੪੮. ਥੇਯ੍ਯਸਂਵਾਸਕਵਤ੍ਥੁਕਥਾ

੧੧੦. ਪਾਰਿਜਞ੍ਞਪਤ੍ਤਸ੍ਸਾਤਿ ਪਰਿਹਾਯਤੀਤਿ ਪਰਿਜਾਨਿ, ਇਸ੍ਸਰਿਯਭੋਗਾਦਿ, ਤਸ੍ਸ ਭਾਵੋ ਪਾਰਿਜਞ੍ਞਂ, ਇਸ੍ਸਰਿਯਭੋਗਾਦਿਕ੍ਖਯੋ, ਤਂ ਪਤ੍ਤੋਤਿ ਪਾਰਿਜਞ੍ਞਪਤ੍ਤੋ, ਤਸ੍ਸ. ‘‘ਪਾਰਿਜੁਞ੍ਞਪਤ੍ਤਸ੍ਸਾ’’ਤਿਪਿ ਉਕਾਰੇਨ ਸਹ ਪਾਠੋ ਅਤ੍ਥਿ. ਖੀਣਕੋਲਞ੍ਞੋਤਿ ਏਤ੍ਥ ਕੁਲੇ ਜਾਤਾ ਕੋਲਞ੍ਞਾ, ਣ੍ਯਪਚ੍ਚਯੋ, ਨਕਾਰਾਗਮੋ. ਖੀਣਾ ਕੋਲਞ੍ਞਾ ਅਸ੍ਸਾਤਿ ਖੀਣਕੋਲਞ੍ਞੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਮਾਤਿਪਕ੍ਖਪਿਤਿਪਕ੍ਖਤੋ’’ਤਿਆਦਿ. ਤਤ੍ਥ ਮਾਤਿਪਕ੍ਖਪਿਤਿਪਕ੍ਖਤੋਤਿ ਮਾਤੁਯਾ ਪਕ੍ਖੋ ਮਾਤਿਪਕ੍ਖੋ, ਪਿਤੁਨੋ ਪਕ੍ਖੋ ਪਿਤਿਪਕ੍ਖੋ, ਮਾਤਿਪਕ੍ਖੋ ਚ ਪਿਤਿਪਕ੍ਖੋ ਚ ਮਾਤਿਪਕ੍ਖਪਿਤਿਪਕ੍ਖਾ. ਫਾਤਿਂ ਕਾਤੁਨ੍ਤਿ ਏਤ੍ਥ ਫਾ-ਧਾਤੁ ਵਡ੍ਢਨਤ੍ਥੋਤਿ ਆਹ ‘‘ਵਡ੍ਢੇਤੁ’’ਨ੍ਤਿ. ‘‘ਪੁਚ੍ਛਿਯਮਾਨੋ’’ਤਿ ਇਮਿਨਾ ਅਨੁਯੁਞ੍ਜਿਯਮਾਨੋਤਿ ਏਤ੍ਥ ਅਨੁਤ੍ਯੂਪਸਗ੍ਗਵਸੇਨ ਯੁਜਸਦ੍ਦੋ ਪੁਚ੍ਛਨਤ੍ਥੋਤਿ ਦਸ੍ਸੇਤਿ.

ਥੇਯ੍ਯਸਂਵਾਸਕੋਤਿ ਥੇਨਨਂ ਥੇਯ੍ਯਂ ਨਕਾਰਸ੍ਸ ਯਕਾਰਂ ਕਤ੍ਵਾ, ਥੇਯ੍ਯਾਯ ਸਂਵਾਸਕੋ ਇਮਸ੍ਸਾਤਿ ਥੇਯ੍ਯਸਂਵਾਸਕੋ. ਏਤ੍ਥ ਚ ਨ ਕੇਵਲਂ ਵਸ੍ਸਗਣਨਾਦਿਕੋਯੇਵ ਸਂਵਾਸੋ ਨਾਮ ਹੋਤਿ, ਅਥ ਖੋ ਥੇਯ੍ਯਾਯ ਲਿਙ੍ਗਗਹਣਮ੍ਪਿ ਸਂਵਾਸੋਯੇਵ ਨਾਮ. ਤਸ੍ਮਾ ਤਸ੍ਸ ਤਿਵਿਧਭਾਵਂ ਦਸ੍ਸੇਨ੍ਤੋ ਆਹ ‘‘ਤਯੋ’’ਤਿਆਦਿ. ਤਤ੍ਥ ਲਿਙ੍ਗਂ ਥੇਨੇਤੀਤਿ ਲਿਙ੍ਗਥੇਨਕੋ, ਏਸੇਵ ਨਯੋ ਇਤਰੇਸੁਪਿ. ਤਮਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਯੋਤਿ ਥੇਯ੍ਯਸਂਵਾਸਕੋ. ਲਿਙ੍ਗਮਤ੍ਤਸ੍ਸੇਵਾਤਿ ਏਤ੍ਥ ਮਤ੍ਤਸਦ੍ਦੇਨ ਸਂਵਾਸਾਦਯੋ ਨਿਵਤ੍ਤੇਤਿ.

ਵਿਦੇਸਨ੍ਤਿ ਅਤ੍ਤਨੋ ਦੇਸਤੋ ਵਿਯੋਗਂ ਦੇਸਂ. ਵਿਸਦ੍ਦੋ ਹੇਤ੍ਥ ਵਿਯੋਗਤ੍ਥਵਾਚਕੋ. ਅਥ ਵਾ ਵਿ ਦੂਰਂ ਦੇਸਂ. ਵਿਸਦ੍ਦੋ ਹੇਤ੍ਥ ਦੂਰਤ੍ਥਵਾਚਕੋ. ਮੁਸਾਤਿ ਅਭੂਤਤ੍ਥੇ ਦੁਤਿਯਨ੍ਤਨਿਪਾਤੋ, ਅਭੂਤਂ ਵਚਨਨ੍ਤਿ ਅਤ੍ਥੋ. ਪਟਿਬਾਹਤੀਤਿ ਅਞ੍ਞੇ ਨਿਵਾਰੇਤਿ. ਸਂਵਾਸਥੇਨਕੋ ਨਾਮਾਤਿ ਏਤ੍ਥ ਕੋ ਸਂਵਾਸੋ ਨਾਮ, ਨਨੁ ਏਕਕਮ੍ਮਾਦਿਕੋਤਿ ਆਹ ‘‘ਭਿਕ੍ਖੁਵਸ੍ਸਗਣਨਾਦਿਕੋ’’ਤਿਆਦਿ. ਭਿਕ੍ਖੁਵਸ੍ਸਗਣਨਾਦਿਕੋਤਿ ਆਦਿਸਦ੍ਦੇਨ ਯਥਾਵੁਡ੍ਢਂ ਵਨ੍ਦਨਸਾਦਿਯਨਂ ਆਸਨਪਟਿਬਾਹਨਂ ਉਪੋਸਥਪਵਾਰਣਾਦੀਸੁ ਸਨ੍ਦਿਸ੍ਸਨਨ੍ਤਿ ਇਮਾਨਿ ਸਙ੍ਗਣ੍ਹਾਤਿ. ‘‘ਕਿਰਿਯਭੇਦੋ’’ਤਿ ਇਮਿਨਾ ਸਂ ਏਕਤੋ ਵਸਿਯਤਿ ਅਨੇਨਾਤਿ ਸਂਵਾਸੋਤਿ ਵਚਨਤ੍ਥੇਨ ਕਿਰਿਯਭੇਦੋ ਸਂਵਾਸੋ ਨਾਮਾਤਿ ਦਸ੍ਸੇਤਿ. ਇਮਸ੍ਮਿਂ ਅਤ੍ਥੇਤਿ ਇਮਸ੍ਮਿਂ ਵਤ੍ਥੁਮ੍ਹਿ, ਇਮਸ੍ਮਿਂ ਠਾਨੇਤਿ ਅਤ੍ਥੋ. ਇਮਿਨਾ ਪਾਰਾਜਿਕਾਦਿਟ੍ਠਾਨੇ ਪਨ ਏਕਕਮ੍ਮਾਦਿਕੋ ਸਂਵਾਸੋ ਨਾਮਾਤਿ ਦਸ੍ਸੇਤਿ.

‘‘ਲਿਙ੍ਗਸ੍ਸ ਚੇਵ ਸਂਵਾਸਸ੍ਸ ਚਾ’’ਤਿ ਇਮਿਨਾ ਉਭਯਥੇਨਕੋਤਿ ਏਤ੍ਥ ਉਭਯਸਰੂਪਂ ਦਸ੍ਸੇਤਿ.

ਏਤ੍ਥਾਤਿ ਥੇਯ੍ਯਸਂਵਾਸਕਟ੍ਠਾਨੇ. ਰਾਜ…ਪੇ… ਭਯੇਹਿ ਵਾਤਿ ਏਤ੍ਥ ਭਯਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਰਾਜਭਯੇਨ ਚ ਦੁਬ੍ਭਿਕ੍ਖਭਯੇਨ ਚ ਕਨ੍ਤਾਰਭਯੇਨ ਚ ਰੋਗਭਯੇਨ ਚ ਵੇਰਿਭਯੇਨ ਚਾਤਿ ਹਿ ਅਤ੍ਥੋ. ਚੀਵਰਗਹਣਤ੍ਥਨ੍ਤਿ ਚੀਵਰਾਹਰਣਤ੍ਥਂ, ਅਯਮੇਵ ਵਾ ਪਾਠੋ. ਵਾਸਦ੍ਦੋ ਹੇਤ੍ਵਤ੍ਥਂ ਵਾ ਸਮ੍ਪਦਾਨਤ੍ਥਂ ਵਾ ਸਮ੍ਪਿਣ੍ਡੇਤਿ. ਅਯਂ ਗਾਥਾ ਵਿਭਤ੍ਤਿਯਾ ਉਪ੍ਪਟਿਪਾਟਿਤ੍ਤਾ ਭਗ੍ਗਰੀਤਿਸਙ੍ਖਾਤਾ ਅਲਙ੍ਕਾਰਦੋਸਾ ਨ ਮੁਤ੍ਤਾ. ਲਿਙ੍ਗਨ੍ਤਿ ਸਮਣਲਿਙ੍ਗਂ. ਇਧਾਤਿ ਇਮਸ੍ਮਿਂ ਸਾਸਨੇ.

ਨਾਧਿਵਾਸੇਤੀਤਿ ਨ ਸਮ੍ਪਟਿਚ੍ਛਤਿ. ਯਾਵਾਤਿ ਯਤ੍ਤਕਂ ਕਾਲਂ, ਅਯਂ ਪਨੇਤ੍ਥ ਯੋਜਨਾ – ਇਧ ਯੋ ਰਾਜ…ਪੇ… ਭਯੇਨ ਵਾ ਚੀਵਰਗਹਣਤ੍ਥਂ ਵਾ ਲਿਙ੍ਗਂ ਆਦਿਯਤਿ, ਸੋ ਸੁਦ੍ਧਮਾਨਸੋ ਹੁਤ੍ਵਾ ਯਾਵ ਸਂਵਾਸਂ ਨਾਧਿਵਾਸੇਤਿ, ਤਾਵ ਏਸੋ ‘‘ਥੇਯ੍ਯਸਂਵਾਸਕੋ ਨਾਮਾ’’ਤਿ ਨ ਵੁਚ੍ਚਤੀਤਿ.

ਤਤ੍ਰਾਤਿ ਤਾਸੁ ਗਾਥਾਸੁ. ਇਧਾਤਿ ਇਮਸ੍ਮਿਂ ਸਾਸਨੇ. ਏਵਨ੍ਤਿ ਲਿਙ੍ਗੇ ਗਹਿਯਮਾਨੇ. ਤਸ੍ਮਿਨ੍ਤਿ ਜਨੇ. ਅਨੋਸਰਿਤ੍ਵਾਵਾਤਿ ਅਨੋਕ੍ਕਮਿਤ੍ਵਾਵ. ਲਿਙ੍ਗਂ ਅਪਨੇਤ੍ਵਾਤਿ ਸਯਂ ਗਹਿਤਂ ਸਮਣਲਿਙ੍ਗਂ ਵਿਨਾਸੇਤ੍ਵਾ. ਪਬ੍ਬਜਿਤਾਲਯਨ੍ਤਿ ਪਬ੍ਬਜਿਤਛਾਯਂ. ਪੁਬ੍ਬੇਤਿ ਸਂਵਾਸਥੇਨਕੇ.

ਸਬ੍ਬਪਾਸਣ੍ਡਿਯਭਤ੍ਤਾਨੀਤਿ ਸਬ੍ਬਾਨਿ ਪਾਸਣ੍ਡਂ ਉਦ੍ਦਿਸ੍ਸ ਦਿਨ੍ਨਾਨਿ ਭਤ੍ਤਾਨਿ.

ਸਤ੍ਤੇ ਵਹਤੀਤਿ ਸਤ੍ਤਵਾਹੋ. ਵਿਰਮਿਤਬ੍ਬਨ੍ਤਿ ਵੇਰਂ, ਤਂ ਪਵਤ੍ਤੇਤੀਤਿ ਵੇਰਿਕੋ. ਕਾਯੇਨ ਪਰਿਹਰਿਤਬ੍ਬਾਨੀਤਿ ਕਾਯਪਰਿਹਾਰਿਯਾਨਿ. ਤਨ੍ਤਿ ਤੁਵਂ. ਹੀਨਾਯਾਵਤ੍ਤਭਾਵਨ੍ਤਿ ਹੀਨਾਯ ਗਿਹਿਭਾਵਾਯ ਆਵਤ੍ਤਭਾਵਂ.

ਉਪ੍ਪਬ੍ਬਜਿਤ੍ਵਾਤਿ ਪਬ੍ਬਜਵਿਯੋਗਂ ਕਤ੍ਵਾ. ਤਮਤ੍ਥਨ੍ਤਿ ਉਪ੍ਪਬ੍ਬਜਿਤਸਙ੍ਖਾਤਮਤ੍ਥਂ. ਅਸ੍ਸਾਤਿ ਮਹਾਸਾਮਣੇਰਸ੍ਸ.

ਮਹਨ੍ਤੋ ਵਾਤਿ ਏਤ੍ਥ ਵਾਸਦ੍ਦੋ ਗਰਹਤ੍ਥੋ. ਪਗੇਵ ਦਹਰੋਤਿ ਦਸ੍ਸੇਤਿ. ਅਬ੍ਯਤ੍ਤੋ ਹੋਤੀਤਿ ਯੋਜਨਾ. ਸੋਤਿ ਸਾਮਣੇਰੋ.

ਵਚ੍ਛਗੋਰਕ੍ਖਾਦੀਨੀਤਿ ਏਤ੍ਥ ਵਚ੍ਛੋਤਿ ਤਰੁਣਗੋਣੋ. ਸੋ ਹਿ ਮਾਤੁਸਨ੍ਤਿਕੇ ਵਸਤੀਤਿ ਵਚ੍ਛੋ. ਮਾਤੁਯਾ ਵਿਯੋਗਕਾਲੇ ਵਾ ਵਸ੍ਸਤੀਤਿ ਵਚ੍ਛੋਤਿ ਵੁਚ੍ਚਤਿ. ਇਮਿਨਾ ਦਮ੍ਮਗਵਜਰਗ੍ਗਵਾਪਿ ਸਾਮਞ੍ਞਤੋ ਗਹਿਤਾ. ਗੋ ਵੁਚ੍ਚਤਿ ਖੇਤ੍ਤਭੂਮਿ. ਵਚ੍ਛੋ ਚ ਗੋ ਚ ਵਚ੍ਛਗਵਾ, ਤੇਸਂ ਰਕ੍ਖਨਂ ਵਚ੍ਛਗੋਰਕ੍ਖੋ, ਸੋ ਆਦਿ ਯੇਸਂ ਕਸਿਕਮ੍ਮਾਦੀਨਨ੍ਤਿ ਵਚ੍ਛਗੋਰਕ੍ਖਾਦੀਨਿ. ‘‘ਸੂਪਸਮ੍ਪਨ੍ਨੋ’’ਤਿ ਇਮਿਨਾ ਗਹਟ੍ਠਮ੍ਪਿ ਸਚੇ ਉਪਸਮ੍ਪਾਦੇਤਿ, ਸੂਪਸਮ੍ਪਨ੍ਨੋਤਿ ਦਸ੍ਸੇਤਿ. ਅਨੁਪਸਮ੍ਪਨ੍ਨਕਾਲੇਯੇਵਾਤਿ ਸਾਮਣੇਰਕਾਲੇਯੇਵ. ਵਿਨਯਵਿਨਿਚ੍ਛਯੇਤਿ ਵਿਨਯੇ ਵੁਤ੍ਤਸ੍ਸ ਥੇਯ੍ਯਸਂਵਾਸਕਸ੍ਸ ਵਿਨਿਚ੍ਛਯੇ. ਥੇਯ੍ਯਸਂਵਾਸਕੋ ਹੋਤਿ ਲਿਙ੍ਗਸ੍ਸ ਅਪਨੀਤਤ੍ਤਾ.

ਥੇਯ੍ਯਸਂਵਾਸਕੋ ਨ ਹੋਤਿ ਸਲਿਙ੍ਗੇ ਠਿਤਤ੍ਤਾ. ਅਯਮ੍ਪਿ ਥੇਯ੍ਯਸਂਵਾਸਕੋ ਨ ਹੋਤਿ ਕਾਸਾਯੇ ਸਉਸ੍ਸਾਹਤ੍ਤਾ. ਥੇਯ੍ਯਸਂਵਾਸਕੋ ਹੋਤਿ ਕਾਸਾਯੇ ਧੁਰਸ੍ਸ ਨਿਕ੍ਖਿਤ੍ਤਤ੍ਤਾ.

ਥੇਯ੍ਯਸਂਵਾਸਕੋ ਨ ਹੋਤਿ ਸਲਿਙ੍ਗੇ ਠਿਤਤ੍ਤਾ. ਨੇਵ ਥੇਯ੍ਯਸਂਵਾਸਕੋ ਹੋਤਿ ਕਾਸਾਯੇ ਸਉਸ੍ਸਾਹਤ੍ਤਾ. ਮੇਥੁਨਸੇਵਨਾਦੀਹੀਤਿਆਦਿਸਦ੍ਦੇਨ ਪਾਣਾਤਿਪਾਤਾਦਯੋ ਸਙ੍ਗਣ੍ਹਾਤਿ. ਥੇਯ੍ਯਸਂਵਾਸਕੋ ਹੋਤਿ ਕਾਸਾਯੇ ਧੁਰਸ੍ਸ ਨਿਕ੍ਖਿਤ੍ਤਤ੍ਤਾ. ਓਵਟ੍ਟਿਕਨ੍ਤਿ ਅਧੋਵਟ੍ਟੇਨ ਕਰਣਂ. ਰਕ੍ਖਤਿ ਤਾਵਾਤਿ ਤਾਵ ਰਕ੍ਖਤਿ ਵੀਮਂਸਨੇਨ ਨਿਵਾਸਿਤਤ੍ਤਾ. ਲਿਙ੍ਗਨ੍ਤਿ ਸਮਣਲਿਙ੍ਗਂ. ਥੇਯ੍ਯਸਂਵਾਸਕੋ ਹੋਤਿ ਗਿਹਿਲਿਙ੍ਗਸ੍ਸ ਸਮ੍ਪਟਿਚ੍ਛਿਤਤ੍ਤਾ.

ਵੀਮਂਸਤਿ ਵਾ ਸਮ੍ਪਟਿਚ੍ਛਤਿ ਵਾ ਰਕ੍ਖਤਿਯੇਵ ਓਦਾਤਵਤ੍ਥਸ੍ਸ ਅਨ੍ਤੋਕਾਸਾਯਭਾਵਤੋ. ‘‘ਭਿਕ੍ਖੁਨਿਯਾਪਿ ਏਸੇਵ ਨਯੋ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਨ੍ਤੋ ਆਹ ‘‘ਸਾਪੀ’’ਤਿਆਦਿ.

ਵੁਡ੍ਢਪਬ੍ਬਜਿਤੋ ਸਾਮਣੇਰੋਤਿ ਸਮ੍ਬਨ੍ਧੋ. ਪਾਲ਼ਿਯਮ੍ਪੀਤਿ ਪਨ੍ਤਿਯਮ੍ਪਿ. ਸੇਨੋ ਮਂਸਪੇਸਿਂ ਗਹੇਤ੍ਵਾ ਗਚ੍ਛਤਿ ਵਿਯ ਭਤ੍ਤਪਿਣ੍ਡੇ ਪਤ੍ਤਂ ਉਪਨਾਮੇਤ੍ਵਾ ਗਹੇਤ੍ਵਾ ਗਚ੍ਛਤਿ. ਥੇਯ੍ਯਸਂਵਾਸਕੋ ਨ ਹੋਤਿ ਵਸ੍ਸਾਨਂ ਅਗਣਨਤ੍ਤਾ.