੪੯. ਤਿਰਚ੍ਛਾਨਗਤਵਤ੍ਥੁ

੧੧੧. ਦੇਵਸਮ੍ਪਤ੍ਤਿਸਦਿਸਂ ਇਸ੍ਸਰਿਯਸਮ੍ਪਤ੍ਤਿਂ ਅਨੁਭਵਨ੍ਤੋਪਿ ਸੋ ਨਾਗੋ ਕਸ੍ਮਾ ਨਾਗਯੋਨਿਯਾ ਅਟ੍ਟੀਯਤੀਤਿ ਆਹ ‘‘ਕਿਞ੍ਚਾਪੀ’’ਤਿਆਦਿ.

ਤਤ੍ਥ ਕਿਞ੍ਚਾਪਿ ਅਨੁਭੋਤੀਤਿ ਸਮ੍ਬਨ੍ਧੋ. ਕਿਞ੍ਚਾਪਿਸਦ੍ਦੋ ਹੇਤ੍ਥ ਸਮ੍ਭਾਵਨਾਜੋਤਕੋ, ਪਨਸਦ੍ਦੋ ਗਰਹਤ੍ਥਜੋਤਕੋ. ਕੁਸਲਵਿਪਾਕੇਨਾਤਿ ਅਹੇਤੁਕਕੁਸਲਵਿਪਾਕੇਨ. ਤਸ੍ਸਾਤਿ ਨਾਗਸ੍ਸ. ਸਜਾਤਿਯਾਤਿ ਸਮਾਨਜਾਤਿਯਾ ਨਾਗਿਯਾ. ਉਦਕਸਞ੍ਚਾਰਿਮਣ੍ਡੂਕਭਕ੍ਖਨ੍ਤਿ ਉਦਕੇ ਸਞ੍ਚਰਣਸੀਲਂ ਮਣ੍ਡੂਕਸਙ੍ਖਾਤਂ ਭਕ੍ਖਂ ਪਾਤੁਭਵਤੀਤਿ ਯੋਜਨਾ. ਸੋਤਿ ਨਾਗੋ. ਅਟ੍ਟੀਯਤੀਤਿ ਅਰਮਣਂ ਪੀਲ਼ਿਯਤਿ. ਹਰਾਯਤੀਤਿ ਏਤ੍ਥ ਹਰੇਧਾਤੁ ਲਜ੍ਜਨਤ੍ਥੋਤਿ ਆਹ ‘‘ਲਜ੍ਜਤੀ’’ਤਿ. ਏਕਾਰਨ੍ਤੋ ਧਾਤੁ ਭੂਵਾਦਿਗਣਿਕੋ (ਸਦ੍ਦਨੀਤਿਧਾਤੁਮਾਲਾਯਂ ੧੬ ਰਕਾਰਨ੍ਤਧਾਤੁ). ਜਿਗੁਚ੍ਛਤੀਤਿ ਏਤ੍ਥ ਗੁਪਧਾਤੁਯਾ ਕਮ੍ਮਂ ਦਸ੍ਸੇਨ੍ਤੋ ਆਹ ‘‘ਅਤ੍ਤਭਾਵ’’ਨ੍ਤਿ. ‘‘ਤਸ੍ਸ ਭਿਕ੍ਖੁਨੋ’’ਤਿਪਦਸ੍ਸ ‘‘ਨਿਕ੍ਖਨ੍ਤੇ’’ਤਿਪਦੇਨ ਯੋਜਿਤਬ੍ਬਤ੍ਤਾ ਭੁਮ੍ਮਤ੍ਥੇ ਸਾਮਿਵਚਨਨ੍ਤਿ ਆਹ ‘‘ਤਸ੍ਮਿਂ ਭਿਕ੍ਖੁਸ੍ਮਿ’’ਨ੍ਤਿ. ਅਥ ਵਾ ਤਸ੍ਸ ਭਿਕ੍ਖੁਨੋਤਿ ਸਾਮਿਯੋਗਤ੍ਤਾ ‘‘ਨਿਕ੍ਖਨ੍ਤੇ’’ਤਿ ਏਤ੍ਥ ਭਾਵਤ੍ਥੇ ਮਾਨਪਚ੍ਚਯੋਤਿ ਆਹ ‘‘ਨਿਕ੍ਖਮਨੇ’’ਤਿ. ਇਮਿਨਾ ਨਿਕ੍ਖਨ੍ਤੇਤਿ ਏਤ੍ਥ ਨ ਅਨ੍ਤਪਚ੍ਚਯੋ, ਮਾਨਪਚ੍ਚਯਸ੍ਸੇਵ ਅਨ੍ਤਭਾਵਂ ਕਤ੍ਵਾ ਵੁਤ੍ਤੋਤਿ ਦਸ੍ਸੇਤਿ. ਵਿਸ੍ਸਟ੍ਠੋਤਿ ਸਤਿਵਿਸ੍ਸਜ੍ਜਿਤੋ. ਤਸ੍ਮਿਨ੍ਤਿ ਭਿਕ੍ਖੁਮ੍ਹਿ. ਕਪਿਮਿਦ੍ਧਵਸੇਨੇਵਾਤਿ ਕਪਿਨੋ ਮਿਦ੍ਧਵਸੇਨ ਏਵ. ਅਥ ਵਾ ਕਪਿਮਿਦ੍ਧਵਸੇਨ ਨਿਦ੍ਦਾਯਨ੍ਤੋ ਇਵ ਨਿਦ੍ਦਾਯਨ੍ਤੋਤਿ ਯੋਜਨਾ. ਪਟਿਨਿਪਜ੍ਜੀਤਿ ਪੁਨ ਨਿਪਜ੍ਜਿ. ਵਿਸ੍ਸਰਮਕਾਸੀਤਿ ਏਤ੍ਥ ਵਿਸਦ੍ਦੋ ਵਿਰੂਪਤ੍ਥਜੋਤਕੋ, ਸਰਸਦ੍ਦੋ ਸਦ੍ਦਵਾਚਕੋਤਿ ਦਸ੍ਸੇਨ੍ਤੋ ਆਹ ‘‘ਵਿਰੂਪਂ ਮਹਾਸਦ੍ਦਮਕਾਸੀ’’ਤਿ.

‘‘ਅਕਾਰਸ੍ਸ ਲੋਪਂ ਕਤ੍ਵਾ’’ਤਿ ਇਮਿਨਾ ਤੁਮ੍ਹੇ ਖੋਤ੍ਥਾਤਿ ਏਤ੍ਥ ‘‘ਤੁਮ੍ਹੇ ਖੋ ਅਤ੍ਥਾ’’ਤਿ ਪਦਵਿਭਾਗਂ ਕਤ੍ਵਾ ਓਕਾਰਤੋ ਪਰਸ੍ਸ ਅਕਾਰਸ੍ਸ ਲੋਪਂ ਦਸ੍ਸੇਤਿ. ‘‘ਅਕਾਰਸ੍ਸਾਲੋਪ’’ਨ੍ਤਿਪਿ ਪਾਠੋ. ਏਵਞ੍ਹਿ ਸਤਿ ਅਕਾਰਸ੍ਸ ਅਲੋਪਂ ਕਤ੍ਵਾਤਿ ਅਤ੍ਥੋ ਦਟ੍ਠਬ੍ਬੋ. ਇਮਿਨਾ ‘‘ਤੁਮ੍ਹੇ ਖੋ ਅਤ੍ਥਾ’’ਤਿ ਪਦਚ੍ਛੇਦਂ ਕਤ੍ਵਾ ਅਕਾਰੇ ਪਰੇ ਓਕਾਰਸ੍ਸ ਵਕਾਰਂ ਕਤ੍ਵਾ ਤੁਮ੍ਹੇ ਖ੍ਵਤ੍ਥਾ’’ਤਿ ਪਾਠੋ ਦਸ੍ਸਿਤੋ. ਕਸ੍ਮਾ ਇਮਸ੍ਮਿਂ ਧਮ੍ਮਵਿਨਯੇ ਅਵਿਰੂਲ਼੍ਹਿਧਮ੍ਮਾਤਿ ਆਹ ‘‘ਝਾਨ…ਪੇ… ਅਭਬ੍ਬਤ੍ਤਾ’’ਤਿ. ‘‘ਭਵਥਾ’’ਤਿ ਇਮਿਨਾ ਅਤ੍ਥਾਤਿ ਏਤ੍ਥ ਅਸਧਾਤੁ ਸਤ੍ਤਤ੍ਥਵਾਚਕੋ ਥਵਿਭਤ੍ਤੀਤਿ ਦਸ੍ਸੇਤਿ. ਸਜਾਤਿਯਾਤਿ ਏਤ੍ਥ ਸਮਾਨਾ ਜਾਤਿ ਏਤਿਸ੍ਸਾਤਿ ਸਜਾਤੀਤਿ ਵੁਤ੍ਤੇ ਨਾਗੀ ਏਵਾਤਿ ਆਹ ‘‘ਨਾਗਿਯਾ ਏਵਾ’’ਤਿ. ਮਨੁਸ੍ਸਿਤ੍ਥਿਆਦੀਤਿ ਏਤ੍ਥ ਆਦਿਸਦ੍ਦੇਨ ਤਿਰਚ੍ਛਾਨਗਤਿਤ੍ਥੀਪੇਤਿਤ੍ਥੀਦੇਵਿਤ੍ਥਿਯੋ ਸਙ੍ਗਣ੍ਹਾਤਿ. ‘‘ਦ੍ਵੇਮੇ ਭਿਕ੍ਖਵੇ ਪਚ੍ਚਯਾ’’ਤਿ ਦੇਸਨਾ ਸਾਵਸੇਸਦੇਸਨਾਤਿ ਦਸ੍ਸੇਨ੍ਤੋ ਆਹ ‘‘ਏਤ੍ਥ ਚਾ’’ਤਿ. ਏਤ੍ਥਾਤਿ ਤਿਰਚ੍ਛਾਨਗਤਵਤ੍ਥੁਮ੍ਹਿ. ਅਭਿਣ੍ਹਨ੍ਤਿ ਅਭਿਕ੍ਖਣਂ ਪੁਨਪ੍ਪੁਨਨ੍ਤਿ ਅਤ੍ਥੋ.

ਤਿਰਚ੍ਛਾਨਗਤੋਤਿ ਏਤ੍ਥ ਕਿਂ ਅਪਾਯਪਰਿਯਾਪਨ੍ਨੋ ਦੁਗ੍ਗਤਿਅਹੇਤੁਕਪਟਿਸਨ੍ਧਿਕੋਵਾਧਿਪ੍ਪੇਤੋਤਿ ਆਹ ‘‘ਨਾਗੋ ਵਾ ਹੋਤੂ’’ਤਿਆਦਿ.