਾਯਵਿਰਹਿਤ’’ਨ੍ਤਿ ਇਮਿਨਾ ਅਨੁਪਜ੍ਝਾਯਕਨ੍ਤਿ ਏਤ੍ਥ ਅਕਾਰਸ੍ਸ ਵਿਰਹਤ੍ਥਂ ਦਸ੍ਸੇਤਿ. ਉਪਜ੍ਝਾਯਵਿਰਹਿਤਂ ਉਪਸਮ੍ਪਦਾਪੇਕ੍ਖਨ੍ਤਿ ਸਮ੍ਬਨ੍ਧੋ. ‘‘ਏਵ’’ਨ੍ਤਿਆਦਿਨਾ ਦੋਸਂ ਦਸ੍ਸੇਤਿ. ਉਪਜ੍ਝਂ ਅਗਾਹਾਪੇਤ੍ਵਾਤਿ ‘‘ਉਪਜ੍ਝਾਯੋ ਮੇ ਭਨ੍ਤੇ ਹੋਹੀ’’ਤਿ (ਮਹਾਵ. ੬੫; ਮਹਾਵ. ਅਟ੍ਠ. ੬੪) ਉਪਜ੍ਝਂ ਅਗਾਹਾਪੇਤ੍ਵਾ. ਉਪਸਮ੍ਪਾਦੇਨ੍ਤਸ੍ਸ ਕਾਰਕਸਙ੍ਘਸ੍ਸਾਤਿ ਯੋਜਨਾ. ਕਮ੍ਮਂ ਪਨਾਤਿ ਉਪਸਮ੍ਪਦਕਮ੍ਮਂ ਪਨ. ‘‘ਏਸੇਵ ਨਯੋ’’ਤਿ ਇਮਿਨਾ ਉਪਸਮ੍ਪਾਦੇਨ੍ਤਸ੍ਸ ਆਪਤ੍ਤਿ, ਕਮ੍ਮਂ ਪਨ ਨ ਕੁਪ੍ਪਤੀਤਿ ਵਚਨਂ ਅਤਿਦਿਸਤਿ.