੪੩. ਅਨਾਪੁਚ੍ਛਾਵਰਣਵਤ੍ਥੁਆਦਿਕਥਾ

੧੦੮. ਉਪਜ੍ਝਾਯਂ ਅਨਾਪੁਚ੍ਛਾਤਿ ਏਤ੍ਥ ਉਪਜ੍ਝਾਯਂ ਅਨਾਪੁਚ੍ਛਿਤ੍ਵਾ. ਸਬ੍ਬਥਾ ਕਿਂ ਨ ਕਾਤਬ੍ਬਨ੍ਤਿ ਆਹ ‘‘ਤੁਮ੍ਹਾਕ’’ਨ੍ਤਿਆਦਿ. ਦਣ੍ਡਕਮ੍ਮਮਸ੍ਸਾਤਿ ਦਣ੍ਡਕਮ੍ਮਂ ਅਸ੍ਸ. ਅਸ੍ਸਾਤਿ ਸਾਮਣੇਰਸ੍ਸ. ਸਦ੍ਧਿਂ ਉਪਜ੍ਝਾਯੇਨ ਵਿਹਰਨ੍ਤੀਤਿ ਸਦ੍ਧਿਵਿਹਾਰਿਕਾ. ਨਿਸ੍ਸਯਾਚਰਿਯਾਦੀਨਂ ਅਨ੍ਤੇ ਸਮੀਪੇ ਵਸਨ੍ਤੀਤਿ ਅਨ੍ਤੇਵਾਸਿਕਾ, ਉਪਸਮ੍ਪਨ੍ਨਾਯੇਵ.

ਅਪਲਾਲ਼ੇਨ੍ਤੀਤਿ ਏਤ੍ਥ ਲਲ਼ ਉਪਸੇਵਾਯਨ੍ਤਿ ਧਾਤੁਪਾਠੇਸੁ ਵੁਤ੍ਤਤ੍ਤਾ (ਸਦ੍ਦਨੀਤਿਧਾਤੁਮਾਲਾਯਂ ੧੮ ਲ਼ਕਾਰਨ੍ਤਧਾਤੁ) ਥੇਰੇ ਲਲ਼ਤੋ ਉਪਸੇਵਤੋ ਅਪਗਮੇਨ੍ਤੀਤਿ ਅਤ੍ਥੋ ਦਟ੍ਠਬ੍ਬੋ. ਇਧ ਪਨ ਅਧਿਪ੍ਪਾਯਤ੍ਥਂ ਦਸ੍ਸੇਨ੍ਤੋ ਆਹ ‘‘ਤੁਮ੍ਹਾਕ’’ਨ੍ਤਿਆਦਿ. ਅਪਲਾਲ਼ੇਤਬ੍ਬਾਤਿ ਅਞ੍ਞਂ ਲਲ਼ਤੋ ਉਪਸੇਵਤੋ ਅਪਗਮੇਤਬ੍ਬਾ. ਪਰਿਸਭੂਤੇ ਸਾਮਣੇਰੂਪਸਮ੍ਪਨ੍ਨੇਤਿ ਯੋਜਨਾ. ਆਦੀਨਵਨ੍ਤਿ ਦੁਸ੍ਸੀਲਂ ਨਿਸ੍ਸਾਯ ਵਸਨਸ੍ਸ ਦੋਸਂ. ਨ੍ਹਾਯਿਤੁਂ ਆਗਤੇਨ ਤਯਾ ਗੂਥਮਕ੍ਖਨਂ ਕਤਂ ਵਿਯ ਦੁਸ੍ਸੀਲਂ ਨਿਸ੍ਸਾਯ ਵਿਹਰਨ੍ਤੇਨ ਦੁਸ੍ਸੀਲਂ ਕਤਨ੍ਤਿ ਯੋਜਨਾ. ‘‘ਦੁਸ੍ਸੀਲ’’ਨ੍ਤਿ ਪਦਂ ਪੁਰਿਮਪਚ੍ਛਿਮਪਦਾਪੇਕ੍ਖਂ, ਤਸ੍ਮਾ ਦ੍ਵਿਨ੍ਨਂ ਪਦਾਨਂ ਮਜ੍ਝੇ ਵੁਤ੍ਤਂ. ਤਤ੍ਥ ਪੁਰਿਮਪਦਾਪੇਕ੍ਖਕਾਲੇ ਵੁਤ੍ਤਕਮ੍ਮਂ, ਪਚ੍ਛਿਮਪਦਾਪੇਕ੍ਖਕਾਲੇ ਅਵੁਤ੍ਤਕਮ੍ਮਂ. ਸੋਤਿ ਸਾਮਣੇਰੂਪਸਮ੍ਪਨ੍ਨੋ. ਉਪਜ੍ਝਾਯਂ ਵਾਤਿ ਸਾਮਣੇਰਂ ਸਨ੍ਧਾਯ ਵੁਤ੍ਤਂ. ਨਿਸ੍ਸਯਂ ਵਾਤਿ ਉਪਸਮ੍ਪਨ੍ਨਂ ਸਨ੍ਧਾਯ ਵੁਤ੍ਤਂ.

ਤੀਸੁ ਨਾਸਨਾਸੂਤਿ ਸਂਵਾਸਲਿਙ੍ਗਦਣ੍ਡਕਮ੍ਮਨਾਸਨਸਙ੍ਖਾਤਾਸੁ ਤੀਸੁ ਨਾਸਨਾਸੁ. ਯੋਤਿ ਸਾਮਣੇਰੋ. ਨਾਨਾਆਪਤ੍ਤਿਯੋਤਿ ਪਾਰਾਜਿਕਥੁਲ੍ਲਚ੍ਚਯ ਪਾਚਿਤ੍ਤਿਯਾਪਤ੍ਤਿਯੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਕੁਨ੍ਥਕਿਪਿਲ੍ਲਿਕਮ੍ਪੀਤਿ ਏਤ੍ਥ ਪਾਣਖਾਦਕੇਹਿ ਸਤ੍ਤੇਹਿ ਕੁਥਿਯਤਿ ਹਿਂਸਿਯਤੀਤਿ ਕੁਨ੍ਥੋ, ਕੁਂ ਪਥਵਿਂ ਵਾ ਧਾਰੇਤੀਤਿ ਕੁਨ੍ਧੋ.

ਕਿਮਿਯੇਵ ਪਿਲ੍ਲਿਕਂ ਪੋਤਕਂ ਕਿਪਿਲ੍ਲਿਕਂ ਮਿਕਾਰਸ੍ਸ ਲੋਪਂ ਕਤ੍ਵਾ. ਪਿਲ੍ਲਿਕਸਦ੍ਦੋ ਹਿ ਪੋਤਕਪਰਿਯਾਯੋ. ਕਿਮੀਨਂ, ਕਿਮੀਸੁ ਵਾ ਪਿਲ੍ਲਿਕਂ ਕਿਪਿਲ੍ਲਿਕਂ. ਨਾਸੇਤਬ੍ਬਤਂਯੇਵਾਤਿ ਲਿਙ੍ਗੇਨ ਨਾਸੇਤਬ੍ਬਭਾਵਮੇਵ. ਤਾਵਦੇਵਾਤਿ ਤਸ੍ਮਿਂ ਮਾਰਣਭਿਨ੍ਦਨਕ੍ਖਣੇਯੇਵ. ਅਸ੍ਸਾਤਿ ਸਾਮਣੇਰਸ੍ਸ. ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਤੀਤਿ ਵਸ੍ਸਚ੍ਛੇਦੋ ਹੋਤੀਤਿ ਅਧਿਪ੍ਪਾਯੋ. ਆਕਿਣ੍ਣਦੋਸੋਵਾਤਿ ਲਿਙ੍ਗਨਾਸਨਦੋਸੇਨ ਚ ਦਣ੍ਡਕਮ੍ਮਨਾਸਨਦੋਸੇਨ ਚ ਆਕੁਲਦੋਸੋਵ. ਵਿਰਜ੍ਝਿਤ੍ਵਾਤਿ ਵਿਰਾਧੇਤ੍ਵਾ. ਯਥਾਨਿਵਤ੍ਥਪਾਰੁਤਸ੍ਸੇਵ ਸਾਮਣੇਰਸ੍ਸਾਤਿ ਸਮ੍ਬਨ੍ਧੋ. ਤਸ੍ਮਾਤਿ ਸਰਣਗਮਨਉਪਸਮ੍ਪਦਕਮ੍ਮਵਾਚਾਨਂ ਸਦਿਸਤ੍ਤਾ. ਭਿਕ੍ਖੁਨਾ ਸਮਾਦਿਨ੍ਨਂ ਵਿਯ ਇਮਿਨਾਪਿ ਸਮਾਦਿਨ੍ਨਾਨੇਵ ਹੋਨ੍ਤੀਤਿ ਯੋਜਨਾ. ਏਵਨ੍ਤਿ ਏਵਮਿਜ੍ਝਨੇ, ਸਮਾਦਿਨ੍ਨੇ ਵਾ. ਦਲ਼੍ਹੀਕਰਣਤ੍ਥਨ੍ਤਿ ਸਿਕ੍ਖਾਪਦਾਨਂ ਦਲ਼੍ਹੀਕਰਣਤ੍ਥਂ. ਪਤਿਟ੍ਠਾਪਨਤ੍ਥਨ੍ਤਿ ਸਾਮਣੇਰਸ੍ਸ ਪਤਿਟ੍ਠਾਪਨਤ੍ਥਂ. ਲਚ੍ਛਤੀਤਿ ਲਭਿਸ੍ਸਤਿ. ਸਙ੍ਘੇਨ ਦਾਤਬ੍ਬੋਤਿ ਸਮ੍ਬਨ੍ਧੋ. ਅਪਲੋਕੇਤ੍ਵਾਤਿ ਸਙ੍ਘਂ ਆਪੁਚ੍ਛਿਤ੍ਵਾ. ਇਮਿਨਾ ਛਿਨ੍ਨਵਸ੍ਸਕਂ ਦਸ੍ਸੇਤਿ.

ਅਦਿਨ੍ਨਾਦਾਨੇ ਤਿਣਸਲਾਕਮਤ੍ਤੇਨਾਪਿ ਵਤ੍ਥੁਨਾ ਅਸਮਣੋ ਹੋਤੀਤਿ ਯੋਜਨਾ. ਵਿਪ੍ਪਟਿਪਤ੍ਤਿਯਾਤਿ ਵਿਕਾਰੇਨ ਪਟਿਪਜ੍ਜਨਤੋ. ਭਣਿਤੇਤਿ ਭਣਨੇ. ਜਾਨਿਤ੍ਵਾਤਿ ਜਾਨਿਤ੍ਵਾ ਏਵ. ਏਵਕਾਰੋ ਹੇਤ੍ਥ ਅਜ੍ਝਾਹਰਿਤਬ੍ਬੋ, ਤੇਨ ਵੁਤ੍ਤਂ ‘‘ਨ ਅਜਾਨਿਤ੍ਵਾ’’ਤਿ. ਯਾਨਿ ਪਞ੍ਚ ਸਿਕ੍ਖਾਪਦਾਨੀਤਿ ਯੋਜਨਾ. ਅਸ੍ਸਾਤਿ ਸਾਮਣੇਰਸ੍ਸ. ਠਪਨਤ੍ਥਾਯਾਤਿ ਸਿਕ੍ਖਾਪਦਾਨਂ ਠਪਨਤ੍ਥਾਯ. ਅਯਨ੍ਤਿ ਪਾਰਾਜਿਕੋ. ਵਿਸੇਸੋਤਿ ਭਿਕ੍ਖੂਨਂ ਪਾਚਿਤ੍ਤਿਯਤੋ ਵਿਸੇਸੋ.

ਪਟਿਪਕ੍ਖਵਸੇਨਾਤਿ ‘‘ਅਨਰਹਂ ਅਸਮ੍ਮਾਸਮ੍ਬੁਦ੍ਧੋ’’ਤਿਆਦਿਨਾ ਚ ‘‘ਦ੍ਵਾਕ੍ਖਾਤੋ’’ਤਿਆਦਿਨਾ ਚ ‘‘ਦੁਪ੍ਪਟਿਪ੍ਪਨ੍ਨੋ’’ਤਿਆਦਿਨਾ ਚ ਪਟਿਵਿਰੁਦ੍ਧਵਸੇਨ ਗਰਹਨ੍ਤੋ ਸਾਮਣੇਰੋ ਨਿਵਾਰੇਤਬ੍ਬੋਤਿ ਸਮ੍ਬਨ੍ਧੋ. ਕਣ੍ਡਕਨਾਸਨਾਯਾਤਿ ਕਣ੍ਡਕਨਾਮਕਸ੍ਸ ਸਾਮਣੇਰਸ੍ਸ ਦਣ੍ਡਕਮ੍ਮਨਾਸਨਾਯ. ਤਂ ਲਦ੍ਧਿਨ੍ਤਿ ਅਵਣ੍ਣਭਾਸਨਦਿਟ੍ਠਿਂ. ਅਚ੍ਚਯਨ੍ਤਿ ਅਤਿਕ੍ਕਮਂ, ਦੋਸਂ ਵਾ. ਦੇਸਾਪੇਤਬ੍ਬੋਤਿ ‘‘ਅਚ੍ਚਯੋ ਮਂ ਭਨ੍ਤੇ ਅਚ੍ਚਗਮਾ’’ਤਿਆਦਿਨਾ ਦੇਸਾਪੇਤਬ੍ਬਾ. ਤਂ ਯੁਤ੍ਤਨ੍ਤਿ ‘‘ਲਿਙ੍ਗਨਾਸਨਾਯ ਨਾਸੇਤਬ੍ਬੋ’’ਤਿ ਤਂ ਵਚਨਂ ਪਤਿਰੂਪਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਇਧਾਤਿ ਖਨ੍ਧਕੇ, ‘‘ਸਾਮਣੇਰਂ ਨਾਸੇਤੁ’’ਨ੍ਤਿਵਚਨੇ ਵਾ.

‘‘ਏਸੇਵ ਨਯੋ’’ਤਿ ਵੁਤ੍ਤਵਚਨਂ ਪਾਕਟਂ ਕਰੋਨ੍ਤੋ ਆਹ ‘‘ਸਸ੍ਸਤੁਚ੍ਛੇਦਾਨਞ੍ਹੀ’’ਤਿਆਦਿ. ਅਞ੍ਞਤਰਦਿਟ੍ਠਿਕੋ ਸਾਮਣੇਰੋਤਿ ਯੋਜਨਾ. ਏਤ੍ਥਾਤਿ ਦਸਸੁ ਨਾਸਨਙ੍ਗੇਸੁ. ‘‘ਕਾਮ’’ਨ੍ਤਿਪਦੇਨ ਪੁਨਰੁਤ੍ਤਿਨਿਰਤ੍ਥਕਦੋਸਾਰੋਪਨੇਨ ਗਰਹਂ ਦਸ੍ਸੇਤਿ. ‘‘ਪਨਾ’’ਤਿਪਦੇਨ ਤੇਸਂ ਦੋਸਾਨਂ ਪਹਾਨੇਨ ਸਮ੍ਭਾਵਨਂ ਦਸ੍ਸੇਤਿ. ਅਬ੍ਰਹ੍ਮਚਾਰਿਂ ਸਾਮਣੇਰਨ੍ਤਿ ਸਮ੍ਬਨ੍ਧੋ. ਉਪਸਮ੍ਪਾਦੇਤੁਂ ਵਟ੍ਟਤੀਤਿ ਉਪਸਮ੍ਪਾਦਨਂ ਵਟ੍ਟਤਿ. ਭਿਕ੍ਖੁਨਿਦੂਸਕੋ ਸਾਮਣੇਰੋਤਿ ਸਮ੍ਬਨ੍ਧੋ. ਪਬ੍ਬਜ੍ਜਮ੍ਪੀਤਿ ਏਤ੍ਥ ਪਿਸਦ੍ਦਸ੍ਸ ਗਰਹਤ੍ਥਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪਗੇਵ ਉਪਸਮ੍ਪਦ’’ਨ੍ਤਿ. ਏਤਮਤ੍ਥਨ੍ਤਿ ਏਤਾਦਿਸਮਤ੍ਥਂ.