੪੮. ਤਿਤ੍ਥਿਯਪਕ੍ਕਨ੍ਤਕਕਥਾ

੧੧੦. ਪਕ੍ਕਮਤੀਤਿ ਪਕ੍ਕਨ੍ਤੋ, ‘‘ਪਵਿਟ੍ਠੋ’’ਤਿ ਇਮਿਨਾ ਕਮੁਧਾਤੁਯਾ ਪਦਵਿਕ੍ਖੇਪਤ੍ਥਂ ਦਸ੍ਸੇਤਿ, ਇਚ੍ਛਾਕਨ੍ਤਿਅਤ੍ਥੇ ਨਿਵਤ੍ਤੇਤਿ. ਸੋਤਿ ਤਿਤ੍ਥਿਯਪਕ੍ਕਨ੍ਤਕੋ. ਤਤ੍ਰਾਤਿ ਤਿਤ੍ਥਿਯਪਕ੍ਕਨ੍ਤਕੇ. ਉਪਸਮ੍ਪਨ੍ਨੋ ਭਿਕ੍ਖੁ ਗਚ੍ਛਤੀਤਿ ਸਮ੍ਬਨ੍ਧੋ. ਤੇਸਨ੍ਤਿ ਤਿਤ੍ਥਿਯਾਨਂ. ‘‘ਤਿਤ੍ਥਿਯੋ ਭਵਿਸ੍ਸਾਮੀ’’ਤਿ ਪੁਬ੍ਬੇਵ ਲਦ੍ਧਿਗਹਿਤਤ੍ਤਾ ਵੁਤ੍ਤਂ ‘‘ਲਿਙ੍ਗੇ ਆਦਿਨ੍ਨਮਤ੍ਤੇ’’ਤਿ. ਕੁਸਚੀਰਾਦੀਨੀਤਿ ਏਤ੍ਥ ਕੁਸੋ ਵੁਚ੍ਚਤਿ ਸਲਾਕਾ. ਚੀਰੋਤਿ ਪਨ੍ਤਿ, ਆਵਲੀਤਿ ਅਤ੍ਥੋ. ਕੁਸੇ ਰਜ੍ਜੁਨਾ ਆਵੁਨਿਤ੍ਵਾ ਕਤੋ ਚੀਰੋ ਕੁਸਚੀਰੋ, ਸੋ ਆਦਿ ਯੇਸਂ ਤਾਨੀਤਿ ਕੁਸਚੀਰਾਦੀਨਿ. ਆਦਿਸਦ੍ਦੇਨ ਫਲਕਚੀਰਾਦਯੋ ਸਙ੍ਗਣ੍ਹਾਤਿ. ਕੁਸਤਿਣੇਹਿ ਕਤੋ ਚੀਰੋ ਕੁਸਚੀਰੋਤਿਪਿ ਵਦਨ੍ਤਿ. ਨਗ੍ਗੋਤਿ ਅਚੇਲਕੋ. ਆਜੀਵਕੋਤਿ ਅਚੇਲਕਵਤਮਾਦਾਯ ਜੀਵਤੀਤਿ ਆਜੀਵਕੋ. ਤੇਸਨ੍ਤਿ ਆਜੀਵਕਾਨਂ. ਓਵਦਿਤੋ ਹੁਤ੍ਵਾਤਿ ਸਮ੍ਬਨ੍ਧੋ.

ਕਿਨ੍ਤਿ ਕਿਂ ਵਤਂ. ਲੁਞ੍ਚਾਪੇਤੀਤਿ ਅਪਨਯਾਪੇਤਿ. ਮੋਰਪਿਞ੍ਛਾਦੀਨੀਤਿ ਏਤ੍ਥ ਪਿਞ੍ਛਂ ਵੁਚ੍ਚਤਿ ਪਕ੍ਖੋ. ਸੋ ਹਿ ਪਿਞ੍ਛਤਿ ਆਕਾਸੇ ਗਚ੍ਛਤਿ ਅਨੇਨਾਤਿ ਪਿਞ੍ਛਨ੍ਤਿ ਵੁਚ੍ਚਤਿ. ਪਿਛਿ ਗਤਿਯਨ੍ਤਿ ਧਾਤੁਪਾਠੋ. ਮੋਰਸ੍ਸ ਪਿਞ੍ਛਂ ਮੋਰਪਿਞ੍ਛਂ, ਤਂ ਆਦਿ ਯੇਸਂ ਤਾਨੀਤਿ ਮੋਰਪਿਞ੍ਛਾਦੀਨਿ. ਆਦਿਸਦ੍ਦੇਨ ਉਲੂਕਪਿਞ੍ਛਾਦਯੋ ਸਙ੍ਗਣ੍ਹਾਤਿ. ਯਾਵ ਨ ਸਮ੍ਪਟਿਚ੍ਛਤੀਤਿ ਯਾਵ ਲਦ੍ਧਿਂ ਨ ਸਮ੍ਪਟਿਚ੍ਛਤਿ. ਨਨ੍ਤਿ ਵੀਮਂਸਮਾਨਂ ਭਿਕ੍ਖੁਂ. ਲਦ੍ਧੀਤਿ ਤਿਤ੍ਥਿਯਲਦ੍ਧਿ. ਰਕ੍ਖਤੀਤਿ ਤਿਤ੍ਥਿਯਪਕ੍ਕਨ੍ਤਕਤੋ ਰਕ੍ਖਤਿ. ਲਦ੍ਧਿਯਾ ਅਭਾਵੇਨ ਤਿਤ੍ਥਿਯਪਕ੍ਕਨ੍ਤਕੋ ਨ ਹੋਤੀਤਿ ਅਧਿਪ੍ਪਾਯੋ. ਅਚ੍ਛਿਦ੍ਦਚੀਵਰੋਤਿ ਏਤ੍ਥ ਆਕਾਰੋ ਕੋਧਤ੍ਥੋ, ਅਡ੍ਡਤ੍ਥੋ ਵਾ ਹੋਤਿ, ਛਿਦ੍ਦਸਦ੍ਦੋ ਦੂਸਨਤ੍ਥੋ ਹੋਤਿ. ਤਸ੍ਮਾ ਆਕੋਧੇਨ ਅਡ੍ਡੇਨ ਵਾ ਛਿਦ੍ਦੋ ਦੂਸਿਤੋਤਿ ਅਚ੍ਛਿਦ੍ਦੋਤਿ ਅਤ੍ਥੋ ਦਟ੍ਠਬ੍ਬੋ. ‘‘ਅਚ੍ਛਿਨ੍ਨੋ’’ਤਿਪਿ ਪਾਠੋ. ਅਚ੍ਛਿਦ੍ਦਂ ਚੀਵਰਮੇਤਸ੍ਸਾਤਿ ਅਚ੍ਛਿਦ੍ਦਚੀਵਰੋ. ਤਿਤ੍ਥਾਯਤਨਨ੍ਤਿ ਤਿਤ੍ਥੀਨਂ ਨਿਵਾਸਟ੍ਠਾਨਂ, ਤਿਤ੍ਥਿਯਾਨਂ ਉਪਸ੍ਸਯਨ੍ਤਿ ਅਤ੍ਥੋ.