੫੪. ਉਭਤੋਬ੍ਯਞ੍ਜਨਕਵਤ੍ਥੁਕਥਾ

੧੧੬. ਉਭਤੋਬ੍ਯਞ੍ਜਨਕੋਤਿ ਏਤ੍ਥ ਬਾਹਿਰਤ੍ਥਸਮਾਸਂ ਦਸ੍ਸੇਨ੍ਤੋ ਆਹ ‘‘ਇਤ੍ਥਿਨਿਮਿਤ੍ਤੁਪ੍ਪਾਦਨਕਮ੍ਮਤੋ ਚਾ’’ਤਿਆਦਿ. ਤਤ੍ਥ ‘‘ਇਤ੍ਥਿ…ਪੇ… ਕਮ੍ਮਤੋ ਚਾ’’ਤਿ ਇਮਿਨਾ ਉਭਯਸਰੂਪਂ ਦਸ੍ਸੇਤਿ. ਉਭਤੋ ਕਮ੍ਮਤੋ ਪਵਤ੍ਤਨ੍ਤਿ ਪਾਠਸੇਸੋ ਯੋਜੇਤਬ੍ਬੋ. ਬ੍ਯਞ੍ਜਨਨ੍ਤਿ ਨਿਮਿਤ੍ਤਂ. ਅਸ੍ਸਾਤਿ ਜਨਸ੍ਸ. ਕਰੋਤਿਪਿ ਕਾਰੇਤਿਪੀਤਿ ਏਤ੍ਥ ਕਰਧਾਤੁਯਾ ਸੁਦ੍ਧਕਮ੍ਮਕਾਰਿਤਕਮ੍ਮਾਨਿ ਦਸ੍ਸੇਨ੍ਤੋ ਆਹ ‘‘ਪੁਰਿਸਨਿਮਿਤ੍ਤੇਨਾ’’ਤਿਆਦਿ. ਤਤ੍ਥ ‘‘ਵੀਤਿਕ੍ਕਮ’’ਨ੍ਤਿ ਇਮਿਨਾ ਸੁਦ੍ਧਕਮ੍ਮਂ ਦਸ੍ਸੇਤਿ, ‘‘ਪਰ’’ਨ੍ਤਿ ਇਮਿਨਾ ਕਾਰਿਤਕਮ੍ਮਂ ਦਸ੍ਸੇਤਿ. ਸਮਾਦਪੇਤ੍ਵਾਤਿ ਉਯ੍ਯੋਜੇਤ੍ਵਾ. ਤਸ੍ਸ ਦੁਵਿਧਭਾਵਂ ਦਸ੍ਸੇਨ੍ਤੋ ਆਹ ‘‘ਦੁਵਿਧੋ’’ਤਿਆਦਿ. ਤਤ੍ਥ ਇਤ੍ਥਿਭਾਵੇਨ ਲਕ੍ਖਿਤੋ ਉਭਤੋਬ੍ਯਞ੍ਜਨਕੋ ਇਤ੍ਥਿਉਭਤੋਬ੍ਯਞ੍ਜਨਕੋ. ਏਸ ਨਯੋ ਇਤਰਤ੍ਥਾਪਿ.

ਤਤ੍ਥਾਤਿ ਦੁਵਿਧੇਸੁ ਉਭਤੋਬ੍ਯਞ੍ਜਨਕੇਸੁ. ਇਤ੍ਥਿਨਿਮਿਤ੍ਤਨ੍ਤਿ ਇਤ੍ਥਿਯਾ ਅਙ੍ਗਜਾਤਂ. ਏਸੇਵ ਨਯੋ ‘‘ਪੁਰਿਸਨਿਮਿਤ੍ਤ’’ਨ੍ਤਿ ਏਤ੍ਥਾਪਿ. ਪਾਕਟਂ ਪਟਿਚ੍ਛਨ੍ਨਨ੍ਤਿ ਸਭਾਵਤੋ ਪਾਕਟਂ ਪਟਿਚ੍ਛਨ੍ਨਂ. ਪੁਨ ਪਟਿਚ੍ਛਨ੍ਨਂ ਪਾਕਟਨ੍ਤਿ ਰਾਗਵਸੇਨ ਪਟਿਚ੍ਛਨ੍ਨਂ ਪਾਕਟਂ. ਪਰਂ ਗਣ੍ਹਾਪੇਤੀਤਿ ਪਰਮੇਵ ਗਣ੍ਹਾਪੇਤੀਤਿ ਅਤ੍ਥੋ. ਇਦਨ੍ਤਿ ਕਾਰਣਂ. ਏਤੇਸਨ੍ਤਿ ਦ੍ਵਿਨ੍ਨਂ ਉਭਤੋਬ੍ਯਞ੍ਜਨਕਾਨਂ. ਕੁਰੁਨ੍ਦਿਯਂ ਪਨ ਵੁਤ੍ਤਂ, ਕਿਂ ਵੁਤ੍ਤਨ੍ਤਿ ਯੋਜਨਾ. ਤਤ੍ਥਾਤਿ ਉਭਤੋਬ੍ਯਞ੍ਜਨਕੇ. ਵਿਚਾਰਣਕ੍ਕਮੋਤਿ ਵੀਮਂਸਨਾਨੁਕ੍ਕਮੋ. ‘‘ਤਤ੍ਥ ਵਿਚਾਰਕ੍ਕਮੋ’’ਤਿਪਿ ਪਾਠੋ. ਵਿਚਾਰਣਕ੍ਕਮੋ ਧਮ੍ਮਸਙ੍ਗਹਟ੍ਠਕਥਾਯ ਵੇਦਿਤਬ੍ਬੋ, ਇਧ ਪਨ ਕਿਂ ਵੇਦਿਤਬ੍ਬਨ੍ਤਿ ਆਹ ‘‘ਇਦਮਿਧ ਵੇਦਿਤਬ੍ਬ’’ਨ੍ਤਿ. ਤਤ੍ਥ ਇਦਨ੍ਤਿ ਨਪਬ੍ਬਜ੍ਜੂਪਸਮ੍ਪਦਕਾਰਣਂ. ਇਧਾਤਿ ਇਮਿਸ੍ਸਂ ਵਿਨਯਟ੍ਠਕਥਾਯਂ.