੪੨. ਸਿਕ੍ਖਾਪਦਦਣ੍ਡਕਮ੍ਮਵਤ੍ਥੁਕਥਾ

੧੦੬. ਨਾਸਨਵਤ੍ਥੂਤਿ ਲਿਙ੍ਗਨਾਸਨਾਯ ਅਧਿਟ੍ਠਾਨਂ, ਕਾਰਣਨ੍ਤਿ ਵੁਤ੍ਤਂ ਹੋਤਿ. ਪਚ੍ਛਿਮਾਨਂ ਪਞ੍ਚਨ੍ਨਨ੍ਤਿ ਯੋਜਨਾ. ਦਣ੍ਡਕਮ੍ਮਵਤ੍ਥੂਤਿ ਦਣ੍ਡਕਮ੍ਮਸ੍ਸ ਕਾਰਣਂ.

੧੦੭. ਅਪ੍ਪਤਿਸ੍ਸਾਤਿ ਏਤ੍ਥ ਭਿਕ੍ਖੂਨਂ ਵਚਨਸ੍ਸ ਪਟਿਮੁਖਂ ਆਦਰੇਨ ਅਸਵਨਂ ਭਿਕ੍ਖੂ ਜੇਟ੍ਠਕਟ੍ਠਾਨੇ ਨ ਠਪੇਨ੍ਤਿ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਭਿਕ੍ਖੂ ਜੇਟ੍ਠਕਟ੍ਠਾਨੇ’’ਤਿਆਦਿ. ‘‘ਸਮਾਨਜੀਵਿਕਾ’’ਤਿ ਇਮਿਨਾ ਅਸਭਾਗਵੁਤ੍ਤਿਕਾਤਿ ਏਤ੍ਥ ਸਭਾਗਸਦ੍ਦੋ ਸਮਾਨਸਦ੍ਦਪਰਿਯਾਯੋ, ਵੁਤ੍ਤਿਸਦ੍ਦੋ ਜੀਵਿਕਪਰਿਯਾਯੋਤਿ ਦਸ੍ਸੇਤਿ. ਪਰਿਸਕ੍ਕਤੀਤਿ ਏਤ੍ਥ ਸਕ੍ਕ ਗਤਿਯਨ੍ਤਿਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੬ ਲ਼ਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਪਰਿਪੁਬ੍ਬੋ ਸਕ੍ਕਸਦ੍ਦੋ ਗਤ੍ਯਤ੍ਥੋਤਿ ਆਹ ‘‘ਪਰਕ੍ਕਮਤੀ’’ਤਿ. ਕਿਨ੍ਤੀਤਿ ਕਿਮੇਵ. ਇਤਿਸਦ੍ਦੋ ਹੇਤ੍ਥ ਏਵਸਦ੍ਦਤ੍ਥੋ, ਕੇਨ ਏਵ ਉਪਾਯੇਨਾਤਿ ਹਿ ਅਤ੍ਥੋ. ਅਕ੍ਕੋਸਤਿ ਚੇਵਾਤਿ ਜਾਤਿਆਦੀਹਿ ਅਕ੍ਕੋਸਤਿ ਚੇਵ. ਭੇਦੇਤੀਤਿ ਭੇਦਾਪੇਤਿ. ਆਵਰਣਂ ਕਾਤੁਨ੍ਤਿ ਏਤ੍ਥ ਆਵਰਣਸਦ੍ਦੋ ਨਿਵਾਰਣਸਦ੍ਦਵੇਵਚਨੋਤਿ ਆਹ ‘‘ਨਿਵਾਰਣਂ ਕਾਤੁ’’ਨ੍ਤਿ. ਯਤ੍ਥਾਤਿ ਯਸ੍ਮਿਂ ਪਰਿਵੇਣੇ, ਸੇਨਾਸਨੇ ਵਾ. ਵਸ੍ਸਗ੍ਗੇਨਾਤਿ ਵਸ੍ਸਗਣਨਾਯ. (ਤਸ੍ਸਾਤਿ ਪਰਿਵੇਣਸੇਨਾਸਨਸ੍ਸ. ਉਪਚਾਰੇਤਿ ਆਸਨ੍ਨੇ). ਮੁਖਦ੍ਵਾਰਿਕਨ੍ਤਿ ਮੁਖਸਙ੍ਖਾਤੇਨ ਦ੍ਵਾਰੇਨ ਅਜ੍ਝੋਹਰਿਤਬ੍ਬਂ. ‘‘ਵਦਤੋਪੀ’’ਤਿ ਇਮਿਨਾ ਵਚੀਪਯੋਗੇਨ ਦੁਕ੍ਕਟਾਪਤ੍ਤਿਂ ਦਸ੍ਸੇਤਿ, ‘‘ਨਿਕ੍ਖਿਪਤੋਪੀ’’ਤਿ ਇਮਿਨਾ ਕਾਯਪਯੋਗੇਨ. ਅਨਾਚਾਰਸ੍ਸਾਤਿ ਦਣ੍ਡਕਮ੍ਮੇ ਅਨਾਚਾਰਸ੍ਸ. ਏਤ੍ਤਕੇ ਨਾਮ ਦਣ੍ਡਕਮ੍ਮੇਤਿ ਏਤ੍ਤਕੇ ਨਾਮ ਉਦਕਾਹਰਾਪਨਾਦਿਸਙ੍ਖਾਤੇ ਦਣ੍ਡਕਮ੍ਮੇ. ਇਦਨ੍ਤਿ ਯਾਗੁਭਤ੍ਤਾਦਿਂ. ਲਚ੍ਛਸੀਤਿ ਲਭਿਸ੍ਸਸਿ. ‘‘ਏਤ੍ਤਕੇ ਨਾਮ ਦਣ੍ਡਕਮ੍ਮੇ’’ਤਿ ਵੁਤ੍ਤਵਚਨਸ੍ਸ ਯੁਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਭਗਵਤਾ ਹੀ’’ਤਿਆਦਿ. ਦਣ੍ਡਕਮ੍ਮਨ੍ਤਿ ਦਣ੍ਡੇਨ੍ਤਿ ਦਮੇਨ੍ਤਿ ਏਤੇਨਾਤਿ ਦਣ੍ਡੋ, ਸੋਯੇਵ ਕਤ੍ਤਬ੍ਬਤ੍ਤਾ ਕਮ੍ਮਨ੍ਤਿ ਦਣ੍ਡਕਮ੍ਮਂ ਆਵਰਣਾਦਿ. ਅਪਰਾਧਾਨੁਰੂਪਨ੍ਤਿ ਵੀਤਿਕ੍ਕਮਸ੍ਸ ਅਪਰਾਧਸ੍ਸ ਅਨੁਰੂਪਂ. ਤਮ੍ਪੀਤਿ ਉਦਕਦਾਰੁਵਾਲਿਕਾਦਿਆਹਰਾਪਣਮ੍ਪਿ. ਤਞ੍ਚ ਖੋਤਿ ਤਞ੍ਚ ਕਰਣਂ. ਓਰਮਿਸ੍ਸਤੀਤਿ ਕਾਯੇਨ ਓਰਮਿਸ੍ਸਤਿ. ਵਿਰਮਿਸ੍ਸਤੀਤਿ ਵਾਚਾਯ ਵਿਰਮਿਸ੍ਸਤਿ. ਉਣ੍ਹਪਾਸਾਣੇ ਵਾਤਿਆਦੀਸੁ ਵਾਸਦ੍ਦੇਨ ਅਞ੍ਞਾਨਿਪਿ ਅਤ੍ਤਤਾਪਨਪਰਿਤਾਪਨਾਦੀਨਿ ਕਮ੍ਮਾਨਿ ਸਙ੍ਗਣ੍ਹਾਤਿ.