੪੭. ਪਣ੍ਡਕਵਤ੍ਥੁਕਥਾ

੧੦੯. ਦਹਰਤਰੁਣਸਦ੍ਦਾਨਂ ਵੇਵਚਨਤ੍ਤਾ ਵੁਤ੍ਤਂ ‘‘ਦਹਰੇ…ਪੇ… ਤਰੁਣੇ’’ਤਿ. ਮੋਲ਼ਿਗਲ੍ਲਸਦ੍ਦੋ ਥੂਲਸਰੀਰਵਾਚਕੋ ਅਨਿਪ੍ਫਨ੍ਨਪਾਟਿਪਦਿਕੋਤਿ ਆਹ ‘‘ਮੋਲ਼ਿਗਲ੍ਲੇਤਿ ਥੂਲਸਰੀਰੇ’’ਤਿ. ਹਤ੍ਥਿਭਣ੍ਡੇਤਿ ਏਤ੍ਥ ਹਤ੍ਥਿਸਙ੍ਖਾਤਂ ਭਣ੍ਡਂ ਏਤੇਸਨ੍ਤਿ ਹਤ੍ਥਿਭਣ੍ਡਾਤਿ ਵੁਤ੍ਤੇ ਹਤ੍ਥਿਗੋਪਕਾਤਿ ਆਹ ‘‘ਹਤ੍ਥਿਗੋਪਕੇ’’ਤਿ. ਅਭਿਧਾਨੇ (ਅਭਿਧਾਨਪ੍ਪਦੀਪਿਕਾਯਂ ੩੬੭ ਗਾਥਾਯਂ) ਪਨ ‘‘ਹਤ੍ਥਿਮੇਣ੍ਡੋ’’ਤਿ ਪਾਠੋ ਅਤ੍ਥਿ.

ਪਣ੍ਡਕੋਤਿ ਪਡਤਿ ਵਿਕਲਭਾਵਂ ਗਚ੍ਛਤੀਤਿ ਪਣ੍ਡਕੋ. ਸਂਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰੇਨ ਦਸ੍ਸੇਨ੍ਤੋ ਆਹ ‘‘ਤਤ੍ਥਾ’’ਤਿਆਦਿ. ਤਤ੍ਥ ਯਸ੍ਸਾਤਿ ਪਣ੍ਡਕਸ੍ਸ. ਅਸੁਚਿਨਾਤਿ ਸਮ੍ਭਵੇਨ. ਆਸਿਤ੍ਤਸ੍ਸਾਤਿ ਆਸਿਞ੍ਚਿਤਬ੍ਬਸ੍ਸ. ਇਮਿਨਾ ਅਸੁਚਿਨਾ ਮੁਖੇ ਆਸਿਞ੍ਚਿਤਬ੍ਬੋਤਿ ਆਸਿਤ੍ਤੋਤਿ ਵਚਨਤ੍ਥਂ ਦਸ੍ਸੇਤਿ. ਅਯਨ੍ਤਿ ਪਣ੍ਡਕੋ. ਅਜ੍ਝਾਚਾਰਨ੍ਤਿ ਮੇਥੁਨਜ੍ਝਾਚਾਰਂ. ‘‘ਉਸੂਯਾਯ ਉਪ੍ਪਨ੍ਨਾਯਾ’’ਤਿਇਮਿਨਾ ਉਸੂਯਤੀਤਿ ਉਸੂਯੋਤਿ ਵਚਨਤ੍ਥਂ ਦਸ੍ਸੇਤਿ. ਉਪਕ੍ਕਮੇਨਾਤਿ ਵਾਯਾਮੇਨ. ਬੀਜਾਨੀਤਿ ਅਣ੍ਡਾਨਿ. ਇਮਿਨਾ ਉਪਕ੍ਕਮੇਨ ਏਤਸ੍ਮਾ ਬੀਜਾਨਿ ਅਪਨੀਤਾਨੀਤਿ ਓਪਕ੍ਕਮਿਕੋਤਿ ਵਚਨਤ੍ਥਂ ਦਸ੍ਸੇਤਿ. ਪਕ੍ਖੇ ਪਵਤ੍ਤੋ ਪਣ੍ਡਕੋ ਪਕ੍ਖਪਣ੍ਡਕੋ, ਪਕ੍ਖੇ ਪਰਿਲ਼ਾਹਵੂਪਸਮੋ ਪਣ੍ਡਕੋ ਪਕ੍ਖਪਣ੍ਡਕੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਏਕਚ੍ਚੋ ਪਨਾ’’ਤਿਆਦਿ. ਤਤ੍ਥ ਪੁਬ੍ਬਵਚਨਤ੍ਥੇ ਪਕ੍ਖੇਤਿ ਕਾਲਪਕ੍ਖੇਤਿ ਅਤ੍ਥੋ ਦਟ੍ਠਬ੍ਬੋ. ਪਚ੍ਛਿਮਵਚਨਤ੍ਥੇ ਪਕ੍ਖੇਤਿ ਜੁਣ੍ਹਪਕ੍ਖੇਤਿ ਅਤ੍ਥੋ ਦਟ੍ਠਬ੍ਬੋ. ‘‘ਅਕੁਸਲਵਿਪਾਕਾਨੁਭਾਵੇਨਾ’’ਤਿ ਪਦਂ ‘‘ਪਣ੍ਡਕੋ ਹੋਤੀ’’ਤਿਪਦੇਯੇਵ ਸਮ੍ਬਨ੍ਧਿਤਬ੍ਬਂ. ਅਸ੍ਸਾਤਿ ਪਣ੍ਡਕਸ੍ਸ. ਨਪੁਂਸਕਪਣ੍ਡਕੋਤਿ ਪੁਰਿਸੋ ਵਿਯ ਸਾਤਿਸਯਂ ਪਚ੍ਚਾਮਿਤ੍ਤੇ ਨ ਪੁਂਸਕੇਤਿ ਅਭਿਮਦ੍ਦਨਂ ਕਾਤੁਂ ਨ ਸਕ੍ਕੋਤੀਤਿ ਨਪੁਂਸਕੋ. ਨ ਪੁਮਾ ਨ ਇਤ੍ਥੀਤਿ ਨਪੁਂਸਕੋਤਿ ਕਤ੍ਵਾ ਨਪੁਮਨਇਤ੍ਥਿਸਦ੍ਦਸ੍ਸ ਨਿਰੁਤ੍ਤਿਨਯੇਨ ਨਪੁਂਸਕਕਰਣਮ੍ਪਿ ਵਦਨ੍ਤਿ. ਨਪੁਂਸਕੋਯੇਵ ਪਣ੍ਡਕੋ ਨਪੁਂਸਕਪਣ੍ਡਕੋ. ਤੇਸੂਤਿ ਪਞ੍ਚਸੁ ਪਣ੍ਡਕੇਸੁ. ਤੇਸੁਪੀਤਿ ਓਪਕ੍ਕਮਿਕਾਦੀਸੁ ਤੀਸੁਪਿ. ‘‘ਯਸ੍ਮਿਂ ਪਕ੍ਖੇ’’ਤਿ ਇਮਿਨਾ ਪਕ੍ਖੇ ਪਕ੍ਖੇ ਪਣ੍ਡਕਭਾਵਂ ਨਿਵਤ੍ਤੇਤਿ. ਅਸ੍ਸਾਤਿ ਪਣ੍ਡਕਸ੍ਸ. ਏਤ੍ਥਾਤਿ ਪਞ੍ਚਸੁ ਪਣ੍ਡਕੇਸੁ. ਸੋਪੀਤਿ ਪਣ੍ਡਕੋਪਿ. ਇਤੋਤਿ ਪਣ੍ਡਕਵਾਰਤੋ. ‘‘ਏਸੇਵ ਨਯੋ’’ਤਿ ਇਮਿਨਾ ਲਿਙ੍ਗਨਾਸਨਮੇਵ ਅਤਿਦਿਸਤਿ.